വായനോത്സവവും അക്കാദമിക മാസ്റ്റര്‍ പ്ലാനും

 

വായനയുമായി ബന്ധപ്പെട്ട് അക്കാദമിക മാസ്റ്റര്‍പ്ലാനില്‍ പരിപാടി രൂപപ്പെടുത്തുന്നതിന് മുമ്പ് വായനയെക്കുറിച്ച് ആശയാടിത്തറ ഒരുക്കണം. അതിനാണ് ഈ കുറിപ്പ്.

ആമുഖം

ചെറിയ കുട്ടികൾക്ക് പുസ്തകം വായിച്ചു കേൾപ്പിക്കുന്നത് വായനയുടെ ആദ്യപടിയാണ്. കുട്ടികൾക്ക് ഭാഷയുടെയും ലോകത്തെക്കുറിച്ചുള്ള കാഴ്ചപ്പാടിന്റെയും വാതായനം തുറക്കുന്ന ഈ അനുഭവം അവരുടെ പഠനജീവിതത്തേക്കുള്ള നല്ല തുടക്കമാകും.

ചെറിയ കുട്ടികളെ പുസ്തകം വായിച്ചു കേൾപ്പിക്കുന്നത് (read-aloud activity) ഭാഷാ വികസനത്തിൽ വലിയ സ്വാധീനം ചെലുത്തുന്നു എന്ന് നിരവധി ഗവേഷണങ്ങൾ സ്ഥിരീകരിക്കുന്നു.  കേരളത്തിലെ പ്രൈമിസ്കൂള്‍ അധ്യാപകരില്‍ പലരും ഇത്തരം ഗവേഷണഫലങ്ങളെക്കുറിച്ച് ധാരണനേടാതെയാണ് അധ്യാപനത്തിലേക്ക് കടക്കുന്നത്. അതിനാല്‍ത്തന്നെ സ്വന്തം ക്ലാസ് പാഠപ്പുസ്തകത്തിനപ്പുറമുള്ള സാധ്യതകള്‍ പ്രയോജനപ്പെടുത്തുന്നതില്‍ പുറം തിരിഞ്ഞുനില്‍ക്കും. ഈ വിമുഖതാധ്യാപനസംസ്കാരം കുട്ടികളെ മികച്ച വായനക്കാരും എഴുത്തുകാരുമാക്കില്ല. പരീക്ഷയിലെ ഉയര്‍ന്ന ഗ്രേഡ് പോലും ഭാഷയിലെ ഉയര്‍ന്ന നിലവാരത്തെ പ്രതിഫലിപ്പിക്കില്ല. അധ്യാപകകേന്ദ്രിത പഠനരീതിയില്‍ നിന്നും പൂര്‍ണമായി മോചിതരാകാത്തവരുണ്ട്. എല്ലാത്തരം അന്വേഷണാത്മകതയെയും അവര്‍ ഓരോരോ കാരണം പറഞ്ഞ് നിരുത്സാഹപ്പെടുത്തും. അത്തരം വഴിമുടക്കലിലെ അംഗീകരിക്കാത്തതും സ്വയം പുതുക്കുന്നതുമായ അധ്യാപകര്‍ക്കാണ് ഗവേഷണഫലങ്ങളെക്കുറിച്ചുള്ള അറിവ് കരുത്തായി മാറുക.

പ്രധാനപ്പെട്ട ഗവേഷണങ്ങളുടെ കണ്ടെത്തലുകൾ ഇവിടെ പങ്കിടുകയാണ്. 

ഈ പ്രവർത്തനം പദസമ്പത്ത് വർദ്ധിപ്പിക്കുകയും വാക്യഘടനയും ശബ്ദവ്യവസ്ഥയും മനസ്സിലാക്കുന്നതിനുള്ള കഴിവ് വികസിപ്പിക്കുകയും ചെയ്യുന്നു.

1. അമേരിക്കയിലെ വ്യത്യസ്ത സാമൂഹികസാഹചര്യങ്ങളിലുള്ള കുട്ടികളുടെ ഭാഷാശേഷിയും വീട്ടിലെ വായനാനുഭവവും തമ്മിലുള്ള ബന്ധം പഠനവിധേയമാക്കിയിട്ടുണ്ട്.

• കുഞ്ഞുങ്ങൾക്ക് വയനാനുഭവങ്ങൾ എത്രമേൽ ലഭിക്കുന്നോ അതനുസരിച്ച് ഭാഷാ ശൈലി വികസിക്കുന്നതായി കണ്ടെത്തി.

• താഴ്ന്ന സാമൂഹിക സാമ്പത്തിക സ്ഥിതിയിലുള്ള കുട്ടിള്‍ക്ക് വായനയുടെ വീട്ടനുഭവം കുറവായിരിക്കും. അത് ഭാഷാവികസനത്തെ ബാധിക്കുന്നു.  വീട്ടില്‍ വായനാനുഭവം കിട്ടാത്ത കുട്ടിയ്കും കിട്ടുന്ന കുട്ടിയ്ക്കും തമ്മില്‍ പദസമ്പത്തില്‍ വിടവ് ( “Vocabulary gap”) ഉണ്ടായിരിക്കും.  ( Hart & Risley (1995) – “Meaningful Differences in the Everyday Experience of Young American Children”

കേരളത്തിലെ പൊതുവിദ്യാലയങ്ങളില്‍ പഠിക്കുന്ന സാധാരണകുട്ടികളുടെ രക്ഷിതാക്കള്‍ക്ക് വീട്ടില്‍ കുട്ടികള്‍ക്ക് ചെറുപ്രായത്തില്‍ വായിക്കാനുള്ള പുസ്തകങ്ങള്‍ ഉണ്ടാകണമെന്നില്ല. വായനാനുഭവപരിമിതി കുട്ടികള്‍ നേരിടും. അത് പരിഹരിക്കാനാണ് ക്ലാസ് ലൈബ്രറി ( ഒന്നാം ക്ലാസില്‍ വായനക്കൂടാരം) ഒരുക്കണമെന്നും പുസ്തകങ്ങള്‍ കുട്ടികള്‍ക്ക് വീട്ടിലേക്ക് കൊടുത്തുവിടണമെന്നും പറയുന്നത്. പി ഡി എഫ് രൂപത്തിലുള്ള സചിത്രകഥകളും ലഭ്യമാക്കണം. 

 2. മുപ്പത്തിമൂന്ന് പഠനങ്ങൾ ആധാരമാക്കി നടത്തിയ വിശകലനപഠനപ്രകാരം, മാതാപിതാക്കൾ കുട്ടികളെ ദിവസവും പുസ്തകം വായിച്ചു കേൾപ്പിക്കുന്നത്, കുട്ടികളുടെ വായനാപരമായ കഴിവുകൾ (reading skills) ഉയർത്തുന്നു എന്ന് കണ്ടെത്തി. ആശയഗ്രഹണം, അച്ചടിച്ചവ സംബന്ധിച്ച അവബോധം, പദസമ്പത്ത് എന്നിവയിലെല്ലാം കുട്ടികള്‍ക്ക് നേട്ടം ഉണ്ടാകുന്നു. ( Bus, Van Ijzendoorn, & Pellegrini (1995) – Meta-analysis )

രക്ഷിതാക്കളെ എങ്ങനെ വീട്ടുവായനയുടെ സംസ്കാരത്തിലേക്ക് കൊണ്ടുവരാനാകും എന്ന് അധ്യാപകര്‍ ആലോചിക്കണം. എന്തിന് വായിക്കണം? എങ്ങനെ വായിക്കണം? എത്രവായിക്കണം തുടങ്ങിയ ആലോചകനകള്‍ രക്ഷിതാക്കളിലേക്ക് എങ്ങനെ എത്തിക്കാമെന്ന് ചിന്തിക്കണം. 

 3. 'സംവാദാത്മക വായന (Dialogic Reading')യുടെ രീതി വായനാനുഭവത്തെ ശക്തമാക്കും എന്ന് ഉപയോഗിക്കണം എന്നു നിര്‍ദ്ദേശിക്കുന്നു ( Whitehurst & Lonigan (1998) – Dialogic Reading)

• കുട്ടികളോട് വിശകലനാത്മക ചോദ്യങ്ങൾ ചോദിക്കുക,

• അവരെ കഥയിൽ പങ്കെടുപ്പിക്കുക ( പ്രവചിക്കല്‍),

• കഥയോട് പ്രതികരിക്കാനും വിലയിരുത്താനും പ്രേരിപ്പിക്കുക

നമ്മുടെ രക്ഷിതാക്കള്‍ക്ക് ഇത്തരം രീതികള്‍ പരിചയം ഉണ്ടാകണമെന്നില്ല. എന്ത്? ആര്? തുടങ്ങിയ ഒറ്റവാക്കുത്തരം കിട്ടുന്ന ചോദ്യങ്ങളാകും കൂടുതല്‍ പേരും ചോദിക്കുക. എന്ത് സംഭവിക്കും? നീ ആയിരുന്നെങ്കില്‍ എങ്ങനെ പെരുമാറും? എന്തുകൊണ്ടായിരിക്കും അങ്ങനെ സംഭവിച്ചത് എന്നൊക്കെ ചോദിക്കണമെങ്കില്‍ കഥയുടെ മര്മ്മ സ്ഥാനങ്ങള്‍ മുന്‍കൂട്ടി തിരിച്ചറിയണം. അതായത് കുട്ടിക്ക് വായിച്ചുകൊടുക്കുന്നതിന് മുമ്പ് ഒരു നല്ലവായന തനിയെ നടത്തണം എന്ന്. ഇതിന് പരിശീലനം ആവശ്യമാണ്. പരിശീലനം നല്‍കണമെങ്കില്‍ ടീച്ചര്‍ക്കും പരിശീലനം ലഭിക്കേണ്ടതുണ്ട്. 

പുസ്തകം വായിച്ചു കേൾപ്പിക്കൽ:

• ഭാഷയുടെ സമ്പത്തും ആഴവും വർദ്ധിപ്പിക്കുന്നു

• വിചാരവും സൃഷ്ടിപരതയും വളർത്തുന്നു

• വായനയുടെ സംസ്‌കാരം വളർത്തുന്നു

ഇത് ഭാഷാ ശിക്ഷണത്തിൽ അനിവാര്യമായ ഭാഗമാകേണ്ടതാണ് . അതിനായി പുസ്തകങ്ങളുടെ തെരഞ്ഞെടുപ്പ് മുതല്‍ ശ്രദ്ധിക്കണം

ശ്രദ്ധാപൂർവം പുസ്തകം തിരഞ്ഞെടുക്കുന്നതെങ്ങനെ?

1. കുട്ടിയുടെ പ്രായത്തിനും ഭാഷാഗ്രഹണശേഷിക്കും അനുയോജ്യമായ പുസ്തകം തെരഞ്ഞെടുക്കണം.

2. ലളിതമായ കഥകൾ കൂടുതൽ ഉചിതമാണ്.

3. ഒന്നാം ക്ലാസിലെ കുട്ടികള്‍ക്കിണങ്ങിയ (ചിത്രങ്ങള്‍ കൂടുതലുളളതും എഴുത്ത് കുറവുളളതുമായ) പുസ്തകങ്ങളാണ് വേണ്ടത്.

4. അധികം പേജുകള്‍ പാടില്ല.

5. ആകര്‍ഷകരമായ ലേഔട്ടും ഉളളടക്കവും വേണം.

6. ചിത്രങ്ങള്‍ ചിത്രവായനയ്ക്ക് സഹായകമാകണം.

7. വീണ്ടും വായിക്കാന്‍ പ്രേരിപ്പിക്കുന്ന ഘടകങ്ങള്‍ പുസ്തകത്തിലുണ്ടാകണം.

8. ചെറിയ പ്രായത്തില്‍ ചിത്രങ്ങളുടെ സഹായത്തോടെയാണ് കുട്ടികള്‍ വായിക്കുന്നത് അതിനാല്‍ ചിത്രങ്ങള്‍ ചിന്തയും ആസ്വാദ്യതയും ഉണര്‍ത്തുന്നതാണോ എന്ന് പരിശോധിക്കണം. 

9. ഭാഷ താളാത്മകമാകണം. പ്രാദേശികഭാഷയുടെ അതിപ്രസരം പാടില്ല.

10. പാഠപ്പുസ്തകത്തിലെ ലിപിയിലുള്ളതാണെങ്കില്‍ തനിച്ചുള്ള വായനയുടെ ഘട്ടത്തിലേക്ക് പ്രവേശിക്കുമ്പോള്‍ പ്രയോജനപ്പെടും.

11. കേട്ടുതഴമ്പിച്ച കഥകള്‍ ഒഴിവാക്കുക. ഓരോ വായനയും പുതിയ വായനാനുഭവം ആയിരിക്കണം. 

12. ഗുണപാഠകഥകളെന്ന പേരില്‍ തയ്യാറാക്കുന്ന പലതും മികച്ച ബാലസാഹിത്യരചനകളാവണമെന്നില്ല. വായനയുടെ ലക്ഷ്യം ഗുണപാഠം പഠിപ്പിക്കലുമല്ല എന്ന് തിരിച്ചറിയണം. 

13. ഓരോ പുസ്തകത്തിന്റെ ഒന്നിലധികം കോപ്പികള്‍ വേണം.

• രക്ഷിതാക്കളുമായി ക്ലാസിലും വീട്ടിലും വായനക്കൂടാരം എന്ന ആശയം ചര്‍ച്ച ചെയ്യണം. നിലവിലെത്ര പുസ്തകങ്ങളുണ്ട്? ഇനി എത്ര വേണം? അവ ജൂണ്‍ മാസം എങ്ങനെ സംഘടിപ്പിക്കാം? സാമ്പത്തികസഹായസാധ്യതകള്‍ എങ്ങനെ? പ്രാദേശികമായി സഹായിക്കാന്‍ കഴിയുന്നവര്‍, സ്ഥാപനങ്ങള്‍ ഇതൊക്കെ ആലോചിച്ച് കൂട്ടായി പ്രവര്‍ത്തിച്ചാല്‍ ലക്ഷ്യം നേടാനാകും.   

 എങ്ങനെ പുസ്തകം വായിച്ചു കേൾപ്പിക്കാം?

1. പ്രസന്നമായി വായിക്കുക:

• കഥാസന്ദര്‍ഭം, കഥാപാത്രസ്വഭാവം ഇവ പരിഗണിച്ച്  ശബ്ദത്തിൽ അനുയോജ്യമായ മാറ്റം വരുത്തി വായിക്കുക (voice modulation). ഇത് കഥാപാത്രവുമായും കഥാസന്ദര്‍ഭവുമായും താദാത്മ്യം പ്രാപിക്കുന്നതിന് സഹായകമാകും

• ശരീരഭാഷ ഉപയോഗിക്കുക.

• വൈകാരികഭാവം  — സന്തോഷം, അമ്പരപ്പ്, ദു:ഖം തുടങ്ങിയ വികാരങ്ങൾ വായനയില്‍ പ്രതിഫലിപ്പിക്കുക.

2. ചിത്രങ്ങൾ കാണിച്ചു വായിക്കുക:

• ഓരോ പേജിലും ഉള്ള ചിത്രങ്ങൾ കുട്ടികൾക്ക് കാണിച്ചു കൊടുക്കുക. ചിത്രവും ഉള്ളടക്കവുമായി ബന്ധപ്പെടുത്തുക. ഓരോ പേജിലും ചിത്രങ്ങളുള്ള പുസ്തകങ്ങള്‍ പ്രയോജനപ്പെടുത്തുക

• "ഇതെന്താണ്?" "ഇവിടെ ആരാണ്?" എന്നിങ്ങനെ ചോദ്യങ്ങളോടെ അവരുടെ പങ്കാളിത്തം ഉറപ്പാക്കുക.

3. വിശകലനാത്മക ചോദ്യങ്ങൾ ചോദിക്കുക:

• കഥയുമായി ബന്ധപ്പെട്ട സംവാദാത്മകചോദ്യങ്ങൾ ചോദിക്കുക.

4. പ്രതികരണശീലങ്ങൾ വളർത്തുക

• കുട്ടി ഒരു ചോദ്യം ചോദിച്ചാൽ ചിന്തിപ്പിക്കുന്ന മറുപടി നൽകുക.

"ഒരു ടീച്ചർ കുട്ടിയുടെ ഭാഷയെ പ്രണയിപ്പിക്കുന്ന ആദ്യ പാഠപുസ്തകമാണ്."

ഭാഷാവികാസം യാഥാർത്ഥ്യപ്പെടുന്നത്, വായനയുടെയും ഭാഷണത്തിന്റെയും ജാലകങ്ങൾ തുറക്കുമ്പോഴാണ്. ഈ വാതിലുകൾ തുറക്കാൻ ടീച്ചർ ഉദ്ദേശത്തോടെ പ്രവർത്തിക്കേണ്ടതുണ്ട്.

കഥാപുസ്തകങ്ങൾ ഉപയോഗിക്കുന്ന ക്ലാസിൽ കുട്ടികൾക്ക് ഭാഷാവികാസം, സൃഷ്ടിപരത, ആശയഗ്രഹണ ശ്രദ്ധാശേഷി, ചിന്ത തുടങ്ങിയ നിരവധി കഴിവുകള്‍ വളരാൻ കഴിയുന്ന ചലനാത്മകവും രസകരവുമായ പ്രവർത്തനങ്ങൾ നടത്താൻ കഴിയും.

ടീച്ചറൊരുക്കുന്ന കഥാനുഭവത്തെ ആധാരമാക്കി നടത്താവുന്ന പ്രവർത്തനങ്ങൾ

1. കഥാഭാഗം പൂർണ്ണമാക്കുക

• ഉദ്ദേശ്യം: സൃഷ്ടിപരമായ ആലോചനയ്ക് അവസരം ഒരുക്കുക  കഥാബോധം വള്ര്‍ത്തുകയും

• പ്രവര്‍ത്തനം:  കഥയുടെ ഒരു ഭാഗംവരെ മാത്രം വായിച്ച് നിർത്തുന്നു.

• കുട്ടികൾ  അവശേഷിച്ച ഭാഗം എങ്ങനെയായിരിക്കാമെന്ന് പറയുക, വരയ്ക്കുക.

2. കഥാപാത്രങ്ങളായി അഭിനയിക്കുക (Role Play / Drama)

• ഉദ്ദേശ്യം: ഭാഷാശൈലി, ആത്മവിശ്വാസം,  ടീം വര്‍ക്ക്, ആവിഷ്കാരനൈപുണി എന്നിവ വികസിപ്പിക്കുക

• പ്രവര്‍ത്തനം: കഥയിലെ കഥാപാത്രങ്ങൾ തങ്ങളുടെ ശബ്ദത്തിൽ സംസാരിക്കുന്നതുപോലെ രംഗാഭിനയം നടത്തുക

• ചെറിയ സംഭാഷണങ്ങൾ  പറഞ്ഞ് അഭിനയിപ്പിക്കുക.

3. ചിത്രം വരയ്ക്കുക – ‘എന്റെ കഥാ ചിത്രം’

• ഉദ്ദേശ്യം: ദൃശ്യാനുഭവം, കഥ മനസ്സിലാക്കൽ, അർത്ഥബോധം എന്നിവ 

• പ്രവര്‍ത്തനം: കുട്ടികൾ  കഥയിലെ ഒരു ഇഷ്ടപ്പെട്ട രംഗം വരയ്ക്കാൻ പറയുക. ചിത്രങ്ങള്‍ പ്രദര്‍ശിപ്പിക്കുക.

4. ‘ഞാനായിരുന്നുവെങ്കിൽ…’ (Perspective Speaking)

• ഉദ്ദേശ്യം: അനുതാപം വാക്കിന്റെ ഉപയോഗം, ഭാഷാശൈലി എന്നിവ വികസിപ്പിക്കാന്‍

• പ്രവര്‍ത്തനം:  കഥാപാത്രത്തിന്റെ ഭാഗത്ത് നിന്ന് സ്വയം സങ്കല്പിക്കുകയും ഈ സന്ദര്‍ഭത്തില്‍ ഞാനായിരുന്നെങ്കില്‍ എങ്ങനെ പ്രതികരിക്കുമായിരുന്നു എന്നു പറയുകയും ചെയ്യുക

• കഥയിലെ കഥാപാത്രത്തിന്റെ സംഭാഷണം അവതരിപ്പിക്കുക.

5.  "എന്റെ സമാന കഥ" – അനുഭവ പങ്കിടൽ

• ഉദ്ദേശ്യം: അനുഭവ ഭാഷ, Oral narrative skill.

• പ്രവര്‍ത്തനം: പറഞ്ഞു കേട്ട കഥയുമായി തങ്ങളുടെ അനുഭവം ബന്ധിപ്പിക്കാൻ പ്രേരിപ്പിക്കുക.

  • "ഞാനും ഒരു ദിവസം അതുപോലെ ......."

6. വാക്കുകൾ തിരയൽ (Word Hunt)

• ഉദ്ദേശ്യം: ഭാഷാവബോധം വികസിപ്പിക്കല്‍ 

• പ്രവര്‍ത്തനം: കഥയിൽ വന്ന വാക്കുകളില്‍ നിന്ന് "നിര്‍ദ്ദേശിക്കുന്ന അര്‍ഥമുള്ളത്, ഭാവമുള്ളത്, താളമുള്ളത്, ആവര്‍ത്തിച്ചുവന്നത് ഒക്കെ കണ്ടെത്താം. .

7. കവിതയാക്കാം / പാട്ടുപാട്

• ഉദ്ദേശ്യം: ശബ്ദബോധം (phonological awareness), താളബോധം ഇവ സൃഷ്ടിക്കല്‍

• കഥയിലെ ഒരു ഭാഗം  താളത്തിൽ പാടിപ്പറയാം.  പാട്ടിന്റെ പൂര്‍ണതയ്ക്കല്ല ശ്രമത്തിനാണ് പ്രാധാന്യം നല്‍കേണ്ടത്.

8. ചിന്തയും ചർച്ചയും (Think-Talk)

• ഉദ്ദേശ്യം: ആലോചനാ ഭാഷ, അഭിപ്രായ പ്രകടനം, വാദശൈലി എന്നിവ പോഷിപ്പിക്കുന്നതിന്

• പ്രവര്‍ത്തനം: ഉദാ: "ആ കഥാപാത്രം നല്ലതോ മോശമോ?" "അവര്‍  അങ്ങനെ ചെയ്തതു ശരിയാണോ?" ചെറിയ ഗ്രൂപ്പുകളായി ചർച്ച ചെയ്യിക്കുക.

9. പുതിയ ശീർഷകം പുതിയ അന്ത്യം

• ഉദ്ദേശ്യം: സൃഷ്ടി,ആശയഗ്രഹണം, കഥാഘടനസംബന്ധിച്ച ധാരണ വികസിപ്പിക്കല്‍  (Story structure awareness.)

• പ്രവര്‍ത്തനം: കഥയ്ക്ക് കുട്ടികൾക്ക് പുതിയ പേരും പുതിയ അവസാനും നിർദ്ദേശിക്കാം.

 വായന സംബന്ധിച്ച് രക്ഷിതാക്കള്‍ക്ക് നല്‍കേണ്ട നിര്‍ദേശങ്ങള്‍ എന്തെല്ലാം?

• രക്ഷിതാവിന്റെയും കുട്ടിയുടെയും മുന്നില്‍ പുസ്തകം വെക്കുകയും പുസ്തകത്തിലെ ഏതെങ്കിലും ചിത്ര സന്ദര്‍ഭത്തെ അടിസ്ഥാനമാക്കി വിശകലനചോദ്യങ്ങള്‍ ഉന്നയിക്കണം

  • ഇനി എന്തായിരിക്കും സംഭവിച്ചിരിക്കുക അല്ലെങ്കില്‍ മുമ്പെന്തായിരിക്കും സംഭവിച്ചത്?

  • എന്തായിരിക്കാം കഥയുടെ ഉളളടക്കം? എന്നിങ്ങനെ ചോദിച്ച് കുട്ടിയെക്കൊണ്ട് ഊഹിപ്പിക്കല്‍ നടത്തണം.

• തുടര്‍ന്ന് ഓരോ പേജായി എടുത്ത് ചിത്രസൂചനകള്‍ ചേര്‍ത്ത് ഓരോ വാക്യത്തിനു ചുവട്ടിലൂടെയും വിരലോടിച്ച് രക്ഷിതാവ് വായിക്കണം.

• മുഖ്യകഥാപാത്രങ്ങളുടെ പേരുകള്‍ വരുമ്പോള്‍ അവ ശ്രദ്ധിപ്പിക്കാന്‍ ശ്രമിക്കണം. ആ പേരുകള്‍ പിന്നീട് വരുമ്പോള്‍ കണ്ടെത്താനായി വെല്ലുവിളി ഉയര്‍ത്താം. എങ്കിലും അത് നിര്‍ബന്ധിച്ച് ചെയ്യിക്കലോ വായനാപരിശോധന ആവുകയോ ചെയ്യരുത്.

• രക്ഷിതാവ് ഭാവാത്മകമായിട്ടാണ് വായിക്കേണ്ടത്. കുട്ടി ആവശ്യപ്പെടുന്ന പക്ഷം വീണ്ടും ആ പേജുകള്‍ വായിക്കേണ്ടി വരാം.

• വായനയ്ക്ക് ശേഷം നടക്കേണ്ടത് എന്താണ്?

• വായന കഴിഞ്ഞാല്‍ വായിച്ചുകേട്ട കഥ ആശയച്ചോര്‍ച്ച ഇല്ലാതെ കുട്ടിയെക്കൊണ്ട് പറയിക്കണം. ആദ്യം പറയുമ്പോള്‍ ഇടപെട്ട് വിട്ടുപോയി എന്ന് പറഞ്ഞ് തിരുത്തുന്നതിനു പകരം പറച്ചില്‍ പൂര്‍ത്തിയായിക്കഴിഞ്ഞ് എന്തെങ്കിലും വിട്ടുപോയോ എന്നു ചോദിക്കുകയും ആവശ്യമെങ്കില്‍ ബന്ധപ്പെട്ട പേജ് ചൂണ്ടിക്കാട്ടി ഓര്‍മപ്പെടുത്തുകയും ചെയ്യാം. ആശയക്രമീകരണത്തിലും മാറ്റം വരാം. ഇവിടെ ഭാഷണ ശേഷിയാണ് വളരുന്നത്.

• ചില സന്ദര്‍ഭങ്ങളില്‍ വിമര്‍ശനപരമായ സമീപനം സ്വീകരിക്കാന്‍ ശ്രമിക്കും. കഥാപാത്രങ്ങളോട് യോജിപ്പും വിയോജിപ്പും പ്രകടിപ്പിക്കും. രസകരമായ ഭാഗങ്ങള്‍ ആവിഷ്കരിക്കാനും അവസരം നല്‍കാം.

• അക്കാദമിക മാസ്റ്റര്‍ പ്ലാന്‍

  1. ആമുഖം

  2. വായനോത്സവ ലക്ഷ്യങ്ങള്‍

  1.എല്ലാ കുട്ടികളെയും സ്വതന്ത്രവായനക്കാരാക്കുക.

  2. രക്ഷിതാക്കളെ കുട്ടികളുടെ വായനയില്‍ പങ്കാളികളാക്കുക.

  3. വായിച്ചു ഗ്രഹിച്ച ആശയങ്ങള്‍ പങ്കിടുന്നതിലൂടെ കുട്ടികളുടെ വാചികാവതരണശേഷി വികസിപ്പിക്കുക.

  4. ആശയഗ്രഹണവായന, ആസ്വാദ്യവായന എന്നിവ പ്രോത്സാഹിപ്പിക്കുക.

  5. കുട്ടികള്‍ വായനയില്‍ നേടിയ ശേഷി പൊതുസമൂഹവുമായി പങ്കിടുക.

  6. ഒന്നാം ക്ലാസില്‍ എല്ലാ കുട്ടികള്‍ക്കും വായിക്കുന്നതിനുള്ള പുസ്തകശേഖരം ഉണ്ടാക്കുക

  വായനോത്സവം പ്രവര്‍ത്തനങ്ങള്‍

  1. മുന്നൊരുക്കം ( ജൂണ്‍ രണ്ടാം വാരം)

  2. കഥാവായവന പരിശീലനം രക്ഷിതാക്കള്‍ക്ക്  ( ഓഫ് ലൈന്‍, ഓണ്‍ലൈന്‍)

  3. ക്ലാസ് വാട്സാപ്പ് ഗ്രൂപ്പില്‍ അറിയിപ്പ്

  4. പുസ്തകവിതരണക്രമം നിശ്ചയിക്കല്‍ ( ഏത് കുട്ടിക്ക് ഏത് പുസ്തകം ഏതാഴ്ച) 

  5. എല്ലാ വെള്ളിയാഴ്ചയും കുട്ടിയുമൊത്ത് വീട്ടില്‍ കഥ വായന

  6. വായിച്ച കഥയിലെ ഇഷ്ടപ്പെട്ട രംഗം കുട്ടി ചിത്രമാക്കല്‍

  7. രക്ഷിതാവ് ചെറുവാക്യങ്ങളില്‍ ആ രംഗത്തെക്കുറിച്ച് രണ്ടോ മൂന്നോ കാര്യം ചിത്രത്തിന് അടിയില്‍ എഴുതണം. പുസ്തകക്കുറിപ്പ് എഴുതുന്നതിലേക്കുള്ള ആദ്യ അനുഭവം.

  8. കഥാവേള 

  വീട്ടില്‍ വായിച്ചുകേട്ട കഥ ക്ലാസില്‍ അവതരിപ്പിക്കണം. ( ഒരു ദിവസം മൂന്നു പേര്‍ക്ക് അവസരം, ഉച്ചനേരം കഥാവതരണം. ഒരു കുട്ടിക്ക് രണ്ട് അവസരമെങ്കിലും  ഓരോ മാസവുംഉറപ്പാക്കും.

  9.വിലയിരുത്തല്‍ 

  10.  ക്ലാസ് വാട്സാപ്പ് ഗ്രൂപ്പില്‍ പങ്കിടലുകള്‍

  ചിത്രം നോക്കി കഥ തന്റേതായ രീതിയില്‍ പറയല്‍

  വായിച്ചുകേട്ട കഥ അവതരിപ്പിക്കുന്നത്  വീഡിയോ രൂപത്തില്‍ പങ്കിടല്‍ 

   

• വീഡിയോ

  അമ്മ വായിച്ച് കേൾപ്പിച്ച കരടി ബലൂൺ എന്ന കഥ ചിത്രം നോക്കി പറയുകയാണ് ഒന്നാം ക്ലാസുകാരൻ അർഷിക്.

  മാച്ചേരി ന്യൂ യു പി എസ്