എറണാകുളം ജില്ലയിലെ ഇതര സംസ്ഥാനവിദ്യാര്‍ഥികളുടെ പഠനനിലവാരം - ഒരു താരതമ്യപഠനം

ആമുഖം

കേരളത്തിലെ വിദ്യാലയങ്ങളില്‍‍ ഇതരസംസ്ഥാനങ്ങളില്‍ നിന്നുളള കുട്ടികള്‍ പ്രവേശിക്കപ്പെടുന്ന

പ്രവണത വര്‍ധിച്ചുവരികയാണ്. തൊഴില്‍ തേടി കേരളത്തിലെത്തുന്ന രക്ഷിതാക്കള്‍ അവരുടെ മക്കളെയും കൂടെക്കൊണ്ടു വരുന്നു. കേരളത്തിലെ പൊതു സാംസ്കാരിക സ്ഥിതിയുടെ സ്വാധീനം, സൗജന്യവിദ്യാഭ്യാസ സൗകര്യം, ജാതീയമായ വിവേചനമില്ലായ്മ, പകല്‍ പണിക്കു പോകുമ്പോള്‍ കുട്ടികളെ സുരക്ഷിതമായി സൂക്ഷിക്കാനുളള ഇടം തുടങ്ങിയ പല കാരണങ്ങളാലാണ് ഇതരസംസ്ഥാകുട്ടികള്‍ കേരളത്തിലെ പൊതുവിദ്യാലയങ്ങളിലേക്ക് ആകര്‍ഷിക്കപ്പെടുന്നത്. ഇടുക്കിയിലെ തെയിലത്തോട്ടങ്ങളില്‍ തമിഴ് തൊഴിലാളികള്‍ ജോലിക്കുവരികയും സ്ഥിരതാമസം ആരംഭിക്കുകയും ചെയ്തപ്പോള്‍ തമിഴ് മാധ്യമ വിദ്യാലയങ്ങള്‍ ഒരുക്കി ആ പ്രശ്നത്തെ അഭിസംബോധന ചെയ്യുകയുണ്ടായി. തമിഴ്നാടുമായും കര്‍ണാടകയുമായി അതിരു പങ്കിടുന്ന പ്രദേശങ്ങളില്‍ തമിഴ്, കന്നഡ് മാധ്യമ വിദ്യാലയങ്ങള്‍ നിലവില്‍ പ്രവര്‍ത്തിക്കുന്നുണ്ട്. ഇതില്‍ നിന്നും തുലോം വ്യത്യസ്തമാണ് പുതിയ പ്രവണത. രാജസ്ഥാന്‍,ബംഗാള്‍, ആസാം, ബീഹാര്‍, ഒറിയ, ഉത്തരപ്രദേശ്, തമിഴ് നാട് എന്നീ സംസ്ഥാനങ്ങളില്‍ നിന്നാണ് താല്കാലിക തൊഴിലവസരം പ്രതീക്ഷിച്ച് തൊഴിലാളികള്‍ എത്തുന്നത്. എപ്പോഴാണ് ഇവര്‍ മടങ്ങിപ്പോകുന്നതെന്നറിയില്ല. പീരുമേട് പ്രദേശത്തെ ഇതരസംസ്ഥാനത്തൊഴിലാളികള്‍ ഇത്തരത്തില്‍ മടങ്ങിപ്പോകാറുണ്ടെന്നു പറയപ്പെടുന്നു. കേരളത്തില്‍ പഠിക്കുകയും ഒരു ഘട്ടത്തില്‍ മടങ്ങിപ്പോകേണ്ടി വരികയും ചെയ്താല്‍ ഇതരസംസ്ഥാനകുട്ടികളുടെ വിദ്യാഭ്യാസ തുടര്‍ച്ച എങ്ങനയാകുമെന്നും ആലോചിക്കേണ്ടതുണ്ട്. പ്രാഥമിക വിദ്യാഭ്യാസം മാതൃഭാഷയിലാകണ മെന്നാണ് പൊതുവേ അംഗീകരിക്കപ്പെട്ട സമീപനം. ഇതരസംസ്ഥാനക്കുട്ടികളുടെ കാര്യത്തില്‍ ഇതേ നിലപാട് തന്നെയല്ലേ വേണ്ടത്? പ്രായോഗികമായി ഇതു സാധ്യമാണോ? അവരെ മലയാളത്തില്‍ തന്നെ പഠിപ്പിക്കുകയാണോ വേണ്ടത്? തുടങ്ങിയ ചോദ്യങ്ങളും ഉയര്‍ന്നു വരുന്നുണ്ട്. എറണാകുളം ജില്ലയില്‍ സര്‍വശിക്ഷാ അഭിയാന്‍ വിദ്യാഭ്യാസ വോളണ്ടിയര്‍മാരെ നിയോഗിച്ച് ഇതരസംസ്ഥാനകുട്ടികള്‍ക്ക് വര്‍ഷങ്ങളായി പിന്തുണ നല്‍കി വരുന്നു. അടുത്ത കാലത്ത് റോഷ്ണി പദ്ധതി ഇതേറ്റെടുക്കുകയും മലയാളം പഠിപ്പിക്കുന്നതിന് കോഡ്സ്വിച്ചിംഗ് രീതി അവലംബിക്കുകയും ചെയ്തു. സമഗ്രശിക്ഷാ കേരളം നടപ്പിലാക്കിയ മലയാളത്തിളക്കം പദ്ധതിയുടെ ഭാഗമായി ധാരാളം ഇതരസംസ്ഥാനക്കുട്ടികള്‍ രണ്ടു മൂന്നാഴ്ച്കൊണ്ട് മലയാളം പഠിക്കുകയുണ്ടായി. മലയാളത്തിളക്കമോ റോഷ്ണി പദ്ധതിയോ നടപ്പിലാക്കാത്ത ധാരാളം വിദ്യാലയങ്ങളില്‍ ഇതരസംസ്ഥാനകുട്ടികള്‍ പഠിക്കുന്നുണ്ട്. അവരുടെ പഠനനിലവാരം എന്താണെന്നത് സംബന്ധിച്ച് പ്രത്യേക പഠനങ്ങള്‍ നടന്നതായി അറിവില്ല. ഇതരസംസ്ഥാനക്കുട്ടികളുടെ വിദ്യാഭ്യാസവുമായി ബന്ധപ്പെട്ട് നയരൂപീകരണത്തിനും പ്രവര്‍ത്തനപദ്ധതി ആസൂത്രണം ചെയ്യുന്നതിനും ഇത്തരം പഠനം സഹായകമാകും.

പഠനലക്ഷ്യങ്ങള്‍

1. പ്രൈമറി വിഭാഗത്തില്‍ പഠിക്കുന്ന ഇതരസംസ്ഥാനകുട്ടികളുടെയും കേരളത്തിലെ കുട്ടികളുടെയും വിവിധ വിഷയങ്ങളിലെ പഠനനിലവാരം താരതമ്യം ചെയ്യുക
2. വിവിധ സംസ്ഥാനക്കാരായ കുട്ടികളുടെ വിവിധ വിഷയങ്ങളിലെ പഠനനിലവാരം താരതമ്യം ചെയ്യുക
3. ഇതരസംസ്ഥാനകുട്ടികളുടെ വിദ്യാഭ്യാസം മെച്ചപ്പെടുത്തുന്നതിനുളള നിര്‍ദേശങ്ങള്‍ രൂപീകരിക്കുക

പഠനരീതി

• ഇതരസംസ്ഥാനകുട്ടികള്‍ പഠിക്കുന്നതും റോഷ്നി പദ്ധതി നടപ്പിലാക്കാത്തതുമായ
  
  പതിമൂന്ന് സ്കൂളുകളിലെ നാലാം ക്ലാസാണ് പഠനത്തിനായി തെരഞ്ഞെടുത്തത്
  
• മലയാളം മാതൃഭാഷയായിട്ടളള 487കുട്ടികളും ഇതരസംസ്ഥാനക്കാരായ 57 പേരുമാണ് (തമിഴ് മാതൃഭാഷക്കാരായ 20 വിദ്യാര്‍ഥികളും ബീഹാര്‍ സ്വദേശികളമായ പതിനൊന്നു പേരും ആസാംകാരായ നാലുപേരും ഏഴു ബംഗാളിക്കുട്ടികളും ഒറീസ ,ഉത്തരപ്രദേശ് തുടങ്ങിയ മറ്റു സംസ്ഥാനക്കാരായ പതിനഞ്ചുപേരും ) പഠനത്തിനു വിധേയമായത്.
• ഒരു ബി ആര്‍ സിയില്‍ നിന്നും ഒന്ന് എന്ന കണക്കിലാണ് വിദ്യാലയങ്ങള്‍ തെരഞ്ഞെടുത്തത്.
• ഒന്നാം ടേം പരീക്ഷയുടെ ഉത്തരക്കടലാസ് അതത് വിദ്യാലയങ്ങളിലെ അധ്യാപകര്‍ പരിശോധിച്ച് ഗ്രേഡ് നല്‍കിയതിനെ ആധാരമാക്കിയാണ് വിശകലനം നടത്തിയിട്ടുളളത്.
• പഠനത്തിനായി വിവരശേഖരണം നടത്തുമെന്ന കാര്യം ഉത്തരക്കടലാസ് പരിശോധിക്കുന്നതിന് മുമ്പ് അറിയിച്ചിരുന്നില്ല. ഗ്രേഡ് വിവരം ക്ലാസില്‍ കുട്ടികളെ അറിയിച്ചതിനു ശേഷമാണ് വിവരം ശേഖരിച്ചത്.
• മലയാളം , ഇംഗ്ലീഷ്, ഗണിതം, പരിസരപഠനം എന്നീ വിഷയങ്ങളുടെ കുട്ടികളുടെ നിലവാരം എ, ബി , സി , ഡി എന്നീ ഗ്രേഡുകളിലാക്കി തരുന്നതിനാണ് വിദ്യാലയത്തോട് ആവശ്യപ്പെട്ടത്. ഓരോ ഗ്രേഡിലുമുളള ഓരോ വിഭാഗം കുട്ടികളുടെ എണ്ണം പ്രത്യേക ഫോര്‍മാറ്റ് നല്‍കി ശേഖരിച്ചു

പഠനത്തിന്റെ പരിമിതികള്‍

• നാലാം ക്ലാസിലെ കുട്ടികളെ മാത്രമാണ് പരിഗണിച്ചത്
• പരിഗണിച്ച കുട്ടികള്‍ക്ക് പ്രീസ്കൂള്‍ തലം മുതല്‍ ലഭിച്ച ഭാഷാനുഭവം നിര്‍ണായക സ്വാധീനഘടകമാണ്. അത് പഠനപരിധിയിലില്ല
• വിവിധ വിദ്യാലയങ്ങളില്‍ ഇതരസംസ്ഥാനകുട്ടികള്‍ക്ക് ഏതൊക്കെ തരത്തിലുളള പിന്തുണയാണ് ലഭിച്ചതെന്ന കാര്യവും ഈ പഠനത്തില്‍ ഉള്‍പ്പെടുത്തിയിട്ടില്ല
• ഒന്നാം ടേം മൂല്യനിര്‍ണയഫലത്തെ മാത്രമാണ് ആശ്രയിച്ചിട്ടുളളത്. അതത് അധ്യാപകര്‍ വിലയിരുത്തിയതിനെ അതേ പോലെ സ്വീകരിക്കുകയാണുണ്ടായത്.
• അധ്യാപകരുടെ ലഭ്യത, ക്ലാസിലെ കുട്ടികളുടെ എണ്ണം, ബഹുഭാഷാവിദ്യാര്‍ഥികളുളള ക്ലാസുകളിലെ വിനിമയ പ്രക്രിയ തുടങ്ങിയ കാര്യങ്ങളും പഠനവിധേയമാക്കിയിട്ടില്ല.

ദത്തവിശകലനവും കണ്ടെത്തലുകളും

മലയാളം മാതൃഭാഷയായിട്ടുളളവരും അല്ലാത്തവരും മലയാളത്തിന്റെ പരീക്ഷ ഏഴുതിയിട്ടുണ്ട്. ഇവരെല്ലാം നാലു വര്‍ഷമായി മലയാളം പഠിക്കുന്നവരാണ്. വിവിധ സംസ്ഥാനങ്ങളിലെ കുട്ടികളുടെ ഓരോ ഗ്രേഡിലുമുളള അവസ്ഥയാണ് ചുവടെ നല്‍കിയിരിക്കുന്നത്.

മലയാളത്തിലെ പ്രകടനം

കേരളം                                    A35% ,  B 28 %,  C 22%    D 15%

തമിഴ്നാട്                              A20% ,  B 10%,   C 20 %    D 50 %

ബീഹാര്‍                                 A27% ,   B 0 %,    C 23 %    D 50. %

ആസാം                                 A25% ,   B 25%,   C 25 %     D 25 %

ബംഗാളി                                A0% ,     B 42%,   C 29 %      D 29. %

മറ്റു സംസ്ഥാനക്കാര്‍           A 7% ,    B 20 %,   C 20%       D 53.%

മലയാളം മാതൃഭാഷയായിട്ടുളളവരാണ് എ ഗ്രേഡില്‍ കൂടുതലുളളത് (35% )‍. ബീഹാറുകാരില്‍ 27% മലയാളപ്പരീക്ഷയില്‍ എ ഗ്രേഡ് നേടിയിട്ടുണ്ട്. ആസാം 25% , തമിഴ് 20%വുമാണ്. റോഷിണി പ്രോജക്ട് പോലെ മറ്റു സഹായമില്ലാതിരുന്നിട്ടും 20-27 ശതമാനം തമിഴ്, ബീഹാര്‍ , ആസാം കുട്ടികള്‍ എ ഗ്രേഡു നേടിയത് ശ്രദ്ധേയമാണ്. ഡി ഗ്രേഡുകാരില്‍ കൂടുതല്‍ ശതമാനം മറ്റു സംസ്ഥാനവിഭാഗത്തില്‍ പെട്ടവരും ബീഹാറുകാരും തമിഴ്നാടുകാരുമാണ്. മലയാളം മാതൃഭാഷയായിട്ടുളളവരില്‍ 15% വും ഇതേ ഗ്രേഡില്‍ വരും. മലയാളക്കുട്ടികളുമായി താരതമ്യം ചെയ്താല്‍ മുപ്പത്തഞ്ച് ശതമാനത്തിലധികം വ്യത്യാസം കാണാന്‍ കഴിയും. മലയാളത്തില്‍ ഇതരസംസ്ഥാനക്കുട്ടികള്‍ കേരളത്തിലെ കുട്ടികളേക്കാള്‍ പിന്നാക്കമാണ്. ആസാം, ബംഗാളി വിഭാഗങ്ങളുടെ സ്ഥിതി അത്ര മോശവുമല്ല.

ഇംഗ്ലീഷ്

ഇംഗ്ലീഷ് എല്ലാ വിഭാഗങ്ങള്‍ക്കും രണ്ടാം ഭാഷയാണ്. എങ്ങനെയാണ് ഈ ഭാഷയിലെ നിലവാരം എന്ന് പരിശോധിക്കാം.

കേരളം                         A 44% , B 24%, C 19 % D 13%

തമിഴ്നാട്                    A 20% , B 15%, C 25 % D 35 %

ബീഹാര്‍                        A18.% , B 20. %, C 25. % D 37. %

ആസാം                         A 50% , B 10%, C 40 % D 0%

ബംഗാളി                        A 0% , B 57.%, C 43% D 0 %

മറ്റു സംസ്ഥാനക്കാര്‍.   A13% , B 27%, C 27% D 33 %

മലയാളം മാതൃഭാഷയായിട്ടുളളവരില്‍ 44 % എ ഗ്രേഡിലും 24.% ബി ഗ്രേഡിലും വരും. അതായത് 68.% കുട്ടികള്‍ ഉയര്‍ന്ന നിലവാരത്തിലാണ്. തമിഴ് കുട്ടികളില്‍ മുപ്പത് ശതമാനമാണ് ഉയര്‍ന്ന ഗ്രേഡുകളിലെത്തിയത്. അതേ സമയം ആസാംകാരില്‍ 60% വും തമിഴ് വിഭാഗത്തില്‍ 35% വുംബീഹാറുകാരില്‍ 28. ശതമാനവും മറ്റു സംസ്ഥാനക്കാരില്‍ 40%വും ഉയര്‍ന്ന ഗ്രേഡില്‍ വരും. മാതൃഭാഷയിലുളള എ ഗ്രേഡുകാരേക്കാള്‍ കൂടുതല്‍ ശതമാനം കേരള വിദ്യാര്‍ഥികള്‍ ഇംഗ്ലീഷില്‍ A ഗ്രേഡിലുണ്ട്. ‍ തമിഴ് കുട്ടികളുടെ ഉയര്‍ന്ന ഗ്രേഡിലുളള പങ്കാളിത്തം മലയാളത്തിലും ഇംഗ്ലീഷിലും സമാനമാണ്. ബീഹാറുകാരില്‍ 28.% ഇംഗ്ലീഷില്‍ എ, ബി ഗ്രേഡുകള്‍ നേടിയപ്പോള്‍ 27% പേര്‍ മലയാളത്തിലും ഉയര്‍ന്ന ഗ്രേഡുകളിലാണ്. മറ്റു ഭാഷാവിഭാഗങ്ങളിലും വലിയ അന്തരം കാണുന്നില്ല. അതായത് അവര്‍ക്കെല്ലാം ഇരുഭാഷകളും ഇതരഭാഷകളായതിനാല്‍ ഒരേ പോലെയാണ് സ്വാംശീകരണം.

പരിസ്ഥിതി പഠനം

കേരളം                           A 51% , B 25%,    C 14 % D 10 %

തമിഴ്നാട്                     A 40% ,  B 25%,   C 15 % D 20 %

ബീഹാര്‍                        A 22.% , B 34 %,   C 22.2 % D 22. %

ആസാം                         A 50% , B 25%,    C 25 % D 0 %

ബംഗാളി                        A 0% ,   B 86%,    C 14. % D 0 %

മറ്റു സംസ്ഥാനക്കാര്‍  . A 6% ,   B 40 %,   C 2 7% D 27 %

മലയാളവുമായി താരതമ്യം ചെയ്താല്‍ പരിസ്ഥിതി പഠനത്തില്‍ താരതമ്യേന മെച്ചപ്പെട്ട പ്രകടനാണ് ഇതരസംസ്ഥാന വിദ്യാര്‍ഥികള്‍ നടത്തിയിട്ടുളളത്. എ ഗ്രേഡുകാരായി തമിഴ് 40%, ആസാം 50% വും എ , ബി ഗ്രേഡുകള്‍ ഒന്നിച്ചു കണക്കാക്കിയാല്‍ കേരളത്തിലെ കുട്ടികള്‍ 76% ,ബംഗാളി 86%,, തമിഴ് 65% ബീഹാര്‍ 56% എന്നിങ്ങനെയാണ് നില. ഡി ഗ്രേഡുകാരുടെ ശതമാനവും ഇതരസംസ്ഥാനക്കാരുടെ കാര്യത്തില്‍ വളരെക്കുറവാണ്.

ഗണിതം

കേരളം                               A60% , B 20 %, C 12% D 8 %

തമിഴ്നാട്                         A50% , B 5%, C 25 % D 20 %

ബീഹാര്‍                            A54 % , B 18.%, C 18. % D 10 %

ആസാം                             A50% , B 18 %, C 18. % D 14 %

ബംഗാളി                            A29 % , B 29%, C 42% D 0 %

മറ്റു സംസ്ഥാനക്കാര്‍.       A20% , B 33. %, C 33.% D 14 %

ഗണിതത്തിലേക്ക് വരുമ്പോള്‍ ഇതരസംസ്ഥാന വിദ്യാര്‍ഥികള്‍ വീണ്ടും നില മെച്ചപ്പെടുത്തിയിരിക്കുകയാണ്. കേരളക്കാരില്‍   60%വും തമിഴ് കുട്ടികളില്‍ 50%വും ബീഹാറുകാരില്‍ 54% വും ആസാമുകാരില്‍ 50% വും എഗ്രേഡിലാണ്. ബംഗാളികള്‍ 29 %വും മറ്റു സംസ്ഥാനക്കാര്‍ 20%വും എ ഗ്രേഡിലുണ്ട്. ഡി ഗ്രേഡുകാരുടെ ശതമാനം താരതമ്യേന കുറവാണ്. എല്ലാ വിഭാഗക്കാരിലും പകുതിയിലധികം പേര്‍ എ ബി ഗ്രേഡുകളിലാണ്.

കണ്ടെത്തലുകള്‍

• ഗണിതം, പരിസ്ഥിതി പഠനം എന്നീ വിഷയങ്ങളില്‍ ഇതരസംസ്ഥാനക്കുട്ടികള്‍ താരതമ്യേന മികച്ച പ്രകടനമാണ് കാഴ്ചവെച്ചിട്ടുളളത് . മലയാളത്തിലാണ് ഈ വിഷയങ്ങള്‍ വിനമയം ചെയ്തിട്ടുണ്ടാവുക എന്ന് കരുതാം. ആ നിലയ്ക് ഇതരസംസ്ഥാനകുട്ടികളുടെ മികച്ച പ്രകടനം ശ്രദ്ധേയമാണ്. പ്രീപ്രൈമറി മുതല്‍ ഈ കുട്ടികല്‍ കേരളത്തിലെ സഹപാഠികളുമായി ആശയവിനിമയം ചെയ്ത് സ്വാഭാവികമായ രീതിയില്‍ മലയാളം വാചികമായി ഉപയോഗിക്കാന്‍ കഴിവുനേടിയിട്ടുണ്ടാകും. അത് ഈ വിഷയങ്ങളിലെ ആശയം ഉള്‍ക്കൊളളാന്‍ സഹായിച്ചിട്ടുണ്ടാകും എന്ന് അനുമാനിക്കാവുന്നതാണ്.
• മലയാളഭാഷാപരീക്ഷയില്‍ എ ഗ്രേഡിലുളളവരുണ്ടെങ്കിലും പകുതിയോളം ഇതരസംസ്ഥാനക്കുട്ടികള്‍ ഡി ഗ്രേഡിലാണ്. വീട്ടിലെ മലായാളഭാഷാനുഭവക്കുറവ് ഒരു പ്രതികൂലഘടകമായി പ്രവര്‍ത്തിച്ചിട്ടുണ്ടാകാം. എന്തിന് മലയാളം പഠിക്കണം എന്ന ചിന്തയില്‍ നിന്നുണ്ടാകുന്ന ആവശ്യബോധമില്ലായ്മ സ്വാധീനിച്ചിട്ടുണ്ടാകാം. മലയാള പരീക്ഷയ്ക് പുതിയ കവിതകളും ഗദ്യവും വിശകലനം ചെയ്തെഴുതേണ്ട ഉത്തരവും വ്യവഹാരരൂപ നിര്‍മിതിയും പ്രയാസം സൃഷ്ടിച്ചിരിക്കാം.
• മലയാളം മാതൃഭാഷയായിട്ടുളള കുട്ടികള്‍ ഇംഗ്ലീഷില്‍ മികച്ച നിലവാരത്തിലാണ്. എന്നാല്‍ ഇംഗ്ലീഷ് രണ്ടാം ഭാഷയായ ഇതരസംസ്ഥാനവിദ്യാര്‍ഥികള്‍ക്ക് കേരളത്തിലെ കുട്ടികള്‍ക്കൊപ്പം എത്താനായിട്ടില്ല. ഇരു കൂട്ടര്‍ക്കും ഇംഗ്ലീഷ് രണ്ടാം ഭാഷയാണ്. ചെറിയ ക്ലാസുമുതല്‍ പഠിച്ചു വരുന്നതുമാണ്. പ്രകടമായ അന്തരം ഉണ്ടായ സ്ഥിതിക്ക് ഇതെന്തുകൊണ്ടെന്ന് പഠിക്കേണ്ടതുണ്ട്.
• തമിഴ് നാട്ടിലെ കുട്ടികള്‍ പൊതുവേ പിന്നാക്കമാണ്. താഴ്ന്ന ഗ്രേഡുകളിലാണ് കൂടുതല്‍ കുട്ടികളും.
• റോഷിനി പ്രോജക്ട് നടപ്പിലാക്കുന്ന വിദ്യാലയങ്ങളിലെ ഇതരസംസ്ഥാന വിദ്യാര്‍ഥികളുടെയും റോഷ്നി ഇല്ലാത്ത വിദ്യാലയങ്ങളിലെ ഇതരസംസ്ഥാന വിദ്യാര്‍ഥികളുടെയും പഠനനിലവാരം വിവിധ വിഷയങ്ങളിലെങ്ങനെ എന്നു താരതമ്യം ചെയ്യുന്നത് നന്നായിരിക്കും.
  എസ് എസ് കെ, എസ് സി ഇ ആര്‍ ടി എന്നീ സ്ഥാപനങ്ങള്‍ ഈ വിഭാഗം കുട്ടികളുടെ പഠനനിലവാരം വിവിധ ക്ലാസുകളിലും വിവിധ വിഷയങ്ങളിലുമെങ്ങനെയെന്നു  ശാസ്ത്രീയമായി പഠിക്കണം. ( പഠനമാധ്യമം, വിനിമയ പ്രക്രിയ, ക്ലാസ് റൂം പരിഗണന, പ്രീസ്കൂള്‍ തലം മുതല്‍ ലഭിക്കുന്ന ഭാഷാനുഭവം തുടങ്ങിയവ പരിഗണിക്കണം)
  
  
  ( അടുത്ത ലക്കത്തില്‍ തുടരും)