ഏറ്റവും പ്രിയപ്പെട്ട അധ്യാപകരാകാം ഈ പുതുവര്‍ഷത്തില്‍ (2)

വിദ്യാലയം വിളിക്കുന്നു

വരൂ കുട്ടികളേ... ഉല്ലാസത്തുമ്പികളേ.. വരൂ..

അവര്‍ പലവര്‍ണങ്ങളിലാണ് വരവ്.

ആദ്യദിനം ആഹ്ലാദിക്കട്ടെ.

രണ്ടാം ദിനം അധ്യാപകരെ വിലയിരുത്താന്‍ കുട്ടികള്‍ക്കവസരം കൊടുത്താലോ? 

കുട്ടികള്‍ തന്നെ അവരിഷ്ടപ്പെടുന്ന അധ്യാപകരുടെയും ഇഷ്ടപ്പെടാത്ത അധ്യാപകരുടേയും പ്രത്യേകതകള്‍ വ്യക്തിഗതമായി എഴുതാന്‍ പറയാം. അതു ഗ്രൂപ്പില്‍ ക്രോഡീകരിക്കണം.

ഒരു ഹൈസ്കൂളിലെ പത്താം ക്ലാസ് വിദ്യാര്‍ഥികള്‍ തയ്യാറാക്കിയ ലിസ്റ്റാണ് ചുവടേ..

അതിനു ശേഷം വിദ്യാലയത്തിലെ എല്ലാ അധ്യാപകരെയും ഈ ചെക് ലിസ്റ്റ് ഉപയോഗിച്ച് വിലയിരുത്താം. അധ്യാപകരുടെ പേരു വ്യക്തമാക്കാതെ.

ഓരോ സൂചകത്തിനു നേരെയും എത്ര അധ്യാപകര്‍ എന്നു കോഡുപയോഗിച്ചെഴുതണം ,ഇതും വ്യക്തഗിതമായി ചെയ്യണം. അതിനു ശേഷം ക്രോഡീകരണം അധ്യാപകന്‍ നടത്തണം. സ്റ്റാഫ് മീറ്റിംഗില്‍ അവതരിപ്പിച്ച് പരിവര്‍ത്തനത്തിനുളള തീരുമാനം എടുക്കണം

ഇഷ്ടമുളള അധ്യാപകരുടെ പ്രത്യേകതകള്‍	ഇഷ്ടമില്ലാത്ത അധ്യാപകരുടെ പ്രത്യേകതകള്‍
കുട്ടികളെ ഇഷ്ടപ്പെടുന്നു	എന്തു പറഞ്ഞാലും കളിയാക്കുന്നു
സ്നേഹത്തോടെ വാത്സല്യത്തോടെ പെരുമാറുന്നു	സംശയം ചോദിച്ചാല്‍ ദേഷ്യത്തോടെ പെരുമാറുന്നു
സൂഹൃത്തിനെ പോലെ ഇടപെടുന്നു	നല്ലവണ്ണം അടിക്കും,( തെറ്റു ചെയ്താലും ഇല്ലെങ്കിലും)
അറിയാത്ത കാര്യങ്ങള്‍ ക്ഷമയോടെ വിശദമായി പറഞ്ഞു തരുന്നു	പഠിപ്പിക്കുന്നകാര്യത്തില്‍ താല്പര്യമില്ല
കുട്ടികള്‍ക്കു മനസിലാകുന്ന വിധത്തില്‍ സംസാരിക്കുന്നു	പാഠങ്ങള്‍ മുഴുവന്‍ പഠിപ്പിക്കില്ല
ഇഷ്ടമുളള കാര്യങ്ങളില്‍ സ്വതന്ത്രമായി പങ്കെടുക്കാന്‍ സഹായിക്കുന്നു	ചില കുട്ടികളോടു മാത്രം ഇഷ്ടം കാണിക്കുന്നു, ഇടപെടുന്നു
അധികം ദേഷ്യപ്പെടാതെ പെരുമാറുന്നു	ഒന്നും മനസിലാക്കാന്‍ കഴിയാതെ പഠിപ്പിക്കുന്ന ആള്‍
പ്രശ്നങ്ങളും പ്രയോസങ്ങളും തുറന്നു പറയാം	കളിക്കാനുളള പിരീഡും ക്ലാസെടുക്കും
എല്ലാപേരേയും ഒരു പോലെ കാണുന്നു	കുട്ടികളോടു വെറുപ്പായേ പെരുമാറൂ
തെറ്റു ചെയ്താലും ദേഷ്യപ്പെടാതെ പറഞ്ഞു മനസിലാക്കുന്നു	വെറുതേ ചൂടാകുന്നു, കാര്യമറിയാതെ തല്ലുന്നു
പാട്ടും തമാശകളുമൊക്കെപ്പറഞ്ഞ് ചിരിച്ച് ക്ലാസെടുക്കുന്നു	എല്ലാപേരേയും നിരത്തി അടിക്കുന്നു
വടിയില്ലാതെ പേടിപ്പിക്കാതെ ക്ലാസെടുക്കുന്നു	ക്ഷമയില്ലാതെ, ക്ഷമിക്കാതെ പെരുമാറുന്നു
രസമായി ആസ്വദിക്കാന്‍ കഴിയും വിധം ക്ലാസെടുക്കുന്നു	സ്നേഹത്തോടെ ഒറു നല്ല വാക്കു പോലും പറയില്ല
ചിരിച്ചുകൊണ്ട് ക്ലാസിലേക്ക വരുന്നു	ക്ലാസില്‍ വന്ന് വെറുതേയിരിക്കും ചിലപ്പോള്‍ ഉറങ്ങും
കുട്ടികളോടൊപ്പം എന്തിനും കൂട്ടുകൂടുന്നു	കുറച്ചു മോഡേണ്‍ ആയി കുട്ടികള്‍ വന്നാല്‍ കളിയാക്കും, ചീത്ത പറയും
വെറുതേയിരിക്കുമ്പോള്‍ കഥ പറയുന്നു	ഇഷ്ടമില്ലാത്തവരോടേ വെറുതേ കാരണമുണ്ടാക്കി തല്ലും
എന്തു കാര്യവും ( ടീച്ചറുടെ വിഷമങ്ങള്‍ പോലും) കുട്ടികളുമായി പങ്കുവെക്കുന്നു	കുട്ടികളെ ഉപദ്രവിക്കുന്നു
	കൃത്യമായി ക്ലാസില്‍ വരില്ല
	സ്റ്റൈലായി ക്ലാസിലെത്തുന്നു
	കുട്ടികളുടെ പഠിപ്പിന്റെ കാര്യത്തില്‍ ശ്രദ്ധിക്കുന്നില്ല
	നല്ലവണ്ണം പഠിക്കുന്നവരോടു മാത്രം സ്നേഹത്തോടെ പെരുമാറും.അല്ലാത്തവരോട് ദേഷ്യം
	കുട്ടികളുടെ പ്രയാസങ്ങള്‍ മനസിലാക്കാന്‍ തയ്യാറാകുന്നില്ല

(എന്റെ സുഹൃത്ത് ശ്രീ രാജന്‍ പാലക്കാട് ജില്ലയിലെ ഹൈസ്കൂള്‍ അധ്യാപകനാണ്. 

അദ്ദേഹം തന്റെ വിദ്യാലയത്തില്‍ ചെയ്ത പ്രവര്‍ത്തനമാണിത്.)

അധ്യാപകരെ വിലയിരുത്തുന്നതു പോലെ കുട്ടികളെ വിലയിരുത്താനും ചെക്ക് ലിസ്റ്റ് ഉണ്ടാക്കണം

അത് ക്ലാസ് തലത്തിലും സ്കൂള്‍ തലത്തിലും കുട്ടികള്‍ ക്രോഡീകരിച്ച് അവരുടെ പെരുമാറ്റ മാര്‍ഗരേഖ തയ്യാറാക്കമം. സ്കൂള്‍ പാര്‍ലമെന്റ് മോണിറ്ററ്‍ ചെയ്യണം.

എല്ലാവരും ഇഷ്ടപ്പെടുന്ന വിദ്യാര്‍ഥിയുടെ സവിശേഷതകള്‍	ഇഷ്ടപ്പെടാത്ത വിദ്യാര്‍ഥിയുടെ സവിശേഷതകള്‍

പുതുവര്ഷം നമ്മുടെതാണ് -1(വിദ്യാലയവിലയിരുത്തല്‍ നയരേഖ)

പുതിയ അക്കാദമിക വര്‍ഷം നമ്മുടേതാണ്. ഇതു വരെ നമ്മെ പലരും പരിശീലിപ്പിച്ചു. ഇനി എല്ലാവര്‍ക്കും പരിശീലിക്കാനുളള മാതൃകകള്‍ സ്വയം വികസിപ്പിക്കാം.

ചില തീരുമാനങ്ങള്‍ എടുക്കണം.

1. കഴിഞ്ഞ വര്‍ഷത്തേതിന്റെ തനിയാവര്‍ത്തനമല്ല വരും വര്‍ഷം

അതെ, അങ്ങനെ ഫോട്ടോക്കോപ്പിയാകാന്‍ പുതുവര്‍‌‍ത്തെ വിട്ടു കൊടുക്കില്ല എന്നു കരുതണം. എല്ലാ കാര്യങ്ങളിലും നൂതനത്വം വരുത്തുക. ഓരോ വര്‍ഷവും നാം ലോകത്തെ പുതുക്കുകയാണ്.

1. ഞാന്‍ നിര്‍ണായകമാണ്.

ഞാന്‍ എന്നത് നിര്‍വചിക്കപ്പെടണം. മറ്റുളളവരെ അനുകരിക്കുന്ന വ്യക്തിയാണോ, അനുസരിച്ച് ചട്ടപ്പടി ചെയ്യുന്ന ആളാണോ? അതോ മറ്റുളളവര്‍ക്ക് അനുകരണീയ മാതൃകകള്‍ സൃഷ്ടിക്കുന്ന നിരന്തരം പ്രചോദിപ്പിക്കുന്നയാളോ? ( കഴിഞ്ഞ വര്‍ഷം ഇങ്ങനെയായിരുന്നോ? അതോ ഉഴപ്പിനു ചൂട്ടു പിടിച്ചുവോ? അധ്യാപനക്കുറിപ്പെഴുതുന്നതില്‍, ആസൂത്രണം നടത്തുന്നതില്‍, കുട്ടികളുടെ അവകാശം സംരക്ഷിക്കുന്നതില്‍...)

1. ദിശാബോധം രൂപപ്പെടുത്തല്‍

ഇത് വളരെ പ്രധാനമാണ്. പ്രഥമാധ്യാപികയുടെ കടമയാണിതെന്ന ചിന്ത വേണ്ട. നമ്മള്‍ക്ക് ചെറിയ ചെറിയ ഇടപെടലുകളിലൂടെ ഇതു സാധ്യമാക്കാം. ഒറ്റ വര്‍ഷം ഒത്തിരി നേട്ടം എന്നിങ്ങനെ പ്രചോദിപ്പിക്കുന്ന ഒരു മുദ്രാവാക്യം ഈ വര്‍ഷം വിദ്യാലയത്തിനു വേണമെന്നു പറയാം. കുട്ടികള്‍ക്കും രക്ഷിതാക്കള്‍ക്കും സമൂഹത്തിനും തൃപ്തി നല്‍കുന്നതാകണം ആ മുദ്രാവാക്യം. അങ്ങനെയൊന്ന് അംഗീകരിച്ചു കഴിഞ്ഞാല്‍ അതിന്റെ പ്രവര്‍ത്തന വിശദാംശങ്ങള്‍ തയ്യാറാക്കാനായി ഒരു ചെറുസംഘത്തെ കൂടി കൂട്ടൂ..

എന്തു പ്രവര്‍ത്തനത്തിനും ഒരു സമീപനം വേണം.

അത് അപ്പപ്പോള്‍ തീരുമാനിക്കുന്നതാകരുത്.

• കായിക പരിശീലനത്തിനുളള നയരേഖ
• സാംസ്കാരിക സാഹിത്യ പ്രവര്‍ത്തനരേഖ
• ജന്‍ഡര്‍ നയരേഖ
• രക്ഷാകര്‍തൃസഹകരണത്തിനുളള പ്രവര്‍ത്തനരേഖ
• വിദ്യാലയ വിലയിരുത്തല്‍ രേഖ
• അധ്യാപനശേഷീ വികസനത്തിനുളള സമീപന രേഖ
• വിദ്യാര്‍ഥി അവകാശ സംരക്ഷണത്തിനുളള സമീപന രേഖ
• വിദ്യാഭ്യാസ അവകാശനിയമം നടപ്പാക്കുന്നതിനുളള വിദ്യാലയ സമീപനം

ഇങ്ങനെ ചെറിയ രേഖകള്‍ തയ്യാറാക്കണം. വിദ്യാലയ വികസനരേഖ പോര. ഇവയാണ് വിദ്യാലയ പ്രവര്‍ത്തനങ്ങളെ വിലയിരുത്താനായി അടിസ്ഥാനമാക്കേണ്ടത്.

ഈ പോസ്റ്റ് വിദ്യാലയ വിലയിരുത്തലിനുളള നയരേഖയെക്കുറിച്ചുളളതാണ്

കുട്ടിയെ മാത്രമാണ് ഇപ്പോള്‍ ചിട്ടയോടെ വിലയിരുത്തുന്നത്. വിദ്യാഭ്യാസത്തിലെ ഒരു കണ്ണി മാത്രം നന്നായാല്‍ മതി എന്ന കാഴ്ചപ്പാടാവും ഇതിന്റെ പിന്നില്‍. അല്ലെങ്കില്‍ അധികാരികള്‍ വിലയിരുത്തപ്പെടേണ്ടതില്ല എന്ന അഹങ്കാരമാകാം. വിലയിരുത്തിയാല്‍ മെച്ചപ്പെടും എന്നു വിശ്വസിക്കുക. പഠനമികവും അധ്യയനമികവും ഉത്തരവാദിത്വമികവും ഭരണമികവും പ്രധാനമല്ലേ? (അല്ലെന്നുണ്ടെങ്കില്‍ വേണ്ട.ഇനിയുളള ഭാഗം വായിക്കേണ്ട. മൗസ് ചലിപ്പിച്ചോളൂ. ക്ലോസ് ചെയ്യൂ.)

ഉയര്‍ന്ന പ്രതീക്ഷയുളളവര്‍ക്കായ്.

അഞ്ചു കാര്യങ്ങളാണ് വിദ്യാലയ വിലയിരുത്തലില്‍ പരിഗണിക്കുന്നത് ( കൂടുതല്‍ ആവാം)

1. പഠനബോധനപ്രക്രിയ
2. പഠനനേട്ടം
3. പഠനാന്തരീക്ഷം
4. അധ്യാപകരുടെ സജ്ജമാകല്‍
5. പിന്തുണാന്തരീക്ഷം

ഇവയുടെ വിശദാംശമിങ്ങനെ

	വിലയിരുത്തല്‍ മേഖലകള്‍	വിശദാംശങ്ങള്‍
1	പഠനബോധനപ്രക്രിയ	പഠനാനുഭവങ്ങള്‍ സംബന്ധിച്ച കാഴ്ചപ്പാട് വിദ്യാലയത്തിലെഎല്ലാവര്‍ക്കും ഒരേ ധാരണയോണെന്നെങ്ങനെയറിയാം? കുട്ടികളില്‍ വളരേണ്ട പഠനനൈപുണികള്‍ കൃത്യതപ്പെടുത്തിയോ? ഒരേ കാര്യം പല രീതിയില്‍ പഠിപ്പിക്കേണ്ടതിന്റെ പ്രസക്തി ചര്‍ച്ച ചെയ്യുകയും ഫലം അനുഭവിക്കുകയും പഠനപിന്നാക്കാവസ്ഥ പരിഹരിക്കുകയും. എല്ലാവരേയും പരിഗണിക്കല്‍ എന്നതിനേടുളള സമീപനം പ്രായോഗികമാക്കാനുളള നടപടി.വെല്ലുവിളി. പ്രക്രിയാപരമായ ജാഗ്രതയും സമയവുമായി പൊരുത്തപ്പെടുത്തലും ഈ വര്‍ഷത്തെ ലക്ഷ്യമാക്കാമോ?
	പഠനനേട്ടം	ഓരോ ക്ലാസിലും ഓരോ മാസവും നേടേണ്ട കഴിവുകള്‍? ഓരോ കുട്ടിയും ഇപ്പോഴെവിടെ നില്‍ക്കുന്നു ? എവിടെ വരെ എത്തിച്ചേരാന്‍ സാധ്യതയുണ്ട് എന്ന പ്രവചനം. നേട്ടവിടവുളളവര്‍ക്കായി സ്വീകരിക്കേണ്ട തന്ത്രങ്ങള്‍ ഇതൊക്കെ ആലോചിക്കാറുണ്ടോ? കുട്ടികള്‍ക്ക് സ്വയം നിലനിര്‍ണ്ണയം ചെയ്യാനുള്ള ഒരുക്കങ്ങള്‍(സുജനിക ബ്ലോഗ്)
	പഠനാന്തരീക്ഷം	കുട്ടികളുടെ ആത്മവിശ്വാസം നിലനിര്‍ത്തല്‍ എങ്ങനെ സാധിക്കും? സൗഹൃദവും സ്വാതന്ത്ര്യവും ഉപാധിയാക്കി പഠനക്കൂട്ടാളിയാകുന്ന അധ്യാപകരാകുമോ? ഒരോ കുട്ടിയും മാനിക്കപ്പെടുകയും അംഗീകരിക്കപ്പെടുകയും ചെയ്യുന്ന ക്ലാസാണിതെന്ന് അനുഭവിച്ചറിയല്‍  കുട്ടികളുെട കഴിവുകളെ പ്രതിഫലിപ്പിക്കുന്ന പ്രദര്‍ശന ബോര്‍ഡുകള്‍ അധ്യാപികയുടെ പ്രതിബദ്ധതയെയും സന്നദ്ധതയെയും തയ്യാറെടുപ്പിനെയും പ്രതിഫലിപ്പിക്കുന്ന റിസോഴ്സ് ബോര്‍ഡുകള്‍ എല്ലാവര്‍ക്കും അധ്യാപികയുടെ സാന്നിദ്ധ്യം ലഭിക്കത്തക്കവിധമുളള ക്ലാസ് ക്രമീകരണം സുരക്ഷ, ശുചിത്വം, തുല്യത നമ്മുടെ ലക്ഷ്യം നാം തീരുമാനിച്ചത് . നാമത് നേടിയെടുക്കുക തന്നെ ചെയ്യുമ്മെന്ന മുദ്രാവാക്യം. (സഹവര്‍ത്തിതസംസ്കാരം)
	അധ്യാപകരുടെ സജ്ജമാകല്‍	സാധ്യായമണിക്കൂറുകളില്‍ വിട്ടു വീഴ്ചയില്ല.( കുട്ടികളുടെ പഠനമണിക്കൂറുകള്‍ ഉറപ്പാക്കല്‍) പലകാരണങ്ങളാല്‍ പഠനസമയനഷ്ടം എങ്ങനെ നികത്തും? പഠനപ്രക്രിയാപരമായ മികവ്. ( എറ്റവും മികച്ച നിലയിലേക്കുയരാനിനി എന്തു വേണം? കഴിഞ്ഞ വര്‍ഷം നിരാശയുണ്ടായ മേഖല? പഠനതന്ത്രങ്ങളില്‍ വരുത്തേണ്ട മാറ്റം. ഏറ്റവും ഫലപ്രദമായവ ഏതെന്നു കണ്ടെത്തിയോ? എന്റെ അധ്യയന മികവിന്റെ തെളിവുകള്‍ എന്തെല്ലാമാണ്. എസ് ആര്‍ജിയില്‍ എന്നെങ്കിലും എന്റെ പ്രവര്‍ത്തനം വിലയിരുത്തപ്പെട്ടുവോ? എങ്ങനെ അധ്യയന മികവ് വിലയിരുത്തമെന്ന് സ്കൂള്‍ അലോചിക്കുകയോ രിതി വികസിപ്പിക്കുകയോ പ്രയോഗിച്ചു മെച്ചപ്പെടുത്തുകയോ ചെയ്തിട്ടുണ്ടോ? അക്കാദമികാസുത്രണത്തിന്റെ എത്ര തട്ടുകള്‍ ഞങ്ങള്‍ പിന്തുടരുന്നു? ആസൂത്രണം-നിര്‍വഹണം-വിലയിരുത്തല്‍- തുടര്‌പ്രവര്‍ത്തനം എന്ന ചാക്രികരീതിയാണോ പിന്തുടരുന്നത് ഏതു കാര്യത്തിലും? സുതാര്യത, ജനാധിപത്യസംസ്കാരം, പഠനസന്നദ്ധത, സ്വയംപഠനം, ഗവേഷണാത്മകത എന്നിവയുടെ പ്രതിഫലനം വിദ്യാലയം അധ്യാപകശേഷീവികസനത്തിനായി ആഗ്രഹിക്കുന്ന പ്രവര്‍ത്തനങ്ങളും നടത്തുന്നവയും
	പിന്തുണാന്തരീക്ഷം	എസ് ആര്‍ജിയുടെ പ്രവര്‍ത്തനം ,അജണ്ടകള്‍, തീരുമാനം നടപ്പിലാക്കുന്നതിനു നല്‍കുന്ന സഹായം, അക്കാദമിക മികവ് രൂപപ്പെടുത്തിയതിന്റെ അഭിമാനാര്‍ഹമായ തെളിവുകള്‍ ഓരോ ക്ലാസിനും ഉണ്ടെന്നുറപ്പു വവരുത്തല്‍ ഗവേഷപരമായ അധ്യാപനം എന്ന കാഴ്ചപ്പാടിന്റെ അടിസ്ഥാനത്തില്‍ ചര്‍ച്ച നടത്താന്‍ കഴിഞ്ഞുവോ? ഓരോ എസ് ആര്‍ ജിയിലും ഓരോ മികവ് എന്ന രീതിയില്‍ എല്ലാ അധ്യാപകരേയും നിര്‍ബന്ധിക്കുന്ന തന്ത്രം പോലെയുളളവ സ്വീകരിക്കപ്പെടുന്നുണ്ടോ? ദിനാചരണങ്ങളുടെ ലക്ഷ്യം, തരംതിരിക്കല്‍ , ചുമതലാവിഭജനം, പങ്കാളിത്തം എന്നിവ എങ്ങനെ ചിട്ടപ്പെടുത്തി. ക്ലാസ് പിടി എ ഭാരമായി തോന്നുന്ന അധ്യാപകരെ എങ്ങനെ സഹായിച്ചു പഠനോപകരണങ്ങള്‍ എല്ലാ ക്ലാസിനും എല്ലാ വിഷയത്തിനും ഉണ്ടെന്നുറപ്പാക്കിയതെന്നാണ്? അവ തയ്യാറാക്കുന്നതിന് വേണ്ട് എന്തു ശ്രമമാണ് നടത്തിയത്? സാമ്പത്തികസുതാര്യതയ്ക്കായി ചെയ്ത പ്രവര്‍ത്തനങ്ങള്‍ ഭരണനേതൃത്വത്തെ വിജയബോധത്തിന്റെ പ്രകാശത്തില്‍ പ്രചോദിപ്പിക്കാനായോ?

എനിക്കറിയാം നിങ്ങളുടെ വിദ്യാലയത്തിനുഇത്തരം ചോദ്യങ്ങളൊന്നുമായിരിക്കില്ല വേണ്ടതെന്ന്. ചോദ്യങ്ങള്‍ ഉന്നയിക്കാനുളള മേഖലകള്‍ ധാരാളമുണ്ടെന്നു മനസ്സിലാക്കാനെങ്കിലും മേല്‍കൊടുത്ത വിശകലനം സഹായിച്ചിട്ടുണ്ടാകും.

1. എന്തു പ്രവര്‍ത്തനത്തിനും ആലോചിച്ചുറച്ച സ്വീകാര്യമായ ലക്ഷ്യമുണ്ടാവുക
2. ലക്ഷ്യം നേടാനൊരു പദ്ധതിയുണ്ടാവുക
3. പദ്ധതിയുടെ നേട്ടം വിലയിരുത്താന്‍ മാനദണ്ഡങ്ങള്‍ രൂപപ്പെടുത്തുക
4. മോണിറ്ററിംഗിനുളള തന്ത്രം വികസിപ്പിക്കുക
5. നിര്‍വഹണകാലവും ചുമതലയും തീരുമാനിക്കുക
6. ആരുടെയും പങ്കാളിത്തം വിലകുറച്ചു കാണാതിരിക്കുക
7. നിര്‍വഹണവേളയില്‍ ഇടക്കാല വിലയിരുത്തല്‍ നടത്തുക
8. ബോധ്യപ്പെടുന്ന വിശ്വസനീയമായ തെളിവുകളെ ആധാരമാക്കി നേട്ടം വിലയിരുത്തുക
9. ദൗര്‍ബല്യങ്ങള്‍ പരിഹരിക്കാനുളള തുടരാലോചന നടത്തുക

ഇത്രയും മനസില്‍ വെച്ച് വിദ്യാലയപ്രവര്‍ത്തനങ്ങളെ സമീപിക്കുക

വിദ്യാലയവിലയിരുത്തലിനും അധ്യാപക വിലയിരുത്തലിനും ആലോചനകള്‍ ലോകത്ത് നടക്കുന്നുണ്ട് . ചിലത് ആവശ്യമെങ്കില്‍ നോക്കാം.

• 
  
• 
  
• Teacher Evaluation Process - Public Schools of North Carolina
• 
  
• New Teacher Evaluation Process - Public Schools of Robeson County
• 
  
• Teacher Evaluation – A Conceptual Framework [PDF] 
• 
  
• Evaluating teaching: guidelines and good practice

തൃത്താലയില്‍ ഞാന്‍ ഇങ്ങനെ ഇടപെടാന്‍ കാരണമുണ്ട്

MARCH 27 ന് ഒരു വിദ്യാഭ്യാസസെമിനാറിലേക്കു ക്ഷണിക്കപ്പെട്ടു.

 മുഖ്യവിഷയാവതാകരന്‍ എന്ന റോളില്‍.കുറെ നാളായി ഏകപക്ഷീയമായ പ്രസംഗങ്ങളോട് എനിക്ക് താല്പ്യര്യമില്ല. അതിനു കാരണമിവയാണ്.
1.പുറത്തു നിന്നും എത്തുന്ന ഒരു വിദഗ്ധന്‍ /നേതാവ് /ബുദ്ധിജീവി ജനങ്ങളെ ബോധവത്കരിച്ചിട്ടു മടങ്ങുന്ന പ്രക്രിയ.
2.അകത്തു വൈദഗ്ധ്യമില്ലെന്ന തോന്നല്‍ നിരന്തരമുണ്ടാക്കിയെടുക്കുന്നതിനു സഹായകമായാണ് പുറത്തുനിന്നോ സംഘടനകളുടെ മേലേത്തട്ടില്‍ നിന്നോ ഉളള ഇത്തരം ഇറക്കുമതി. കൂടുതല്‍ വൈദഗ്ധ്യത്തെ പ്രദേശികവൈദഗ്ധ്യത്തിനെ പിന്തുണയ്ക്കുന്ന രീതിയില്‍ പ്രയോജനപ്പെടുത്താവുന്ന സ്ഥാനവും വിന്യാസവും അതു വഴി പ്രദേശികാത്മവിശ്വാസവര്‍ദ്ധനവും പലപ്പോഴും അജണ്ടയാകുന്നില്ല.
3.ഈ ബോധവത്കരണപ്രക്രിയയാകട്ടെ വിവരങ്ങളുടെ ദാനമാണ്. അറിവിന്റെ ഉല്പാദനമല്ല.
4.നിശ്ചിതസമയം തുടര്‍ച്ചയായി നല്‍കുന്ന വാചികപാഠങ്ങള്‍ക്കു ശേഷം ചര്‍ച്ച എന്ന പേരിലുളള നാമമാത്രമായ ചിലരുടെ പ്രതികരണങ്ങളും അവതാരകരുടെ ക്രോഡീകരണവുമെന്ന ചടങ്ങ് പങ്കാളിത്തത്തിന്റെ വ്യാജമായ അന്തരീക്ഷം സൃഷ്ടിക്കും.അത്തരം പ്രക്രിയയ്ക്കു കൂട്ടുനില്‍ക്കുന്നത് ഇടതുപക്ഷാവബോധത്തോടുളള ആത്മവഞ്ചനയാണ്.അപ്പോള്‍ എനിക്ക്, എന്നെ തന്നെ പുതുക്കിക്കൊണ്ടും സദസിനു എന്നെ കീഴ്പ്പെടുത്തിയുമുളള ഒരു റോള്‍ രൂപപ്പെടുത്തേണ്ട ഉത്തരവാദിത്വം സ്വയം എല്‍പ്പിക്കേണ്ടതായി വന്നു. അതത്ര ലളിതവമല്ലന്നെറിയാം.

ലക്ഷ്യ നിര്‍മിതി

ഞാന്‍ തുടക്കത്തില്‍ ,പങ്കെടുത്തവരോട് അവരുടെ സാന്നിദ്ധ്യത്തിന്റെ ലക്ഷ്യം നിര്‍ണയിക്കാനാവശ്യപ്പെട്ടു. എന്തിനാണ് ഈ അവധിദിവസം നിങ്ങളിവിടെ വന്നത്?അല്പനേരത്തെ ചിന്തയ്ക്കുളള ഇടം.അതിനു ശേഷം അവരുടെ സാന്നിദ്ധ്യലക്ഷ്യം രൂപപ്പെടുത്തുന്നതിനു കൃത്യതപ്പെടുത്തുന്നതിനു സഹായകമായി അവരുടെ പക്ഷത്തു നിന്നുളള ചില ചോദ്യങ്ങള്‍ അവതരിപ്പിച്ചു.
1.ഇവിടുന്നു പിരിയുന്നത് വന്ന അവസ്ഥയിലാണെങ്കില്‍ ഇന്നത്തെ ദിനം പാഴായി എന്നു കരുതണം. അതിനാല്‍ രൂപപ്പെടുന്ന ചിന്തയെ ആശയങ്ങളെ പ്രവൃത്തിയാക്കി പരിവര്‍ത്തിപ്പിക്കുന്നതിനുളള അവസരം സൃഷ്ടിച്ചെടുക്കാന് ശ്രമിക്കും എന്നു ലക്ഷ്യമിടാമോ?
2.വെറും കേള്‍വിക്കാരെന്ന നിലയില്‍ സജീവമല്ലാത്ത പ്രാതിനിധ്യം കൊണ്ടല്ല മറിച്ച് വിയോജിച്ചും വിമര്‍ശിച്ചും കൂട്ടിച്ചേര്‍ത്തും ക്രിയാത്മകമായി ഇടപെട്ടും സ്വന്തം സാന്നിധ്യത്തെ മറ്റുളളവര്‍ക്ക കൂടി മൂല്യമുളളതാക്കി മാറ്റുമെന്നത് ഒരു ലക്ഷ്യമായി കരുതാമോ?
3.പൊതുവിദ്യാഭ്യാസത്തെ കൂടുതല്‍ മികവുളളതാക്കാന്‍ കരുത്തുറ്റതാക്കാന്‍ വേണ്ടി അവരവര്ക്കു സ്വന്തമായും മറ്റുളളവരുടെ ഒപ്പം ചേര്‍ന്നും ആവുന്നത്ര പ്രവര്‍ത്തിക്കാനുളള ആലോചനയ്ക്കാണീ കൂടിച്ചേരല്‍ എന്നു കരുതാമോ?
4. സ്വന്തം സന്നദ്ധത കൂടി പ്രയോജനപ്പെടുത്തി തുടര്‍പ്രവര്‍ത്തനങ്ങളിലേക്കു ഈ കൂട്ടായ്മയെ വളര്‍ത്തിക്കൊണ്ടു വരുന്നതിനു ലക്ഷ്യമിടാമോ?

പങ്കാളിത്ത നിര്‍മിതി
അടുത്തത് പങ്കാളിത്തത്തിന്റെ സമീപനം തീരുമാനിക്കലായിരുന്നു.ഞാന്‍ അവരോടു പറഞ്ഞു.വലിയകാര്യങ്ങള്‍ ഇവിടെ അവതരിപ്പിക്കുന്നില്ല. എന്നാല്‍ വേറിട്ട ചിന്തയിലേക്കുളള വാതില്‍ തുറന്നിടും.എന്റെ അവതരണത്തെ ക്ഷമയോടെ കേട്ടിരിക്കുക എന്നത് ഞാനാഗ്രഹിക്കുന്നില്ല. എല്ലാം തീര്‍ന്ന ശേഷം ചര്‍ച്ച എന്നതും നിങ്ങളെ മാനിക്കലായി ഞാന്‍ കരുതുന്നില്ല.ഔപചാരികതയുടെ പേരില്‍ യോഗത്തെ യാന്ത്രികമാക്കാതെ നിങ്ങള്‍ നോക്കണം
എപ്പോള്‍ വേണമെങ്കിലും എന്റെ അവതരണത്തെ തടസ്സപ്പെടുത്താം. അത് ഇടപെടലാണ് നിഷേധാത്മകമല്ല. ഈ തടസ്സപ്പെടുത്തലാണ് സംവാദം. വിമര്‍ശനങ്ങള്‍ ഉന്നയിച്ച്, വിയോജിച്ച്, വിശദീകരിച്ച്, കൂട്ടിച്ചേര്‍ത്ത്, ഉദാഹരണങ്ങള്‍ ലനല്‍കി, സാധ്യതകള്‍ ചൂണ്ടിക്കാട്ടി, അവതരണത്തിന്റെ പ്രസക്തിയെ ചോദ്യം ചെയ്ത് ഒക്കെ തടസ്സപ്പെടുത്താം. (തടസ്സം എന്നവാക്കിനേക്കാള്‍ നല്ല വാക്കുണ്ടെങ്കിലും ഞാനതാണുപയോഗിച്ചത്. അതിനൊരു കാരണം അവരുടെ മേല്‍ക്കോയ്മയെ അംഗീകരിക്കാനാ വാക്കിനു കഴിയുമെന്ന ചിന്തയാണ്)എന്റെ സമയമല്ല നിങ്ങളുടെ സമയമാണ് വിലപ്പെട്ടത്. ഭൂരിപക്ഷത്തിന്റെ ചിന്തയെയും പ്രതികരണങ്ങളെയും മാനിക്കാത്ത ഏകപക്ഷീയത അനുവദിക്കരുത്.ഇക്കാര്യങ്ങളില്‍ നിലപാട് എടുക്കാന്‍ അവര്‍ പ്രയാസപ്പെടുന്നതു പോലെ തോന്നി. കാരണം ഇങ്ങനെ പലതും പറഞ്ഞതിനു ശേഷം തന്ത്രപരമായ നീക്കത്തിലൂടെ ഞാന്‍ തന്നെ അതു ലംഘിച്ചാല്‍ എങ്ങനെ ചോദ്യം ചെയ്യും ? ഞാന്‍ ക്ഷണിക്കപ്പെട്ട അതിഥിയല്ലേ? വിളിച്ചു വരുത്തി...?എനിക്കാകട്ടെ ഞാന്‍ തന്ന പാകിയ ഈ വെല്ലുവിളി പ്രചോദനം നല്‍കി
ഇതിനുശേഷമാണ് ഞാന്‍ തുടങ്ങിയത്. ആദ്യത്തെ ആശയം അവതരിപ്പിച്ചപ്പോള്‍ തന്നെ പിറകില്‍ നിന്നൊരാള്‍ എഴുന്നേറ്റു പ്രതികരിച്ചു. അതിനു മൂല്യം ലഭിച്ചതോടെ സെമിനാറെന്ന ചടങ്ങ് വിശകലനാത്മകവും ക്രിയാത്മകവുമായ സംഘാലോചനയായി മാറി. ചിന്തയുടെ പരിപോഷകന്‍ ( ഫെസിലിറ്റേറ്റര്‍ ) ആയി മാറുക എന്നതില്‍ എനിക്കു വിജയിക്കാനാകുമോ എന്ന ആശങ്ക ക്രമേണ മാറി.

പഴിപറയാനും വിമര്‍ശിക്കാനുമെളുപ്പമാണ്. എന്നാല്‍ സാധ്യതകളെ ഉപയോഗപ്പെടുത്തുക എന്ന സംസ്കാരത്തിന്റെ വിത്തു പാകുക അത്ര എളുപ്പമല്ലെങ്കിലും അസാധ്യവുമല്ല എന്നതിലേക്ക് ദിശമാറി.

പ്രവര്‍ത്തനനിര്‍മിതി

ഇന്നത്തേടം കൊണ്ടവസാനിക്കരുത് ഈ കൂടിച്ചേരല്‍ എന്ന നിലപാട് എല്ലാവരിലും ഉണ്ടായി. പ്രവര്‍ത്തനങ്ങളുടെ സാധ്യതകള്‍ അവതരിപ്പിക്കപ്പെട്ടു. വിശദാംശങ്ങള്‍ വേണ്ടവ.അപ്പോള്‍ അതുത്ത പ്രശ്നം ആരു സംഘടിപ്പിക്കും. സെമിനാര്‍ സംഘടിപ്പിച്ച ശാസ്ത്രസാഹിത്യപരിഷത്ത് ആ ഉത്തരവീദിത്വം ഏറ്റെടുക്കണമെന്ന നിര്‍ദ്ദേശം വന്നു.

ഞാന്‍ ചോദിച്ചു -

• ഇപ്പോള്‍ ആലോചനയില്‍ വന്ന കാര്യങ്ങള്‍ നടപ്പിലാക്കാന്‍ ഇവിടുളളവര്‍ പോരേ ?
• നാം നമ്മുടെ ഉത്തരവാദിത്വത്തില്‍ നിന്നൊഴിഞ്ഞു മാറുകയാണോ?
• വികേന്ദ്രീകരണജനാധിപത്യം ആശ്രിതജനാധിപത്യമാണോ? സംഘടനയെ പ്രയോജനപ്പെടുത്താം. സമൂഹത്തെ പ്രയോജനപ്പെടുത്താം. സംഘടനയുടെ പരിപാടിയായി സംഘടന കണ്ടോട്ടെ. പക്ഷ ഇതു നമ്മുടെ പരിപാടിയാണ് എന്നു കരുതാനെന്താ പ്രയാസം?ആരൊക്കെയാണ് നാം? സമൂഹത്തെ പരിവര്‍ത്തിപ്പിക്കേണ്ട സാമൂഹികവിദ്യാഭ്യാസ പ്രവര്‍ത്തകര്‍ നമ്മുടെ സൃഷ്ടിപരതയില്‍ വിശ്വസിക്കുന്നവര്‍
  

അങ്ങനെ പത്തംഗക്കൂട്ടം അടുത്ത ചൊവ്വാഴ്ച്ച വീണ്ടും കൂടും.അടുത്ത വര്ഷത്തേക്കുളള കര്‍മപരിപാടി രൂപപ്പെടുത്തും. സര്‍ക്കാര്‍വിലാസം പദ്ധതിയാകില്ല.സദസ്സിനെ സംഘമാക്കുന്ന പ്രക്രിയ പ്രധാനമാണ്. അത് സംഘാടകരുടെ സംഘടനയിലെ അഗത്വമെടുപ്പിക്കലല്ല. മറിച്ച് സാമൂഹികമാറ്റത്തിനു വേണ്ടിയുളള പ്രവര്‍ത്തകസംഘമാക്കലാണ്.എന്നെങ്കിലും സ്വമേധയാ സംഭവിക്കുമെന്ന ധാരണയില്‍ നീട്ടിവെക്കാവുന്നതാകരുത് സംഘപ്രവര്‍ത്തന സാധ്യത. ഇത്തരം അജണ്ടയില്ലാതെ പരിപാടികള്‍ സംഘടിപ്പിക്കുന്നത് തങ്ങള്‍ സജീവമാണെന്നു വരുത്തിത്തീര്‍ക്കാന്‍ സഹായകമാണെങ്കിലും മനുഷ്യരുടെ സൃഷ്ടിപരതയെ അംഗീകരിക്കാത്തതാണ്.നമ്മള്‍ക്ക് അമ്പതു പേരെ ഒരു യോഗത്തിനു കിട്ടീയാല്‍ അവരെ അഞ്ഞൂറാക്കി മാറ്റാന്‍ കഴിയുമോ എന്നാണാലോചിക്കേണ്ടത്. എടുക്കുമ്പോഴൊന്ന് തൊടുക്കമ്പോള്‍ പത്ത് എന്നു പറയുന്ന പോലെ വര്‍ദ്ധിക്കുന്ന തന്ത്രം.

• തൃത്താലയില്‍ കൂടിയവര്‍ ആ പ്രദേശത്തെ വിദ്യാലയങ്ങളുമായി ബന്ധപ്പെട്ട കൂടുതലാളുകളെ ഉള്‍പ്പെടുത്തി ശില്പശാല സംഘടിപ്പിച്ചേക്കാം.
• പിന്നീടത് വിദ്യാലയ ശില്പശാലകളായി മാറിയേക്കാം.
• അതിനു ശേഷം സ്കൂള്‍ ലീഡര്‍മാരായ വിദ്യാര്‍ഥികള്‍, പ്രത്യേകപരിഗണന അര‍ഹിക്കുന്ന കുട്ടികളുടെ രക്ഷിതാക്കള്‍ , വിദ്യാലയ പ്രവര്‍ത്തനങ്ങളില്‍ ഇടപെടുന്ന വനിതകള്‍ ,എസ് എം സി ചുമതലയുളള അധ്യാപകര്‍, ജനപ്രതിനിധികള്‍ എന്നിവര്‍ക്കുളള സവിശേഷ ശില്പശാലകളിലേക്കു വളരാം.
• സാങ്കേതിക വിദ്യാപരമായ ശേഷീവികസന ക്ലാസുകളും പരിശീലങ്ങളും സുതാര്യതയും ഗുണനിലവാരവുമുയര്‍ത്തുന്നതിനുമുളള പ്രവര്‍ത്തനങ്ങളും സംഭവിച്ചേക്കാം.
• ഇത്തരം ഇടപെടല്‍ നല്‍കുന്ന ആവേശം മറ്റിടങ്ങളിലെ വിദ്യാഭ്യാസപ്രവര്ത്തകര്‍ക്കുളള പഠനകേന്ദ്രമായി ഇവരുടെ അനുഭവങ്ങളെ മാറ്റിയേക്കാം.
• ഇതെല്ലാം സാധ്യതകളാണ്. കൃത്യമായ സര്‍ഗാത്മക,പങ്കാളിത്ത,ഇടതുപക്ഷാവബോധമുണ്ടെങ്കില്‍ മാത്രമേ ചെടി മരമാവുകയുളളു. വിത്തു നടുമ്പോള്‍ മരത്തെക്കുറിച്ചാലോചിക്കണം. അത്തരം ഒരു ആലോചന നടത്താന്‍ ഞാന്‍ അവര്‍ക്കസവരം നല്‍കി. പരിമിതികളേ സാധ്യതകളാക്കി മാറ്റാനും അസാധ്യമെന്നു കരുതുന്നവയെപ്പോലും സാധ്യമാക്കുന്നതിനുമുളള ആത്മവിശ്വാസം രൂപപ്പെടണം.പ്രസ്ഥാനത്തെ നിരാകരിക്കലാണോ ഇത്?

അല്ല /ജനതയെ ശാക്തീകരിക്കുന്ന പ്രസ്ഥാനങ്ങളുടെ ദൗത്യത്തെ പരിപോഷിപ്പിക്കലാണ്. സബ്കമ്മറ്റി /പോഷകസംഘടനാ പ്രവര്‍ത്തന ശൈലികളില്‍ മാത്രം ഒതുങ്ങന്നതില്‍ നിന്നും മാറി സമൂഹശക്തിയിലധിഷ്ഠിതമായ മുന്നിറക്കങ്ങളെ വളര്‍ത്തുകയും
സന്നദ്ധതയുടെയും ത്യാഗത്തിന്റെയും പ്രതിബദ്ധതിയുടെയും പ്രതിഫലനരൂപമാക്കി മാറ്റുകയും വേണം.

 അവകാശാധിഷ്ടിക വിദ്യാലയങ്ങള്‍ സാക്ഷാത്കരിക്കുന്നതിനുളള അക്കാദമിക സമരസംഘമായി അവര്‍ മാറുമായിരിക്കും.ജനകീയപ്രസ്ഥാനങ്ങള്‍ കൂടുതല്‍ ഗൃഹപാഠം ചെയ്യാതെ നിരവധി പ്രവര്‍ത്തനങ്ങള്‍ സംഘടിപ്പിക്കുന്നതിനാലാണ് ജനങ്ങള്‍ കാഴ്ചക്കാരും കേള്‍വിക്കാരുമായി മാറിനില്ക്കേണ്ടി വരുന്നത്.

ഊര്‍ജോല്പാദനപ്രക്രിയ
യോഗങ്ങളിലെ ഊര്‍ജോല്പാദനപ്രക്രിയ പ്രധാനമാണ്.ഊര്‍ജം പ്രവൃത്തിയിലേക്കു നയിക്കും.ഊര്‍ജോല്പാദനപ്രക്രിയയുടെ രീതീശാസ്ത്രം വികസിപ്പിച്ചില്ലെങ്കില്‍ പവര്‍കട്ട് വരും. ഇരുട്ടത്തിരിക്കാന്‍ സ്വയം അവസരമൊരുക്കുന്ന സാംസ്കാരികപ്രവര്‍ത്തനരീതിയോട് പൊരുത്തപ്പെട്ടു കൂടാ.എന്തായാലും ഞാന്‍ സംതൃപ്തിയോടയാണ് തൃത്താലയില്‍ നിന്നും മടങ്ങിയത്. അടുത്ത ചൊവ്വാഴ്ച്ച അവര്‍ കൂടുമല്ലോ‍

ഫേസ് ബുക്കില്‍ വന്ന പ്രതികരണങ്ങള്‍ ചുവടെ 

ഫേസ് ബുക്കില്‍ വന്ന പ്രതികരണങ്ങള്‍ ചുവടെ

• Sabu Paul എപ്പോള്‍ വേണമെങ്കിലും എന്റെ അവതരണത്തെ തടസ്സപ്പെടുത്താം. അത് ഇടപെടലാണ് നിഷേധാത്മകമല്ല. ഈ തടസ്സപ്പെടുത്തലാണ് സംവാദം...ഇതാണ് സർ പ്രധാനം....പാർട്ടികമ്മറ്റികളാവട്ടെ ഔദ്യോഗികയോഗങ്ങളാകട്ടെ അവിടെ നടക്കാത്തത് ഇതാണ് ..ഈ ക്രമമാകട്ടെ അവതാരകൻറെ സൗകര്യത്തിനുവേണ്ടി ഉണ്ടാക്കിയിട്ടുള്ളതുമാണ്....നേരിട്ടുള്ള സംവാദത്തിൽ നേരിടുന്ന പല ബുദ്ധിമുട്ടുകളും ഒടുവിൽ ചർച്ചയും അതിനു മറുപടിയും എന്ന സംവിധാനത്തിൽ ഉണ്ടാകില്ല......സത്യത്തിൽ വിഷയത്തിൽ വേണ്ടത്ര അവഗാഹവും ആത്മവിശ്വാസവും ഉള്ളവർക്ക് മാത്രമേ ഉടൻ സംവാദത്തിന് ധൈര്യം വരികയുള്ളു......നമുക്കെപ്പോഴും അടിച്ചേൽപ്പിച്ചാണല്ലോ ശീലം...അതാണ് സൗകര്യവും

  Friday at 8:50pm · Like · 2
• 

  Rajeesh CL അടിച്ചേല്‍പ്പിക്കലിലൂടെ അടിമകളാകുന്നു നമ്മള്‍....See Translation

  Friday at 9:06pm · Unlike · 2
• 

  Sabu Paul ബ്യൂറോക്രാറ്റിക്ക് സംവിധാനത്തിൻറെ ജന്മനാ ഉള്ള കുഴപ്പമാണത് ഇങ്ങോട്ടൊന്നും പറയണ്ട അങ്ങോട് പറയുന്നത് കേട്ടാൽമതി എന്നാണ് നിലപാട്....

  Friday at 9:12pm · Unlike · 1
• 

  Radhakrishnan Puthiyottil ഈ ഇടപെടൽ...ചില യോഗങ്ങളിൽ സംബന്ധിക്കുമ്പൊൾ ഒരു ദിവസം പാഴായി എന്നു തോന്നാറുണ്ട്.അവതാരൺത്തിനു് ശേഷം. അവതാരകന് സമയമില്ലെന്നും അതിനാൽ വിശദമായ ചർച്ച്യില്ലെന്നും സംശയങ്ങൾ എഴുതികൊടുത്താൽ മതിയെന്നുംഡയസ്സിൽ നിന്നും അറിയിപ്പ് പതിവായി കേൾക്കുന്ന സമയത്താണ് ഈ വേറീട്ടശബ്ദം...നന്നയി

  Friday at 10:27pm · Unlike · 2
• 

  Rajan Nagalassery വേറെ ഒരു പരിപാടിയില്‍ പങ്കെടുക്കേണ്ടിയിരുന്നതിനാല്‍ ഈ സംവാദത്തില്‍ എത്താനായില്ല .പാര്‍ട്ടികമ്മിറ്റികളും ഔദ്യോഗിക കമ്മിറ്റികളും ചില അജണ്ടകള്‍ നടപ്പാക്കാന്‍ വേണ്ടിയാണ്.അതിനെ കുറ്റം പറയുന്നതില്‍ അര്‍ത്ഥമില്ല.മൂന്നാറില്‍ ബസ്‌ മറിഞ്ഞത് ഡ്രൈവറുടെ ഡ്രൈവറുടെ മാത്രം അശ്രദ്ദ കൊണ്ടാണ്.

  Friday at 11:15pm · Unlike · 1
• 

  Kaladharan Tp ഢാന്‍ നിരിടുന്ന ആത്മസംഘര്‍ഷം വളരെയാണ്. വിമര്‍ശനാത്മകപാഠ്യപദ്ധതിയെക്കുറിച്ചു പറയുക എന്നാല്‍ മറ്റു വ്യവഹാരങ്ങളില്‍ എല്ലായിടത്തും വിപരീതമായി പ്രവര്‍ത്തിക്കുക.. കുറ്റബോധം വേട്ടയാടുന്നുണ്ട്..അതിനാല്‌ സുഹൃത്തുക്കളേ സഖാക്കളേ നമ്മുടെ ഇടപെടലുകളില്‍ നമ്മെത്തന്നെ മാറ്റുന്ന ഒരു പ്രക്രിയ കണ്ടെത്താന്‍ ശ്രമിക്കാം.. കൂടുതല്‍ ശ്രമങ്ങള്‍ ആഗ്രഹിക്കാം..

  Yesterday at 5:57am · Like · 1
• 

  Ramachandran Kizhuveettil മുഴുവന്‍ സമയം ഇരിക്കാനായില്ല.രീതി നന്നായി.വെല്ലുവിളി ഈ സംഘം ഏറ്റെടുക്കുമായിരിക്കും.മറ്റുള്ളവരുടെ അഭിപ്രായത്തെ മാനിക്കുക എന്നത് മുഖ്യംതന്നെ,പക്ഷെ അത് വേണ്ടത്ര നടന്നോ? ഈ രീതിയോടു പൊരുത്തപ്പെടാന്‍ സദസ്സും അവതാരകരും ഇനിയും സ്വയം മാറണമെന്നു തോന്നുന്നു.See Translation

  Yesterday at 6:53am · Like
• 

  Sujanika Ramanunni കഴിഞ്ഞ ദിവസം ഒരു വിദ്യാഭ്യാസസെമിനാറിലേക്കു ക്ഷണിക്കപ്പെട്ടു. മുഖ്യവിഷയാവതാകരന്‍ എന്ന റോളില്‍. .... ക്ഷണിക്കപ്പെടാതെ എത്താന്‍ കഴിയുമായിരുന്നോ എന്നു തൊട്ട് തുടങ്ങണം. അവിടെച്ചെന്ന് ഇടപെടാന്‍ ശേഷിയുള്ളവരെ കണ്ടെത്തി പ്രവര്‍ത്തനങ്ങള്‍ ആലോചിച്ച് നടപ്പാക്കാന്‍ ആരംഭിക്കണം... പഴയകാല സംഘടനാപ്രവര്‍ത്തനങ്ങള്‍ [ രാഷ്ട്രീയം, സന്നദ്ധം,..... ] ഓര്‍മ്മയില്‍ വന്നതാണ്`... മാറ്റാന്‍ ശ്രമിച്ചത് നന്നായി.See Translation

  Yesterday at 8:49am · Like
• 

  Kaladharan Tp രാമനുണ്ണിമാഷ് പറഞ്ഞതിലേക്കെത്തപ്പെടണം. അതാണ് വേണ്ടതും. രാമചന്ദ്രന്‍മാഷ് സൂചിപ്പിച്ച അഭിപ്രായം മാനിക്കല് പ്രക്രിയയുടെ മുന്നൊരുക്കമെന്ന നിലയില്‍ അവയ്ക്കു മൂല്യം നല്‍കുന്ന അവയെ അഭിപ്രായമെന്നതിനപ്പുറം ചര്‍ച്ചചെയ്യേണ്ട വിഷയമായി ഉലര്‍ത്തുന്ന ഒരു പ്രക്രിയയുടെ വിടവ് ഉണ്ട്. അതാലോചിക്കും. പ്രായോഗികമാക്കും.

  Yesterday at 1:44pm · Like · 2
• 

  Ramachandran Kizhuveettil ഞങ്ങള്‍ ഈ ഊര്‍ജ്ജം ഉള്‍ക്കൊള്ളുന്നു.5 സ്കൂള്‍ ഏതൊക്കെവേണമെന്ന് എം.വി രാജന്‍ മാഷും,ഗംഗാധരനുമായി പ്രാധമിക ആലോചന നടത്തി.വട്ടേനാട് ജി.എല്‍.പി സ്വയം സന്നദ്ധമായി..ഇനി ഈ ടീം പിന്തുണ നല്‍കിയീല്‍ 5 സ്കൂളില്‍ ഇത് പ്രവര്‍ത്തികമാക്കും. വേറിട്ടൊരു രീതി പരീക്ഷിച്ചു നോക്കാം...See Translation

  19 hours ago · Unlike · 1
• 

  Kaladharan Tp പ്രിയ രാമചദ്രന്‍മാഷ് ഇവിടെ ഔദ്യോഗികമായ ഒരു ഫണ്ടും ഉപയോഗിക്കരുത്. നാടിന്റെ സമരമുഖമാണ്. ശില്പശാലകളേ നടത്താവൂ.. രൂപപ്പെടേണ്ട ശില്പത്തിനെക്കുറിച്ചുളള സ്വപ്നങ്ങള്‍ വേണം. മൊബൈല്‍ ഫോണ്‍ നല്ല രീതിയില്‍ ഉപയോഗിക്കണം. രക്ഷിതാക്കളും അധ്യാപകരും കുട്ടികളും പരസ്പരം ആശ്യവിനിമയത്തിന് ഈ സംവിധാനം പ്രയോജനപ്പെചുത്തണം.എല്ലാം രൂപപ്പെട്ടു വരണം .നമ്മുടെ മനസിലെ ആശയങ്ങളിലേക്ക് അവരെ എടുത്തു പ്രതിഷ്ടിക്കരുത്. ലക്ഷ്യ നിര്‍മിതി, പങ്കാളിത്ത നിര്‍മിതി, ആശയനിര്‍മിതി, പ്രവര്‍ത്തനനിര്‍മിതി , പ്രചോദനനിര്‍മിതി എന്നിവയുടെ പ്രായോഗികതയാണ് അന്വേഷിക്കുന്നത്.

  17 hours ago · Like
• 

  Vs Bindu തൃത്താല യിലെ ശ്രമം സ്വാഗതാര്‍ഹം തന്നെ .കുട്ടി ആരാണെന്ന് ഇനിയും മനസ്സിലാക്കാത്ത രീതിയില്‍ വിദ്യ അഭ്യാസം തുടര്‍ന്നാല്‍ വലിയ അപകടങ്ങള്‍ സമൂഹത്തില്‍ ഉണ്ടാകും .വിജയ ശതമാനം വര്‍ദ്ധിപ്പിക്കല്‍ മാത്രം ലക്‌ഷ്യം ആകും . ഓരോ വിഷയത്തിലും നമ്മള്‍ ജനകീയ ഇടപെടലുകള്‍ വേണം എന്ന് പറയാറുണ്ട്‌ എന്താണ് ഈ ഇടപെടലിന്‍ വ്യാപ്തി എന്ന് ആരും പറഞ്ഞിട്ടില്ല . .ഒരു ഫയലും പേനയും ലഘു ഭക്ഷണവും അടങ്ങുന്ന ബോധ വല്‍ക്ക രണ ക്ലാസുകളെ എത്ര പരിഹാസ്യമായാണ് ആളുകള്‍ സമീപിക്കുന്നത് എന്നത് അവരുടെ അനുഭവം മറിച്ചല്ലാത്തതിനാല്‍ . അതില്‍ നിന്നൊരു മോചനം ഉണ്ടാകുന്നു വെന്നു കരുതാവുന്നത് സ്വപ്ന പ്രോജെക്ട് കളില്‍ നിന്ന് ഒന്നെങ്കിലും പൂര്‍ണ്ണ അര്‍ഥത്തില്‍ നടപ്പിലായിവരുംപോഴാനു .ആശയ സംവാദങ്ങള്‍ വളരുന്നത് ഊര്‍ജ്ജ ദായകമാണ് .ഇവിടെ വീണ്ടും കൂടി ചേരുന്ന വര്‍ നടപ്പില്‍ വരുത്തുന്ന ഒരു രീതി കേരളം ഒട്ടുക്കു വ്യത്യസ്ത രീതിയില്‍ നടപ്പില്‍ വരുമ്പോള്‍ തൃത്താല മോഡല്‍ എന്നത് എല്ലാവരും ഓര്‍ക്കുന്ന ഒന്നാകും .

  16 hours ago · Unlike · 1
• 

  Kaladharan Tp ബിന്ദു, തൃത്താല ഒരു മോഡലല്ല.സാധ്യതയാണ്. അതു എവിടെയും ഇടതുപക്ഷപ്രവര്‍ത്തകര്‍ കാണിക്കേണ്ട രീതിയാണ്. ഓരോ പരിപാടിയേയും ജനാധിപത്യവത്കരിക്കല്‍,യോഗത്തിനപ്പുറത്തേക്കു നയിക്കല് സദസിനെ സംഘമാക്കല്‍......ഞാന്‍ സൂചിപ്പിച്ച പോലെ ലക്ഷ്യ നിര്‍മിതി, പങ്കാളിത്ത നിര്‍മിതി, ആശയനിര്‍മിതി, പ്രവര്‍ത്തനനിര്‍മിതി , പ്രചോദനനിര്‍മിതി എന്നിവയുടെ പ്രായോഗികത തേടല്‍..ഇതു താഹ്കള്‍ക്കുമാകാം. ചടങ്ങില്‍ കുടുങ്ങരുതെന്നു കവി പറഞ്ഞതിനെ വിപുലപ്പെടുത്താനാര്‍ക്കും കഴിയും.കര്‍മോത്സുകമായ പങ്കാളിത്താനുഭവങ്ങള്‍ നിര്‍മിച്ചെടുക്കുക .താങ്കളുടെ വ്യവഹാരമേഖലകളില്‍ അതിനുളള സാധ്യത ഇല്ലേ?

1