മത്തങ്ങപ്പയറോണ്ടാലോലത്തില്‍ നിന്നും നാടകവും സിനിമയുമായി കുട്ടികള്‍

കണ്ണൂരില്‍ നിന്നും നവചേതനഗ്രന്ഥശാല  മൂന്നു പെണ്‍കുട്ടികള്‍ ഒറ്റ ദിവസം കൊണ്ടാണ് തയ്യാറാക്കിയ അമ്മണി കുമ്മിണി ആലോലം എന്ന   സിനിമ ഫേസ്ബുക്കില്‍ അപ് ലോഡ് ചെയ്തു.  അനുപ്രിയയും സ്നേഹപ്രിയയും അംഗരീയയും മത്തങ്ങപ്പയറോണ്ടാലോലം എന്ന എന്റെ കഥയെ ഉപജീവിച്ചാണ് സിനിമ തയ്യാറാക്കിയത്https://m.facebook.com/story.php?story_fbid=1103297690048802&id=100011057438456. തോണിയും പശ്ചാത്തലവും പട്ടിയായും പൂച്ചയായുമുളള വേഷപ്പകര്‍ച്ചയും അതിഗംഭീരമാക്കിയിട്ടുണ്ട് കുട്ടികള്‍.

ആ കഥ ആസ്വാദ്യമായി പറഞ്ഞവതരിപ്പിച്ച വീഡിയോ അധ്യാപകരിലേക്ക് ഞാന്‍ ഷെയര്‍ ചെയ്തിരുന്നു. ആ കഥ എഴുതാനിടയായ സാഹചര്യം ഇതാണ്.

കൊവിഡ് കാലത്ത് റേഡിയോ ജെ സി ബി ബാലസാഹിത്യമെഴുത്തുകാരുടെ ഒരു പ്രത്യേക പരിപാടി കുട്ടികള്‍ക്കായി സംഘടിപ്പിച്ചു. അതിലേക്ക് ഒരു കഥ സംഘാടകര്‍ ആവശ്യപ്പെട്ടു. പുതിയ കഥയാകട്ടെ എന്നു കരുതി. മത്തങ്ങപ്പയറോണ്ടാലോലം എഴുതി അവതരിപ്പിച്ച് ഓഡിയോ അയച്ചുകൊടുത്തു. കഥാവായനയുുടെ വീഡിയോ കുട്ടികള്‍ സ്വീകരിച്ച സ്ഥിതിക്ക് കഥപറയലും വീഡിയോപാഠമാക്കിയാലോ എന്ന ആലോചന. തുടര്‍ന്ന് റിക്കാര്‍ഡിംഗ്. കഥയുടെ അവസാനം പ്രവര്‍ത്തനം നിര്‍ദേശിച്ചു. നാടകമോ സിനിമയോ നിര്‍മിക്കാമോ? വീഡിയോപാഠം ക്ലിക്കായി.

അധ്യാപകരുടെ വാട്സാപ്പ് കൂട്ടായ്മകള്‍ അത് പ്രചരിപ്പിച്ചു. ഫലമോ ധാരാളം നാടകങ്ങള്‍ എനിക്ക് വാട്സാപ്പിലൂടെ കിട്ടി.

കുട്ടികള്‍ റേഡിയോ നാടകമായും പാവകളിയായും അവതരിപ്പിച്ചിട്ടുണ്ട്. റേഡിയോ ജെ സി ബിയില്‍ സകുടുംബം ഈ കഥ പശ്ചാത്തല സംഗീതത്തോടെ അവതിരിപ്പിച്ചതിന്റെ ഓഡിയോയും ധാരളമായി ലഭിച്ചു. ഇത്രയധികം വൈവിധ്യം ആവിഷ്കാരത്തില്‍ പ്രകടിപ്പിച്ചതിലൂടെ ഞാന്‍ തിരിച്ചറിയുന്ന കാര്യങ്ങളിവയാണ്.

• അനുഭവതീവ്രത വര്‍ധിപ്പിക്കുന്ന രീതിയില്‍ കഥ അവതരിപ്പിച്ചാല്‍ അത് കുട്ടികളുടെ മനസിനെ സ്വാധീനിക്കുകയും പുതിയ ആവിഷ്കാരത്തിന് നിര്‍ദേശിച്ചാല്‍ അത് ഏറ്റെടുക്കപ്പെടുകയും ചെയ്യും.
• സര്‍ഗാത്മക ആവിഷ്കാരം കഥയുടെ മികച്ച ആസ്വാദനത്തിനും വഴിയൊരുക്കും
• കുട്ടികളുടെ സര്‍ഗാത്മകതയെ വെല്ലുവിളിക്കാത്ത അഭ്യാസങ്ങളാണ് പാഠപുസ്തകങ്ങളിലധികവും ആ രീതിയില്‍ മാറ്റം വരണ്ടേതുണ്ടോ എന്ന് ആലോചിക്കണം
• കഥ പറയല്‍ ക്ലാസുകളില്‍ വേണ്ട വിധം നടക്കുന്നില്ല. ഒന്നാം ക്ലാസു കഴിഞ്ഞാല്‍ പിന്നെ കഥാവായനയും എഴുത്തും ചോദ്യങ്ങളും ഉത്തരങ്ങളും മാത്രമായി ചുരുങ്ങുന്നുണ്ടോ? സ്വതന്ത്രകഥാവതരണസന്ദര്‍ഭങ്ങള്‍ ധാരാളമായി വേണ്ടേ?
• വ്യവഹാരരൂപ നിര്‍മിതിക്ക് ആവശ്യപ്പെടുമ്പോള്‍ നല്‍കുന്ന അനുഭവം ശക്തവും നിര്‍ദേശങ്ങള്‍ വ്യക്തവും ആയിരിക്കണം.

പത്തനംതിട്ട വളളിക്കോട്  നിന്നും (സ്വപ്ന ടീച്ചര്‍ അയച്ചു തന്നത്) ദേവീകൃഷ്ണ ( ക്ലാസ് ഏഴ്, PDUPS)  , ആലപ്പുഴയില്‍ നിന്നും ഒമ്പതാം ക്ലാസ് വിദ്യാര്‍ഥിനിയായ അമിനഫയാന, കോട്ടയം കാഞ്ഞിരത്താനം സ്കൂളിലെ അധ്യാപികയായ ക്രിസ്റ്റീന ജേക്കബ് എന്നിവരെഴുതിയ നാടകമാണ് ചുവടെ നല്‍കുന്നത്.

 

 

 

നാടകം 2 ( അമിനഫയാന എഴുതിയത്)

മത്തങ്ങാപ്പയറോണ്ടാലോലം

രംഗം 1

ഒരു ദേശത്തിന്റെ ദൂരക്കാഴ്ച.

അവിടെ ചെറിയൊരു വീട്

പശ്ചാത്തലത്തിൽ ഒരു കുഞ്ഞിന്റെ കരച്ചിൽ കേൾക്കാം.

രംഗം 2

വീടിന്റെ ഉമ്മറത്തേക്ക് ഒരു മുത്തശ്ശി കടന്നു വരുന്നു.

താഴെ പായയിൽ കിടക്കുന്ന കുഞ്ഞിനെ മുത്തശ്ശി കയ്യിലെടുക്കുന്നു. അത് കണ്ടു കൊണ്ട് വീടിന്റെ മറവിൽ കുറച്ച് കുട്ടികൾ നിൽക്കുന്നുണ്ട്. 

കുഞ്ഞിനെ ചേർത്ത് പിടിച്ചു മുത്തശ്ശി താരാട്ട് പാടാൻ തുടങ്ങുന്നു. 

"അമ്മിണി അമ്മിണി അമ്മിണി അമ്മിണി 

അമ്മിണി അമ്മിണി ആരിരാരോ..

കുമ്മിണി കുമ്മിണി കുമ്മിണി കുമ്മിണി 

കുമ്മിണി കുമ്മിണി ആരിരാരോ.. 

ആലോലം ആലോലം ആരിരാരോ.."

ആ താരാട്ട് ഏറ്റ് പാടുന്ന കുട്ടികൾ

"അമ്മിണി അമ്മിണി അമ്മിണി അമ്മിണി....

കുമ്മിണി കുമ്മിണി.കുമ്മിണി ആരിരാരോ..... 

ആലോലം ആലോലം ആലോലംആലോലം

ആലോലം ആലോലംആരിരാരോ.... "

രംഗം 3

താരാട്ട് പാട്ട് പാടികൊണ്ട് പാട വരമ്പത്തു കൂടി ഓടുന്ന കുട്ടികൾ.

കുട്ടി 1: "എത്ര സുന്ദരമായ പാട്ടാണല്ലേ..."

കുട്ടി 2: " നല്ല ഓമനത്തം ഉള്ള കുഞ്ഞും.. "

കുട്ടി 3: " നമുക്ക് അവൾക്കൊരു പേരിട്ടാലോ... ? "

കുട്ടികൾ എല്ലാവരും ചേർന്ന് : "ശരിയാ ശരിയാ... "

കുട്ടി 4:" പക്ഷെ എന്ത് പേരാണിടുക.. ?"

(എല്ലാവരും ആലോചിക്കുന്നു)

കുട്ടി2: "നമുക്ക് അമ്മിണി കുമ്മിണി എന്നിട്ടാലോ..?"

കുട്ടികൾ ചേർന്ന്: "ഹായ് നല്ല പേര്... അമ്മിണി കുമ്മിണി.. അമ്മിണി കുമ്മിണി.. " 

ആർപ്പു വിളിച്ചു കൊണ്ട് ഓടി മറയുന്ന കുട്ടികൾ. 

രംഗം 4

ഒരു പൂന്തോട്ടം

അവിടേക്ക് കടന്നു വരുന്ന അമ്മിണി കുമ്മിണി

(വളർന്നു ഒരു പെൺകുട്ടി ആയ അമ്മിണി കുമ്മിണി )

അവൾ പൂക്കളോടും പൂമ്പാറ്റകളോടും കിന്നാരം പറയുന്നു. 

അപ്പോ അവിടേക്ക് കടന്നു വരികയാണ് ഒരു പൂച്ചയും പിന്നെ ഒരു പട്ടിക്കുട്ടനും. 

അവരെ കണ്ടപ്പോൾ സന്തോഷത്തോടെ അമ്മിണി കുമ്മിണി പറഞ്ഞു. 

"ഹായ് എന്റെ കൂട്ടുകാർ വന്നല്ലോ... 

വൃത്തിപ്പൂച്ചേ... മണാമണൻ പട്ടീ ... നിങ്ങൾ എവിടെ ആയിരുന്നു.. ?"

അപ്പോൾ വാലാട്ടിക്കൊണ്ട് വൃത്തിപ്പൂച്ച പറഞ്ഞു

"അമ്മിണി കുമ്മിണീ .. ഞങ്ങൾ ഒരു കാര്യം പറയാൻ വന്നതാണ്.. "

അമ്മിണി കുമ്മിണി: "എന്താ പറയ്.. കേൾക്കട്ടെ.. "

മണാമണൻ പട്ടി : "അമ്മിണി കുമ്മിണീ.. നമ്മൾ കൂട്ടുകാരല്ലേ.. നമ്മൾ എപ്പോഴും ഒരുമിച്ചല്ലേ കളിക്കുന്നത്.. "

വൃത്തിപ്പൂച്ച: "ഇത്തവണ നമുക്ക് മത്തങ്ങാപയർ നാട്ടാലോ.. ?"

അമ്മിണി : "അതിനെന്താ ഞാൻ തയ്യാർ"

എല്ലാവരും ചേർന്ന് പാടുന്നു.. 

"അമ്മിണി കുമ്മിണി ആലോലം.. 

മത്തങ്ങപ്പയറോണ്ടാലോലം.. "

രംഗം 5

പൂന്തോട്ടം

അമ്മിണി കുമ്മിണിയും വൃത്തിപ്പൂച്ചയും

മണാമണൻ പട്ടിയും ചേർന്ന് മത്തങ്ങാപയർ നടുന്നു.

അമ്മിണി : " നോക്കൂ .. നമുക്ക് എല്ല ദിവസവും ഇതിനു വെള്ളം ഒഴിക്കണം.. "

"ശരി ശരി ... " രണ്ടു പേരും തലയാട്ടി.

രംഗം 6

പൂന്തോട്ടത്തിൽ വളർന്നു വലുതായ മത്തങ്ങാപയർ ചെടി. അതിനു ചുറ്റും നിൽക്കുന്ന അമ്മിണിയും കൂട്ടുകാരും. 

വൃത്തിപ്പൂച്ച : " നോക്കൂ... നമ്മുടെ ചെടിയിൽ പൂവിട്ടിരിക്കുന്നു ... "

എല്ലാവരും സന്തോഷത്തോടെ തുള്ളിച്ചാടി. അതിനു ശേഷം അവർ എല്ലാവരും ചേർന്ന് പാടി. 

"അമ്മിണി കുമ്മിണി ആലോലം..

മത്തങ്ങാപ്പയറോണ്ടാലോലം... "

രംഗം 7

ഒരു പുഴക്കര

അരികിൽ ഒരു തോണി കിടക്കുന്നു

മത്തങ്ങാ പയറുകൾ തലയിൽ ചുമന്ന് ധോണിയുടെ അരികിലേക്ക് നടന്നു വരുന്ന അമ്മിണിയും കൂട്ടുകാരും.

അവർ മത്തങ്ങാ പയർ തോണിയുടെ നടുവിൽ വെച്ചു. എല്ലാവരും കയറി.

പൂച്ച : വരൂ നമുക്ക് ചന്തയിലേക്ക് പോകാം.. 

വൃത്തിപ്പൂച്ച തോണി തുഴയാൻ തുടങ്ങി.

രംഗം 8

പുഴയുടെ നടുവിൽ തോണിയിൽ പോകുന്ന കൂട്ടുകാർ. 

അപ്പോൾ ഒരു മീൻ പൊങ്ങിച്ചാടി. 

അത് കണ്ട വൃത്തിപ്പൂച്ച: "ഹായ് ദേ ഒരു മീൻ... " അതും പറഞ്ഞ് അവൻ മീനെ പിടിക്കാൻ ഒറ്റ ചാട്ടം. 

അമ്മിണി : " അയ്യോ ചാടല്ലേ വൃത്തിപ്പൂച്ചേ.."

"മ്യാവൂ മ്യാവൂ.."

ബ്ലും..

മറിയുന്ന തോണി

അമ്മിണിയും പൂച്ചയും പട്ടിയും മത്തങ്ങാ പയറും എല്ലാം വെള്ളത്തിലേക്ക്.

ബ്ലും..

എല്ലാവരും നിലവിളിക്കുന്നു

"അയ്യോ അയ്യോ.. തോണി മറിഞ്ഞേ..

രക്ഷിക്കണേ.. "

രംഗം 9

കഷ്ടപ്പെട്ട് തോണിയുമായി കരക്കെത്തുന്ന അമ്മിണി കുമ്മിണി .അവൾ ചുറ്റും നോക്കുന്നു. ആരെയും കാണാനില്ല. 

സങ്കടത്തോടെ അമ്മിണി പാടി

" അമ്മിണി കുമ്മിണി ആലോലം

മത്തങ്ങ പ്പയറോണ്ടാലോലം.. "

സങ്കടത്തോടെ തിരിചു പോകാൻ ഒരുങ്ങുന്ന അമ്മിണി.

തോണിയിൽ കേറാൻ തുടങ്ങുന്നു. 

അപ്പോ അവളുടെ മുന്നിൽ ചെളിയിൽ കുഴഞ്ഞ ഒരു ജീവി വന്നു നിന്നു. 

അമ്മിണി: "ങേ ഇതെന്ത് ജീവി....?"

ജീവി:"മ്യാവൂ..."

അമ്മിണി:"ആഹാ.. വൃത്തിപ്പൂച്ച ആയിരുന്നോ... വാ വാ.. മണാമണൻ എവിടെ.. ?"

അപ്പോൾ അകലെ നിന്നൊരു ശബ്ദം 

"ഞാൻ ഇവിടുണ്ടേ.... "

വെള്ളം കുടിച്ചു വയർ വീർത്ത മണാമണൻ പട്ടി നടന്നു വരുന്നു.. 

എല്ലാവരും ഒരുമിച്ച് സന്തോഷത്തോടെ തോണിയിൽ കയറുന്നു. 

രംഗം 10

പുഴയുടെ നടുവിൽ സന്തോഷത്തോടെ തോണിയിൽ പോകുന്ന കൂട്ടുകാർ. 

അവർ പാടുന്നു.. 

" അമ്മിണി കുമ്മിണി ആലോലം

മത്തങ്ങ പ്പയറോണ്ടാലോലം.. "

" അമ്മിണി കുമ്മിണി ആലോലം

മത്തങ്ങ പ്പയറോണ്ടാലോലം.. "

വൃത്തിപ്പൂച്ച: അല്ലാ. .. നമ്മുടെ മത്തങ്ങാപയർ എവിടെ... ?

അമ്മിണി :"ശരിയാണല്ലോ.. "

മണാമണൻ :" ചിലപ്പോ അത് ചന്തയിൽ എത്തിയിട്ടുണ്ടാകും . നമുക്ക് പോയി നോക്കിയാലോ.. ?

വൃത്തിപ്പൂച്ച :" ശരിയാ... അമ്മിണി കുമ്മിണിയെ വീട്ടിൽ എത്തിച്ചിട്ട് നമുക്ക് ചന്തയിൽ പോയി നോക്കാം.. "

അവർ വീണ്ടും പാടി..

" അമ്മിണി കുമ്മിണി ആലോലം

മത്തങ്ങ പ്പയറോണ്ടാലോലം.. "

CurtAin

Voice over

അന്ന് മത്തങ്ങാപയറും തപ്പി ഇറങ്ങിയ വൃത്തിപ്പൂച്ചയും മണാമണൻ പട്ടിയും തുടങ്ങി വച്ച പതിവാണ് ഇന്ന് നാം കാണുന്ന ചന്തയിൽ അലഞ്ഞു നടക്കുന്ന പട്ടികളും പൂച്ചകളും.

Background music

" അമ്മിണി കുമ്മിണി ആലോലം

മത്തങ്ങ പ്പയറോണ്ടാലോലം.. "

" അമ്മിണി കുമ്മിണി ആലോലം

മത്തങ്ങ പ്പയറോണ്ടാലോലം.. "

ശുഭം

അധ്യാപിക എഴുതിയത് വായിക്കാം.

മത്തങ്ങപ്പയറോണ്ടാലോലം

രംഗം I

( ഒരു ചെറിയ വീടിന്റെ ഉൾവശം' ഒരു തൊട്ടിൽ കെട്ടിയിരിക്കുന്നു 'തൊട്ടിലിൽ ഒരു കുഞ്ഞു കിടന്നുറങ്ങുന്നുണ്ട്. ഒരു മുത്തശ്ശി ധൃതിയിൽ തൊട്ടിലിന്നരികിലേയ്ക്കു വരുന്നു.)

മുത്തശ്ശി (തൊട്ടിലിനുള്ളിലേയ്ക്ക് നോക്കിക്കൊണ്ട് )

മുത്തശ്ശി: ഓ.... രോ.. രോ... രോ... പെണ്ണാവ ഉണന്നോ....

(തൊട്ടിലാട്ടിക്കൊണ്ട് )

മുത്തശ്ശി ( പാടുന്നു):

അമ്മിണി അമ്മിണി അമ്മിണി അമ്മിണി

കുമ്മിണി കുമ്മിണി ആരിരാരോ

അമ്മിണി അമ്മിണി അമ്മിണി അമ്മിണി

കുമ്മിണി കുമ്മിണി ആരിരാരോ

 (പാട്ടു കേട്ട് ഒരു കൂട്ടം കുട്ടികൾ കടന്നു വരുന്നു' അവരും പട്ടേറ്റു പാടുന്നു)

പാട്ടവസാനിക്കുമ്പോൾ കുട്ടികൾ: മുത്തശ്ശി .... അമ്മിണി അമ്മിണി ഉറക്കായോ...

മുത്തശ്ശി: പോടാ - .. പോടാ... പെണ്ണാവേ... ഉണത്തല്ലേ.

(കുട്ടികൾ അമ്മിണി കമ്മിണി എന്നു പാടിയും പൊട്ടിച്ചിരിച്ചും പുറത്തേയ്ക്ക് ഓടുന്നു)

(കർട്ടൻ)

രംഗം 2

(മുറ്റം' പുച്ചെടികൾ മുറ്റത്ത്.ഒരു ബാലിക തുള്ളിച്ചാടി വരുന്നു. ഒരു ചെടിക്കരികിലെത്തി പൂക്കളെ തലോടുന്നു)

ബാലിക: ഹായ്.. പൂവേ, നിന്നെ കാണാനെന്തു ശേലാ..

(ബാലിക പൂവെ തൻ്റെ കവിളോടു ചേർത്ത് നൃത്തം ചെയ്യുന്നു)

(കുറച്ചു കുട്ടികൾ രംഗത്തേയ്ക്ക് ഓടി വന്ന് മറുഭാഗത്തേയ്ക്ക് പോകുന്നു.)

കട്ടികൾ (ഉച്ചത്തിൽ): ഹായ്.. അമ്മിണി കമ്മിണീ ... കളിക്കാൻ പോരുന്നോ...

അമ്മിണികുമ്മിണി :നിങ്ങള് പൊക്കോളിൻ.... എൻ്റെ കൂട്ടുകാര് ഇപ്പോ വരൂലോ.... ഹായ്... മണാളൻ വന്നൂലോ...

(ഒരു നായ്ക്കുട്ടി രംഗത്തേയ്ക്ക് വരുന്നു)

അമ്മിണി കുമ്മിണി(സന്തോഷം): ദേ... വൃത്തിപ്പൂച്ചയും വന്നു ട്ടോ..

( മറ്റൊരു കോണിൽ നിന്ന് ഒരു പൂച്ചക്കുട്ടി രംഗത്തേയ്ക്ക്

വൃത്തിയും മണാളനും :മ്യാവൂ... മ്യാവു... ബ് ഔ: ഹായ്.. അമ്മിണി കുമ്മിണീ ..

(മൂവരും വട്ടം കൂടി പാട്ടു പാടി നൃത്തം തുടങ്ങി )

മൂവരും: അമ്മിണി കുമ്മിണി ആലോലം

മത്തങ്ങാപ്പയറോണ്ടാലോലം [2]

(പാട്ടവസാനിച്ചു)

വൃത്തിപ്പൂച്ച: നമുക്കു മത്തങ്ങാപ്പയറു നട്ടാലോ ....

മണാളൻനായ :ആ...ആ.... നമുക്കു നടാം...

അമ്മിണി കുമ്മിണി :ആയ് ....ആയ് ... നമുക്കു നടാം: .. വാ... വാ.... മത്തങ്ങാപ്പയറുനടാം....

(മൂവരും കൂടി പയറു കുഴിച്ചിടുന്നു 'ചുറ്റും നിന്ന് വട്ടം കൂടി പാടിക്കളിക്കുന്നു)

"അമ്മിണി കമ്മിണി ആലോലം

മത്തങ്ങാപ്പയറോണ്ടാലോലം [2]

(കർട്ടൻ)

(രംഗം 3)

(മുറ്റം .അമ്മിണി കുമ്മിണി മുറ്റത്തേയ്ക്കു വരുന്നു)

അമ്മിണികമ്മിണി :ഹായ്... ദേ... മണാളാ... വൃത്തിപ്പൂച്ചേ.... ഓടിയോടി വാ ....

(നായ്ക്കുട്ടിയും പുച്ചക്കുട്ടിയും ഓടി വരുന്നു) 

മണാളൻനായ്: എന്താ... എന്താ ....

അമ്മിണിക്കുമ്മിണി (സന്തോഷം) :ദേ ... നോക്കിയേ... മത്തങ്ങാപ്പയറു ചെടിയിൽ എന്തോരം പയറാന്നു നോക്കിയേ...

വൃത്തിപ്പൂച്ച (തുള്ളിച്ചാടുന്നു ): മ്യാവൂ.... 'മ്യാവൂ....

മണാൻ ( കുരച്ചു ചാടി): ബ് ഔ '...

(മൂവരും  മത്തങ്ങാപ്പയറു ചെടിക്കു ചുറ്റും കൂടി പാടിക്കളിക്കുന്നു)

"അമ്മിണി കുമ്മിണി ആലോലം

മത്തങ്ങാപ്പയറോണ്ടാലോലം [2]

കളി അവസാനിക്കുമ്പോൾ:

അമ്മിണി കുമ്മിണി :കൂട്ടുകാരേ, നമുക്കീ മത്തങ്ങാപ്പയറു പറിച്ച് ചന്തയ്ക്കു കൊണ്ടു പോയാലോ...

മറ്റുള്ളവർ: ശരിയാ ... ശരിയാ... നമുക്കു പോകാം:

(മൂവരും പാടികളിക്കുന്നു)

"അമ്മിണി കുമ്മിണി ആലോലം

മത്തങ്ങാപ്പയറോണ്ടാലോലം [2]

 (കർട്ടൻ)

രംഗം 4

( പുഴയുടെ ദൃശ്യം. രംഗത്ത് ഒരു വള്ളം. അമ്മിണികുമ്മിണിയും മണാളനും വൃത്തിപ്പൂച്ചയും വള്ളത്തിലിരിക്കുന്നു. വൃത്തിപ്പൂച്ചയാണ് വള്ളം തുഴയുനത് .അവരുടെ പാട്ടും കേൾക്കാം )

"അമ്മിണി കുമ്മിണി ആലോലം

മത്തങ്ങാപ്പയറോണ്ടാലോലം "

അമ്മിണി കുമ്മിണി (ആഹ്ലാദസ്വരത്തിൽ): ഹായ്... എന്തു രസാ... പുഴ കാണാൻ ....

മണാളൻ :നമ്മള് പുഴയുടെ നടുക്കെത്തി 

കേട്ടോ...

വൃത്തിപ്പൂച്ച (കൊതി ): ദേ... മുട്ടൻ മീൻ ...

വൃത്തിപ്പൂച്ച (പുഴയിലേയ്ക്കെടുത്തൊരു ചാട്ടം)

"ബ്ലും "

(വള്ളം ഇളകി 'മത്തങ്ങാപ്പയർ പുഴയിലേയ്ക്കു തെറിച്ചു വീണു )

"ബ്ലും ''

(മത്തങ്ങാപ്പയർ പിടിക്കാൻ ശ്രമിച്ച മണാളൻനായും പുഴയിൽ വീണു.)

"ബ്ലും ''

അമ്മിണി കുമ്മിണി (കരച്ചിൽ): ശ്ശോ.. അവരെ കാണുന്നില്ലല്ലോ .... മണാളാ... വൃത്തിപ്പൂച്ചേ.... നിങ്ങളെവിടെപ്പോയി...

(അമ്മിണി കുമ്മിണി തുഴ കയ്യിലെടുക്കുന്നു ' തുഴയുന്നു)

(അവൾ ആഞ്ഞു തുഴഞ്ഞ് ചുറ്റും കറങ്ങി വിളിച്ചു.)

"വൃത്തിപ്പൂച്ചേ... മണാളാ...."

(അമ്മിണി കുമ്മിണി കരഞ്ഞുകൊണ്ട് വള്ളം തുഴയുന്നു)

(കർട്ടൻ)

                രംഗം 5

(പുഴയുടെ മറ്റൊരു ദൃശ്യം' രംഗത്ത് പൊന്തക്കാട് .അതിന്നരികിലിരുന്ന് ഏങ്ങലടിക്കുന്ന അമ്മിണി കുമ്മിണി )

അവൾ (കരച്ചിൽ): അവരെ കണ്ടില്ലല്ലോ iമണാളാ... വൃത്തിപ്പുച്ചേ.. വേഗം വായോ....എനിച്ചു പേടിയാവണൂ.... 

( നിശ്ശബ്ദത )

അമ്മിണി കമ്മിണി :ഓ... നേരമൊത്തിരിയായി... വന്ന വഴി ഒന്നുകൂടി നോക്കാം

(അവൾ വള്ളത്തിനടുക്കലേയ്ക്കു നടന്നു )

" മ്യാവൂ.... മ്യാവൂ..... "

അവൾ (തിരിഞ്ഞു നോക്കി ചിരിച്ചു കൊണ്ട് ): ഹായ്''... വൃത്തിപ്പൂച്ച

(വൃത്തിപ്പൂച്ച നനഞ്ഞു കുളിച്ചു തളർന്ന ഭാവം )

(അമ്മിണി കുമ്മിണി ഓടിച്ചെന്ന് അവനെ കെട്ടിപ്പിടിച്ചു)

അവൾ ( സങ്കടം ): മണാളനെ കണ്ടില്ലല്ലോ വൃത്തിപ്പൂച്ചേ...

"ബ് ഔ ...'ബ് ഔ ...."

അവൾ ( സന്തോഷം): ആയ് .... ദാ... മണാളനും വന്നേ..

മണാളൻ (കിതപ്പ്): അമ്മിണി കുമ്മിണിപ്പെണ്ണേ, ഒത്തിരി നോക്കി....മടുത്തു.. നമ്മുടെ മത്തങ്ങാപ്പയറെല്ലാം പോയി

അമ്മിണി കുമ്മിണി :സാരല്യ... നിങ്ങളു വന്നൂലോ... നമുക്കു തിരിച്ചു പോകാം

അവർ (വള്ളത്തിലേയ്ക്കുകയറുന്നു)

അവൾ (സോത്സാഹം ): ആ.... പാട് ... ആ പാട്ട്....

അമ്മിണി കുമ്മിണി ആലോലം

മത്തങ്ങാപ്പയറോണ്ടാലോലം

(മൂവരും പാട്ടു പാടി വള്ളം തുഴയുന്നു)

 (കർട്ടൻ)

രംഗം 6

( രംഗത്ത് വള്ളം ... വള്ളത്തിൽ അമ്മിണി കുമ്മിണി.മണാളൻനായ്ക്കുട്ടി, വൃത്തിപ്പൂച്ച )

അമ്മിണി കുമ്മിണി :ദേ ... വൃത്തിപ്പൂച്ചേ.... മുഴുത്ത മീൻ .. ചാടണ്ടേ...

വൃത്തിപ്പൂച്ച: ഏയ്.... വേണ്ടേ വേണ്ട... ഞാനില്ലേ ( പൊട്ടിച്ചിരിക്കുന്നു)

അമ്മിണി കുമ്മിണി :( പൊട്ടിച്ചിരിക്കുന്നു)

മണാളൻ: ( പൊട്ടിച്ചിരിക്കുന്നു)

അമ്മിണി കുമ്മിണി ( നിശ്ചയഭാവം): നമുക്കേ ഇനീം നടണം മത്തങ്ങാപ്പയറ്: അപ്പോ, അത് മുളച്ച് വളർന്ന് ഒത്തിരി പയറുണ്ടാവും... അതെല്ലാം പറിച്ച് ചന്തയ്ക്കു പോണം അന്നു നമുക്ക്... അല്ലേ... കൂട്ടരേ, :

വൃത്തിപ്പൂച്ച:( പൊട്ടിച്ചിരിക്കുന്നു)

മണാളർ:( പൊട്ടിപ്പൊട്ടിച്ചിരിക്കുന്നു)

അവൾ: (കുടുകുടെ ചിരിക്കുന്നു)

മൂവരും പാട്ടും തുടങ്ങി:

"അമ്മിണി കുമ്മിണി ആലോലം

മത്തങ്ങാപ്പയറോണ്ടാലോലം "

 (കർട്ടൻ )

ശുഭം

(ക്രിസ്റ്റീന ജേക്കബ് ,എൽ.പി.എസ്.ടി, സെന്റ് ജോൺസ് ഹൈസ്ക്കൂൾ

കാഞ്ഞിരത്താനം, കോട്ടയം )

(കൊറോണക്കാലത്തെ ട്രൈ ഔട്ടായി ഞീനീ പ്രവര്‍ത്തനത്തെയും പരിഗണിക്കുന്നു.)