ഭാഷാപഠനത്തിലെ പ്രശ്നങ്ങള്‍ അഭിസംബോധന ചെയ്യുമ്പോൾ..

( കൊറോണക്കാലം സജിവമായ അക്കാദമിക പ്രവര്‍ത്തനങ്ങളിലാണ്. നാലഞ്ച്

അക്കാദമിക സംഘങ്ങള്‍. അതില്‍ ശ്രദ്ധേയമായ ഒന്നാണ് കെ എസ് ടി എ തിരുവനന്തപുരം ജില്ലാഘടകത്തിന്റെ ഓണ്‍ലൈന്‍ ചര്‍ച്ചാവേദി. ഏപ്രില്‍ പതിനൊന്നാം തീയതി ആരംഭിച്ച ആ പ്രോഗ്രാം ഇന്ന് രണ്ടാം ദിവസത്തേക്ക് കടന്നു. ഭാഷാപഠനമായിരുന്നു ഇന്നത്തെ ( 13/04/20) ചര്‍ച്ചാ വിഷയം . ചര്‍ച്ചയുടെ ഭാഗമായി ഞാന്‍ അവതരിപ്പിച്ച കാര്യങ്ങളാണ് ചുവടെ. )

ഭാഷാപഠനത്തിലെ പ്രശ്നങ്ങള്‍ അഭിസംബോധന ചെയ്യുമ്പോൾ...

നാം ആദ്യം കുറ്റം പറയുകയാണ് ചെയ്യുക. പിരീഡ്, പാഠ്യപദ്ധതി, പാഠപുസ്തകം, പാഠങ്ങള്‍, കുട്ടികളുടെ പശ്ചാത്തലം, ക്ലാസിലെ കുട്ടികളുടെ എണ്ണം, പരിശീലന ഉളളടക്കം..

ആദ്യം സ്വയം വിമര്‍ശനപരമായി ആലോചിക്കാം

ബദല്‍ രീതികള്‍ വളര്‍ത്തുന്നതിന് ആരെങ്കിലും എന്നെ തടഞ്ഞിട്ടുണ്ടോ? ഇല്ല. എങ്കില്‍ എന്തുകൊണ്ടാണ് ഞാന്‍ പുതിയ അന്വേഷണം ഏറ്റെടുക്കാഞ്ഞത്? ടീച്ചറെന്ന നിലയില്‍ അധ്യാപനവുമായി ബന്ധപ്പെട്ട അറിവുനിര്‍മാണ പ്രക്രിയയില്‍ ഞാന്‍ എന്തു സംഭാവനയാണ് നല്‍കിയത്?

ഒത്തിരി ചോദ്യങ്ങള്‍ ഉന്നയിക്കുന്നില്ല

പാഠപുസ്തകവും പാഠവുമല്ല എന്റെ ഊന്നല്‍ മറിച്ച് ഭാഷ ആസ്വദിച്ചു പഠിക്കുന്ന കുട്ടികളാണ്.

ഭാഷ ആസ്വദിച്ചു പഠിക്കണമെങ്കില്‍ അനുഭവം അങ്ങനെയാകണം

കഥയനുഭവം, കവിതാനുഭവം, നാടകാനുഭവം. പാട്ടനുഭവം, യാത്രാവിവരണാനുഭവം എന്നിങ്ങനെ ആസ്വാദ്യതലത്തില്‍ അനുഭവ തീവ്രതയുളവാക്കുന്നതിന് എന്തു ചെയ്തു? ചുവടെയുളള പാട്ട് എപ്പോഴെങ്കിലും  വിശകലനം ചെയ്തിട്ടുണ്ടോ? അടിസ്ഥാന ജീവിതശേഷികളെക്കുറിച്ചാണ് ഈ പാട്ട് ചോദ്യശരങ്ങള്‍ തൊടുക്കുന്നത്.

മുണ്ടകൻ കണ്ടാലറിയോടാ ?

മുണ്ടകൻ കണ്ടാലറിയില്ല

പുഞ്ചയ്ക്ക് തേവാനറിയോടാ ?

പുഞ്ചയ്ക്ക് തേവാനറിയില്ല

മുണ്ടു മുറുക്കിയുടുത്തേ നിന്നെ ഇക്കണ്ട കാലം പഠിപ്പിച്ചു

എന്തു കുന്തം പഠിച്ചെന്റെ ചെക്കാ എന്തേ നിന്നെ പഠിപ്പിച്ചു ?

കണ്ടം കുത്താനറിയോടാ ?

വരമ്പ് മാടാനറിയോടാ ?

ആറ്റുമ്മണമ്മലെ പാട്ടറിയോ ?

വട്ടക്കളിയുടെ ചോടറിയോ ?

കുറുന്തോട്ടിത്തല കണ്ടറിയോ ?

കഞ്ഞിക്കൂർക്ക മണത്തറിയോ ?

നാട്ടുമരുന്നിന്റെ പേരറിയോ ?

നാടൻ പാട്ടിന്റെ ചൂരറിയോ ?

എന്തു കുന്തം പഠിച്ചെന്റെ ചെക്കാ എന്തേ നിന്നെ പഠിപ്പിച്ചു

താതെയ്യത്തക തെയ്യാരോ തക തെയ്യത്തെയ്യത്തക തെയ്യാരോ

താതെയ്യത്തക തെയ്യാരോ തക തെയ്യത്തെയ്യത്തക തെയ്യാരോ

നേരറിയണം നെറിയറിയണം പണിയറിയണം പഠിച്ചുവന്നാൽ

നേരറിയണം നെറിയറിയണം പണിയറിയണം പഠിച്ചുവന്നാൽ

താതെയ്യത്തക തെയ്യാരോ തക തെയ്യത്തെയ്യത്തക തെയ്യാരോ

താതെയ്യത്തക തെയ്യാരോ തക തെയ്യത്തെയ്യത്തക തെയ്യാരോ

1. ആറ്റുമ്മണമ്മലെ പാട്ടറിയോ ? നാടൻ പാട്ടിന്റെ ചൂരറിയോ ? എന്ന ചോദ്യത്തിന് നമ്മുടെ കുട്ടികള്‍ക്കെന്തുത്തരമാണുളളത് ? ഏതു കുട്ടിക്കും പത്തിരുപത് നാടന്‍ പാട്ടുകളറിയില്ലെങ്കില്‍ അതിനു കാരണം എന്താണ്? സംസ്കാരത്തിന്റെ ഈടുവെയ്പുകളെ മനസിലാക്കുക എന്നത് അടിസ്ഥാന ശേഷികളില്‍ പെടുമോ?തലമുറ തലമുറയായി പകര്‍ന്നുവന്ന നാടന്‍ പാട്ടുകള്‍ക്ക് നാവിന്‍ തുമ്പില്‍ മധുരം കനിയുന്ന അനുഭവമാകാനാകും. അതിന്റെ ആഴം തേടണം, താളം തേടണം, ചൊല്ലി ആസ്വദിക്കണം. ആസ്വദിച്ചവ രേഖപ്പെടുത്തണം. രേഖപ്പെടുത്തുന്നതാകട്ടെ തെറ്റില്ലാത്ത ഭാഷയിലാകുകയും വേണം. ഒരു പാട്ടനുഭവം ഭാഷാശേഷികളുടെ വിഭിന്ന തലങ്ങളെ കോര്‍ത്തിണക്കുന്നതിനു പകരം അഭ്യാസാധിഷ്ഠിതമായി വര്‍ക്കുകളും വര്‍ക് ഷീറ്റുകളുമായി നാം ചുരുങ്ങിപ്പോവുകയാണോ?

2.വട്ടക്കളിയുടെ ചോടറിയോ ? എന്താണ് വട്ടക്കളി. ഏതു വട്ടക്കളിയെക്കുറിച്ചാണ് പറയുന്നത്?ഒരു പരാമര്‍ശം ഉണര്‍ത്തുന്ന ചിന്ത നോക്കൂ. വട്ടക്കളി എന്നേ ചോദിച്ചൂളളൂ. അതുമറിയില്ല, അതിന്റെ പാട്ടുമറിയില്ല, ചുവടുമറിയില്ല.കേരളീയഭാഷാധ്യാപനത്തിന്റെ തുളകള്‍ വീണ പ്രതലം തെളിഞ്ഞു വരുന്നുണ്ട്..

ചെറുമര്‍, പുലയര്‍, വടുകര്‍, കുറവര്‍, മുള്ളുക്കുരുവര്‍, തച്ചനാടന്മാര്‍, വയനാടന്‍ ചെട്ടികള്‍, അടിയാന്മാര്‍, കളനാടികള്‍ പാലക്കാട്ടു ജില്ലയിലെ വടുക്കര്‍ , പുലയര്‍, മുള്ളുക്കുറുമര്‍, ചെറുമര്‍, കണക്കര്‍, എന്നിവര്‍ക്കെല്ലാം വട്ടക്കളിയുണ്ട്. കണ്യാര്‍കളിയില്‍ ‘വട്ടക്കളി’ എന്ന രംഗമുണ്ട്. കേരളത്തിലെ ക്രിസ്ത്യാനികളുടെ ഇടയില്‍ കല്യാണത്തോടനുബന്ധിച്ച് ‘വട്ടക്കളി’ യുണ്ടായിരുന്നു. എടുത്തിരവട്ടക്കളി, മംഗല്യം വട്ടക്കളി, വാടിമനം വട്ടക്കളി, യാക്കോവിന്റെ വട്ടക്കളി, യൗസേപ്പിന്റെ വട്ടക്കളി, മൂശയുടെ വട്ടക്കളി, തോബിയാസിന്റെ പാട്ട് എന്നിങ്ങനെ അനേകം വട്ടക്കളിപ്പാട്ടുകളുണ്ട്. വട്ടത്തില്‍ നിന്നും ചുവടുവെച്ചുളള ആ കളിക്ക് എന്താ ഇത്ര പ്രാധാന്യം? കാര്‍ഷിക സംസ്കൃതിയുമായി ബന്ധപ്പെട്ടാണ് പല വട്ടക്കളികളും. ഒരു പ്രദേശത്തിന്റെ കൂട്ടായ്മയാണത്. ഒരേ താളത്തിലേക്ക് ലയിച്ചുചേര്‍ന്ന് ചുവടുവെച്ച് ആസ്വദിക്കലാണ്. അത്തരം പാട്ടിന്റെയും താളവാദ്യങ്ങളുടെയും ചുവടുകളുടെയും സമന്വയമായ കളി നമ്മള്‍ക്ക് യുവജനോത്സവത്തിനുളള ഇനം മാത്രമാണ്. കായിക വിദ്യാഭ്യാസത്തിന്റെ ഭാഗമായി എയ്റോബിക്സ് ചെയ്യും. പടയണിയും ചുവടുവെച്ച് ആടുന്ന കലാരൂപമാണ്. ആയോധനകലയുടെ ചുവടുകളും താളങ്ങളും അതിലുണ്ട്. നാട്ടിലുണ്ടായിരുന്ന സാംസ്കാരിക പ്രാധാന്യം കൂടിയുളള ഇത്തരം കളികള്‍ക്ക് ആ ദൗത്യം കൂടിയുണ്ടെങ്കിലും ചെയ്യിക്കില്ല. പറഞ്ഞു വരുന്നത്. ചുവടുവെച്ചു പാടുന്ന പാട്ടുകള്‍ക്ക് ഭാഷാപഠനത്തിലുളള ഇന്നത്തെ സ്ഥാനമെന്താണ്? വരേണ്യ കലയായ ആട്ടക്കഥയ്ക് നല്‍കുന്നതിന്റെ എത്ര ശതമാനം ? ആസ്വാദ്യമായ ഭാഷാനുഭവത്തിന്റെ ചേരുവകളെ ഓരോന്നിനെയും വരണ്ട പാഠപുസ്തകകേന്ദ്രിത പ്രവര്‍ത്തനങ്ങള്‍ക്കായി പുറംകാലുകൊണ്ട് തൊഴിച്ചെറിഞ്ഞിട്ട് നാം ഭാഷാപഠനത്തിന്റെ ശോചനീയാവസ്ഥയെക്കുറിച്ച് വിലപിക്കുന്നു!

3.  കണ്ടറിയുക, മണത്തറിയുക, കേട്ടറിയുക, ചെയ്തറിയുക , ജീവിക്കാനുളള തൊഴിലറിയുക എന്നിങ്ങനെയുളളതെല്ലാം കൂടിച്ചേരുമ്പോഴാണല്ലോ അറിവ് സമഗ്രമാവുക? കുറുന്തോട്ടിത്തല കണ്ടറിയോ ? കഞ്ഞിക്കൂർക്ക മണത്തറിയോ ? നാട്ടുമരുന്നിന്റെ പേരറിയോ ? മുണ്ടകൻ കണ്ടാലറിയോടാ ? പുഞ്ചയ്ക്ക് തേവാനറിയോടാ ? കണ്ടം കുത്താനറിയോടാ ? വരമ്പ് മാടാനറിയോടാ ? എന്നൊക്കെ ചോദിക്കുമ്പോള്‍ വിദ്യാഭ്യാസം അല്ലെങ്കില്‍ പഠിപ്പ് എന്തായിരിക്കണം എന്നു നിര്‍വചിക്കുകയാണ്. അത്തരം നിര്‍വചനം നടത്താതെ എങ്ങനെ ചോരയോട്ടമുളള ഭാഷ കുട്ടിക്ക് ആര്‍ജിക്കാന്‍ അവസരമൊരുക്കും?

4. ഒരു പുരോഗമന വിദ്യാഭ്യാസ പ്രവര്‍ത്തക( ന്‍) എന്ന നിലയില്‍ നിങ്ങള്‍ ആഗ്രഹിക്കുന്ന ജീവിത വീക്ഷണവും വിശകലനപാടവവും വളര്‍ത്താനുതകുന്നതാണോ ഭാഷാപാഠങ്ങള്‍? അല്ലെങ്കില്‍ അത്തരത്തിലുളളവ ഉള്‍ച്ചേര്‍ക്കാനായി എന്തു കരുതല്‍( ശേഖരം ) നടത്തി?

അടിസ്ഥാനപരമായ ചോദ്യങ്ങളുന്നയിക്കാതെ എങ്ങനെ ഭാഷാപഠനത്തെ സര്‍ഗാത്മകവും പുരോഗമനസ്വഭാവമുളളതുമാക്കും?

അതിനാല്‍ ആദ്യം ഭാഷാനുഭവങ്ങളെ ഓഡിറ്റ് ചെയ്യാം. ഹൃദയത്തില്‍ തൊടുന്ന എത്ര പ്രവര്‍ത്തനങ്ങളുണ്ട്. എനിക്ക് പഠിക്കണം പഠിക്കണം എന്ന ശക്തമായ ആന്തരിക സമ്മര്‍ദമുണ്ടാക്കുന്ന പാഠങ്ങള്‍?

• ഉളളടക്കത്തില്‍
• അവതരണത്തില്‍
• അതിലേക്ക് കുട്ടികള്‍ ലയിക്കുന്നതില്‍
• അത് ആവിഷ്കരിക്കുന്നതില്‍

എന്ത് തരം മൂര്‍ച്ചയുളള അനുഭവങ്ങളാണ് ക്ലാസില്‍ സംഭവിക്കുന്നത്?

ഏറ്റെടുക്കാത്തവയും അടിച്ചേല്‍പ്പിക്കുന്നവയും ഏതാണ് പിന്നാക്കക്കാരെ സൃഷ്ടിക്കുക?

അതിശക്തമായ ഭാഷാനുഭവ ദാരിദ്ര്യത്തെ അഭിസംബോധന ചെയ്യാനുളള ആലോചനകള്‍ക്കായി നാം ഉണരുകയല്ലേ?

ഭാഗം രണ്ട്

സമഗ്രസമീപനം

ഒരു ഭാഷാപ്രവർത്തനം കുട്ടികൾ ഏറ്റെടുക്കുന്നത് അത് ആസ്വാദ്യമാകുമ്പോഴാണ്

വായനയും എഴുത്തും അവതരണവും സർഗാത്മകതയും എല്ലാം ചേരുന്ന പ്രവർത്തനം

 വീണ്ടും ചെയ്യാനായി തുടരാനായി ഉൾപ്രേരണ സൃഷ്ടിക്കുന്നവ.

അത്തരം അനുഭവങ്ങളുടെ അഭാവം ചെറിയ ക്ലാസുകളിലുമുണ്ട്

ഒരു പ്രവർത്തനത്തിലൂടെ കടന്നു പോകാം

(ഉദാഹരണം വെച്ചു പറയുന്നതാണ് എന്റെ ശീലം)

നാടൻപാട്ട് വായിക്കൂ

ഡും ഡും ഡും

ആരാത്?

ഞാനാണ്

എന്തിനു വന്നു? 

പന്തിനു വന്നു. 

എന്ത് പന്ത്? 

മഞ്ഞപ്പന്ത് 

എന്ത് മഞ്ഞ?

മുക്കുറ്റി മഞ്ഞ

എന്ത് മൂക്കുറ്റി?

പീലി മൂക്കുറ്റി

എന്ത് പീലി?

കണ്പീലി

എന്ത് കണ്ണ്?

ആനക്കണ്ണ്

എന്ത് ആന?

കാട്ടാന

......

.......

ബാക്കി സ്വന്തം വരികൾ ചേർത്ത് പൂരിപ്പിക്കണേ ( പൂരിപ്പിക്കണം. സ്വയം ഉറപ്പാക്കണമത്)

കുറച്ച് പേരുടെ  പ്രതികരണങ്ങൾ നോക്കുക ( എന്റെ മലയാളം ഗ്രൂപ്പിൽ ചെയ്തപ്പോൾ )

1. 

എന്തുകാട് ?

മുളങ്കാട്

എന്തു മുള?

ആറൻമുള

എന്താറ്?

മണിയാറ്

2.

 എന്ത് കാട് ?

മഴക്കാട്

എന്തു മഴ ?

വർണ്ണമഴ

എന്തു വർണ്ണം? 

പച്ചവർണ്ണം

എന്തുപച്ച ?

കിളിപ്പച്ച

എന്തു കിളി ?

കുഞ്ഞിക്കിളി

എന്തു കുഞ്ഞ് ?

മയിൽക്കുഞ്ഞ്

എന്തു മയിൽ ?

ആടും മയിൽ

എന്ത് ആട്ടം ?

കളിയാട്ടം 

എന്തു കളി ?

കല്ലുകളി

എന്തു കല്ല് ?

പാറക്കല്ല്.

എന്തു പാറ ?

വട്ടപ്പാറ 

എന്ത് വട്ടം

3.

ഡും ഡും ഡും 

ആരാത്?

മാലാഖ 

എന്തിന് വന്നു? 

എഴുത്തിനു വന്നു 

എന്തെഴുത്ത്? 

തലേ ലെഴുത് 

എന്ത് തല? 

മൊട്ടത്തല 

എന്ത് മുട്ട? 

കോഴി മുട്ട 

എന്ത് കോഴി? 

പൂവൻ കോഴി 

എന്ത് പൂവ്? 

ചെത്തി പൂവ് 

എന്ത് ചെത്തി 

കാട്ട് ചെത്തി 

എന്ത് കാട്? 

പട്ടി ക്കാട് 

എന്ത് പട്ടി? 

പേപ്പട്ടി 

എന്ത് പേ? 

പെപ്പര പെപ്പര പേ

ക്ലാസ് റൂം പ്രക്രിയ എന്തായിരിക്കും?

•  ആദ്യഭാഗം എല്ലാവരും നോക്കിചൊല്ലും ,എഴുതിയെടുക്കും 
• പിന്നെ വരികൾ (ഒന്നോ രണ്ടോ ആയാലും മതി) കൂട്ടിച്ചേർക്കും
• ടീച്ചർ സഹായമാവശ്യമുള്ളവർക്ക് നൽകും ( എഴുത്തിൽ)
• പിന്നെ അവതരണം
• ബി ബി യിൽ ക്രോഡീകരിക്കൽ
• ഇഷ്ടപ്പെട്ട കൂടുതൽ വരികൾ പകർത്തൽ
• ക്ലാസിൽ ചോദ്യോത്തരപ്പാട്ട്. ( തത്സമയ നിര്‍മിതിയും)

അത്രയും മതി

ഇങ്ങനെ ഭാഷാ ശേഷികളെ സമഗ്രമായി കാണുന്ന പ്രവർത്തനങ്ങൾ വികസിപ്പിച്ചു കൂടെ?

ഭാഗം മൂന്ന്

ദയമാഡി ഇന്ത ഹോഗി

എന്നതാണ് ടി പത്മനാഭന്റെ ഇന്നത്തെ( 13/04/2020) മാതൃഭൂമി ദിനപ്പത്രത്തിലെ ലേഖനത്തിന്റെ ശീർഷകം

അത് എന്താ? എന്ന ചോദ്യം വായനക്കു മുമ്പേ ചിന്തയിൽ കൊളുത്തി. ലേഖനത്തിന്റെ ഒടുവിൽ കാണുമെന്ന ചിന്തയോടെ നോക്കിയപ്പോൾ

ലേഖനം അവസാനിക്കുന്നത്

"തേരിതു തെളിച്ചിടുക ധീരനാം സാരഥേ

നേരുന്നു, ഞങ്ങളങ്ങയ്ക്കഖില ഭാവുകം"

എന്ന വരികളാണ്. വീണ്ടും ജിജ്ഞാസ.

ഇതേപോലെ ജിജ്ഞാസ സ്വയം ജനിപ്പിക്കുന്ന വായനാസാ മഗ്രികൾ വേണം  ഇല്ലെങ്കിൽ പകരം കണ്ടെത്താൻ കഴിയണം. മൂന്നു മഹാമാരികള്‍ തന്റെ ജീവിതത്തിലുമുണ്ടായി എന്നും ആ അനുഭവങ്ങള്‍ ചെറുകഥകളായി പിറന്നുവെന്നും ടി പത്മനാഭന്‍ പറയുന്നുണ്ട്. നിങ്ങള്‍ അത് ഇനിയും വായിച്ചില്ലേ?

ഭാഗം നാല്

വിശകലനശേഷിയും വിമര്‍ശനാവബോധവും കഥാസംവാദങ്ങളും

വിശകലനശേഷിയും വിമര്‍ശനാവബോധവും എല്ലാ കുട്ടികള്‍ക്കും ഭാഷയിലൂടെയും നേടാനാകണം. അതിന് സാഹിത്യ കൃതികളെ പ്രയോജനപ്പെടുത്താം. പല വാതിലുകള്‍ തുറന്നിടുന്ന രചനകള്‍ കണ്ടെത്താം

മുതിര്‍ന്ന കുട്ടികള്‍ക്കും കഥകള്‍  ഉയര്‍ന്ന ചിന്തയ്ക്കുള്ള അവസരമാക്കാം.
ഒരു കഥയ്ക്ക്‌ ഒത്തിരി വ്യാഖ്യാനങ്ങള്‍ ,മാനങ്ങള്‍ , പല വീക്ഷണങ്ങളില്‍ നിന്നും നോക്കി കാണല്‍ ,കഥയെ സമൂഹവുമായി  ബന്ധിപ്പിക്കല്‍ ..ഒക്കെ ആകാം.ഏതെങ്കിലും കൃത്യമായ ഒരു ഉത്തരമല്ല കഥയിലുള്ള ചിന്തയുടെ പ്രവര്‍ത്തനമാണ് വലുത്.
ഓരോ കൃതിയും ഓരോ ആകാശം തുറന്നിടുന്നു . ഇഷ്ടം പോലെ  പറക്കാം .പക്ഷെ ക്ലാസുകളില്‍ കൂടുകള്‍ പണിതിടുന്നു. ചിന്തയുടെ ചിറകടി ഭയക്കുന്ന ക്ലാസുകള്‍ ശാപം തന്നെ .
ഒരു കഥ അവതരിപ്പിച്ചു സാധ്യത നോക്കാം ..
പൌലോ കൊയ്‌ലോയുടെ വെറോനിക്ക മരിക്കാന്‍ തീരുമാനിക്കുന്നു എന്ന നോവലില്‍ നിന്നും ഒരു കഥ ഇതാ... ( ബ്ലോഗില്‍ മുമ്പൊരിക്കല്‍ ഈ കഥ പങ്കിട്ടിട്ടുണ്ട്)

'ഒരു  ഉഗ്ര മന്ത്രവാദി രാജ്യം മുഴുവന്‍ നശിപ്പിക്കാനായി ഒരു കിണറ്റില്‍ മാന്ത്രിക  ഔഷധം കലക്കി.
ആ രാജ്യത്തെ ആളുകളെല്ലാം വെള്ളം കുടിക്കനുപയോഗിച്ചിരുന്ന കിണറായിരുന്നു അത്.
ആരെല്ലാം വെള്ളം കുടിക്കുന്നുവോ അവരെല്ലാം ഭ്രാന്തരായിത്തീരും.

പിറ്റേന്ന് രാവിലെ ആളുകളെല്ലാം ആ വെള്ളം കുടിക്കുകയും എല്ലാവരും ഭ്രാന്തരായിത്തീരുകയും ചെയ്തു. എന്നാല്‍ രാജാവിനും കുടുംബത്തിനും  കൊട്ടാരക്കെട്ടിനകത്ത് മറ്റൊരു കിണറാണ് ഉപയോഗിക്കാന്‍ ഉണ്ടായിരുന്നത്.
അതില്‍ മന്ത്രവാദി വിഷം കലക്കിയിരുന്നില്ല.
അതു കൊണ്ട് അവര്‍ക്ക് മാത്രം ഭ്രാന്തു വന്നില്ല .

രാജാവ് ആകെ വിഷമത്തിലായി .
നാട്ടുകാര്‍ക്കെല്ലാം സുരക്ഷയും ആരോഗ്യവും ഉറപ്പു വരുത്തുന്ന പല ശാസനകളും പുറപ്പെടുവിച്ചുകൊണ്ട് അവരെ നിയന്ത്രിക്കാന്‍ രാജാവ് ശ്രമിച്ചു.
പോലീസുകാരും ഇന്‍സ്പെക്ടര്‍മാരും വിഷ വെള്ളം കുടിച്ചിരുന്നതിനാല്‍ രാജാവിന്റെ തീരുമാനങ്ങള്‍ മനസ്സിലാക്കുവാനോ നടപ്പാക്കാനോ അവര്‍ക്ക് കഴിയില്ലല്ലോ.

കല്പനകള്‍ കേട്ട നാട്ടുകാരെല്ലാം രാജാവിന് ഭ്രാന്തായിപ്പോയെന്നും അതിനാലാണ് അത്തരം കല്പനകള്‍ പുറപ്പെടുവിക്കുന്നതെന്നും കരുതി .
അവര്‍ കോട്ടയിലേക്ക് കൂട്ടം ചേര്‍ന്നു വരികയും രാജാവ് സ്ഥാനം ഒഴിയണം എന്നു ആവശ്യപ്പെടുകയും ചെയ്തു. .
മനം മടുത്ത രാജാവ് സിംഹാസനം ഒഴിയാന്‍ തീരുമാനിച്ചു.

എന്നാല്‍ രാജ്ഞി അതു തടഞ്ഞു.
അവര്‍ പറഞ്ഞു -
"നമ്മുക്കെല്ലാം ആ പൊതു കിണറ്റിലെ വെള്ളം കുടിക്കാം അപ്പോള്‍ നമ്മളും അവരെപ്പോലാകും "
അങ്ങനെ അവരും അതു ചെയ്തു.
രാജാവും രാജ്ഞിയും ഭ്രാന്തിന്റെ വെള്ളം കുടിച്ചു.
ഉടന്‍ തന്നെ അസംബന്ധം പറയാന്‍ തുടങ്ങി.
ഒരിക്കല്‍ എതിര്‍ത്തിരുന്ന ജനങ്ങള്‍ "ഇപ്പോള്‍ രാജാവ് അറിവുള്ള ആളുകളെ പ്പോലെ പറയുകയും പ്രവര്‍ത്തിക്കുകയും ചെയ്യുന്നു
അദ്ദേഹം രാജ്യഭാരം തുടരാതിരിക്കെണ്ടാതുണ്ടോ.." എന്നു വിലയിരുത്തി.
നാട് ശാന്തിയോടെയും സമാധാനത്തോടെയും ജീവിക്കാനാരഭിച്ചു.
അയല്‍ രാജ്യങ്ങളിലെ ആളുകളില്‍ നിന്നും വളരെ വ്യത്യസ്തരായാണ് അവര്‍ പെരുമാറിയിരുന്നത്.
രാജാവിനാകെട്ടെ അദ്ദേഹത്തിന്റെ കാലം മുഴുവന്‍ രാജ്യം ഭരിക്കുവാന്‍ കഴിയുകയും ചെയ്തു.'

സംവാദത്തിനുള്ള ചോദ്യങ്ങള്‍

• ഈ പ്രസ്താവനകളോട് നിങ്ങള്‍ യോജിക്കുന്നുണ്ടോ?എന്ത് കൊണ്ട് ?

1. അവരവരുടെ ലോകത്ത് മാത്രം ജീവിക്കലാണ് ഭ്രാന്ത്.
2. മറ്റുള്ളവരില്‍ നിന്നും വ്യത്യസ്തരായി ജീവിക്കുന്നവരാണ് ഭ്രാന്തര്‍

• ഈ കഥയില്‍ അയല്‍ രാജ്യത്തോടുള്ള സമീപനം സംബന്ധിച്ചുള്ള എന്തെങ്കിലും നിലപാടുകള്‍ തെളിയുന്നുണ്ടോ ?
• രാജാവും ജനവും തമ്മില്‍ ജീവിത ഭൌതിക സൌകര്യങ്ങളില്‍ ഭീമമായ അന്തരം ഉണ്ടായാല്‍ രാജാവ് എന്ത് ചെയ്യണം?
• ഈ കഥ നമ്മുടെ ജനാധിപത്യ സങ്കല്പ്പനങ്ങളുമായി  എത്രമാത്രം പൊരുത്തപ്പെടുന്നു.?
• ജനങ്ങളെ എങ്ങനെയും തൃപ്ത്തിപ്പെടുത്തി അധികാരത്തില്‍ തുടരുകയാണോ ഒരു ഭരണാധികാരി ചെയ്യേണ്ടത്?
• മതഭ്രാന്ത്‌  പിടിച്ച ഒരു സമൂഹത്തിലെ ഭരണാധികാരിയാണ് നിങ്ങള്‍ എങ്കില്‍ എന്ത് ചെയ്യും.?
• നിങ്ങള്ക്ക് ഈ കഥ ഇഷ്ടമായോ ? കാരണം വ്യക്തമാക്കാമോ.
• "നാട് ശാന്തിയോടെയും സമാധാനത്തോടെയും ജീവിക്കാനാരഭിച്ചു." ഈ വാക്യം ഈ കഥയില്‍ എന്ത് സ്വാധീനമാണ് ചെലുത്തുന്നത്?
• "അയല്‍ രാജ്യങ്ങളിലെ ആളുകളില്‍ നിന്നും വളരെ വ്യത്യസ്തരായാണ് അവര്‍ പെരുമാറിയിരുന്നത്." ഈ വാക്യം രചയിതാവ് ഉപയോഗിക്കുന്നത് എന്ത് കാര്യം സ്ഥാപി ക്കാനാണ്   .?
• "രാജാവ് അറിവുള്ള ആളുകളെപ്പോലെ പറയുകയും പ്രവര്‍ത്തിക്കുകയും ചെയ്യുന്നു" ഈ വാക്യം നല്‍കുന്ന സൂചന എന്താണ്.?

കുട്ടികളുടെ വിശകലന ശേഷി അളക്കാനും വികസിപ്പിക്കാനും ഇത്തരം ചോദ്യങ്ങള്‍ ഉപയോഗിക്കണ്ടേ?
കഥാ സംവാദങ്ങള്‍,ചര്‍ച്ചകള്‍ സംഘടിപ്പിക്കണ്ടേ ?

ഭാഗം അഞ്ച്

• പരീക്ഷയിലെ എ പ്ലസ് അല്ല വേണ്ടത് ഭാഷയിലെ എപ്ലസ് ആണ്. അതിന്റെ സൂചകങ്ങള്‍ വികസിപ്പിക്കണം.
• നല്ല പ്രഭാഷകയായ കുട്ടി ഉത്തരക്കടലാസില്‍ കാലം ചെയ്യുന്ന അവസ്ഥയുണ്ടാകരുത്.
• വിപ്ലവകാരിയായ അധ്യാപകന്‍ കുറ്റം പറയുന്നില്ല . കുറവുകള്‍ തീര്‍ക്കുകയാണ് ചെയ്യുക
• തുലാഭാരം സിനിമ ദൃശ്യപാഠമായി ഉപയോഗിച്ചുകൂടേ? അതില്‍ കവിതയുണ്ട് ( കാറ്റടിച്ചു കൊടുങ്കാറ്റടിച്ചു, ഓമനത്തിങ്കളിലോണം പിറക്കുമ്പോള്‍,പ്രഭാത ഗോപുര വാതില്‍ തുറന്നു പണ്ടു മനുഷ്യന്‍ വന്നൂ..) വീക്ഷണമുണ്ട്, നിലപാടുണ്ട്, ജീവിതമുണ്ട്. എന്തെല്ലാം ഭാഷാ സാധ്യതകള്‍? ലോകാവസാനം വരെ കുത്തിക്കെട്ടിയ പാഠപുസ്തക സങ്കല്പം ചുമക്കണോ?
  
  
  ഭൂതകാലത്തെയും ഭാവികാലത്തെയും വര്‍ത്തമാനകാലത്തെയും അനുഭവിക്കുന്നതിനെക്കുറിച്ച് പ്രതിപാദിക്കുന്ന പേരറിയാക്കവികളുടെ ഇത്തരം പാട്ടുകളുടെ ചന്തവും ആഴവും അറിയേണ്ടവരല്ലേ കുട്ടികള്‍?
  വലിയ മനിച്ചരെ പറഞ്ഞുവിടപ്പാ
  ചെറിയ മനിച്ചരെ പറഞ്ഞിരുത്തപ്പാ
  രേരിരേരേരോം എന്റപ്പാ രേരിരേരേരോം
  ഏറിയ കുന്നെ പെരവെയ്യപ്പാ
  ഏറിയ കുന്നേ പെരവെച്ചെന്നാ
  വരിണോരേം കാണാം
  പോണോരേം കാണാം
   വെറ്റേം തിന്നാം
  വട്ടീം നെയ്യാം
   
  രേരിരേരേരോം എന്റപ്പാ രേരിരേരേരോം
  രേരിരേരേരോം എന്റപ്പാ രേരിരേരേരോം
  .......
  അതെ വലിയ മനിച്ചരെ പറഞ്ഞുവിട്ട് ചെറിയ മനിച്ചരോടൊപ്പം കഴിയാം. അതൊരു ലോക വീക്ഷണമാണ്.