ഒന്നൊരുക്കം ഏഴാംദിവസം

 

 ഗോത്രഭാഷയിൽ പാടിയപ്പോൾ അവർ താളം പിടിക്കാൻ തുടങ്ങി.

" എൻ്റെ ക്ലാസ്സിലെ 1 കുട്ടി ഒഴികെ മറ്റെല്ലാ കുട്ടികളും *ഉന്നതിയിൽ* നിന്ന് വരുന്നവരാണ്. മൊഴിമാറ്റം നടത്തിയ ഈ ഒന്നൊരുക്കം എനിക്ക് പറഞ്ഞറിയിക്കാൻ കഴിയാത്ത സന്തോഷം ആണ് നൽകിയത്.  ഇതിലെ പാട്ടുകളെല്ലാം അവരുടെതായ രീതിയിൽ പാടികൊടുത്തപ്പോൾ അവർക്കുണ്ടായ സന്തോഷം വളരെ വലുതായിരുന്നു. അവരുടെതായ മൊഴി പഠിച്ച് വരുന്ന എനിക്ക് ഇത് വളരെ ഉപകാരമായിരുന്നു. ബാക്കി പ്രവർത്തനങ്ങൾ കൂടി ഉണ്ടായിരുന്നു എങ്കിൽ വളരെ നന്നായിരുന്നു എന്ന് ആഗ്രഹിച്ച് പോകുന്നു.🥰

 പല ആവർത്തി അച്ചടി ഭാഷയിൽ ഈ പാട്ട് പാടിയപ്പോൾ കുട്ടികൾ ആരും പാടുകയോ താളം കൊട്ടുകയോ ചെയ്തില്ല.പിന്നീട് ഗോത്രഭാഷയിൽ പാടിയപ്പോൾ അവർ താളം പിടിക്കാൻ തുടങ്ങി.

 വാളൽ യു.പി സ്കൂൾ കോട്ടത്തറ.

വയനാട്

*മൺതരികൾ ഓടുന്നു*

ഒന്നൊരുക്കം ഏഴാം ദിവസം - ഒരു നീണ്ട  പെൻസിൽ ബോക്സിൻ്റെ  പരന്ന അടിഭാഗത്തായി നീളത്തിൽ മുറിച്ച് ബോക്സിനകത്തുള്ള കാന്തം വിരൽ കൊണ്ട് ചലിപ്പിക്കാൻ പാകത്തിനാക്കി ശേഷം ബോക്സിൻ്റെ മുകൾ വശം വർണ പേപ്പർ കൊണ്ട് ഒട്ടിച്ചു, വർണ പേപ്പറിനു മുകളിൽ മൊട്ടുസൂചികൾ വെച്ച് ബോക്സിനുള്ളിലെ കാന്തം നീക്കിയപ്പോൾ മുകളിലെ മൊട്ടുസൂചികൾ ചലിക്കുന്നു . 

പെട്ടെന്നാണ്  എൻ്റെ ക്ലാസിലെ കൊച്ചു മിടുക്കൻ റസാൻ ഒരു കാര്യം ഉച്ചത്തിൽ വിളിച്ചു പറഞ്ഞത്. ടീച്ചറേ ഇതെനിക്കറിയാം. അതിനുള്ളിൽ കാന്തം അല്ലേ? 

ഞാൻ അതിശയിച്ചു പോയി. അവൻ തുടർന്നു. "ഒരു വെള്ള പേപ്പറിൻ്റെ ചോട്ടിൽ കാന്തം പിടിച്ചിട്ട്  പേപ്പറിൻ്റെ മേലെ കൊറച്ച് മണ്ണിട്ടാൽ കാന്തം നീക്കുമ്പോ മണ്ണ് ഓടും "

അവൻ എല്ലാവരോടുമായി പറഞ്ഞു.

മണ്ണിലെ ഇരുമ്പിൻ്റെ അംശത്തെ കാന്തം ആകർഷിക്കുന്നതാണെന്ന് ആ കൊച്ചു മിടുക്കന് അറിയില്ലെങ്കിലും അവൻ്റെ കുഞ്ഞേട്ടൻ കാണിച്ച പരീക്ഷണങ്ങളിലെ അറിവ് അവനിൽ ഉറച്ചിരിക്കുന്നു. ഞങ്ങൾ ക്ലാസിൽ അതു കൂടി പരീക്ഷിച്ചു.

നേരറിവുകൾ, അനുഭവത്തിലൂടെ പഠിക്കുന്ന പാഠങ്ങൾ മക്കളിൽ ഉറയ്ക്കും, തീർച്ച.

ഏഴാം ദിനത്തെ  പ്രവർത്തനങ്ങൾ ഓരോന്നും മികച്ചവ തന്നെ👍

ഷബ്ന .കെ

ജി വി എച്ച് എസ് എസ്

വെള്ളാർമല, വയനാട്

ഒരു വിരുതൻ സ്വന്തം ബാഗിന്റെ സിബ്ബിൽ വരെ പരീക്ഷണം നടത്തി

ഇന്നത്തെ പ്രവ'ർത്തനങ്ങൾ എല്ലാം കുട്ടികൾക്ക് വളരെ ഇഷ്ടം ആയി, കളികൾ വളരെ ആക്റ്റീവ് ആയി അവർ പങ്കെടുത്ത് വിജയികളെ കണ്ടെത്തി 🥰👍

• എറിയാം നേടാം എന്ന പ്രവർത്തനത്തിലൂടെ ആണ് ക്ലാസ്സ്‌ ആരംഭിച്ചത് അതുകൊണ്ട് തന്നെ ബാക്കി ഉള്ള പ്രവർത്തങ്ങൾക്ക് വളരെ ഊർജ്ജസ്വാലർ ആയിരുന്നു എന്റെ കുട്ടികൾ,
• ശരീരത്തിന്റെ ചലനങ്ങൾ വളരെ ഈസി ആയി നേടിയെടുക്കാൻ അവർക്ക് സാധിച്ചു കൈകളുടെ വഴക്കം അവരുടെ ശ്രദ്ധ എല്ലാം ഞാൻ വളരെ സൂക്ഷ്മമായി നിരീക്ഷിച്ചു.. 
• പിന്നീട്  എത്ര ഭാരം താങ്ങും എന്ന പ്രവർത്തനം ചെയ്യാൻ എനിക്കൊപ്പം കല്ലുകൾ കണ്ടെത്താനും അവർ കൂടി,, ഓരോ കല്ലും ഗ്ലാസ്സിലേക്ക് ഇടുമ്പോൾ എണ്ണുകയും സൂക്ഷ്മമായി നിരീക്ഷിക്കാനും അവർ മറന്നില്ല ടീച്ചറെ ഗ്ലാസ്സ് താണു എന്ന് പറഞ്ഞപ്പോൾ ആണ് ഞാനും നോക്കിയത് അത്രയും നിരീക്ഷണപാടവം കുട്ടികൾക്ക് നേടുവാൻ ഓരോ പ്രവർത്തങ്ങളിലൂടെ സാധിക്കുന്നു,,, 
• കാന്തത്തിന്റെ പ്രവർത്തനത്തിൽ ഒരു വിരുതൻ സ്വന്തം ബാഗിന്റെ സിബ്ബിൽ വരെ പരീക്ഷണം നടത്തി 😃
• പോ പോ വണ്ടി എന്ന പ്രവർത്തനംഅവർക്ക് വളരെ ഇഷ്ടം ആയി ടീച്ചറെ നമുക്ക് ലോറി ഉണ്ടാക്കാം ബസ് ഉണ്ടാക്കാം ജെസിബി ഉണ്ടാക്കാം എന്നൊക്കെ പറഞ്ഞു തുടങ്ങി 🫣അറിയാവുന്ന ചില വാഹനങ്ങൾ കുട്ടികൾക്കു ഉണ്ടാക്കാൻ നൽകി, നാളെ നമുക്ക് ജെസിബി ഉണ്ടാക്കാം എന്ന് പറഞ്ഞു ഞാൻ രക്ഷപ്പെട്ടു 🫣😊😊

😃

പുഴുവിന്റെ എട്ടുകാലിയുടെ കഥ വളരെ ഇഷ്ടം ആയി കുഞ്ഞുങ്ങൾക്ക് (എന്നാൽ കഥയുടെ തുടർച്ച എങ്ങനെ പറയണം എന്ന് അവർക്ക് അറിയാതെ വന്നു, എന്നാൽ അവർ വഴക്കിനു ശേഷം കൂട്ടുകാർ ആയി എന്ന് പറഞ്ഞു പരസ്പരം തോളിൽ കൈ ഇട്ടു നമുക്ക് അവരെ പോലെ കൂട്ടുക്കാർ ആകാം എന്ന് പറഞ്ഞു )

ഇംഗ്ലീഷ് ആക്ടിവിറ്റി വളരെ നന്നായി അവർ ചെയ്തു... ഓരോ ചിത്രങ്ങൾ എടുക്കൻ ഞാൻ മറന്നാലും എന്നെ ഓർമിപ്പിച്ചു കൊണ്ട് ഓരോ ക്ലാസും അവർ ആസ്വദിച്ചു പോകുന്നു എന്നതിൽ ഞാൻ വളരെ സന്തുഷ്ട ആണ് 🥰🥰🥰🥰

MDUPS വെള്ളറ മേമല

പത്തനംതിട്ട, വെണ്ണികുളം sub

 തീ പിടിച്ചേ എന്ന് പറഞ്ഞതും കൂട്ടയോട്ടമായി

ഇന്നത്തെ പ്രവർത്തനങ്ങളിൽ  കുട്ടികൾ വളരെ ഉത്സാഹത്തോടെ പങ്കെടുത്തു കാന്തം കൊണ്ടുള്ള പ്രവർത്തനം വളരെ ആകാംക്ഷ ഭരിതരാക്കി  കൂടാതെ  മണമുള്ള പൂവ് തേടി മലയിൽ എത്തിയതേ ഓർമ്മയുള്ളൂ . തീ പിടിച്ചേ എന്ന് പറഞ്ഞതും കൂട്ടയോട്ടമായി അതിനിടയിൽ ഞങ്ങൾ കുറെ അഭിനയ മുഹൂർത്തങ്ങൾ ഉണ്ടാക്കി 

മല കയറുമ്പോൾ പാറ വഴുതുന്നത് പോലെയും പാറയിടുക്കുകൾ ചാടിക്കടക്കുന്നതയും അഭിനയിച്ചു എന്തായാലും രസകരമായി തന്നെ ഇന്നത്തെ ദിവസവും അവസാനിച്ചു

VRUP  school muthukurussi

എങ്കിൽ അവസാനം അതിലിട്ട കല്ല് മാറ്റി തരുമോ ടീച്ചർ,എങ്കിൽ ഗ്ലാസ് പൊങ്ങി വരുമോ?

ഇന്ന് എൻ്റെ വരവും കാത്തിരിക്കുന്ന കൂട്ടുകാരുണ്ടായിരുന്നു. കണ്ട ഉടൻ ഇന്നലെ കെട്ടിവെച്ച ഇല വിയർത്തോ നോക്കണേ അതിനെന്താ വരൂ കവർ തുറന്നു വിയർപ്പ് കുറവ് . കാഴ്ച്ചക്കാരിൽ ഒരാൾ നമ്മൾ വെയിൽ ഉള്ള സമയം വിയർക്കില്ലേ അപ്പോഴാണ് കവറിലെ ഇലയും വിയർക്കുക

കൊമ്പൻ പുഴുവിൻ്റെ കഥ - 

ഗ്രൂപ്പാക്കി ചിത്രം നൽകി നിരീക്ഷിക്കാൻ സമയം കൊടുത്തു. ശേഷം 2 പേർ അടങ്ങുന്ന ഗ്രൂപ്പിൽ അവതരണത്തിനായി വന്നു. വിശന്ന പുഴു മരത്തിൽ കയറി കൂട്ടുകാരനെ കണ്ടു, അവർ ചിരിച്ചു തുടങ്ങിയ ചെറിയ വരികൾ വന്നു കഥ പൂർത്തിക്കാൻ കഴിഞ്ഞില്ല  ക്ലാസിൽ  ഒരു ഗ്രൂപ്പ് മാത്രം കുഴപ്പമില്ലാതെ പറഞ്ഞു. ചിത്രം ഗ്രൂപ്പിൽ അയച്ചു വീട്ടിൽ നിന്നും അമ്മയുടെ സഹായത്തിൽ പറയണേ.

എത്ര ഭാരം താങ്ങും

ഗ്ലാസിൽ ചെറിയ കല്ല് 98 എണ്ണം വരെ വീണു എല്ലാവർക്കും അത്ഭുതം 99 ആയപ്പോൾ ഗ്ലാസ് മുങ്ങി. എങ്കിൽ അവസാനം അതിലിട്ട കല്ല് മാറ്റി തരുമോ ടീച്ചർ,എങ്കിൽ ഗ്ലാസ് പൊങ്ങി വരുമോ? അതും പരീക്ഷിച്ചു

കാന്തത്തിൻ്റെ കൗതുകം- 

ആഹാ കൊള്ളാലോ  ഇത് മാളിൽ നിന്നും ഞങ്ങൾ കളിക്കുന്ന റൈസിംഗ് കാർ പോലെയുണ്ട്

എല്ലാവർക്കും വീണ്ടും കളിക്കാൻ മോഹം.

പോം പോം വണ്ടി

ഗ്രൂപ്പാക്കി പേപ്പർ നൽകി , രൂപങ്ങൾ നൽകി, ഇഷ്ട്ടപെട്ട വാഹനം നിർമ്മിക്കാൻ പറഞ്ഞു. ഒരു സഹായവും നൽകിയില്ല. പല വിധത്തിൽ ഒട്ടിച്ചവർ ഉണ്ടായിരുന്നു. എങ്കിലും പശ മിതമായി ഉപയോഗിക്കാനും കൈയ്യിൽ ആവാതെ, ക്ലാസിൽ ആവാതെ നല്ല ശ്രദ്ധയോടെ ഗ്രൂപ്പ് നിയന്ത്രണവും , അഭിപ്രായ പങ്കുവെക്കലും എല്ലാവരുടേയും അഭിപ്രായങ്ങളെ മാനിക്കുന്നതും ഉദ്ധേശിച്ച വാഹന ചിത്രം രൂപപെട്ടപ്പോഴുള്ള സന്തോഷവും നേരിൽ കണ്ടു. മുഴുവൻ പ്രവർത്തനങ്ങളും ചെയ്യാൻ കഴിഞ്ഞില്ല. എങ്കിലും നൽകിയ പ്രവർത്തനങ്ങൾ അത്രയും ഇഷ്ട്ടത്തോടെ ഏറ്റെടുത്തു. കുഞ്ഞുമക്കൾക്ക് വിരസത ഉണർത്താതെ സ്വതന്ത്രമായി ഇടപെടാൻ കഴിയുന്ന മൊഡ്യൂൾ തന്നെയാണ് ഇപ്രാവശ്യത്തെ ഒന്നൊരുക്കം.

Ummul Khir

GMLPS KOOMANNA

അനങ്ങാത്തവരും  ഇപ്പോൾ  നല്ല സ്മാർട്ട്.     

 ഇന്ന് കഥാചിത്രം പരിചയപ്പെടുത്തി വർക്ക്ഷീറ്റ്  വ്യക്തിഗതമായി നൽകി. ഭിന്നശേഷി ഉൾപ്പെടെ എല്ലാവരും നിറം നൽകി വ്യത്യസ്തമായ കഥാസന്ദർഭങ്ങൾ അവതരിപ്പിച്ചു.

• എട്ടുകാലിയെ പറ്റിച്ച പുഴു ഹി ..ഹി.. കളിയാക്കിയതും  എട്ടുകാലി പുഴുവിനെ തിന്ന് വയറുവേദന വന്ന് ചത്തുപോയതും എട്ടുകാലി കാലു കൊണ്ട് പുഴുവിനെ ചവിട്ടി തെറിപ്പിച്ച് പുഴു ചാലിൽ തെറിച്ചുവീണ് മരിച്ചതും  എല്ലാം പ്രത്യേകത നിറഞ്ഞതായി തോന്നി.

• അതുപോലെ രൂപങ്ങൾ ഉണ്ടാക്കാൻ ബസ്,കാർ ഉണ്ടാക്കി. സൈക്കിൾ ഉണ്ടാക്കാൻ കളർപേപ്പർ വീട്ടിലേക്ക് നൽകി.  

• പേപ്പർകപ്പ് മുങ്ങിയോ എന്ന പരീക്ഷണം എല്ലാവരും വളരെ താല്പര്യത്തോടെ ചെയ്യ്തു. 

• ബോൾ ആരുടെ  പേര് പറഞ്ഞു ഇടുന്നുവോ അവർ പിടിക്കുന്നത്  ഒരു ഹരമായി എടുത്തു.

• മ്യൂസിക്കിനനുസരിച്ച് താളം  പിടിക്കുന്നത്   നല്ല രസം.നാളെ കൊട്ടാൻ വടി കൊണ്ടുവരാം എന്ന് പറഞ്ഞിട്ടുണ്ട്.

സൂംബ ഡാൻസ് ഇപ്പോൾ 2എണ്ണം കുട്ടികൾ പഠിച്ചു. അനങ്ങാത്തവരും  ഇപ്പോൾ  നല്ല സ്മാർട്ട്.     

ദിവസവും 10 മിനിറ്റ്   അതിനു വേണ്ടി കാത്തിരിക്കും .

കുട്ടികളിലെ മാറ്റം ശരിക്കും അതിശയിപ്പിക്കുന്നു.

ലളിത പാലക്കാട് 

കാന്തം കൊണ്ട് പരീക്ഷണം ചെയ്തിട്ടും ചെയ്തിട്ടും മതിയായില്ല.

കഥ പറയുന്നവർക്ക് സ്റ്റാർ  തരോ??എന്ന് ചോദിച്ചു റയാൻ. നിങ്ങളെന്റെ അമ്മയാണോ എന്ന കഥ പറയട്ടെ  എന്ന് ചോദിച്ചു.. സമ്മതം.. ബോർഡിൽ ഇരിക്കുന്ന എല്ലാ ജീവികളോടും കുഞ്ഞിക്കോഴി ചോദിച്ചു... റയന്റെ സ്വന്തം വാചകത്തിൽ ആണെങ്കിലും സന്തോഷം തോന്നി.. അതിലേറെ കൗതുകവും.. താറാവിനോട് ചോദിച്ചപ്പോ താറാവ് പറഞ്ഞത് ഞാൻ വെള്ളത്തിൽ നീന്തും നിന്റമ്മക്ക് വെള്ളത്തിൽ ഇറങ്ങാൻ പറ്റില്ലഎന്ന്.. 🙂

ഇന്നലെ വിയർക്കാൻ വച്ച ഇലകളിൽ ഇന്ന് വെള്ളം കണ്ടപ്പോൾ അതിശയം..

കളിയുടെ ആവേശം പറയാതെ വയ്യ.. ഉച്ചക്കും ചോദിച്ചു. ഞങ്ങൾ ബോൾ എറിഞ്ഞു കുപ്പി വീഴത്തട്ടെ എന്ന്..

*കാന്തം കൊണ്ട് പരീക്ഷണം ചെയ്തിട്ടും ചെയ്തിട്ടും മതിയായില്ല. ക്ലാസിൽ ഉള്ള സകലതും ചെയ്തു.. Cwsn കുട്ടികൾക്കും പങ്കാളിയാവാൻ സാധിച്ചു..

*രൂപങ്ങൾ ചേർത്ത് വച്ചു വാഹനങ്ങൾ  ഒട്ടിക്കുന്നത് ഏറെ ഇഷ്ടമായി. 

* കഥ യുടെ ചിത്രം കൊടുത്തു ബാക്കി ഭാഗം  "എട്ടുകാലിയുടെ ഇല പുഴു കടിച്ചു. ഇല താഴെ വീണു എട്ടുകാലിയും വീണു.  പുഴുവിന് പാവം തോന്നി അവർ നല്ല കൂട്ടുകാരായി."

ഒരു ഗ്രൂപ്പിന്റെ ഊഹം  ഇതാണ്..

ശ്രീജ 

Glps kunnamkulam

പ്രവർത്തനങ്ങൾ ഓരോ ദിവസം കഴിയും തോറും സമയ ബന്ധിതമായി  ചെയ്യാൻ സാധിക്കുന്നുണ്ട്.

കൊക്കരക്കോ കോ - അമ്മയെവിടെ ? കഥയിലൂടെ ഇന്നത്തെ പ്രവർത്തനങ്ങൾ ആരംഭിച്ചു. 

• വളരെ ശ്രദ്ധയോടെ കുഞ്ഞുങ്ങൾ കഥ ആസ്വദിച്ചു. ആടിൻ്റെയും, പശുവിൻ്റെയും താറാവിൻ്റെയുമൊക്കെ ശബ്ദങ്ങൾ  കുഞ്ഞുങ്ങൾ അവതരിപ്പിച്ചു.
• വിരൽ പാവ നിർമ്മാണത്തിൽ വളരെ ശ്രദ്ധയോടെ കുഞ്ഞുങ്ങൾ പങ്കാളികളായി.
• റോൾ പ്ലേയിലൂടെ കഥാഭാഗം രസകരമായി അവതരി പ്പിച്ചു.
• പാട്ടു നടത്തം
• കുഞ്ഞുങ്ങൾ ഏറെ ഇഷ്ടത്തോടെ ഏറ്റെടുത്തു.
• വായ്ത്താരികൾ ഏറ്റു ചൊല്ലാനും താളത്തിനനുസരിച്ച് ചുവടു വെയ്ക്കാനും കുഞ്ഞുങ്ങൾ ഉത്സാഹത്തോടെയാണ് മുന്നോട്ടു വന്നത്. 
• വായ്ത്താരിയോട് കൂടി പാട്ടുകൾ പാടുമ്പോൾ വായ്ത്താരികൾ എപ്പോഴാണ് ചൊല്ലേണ്ടത് എന്ന ധാരണ കുഞ്ഞുങ്ങൾക്ക് എല്ലാവർക്കും ഉണ്ടായിട്ടുണ്ട്.
• തരംതിരിക്കാം കൂട്ടങ്ങളാക്കാം . സ്കൂൾ പരിസരത്തു നിന്നു തന്നെ ഇലകൾ ശേഖരിച്ചാണ് പ്രവർത്തനം നടത്തിയത്. കുഞ്ഞുങ്ങൾ വളരെ കൃത്യതയോടെ വലിപ്പത്തിൻ്റെ അടിസ്ഥാനത്തിൽ ഇലകളെ തരം തിരിച്ചു. വീട്ടിൽ ചെന്നും ഇതുപോലെ ചെയ്യും എന്ന് കുഞ്ഞുങ്ങൾ പറഞ്ഞു.
• അളക്കാം കണ്ടെത്താം. ഗ്രൂപ്പംഗങ്ങൾ നല്ല രീതിയിൽ തന്നെ പ്രവർത്തനത്തിൽ പങ്കെടുത്തു. 
• ഞങ്ങളാണേ ഞങ്ങളാണേ നീളത്തിൽ വമ്പർ ഞങ്ങളാണേ പാട്ട് താളത്തിൽ പാടി അവതരിപ്പിച്ചു. താളത്തിൽ അവതരിപ്പിക്കാൻ  കുഞ്ഞുങ്ങൾ ഇപ്പോൾ പ്രത്യേകം ശ്രദ്ധിക്കുന്നുണ്ട്.
• Passing the sound പ്രവർത്തനത്തിൽ ആദ്യം 4 പേർക്ക് Sound ബുദ്ധി മുട്ടായി തോന്നി. ആവർത്തിച്ച് game ചെയ്തപ്പോൾ മാറ്റം വന്നു. where is my name പ്രവർത്തനത്തിൽ എല്ലാ ഗ്രൂപ്പുകാരും പേരുകൾ കണ്ടെത്തി.

ഒന്നൊരുക്കം പ്രവർത്തനങ്ങൾ ഓരോ ദിവസം കഴിയും തോറുംസമയ ബന്ധിതമായി  ചെയ്യാൻ സാധിക്കുന്നുണ്ട്.

പാഠഭാഗത്തേയ്ക്ക് കടക്കുമ്പോൾ  സമയബന്ധിതമായി തന്നെ കുഞ്ഞുങ്ങളെ എല്ലാവരേയും പരിഗണിച്ച്കൊണ്ട് മെച്ചപ്പെട്ട രീതിയിൽ പാഠ ഭാഗങ്ങൾ മുന്നോട്ട്

നയിക്കാൻ ഒന്നൊരുക്കം പ്രവർത്തനങ്ങൾ ചെയ്യുന്നത്,

സഹായകമാകുമെന്ന തിൽ സംശയമില്ല

⏹️ കുട്ടിയെ അറിയാൻ

കുഞ്ഞുങ്ങളുടെ കുടുംബ പശ്ചാത്തലവും സാഹചര്യവും മനസിലാക്കാൻ ഭവന സന്ദർശനത്തിന്ഇന്ന് തുടക്കം കുറിച്ചു. [സ്കൂൾ സമയത്തിന് ശേഷം ]  കുഞ്ഞുങ്ങളുടെ വിവരങ്ങൾ തിരക്കി.  നേരിട്ട് എത്തിയതിൽ രക്ഷിതാക്കൾക്ക്  സന്തോഷം.

ജി എച്ച് എസ് എസ്

വലിയഴീക്കൽ

 കഥ പറയാൻ ഇനിയും ഇത്തരം ധാരാളം പ്രവർത്തനങ്ങൾ നൽകേണ്ടതുണ്ട് എന്ന് തിരിച്ചറിഞ്ഞു

 ഇന്നത്തെ ഒന്നാമത്തെ പ്രവർത്തനം ടിഷ്യൂ പേപ്പർ കൊണ്ട് മരത്തിന് ഇല നിർമ്മിക്കുകയായിരുന്നു.

• കുട്ടികൾ തനിയെ തന്നെ എല്ലാം ചെയ്തു. കാഴ്ചപരിമിതിയുള്ള കുട്ടിയും ചെയ്തു. സമയം കുറച്ചധികം വേണ്ടി വന്നു.
• തുടർന്ന് താനാരം താനാരം തക....... പാടിത്തകർത്തു. പാട്ടിനനുസരിച്ച് ചുവടുകൾ വച്ച് രസിച്ചു കളിച്ചു.
• പിന്നത്തെ പ്രവർത്തനം where is my name എന്ന ഇംഗ്ലീഷ് പ്രവർത്തമായിരുന്നു.
• മൂന്നു ഗ്രൂപ്പുകൾ ശരിയായി ചെയ്തു.
• 17 പേരിൽ മൂന്നു പേർക്കൊഴികെ എല്ലാവർക്കും സ്വന്തം പേരുകൾ കണ്ടു പിടിക്കാൻ കഴിഞ്ഞു. 
• തുടർന്ന് name chair അല്പം വ്യത്യാസപ്പെടുത്തി പേരെഴുതിയ സ്ട്രിപ്പുകൾ മേശപ്പുറത്ത് വച്ച് ചെയ്തു.എന്റെ മുൻപ്രവർത്തനത്തിൽ പിന്തുണ വേണ്ടി വന്ന മൂന്നു പേർക്ക് ഈ പ്രവർത്തനത്തിലും പിന്തുണ നൽകേണ്ടി വന്നു. 
• തുടർന്ന് ആരാദ്യം എന്ന ഗണിത പ്രവർത്തനം. കുട്ടികൾ വളരെ താല്പര്യത്തോടെ ഏറ്റെടുത്തെങ്കിലും കൃത്യമായ ട്രാക്കിനുള്ളിലൂടെ ബോൾ ഉരുട്ടാൻ പലർക്കും കഴിഞ്ഞില്ല. എല്ലാ ഗ്രൂപ്പിനും ഓരോ പോയിൻ്റ് വീതം മാത്രം കിട്ടി. പിന്നീട് മുത്തുകൾ വ്യത്യസ്ത എണ്ണത്തിലാക്കി വച്ച് ഇങ്ങനെയാണ് പോയിൻ്റ് കിട്ടിയതെങ്കിൽ ആരാണ് ജയിച്ചത് എന്നു ചോദിച്ചപ്പോൾ കൂടുതൽ എണ്ണമുള്ള കൂട്ടം തന്നെ അവർ ചൂണ്ടിക്കാണിച്ചു. 
• തുടർന്ന് ക്യുആർ കോഡ് സ്കാൻ ചെയ്ത് മ്യൂസിക്കിനനുസരിച്ച് Rhythmic movements എന്ന പ്രവർത്തനം ചെയ്തു. ഒത്തിരി ഇഷ്ടത്തോടെ അവർ പ്രവർത്തനത്തിൽ പങ്കെടുത്തു. 
• അവസാന പ്രവർത്തനം എട്ടുകാലിയുടെയും കൊമ്പൻ പുഴുവിൻ്റെയും കഥയായിരുന്നു. അവർ ചിരിക്കുന്ന ചിത്രം കണ്ടതു കൊണ്ട് അവർ നല്ല ചങ്ങാതിമാരായി കളിച്ചു രസിച്ചു എന്നു മാത്രമാണ് കുട്ടികൾ പറഞ്ഞത്. കൂടുതൽ കാര്യങ്ങൾ വികസിപ്പിച്ച് കഥ പറയാൻ ഇനിയും ഇത്തരം ധാരാളം പ്രവർത്തനങ്ങൾ നൽകേണ്ടതുണ്ട് എന്ന് തിരിച്ചറിഞ്ഞു. ചിത്രങ്ങൾക്ക് ഗ്രൂപ്പായിത്തന്നെ ഭംഗിയായി നിറവും നൽകി. 
• ഇന്ന് 7 പ്രവർത്തനങ്ങൾ ചെയ്യാൻ കഴിഞ്ഞു.

ബിന്നി ഐരാറ്റിൽ

ജി ഡബ്ല്യു എൽ പി എസ് ബേള കാസറഗോഡ്

🌈 വളരെയേറെ സന്തോഷം നിറഞ്ഞ ഒരു ദിനം ആയിരുന്നു ഇന്നലെ, രാവിലെ പ്രവർത്തനങ്ങൾ ആരംഭിച്ചു. 11 മണിയോടുകൂടി AEO വിസിറ്റ് നടത്തി. അതിൽ  എന്റെ ക്ലാസ് റൂമിൽ ഏറെ നേരം ഇരുന്നു കുട്ടികളുടെ പ്രവർത്തനങ്ങൾ എല്ലാം നിരീക്ഷിച്ചു. ക്ലാസിൽ നെയിം ട്രീ നിർമ്മാണമായിരുന്നു നടന്നുകൊണ്ടിരുന്നത്. AEO ശോഭന മേഡം കുഞ്ഞുങ്ങളോട് സൗഹൃദം നിറഞ്ഞ ചെറു ചോദ്യങ്ങൾ ചോദിക്കുകയുണ്ടായി. കുഞ്ഞുങ്ങൾ എല്ലാവരും മികച്ച പ്രതികരണം നടത്തി. *ഒന്നൊരുക്കം* കഴിഞ്ഞ ദിവസങ്ങളിലെ എല്ലാ പ്രവർത്തനങ്ങളുടെയും പേപ്പർ വഞ്ചി, ചെമ്പരത്തിപ്പൂ ചാർട്ട് പേപ്പറിൽ ഒട്ടിച്ചത്, മീൻ നിർമ്മാണം, മഴവിൽ നിർമ്മാണം  എന്നിവയെല്ലാം കാണുകയും, അതിന്റെ ഫോട്ടോസും വീഡിയോസും വളരെ കൗതുകത്തോടെ കൂടുതൽ സമയം ഇരുന്ന് ആസ്വദിക്കുകയും ചെയ്തു. രക്ഷകർത്താക്കളുടെ അഭിപ്രായവും കണ്ടു വളരെയധികം സന്തോഷത്തോടെ പറഞ്ഞു *ഒന്നാം ക്ലാസ് ഒന്നാം തരം* തന്നെ എന്നെ വളരെയധികം പ്രശംസിക്കുകയും ചെയ്തു കൊണ്ട്, പ്രവർത്തനങ്ങളുടെ എല്ലാം റിപ്പോർട്ട് മേഡത്തിന് വേണമെന്നും പറഞ്ഞു 🙏. ഇപ്രകാരം ഒന്നാം ക്ലാസിനെ മികവുറ്റതാക്കാൻ കഴിയുന്നത് ഒന്നൊരുക്കത്തിലെ പ്രവർത്തനങ്ങൾ  തന്നെ ആണെന്ന്  മേഡം പറഞ്ഞു. സംയുക്ത ഡയറി രചന,വായനോത്സവം ഇവ തുടങ്ങുന്നതിനെക്കുറിച്ചും ആരാഞ്ഞു. ഇവയുടെ  ഉദ്ഘാടനത്തിന് ഞാൻ ക്ഷണിച്ചു. മറ്റ് തിരക്കുകൾ ഇല്ലെങ്കിൽ തീർച്ചയായും ഞാൻ വരും എന്നും അറിയിച്ചു. School HM നോട് എന്റെ ക്ലാസ് നിരീക്ഷിച്ചതിന്റെ അനുഭവങ്ങൾ പങ്കു വെച്ചു മികച്ച അഭിപ്രായം പറഞ്ഞു 🌈ഒന്നൊരുക്ക പ്രവർത്തനങ്ങളിലൂടെ എനിക്കും ഒന്ന് star ആകാൻ സാധിച്ചു. അണിയറ പ്രവർത്തനങ്ങളിൽ നേതൃത്വം നല്കുന്ന കലാധരൻ മാഷിന് ഒരായിരം  നന്ദി🙏 മുൻ കാലങ്ങളിൽ AEO വിസിറ്റ് ചെയ്യുമ്പോൾ ടെൻഷൻ ആയിരുന്നു. ഇപ്പോൾ ഒരു പാട് പ്രവർത്തനങ്ങൾ കാണിച്ചു കൊടുക്കാനും, പറയാനും ആവേശമാണ് ❤️