പിന്നാക്ക പരിഗണന പാലിച്ചുളള പ്രവര്‍ത്തനാസൂത്രണം ( ഓണ്‍ ലൈന്‍ ക്ലസ്റ്റര്‍)

അധ്യാപകരെല്ലാം ക്ലസ്റ്ററില്‍ പോയാലേ കാര്യങ്ങള്‍ ചര്‍ച്ച ചെയ്യാനാകൂ എന്നത് കലണ്ടറിലെ ശനിയാഴ്ചകളില്‍ നമ്മെ കുടുക്കിയിടുകയല്ലേ. വര്‍ഷത്തില്‍ അഞ്ച് ശനിക്കകള്‍ക്കപ്പുറം അക്കാദിക ചര്‍ച്ച പാടില്ലെന്നുണ്ടോ? വിദ്യാലയത്തില്‍ നെറ്റ് കണക്ഷനുണ്ടെങ്കില്‍ ഇത്തരം ഓണ്‍ലൈന്‍ ക്ലസ്റ്റര്‍ ആയിക്കൂടേ? ഒരു പ്രദേശത്തെ വിദ്യാലയങ്ങള്‍ ഇത് വായിച്ച് എസ് ആര്‍ ജിയില്‍ ചര്‍ച്ച ചെയ്ത് പ്രതികരണം കമന്റുബോക്സില്‍ പോസ്റ്റ് ചെയ്യുക. ചര്‍ച്ച നടത്തുക, വിപുലീകരിക്കുക, പ്രയോഗിക്കുക, തെളിവുകള്‍ പങ്കിടുക എന്നിങ്ങനെ? ഏതെങ്കിലും വിദ്യാലയത്തിനു ഈ സാധ്യത ചെയ്തു നോക്കാം. പ്രതികരിക്കൂ 
ടിപ് ആക്ടിവിറ്റി.

 

1. ഇതിന് അടിക്കുറിപ്പ് തയ്യാറാക്കാമോ? (വ്യക്തിഗതം. )
2. ഇതേ പ്രവര്‍ത്തനം പിന്നാക്ക പരിഗണനയോടെ എങ്ങനെ ക്ലാസില്‍ ആസൂത്രണം ചെയ്യും
3. വ്യക്തിഗതമായി കുറിക്കുക. ( കുറിച്ചെങ്കില്‍ അടുത്ത വരി വായിക്കാം)
4. ക്ലാസില്‍ പ്രതീക്ഷിക്കുന്ന പിന്നാക്കാവസ്ഥകള്‍ എന്തായിരിക്കുമെന്നു  ലിസ്റ്റ് ചെയ്യുുക ( പട്ടിക രണ്ടാം കോളവുമായി ഒത്തു നോക്കുക. നിങ്ങള്‍ ആലോചിച്ചതെല്ലാം ഉണ്ടോ? നിങ്ങളുടെ ക്ലാസിന് ഇത് ബാധകമാണോ?)
5. ഈ പിന്നാക്കാവസ്ഥ നേരത്തെ ആലോചിച്ചപ്പോള്‍ അഭിസംബോധന ചെയ്തിരുന്നുവോ? ) ചോദ്യം 2)
6. എങ്കില്‍ എങ്ങനെ അടിക്കുറിപ്പ് രചന പിന്നാക്ക പരിഗണനയോടെ നടത്തും? ചുവടെയുളള പട്ടികയിലെ മൂന്നാം കോളത്തിലെ ഏതെല്ലാം കാര്യങ്ങളോടും പ്രക്രിയയോടും നിങ്ങള്‍ യോജിക്കുന്നു?

അധ്യാപകര്‍ പറയാനിടയുളളത്	പ്രതീക്ഷിക്കുന്ന പിന്നാക്കാവസ്ഥ	പിന്നാക്ക പരിഗണനയോടെ മെച്ചപ്പെടുത്തി അവതരിപ്പിക്കുന്നത്
ചിത്രം കാണിക്കും വ്യക്തിഗതമായി എഴുതിക്കും ഗ്രൂപ്പില്‍ പങ്കിടും മെച്ചപ്പെടുത്തും ഗ്രൂപ്പുകളുടെ അവതരണം പൊതു ചര്‍ച്ച മെച്ചപ്പെടുത്തല്‍	1.അടിക്കുറിപ്പ് എന്താണ് എന്ന്. അറിയാത്തവര്‍ കാണും 2.അടിക്കുറിപ്പിന്റെ സവിശേഷതകള്‍ അറിയാത്തവരുണ്ടാകും 3.ആശയം ഉണ്ടെങ്കിലും എഴുതാത്തവരുണ്ടാകം 4.അപൂര്‍ണമായ വാക്യങ്ങളില്‍ എഴുതുന്നവര്‍ കാണും 5.എഴുതിയവയില്‍ തെറ്റ് സംഭവിക്കാം ( അക്ഷരം, കൂട്ടക്ഷരം, ചിഹ്നം) 6.അക്ഷരങ്ങള്‍ രൂപപരമായ വടിവ് പാലിക്കാതെ എഴുതുന്നവര്‍ കാണും ( വ,പ) 7.വാക്കുകളുടെ അകലം പാലിക്കാത്തവരും കാണും 8.വാക്യഘടനാപരമായ പ്രശ്നങ്ങളും പ്രതീക്ഷിക്കാം 9. ഇവയൊന്നമല്ലാത്ത തെറ്റുകളും കാണും പ്രതീക്ഷിക്കുന്ന മികവ് മനോഹരമായ അടിക്കുറിപ്പ് തയ്യാറാക്കിയവരുണ്ടാകും ( ആശയതലം) (ഭാഷാ തലം)	എല്ലാവരും ചിത്രം വരയ്കണം എന്തായിരിക്കാം ഈ പൂച്ചയ്ക് സംഭവിച്ചത്? ഈ രംഗത്തിനു പറ്റിയ അടിക്കുറിപ്പ് ആലോചിക്കണം. എഴുതണം എന്താണ് അടിക്കുറിപ്പ്? ഒന്നു രണ്ടുപേര്‍ പറയുന്നു. ക്രോഡീകരണം ചിത്രത്തില്‍ കാണുന്നത് അതേ പോലെ എഴുതലല്ല. അതിനെ പുതിയ രീതിയില്‍ വ്യാഖ്യാനിക്കലാണ്. പ്രത്യേക രീതിയില്‍ ആശയം പറയലാണ്. കൂടുതലാശയം കുറുക്കിപ്പറയലാണ് ശൈലികളോ പഴഞ്ചൊല്ലുകളോ കവിതകളോ ഉപയോഗിച്ചും എഴുതാം ( ഉദാഹരണങ്ങള്‍ പരിചയപ്പെടുത്തുന്നു, കാണിക്കുന്നു. ഒരുമയുണ്ടെങ്കില്‍ ഉലക്കമേലും കിടക്കാം. ഒരു സൈക്കിളില്‍ അഞ്ചുപേര്‍ യാത്ര ചെയ്യുന്നതിനെഴുതിയ അടിക്കുറിപ്പ്) അടിയില്‍ കുറിക്കുന്നതാണ് അടിക്കുറിപ്പ് അടിക്കുറിപ്പിന്റെ സവിശേഷതകള്‍ ബോര്‍ഡില്‍ രേഖപ്പെടുത്തുന്നു ചിത്രത്തിലെ അവസ്ഥയെ പുതിയരീതിയില്‍ വ്യാഖ്യാനിച്ചു എഴുതിയതിന് ചിത്രവുമായി പൊരുത്തമുണ്ട് ചുരുക്കി (ഒന്നോ രണ്ടോ വാക്കുകളിലോ ഒന്നോ രണ്ടോ വാക്യത്തിലോ )വ്യക്തമാക്കിയിട്ടുണ്ട് ആകര്‍ഷകമാണ് ( ചിത്രം, ആശയം, എഴുത്ത്ഭംഗി). തെറ്റില്ലാത്ത ഭാഷയിലെഴുതി. ................................ ചിത്രം വര അരപ്പേജില്‍ ആശയം ഉറപ്പാക്കല്‍ (കുട്ടികളുടെ ഓരോരുത്തരുടെയും അടുത്തെത്തി എന്താ എഴുതാനാലോചിച്ചത് എന്നു തിരക്കി ആശയം ഉണ്ടെന്നുറപ്പാക്കല്‍.) എഴുത്തുവേളയിലെ മോണിറ്ററിംഗ് തത്സമയ സഹായം (വിശകലന ചോദ്യങ്ങള്‍, ചില താരതമ്യങ്ങള്‍, മാതൃകകാട്ടല്‍, ശരിയിലേക്ക് നയിക്കല്‍) പൊതുവായി ഫീഡ് ബാക്ക് നല്‍കല്‍ ( ഉദാ ചലര്‍ വാക്കുകള്‍ അകലം പാലിക്കാതെ എഴുതുന്നുണ്ട്. ശ്രദ്ധിക്കണേ..) അവതരണം ഓരോരുത്തരും ഭാവം ഉള്‍ക്കൊണ്ട് ക്ലാസിനു മുന്നിലെത്തി അവതരിപ്പിക്കല്‍, അംഗീകാരം ബോര്‍ഡെഴുത്ത് ( എല്ലാവരും ) എഡിറ്റിംഗ് ( വാക്യതലം ,പദതലം, അക്ഷരതലം ) അംഗീകാരം നല്ല രീതിയില്‍ എഴുതിയത് ( പ്രയോഗം, ആശയം) അംഗീകരിക്കല്‍. ചര്‍ച്ച മെച്ചപ്പെടുത്തി എഴുതല്‍ ( മോണിറ്ററിംഗ് ) സൂചകങ്ങളുപയോഗിച്ച് സ്വയം വിലയരുത്തി ഗ്രേഡ് അവരവര്‍ തന്നെ നല്‍കല്‍ ഫീഡ്ബാക്ക് എഴുതല്‍

സ്വയം വിശകലനം ചെയ്യുക.

1. പിന്നാക്ക പരിഗണന ഉണ്ടോ?
2. എല്ലാ കുട്ടികളുടെയും നോട്ട് ബുക്കില്‍ രചന ഉണ്ടെന്നുറപ്പാക്കിയോ
3. അത് മെച്ചപ്പെടുത്തിയതാണെന്ന് ഉറപ്പുണ്ടോ?
4. പ്രക്രിയാപരമായ സൂക്ഷ്മതയുണ്ടോ?
5. ബോര്‍ഡിന്റെ ഉപയോഗം സൂചിപ്പിച്ചിട്ടുണ്ടോ?
6. ഭാഷാപ്രശ്നങ്ങള്‍ പരിഹരിക്കുമോ?
7. തത്സമയ വിലയിരുത്തല്‍ നടക്കുന്നുണ്ടോ?
8. ക്ലാസിലെ രചനാപരമായ മികവുകള്‍ മറ്റുളളവര്‍ക്ക് മാതൃകയാക്കുന്നുണ്ടോ?
9. എന്തായിരിക്കും പ്രതികരണപ്പേജില്‍ എഴുതുക? ( സാധ്യതകള്‍)

1. ഒരു അധ്യാപികയുടെ ആസൂത്രണക്കുറിപ്പ്. 

ഇതിനെ മുകളില്‍ നല്‍കിയ ഉദാഹരണത്തിന്റെ അടിസ്ഥാനത്തില്‍ വിലയിരുത്തുക.

ക്ലാസ് നാല്,പാഠം മേളിതം- ടീച്ചിംഗ് മാന്വല്‍ തയ്യാറാക്കിയ തീയതി-30/11/2015 - ലക്ഷ്യം -വര്‍ണന

• പ്രക്രിയ-കവിത- വായന-വ്യക്തിഗതം- ഗ്രൂപ്പില്‍ ഈണം കണ്ടെത്തി അവതരണം- കവിതയിലെ ആശയം വ്യക്തിഗതമായി രചന-കൈമാറി വായന-ഗ്രൂപ്പില്‍ മെച്ചപ്പെടുത്തല്‍- മനസിലാക്കിയ ആശയത്തെ ആസ്പദമാക്കി ചിത്രം വരയ്കുന്നു-ഉത്സവത്തെക്കുറിച്ചുളള വര്‍ണനയും വിവരണവും തയ്യാറാക്കി അവതരിപ്പിക്കുന്നു- ചാര്‍ട്ടില്‍ പ്രദര്‍ശിപ്പിക്കുന്നു-ഇവ തമ്മിലുളള വ്യത്യാസം കുട്ടികള്‍ തന്നെ കണ്ടെത്തുന്നു-കേരളത്തിന്റെ പ്രകൃതിഭംഗിയെക്കുറിച്ച് കവിതയിലെ ആശയം ഉള്‍ക്കൊണ്ട് വര്‍ണന തയ്യാറാക്കുന്നു. ആലങ്കാരിക പദപ്രയോഗങ്ങള്‍, വാക്യഘടന, അക്ഷരങ്ങള്‍, ചിഹ്നങ്ങള്‍, വാക്യങ്ങളുടെ പരസ്പരബന്ധം ഇവ വിലയിരുത്തുന്നു.

1.  ഈ അധ്യാപനക്കുറിപ്പും നിങ്ങളുടെ ടീച്ചിംഗ് മാന്വലെഴുത്തും തമ്മില്‍ എന്താണ് വ്യത്യാസം?

1. ................................................
2. ...............................................
3. .................................................
4. .................................................

ഏതൊക്കെയാണ് ഇവിടെ പിന്നാക്കപരിഗണനാപ്രശ്നസന്ദര്‍ഭങ്ങള്‍? (ബ്രായ്ക്കറ്റിനുളളിലുളള ചോദ്യങ്ങള്‍ നിങ്ങളുടെ ക്ലാസിനു ബാധകമാണോ? ഇത്തരം  ചോദ്യങ്ങള്‍ ആസൂത്രക്കുറിപ്പിനെ സ്വാധീനിക്കാറുണ്ടോൽ

1. വായന-വ്യക്തിഗതം ( വായിക്കാനറിയാത്ത എട്ടു പേര്‍ എന്തു ചെയ്യും? വായിച്ചവരെല്ലാം ആശയം ഗ്രഹിച്ചു എന്നുറപ്പുണ്ടോ? അതിന് മിടുക്കരെ കൊണ്ട് ഉത്തരം പറയിച്ചാല്‍ ആശയഗ്രഹണത്തോടെയുളള വായനാശേഷി ഈ കുട്ടികള്‍ക്ക് കിട്ടുമോ?)
2. ഗ്രൂപ്പില്‍ ഈണം കണ്ടെത്തി അവതരണം ( ഈണം കണ്ടെത്തുന്ന പ്രക്രിയ എന്താണ്? വരിയുടെ ആശയം അറിയേണ്ടേ? ഭാവം മനസിലാക്കണ്ടേ? അതിനു നന്നായി പദച്ചേരുവ മനസിലാക്കി വായിക്കണ്ടേ? ഓരോരുത്തരും വായിച്ചുവെന്നുറപ്പുണ്ടോ? ഓരോരുത്തരുടേയും ഈണധാരണയെ ഏകീകരിക്കുന്ന പ്രക്രിയ എന്താണ്?)
3. കവിതയിലെ ആശയം വ്യക്തിഗതമായി രചന- ( ആശയം മനസിലാക്കാത്തവരെന്തു ചെയ്യും? എഴുത്തില്‍ പിന്നാക്കമുളളവരെന്തു ചെയ്യും? കവിതയിലെ ആശയം എങ്ങനെ എഴുതണമെന്ന് അറിയാത്തവരെന്തു ചെയ്യും?ടീച്ചര്‍ എന്തു പിന്തുണയായണ് നല്‍കുന്നത്?)
4.  രചന-കൈമാറി വായന-ഗ്രൂപ്പില്‍ മെച്ചപ്പെടുത്തല്‍- ( എന്താണ് ഗ്രൂപ്പില്‍ നടക്കേണ്ടത്? ഒരാള്‍ സമര്‍ഥ/ന്‍ വായിച്ച് മറ്റുളളവരെക്കൊണ്ട് അംഗീകരിപ്പിക്കലാണോ? കീഴടങ്ങുക, വിധേയരാവുക എന്ന സംസ്കാരമാണോ ഗ്രൂപ്പില്‍ വേണ്ടത്?ടീച്ചര്‍ എന്തു പിന്തുണയായണ് നല്‍കുന്നത്?)
5. മനസിലാക്കിയ ആശയത്തെ ആസ്പദമാക്കി ചിത്രം വരയ്കുന്നു ( ഗ്രൂപ്പില്‍ എല്ലാവരും പങ്കുവെച്ച ആശയമാണോ? അതോ കവിതയിലെ ആശയമാണോ? ഞങ്ങള്‍ എല്ലാ ആശയവും മനസിലാക്കി എന്ന് ടീച്ചര്‍ക്ക് ഉറപ്പുണ്ടോ?
6. ഉത്സവത്തെക്കുറിച്ചുളള വര്‍ണനയും വിവരണവും തയ്യാറാക്കി അവതരിപ്പിക്കുന്നു- ( ആദ്യം എന്താ എഴുതേണ്ടത്? എന്താ ഇവ തമ്മിലുളള വ്യത്യാസം എന്ന് ‍അറിയില്ലെങ്കിലോ? ഒരോ കാര്യത്തെക്കുറിച്ച് എന്തിനാ വര്‍ണനേം വിവരണോം? ഉത്സവം എങ്ങനെ ഈ സന്ദര്‍ഭത്തില്‍ കടന്നു വന്നു? ടീച്ചര്‍ എന്തു പിന്തുണയായണ് നല്‍കുന്നത്?)
7.  ചാര്‍ട്ടില്‍ പ്രദര്‍ശിപ്പിക്കുന്നു ഇവ തമ്മിലുളള വ്യത്യാസം കുട്ടികള്‍ തന്നെ കണ്ടെത്തുന്നു ( എല്ലാ കുട്ടികളും എഴുതിയത് ചാര്‍ട്ടില്‍ പ്രദര്‍ശിപ്പിക്കുമോ? അത് തന്നെ പല രീതിയിലാകില്ലേ? എങ്ങനെ താരതമ്യം ചെയ്യും? മാനദണ്ഡങ്ങള്‍ കുട്ടികള്‍ക്ക് വ്യക്തമല്ലല്ലോ? ആദ്യം ഏതു ഘടകം താരതമ്യം ചെയ്യണം? കുട്ടികള്‍ എഴുതിയത് വര്‍ണന ആയില്ലെങ്കില്‍ താരതമ്യം എങ്ങനെ നടക്കും? 
8. കവിതയിലെ ആശയം ഉള്‍ക്കൊണ്ട് വര്‍ണന തയ്യാറാക്കുന്നു. ( മുകളില്‍ ഉന്നയിച്ച ചോദ്യങ്ങള്‍ക്ക് ഉത്തരമില്ലെങ്കില്‍ ഈ ക്ലാസ് പൊളിയും. അത് ക്ഷണിച്ചു വരുത്തിയതാണ് . ടീച്ചിംഗ് മാന്വല്‍ തന്നെ തെളിവ്.
9. ആലങ്കാരിക പദപ്രയോഗങ്ങള്‍, വാക്യഘടന, അക്ഷരങ്ങള്‍, ചിഹ്നങ്ങള്‍, വാക്യങ്ങളുടെ പരസ്പരബന്ധം ഇവ വിലയിരുത്തുന്നു ( ഈ സൂചകങ്ങള്‍ കുട്ടികളുടെ പക്ഷത്തുനിന്നാണോ? വാക്യഘടന എന്നതും അക്ഷരങ്ങള്‍ എന്നതുമെല്ലാം എന്ത് അര്‍ഥമാണ് കുട്ടിക്ക് നല്‍കുന്നത്?)

ഈ ചോദ്യങ്ങളോട് പ്രതികരിച്ച അധ്യാപിക ഇങ്ങനെ മാറ്റി എഴുതി

• -കവിത വായന -വ്യക്തിഗതം- (വ്യക്തിഗതസഹായം , ആദ്യനാലുവരി- എട്ടുപേര്‍ക്ക് തത്സമയപിന്തുണ)
• ഗ്രൂപ്പില്‍ വായന ( ഒരാള്‍ ഒരു വരി വീതം) ഒരാള്‍ ഉച്ചത്തില്‍ വായിക്കുക മററുളളവര്‍ അത് പിന്തുടരുക ( ടീച്ചറുടെ ഇടപെല്‍. പരസ്പരം സഹായിക്കാന്‍, പദച്ചേരുവ മനസിലാകും വിധം സാവധാനം വായിക്കാന്‍, ഉച്ചാരണശ്രദ്ധയ്ക്)
• ഗ്രൂപ്പുകളുടെ ഉച്ചത്തില്‍ വായന-സാവധാനം പദച്ചേരുവ വ്യക്തമാകും വിധം
• ഈണം കണ്ടെത്തി അവതരണം(-ഗ്രൂപ്പില്‍ ഒരാള്‍ രണ്ടു വരി വായിക്കും ഈണം നല്‍കും. മറ്റുളളവരും ഈണം നല്‍കും മെച്ചപ്പെട്ട ഈണം തെരഞ്ഞെടുക്കും. പൊതു അവതരണത്തില്‍ ഒരാള്‍ രണ്ടുവരി ചൊല്ലും ഗ്രൂപ്പംഗങ്ങള്‍ ഏറ്റു ചൊല്ലും. അടുത്ത രണ്ടു വരി അടുത്തയാള്‍,ഇങ്ങനെ എല്ലാവര്‍ക്കും പങ്കാളിത്തം. )
• കവിതയിലെ ആശയം വ്യക്തിഗതമായി എഴുതും മുമ്പ് ( മനസിലായ ആശയങ്ങളുളള വരികളുടെ നേരേ ശരി അടയാളം നല്‍കിയ ശേഷം എഴുതുക.അധ്യാപികയുടെ പിന്തുണ.)
• രചന –കവിതയിലെ ആശയമെഴുതല്‍.( അത് അതേ പോലെ പകര്‍ത്താന്‍ സാധ്യത. കവിതയിലെ ആശയം എങ്ങനെയെല്ലാം എഴുതാം. ഉദാ കേരവൃക്ഷങ്ങള്‍ നിറഞ്ഞനാട്. ( കേരളത്തില്‍ ധാരാളം തെങ്ങുകളുണ്ട്. തെങ്ങുകള്‍ തിങ്ങിനിറഞ്ഞ നാടാണ് കേരളം. കേരളത്തില്‍ ഏറ്റവും കൂടുതല്‍ കാണപ്പെടുന്നത് തെങ്ങുകളാണ്.
• രചനാവേളയില്‍ മോണിറ്ററിംഗ്.
• ബോര്‍ഡില്‍ എഴുതിക്കല്‍-ഒരു വാക്യം- രണ്ടോ മൂന്നോ കുട്ടികള്‍. കുട്ടികളുടെ സഹായത്തോടെ എഡിറ്റിംഗ്
• -കൈമാറി വായന-ഗ്രൂപ്പില്‍ മെച്ചപ്പെടുത്തല്‍- ( നോട്ട് ബുക്ക് -)
• മനസിലാക്കിയ ആശയത്തെ ആസ്പദമാക്കി ചിത്രം വരയ്കുന്നു-
• കവിതയിലെ ആശയം എഴുതിയസ്ഥിതിക്ക് കേരളത്തിന്റെ പ്രകൃതിഭംഗിയെക്കുറിച്ച് വര്‍ണന തയ്യാറാക്കിയാല്‍ മതി.( ഉത്സവത്തിന്റെ വര്‍ണനയും വിവരണവും ആശയക്കുഴപ്പം ഉണ്ടാക്കും.)
• കേരളത്തെക്കുറിച്ച് വര്‍ണന തയ്യാറാക്കിയാലോ? എന്തെല്ലാം കാര്യങ്ങള്‍ പരിഗണിക്കാം..
  പദസൂര്യന്‍, ബോര്‍ഡില്‍ ആശയഭൂപടം, ചര്‍ച്ച. ഒരിനം എടുത്ത് സവിശേഷതകളിലേക്ക് ( പുഴ-ഒഴുക്ക്, നിറം, ജലസമൃദ്ധി, പശ്ചാത്തലം, പുഴക്കാഴ്ചകള്‍, ജലേത്സവങ്ങള്‍....)
  ചെക്ക് ലിസ്റ്റ്.

1. ലക്ഷ്യത്തിന്റെ അടിസ്ഥാനത്തില്‍ വര്‍ണിക്കേണ്ട പരമാവധി കാര്യങ്ങള്‍ ക്രമീകരിച്ച് എഴുതാന്‍ അവസരം ഉണ്ടോ?( ചിത്രത്തെ , വീഡിയോ ദൃശ്യത്തെ അടിസ്ഥാനമാക്കി കേരളത്തിന്റെ പ്രകൃതി ഭംഗിയെക്കുറിച്ച് ചര്‍ച്ച )
2. താരതമ്യത്തിലൂടെയും വിശേഷണ പദങ്ങള്‍ ചേര്‍ത്തും സൂക്ഷ്മാംശങ്ങള്‍ പരിഗണിച്ചും വസ്തുവിന്റെ സവിശേഷതകള്‍ വ്യക്തമാകും വിധം രചന നടത്തുന്നുണ്ടോ (
   തെങ്ങോല കാറ്റില്‍ ഇളകുന്നു . എന്നത് ചെറുകാറ്റില്‍ തൊങ്ങോല നൃത്തമാടുന്നുണ്ടായിരുന്നു, തെങ്ങോലകള്‍ ഇളകുന്നതു കണ്ടാല്‍ നമ്മെ മാടി വിളിക്കുകയാണെന്നു തോന്നും എന്നെല്ലാം എഴുതാന്‍ സാധിക്കും. രചനാപരമായ ഇത്തരം സാധ്യതകള്‍ ക്ലാസില്‍ ചര്‍ച ചെയ്ത് വ്യക്തത വരുത്തുന്നതിന് അവസരം)
3. രചനകളില്‍ വാക്യഭംഗി, ഭാഷാഭംഗി എന്നിവ ശ്രദ്ധിക്കുന്നുണ്ടോ?
4. തെറ്റില്ലാത്ത ഭാഷയില്‍ എഴുതുന്നുണ്ടോ?
   ഇത്തരം സൂക്ഷ്മത പാലിക്കേണ്ടതുണ്ടോ? പൊന്നാഭരണം വേണമെങ്കില്‍ അതിസൂക്ഷ്മത വേണം. ക്ലാസില്‍ പൊന്നുരുക്കണോ വേണ്ടയോ എന്ന് അവരവര്‍ക്ക് തീരുമാനിക്കാം. തീരുമാനത്തില്‍ സൂക്ഷ്മത, ആസൂത്രണത്തില്‍ സൂക്ഷ്മത, അധ്യാപന സൂക്ഷ്മത, വിശകലന സൂക്ഷ്മത എന്നിവ പാലിക്കുന്നവര്‍ കുട്ടികളുടെ നിലവാരത്തെ ഓര്‍ത്ത് തലതാഴ്ത്തേണ്ടി വരില്ല.