236. ശ്യാമടീച്ചറുടെ ഒന്നാം ക്ലാസില്‍ സന്തോഷവും അഭിമാനവും -അഭിമുഖം

സൈജ എസ്: ശ്യാമടീച്ചര്‍, ഒന്നഴക് അക്കാദമിക കൂട്ടായ്മയ്ക്ക് വേണ്ടിയാണ് ഞാന്‍ ടീച്ചറുമായി

സംസാരിക്കുന്നത്. ഒന്നാം ക്ലാസ്സിൽ മുഴുവൻ കുട്ടികളും ലഘുവാക്യങ്ങൾ വായിക്കുന്നു, എഴുതുന്നു, ലഘുബാല സാഹിത്യകൃതികൾ വായിക്കുന്നു എന്നത് ഭാഷയുടെ ഏറ്റവും ഉയർന്ന പഠനലക്ഷ്യമാണ് എന്നിരിക്കെ രണ്ടാം ടേം തീരും മുമ്പെ തന്നെ “എൻ്റെ ക്ലാസ്സിലെ മുഴുവൻ കുട്ടികൾക്കും മലയാളം എഴുതാനും വായിക്കാനും കഴിയും” എന്ന് പ്രഖ്യാപിച്ച ശ്യാമടീച്ചറിന് ഹൃദയാഭിനന്ദനങ്ങൾ. ഈയൊരു വലിയ നേട്ടത്തെ ശ്യാമ ടീച്ചർ എങ്ങനെ നോക്കിക്കാണുന്നു?

ശ്യാമ. ആർ: ഒന്നാംക്ലാസിൽ നടത്തിവരുന്ന ഇപ്പോഴത്തെ വിവിധ പഠന പ്രവർത്തനങ്ങൾ കുട്ടികൾക്ക് പ്രയാസമില്ലാതെ കാര്യങ്ങൾ ഗ്രഹിക്കാൻ സാധിക്കുന്നുണ്ട്. സംയുക്തഡയറി എഴുത്തിലൂടെ സ്വന്തമായി കുട്ടികൾ എഴുതി തുടങ്ങി. ഉത്തർപ്രദേശിൽ നിന്നെത്തിയ ഒരു മകനടക്കം എൻ്റെ എല്ലാ കുട്ടികളും വായിക്കും എഴുതും. അത് പൊതുവിദ്യാലയത്തിലെ അധ്യാപിക എന്ന നിലയിൽ അഭിമാനകരമായ നേട്ടമായിത്തന്നെ കാണുന്നു.

 സൈജ എസ്: ഉത്തരപ്രദേശില്‍ നിന്നുള്ള കുട്ടിക്ക് മലയാളം അറിയില്ലല്ലോ? ടീച്ചര്‍ എങ്ങനെയാണ് ആ കുട്ടിയെ ഒപ്പം കൂട്ടിയത്?

 ശ്യാമ. ആർ: ആ കുട്ടിയുടെ വീട്ടിൽ ആർക്കും മലയാളം എഴുതാൻ അറിയില്ല. ഉത്തർപ്രദേശുകാരനായ സത്യാപട്ടേലിന് ടീച്ചറായ ഞാനും കുട്ടിയും കൂടെ ആയിരുന്നു ആദ്യo ഡയറി എഴുതി തുടങ്ങിയത്. ഇപ്പോൾ സ്വന്തമായി വീട്ടിൽ നിന്ന് എഴുതി വരും. ആ കുട്ടിയുടെ രക്ഷിതാവിന്റെ പ്രതികരണം വാട്സാപ്പിലുണ്ട്.

 സൈജ എസ്: വായിക്കൂ, ടീച്ചറേ

ശ്യാമ. ആർ: വായിക്കാം.

हम सत्य के पापा हैं. हम उत्तर प्रदेश के रहने वाले हैं. सत्य यहां के मलयालम अच्छा बोलता है और लिखना भी अच्छा है. स्कूल में टीचर लोग अच्छे से पढ़ते हैं सत्य पढ़ने में भी अच्छा है हम लोगों को मलयालम पढ़ना नहीं आता लिखना भी नहीं आता है लेकिन सत्य अच्छे लिखता है और पढ़ना भी है हमारे बेटे की अच्छी पढ़ाई है

സൈജ എസ്: ആഹാ, മനോഹരമായ അംഗീകാരം.

 ശ്യാമ. ആർ: മറ്റ രക്ഷിതാക്കളുടെ കുറിപ്പുമുണ്ട്. 

സൈജ എസ്: അത് പിന്നെ വായിക്കാം. ഈ നേട്ടത്തിലെക്കെത്താൻ ടീച്ചറിന് അനുകൂലമായി വന്ന ഘടകങ്ങളെപ്പറ്റി പറയാമോ?

 ശ്യാമ. ആർ: അത് തീർച്ചയായും ഹാൻ്റ് ബുക്കും ഒന്നഴക് അക്കാദമിക കൂട്ടായ്മയിലൂടെ ലഭിക്കുന്ന ടീച്ചിങ് മാന്വലും കൃത്യമായി പിന്തുടർന്നതിൻ്റെ ഫലമാണ്. എല്ലാ ദിവസവും എല്ലാ കുട്ടികളും സംയുക്ത ഡയറി എഴുതുന്നുണ്ട്. ഉത്തർ പ്രദേശിൽ നിന്നെത്തിയ മോനെ ഞാൻ സ്കൂൾ വാഹനം ഫസ്റ്റ് ട്രിപ്പ് പോയ ശേഷം ക്ലാസ്സിലിരുത്തിയാണ് ഡയറി എഴുതിക്കാറ്. രക്ഷിതാക്കളുടെ പിന്തുണയും കൃത്യമായി ലഭ്യമാകുന്നുണ്ട്. രക്ഷിതാക്കളുമായി നിരന്തരം ഫോണിൽ ബന്ധപ്പെടുന്നുണ്ട്.

 സൈജ എസ്: പാഠപുസ്തകത്തിനും ഹാൻ്റ്ബുക്കിനുമപ്പുറം മറ്റേതെങ്കിലും പ്രവർത്തനങ്ങൾ ഇത്തരമൊരു മികവിനെ സഹായിച്ചിട്ടുണ്ടോ?

ശ്യാമ. ആർ: നമ്മുടെ ഹാൻ്റ്ബുക്കിൽ തന്നെ പറയുന്ന കഥോത്സവം ജൂണിൽത്തനെ ആരംഭിച്ചിരുന്നു. എല്ലാ വെള്ളിയാഴ്ചയും ലഘു ബാലസാഹിത്യകൃതികൾ കൊടുത്ത് വിടുന്നുണ്ട്. ആദ്യഘട്ടത്തിൽ മുതിർന്നവർ വായിച്ചു കൊടുക്കുന്ന വീഡിയോയും ആഡിയോയും ഇപ്പോൾ കുട്ടികൾ ഒറ്റയ്ക്ക് വായിക്കുന്ന വീഡിയോയും ക്ലാസ്സ് ഗ്രൂപ്പിൽ പങ്കിടാറുണ്ട്.

 സൈജ എസ്: കുട്ടികളുടെ നിരന്തരവിലയിരുത്തലും പഠനപുരോഗതിയും ഏത് രീതിയിൽ ക്ലാസില്‍ സ്വാധീനിക്കപ്പെട്ടു. 

ശ്യാമ. ആർ: കുട്ടികളുടെ അക്ഷര ബോധ്യച്ചാർട്ട് ആദ്യഘട്ടത്തിൽ നോട്ട്ബുക്കിൽ ഓരോ കുട്ടിക്കും തയ്യാറാക്കിയിരുന്നു. പിന്നീട് ഒന്നഴകിലൂടെ പ്രിൻ്റ് ഫോർമാറ്റ് കിട്ടിയപ്പോൾ എല്ലാ കുട്ടികൾക്കും പ്രിൻ്റെടുത്ത് തയ്യാറാക്കിയിട്ടുണ്ട്. അക്ഷരബോധ്യച്ചാര്‍ട്ട് ഇതാ, നോക്കൂ

സൈജ എസ്: ഗംഭീരം, എല്ലാ കുട്ടികളും നിശ്ചിതാക്ഷരങ്ങള്‍ സ്വായത്തമാക്കിയിരിക്കുന്നു. പഠനവേഗത കുറഞ്ഞ കുട്ടികള്‍ അത് വൈകിയാണെങ്കിലും നേടുന്നുമുണ്ട്. ക്ലാസ്സിൽ സ്ഥിരഹാജറില്ലാത്ത ഒരു കുട്ടിയുണ്ടല്ലോ? അക്ഷരബോധ്യച്ചാര്‍ട്ടില്‍ അങ്ങനെ കാണുന്ന. ആ കുട്ടിയും വൈകിയാണെങ്കിലും അക്ഷരം സ്വായത്തമാക്കിയിട്ടുണ്ട്. എങ്ങനെയാണ് പിന്തുണയ്ക്കുന്നത്?

ശ്യാമ. ആർ:   ഒരു കുട്ടിയുണ്ട്. എപ്പോഴും അസുഖങ്ങളാണ് രക്ഷിതാവ് കാരണമായി പറയുക.. ഹെൽത്ത് ഡിപ്പാർട്ട്മെൻ്റുമായി ഞാൻ ബന്ധപ്പെടുകയും രക്ഷിതാവിന് ബോധവൽക്കരണ ക്ലാസ് കൊടുക്കുകയും ചെയ്തു.

 സൈജ എസ്: വായന പരിശീലിച്ച് വന്ന കുട്ടികൾ ക്ലാസ്സിലുണ്ടോ? അവരുടെ കാര്യം പറയാമോ?

 ശ്യാമ. ആർ: വായന പരിശീലിച്ചു എന്ന് പറയാനാവില്ല. കുറച്ചക്ഷരങ്ങൾ കണ്ടാലറിയുന്ന കുട്ടികൾ ഉണ്ടായിരുന്നു. ഒരക്ഷരം പോലും തിരിച്ചറിയാതെ വന്ന മറ്റ് കുട്ടികളും ഇപ്പോൾ നന്നായി വായിക്കുന്നുണ്ട്.

 സൈജ എസ്:  ശ്യാമ ടീച്ചറിനെ കഴിഞ്ഞ വർഷം ഒന്നഴക് നടത്തിയ മികവഴക് പരിപാടിയിലൊന്നും കണ്ടിട്ടില്ലല്ലോ. അങ്ങനെയൊന്ന് അറിഞ്ഞില്ലായിരുന്നോ?! 

ശ്യാമ. ആർ: അറിഞ്ഞിരുന്നു. സൈജടീച്ചറിനോട് സംസാരിക്കാൻ മെസഞ്ചറിൽ മെസേജ് ഇട്ടിരുന്നു. ടീച്ചർ പക്ഷെ കണ്ടിട്ടില്ല. എന്നാൽ ടീച്ചർ എൻ്റെ ഒരു fb പോസ്റ്റ് ഷെയർ ചെയ്തിട്ടുണ്ട്. അത് രണ്ട് വർഷം മുമ്പ് വിദ്യാഭ്യാസവകുപ്പ് ഇറക്കിയ ഒന്നാം ക്ലാസ് ഒന്നാന്തരം എന്ന പുസ്തകത്തിൽ എൻ്റെ ക്ലാസ്സിനെ കുറിച്ച് പരമാർശം ഉള്ളത്. ഡയറ്റിലെ ഒരു ട്രെയിനിങ്ങിൽ ഞാൻ ആദ്യമായി അറിയുന്ന അഭിമാനനിമിഷത്തിൻ്റെ വീഡിയോ ആയിരുന്നു പങ്കിട്ടത്. കലാധരൻമാഷിനോട് സംസാരിക്കാനും ഒത്തിരി ആഗ്രഹിച്ചിരുന്നു. ഞാൻ രതീഷ് സംഗമത്തിനോടൊക്കെ പറഞ്ഞിരുന്നു. ഇപ്പൊ എന്തായാലും ഒന്നഴകിൻ്റെ ടീച്ചിങ് മാന്വൽ നിർമ്മാണവുമായി ബന്ധപ്പെട്ട് മാഷിനോട് വാട്സ് ആപിൽ സംസാരിക്കാൻ കഴിഞ്ഞു. ഒത്തിരി സന്തോഷം.

 സൈജ എസ്: കരുനാഗപ്പള്ളി ഉപജില്ലയിലെ മറ്റ് വിദ്യാലയങ്ങളിലെ ഒന്നാം ക്ലാസിലെ അവസ്ഥ എന്താണ്? ഒരു റിസോഴ്സ് പേഴ്സണ്‍ എന്ന നിലയില്‍ ശ്യാമടീച്ചറുടെ വിലയിരുത്തല്‍?

 ശ്യാമ. ആർ: ഇവിടെ എണ്‍പതോളം അധ്യാപകര്‍ ഒന്നാം ക്ലാസില്‍ പഠിപ്പിക്കുന്നുണ്ട്. ഞങ്ങളുടെതായ വാട്സാപ്പ് കൂട്ടായ്മയുണ്ട്. പരസ്പരം സംശയങ്ങള്‍ ചോദിച്ചും വ്യക്തത വരുത്തിയുമാണ് മുന്നോട്ട് പോകുന്നത്. വേറിട്ട പ്രവര്‍ത്തനങ്ങളും പങ്കിടും. ഒന്നാം ക്ലാസ് മികച്ച നിലയില്‍ പോകുന്നുവെന്നാണ് ആ കൂട്ടായ്മയില്‍ നിന്നും എനിക്ക് മനസ്സിലാക്കാന്‍ കഴിയുന്നത്.

സൈജ എസ്: ഒന്നാം ക്ലാസിലെ പുതിയ പുസ്തകം വിജയകരമായി നടപ്പിലാക്കിക്കൊണ്ടിരിക്കുന്ന ടീച്ചര്‍ക്ക് എന്താണ് ഒന്നഴക് അക്കാദമിക കൂട്ടായ്മയിലെ സുഹൃത്തുക്കളോട് പറയാനുള്ളത്?

ശ്യാമ. ആർ:

സർക്കാർ സ്ക്കൂളുകളിൽ കുട്ടികളുടെ പഠന നിലവാരം വേണ്ടത്ര ഇല്ല എന്ന തെറ്റായ ധാരണകൾക്കിടയിൽ നിന്ന് യാഥാർത്ഥ്യം മറ്റൊന്നാണ് എന്ന് എന്റെ ക്ലാസിലെ ഫലം ബോധ്യപ്പെടുത്തുന്നു. ഞങ്ങൾ അധ്യാപകർ ഇക്കാര്യത്തിൽ ഉത്തരവാദിത്വം നീതിയോടെ നടപ്പാക്കുന്നു എന്നതും കാണാതിരിക്കാൻ കഴിയില്ല. ഒന്നാം ക്ലാസിൻ്റെ അധ്യാപിക എന്ന നിലയിൽ ഏറെ സന്തോഷത്തോടെയും അഭിമാനത്തോടെയുമാണ് ഈ മുന്നേറ്റത്തെ കാണുന്നത്. ഏവരുടെയും സ്നേഹസഹകരണവും ഇക്കാര്യത്തിൽ ഞങ്ങൾക്ക് പ്രചോദനം ഏകിയിട്ടുണ്ട്. കൂടുതൽ ജാഗ്രത്തായ പ്രവർത്തനം ഇനിയും നടത്തുമെന്ന് കൂടി ഒന്നഴക് ടീമിനെ അറിയിക്കുന്നു

സൈജ എസ്:

രക്ഷിതാക്കളുടെ പ്രതികരണങ്ങള്‍ വാട്സാപ്പിലുണ്ടെന്നല്ലേ പറഞ്ഞത്? ഇനി അത് വായിക്കാം അല്ലേ?

ശ്യാമ. ആർ:  ടീച്ചറേ അതെല്ലാം ഞാന്‍ ഫോര്‍വേഡ് ചെയ്യാം. പോരെ?

സൈജ എസ്:  മതി. അപ്പോൾ ശ്യാമടീച്ചറിൻ്റെ ക്ലാസ്സ് മുറിയിലെ കൂടുതൽ വിപ്ലവാനുഭവങ്ങളുമായി നമുക്ക് അടുത്ത മികവഴകിൽ കാണാം. ആശംസകള്‍. 

അനുബന്ധം

അക്ഷരബോധ്യച്ചാര്‍ട്ടുകളും രക്ഷിതാക്കളുടെ കുറിപ്പുകളും 

 

രക്ഷിതാക്കളുടെ കുറിപ്പുകള്‍

1. നന്നായി വായിക്കാനും എഴുതാനും പഠിച്ചു.

ശിവയുടെഅമ്മ: L K. G, U. K. G ക്ലാസ്സുകളിൽ എന്റെ മകൻ വളരെ സൈലന്റ് ആയിട്ട് ഉള്ള ഒരു കുട്ടി ആയിരുന്നു. കൂട്ടുകാരുമായി കളിക്കാൻ ഒക്കെ വളരെ ബുദ്ധിമുട്ട് ആയിരുന്നു. ഒന്നാം ക്ലാസ്സിൽ ആയപ്പോൾ അവനു നല്ല മാറ്റം ഉണ്ട്. മിടുക്കൻ ആയിട്ട് പഠിക്കുന്നുണ്ട്. അക്ഷരങ്ങൾ ഒക്കെ നന്നായി വായിക്കാനും എഴുതാനും പഠിച്ചു. നന്നായി സംസാരിക്കും. പാട്ട് പാടും നല്ല ആക്റ്റീവ് ആയിട്ടുണ്ട്.

2. ടീച്ചറിൻ്റെ പോസിറ്റീവ് അപ്രോച്ച് എൻ്റെ മകൻ്റെ mind ഹാപ്പി ആക്കുന്നു

DhyanRaj ൻ്റെ അമ്മ: എൻ്റെ മകൻ്റെ അക്ഷരങ്ങൾ കൂട്ടി ചേർത്തു എഴുതാനും വായിക്കാനും ഉള്ള പുരോഗതിയിൽ വളരെ സന്തോഷം ഉണ്ട്. സംയുക്ത ഡയറി എഴുതുന്നത് ഒരു നല്ല കാര്യമാണ്. കുഞ്ഞുങ്ങൾക്ക് അക്ഷരങ്ങൾ കൂടുതൽ പരിചയപ്പെടാൻ ഇത് സഹായിക്കും. Syama teacher കുട്ടികൾക്ക് നല്ല രീതിയിൽ care നൽകുന്നുണ്ട്. എല്ലാ കുട്ടികൾക്കും ഒരുപോലെ പരിഗണന നൽകി, എല്ലാവർക്കും അവസരങ്ങൾ നൽകി നന്നായി ക്ലാസ്സ് മുന്നോട്ട് പോകുന്നു. ടീച്ചറിൻ്റെ പോസിറ്റീവ് അപ്രോച്ച് എൻ്റെ മകൻ്റെ mind ഹാപ്പി ആക്കുന്നു. fourth std വരെ ഒന്നിൽ ഇരിക്കണം എന്ന് അവൻ പറഞ്ഞു. അമ്മ എന്ന നിലയിൽ സ്കൂളിൽ നടക്കുന്ന പരിപാടിക്ക് പിന്നിൽ മാറി നിന്നാൽ ടീച്ചർ മുൻപിൽ ഞങ്ങളെ എത്തിക്കും. Syama teacher is a best friend for each student and parents according to my opinion. As a mother am so happy and proud about my son's school life especially 1St std..

3. മോൾ തനിയെ വായിക്കാൻ തുടങ്ങി

ദുർഗയുടെ അമ്മ:. ടീച്ചറിന്റെ ക്ലാസ്സ്‌ കൊണ്ട് മോളുടെ പഠനത്തിൽ നല്ല മാറ്റം ഉണ്ട്. കൂടാതെ എല്ലാ ആഴ്ച യിലും ഓരോ കഥബുക്ക്‌ വീതം ടീച്ചർ കൊടുത്തു വിടും. അതിപ്പോൾ മോൾ തനിയെ വായിക്കാൻ തുടങ്ങി, കട്ടിയുള്ള വാക്കുകളെ ഞാൻ പറഞ്ഞു കൊടുക്കേണ്ടി വരുന്നുള്ളു. പിന്നെ സംയുക്ത ഡയറി എഴുതുന്നത് കുട്ടികളിൽ വലിയൊരു മാറ്റം വരുത്താൻ സഹായിച്ചിട്ടുണ്ട്, എന്റെ മകളുടെ കാര്യത്തിൽ ആണെങ്കിൽ കൂടുതൽ മാറ്റം ആണ് ഉണ്ടായത്, ആദ്യമൊക്കെ മോൾ സ്കൂളിൽ നടന്ന കാര്യങ്ങൾ പറയുമ്പോൾ ഞാൻ അത് നല്ലൊരു വാക്കുകളായി ഡയറി യിൽ എഴുതത്തക്ക രീതിയിൽ പറഞ്ഞു കൊടുക്കുമായിരുന്നു. എന്നാൽ ഇപ്പോൾ അവൾ തനിയെ ആണ് ഡയറി എഴുതുന്നത്. അക്ഷരത്തെറ്റ് നല്ല രീതിയിൽ കുറവുണ്ട്

4. കഥപുസ്തകങ്ങളും വായനക്കാർഡുകളും ടീച്ചർ തന്ന് വിടാറുണ്ട്

സുമലത (ദീപക്കിന്റെ അമ്മ): .ഈ അധ്യയന വർഷത്തിൽ ദീപക്കിന് കുറെ മാറ്റങ്ങൾ പഠന കാര്യത്തിൽ വന്നിട്ടുണ്ട്. ദീപക്കിന്റെ ക്ലാസ്സ്‌ ടീച്ചർ ആയ ശ്യാമടീച്ചറിനോട് നന്ദി പറയുന്നു. ടീച്ചർ വളരെ ക്ഷമയോടും ആത്മാർത്ഥതയോടും കൂടി കുട്ടികളെ പഠിപ്പിക്കാറുണ്ട്. അതുകൊണ്ട് തന്നെ പഠിപ്പിക്കുന്നത് ദീപക് വീട്ടിൽ വന്ന് വായിക്കാറുണ്ട്. ദിവസവും സംയുക്ത ഡയറി എഴുതണം എന്ന് ടീച്ചർ പറഞ്ഞിട്ടുണ്ട്. ആദ്യം കുറെ ബുദ്ധിമുട്ട് ആയിരുന്നു എങ്കിലും ഇപ്പോൾ വളരെ മാറ്റം വന്നിട്ടുണ്ട്. കുട്ടികൾക്ക് വായിച്ചു കൊടുക്കാനും പിന്നീട് അവരെ കൊണ്ട് വായിപ്പിക്കാനും കഥപുസ്തകങ്ങളും വായനക്കാർഡുകളും ടീച്ചർ തന്ന് വിടാറുണ്ട്. ദീപക്കിന് എഴുതാനും വായിക്കാനും അറിയാത്തത് ടീച്ചർ അടുത്ത് നിർത്തി പറഞ്ഞ് കൊടുക്കാറുണ്ട്. അതുകൊണ്ട് തന്നെ സ്വന്തമായി മലയാളം വായിക്കാൻ ശ്രമിക്കുന്നുണ്ട്. (കടയിലെ ബോർഡുകൾ, നോട്ടീസ്, ബസിലെ പേരുകൾ) .Extra curicular ആക്ടിവിറ്റികളും ടീച്ചർ ചെയ്യിക്കാറുണ്ട്. ദീപക്കിനെ ഇത്രയും മാറ്റിയെടുത്ത ശ്യാമ ടീച്ചറിനോട് ഒരിക്കൽ കൂടി നന്ദി.

5. സംയുക്ത ഡയറി എഴുതാൻ വളരെ താല്പര്യം

ജിബി സിനു (അബിയ മറിയം സിനുവിന്റെ മാതാവ്): എന്റെ മകൾ ഒന്നാം ക്ലാസ്സിൽ എത്തിയിട്ട് കുറച്ചു മാസങ്ങൾ ആയിട്ടെ ഉള്ളുവെങ്കിലും അവൾ അക്ഷരങ്ങൾ എല്ലാം പഠിച്ചു. വാക്കുകൾ കൂട്ടി വായിക്കാനും എഴുതാനും നന്നായി ശ്രമിക്കുന്നുണ്ട്. കഥപുസ്‌തകങ്ങൾ സ്വന്തമായി വായിക്കാൻ ശ്രമിക്കുന്നുണ്ട്.. അതുപോലെ സംയുക്ത ഡയറി എഴുതാൻ വളരെ താല്പര്യം ആണ്. സ്കൂളിലെ വിശേഷം എല്ലാം ഓരോന്നായി വന്നു പറഞ്ഞു എഴുതാൻ ശ്രമിക്കും. ഇപ്പോൾ ഏതേലും വാക്കോ അക്ഷരമോ എഴുതാൻ അറിയില്ലേൽ ഞാൻ പേന കൊണ്ട് എഴുതാൻ സമ്മതിക്കാതെ പുറകിലെ പേജിൽ നിന്ന് കണ്ടെത്തും. അതുപോലെ തന്നെ അവൾടെ ക്ലാസ്ടീച്ചറിനെ വളരെ ഇഷ്ട്ടാണ്. വൃത്തിയായി എഴുതുന്നതിന് സ്‌റ്റിക്കർ ബുക്കിൽ കൊടുക്കാറുണ്ട്. അത് കൊണ്ട് മലയാളം നോട്ട് ബുക്ക് കണ്ടാൽ ഒന്നാം ക്ലാസിലെ ഞങ്ങൾ പഠിച്ച കാലത്തെ ബുക്ക് പോലെയല്ല. പലതരം പ്രവർത്തനങ്ങളും കഥകളും പറഞ്ഞ്കൊടുക്കുന്നത് കൊണ്ട് സ്കൂളിൽ പോകാൻ വളരെ താല്പര്യം ആണ്.

6. എഴുതാനും വായിക്കാനും പഠിച്ചു

ശ്രീലക്ഷ്മി (നവദേവിന്റെ അമ്മ): കൃത്യമായി വാക്കുകൾക്ക് അകലം പാലിച്ച് എഴുതാൻ പഠിച്ചു. ദിവസവും സംയുക്ത ഡയറി എഴുതിപ്പിക്കുന്നത് കൊണ്ട് സ്‌കൂളിലെ കാര്യങ്ങൾ വീട്ടിൽ വന്ന് പറയുകയും അത് എഴുതാനും താല്‌പര്യം കാണിക്കുന്നുണ്ട്. എഴുതാനും വായിക്കാനും പഠിച്ചു. മോൻ ക്ലാസ്സിൽ പോകാത്ത ദിവസം ടീച്ചർ വിളിച്ചു തിരക്കാറുണ്ട്. അതുകൊണ്ട് തന്നെ ദിവസവും സ്‌കൂളിൽ പോകും. കൃത്യമായി എല്ലാ വിവരങ്ങളും ടീച്ചർ ഗ്രൂപ്പ് വഴി അറിയിക്കാറുണ്ട്.

7. ചെറിയപുസ്തകം വായിക്കാൻ കൊടുക്കുന്നത് തനിയെ വായിക്കാനും തുടങ്ങി

അദിതി. ഡി യുടെ അമ്മ: എൻ്റെ മകൾ ഒന്നാം ക്ലാസിൽ ആയതിനു ശേഷം അവളിൽ നല്ല മാറ്റങ്ങൾ ഉണ്ട്. ഇപ്പോൾ തനിയെ അക്ഷരം കൂട്ടി വായിക്കാനും എഴുതാനും ഒക്കെ തുടങ്ങി. സംയുക്ത ഡയറി എഴുത്തുന്നത്തിലൂടെ ചെറിയ ചെറിയ വാക്കുകൾ തനിയെ എഴുതുന്നുണ്ട്. ചെറിയപുസ്തകം വായിക്കാൻ കൊടുക്കുന്നത് തനിയെ വായിക്കാനും തുടങ്ങി. ശ്യാമടീച്ചറിൻ്റെ ക്ലാസിൽ ആയണക്കെ എൻ്റെ മകൾ പഠിത്തത്തിൽ നല്ല രീതിയിൽ മുന്നോട്ടു വന്നു.

8. കഥപുസ്‌തകം കുറച്ച് കുറച്ച് വായിച്ച് തുടങ്ങി

സൂര്യ. (അഭിലക്ഷ്മിയുടെ അമ്മ): എന്റെ മകൾ അക്ഷരം കൂട്ടിച്ചേർത്തു വായിക്കാൻ തുടങ്ങി. ഡയറി എഴുതി തുടങ്ങി. ബുക്കിൽ എഴുതുന്ന രീതിയിൽ മാറ്റമുണ്ടായി. കഥപുസ്‌തകം കുറച്ച് കുറച്ച് വായിച്ച് തുടങ്ങി.ഇംഗ്ലീഷ് കൊച്ചു സെന്റെൻസ് വായിക്കാൻ തുടങ്ങി. പാട്ടുപാടാനും ഡാൻസ് കളിക്കാനും വലിയ ഇഷ്ട്ടമാണ്

9. സ്ഥിരമായി വരാൻ കഴിഞ്ഞാൽ കുറച്ച് കൂടി മികച്ച രീതിയിൽ മാറാൻ കഴിഞ്ഞേനേ

ഒന്നാം ക്ലാസ്സിൽ പഠിക്കുന്ന അഗ്രിനാഥ് എന്ന കുട്ടിയുടെ അമ്മയാണ്. കുട്ടികളുടെ വൈബിനൊത്ത ഒരു ടീച്ചർ മോൻ്റെ ക്ലാസ്സ് ടീച്ചർ പലപ്പോഴും മോന് പനി വിട്ടു മാറാതെ വരികയും അതിനൊടൊപ്പം ഫിറ്റ്സ് വരാനുള്ള സാധ്യതയുള്ളതു കൊണ്ടു മോന് സ്ഥിരമായി ക്ലാസ്സിൽ വരാൻ കഴിയാറില്ലായിരുന്നു എങ്കിലും മോൻ സ്കൂളിൽ വരുന്ന ദിവസങ്ങളിൽ ടീച്ചർ അടുത്ത് വിളിച്ച് നിർത്തി പറഞ്ഞു കൊടുക്കുകയും. മറ്റു കുട്ടികളുടെ ഒപ്പമെത്തിക്കാൻ ശ്രമിക്കുകയും ചെയ്യും. കഥകൾ പറഞ്ഞും ആംഗ്യപ്പാട്ടിലൂടെയും അവരിലൊരാളായി മാറിയും അക്കളും അക്ഷരളും പടം വരപ്പിച്ചും അവരുടെ പഠനത്തെ ലളിതമാക്കുന്നതുവഴി കുട്ടികൾക്ക് പാഠങ്ങൾ പെട്ടെന്ന് മനസ്സിലാക്കാൻ സാധിക്കുന്നു ഡയറി എഴുതിക്കുന്നത് വഴി അന്ന് കാര്യങ്ങളെ കുറിച്ച് ഒരു വ്യക്ത വരികയും വാക്കുകൾ വേഗത്തിൽ മനസ്സിലാക്കാനും സാധിക്കുന്നുണ്ട്. കലാപരമായും ടീച്ചർ കുട്ടികളെ സപ്പോർട്ട് ചെയ്യാറുണ്ട്. പിന്നെ സ്ഥിരമായി ക്ലാസ്സിൽ വരാൻ കഴിയാത്തത് ഒരു കുട്ടിയുടെ അമ്മയെന്ന നിലയിലുള്ള എൻ്റെ വേദനയാണ് ടീച്ചർ മോനെ ക്ലാസ്സിൽ ശ്രദ്ധിക്കുന്നുണ്ടെന്ന് അറിയാം. എങ്കിലും കുറച്ച് കൂടി ഒന്ന് ശ്രദ്ധിച്ചാൽ നന്നായിരുന്നു. ചില ദിവസങ്ങളിൽ ക്ലാസ്സിൽ വരുമ്പോൾ ചാറ്റാൽ മഴ നനഞ്ഞ് ഓടി വരുന്നത് കണ്ടിട്ടുണ്ട്. ഒരു തണുപ്പ് അടിച്ചാൽ പോലും തുമ്മലും കഫക്കെട്ടുമായി നിരന്തരമായി ആൻ്റി ബയോട്ടിക് കൊടുക്കേണ്ട അവസ്ഥ ഉണ്ടാകാറുണ്ട് പിന്നെ ഫിറ്റ്സ് നിരന്തരമായി വന്നാൽ അത് കുഞ്ഞിന്റെ ബ്രയിനിനെ ബാധിക്കും. മോന് സ്ഥിരമായി ക്ലാസ്സിൽ വരാൻ കഴിഞ്ഞില്ലെങ്കിൽ മോൻ്റെ വിദ്യാഭ്യസത്തെ അത് ബാധിക്കും. പിന്നെ ഡോക്ടർ നിർബന്ധമായും മാസ്ക് വെച്ചു വേണം മോന് സ്കൂളിൽ വിടാൻ എന്ന് പറഞ്ഞിട്ടുണ്ട്. അവൻ ക്ലാസ്സിൽ വരുമ്പോൾ മാസ്ക് ഇല്ലാതെ ഇരിക്കുന്നുതുകാണം ഒന്ന് രണ്ട് ദിവസമായി വെള്ളം തീരെ കുടിക്കാറുമില്ല. ടീച്ചർ എത്ര പറഞ്ഞാലും അവിടെ നിന്ന് മാറുന്ന സമയത്ത് മോൻ ഇതൊന്നും ശ്രദ്ധിക്കില്ല. ടീച്ചർ ഇതൊന്നു പറഞ്ഞ് മനസ്സിലാക്കി കൊടുക്കണം. ഇതൊക്കെ ശ്രദ്ധിച്ചില്ലെങ്കിൽ മോന് സ്ഥിരമായി ക്ലാസ്സിൽ വരാൻ കഴിയില്ലെന്ന് എനിക്കറിയാം. ഒരു കുട്ടിയെ തന്നെ വീട്ടിൽ ശ്രദ്ധിക്കാൻ നല്ല ബുദ്ധിമുട്ടാണ്. അപ്പോൾ അത്രയും കുട്ടികളെ ശ്രദ്ധിക്കുന്ന ടീച്ചറിൻ്റെ ബുദ്ധിമുട്ട് അറിയാൻ വയ്യാഞ്ഞിട്ടല്ല. വളരെ കുറച്ച് ദിവസം വന്നപ്പോൾ തന്നെ എൻ്റെ മോന് പഠന കാര്യങ്ങളിൽ നല്ല മാറ്റം ഉണ്ട്. സ്ഥിരമായി വരാൻ കഴിഞ്ഞാൽ കുറച്ച് കൂടി മികച്ച രീതിയിൽ മാറാൻ കഴിഞ്ഞേനേ.

(ശ്യാമ. ആർ, ജി.ഡബ്ല്യു.എൽ.പി.എസ്, കുലശേഖരപുരം, കരുനാഗപ്പള്ളി കൊല്ലം 94475 93226)