റീഷ്മ ടീച്ചറുടെ ഓൺലൈൻ ഗണിതാന്വേഷണമാതൃക-1 (ഗണിതം പരീക്ഷണങ്ങളിലൂടെ)

സ്കൂള്‍ തുറക്കുകയാണ് . എങ്ങനെ കുട്ടികളെ ഗണിതാനുഭവത്തില്‍ വ്യാപൃതരാക്കാം എന്നത് വെല്ലുവിളിയാണ്. താല്പര്യത്തിന്റെ ഡിഗ്രി ഉയര്‍ത്തിക്കൊണ്ടാകണം അത്. വീട്ടിലുളള സൗകര്യങ്ങള്‍ പ്രയോജനപ്പെടുത്തി ചെയ്യുകയും വേണം. റീഷ്മടീച്ചര്‍ ഈ രംഗത്ത് കുറേ ആലോചനകള്‍ നടത്തി. അത് ട്രൈ ഔട്ട് ചെയ്തു. ആ അനുഭവങ്ങളാണ് ബ്ലോഗില്‍ അടുത്ത കുറേ ലക്കങ്ങളിലായി പങ്കിടുന്നത്. ഇപ്പോള്‍ പതിനൊന്നു പ്രവര്‍ത്തനങ്ങള്‍ കഴിഞ്ഞു. നിങ്ങളുടെ വിലയിരുത്തല്‍, നിര്‍ദേശങ്ങള്‍ എന്നിവ കുറിക്കണം. അത് ടീച്ചര്‍ക്ക് കൂടുതല്‍ മെച്ചപ്പെടാന്‍ സഹായകമാകും. E,L,P,S എന്നതിന്റെ സാധ്യത പ്രയോജനപ്പെടുത്തുന്നുണ്ടോ? സ്വാഭാവികമായി ഗണിതത്തിലെത്താനുളള അവസരമുണ്ടോ? കൃത്യത, സൂക്ഷ്മത എന്നീ ഗുണങ്ങള്‍ വളര്‍ത്തുമോ? എന്നിത്യാദി സമീപനവുമായി ബന്ധപ്പെട്ട ചോദ്യങ്ങളെ ആധാരമാക്കി വിശകലനം നടത്തുമല്ലോ?

അന്വേഷണ വിഷയം-

1) ഗണിത പഠനത്തില്‍ ശാസ്ത്ര പരീക്ഷണങ്ങളുടെ സാധ്യത

2) ഓണ്‍ലൈന്‍ രീതിയില്‍ ഗണിതാനുഭവം എങ്ങനെ ഒരുക്കാം?

ഈ രണ്ടു കാര്യങ്ങളാണ് റീഷ്മ ടീച്ചര്‍ പരിശോധിച്ചത്.

ടീച്ചര്‍ കുട്ടികൾക്ക് കൊടുത്ത നിർദ്ദേശങ്ങൾ

പ്രിയപ്പെട്ട കുട്ടികളേ,

ഒരു ശാസ്ത്രപരീക്ഷണം ചെയ്യാം.

പരീക്ഷണം ചെയ്യാൻ വീട്ടിലുള്ള സാധനങ്ങൾ മതി.

ചുവടെയുള്ള നിർദ്ദേശപ്രകാരം ചെയ്യുക

1. ചിത്രത്തിലുളളതു പോലെ മൂന്നു പ്ലാസ്റ്റിക് കുപ്പികൾ എടുക്കണം

(ഒരേ പോലെ വണ്ണവും ഉയരവും ഉള്ളവ)

2 .ഒന്നിൽ നിറയെ വെള്ളം,

ഒന്നിൽ അര ഭാഗം വെള്ളം,

ഒന്നിൽ കാൽ ഭാഗം വെള്ളം നിറയ്ക്കുക ( അളവ് ശരിയായ രീതിയിൽ വേണം. എങ്ങനെ യെന്നു പറയണേ )

3. കുപ്പികൾ നന്നായി അടയ്ക്കുക

4. എല്ലാ കുപ്പികളുടെയും ചുവട്ടിൽ വശത്തായി ഒരേ ഉയരത്തിൽ സുഷിരമുണ്ടാക്കുക

എന്തു സംഭവിക്കും? ഊഹിക്കൂ. എന്താണ് കണ്ടെത്തിയത്? ഊഹവുമായി താരതമ്യം ചെയ്യൂ.

5. ഇതേ പ്രവർത്തനം അടപ്പ് മാറ്റിയും ചെയ്തു നോക്കണം. എന്തു വ്യത്യാസം?

6 ഓരോ കുപ്പിയിൽ നിന്നും ജലം ദൂരേക്ക് വീണോ? ഒരേ അകലത്തിലാണോ വീഴുക? അളന്ന് എഴുതണേ

മുറ്റത്തു വെച്ചു ചെയ്യണം. ആദ്യം സുഷിരമുണ്ടാക്കി ആ സുഷിരം അടച്ചുപിടിച്ച് വെള്ളം ഒഴിക്കുന്നതാകും നല്ലത്.

7. പരീക്ഷണക്കുറിപ്പ് എഴുതണം.

അതിൽ കുപ്പിയുടെ പടം വരച്ച് വെള്ളത്തിന്റെ അളവ് രേഖപ്പെടുത്താനും മറക്കരുത്

1.പരീക്ഷണക്കുറിപ്പിൽ അളവുകളെ ഭിന്നസംഖ്യ രൂപത്തിൽ എഴുതണം 

തുടർ പ്രവർത്തനം

2.കുപ്പിയിൽ 1/5 ഭാഗവും അതുപോലെ 1/10 ഭാഗവും വെള്ളം നിറക്കാമോ? എന്നിട്ട് പരീക്ഷം ആവര്‍ത്തിച്ചാലോ. മുന്‍ പരീക്ഷണാനുഭവത്തിന്റെ അടിസ്ഥാനത്തില്‍ ഫലം ഊഹിക്കുക. പിന്നെ ചെയ്തു നോക്കുക.

3. ഒരു കുപ്പിയിൽ 5/10ഭാഗവും അതേ വലുപ്പമുള്ള മറ്റൊരു കുപ്പിൻ 1 / 2 ഭാഗവും വെള്ളം നിറച്ചാല്‍ ഏതാകും കൂടുതല്‍? താരതമ്യം ചെയ്യൂ.

3.എങ്കിൽ എങ്ങനെ ആയിരിക്കും 

4.അളവും അതുപോലെ ഭിന്നസംഖ്യയും എഴുതി നോക്കു 

5.ഫോട്ടോ എടുത്തു നിറച്ചു വച്ച വിവിധ രീതികൾ 1/5, 1/10, 1/4 കാണിക്കണം 

6.എങ്ങനെ അളവ് എടുത്തു എന്നും വ്യക്തമാക്കണേ.

കുട്ടികൾ ഈ പരീക്ഷണ പ്രവർത്തനം ഏറ്റെടുത്തു

തെളിവുകള്‍ ചിലത് പങ്കിടാം

 

ഏറ്റവും പ്രധാനപ്പെട്ട വെല്ലുവിളി എങ്ങനെ വിവിധ അളവുകളില്‍ ജലം എടുക്കുമെന്നതായിരുന്നു. ടീച്ചറാകട്ടെ രീതിയൊന്നും പറഞ്ഞിരുന്നില്ല
ഫലത്തില്‍ പ്രശ്നപരിഹരാന്വേഷണമായി അത് മാറി
പല രീതികളാണ് കുട്ടികള്‍ ഉപയോഗിച്ചത്

• 250 ml ഗ്ലാസ് ഉപയോഗിച്ച് അളന്നവരുണ്ട്
• മരുന്നു എടുക്കുന്ന അളവ് പാത്രം ഉപയോഗിച്ച് നൂറ്, ഇരുന്നൂറ് ആക്കി അളന്നവരുണ്ട്
• അരിഷ്ടമെടുക്കുന്ന ഗ്ലാസ് ഉപയോഗിച്ചവരുണ്ട്
• കുട്ടികള്‍ക്ക് മരുന്നു കൊടുക്കുന്ന അടപ്പും ഫില്ലറും ഉപയോഗിച്ചവരുണ്ട്
• വീട്ടിലെ പല അളവിലുളള കുപ്പികള്‍ ഉപയോഗിച്ചവരുണ്ട്
• പകുതി അളന്ന് അത് ഗ്ലാസില്‍ പകര്‍ന്ന് തുല്യത ഉറപ്പാക്കി പിന്നെ അതിനു പകുതി കാണുകയും ഗണിതപരമായി അളവ് നിര്‍ണയിക്കുകയും ചെയ്തവരുണ്ട്

എല്ലാവരും വീഡിയോ അല്ലെങ്കില്‍ ഫോട്ടോ ടീച്ചര്‍ക്ക് അയച്ചുകൊടുത്തു . ടീച്ചര്‍ർ ഓരോ കുട്ടിയെയും വിളിച്ച് എങ്ങനെ അളന്നു എന്നു ചോദിച്ച് വ്യക്തത വരുത്തുകയും ചെയ്യുന്നു.
രക്ഷിതാക്കള്‍ ഓണ്‍ലൈന്‍ഗണിതാനുഭവത്തെ എങ്ങനെ വിലയിരുത്തി?

 1.

നമസ്കാരം

വഴിവിളക്ക് ഗ്രൂപ്പിൽ ആദ്യ ദിവസങ്ങളിൽ തന്നിരുന്ന വർക്കുകൾ കണ്ടപ്പോൾ വലിയ കാര്യമായി തോന്നിയിരുന്നില്ല. പക്ഷെ തുടർന്നുള്ള ദിവസങ്ങളിൽ മകൻ്റെ താല്പര്യം കണ്ടപ്പോൾ കാര്യം മനസ്സിലായി. കുട്ടികൾക്ക് വളരെ താല്പ്പര്യത്തോടെ ഗണിതം പഠിക്കാൻ ഉതകുന്ന രീതിയാണെന്ന്. മുൻപ് ഒര് രക്ഷിതാവ് പറഞ്ഞത് പോലെ മകൻ എപ്പോഴും ചോദിക്കും എന്തെങ്കിലും വർക്ക് തന്നിട്ടുണ്ടോ എന്ന്. ടീച്ചറുടെ അവതണം മക്കൾക്ക് വളരെ നന്നായി ഇഷ്ടപ്പെടുന്നുണ്ട്.ഈ ഗ്രൂപ്പിൽ എൻ്റെ മകന് ഒരംഗമാകാൻ സാധിച്ചതിൽ ടീച്ചറോടും സുജിത് സാറിനോടും നന്ദി അറിയിക്കുന്നു.

(ശ്രീഹരിയുടെ രക്ഷിതാവ്)

2.

ലോക്  ഡൗൺ പ്രഖ്യാപിച്ചതു മുതൽ പുസ്തകങ്ങൾ തൊട്ടു നോക്കാതെ ടിവി കാണലും മൊബൈൽ ഗെയിമും മാത്രമായി നടന്നിരുന്ന എൻറെ മകൾ ഈ  ക്ലാസ് ആരംഭിച്ചതുമുതൽ പഠനപ്രവർത്തനങ്ങളിൽ വീണ്ടും സജീവമായി. പൊതുവേ കണക്കി നോട് താൽപര്യക്കുറവ് കാണിച്ച കുട്ടി ഇപ്പോൾ ഗണിതക്രിയകളോട് നല്ല താൽപര്യം കാണിക്കുന്നുണ്ട്. എന്റെ മകളിൽ ഇത്രയും മാറ്റങ്ങൾ ഉണ്ടാക്കാൻ സാധിച്ച ടീച്ചർക്ക്‌ ഒരു പാട് നന്ദി

 (ദേവനന്ദയുടെ രക്ഷിതാവ്)

ചങ്ങാതികളേ

• ഇതിൽ ഗണിതമുണ്ടോ? എന്തെല്ലാം ഗണിതാശയധാരണ കിട്ടും? ഓരോ കുട്ടിയുടെയും കണ്ടെത്തല്‍ എങ്ങനെ പരസ്പര വിലയിരുത്തലിന് വിധേയമാക്കാം?  അതിന് ടീച്ചറുടെ ഓണ്‍ലൈന്‍ ഇടപെടലെന്താകണം.? കുട്ടികളുടെ പ്രതികരണങ്ങള്‍ പല സമയത്താകുന്നതാണോ ഒരു നിശ്ചിത സമയത്താകുന്നതാണോ നല്ലത്?
• ഓൺലൈൻ ഗണിതപഠനത്തിന് വഴങ്ങുമോ?
• കുട്ടികളിൽ താൽപര്യമുണ്ടാക്കുമോ?
• ശാസ്ത്രവും പഠിക്കുമോ? കുട്ടികള്‍ നിഗമനങ്ങളിലെത്തിച്ചേരുന്നുണ്ടോ? എങ്ങനെ അതുറപ്പാക്കാം?

ഇവിടെ ശാസ്ത്ര പരീക്ഷണക്കുറിപ്പിൽ ഗണിതമാവശ്യമുണ്ട്. കൃത്യതയോടെ വേണം ചരങ്ങള്‍. അളന്നെഴുതിയാല്‍ പറയുന്നത് കൂടുതല്‍ ശാസ്ത്രീയമാകും.

(ഗണിതം എല്ലാ വിഷയങ്ങളിലും എന്ന് പറഞ്ഞാൽ പോര കാണിച്ചു കൊടുക്കണം)

• മെയ് ആറാംതീയതി മുതല്‍ റീഷ്മ ടീച്ചര്‍ ഗണിതാശയങ്ങള്‍ പങ്കിടുന്നു.  നൂതനമായ രീതികള്‍ പരീക്ഷിക്കാനുളള ടീച്ചറുടെ സന്നദ്ധത മാനിക്കപ്പെടേണ്ടതാണ്.
• ഒരു സാധാരണ ടീച്ചറുടെ അന്വേഷണമാണ് . ചിലപ്പോള്‍ ഇങ്ങനെയല്ല ചെയ്യേണ്ടതെന്നു തിരിച്ചറിവുണ്ടാകും. കുട്ടികള്‍ ഏറ്റെടുക്കുന്നതിനെ വിശകലനം ചെയ്താല്‍ അത് താല്പര്യം ജനിപ്പിക്കുന്നതാണോ, ഗണിതാശയരൂപീകരണത്തിന് സഹായകമാണോ എന്നറിയാം. രക്ഷിതാക്കളുടെ പിന്തുണ കുട്ടികള്‍ക്ക് കിട്ടുന്നുണ്ട്. വീട്ടിലെ ടീച്ചറായി ചിലപ്പോള്‍ രക്ഷിതാവ് മാറുകയും ചെയ്യുന്നു. ചിലസന്ദര്‍ഭങ്ങളില്‍ കൗതുകപൂര്‍വം കുട്ടിയുടെ പഠനപങ്കാളിയുമാകുന്നു.
• ഇത്തരം പ്രവര്‍ത്തനങ്ങള്‍ കുട്ടികള്‍ ഏറ്റെടുക്കുമെന്നാണ് ടീച്ചര്‍ പറയുന്നത്
• വ്യത്യസ്ത അളവിലുളള കുപ്പികളാണ് കുട്ടികള്‍ എടുത്തത്. അതിനാല്‍ത്തന്നെ പല ഉത്തരങ്ങള്‍ വന്നു. അത് പങ്കിട്ടപ്പോള്‍ മറ്റുളളവര്‍ക്ക് പാഠമായി.

റീഷ്മ ടീച്ചറെക്കുറിച്ച്

• മലപ്പുറം ജില്ലയിലെ തീരൂരിൽ ഏഴുർ എം ഡി പി എസ്‌ യു പി സ്കൂൾ അധ്യാപികയാണ്
• അഭിമാനരേഖ- 2019-20 അധ്യയനവർഷത്തെ അവധിക്കാല അധ്യാപക പരിശീലനത്തിൽ നിന്നും ലഭിച്ച ആശയം ആയിരുന്നു . ടീച്ചര്‍ അത് മാതൃകാപരമായി തയ്യാറാക്കി. ഓരോ കുട്ടിയും അഭിമാനരേഖയിൽ ഉൾകൊള്ളാവുന്നതിലും ഒരുപാട് മുകളിൽ ആണ് എന്നാണ് ടീച്ചറുടെ കണ്ടെത്തല്‍. ടീച്ചര്‍ പറയുന്നു- ഒന്നാം ക്ലാസ്സ്‌ മുതൽ ഓരോ കുട്ടിക്കും ഇത്തരം ഒരു വളരുന്ന അഭിമാനരേഖ കൂടെ ഉണ്ടായാൽ ഓരോ അധ്യാപകർക്കും തന്റെ കുട്ടികൾക്ക് എവടെ വേണം കൂടുതൽ കരുതൽ എന്നും എവടെ കൂടുതൽ പിന്തുണ നൽകണം എന്നും തിരിച്ചറിയാൻ സാധിക്കും.അതോടൊപ്പം രക്ഷിതാക്കൾജ്ഉം തന്റെ കുട്ടിയുടെ മികവുകൾ തിരിച്ചറിയാം എല്ലാത്തിലും ഉപരി പഠനവിടവ് എന്ന കാരണത്താൽ ഒരു കുട്ടി പോലും പിറകിൽ ആകാതെ ഓരോ കുട്ടിയേയും അറിവിന്റെ ഉയര്‍ന്ന തലത്തിൽ എത്തിക്കാം. എന്റെ മക്കളിൽ നിന്നും ഞാൻ പഠിച്ചതും അവരിൽ നിന്നും മനസ്സിലാക്കിയതും ആയ കാര്യങ്ങൾ ചേർത്തു വെച്ചാണ് ഞാൻ എൻ്റെ അഭിമാനരേഖ പൂർത്തിയാക്കിയത്
• എന്റെ മലയാളം നല്ല മലയാളം ഓണ്‍ലൈന്‍ പരിപാടിയില്‍ ഏറെ ശ്രദ്ധേയമായ ഇടപെടല്‍ നടത്തിയ അധ്യാപകരില്‍ ഒരാളാണ് റീഷ്മടീച്ചര്‍. അത് ചൂണ്ടു വിരല്‍ ബ്ലോഗില്‍ പങ്കിട്ടിട്ടുണ്ട്.
• വഴിവിളക്ക് യു പി ഗണിതഗ്രൂപ്പിലാണ് ടീച്ചര്‍ ഇപ്പോള്‍ പ്രവര്‍ത്തിക്കുന്നത്. നാല്പത്തഞ്ച് കുട്ടികളാണ് ഈ ട്രൈ ഔട്ടില്‍ പങ്കാളികളായത്.
  (തുടരും)