മഴവില്ലിന്‍ ചോട്ടിലെ പൂമണക്കാട്ടിലെ കല്യാണക്കുറുക്കത്തീം... (ബദല്‍പാഠം)

( ഒരേ പാഠം ഒന്നാം ക്ലാസിനും നാലാം ക്ലാസിനും എങ്ങനെ ഉപയോഗിക്കാം എന്നൊരന്വേഷണം. പാഠപുസ്തകങ്ങള്‍ വേഗം വേഗം മാറുമ്പോള്‍ നല്ല പാഠങ്ങളെ ഭാവിയില്‍ പ്രയോജനപ്പെടുത്താനുളള തന്ത്രവും കൂടിയാണിത്. ഈ ബദല്‍പാഠം തയ്യാറാക്കുന്നതിന് കുറസേവയുടെ ഡ്രീംസ് എന്ന സിനിമയും മഴയെക്കുറിച്ചുളള പാഠങ്ങളും സഹായകമായിട്ടുണ്ട്.)

ആദ്യം ഒന്നാം ക്ലാസിനുളള പ്രവര്‍ത്തനം

കുട്ടികള്‍ മൈതാനത്ത് പന്ത് കളിക്കുകയായിരുന്നു .

പന്ത് അടിച്ചുയര്‍ത്തി.

അത് ആകാശത്തേക്കുയര്‍ന്നുയര്‍ന്നു പോയി.

പന്ത് കടുകുമണിയോളം ചെറുതായി.

ആകാശത്തിന്റെ കണ്ണില്‍ വീണു.

മാനം മുഖം കറുപ്പിച്ചു.

കണ്ണുനീര്‍ പെയ്യാന്‍ തുടങ്ങി.

തുരുതുരാന്ന് തുളളികള്‍.

മഴ കനത്തു പെയ്തു.

പെരുമഴ. പേമഴ.കളി മുടങ്ങി.

അപ്പോള്‍ കുട്ടികള്‍ എന്താവും ചെയ്തിരിക്കുക?

(ഈ രംഗം അഭിനയിക്കണം.അഭിനയം വിലയിരുത്തണം)

ശരിക്കും മഴ നനഞ്ഞോ? മുഖത്തെല്ലാം വെളളത്തുളളികള്‍ വീണോ?

എവിടെയാണ് ഓടിക്കയറിയത്?

മരച്ചുവട്ടിലോ? അപ്പോള്‍ കുട്ടികള്‍ക്ക് മഴയോട് ഇഷ്ടമോ ദേഷ്യമോ തോന്നിയത്?

അവര്‍ മഴയോടെന്തു പറഞ്ഞുകാണും?

പ്രതികരണങ്ങള്‍ ബോര്‍ഡിലെഴുതണം .പറഞ്ഞെഴുതണം.

വായിക്കണം. കുഞ്ഞുങ്ങള്‍ കാണണം. അവര്‍ പറഞ്ഞതാണ് .

ബോര്‍ഡിലെന്ന് അറിയുന്നത് വായനാതാല്പര്യം വര്‍ധിപ്പിക്കും.

എഴുത്തു പഠിക്കാന്‍ പ്രേരണയുമാകും.

( എല്ലാ ക്ലാസുകളിലും ഇങ്ങനെ എഴുത്തുണ്ടാകണം)

കുട്ടികള്‍ പറഞ്ഞ ആശയങ്ങളിതിലുണ്ടോ?

ടീച്ചര്‍ യഥാര്‍ഥത്തില്‍ കുട്ടികള്‍ പാടിപ്പറഞ്ഞ കാര്യം പരിചയപ്പെടുത്തുന്നു.

മഴേ മഴേ പോ മഴേ

പിന്നൊരിക്കല്‍ വാ മഴേ

ഞങ്ങളൊന്നു കളിച്ചോട്ടേ

മഴേ മഴേ പോ മഴേ

പിന്നൊരിക്കല്‍ വാ മഴേ

മഴേ...മഴേ... പോ... പോ...

മഴേ... മഴേ... പോ... പോ...

വെയിലേ... വെയിലേ... വാ... വാ...

വെയിലേ... വെയിലേ... വാ...വാ

ഇത് നോക്കി ഏറ്റുപാടി രസിക്കുന്നു.ഈ പാട്ട് ഇഷ്ടമായോ എങ്കില്‍ പടം വരയ്കാം. മൈതാനം-കുട്ടികള്‍ മരച്ചുവട്ടില്‍-ചെയ്യുന്ന മഴ ...നിറം നല്‍കണം.

കുട്ടികളുടെ പാട്ടു കൂടി എഴുതിയാലോ? ചിത്രത്തിന്റെ താഴെ പാട്ട്.അതിന് എഴുതാനറിയില്ല.എങ്കില്‍ ടീച്ചറെഴുതിക്കാണിക്കാം (ഗ്രാഫിക് റൈറ്റിംഗ്) വായന.

താരയ്ക്ക മഴ പെയ്യുന്നതാ ഇഷ്ടം.

അവള്‍ പാടി

മഴേ...മഴേ വാ... വാ

മഴേ...മഴേ വാ... വാ

വെയിലേ... വെയിലേ പോ... പോ...

വെയിലേ... വെയിലേ പോ... പോ...

അപ്പോള്‍ മറ്റുളളവര്‍ക്ക് അതിഷ്ടമായില്ല.അവര്‍ തിരിച്ചുപാടി

മഴേ...മഴേ... പോ... പോ...

മഴേ... മഴേ... പോ... പോ...

വെയിലേ... വെയിലേ... വാ... വാ...

വെയിലേ... വെയിലേ... വാ...വാ

മഴയോടും വരാനും പോകാനും

വെയിലിനോടും വരാനും പോകാനും പറഞ്ഞാല്‍ എന്താ സംഭവിക്കുക?

അപ്പോഴല്ലേ രസം! മഴേം വെയിലും ഒന്നിച്ചു വന്നു!

മഴേം വെയിലും ഒന്നിച്ചു വന്നാല്‍ എന്താ സംഭവിക്കുക?

കൂൂൂൂൂൂൂൂൂൂൂൂൂൂൂൂൂൂൂൂൂൂൂൂൂൂൂ കൂൂൂൂൂൂൂൂൂൂൂൂൂൂൂൂൂൂൂൂൂൂൂൂൂൂ

ആരോ ഓലിയിടുന്നു. ആരാവും?

കാറ്റും മഴയും പൊന്‍വെയിലും കാട്ടിലെ കുറുക്കന്റെ കല്യാണം.

കാറ്റും വെയിലും കുറുക്കന്റെ കല്യാണം

കുറുക്കന്റെ പടം വരച്ച് കൂ കൂ എന്നെഴുതുന്നു. ശബ്ദാനുകരണം.

നിറം നല്‍കാം

കുറുക്കന്റെയും കുറുക്കത്തീടേം കല്യാണരംഗം. ചിത്രം നല്‍കണം. നിറം നല്‍കി അടിക്കുറിപ്പെഴുതട്ടെ (മഴയും വെയിലും കുറുക്കന്റെ കല്യാണം )

 

കല്യാണച്ചക്കനും പെണ്ണിനും ആകാശം ഒരു സമ്മാനം കൊടുത്തു. ഉരുണ്ട ഒരു സാധനം. എന്തായിരിക്കും?
അവര്‍ ആ പന്തു തട്ടിക്കളിച്ചു.
പന്തുരുണ്ടുരുണ്ട് നാട്ടിലെത്തി.
കുറുക്കനും കുറുക്കത്തീം പന്തുതേടി നാട്ടിലെത്തും. 
പമ്മി പമ്മി, ഓരോ രാത്രിയും. 
കുറുക്കക്കെട്ട്യോനേം കെട്ട്യോളേം കണ്ട കോഴികള്‍ ബഹളം വെക്കും. പന്തു തെരയാന്‍ ഈ കോഴികള്‍ സമ്മതിക്കില്ല. കുറുക്കനും കുറുക്കത്തീം ഓരോ കോഴിയേയും കൊണ്ടാണ് കാട്ടിലോക്ക് മടങ്ങുക.
വെറും കൈയോടെ മടങ്ങിച്ചെന്നാല്‍ മോശമല്ലേ.കല്യാണ വിരുന്ന് കെങ്കേമം.
അങ്ങനെ പന്തു തേടിഇപ്പോഴും കുറുക്കക്കൂട്ടര്‍ വരാറുണ്ടത്രേ.

വീട്ടില്‍ ചെന്ന് അമ്മയോട് കഥ പറഞ്ഞു കൊടുക്കണം. 
എന്തെല്ലാം പറയും? കുട്ടികള്‍ പ്രതികരിക്കുന്നു. 
ഓരോരുത്തര്‍ക്കും അവസരം കിട്ടണം. 
പടം വരച്ചതും എഴുതിയതും കാണിക്കണ്ടേ? അതു വായിച്ചു കേള്‍പ്പിക്കണ്ടേ? കുട്ടികള്‍ എഴുതിയവ വീണ്ടും വായിക്കുന്നു. തിരിച്ചറിയല്‍ കളി.

 

ഭാഗം രണ്ട്.

കുരസോവയുടെ ഡ്രീംസ് കഥ പറയുന്നു (ഭേദഗതികള്‍ വരുത്തിയതാണ്)

കുറുക്കന്റെ കല്യാണം ആരും കാണാന്‍ പാടില്ല

ഒരു കുട്ടി അമ്മ പറഞ്ഞത് വക വെക്കാതെ കാട്ടില്‍ പോയി. 
കല്യാണം കാണാന്‍. 
കുട്ടി കാട്ടിലെത്തി.
കൊടുങ്കാട്. 
മരങ്ങള്‍ക്ക് മറ പറ്റി കുട്ടി നടന്നു

അവിടെ ഒത്തിരി കുറുക്കന്മാര്‍ കല്യാണത്തിനു കൂടിയിട്ടുണ്ട്. 
അവര്‍ പ്രത്യേക രീതിയില്‍ നൃത്തം വെച്ചു നീങ്ങി.
ഇടതുവശത്തേക്ക് അവ തല തിരിച്ചു. 
കുട്ടിക്ക് സംശയം തന്നെ കണ്ടോ?

കുട്ടി തിരഞ്ഞോടി. 

അത് കുറുക്കന്മാര്‍ കണ്ടു!

മൂത്ത കുറുക്കന്‍ കുട്ടീടെ വീട്ടിലെത്തി അമ്മയോടു പറഞ്ഞു. "കുട്ടിയെ ഉപദ്രവിക്കും"

അമ്മ പേടിച്ചു. വിഷമിച്ചു.അമ്മ കുട്ടിയോട് പറഞ്ഞു "ചെന്നു ക്ഷമ പറയൂ"

"എവിടെയാ കുറുക്കന്മാര്‍?"

"മഴവില്ലിന്റെ താഴെ പൂക്കളുളള കുറ്റികാട്ടിലാണ് കുറുക്കന്മാര്‍"

കുട്ടി ഇറങ്ങി

പോകുന്ന വഴിക്ക് നല്ല മണം.പൂക്കളുടെ മണം പിടിച്ച് നടന്നു.

പിന്നെയും നടന്നു. നടന്നു നടന്നു ചെന്നപ്പോള്‍ അവിടെ ധാരാളം പൂക്കള്‍. ഹായ്!

മഴവില്ലെവിടെ?

കുട്ടി പൂക്കളോടു ചോദിച്ചു

അതിന് മഴ പെയ്യണം

കുട്ടി പാടി

താര പാടിയ പാട്ട് (ബോര്‍ഡില്‍ കുട്ടികളുടെ പങ്കാളിത്തത്തോടെ എഴുതണം)

മഴേ മഴേ വാ വാ വാാാാാാാാാാാ

മഴവില്ലൊന്നു താ താ താാാാാാാാാാ

മഴേ മഴേ വാ വാ വാാാാാാാാാാ

മഴവില്ലൊന്നു താ താ താാാാാാാാാാാാ

അപ്പോള്‍ ചാറ്റല്‍ മഴ പെയ്തു

മഴവില്ല് തെളിഞ്ഞു

അവിടെ കുറ്റിച്ചെടികള്‍ക്കിടയില്‍ കുറുക്കന്മാര്‍ തല ഉയര്‍ത്തി.

കുട്ടി പറഞ്ഞു "ക്ഷമിക്കണം"

കുറുക്കന്മാര്‍ കൂവി

"കൂൂൂൂൂൂൂൂൂൂൂൂൂൂൂൂൂൂൂൂൂൂൂൂൂൂൂൂ കൂൂൂൂൂൂൂൂൂൂൂൂൂൂൂൂൂൂൂൂ..."

എന്താ കളിയാക്കുന്നെ? കുട്ടി ചോദിച്ചു

"കൂൂൂൂൂൂൂൂൂൂൂൂൂൂൂൂൂൂൂൂൂ കൂൂൂൂൂൂൂൂൂൂൂൂൂൂൂൂൂൂ.."

എന്നോട് ക്ഷമിച്ചൂന്നു പറ

"കൂൂൂൂൂൂൂൂൂൂൂൂൂൂൂൂൂൂൂ കൂൂൂൂൂൂൂൂൂൂൂൂൂൂൂൂൂൂൂൂൂ..."

അപ്പോള്‍ കുട്ടിക്ക് വിഷമമായി

പൂക്കള്‍ പറഞ്ഞു

"അവര്‍ക്ക് അങ്ങനെയെ പറയാനറിയൂ

ക്ഷമിച്ചതാ. അല്ലെങ്കില്‍ മഴവില്ലിന്റെ ചുവട്ടില്‍ പൂക്കളുടെ നാട്ടില്‍ താമസിക്കുന്നവര്‍ ആരെയെങ്കിലും ഉപദ്രവിക്കുമോ?"

കുട്ടിക്ക് സന്തോഷമായി

അവള്‍ കുറുക്കന്മാരെ നോക്കി ചിരിച്ചു

കുറുക്കന്മാരും

(മുഖം മൂടി വെച്ച് നാടകം കളിക്കാം.)

  മഴവില്ലിനു താഴെ കുറുക്കന്‍ നില്‍ക്കുന്ന ചിത്രവും വരയ്കാം. അടിക്കുറിപ്പെഴുതാം. അവര്‍ ഓരോരുത്തരും പറയുന്നത് എഴുതിക്കൊടുത്ത് വായിപ്പിക്കുക. ക്ലാസില്‍ പങ്കിടുക.

(ഒന്നാം ക്ലാസുകാരും അവരുടെ നോട്ടുബുക്കും എന്ന മുന്‍ ലക്കത്തില്‍ ഈ പാഠം പ്രയോഗിച്ചതിന്റെ തെളിവുകള്‍ കാണാം.)

നാലാം ക്ലാസിന്

കഥ ശ്രാവ്യപാഠം. അതൊരനുഭവം ആകണം. ഭാവത്തോടെ ശബ്ദവ്യതിയാനത്തോടെ,കഥാപാത്രമായി താദാത്മ്യം പ്രാപിക്കുന്ന വിധം.ഈ കഥ പറഞ്ഞ ശേഷം സാധ്യമെങ്കില്‍ കുറസോവയുടെ സിനിമയുടെ ആദ്യസ്വപ്നം കാണിക്കണം.

ഈ സിനിമക്കഥ ഇഷ്ടപ്പെട്ടോ? ഇഷ്ടപ്പെട്ടത് മറ്റുളളവരും അറിയണ്ടേ?മൂന്നാം ക്ലാസുകാര്‍ക്ക് വേണ്ടി ഒരു കഥാപാഠമാക്കിയാലോ? നമ്മള്‍ രചിക്കും നമ്മള്‍ പഠിപ്പിക്കും.എന്താ മനസ്സമ്മതമുണ്ടോ? കുട്ടികളെ പ്രചോദിപ്പിക്കണം.ധാരണയിലെത്തിച്ചേര്‍ന്നാല്‍ രചനയിലേക്കു കടക്കാം
വ്യക്തിഗതമായി കഥാപാഠം എഴുതുന്നതിനു മുമ്പ് ചര്‍ച്ച വേണം. ഫ്ലോ ചാര്‍ട്ടാക്കാം/കഥാപ്പട്ടികയാക്കാം.
എന്തെല്ലാമാണ് പ്രധാന സംഭവങ്ങള്‍?
ഓരോ സംഭവവും എങ്ങനെ വിവരിക്കും?

(ചിന്തയുടെ പാതയൊരുക്കല്‍

ഞാനൊരു വലിയ തെങ്ങ് കണ്ടു എന്നു പറഞ്ഞാല്‍ മറ്റൊരാള്‍ക്ക് അതു മനസിലാകുമോ? ആകുമെന്നാണ് നാം വിചാരിക്കുന്നത്?

വലിയ തെങ്ങ് പലരുടേയും മനസില്‍ പലതാകും. രണ്ടു നില ഉയരമുളളതാണോ? നാലു നില ഉയരമുളളതാണോ? വളഞ്ഞു ചാഞ്ഞതാണോ? കായ്കള്‍ നിറയെ ഉളളതാണോ? ഇലകള്‍ എങ്ങനെ? ആ വലിയതെങ്ങിനെക്കുറിച്ച് മറ്റുളളവര്‍ക്ക് കൃത്യം ധാരണ ലഭിക്കുന്ന വിധം എങ്ങനെ പറയും?

ഇത്തരം ഒരു ഉദാഹരണത്തിന്റെ അവതരണം നടത്തിയ ശേഷം വിശദാംശങ്ങള്‍ സഹിതം എഴുതാന്‍ പറഞ്ഞാലോ?)

വ്യക്തിഗത രചന നടക്കുമ്പോള്‍ ഓരോരുത്തരുടേയും ചിന്താ തടസ്സം മാറ്റാനുളള ഒരു ചുററി നടത്തം വേണം. ഡോക്ടര്‍മാര്‍ രാവിലെ വാര്‍ഡ് സന്ദര്‍ശനത്തിനു പോകുന്നത് വെറുതേ കാണാനല്ലല്ലോ? അതേ പോലെ ലേഖനത്തിന്റെ ആരോഗ്യം നോക്കാനുളള റൗണ്ട്സ് എന്നു കരുതിക്കോളൂ.

ചുറ്റിനടത്ത മോണിറ്ററിംഗില്‍ പരിഗണിക്കേണ്ടവ

പ്രോത്സാഹനം നല്‍കലാണ് പ്രധാന ദൗത്യം

അശയപരമായ വഴിതുറക്കലിനു പിന്തുണ

രചനാപരമായ തടസ്സങ്ങള്‍ മറികടക്കാനുളള സഹായം (ഇതിന്റെ വിശദാംശം അറിയില്ലെങ്കില്‍ എഴുതൂ.മറുപടി കിട്ടും)

വ്യക്തിഗത രചനയ്ക്ക് ശേഷം ഗ്രൂപ്പില്‍ പങ്കുവെക്കലും എഡിറ്റിംഗും സഹായരചനയും സംയുക്തരചനയും നടക്കണം

ഗ്രൂപ്പിലേക്കുളള നിര്‍ദ്ദേശങ്ങള്‍ ഓരോന്നോരോന്നായി ക്രമത്തില്‍ നല്‍കുക.

ഘട്ടം ഒന്ന് -എന്തെല്ലാം സംഭവങ്ങള്‍ ഓരോരുത്തരും പരിഗണിച്ചു? അതിന്റെ പങ്കിടല്‍. വിട്ടു പോയ

ത് കൂട്ടിച്ചേര്‍ക്കല്‍.ഈ ഘട്ടത്തില്‍ വായിച്ചവതരിപ്പിക്കണമെന്നില്ല.

ഘട്ടം രണ്ട്-തുടക്കം എങ്ങനെ? ആദ്യം ആതാണ് പങ്കിടേണ്ടത് .എല്ലാവരും വായിക്കണം. ഇതലേതാണ് ഏററവും നല്ല തുടക്കം. ഇനി ഇത് മെച്ചപ്പെടുത്താനാകുമോ? ധാരണയാക്കല്‍ .ആ വാക്യം മെച്ചപ്പെടുത്തല്‍. എല്ലാവരുടേയും ബുക്കിലെഴുതല്‍. സഹായം ആവശ്യമുളളവര്‍ക്ക് സഹായം. മറ്റൊരാളുടെ അതേപോലെ നോക്കി എഴുതാന്‍ അനുവദിക്കില്ല.

ഇങ്ങനെ ഓരോ വരിവീതം ചര്‍ച്ച ചെയ്ത് എഴുതണം

ഇടയ്ക്ക് ഫീഡ് ബാക്ക് നല്‍കാനായി പ്രവര്‍ത്തനം നിശ്ചലമാക്കണം. ചിത്രീകരണസാധ്യത ആലോചിക്കണം.

ആദ്യത്തെ രണ്ടോ മൂന്നോ വാക്യം എല്ലാ ഗ്രൂപ്പും പങ്കിടട്ടെ. അവ ബോര്‍ഡില്‍ എഴുതണം.വിശകലനം ചെയ്യണം. എഴുത്തിന്റെ രീതി പരസ്പരം ബോധ്യപ്പെടാന്‍

ഈ ഘട്ടത്തില്‍ രൂപരേഖ തയ്യാറാക്കി രചന നടത്തുന്ന രീതി പരിചയപ്പെടുത്താം. പ്രധാന സംഭവങ്ങള്‍ എന്തെല്ലാമാണ്. ആ സന്ദര്‍ഭത്തിലെ എന്തെല്ലാം കാര്യങ്ങള്‍ പരിഗണിക്കണം.സൂചന ടെലിഗ്രാഫിക് രീതിയില്‍ എഴുതുന്ന വിധം പരിചയപ്പെടുത്തുന്നു. എങ്ങനെ വിപുലീകരിക്കാമെന്നു പങ്കാളിത്ത ചര്‍ച്ചയിലൂടെ ധാരണയാക്കുന്നു. തുടര്‍ന്ന് ഗ്രൂപ്പുകള്‍ രൂപരേഖ തയ്യാറാക്കി വിപുലീകരണം നടത്തുന്നു.

ഗ്രൂപ്പ് പ്രവര്‍ത്തനം മോണിറ്റര്‍ ചെയ്യണം

കഥകള്‍ വീട്ടില്‍ വെച്ച് മെച്ചപ്പെടുത്തണം

അടുത്ത ദിവസം കഥയരങ്ങ്

കഥാഭാഗം വായിക്കുമ്പോള്‍ മുഖം മൂടി വെച്ച കുറുക്കന്മാരുടെ വരവും ഇടപെടലും ആകാം.

ചെറിയ മുഖം മൂടി ബുക്കില്‍ കഥയോടൊപ്പം ഒട്ടിച്ചു വെക്കാം .സംഭവ ചിത്രങ്ങളുമാകാം.

മൂന്നാം ക്ലാസില്‍ പോയി നാലാം ക്ലാസിലെ കുട്ടികള്‍ രചിച്ച കഥ അധ്യാപിക പഠിപ്പിക്കണം. എങ്ങനെ ഈ ബ്ലോഗ് പോസ്റ്റിന്റെ ശീര്‍ഷകം ബോര്‍ഡില്‍ എഴുതണം. എന്തായിരിക്കാം കഥ എന്നൂഹിക്കാനാവശ്യപ്പെടാം.അതിനു ശേഷം ഗ്രൂപ്പ് വായനാപ്രവര്‍ത്തനം. ഓരോ ഗ്രൂപ്പിനും കഥ കൊടുക്കണം

കഥ ഇഷ്ടപ്പെട്ടെങ്കില്‍ ആസ്വാദ്യവായന. മുഖം മൂടി വെച്ചവതരിപ്പിക്കല്‍. രചയിതാക്കളെ പരിചയപ്പെടുത്തല്‍ . ആരെങ്കിലും സന്നദ്ധരായാല്‍

ഒരു പക്ഷേ കേരളത്തിലാദ്യമായി കുട്ടികള്‍ തയ്യാറാക്കി തങ്ങളുടെ വിദ്യാലയത്തിലെ കുട്ടികള്‍ക്ക് നല്‍കിയ പാഠമായേക്കാം ഇത്. 

അടുത്ത ലക്കങ്ങളില്‍

ട്രൈ ഔട്ട്  അനുഭവങ്ങള്‍ 

........................................................................

വിദ്യാ ഇ മെയില്‍ ക്ലബ്

അധ്യാപകരുടെ ഓണ്‍ ലൈന്‍ കൂട്ടായ്മ

 വിഭവങ്ങളുടെ പങ്കിടല്‍ വേദി

സ്വാഗതം

tpkala@gmail.com എന്ന വിലാസത്തില്‍ മെയില്‍ അയച്ചു പങ്കാളിയാകൂ

.......................................... 

ഒന്നാം ക്ലാസുകാരും അവരുടെ നോട്ടുബുക്കും

ഇന്ന് (21/7/214) ഒരു വിദ്യാലയത്തില്‍ ഒന്നാം ക്ലാസുകാരോടൊത്ത് കഥയും പാട്ടും പഠനവുമായി കുറേ നേരം ചെലവഴിച്ചു

കുട്ടികളില്‍ നിന്നും പഠിച്ചത്

• അവര്‍ എല്ലാവരും ചിത്രം വരയ്കും.നിറം നല്‍കും. 
• പൂര്‍ണവാക്യം വായിക്കും. വാക്കുകള്‍ തിരിച്ചറിയും.  
• സ്വയം തെറ്റുകള്‍ തിരുത്തും.  
• അധ്യാപകരെ കൊണ്ട് കഥ പറയിക്കും,

ക്ലാസനുഭവം

ക്ലാസില്‍ മഴമേളം പഠിപ്പിക്കുകയായിരുന്നു. ആഖ്യാനത്തക്കാള്‍ കൂടുതല്‍ എഴുതേണ്ട പദങ്ങള്‍ക്കാണ് ഊന്നല്‍ നല്‍കുന്നത്. കുട്ടി മാനസികമായി ഏറ്റെടുക്കാതെ എന്തു നല്‍കിയാലും യാന്ത്രികമാകും.

അധ്യാപികമാര്‍ ഒറ്റയൊറ്റ പദങ്ങളിലാണ് എഴുത്ത് പരിമിതപ്പെടുത്തുന്നത്.

ഒന്നാം ക്ലാസില്‍ വാക്യം എഴുതിക്കലും വായിക്കലും പിന്നീട് ചെയ്യേണ്ടതാണോ? മുന്‍ പിന്‍ ബന്ധമില്ലാതെ പുസ്തകത്തിലുളളത് അതേ പോലെ പകര്‍ത്തിക്കലാണ് പലയിടത്തും നടക്കുന്നത് ( ഈ വര്‍ഷം പത്തു വിദ്യാലയങ്ങളില്‍ കണ്ടത്)

ഞാന്‍ അധ്യാപികയുടെ അനുവാദത്തോടെ മഴക്ലാസിലേക്കു കയറി

പിന്നെ ക്ലാസില്‍ മഴപെയ്യിച്ചു.കഥയുടെ മഴ, പാട്ടിന്റെ മഴ,അഭിനയത്തിന്റെ മഴ, ചിത്രം വരയുടെ മഴ. ജോണ്‍ഡ്യൂയി പറഞ്ഞത് കുട്ടി ശരീരം മുഴുവനും പഠനത്തില്‍ പ്രയോജനപ്പെടുത്തണമെന്നാണല്ലോ.

മഴയത്ത് പന്തുകളിച്ച കുട്ടികളും കുറുക്കന്റെ കല്യാണവും നാട്ടില്‍ കുറുക്കന്‍ കോഴിയെപ്പിടിക്കാന്‍ വരാനിടയായ കഥയുമെല്ലാം പറഞ്ഞു (ഇതിന്റെ വിശദാംശങ്ങള്‍ അടുത്ത ലക്കങ്ങളില്‍ )

മഴേ മഴേ പോ പോ പോ

വെയിലേ വെയിലേ വാ വാ വാ

ഇതായിരുന്നു കഥയിലെ പ്രധാനപ്പെട്ട പാട്ട്

വെയിലേ വെയിലേ പോ പോ പോ

മഴേ മഴേ വാ വാ വാ

എന്ന മറുപാട്ടുമുണ്ടായിരുന്നു

ഞങ്ങള്‍ പാട്ടു പാടി

പാട്ട് ബോര്‍ഡിലെഴുതിയത് ചൊല്ലി. ചോക്കു കൊടുത്തപ്പോള്‍ എല്ലാവരും ബോര്‍ഡില്‍ വന്ന് പാട്ടെഴുതി ( കുട്ടികളുടെ ബോര്‍ഡിലെഴുത്ത് വലിയൊരു സംഭവമാണ്. തുടയ്ക്കലും തിരുത്തലും എല്ലാമുണ്ട്)

പിന്നീട് അവര്‍ സ്വന്തം ബുക്കില്‍ പടം വരച്ച് പാട്ടെഴുതി

ഞാന്‍ അവരുടെ ബുക്കിലെ ഒരു പേജിനു കളര്‍ ഡസൈന്‍ നല്‍കി

 കല്യാണകുറുക്കന്റെ അവര്‍ ചിത്രം വരച്ചെഴുതി ( എന്നെക്കൊണ്ട് കുറുക്കനെ വരപ്പിച്ചു )

വെയിലും മഴയും കുറുക്കന്റെ കല്യാണം

അപ്പോള്‍ അധ്യാപിക പേജ് ഡിസൈനറായി

ബാക്കി കളറിംഗ് കുട്ടികള്‍ ഏറ്റെടുത്തു

നോട്ട് ബുക്ക് ആകര്‍ഷകമാക്കല്‍

• ബുക്കുകള്‍ ആകര്‍ഷകമാക്കാന്‍ ഇതാണ് നല്ല മാര്‍ഗം.
• എന്നും എല്ലാവരുടേയും ബുക്കില്‍ അധ്യാപികയുടെ ഇടപെടല്‍ സാധ്യമാണ്. മാര്‍ഗനിര്‍ദ്ദേശങ്ങള്‍ക്കനുസരിച്ച്
• കൂട്ടമായി നിറം നല്‍കല്‍ നടത്താം.  
• ഓരോ കുട്ടിക്കും വ്യത്യസ്ത ഡിസൈന്‍ നല്‍കണം. ബാലമാസികകളില്‍ ധാരാളം ലേ ഔട്ട് രീതികള്‍ ഉണ്ട്.
•  നിറം നല്‍കാന്‍ പരിശീലനം ആവശ്യമാണ്. ബലം പ്രയോഗിച്ചുളള ആക്രമണം ക്രയോണ്‍സിനോടു വേണ്ട.

ഒരു മിടുക്കന്‍ എഴുതിയതു കണ്ടോ? എന്തെങ്കിലും പ്രശ്നം?ഞാനവനെ അഭിനന്ദിച്ചു.താഴത്തെ വരിയും മേ‍ലത്തെ വരിയും ചൊല്ലാന്‍ പറഞ്ഞു. ബോര്‍ഡില്‍ നോക്കി ചെല്ലാനും. പെട്ടെന്ന് സംഗതി അവനു പിടികിട്ടി.ചെറിയ ഫീഡ് ബാക്ക് മതിയാകും വലിയ തിരിച്ചറിവിന്. (കുറുക്കന് നീലവാലു നല്‍കിയതു തിരുത്തേണ്ടതില്ല.അതിനൊരു കഥയുണ്ടാക്കി നാളെ പറയണം)

നല്‍കിയ വായനാ ലേഖന സാമഗ്രിയുടെ ഭാഷാപരമായ വിശകലനം

അധ്യാപകര്‍ ആശങ്കപ്പെടുന്ന മിക്കവാറും എല്ലാ ചിഹ്നങ്ങളും (ൗ,ൈ ഒഴികെ) ഇതിലുണ്ട്

അവയെല്ലാം തിരിച്ചറിഞ്ഞ് കുട്ടികള്‍ രചന നടത്തുന്നു.പ്രത്യേക ഊന്നല്‍ നല്‍കാതെ തന്നെ.

ഏതു വാക്കും ചൂണ്ടിക്കാട്ടുന്നു. എഴുതിയപ്പോള്‍ വന്ന വിട്ടുപോകലുകള്‍ അവര്‍ തന്നെ കണ്ടെത്തുന്നു.

താല്പര്യമുണര്‍ത്തുന്ന ലളിതമായ വായനാ സാമഗ്രിയാകണം. അതാകട്ടെ ആഖ്യാനത്തില്‍ ബന്ധിതമാകണം.ക്ലാസ് സജിവമാകും

അക്ഷരങ്ങളില്‍ ഊന്നിയുളള വിരസമായ പദനിര്‍മാണത്തേക്കാള്‍ നല്ലത് അര്‍ഥപൂര്‍ണമായ രചനകളാണ്.

......................................................
ന്ലാലാം ക്ലാസിലെരു ട്രൈ ഔട്ടിനായാണ് വിദ്യാലയം സന്ദര്‍ശിച്ചത് . അതിന്റെ അനുഭവം പങ്കിടാം.അത് രണ്ടു ദിവസം തുടര്‍ച്ചയായി ചെയ്യാനുണ്ട്.

നല്ല നല്ല പാഠങ്ങള്‍ വേണം കുഞ്ഞുങ്ങള്‍ക്ക്

കുട്ടികള്‍ക്ക് പാഠങ്ങള്‍ തയ്യാറാക്കുമ്പോള്‍ അവരുടെ പ്രകൃതം,ഭാവന ഇവ പരിഗണിക്കണം. വീട്ടിലും അങ്കണവാടിയിലും കേട്ടു മടുത്തവയാണ് പുതിയ പാഠപുസ്തകങ്ങളിലെ പലതും. അത് ഒഴിവാക്കാമായിരുന്നു
പുസ്തകത്തിലെ പാഠങ്ങള്‍ ഒന്നു രണ്ടാഴ്ച തലങ്ങനേം വിലങ്ങനേം പഠിപ്പിച്ചു പഠിപ്പിച്ച്  മുഷിപ്പുണ്ടാക്കും. അത്രയ്ക്ക് യാന്ത്രികമായ അക്ടിവിറ്റിഭ്രാന്താണ് പലര്‍ക്കും..കരിമ്പിന്‍ ചണ്ടി വീണ്ടും വീണ്ടുംഎടുത്തു ചവയ്ക്കുന്ന അവസ്ഥകള്‍.
എന്തു കൊണ്ട് രണ്ടു ദവസത്തേക്കുളള ചെറു പാഠങ്ങള്‍ ആയിക്കൂടാ?
മനോഹരമായ എത്രയെത്ര പാഠങ്ങള്‍ നമ്മുക്കു ശേഖരിക്കാന്‍ കഴിയും. കൃത്യമായ പഠനനേട്ടത്തിലേക്ക് നയിക്കുന്നവ. കുട്ടികളുടെ ഭാഷയെ ഉജ്വലിപ്പിക്കുന്നവ.
ഇതാ യുറീക്കപ്പാട്ടുകളില്‍ വന്ന ഒരു കവിതയാണിത്. ഒരു ഉറുമ്പിന്റെ കണ്ണിലൂടെ കുഞ്ഞുപൂവിനേയും മഞ്‍‍‍ഞു തുളളിയേയും അതിന്റെ വീഴ്ചയേയും കാണൂ.കുട്ടികളുമായി ചൊല്ലി രസിക്കൂ.

...............................................................................................................................

മഞ്ഞ മഞ്ഞപ്പൂവ്

കുഞ്ഞു കുഞ്ഞുപൂവ്

മഞ്ഞുകാലം വന്നു

കുഞ്ഞിതള്‍ വിടര്‍ന്നു

മഞ്ഞലയില്‍

പൊന്‍ വെയിലില്‍

കുഞ്ഞുപൂവു നിന്നു

പൊന്നിതളിന്‍ തുമ്പിലൊരു

മഞ്ഞുതുളളി മിന്നി

മെല്ലെ മെല്ലെ ഇളകിടുമ്പോള്‍

എന്തൊരിന്ദ്രജാലം!

കുഞ്ഞുറുമ്പൊരരിമണിയും

കൊണ്ടതുവഴി വന്നു

കുഞ്ഞുപൂവിനരികിലെത്തി

തെല്ലു നേരം നിന്നു

മെല്ലെയൊരു തെന്നല്‍ വീശി

കുഞ്ഞു പൂവുലഞ്ഞു

മണ്ണിലൊരു 

ചെറുനനവായ്

മഞ്ഞു തുളളി മാഞ്ഞു

എങ്ങുപോയി 

വര്‍ണഭംഗി?

എങ്ങുപോയി 

വര്‍ണഭംഗി?

കുഞ്ഞുറുമ്പു തേങ്ങി

കുഞ്ഞുറുമ്പു തേങ്ങി

പാടി രസിച്ചതിനു ശേഷം ചാര്‍ട്ട് മാറ്റണം. എന്നിട്ട് ചുവടെയുളള പ്രവര്‍ത്തനം അവതരിപ്പിക്കണം

കവിതയെ ചിത്രകഥയാക്കാം

നാലു കളങ്ങള്‍ ( ഓരോ പേജ് വീതം നീക്കി വെച്ചാലും മതി) കഥ ഒന്നു കൂടി പറയിക്കണം.(ക്രമം ഉറപ്പിക്കാന്‍)

കുട്ടികളുടെ ചിത്രരചന. ഇതു പോലെ വരയ്കാം.

ചിലര്‍ക്ക് സഹായം നല്‍കണം .പ്രോത്സാഹിപ്പിക്കണം.അംഗീകരിക്കല്‍.

നിറം നല്‍കല്‍ (നിറം തെരഞ്ഞെടുക്കാന്‍ ഓരോരുത്തരുടേയും യുക്തി കേള്‍ക്കണം. ഇവിടെ പൊതു ചര്‍ച്ച വേണ്ട.പിന്നീട് പര്സ്പരം ചിത്ര കാണുമ്പോള്‍ അത്ഭുതപ്പെടണം. നിറബോധം വളരണം)

ആദ്യത്തെ ചിത്രത്തിന്റെ അടിയില്‍ കുട്ടികളുടെ നിര്‍ദ്ദേശപ്രകാരം അധ്യാപിക ബോര്‍ഡില്‍ വാക്യമെഴുതണം (ഗദ്യരൂപത്തിലാണ് എഴുതേണ്ടത്)

ബാക്കി അവര്‍ വ്യക്തിഗതമായി പൂരിപ്പിക്കണം

വ്യക്തിഗത രചനയുടെ മോണിറ്ററിംഗ്, പിന്തുണാരചന. സഹായ രചന. എഴുത്തില്‍ പിന്നാക്കം നില്‍ക്കുന്ന കുട്ടിക്ക് അവന്റെ അവളുടെ ആശയം തന്നെ എഴുതിക്കണം. സമാന്തരമായി എഴുതിക്കാട്ടാം. തെറ്റോടുകൂടി എഴുതാനനുവദിക്കാം. ( പിന്നീട് തിരുത്താം) എഴുതിയത് വായിപ്പിക്കണം.

പങ്കുവെക്കല്‍ 

ചാര്‍ട്ടില്‍ കുട്ടികള്‍ക്കെഴുതാം. അധ്യാപികയ്ക്ക് എല്ലാവരുടേയും എഴുത്ത് എഡിറ്റിംഗിന് വിധേയമാക്കാം.

സംയുക്ത രചന നടത്താം.

കവിതാ ചാര്‍ട്ട് വീണ്ടും പ്രദര്‍ശിപ്പിക്കണം. ചില കുട്ടികള്‍ക്ക് അതിലെ ചില വാക്കുകള്‍ നോക്കി തന്റെ രചന മെച്ചപ്പെടുത്താനും തെറ്റുകള്ഡ‍ തിരുത്താനും അവസരവുമാകും.ആശയങ്ങളെല്ലാം വന്നുവോ എന്ന പരിശോധനയുമാകും.

ഇവിടെ ആവിഷ്കാരം എന്ന ലക്ഷ്യമാണ് രചന നിര്‍ബന്ധിക്കുന്നത്.അത് സര്‍ഗാത്മകവുമാണ്. ഓരോ കുട്ടിയും തന്റെ ഭാഷാപുസ്തകം മികച്ച രീതിയില്‍ സൂക്ഷിക്കണമെങ്കില്‍ പരമ്പരാഗത രീതിയിലുളള എഴുത്തു പോരാതെ വരും

കിവിത ആവശ്യമുളളവര്‍ക്ക് എഴുതിയെടുക്കാം

അടുത്ത ബാലസഭയില്‍ രംഗാവിഷ്കാരം കൂടി നടത്താം.

വിലയിരുത്തല്‍ സൂചകങ്ങള്‍

1. ആശയം ഉള്‍ക്കൊണ്ട് രചന നടത്തിയിട്ടുണ്ട്( ആശയ പരം)
2. ആശയ വ്യക്തതയോടെ തെറ്റില്ലാത്ത ഭാഷയില്‍ രചന നടത്തിയിട്ടുണ്ട് ( ഭാഷാപരം)
3. വ്യവഹാരരൂപത്തിന്റെ സവിശേഷതകള്‍ പാലിച്ചിട്ടുണ്ട്-തുടര്‍ച്ച, സന്ദര്‍ഭത്തിനു് അനുയോജ്യമായ ഭാഷ,സ്വാഭാവികത,വൈകാരികത ( ആവിഷ്കാരപരം)

എഡിറ്റിംഗ് -ഭാഷാപരമായ വിശകലനം ( മുന്‍കൂട്ടി പറയുന്നില്ല .കുട്ടികളുടെ രചന ഓരോന്നും വശകലനം ചെയ്ത് തരം തിരിക്കാം. ഓരോ ക്ലാസിനും മാറ്റം വരാം)നാലാം ക്ലാസില്‍ ചെയ്തതിന്റെ ഉല്പന്നങ്ങള്‍ അനുബന്ധമായി ഉണ്ട് അതു വിശകലനം ചെയ്യുക

ഇനം	കുട്ടികളുടെ എണ്ണം	ശതമാനം

 ഇത്ര്രയും ചെയ്തതിനു ശേഷം ഈ പാഠം വീണ്ടും അലക്കേണ്ടതുണ്ടോ? 

വേണ്ട് കാവ്യസ്വാദനത്തിനായി പിന്നീടൊരിക്കല്‍ പരിഗണിക്കാം

ഇത്തരം ബദല്‍പാഠങ്ങള്‍ ക്ലാസുകളില്‍ സാധ്യമല്ലേ?

ചെറിയ ക്ലാസുകളില്‍ പ്രയോഗിച്ചു നോക്കൂ

അനുഭവം പങ്കിടൂ.( എനിക്ക് അയച്ചു തരാമെങ്കില്‍- tpkala@gmail.com)

അനുബന്ധം
കുട്ടികളുടെ ബുക്കുകളില്‍ നിന്ന് പഠത്തിന്റെ ഫലപ്രാപ്തി.

ഷോണിന്റെ തുടക്കം ഗംഭീരമല്ലേ.വാക്യങ്ങളും കേമം.സ്വര്‍ണനിറമുളള ഇതളില്‍ കുഞ്ഞു മഞ്ഞുതുളളി പോലെ മനോഹരം. തുളളിയുടെ വീഴ്ചാരംഗം അടുത്ത പേജുകളില്‍ എങ്ങനെയെന്നു നോക്കൂ

പൂവില്‍ മാത്രമല്ല മഞ്ഞു തുളളി .പുല്ലുകളിലും മഞ്ഞു തുളളികള്‍ അരുണ്‍ കണ്ടു

"ആ പൂവില്‍ ഏതാണ്ട് തിളങ്ങുന്നുണ്ടല്ലോ? ആ ഉറുമ്പ് കുഞ്ഞു പൂവിനെ നോക്കിയിരുന്നു." 

(അതിശയിപ്പിക്കുന്ന കാഴ്ചകളല്ലേ നോക്കിയിരുന്നു പോകും )

"വിടര്‍ന്ന പൂവുകളെ നോക്കിയപ്പോള്‍ പൂവുകള്‍ക്ക് സന്തോഷമായി."

ഓരോ കുട്ടിയ്ക്കും തന്റെ ഭാഷ

തുടര്‍ന്നുളളതും വായിക്കൂ

ആദ്യം നന്മകള്‍ മാത്രമേ നോക്കാവൂ ( പിന്നെ പ്രശ്നങ്ങള്‍ പരിഹരിക്കാം) 

അശ്വിന്‍ മലമുകളിലാണ് മഞ്ഞപ്പൂവിനെ കണ്ടത്. അരിമണി താഴെ വെച്ചാണ് ആ കാഴ്ചകാണാന്‍ ശ്രമിച്ചത്. മേലേക്ക് നോക്കി നടന്നതുകൊണ്ടാകാം കല്ലില്‍ തട്ടി വീണു.എന്തോരു സൂക്ഷ്മ നിരീക്ഷണം!അശ്വിന്റെ ആ മരം ഒന്നു നോക്കൂ. രണ്ടു ചിത്രത്തിലും കാലം അടയാളപ്പെടുത്തിയതും. സൂര്യന്റെ സ്ഥാനം സാധാരണ അധ്യാപകര്‍ ഇതൊന്നും ശ്രദ്ധിക്കാറില്ല.ചിത്രം മൂല്യമുളള ഒന്നാണ്.

അനു അരിമണി ചുമന്ന ഉറുമ്പിന്റെ ക്ഷീണമാണ് പങ്കിടുന്നത്. നമ്മുക്ക് അരിമണി ചെറുതാവാം.ഉറുമ്പിന് വലിയ അരിമണിയാണത്.ഭാരം കൂടും പാവം ഉറുമ്പ്.!

*

എറണാകുളം വിദ്യാഭ്യാസ കൂട്ടായ്മ ഈ പാഠം പ്രയോഗിച്ചു നോക്കി.അതിന്റെ തെളിവുകള്‍ ആണിവ.
ഇതേ പാഠം ഒന്നു മുതല്‍ നാലുവരെ ക്ലാസുകളില്‍ പ്രയോഗിച്ചു നോക്കണം എന്നു അവരോട് അഭ്യര്‍ഥിച്ചിട്ടുണ്ട്.
* 
അടുത്തത് ജാപ്പാനീസ് സംവിധായകനായ കുറസോവയുടെ ഡ്രീംസ് എന്ന സിനിമയിലെ ആദ്യ സ്വപ്നം പാഠമായാല്‍ എങ്ങനെ എന്നാലോചിക്കുന്നു
*...............................................
പ്രയോഗിച്ചു ഫലം കണ്ട പ്രവര്‍ത്തനങ്ങളാകണം പാഠപുസ്തകങ്ങളില്‍ വരേണ്ടത്
ദൗര്‍ഭാഗ്യമെന്നു പറയട്ടെ അത്തരം ശീലം പുസ്തകനിര്‍മിതിയില്‍ പാലിക്കാറില്ല
*