വീട് ഒരു കളിവീട് (കൊവിഡ് കാല വിദ്യാഭ്യസം)

കൊവിഡ് കാലത്ത് ഓണ്‍ലൈന്‍ ക്ലാസുകള്‍കൊണ്ടു മാത്രം കുട്ടികളെ തൃപ്തിപ്പെടുത്താനാകില്ല. കാരണം അവര്‍ കൂട്ടുചേരാനാകാതെ വീട്ടകങ്ങളില്‍ ഒറ്റപ്പെട്ടു കഴിയുകയാണ്. മാര്‍ച്ച് മാസം മുതല്‍ തുടങ്ങിയ അവധി തോരുന്നില്ല. കേരളത്തിലെ കുട്ടികള്‍ക്ക് ഇത്തരമൊരു അനുഭവം ആദ്യത്തേതാണ്. അതിനാല്‍ത്തന്നെ ശിശുപക്ഷ സമീപനം പുലര്‍ത്തുന്ന അധ്യാപകര്‍ അവരെ സജീവമാക്കുന്നതിന് വിവിധങ്ങളായ പ്രവര്‍ത്തനങ്ങള്‍ ആസൂത്രണം ചെയ്യും. പെരിങ്ങോട് എ എല്‍ പി സ്കൂളിലെ രാജീവ് മാഷ് കുട്ടികളുടെ വീടിനെ കളിവീടാക്കുന്നതിനാണ് ശ്രമിച്ചത്. പലവിധ പ്രവര്‍ത്തനങ്ങള്‍. കുട്ടികളുടെ സര്‍ഗാത്മകതാവിഷ്കാരത്തിന് ഉതകുന്നവ. ചില ഉദാഹരണങ്ങള്‍ പരിചയപ്പെടാം

മാഷ് കുഞ്ഞുമഴ എന്ന കവിത എഴുതി കുട്ടികള്‍ക്ക് നല്‍കി. അതിന്റെ ദൃശ്യാവിഷ്കാരം നടത്തണം. കവിത ചങ്ങാതിയായ ദേവരാജന്‍ സി എസ് ആലപിച്ചതും ലഭ്യമാക്കി. ആ കുഞ്ഞു കവിതയും അതിന്റെ മനോഹരദൃശ്യാവിഷ്കാരവും നോക്കൂ. 

കുഞ്ഞു മഴേ പൊന്നു മഴേ
ഒന്നു വന്നു മിണ്ടരുതേ
ഉണ്ണീടെ കണ്ണിൽ നോക്കി
മിന്നുന്ന കാതലിനോട്
മെല്ലെ മെല്ലെ മിണ്ടരുതേ
കൊഞ്ചിക്കൊഞ്ചി മിണ്ടരുതേ   കുഞ്ഞു മഴേ.....
അന്തിക്കു വിണ്ണിന്റെ
നെഞ്ചിനകത്തീന്ന്
അമ്മിണിക്കുട്ടൻ ഒളിഞ്ഞു നോക്കി
കണ്ണാലെ കയ്യാലെ ഞാനൊന്നു തൊട്ടപ്പോൾ
പുഞ്ചിരിപ്പാലായി കൂടെ വന്നു        കുഞ്ഞു മഴേ.. 
നിന്റെ സ്നേഹത്തിന്റെ
ചുംബനമേൽക്കുവാൻ
കുഞ്ഞിക്കിളികൾ വിരുന്നു  വന്നു
കേളികളാടുവാൻ ഞാൻ കൂടി വന്നപ്പോൾ
മാനത്തെ മുത്തച്ഛൻ പേടിയാട്ടി             കുഞ്ഞു മഴേ..
ആരേയും കൂസാതെ മണ്ടി നടക്കുന്ന
മാനത്തെ കൂട്ടുകാർ മെല്ലെയോതി
ചങ്ങല പൊട്ടിച്ച് ചേങ്ങില കൊട്ടീട്ട്
കുഞ്ഞിളം കാറ്റായ് കൂടെപ്പോരൂ         കുഞ്ഞു മഴേ...
          

ബഹുമാനപ്പെട്ട കലാധരൻ മാഷേ,

       കളിയും ചിരിയുമായി എങ്ങും പാറി നടക്കേണ്ട നമ്മുടെ കുഞ്ഞുങ്ങൾ വീട്ടിൽ അടഞ്ഞിരിക്കുകയാണല്ലോ.

വൈവിധ്യമാർന്ന ചിന്തകൾ പങ്കുവെക്കുന്ന നമ്മുടെ കുട്ടികൾക്ക് മാറ്റുകൂട്ടാൻ നമുക്കെന്ത് ചെയ്യാം എന്ന ചിന്തയാണ് ഞങ്ങളെ കളിവീട് എന്ന സങ്കൽപത്തിലെത്തിച്ചത്.

ഓരോ പ്രദേശത്തും ഒരു കളിവീട് എന്നത് ഇന്ന് ഓരോ വീടുകളും കളിവീടുകളായി മാറുകയാണ്.

പെരിങ്ങോട്എ.എൽ.പി.സ്കൂളിലെ നാലാം ക്ലാസ്സിൽ പഠിക്കുന്ന അവന്തിക സ്വന്തമായി കളമൊരുക്കി ഒരു പാവനാടകം അവതരിപ്പിക്കുകയാണ്.

വായനയുടെ പൂക്കാലം ധന്യമാക്കുവാൻ മോളുടെ അവതണം ഏറെ സഹായകമായി. നോക്കുമല്ലോ?

എന്റെ ക്ലാസ്സിലെ ഓരോ കുട്ടിയും ലഭ്യമായ സാധനങ്ങൾ ഉപയോഗിച്ച് പുതിയ കഥകൾ അവതരിപ്പിക്കാനുള്ള ശ്രമത്തിലാണ്. അവന്തികയുടെ അവതരണം ഞാൻ പങ്കു വെച്ചല്ലോ. മറ്റു രണ്ടു വീഡിയോകള്‍ കൂടി. വൈവിധ്യമുളളവയാണ്.

സ്വന്തമായി ചിത്രം വരച്ച് അവയെ കട്ടൗട്ട് പാവകളാക്കിയാണ് അവതരണം. ചുവടെയുളള അവതരണത്തിന് വീട്ടിലെ പാവക്കുട്ടികളെയാണ് ഉപയോഗിച്ചത്.

മൊബൈല്‍ ചിത്രം

രാജീവ് മാഷ് മൊബൈലില്‍ പകര്‍ത്തിയതാണ് ഈ ചിത്രം. അതും പഠനവിഭവമായി.

മാഷ് കുട്ടികളോട് പറഞ്ഞു "ഈ ചിത്രം കാണുമ്പോൾ മനസ്സിലുണരുന്ന ചിന്തകൾ എഴുതി നോക്കൂ"

"എനിക്ക് പാഠപുസ്തകത്തിലെ അമൃതത്തിലെ അപ്പൂപ്പനെയാണോര്‍മ വന്നത്. ആരും സഹായിക്കാനില്ലാതെ വിശന്നിരിക്കുന്ന അപ്പൂപ്പനെയും ആ പെണ്‍കുട്ടിയെയും ജീവിതിയാത്രയുടെ അവസാനമെത്തി നില്‍ക്കുന്ന അപ്പൂപ്പനും ഈ ഫോട്ടോയില്‍ർ കാണുന്ന വക്ഷവും ഒരു പോലെയാണ്."

"നീലവാനച്ചോലയില്‍.

ആകാശം കാണുമ്പോള്‍ നീലനിറത്തിലുളള പരവതാനി വിരിച്ച പോലുണ്ട്. ഇതു കാണുമ്പോള്‍ സന്തോഷം ഉണ്ടാകുമെങ്കിലും ചെറിയ സങ്കടവുമുണ്ട്. ഇലകളുടെ കിന്നാരം കേള്‍ക്കാനില്ല, പൂക്കളുടെ ചിരി കാണാനില്ല. ഇതെല്ലാം കാണാനും ആസ്വദിക്കാനും അതിഥികള്‍ ആരുമില്ല."

"ചിത്രം കണ്ടപ്പോള്‍ അമ്മ എനിക്ക് പഴയ സിനിമപ്പാട്ട് പറഞ്ഞു തന്നു. നീലവാനച്ചോലയില്‍ നീന്തിടുന്ന ചന്ദ്രികേ."

 മാഷ്ടെ സ്വന്തം വായനക്കാര്‍ഡുകള്‍

 കൂട്ടുകാരെ 

നിങ്ങൾക്ക് സുഖമാണല്ലോ . സുന്ദരിപ്പട്ടം കഥ വായിച്ചില്ലേ പരിക്കുപറ്റിയ പട്ടത്തിന് ജീവൻ പകർന്ന കുട്ടനെ പരിചയപ്പെട്ടില്ലേ. നമ്മുക്ക് ഇപ്പോ കൂട്ടുകൂടാനും കഥ പറയാനും കളിക്കാനും വീട്ടിൽ ഒരു കളി വീടുണ്ടാക്കാം. എന്തൊക്കെ ചെയ്യാം?. ചിത്രം വരക്കാം ' പാവയെ ഉണ്ടാക്കാം അതെ പാവനാടകം കളിക്കാം. പിന്നെന്തൊക്കെ ?

ഇഷ്ടമുള്ള കളികൾ കളിച്ച് എനിക്കയച്ചു തരൂ. കഴിഞ്ഞ വർഷം മാഷ്  തയ്യാറാക്കിയ വായനക്കാർഡുകളാണ്. കുഞ്ഞനാന. മോഹം, സുന്ദരിപ്പട്ടം, ചപ്പല പന്ത് .ഇതെല്ലാം മാഷ് തന്നെ എഴുതിയതാണ്. LP യ്ക്ക് 40 കാർഡുകൾ ഉണ്ടാക്കി. പഞ്ചായത്ത്വി അവ അച്ചടിച്ച് വിതരണം ചെയ്തു. കുട്ടികൾ നന്നായി സ്വീകരിച്ചു' ഇപ്പോള്‍ ഈ വായനക്കാര്‍ഡുകളും കളിവീട് പ്രവര്‍ത്തനത്തിന് ഉപകരിച്ചു.
പട്ടം എങ്ങനെ കുട്ടികൾ ഏറ്റെടുത്തു എന്നറിയാൻ ചുവടെയുള്ള രചന വായിക്കുക

നിര്‍മാണ പ്രവര്‍ത്തനങ്ങള്‍

കുട്ടികള്‍ പല വിധ നിര്‍മാണ പ്രവര്‍ത്തനങ്ങളും ഏറ്റെടുത്തു. കളിവീടിനെ മികച്ചതാക്കി. ദേ നോക്കൂ.

കളിവീടിനെ കുട്ടികള്‍ എങ്ങനെ വിലയിരുത്തുന്നു. പ്രതികരണങ്ങള്‍ വായിക്കാം.

 "കളിയും ചിരിയും കൂടെ പഠനവും സമന്വയിക്കുമ്പോഴാണ് കളിവീട് ഉണരുന്നത്.

ഓരോ പ്രദേശത്തേയും ഓരോ കുട്ടിയുടെയും  നൈപുണികൾ സ്വയം വികസിപ്പിക്കുന്നതിനും പരിപോഷിപ്പിക്കുന്നതിനുള്ള കളമൊരുക്കുകയാണ്.

കൂട്ടുകാരുമൊത്ത് കളി പറയാനും കൂടെക്കളിക്കാനും പറ്റാത്ത ഇക്കാലത്ത് കുട്ടികൾ പ്രശ്നങ്ങളിൽ അടിപതറാതെ അതിജീവിച്ച്  സ്വന്തം കഴിവുകളെ വികസിപ്പിച്ചെടുക്കുന്നു.

നമ്മൾ നൽകുന്ന എളിയ നിർദ്ദേശങ്ങളും പ്രാദേശിക വിദഗ്ദ്ധരുടെ സംഭാവനകളും സാങ്കേതിക സംവിധാനങ്ങളും കളി വീടിന് ശക്തി നൽകുന്നു.ഇത് നമ്മുക്കും മക്കൾക്കും പുതുജീവൻ നൽകുന്നു. സ്വന്തം വീടുകളെ കളി വീടുകളായി മാറ്റി കുട്ടികൾ പുതിയ ലോകം സൃഷ്ടിക്കുവാൻ ശ്രമിക്കുന്നു"

അനുബന്ധം

കളി വാനം https://www.youtube.com/channel/UCWJ3AhAP6S0I0H6YSor-Q8w