സംതൃപ്തം ഒന്നാം ക്ലാസ്

 

അവധിക്കാല പരിശീലനത്തിൻ്റെ ശില്പശാല SCERT യിൽ നടക്കുകയാണ്. റിപ്പോർട്ടിംഗ് സമയത്ത് ഒന്നാം ക്ലാസിലെ ടീം അംഗങ്ങൾ പറഞ്ഞു:

"ആർ പി കുപ്പായമിടുന്നത് ക്ലാസുകളിൽ ഗുണപരമായ മാറ്റം ഉണ്ടാക്കുവാനാണ്. അതിന് കഴിയുംവിധം അധ്യാപകരെ സജ്ജമാക്കാൻ കഴിയുന്നില്ലെങ്കിൽ, മാറ്റം പ്രകടമാകുന്നില്ലെങ്കിൽ വർഷാവർഷം RP മാരുടെ വേഷം അണിയുന്നതെന്തിന്? ഈ വർഷം ഈ പരിശീലനം ഒന്നാം ക്ലാസിൽ ഒരു മാറ്റവും വരുത്തുന്നില്ലെങ്കിൽ ഞങ്ങൾ ഇനി റിസോഴ്സ് പേഴ്സൺസായി തുടരില്ല"

ഞങ്ങൾക്ക് വെല്ലുവിളികൾ ഏറെയായിരുന്നു. അതിനാൽ

• വിശദമായ പ്രക്രിയാ കുറിപ്പുകളും പിന്തുണാ സാമഗ്രികളും തയ്യാറാക്കി (300 പേജ്)
• ഒരു വിഷയത്തിൽ ( മലയാളം) മാത്രം കേന്ദ്രീകരിച്ചു.
• തെളിവധിഷ്ഠിതമായി സെഷൻ നയിക്കാൻ തീരുമാനിച്ചു. കുട്ടികളെ വച്ചുള്ള ക്ലാസ്, ആധികാരികരഖകൾ എന്നിവ ഉപയോഗിച്ചു
• പ്രക്രിയാ ഘട്ടങ്ങളുടെ സൂക്ഷ്മതയിൽ അതീവ ശ്രദ്ധ പുലർത്തി.
• ഗവേഷണാത്മകമായി കാര്യങ്ങൾ ചെയ്യാൻ തീരുമാനിച്ചു
• SRG, DRG, BRCതല പരിശീലനങ്ങളെ അക്കാദമികമായി എങ്ങനെ പിന്തുണയ്ക്കാമെന്ന് ആലോചിച്ചു. റിസോഴ്സ് പേഴ്സൺസിൻ്റെ വാട്സാപ്പ് കൂട്ടായ്മ  ഓരോ തലം കഴിയുമ്പോഴും വിപുലീകരിച്ചു കൊണ്ടിരുന്നു
• അവ്യക്തതകൾ, സംശയങ്ങൾ, വിമർശനങ്ങൾ, വിയോജിപ്പുകൾ ,നിർദ്ദേശങ്ങൾ എന്നിവ ഈ വേദികളിൽ ഉന്നയിക്കപ്പെടുകയും ബോധ്യപ്പെടുന്ന തരത്തിൽ വിശദീകര പിന്തുണ നൽകുകയും ചെയ്തു.
• ഏപ്രിൽ 29 മുതൽ മെയ് അവസാനം വരെ സംസ്ഥാന റിസോഴ്സ് ടീം ഈ കൂട്ടായ്മകളെ സജീവമാക്കി നിറുത്തി. വിനിമയ ചോർച്ചകൾ എന്നിട്ടും ഉണ്ടായി. ഒന്നാം ക്ലാസ് അനുഭവമില്ലാത്ത റിസോഴ്സ് പേഴ്സൺസ് പരിശീലകരായി നിയോഗിക്കപ്പെട്ടതിനാൽ അവരെയും സജ്ജമാക്കേണ്ടി വന്നു.
• അവധിക്കാല പരിശീലനം തീരാറായപ്പോൾ അധ്യാപകരുടെ വാട്സാപ്പ് ഗ്രൂപ്പുകൾ രൂപീകരിക്കണം എന്ന നിർദ്ദേശം ഉയർന്നു വന്നു. ജൂൺ മുതൽ മറ്റെല്ലാ പണികളും മാറ്റി വച്ചാൽ മാത്രമേ ഈ വേദികളിൽ ക്രിയാത്മകമായി ഇടപെടാൻ കഴിയൂ. എന്തായാലും തുടരാൻ തീരുമാനിച്ചു
• ഒന്നാം ക്ലാസിലെ അധ്യാപകരെ ഉൾപ്പെടുത്തി രൂപീകരിച്ച വാട്സാപ്പ് ഗ്രൂപ്പുകളും പങ്കാളിത്തവും

1. ഗവേഷണാത്മക അധ്യാപക വേദി -975
2. Aഒന്നാനാം കുന്നിന്മേൽ - 1000 
3. B ഒന്നാനാം കുന്നിന്മേൽ - 1023
4. C ഒന്നാനാം കുന്നിന്മേൽ - 171
5. A ഒന്നേ ഒന്നേ- 635
6. B ഒന്നേ ഒന്നേ _1010
7. C ഒന്നേ ഒന്നേ -918
8. ഒന്നാം രാഗം - 521
9. ഒന്നിച്ചുയരാം - 603
10. ഒന്നാം മാനം - 517

ആകെ 7373

ആകെ പ്രൈമറി സ്കൂളുകൾ 6817 ആണ്.ഒന്നാം ക്ലാസിൽ പതിനായിരം അധ്യാപകർ ഉണ്ടെന്ന് കണക്കാക്കിയാൽ സംസ്ഥാനത്തെ 70% ത്തോളം അധ്യാപകരാണ് ഈ കൂട്ടായ്മകളിൽ പങ്കാളികളാകാൻ സന്നദ്ധരായത്.

• തുടർ പിന്തുണ അവർ ആഗ്രഹിക്കുന്നു
• പരിശീലനം പോസിറ്റീവായ മനോഭാവം സൃഷ്ടിച്ചു
• ഒന്നാം ക്ലാസിൽ അവർ മുൻ വർഷം വരെ നേരിട്ട പ്രശ്നങ്ങൾ പരിഹരിക്കണമെന്ന ആഗ്രഹം
• ഒരു പങ്കിടൽ വേദിയുടെ അനിവാര്യത

ഈ കൂട്ടായ്മകൾക്ക് പുറമേ ഹലോ അഡ്മിൻ, അനുഭവക്കുറിപ്പുകൾ, പാട്ടുപൂക്കളം, ഒന്നാം ക്ലാസിലെ ഡയറികൾ (2), രചനാ ശില്പശാല, കലവറ ഒന്നാം ക്ലാസ് ,ഒന്നാം ക്ലാസ് രേഖകൾ എന്നിങ്ങനെ ഗ്രൂപ്പുകളും രൂപീകരിച്ചു. 

നവ മാധ്യമഗ്രൂപ്പിലെ പ്രവർത്തനം ഒരു ടേം പൂർത്തീകരിച്ചപ്പോൾ പങ്കാളികളിൽ നിന്നും ഫീഡ്ബാക്ക് ശേഖരിച്ചു. അത് ചുവടെ.

അവരുടെ കണ്ണിലെ തിളക്കം എന്നെ ഏറെ സന്തോഷിപ്പിച്ചു

സർ, 

പറയാതിരിക്കാൻ വയ്യ. ഞങ്ങളുടെ CPTA വെള്ളിയാഴ്ചയായിരുന്നു. രണ്ട് ശില്പശാലകളിൽ പങ്കെടുത്ത് മടങ്ങുമ്പോഴും രക്ഷിതാക്കളിൽ പലരും ചില ആശങ്കകളും സംശയങ്ങളും ബാക്കിയാക്കിയാണ് മടങ്ങിയത്. എന്നാൽ ഇന്നലെ CPTA കഴിഞ്ഞ് പോകുമ്പോഴുള്ള അവരുടെ കണ്ണിലെ തിളക്കം എന്നെ ഏറെ സന്തോഷിപ്പിച്ചു. മുൻപൊന്നും സംയുക്ത ഡയറിയെ കുറിച്ചും സചിത്ര പുസ്തകത്തെപ്പറ്റിയും അഭിപ്രായങ്ങൾ പറയാതിരുന്നവർക്ക് ഇന്നലെ അതെക്കുറിച്ചു ഒത്തിരി പറയാനുണ്ടായിരുന്നു. അവരുടെ സഹായമില്ലാതെ

• കുട്ടികൾ ഡയറി എഴുതി തുടങ്ങിയതും
• തിരുത്തലുകൾ ഇഷ്ടപ്പെടാത്തവർ തെളിവെടുത്തു എഴുതുന്നതും
• നന്നായി ചിത്രം വരയ്ക്കുന്നതും
• കളർ ചെയ്യുന്നതും...അങ്ങനെ.. അങ്ങനെ..എന്നാൽ എന്നെ ഏറെ ചിന്തിപ്പിച്ചതും ചിരിപ്പിച്ചതും മറ്റൊരു രക്ഷിതാവിന്റെ അഭിപ്രായമായിരുന്നു.

'ഈ സചിത്ര പുസ്തകവും സംയുക്ത ഡയറിയും കുറച്ച് മുന്നേ തുടങ്ങിയിരുന്നെങ്കിൽ നാലാം ക്ലാസ്സിൽ പഠിക്കുന്ന, ഇപ്പോഴും സ്വന്തമായി വായിക്കാൻ നന്നേ പാടുപെടുന്ന അവരുടെ മുതിർന്ന കുട്ടി എളുപ്പത്തിൽ മെച്ചപ്പെട്ടേനെ എന്ന്.'

അദ്ധ്യാപന രംഗത്ത് തുടക്കക്കാരിയും ഒന്നാം ക്ലാസ്സിൽ മുൻപരിചയവുമില്ലാത്ത ഞാൻ തെല്ല് ആശങ്കയോടെ തന്നെയായിരുന്നു ക്ലാസ്സിലേക്ക് പോയത്.

എന്നാൽ ഇന്ന് എന്റെ കുട്ടികളിലുണ്ടായ മാറ്റവും അവരുടെ രക്ഷിതാക്കളുടെ സന്തോഷവും എന്റെ ആശങ്കളെയെല്ലാം തന്നെ അസ്ഥാനത്താക്കിയിരിക്കുന്നു. 🙏🙏

Sariga C V

GMLPS Ponmundam South

Tanur

Malappuram

2

അക്ഷരമില്ലാതെ ഉയർന്ന ക്ലാസുകളിൽ എത്തുന്ന കുട്ടികൾ എന്നത് ഒരു പഴങ്കഥയാക്കട്ടെ..

പാഠഭാഗവും സചിത്ര പുസ്തകവും സമന്വയിപ്പിക്കുന്നത് വളരെ നന്നായി. 

രൂപീകരണ പാഠത്തിനു ശേഷം പാഠപുസ്തകത്തിലേക്ക് കടക്കുമ്പോൾ വീണ്ടും ആദ്യം മുതൽ എടുക്കുന്നതുപോലെ തോന്നിയിരുന്നു. 

അത് സമയനഷ്ടമല്ലേ? എങ്കിലും പാഠാവതരണവും കുട്ടികളുടെ  വായനയും കഴിഞ്ഞവർഷത്തേക്കാൾ വേഗത്തിൽ ആയി എന്ന് പറയാതെ വയ്യ.  നിർമാണ ഉൽപ്പന്നങ്ങൾ പുസ്തകത്തിൽ ഒട്ടിക്കുന്നത് കുട്ടികൾക്ക്  താല്പര്യ ജനകവും ആകർഷകവും ആണെങ്കിലും അതിന്റെ പങ്ക് ഏറെയും ശില്പശാലയിൽ പങ്കെടുത്ത രക്ഷിതാക്കൾക്ക് അവകാശപ്പെട്ടതാണ്. നേരെമറിച്ച് ചിത്രം വരയിലും നിറം കൊടുക്കലിലും നമുക്ക് കുട്ടികളുടെ പൂർണ്ണ പങ്കാളിത്തം ഉറപ്പുവരുത്താൻ ആകും.

കുട്ടിയുടെ  മനസ്സിലെ ആശയത്തിനും ഭാവനയ്ക്കും അനുസരിച്ചാണ് അവൻ ചിത്രം വരയ്ക്കുന്നത്. അതുകൊണ്ടുതന്നെ ആശയഗ്രഹണത്തിനും ആശയപ്രകടനത്തിനുമുള്ള സാധ്യത വളരെ കൂടുതലാണ്.

ഓരോ ഫ്രെയിമിന്റെയും പ്രക്രിയ കുറിപ്പ് ലഭ്യമാക്കുന്നത് അധ്യാപകരിൽ ആത്മവിശ്വാസം വർദ്ധിപ്പിക്കുകയും ഒരു ഏകീകൃത അധ്യാപന രീതി സാധ്യമാക്കുകയും ചെയ്യും. ഈ കൂട്ടായ്മയും ഒപ്പം നമ്മുടെ ആത്മാർത്ഥതയും അർപ്പണ മനോഭാവവും. അക്ഷരമില്ലാതെ ഉയർന്ന ക്ലാസുകളിൽ എത്തുന്ന കുട്ടികൾ എന്നത് ഒരു പഴങ്കഥയാക്കട്ടെ..

മിനി കെ

കെ എസ് എൽ പി എസ് എം ജി കാവ്

3

രൂപീകരണ പാഠവും പാഠപുസ്തകവും തമ്മിൽ ശരിക്കും ബന്ധപ്പെടുത്തേണ്ട തുണ്ട്

• മുൻവർഷങ്ങളിൽ നിന്നും വ്യത്യസ്തമായി ഇക്കൊല്ലം ഒന്നാം ക്ലാസ്സിൽ നടപ്പാക്കിയ ഗവേഷണാത്മക പ്രവർത്തനങ്ങൾ ഏറ്റവും മികച്ചതു തന്നെ എന്ന കാര്യത്തിൽ സംശയമില്ല .
• വായന, ലേഖനം എന്നിവയിൽ ഏറ്റവും ഉയർന്ന തലത്തിൽ കുട്ടികളെ എത്തിക്കാൻ ഇത്തരത്തിലുള്ള പ്രവർത്തനങ്ങളിലൂടെ കഴിഞ്ഞിട്ടുണ്ട് .

എങ്കിലും 30 ൽ കൂടുതൽ കുട്ടികളുള്ള ഒരു ഒന്നാം ക്ലാസ്സിൽ ഈ രീതിയിലുള്ള പ്രവർത്തനങ്ങളിലൂടെ കടന്നുപോകുക എന്നത് ഒരു അധ്യാപികയെ സംബന്ധിച്ചിടത്തോളം ഭഗീരഥ പ്രയത്നം തന്നെയാണ്. ഇത്തരത്തിലുള്ള ഒരു പഠനരീതി പ്രാവർത്തികമാക്കുമ്പോൾ ഇനിയെങ്കിലും ഒന്നാം ക്ലാസിലെ കുട്ടികളുടെ എണ്ണം , പാഠങ്ങളുടെ ബാഹുല്യം എന്നീ പ്രശ്നങ്ങളിൽ  ഉന്നതതലങ്ങളിൽ ചർച്ച നടക്കേണ്ടതും  ഉചിതമായ നടപടികൾ ഉണ്ടാവേണ്ടതും ആകുന്നു.

കുട്ടികൾ കൂടുതലുള്ള ഒരു ക്ലാസ്സിൽ ഒരിക്കലും ഒരു അധ്യാപികയ്ക്ക് റിലാക്സ് ചെയ്തുകൊണ്ട് ആസ്വാദ്യകരമായ അധ്യാപനം സാധ്യമാവുന്നില്ല എന്നത് തുറന്നുപറയാൻ പലരും മടിക്കുന്നു. നമ്മുടെ മുന്നിൽ കുട്ടികൾ ധാരാളം ആണെങ്കിലും ഒരു രക്ഷിതാവ് അവന്റെ ഒന്നാം ക്ലാസുകാരനായ ഒരു കുട്ടിയെയാണ് നമ്മുടെ മുന്നിലേക്ക് അയക്കുന്നത് . ആ കുട്ടിയെ കുറിച്ച് ആ രക്ഷിതാവിനുള്ള പ്രതീക്ഷകൾ വളരെയധികമാണ്.

1️⃣രൂപീകരണ പാഠവും പാഠപുസ്തകവും തമ്മിൽ ശരിക്കും ബന്ധപ്പെടുത്തേണ്ടതുണ്ട് രൂപീകരണ പാഠങ്ങളിലൂടെ വന്ന കഥാനുഭവം അവസാനഘട്ടത്തിൽ എത്തുകയും തുടർന്ന് പാഠത്തിലേക്ക് കടക്കുമ്പോൾ വീണ്ടും ആദ്യം മുതൽ എന്ന അവസ്ഥയാണ് ഉണ്ടാക്കുന്നത്.

ഇത് എങ്ങനെ വേണമെന്ന് പറയാൻ അറിവില്ല. പാഠത്തിൽ നിന്നും രൂപീകരണ പാഠം ഉണ്ടാക്കുക സാധ്യമാണോ?

ഫ്രെയിമുകളെല്ലാം പൂർത്തിയാക്കിയതിനു ശേഷം പാഠം തുടങ്ങുക എന്ന രീതി ശരിയാവുന്നില്ല .തുടക്കം മുതൽ തന്നെ പാഠഭാഗവുമായി പൊരുത്തപ്പെടുത്തി കൊണ്ടു തന്നെ പോകുന്നത് നന്നാവും എന്ന് തോന്നുന്നു.

2️⃣സചിത്ര പുസ്തകത്തിലേയ്ക്ക് ആവശ്യമായ മെറ്റീരിയലുകൾ അത്യാവശ്യം തന്നെയാണ്.എങ്കിലും തുടർച്ചയായുള്ള ശില്പശാലകളും നിർമ്മാണ പ്രവർത്തനങ്ങളും സാധ്യമാവാതെയും വരുന്നു

3️⃣രൂപീകരണ പാഠങ്ങളുടെ ദൈർഘ്യം കുറയ്ക്കാൻ പറ്റില്ലേ ?

4️⃣ വായനാസാമഗ്രികൾ  ലഭ്യമാകണം.ഇത് ഉദ്ദേശിച്ച രീതിയിൽ വിജയം കാണണമെങ്കിൽ വായന ക്ലാസ് റൂമിൽ തന്നെ നടക്കണം എന്നാകുന്നു. കാരണം രക്ഷിതാക്കളുടെ സഹകരണം കുറഞ്ഞുവരുന്നു.

5️⃣, 7️⃣ വായന -  ലേഖന പ്രവർത്തനങ്ങൾ വളരെ നല്ലതാണ്.

8️⃣ഫ്രെയിം തിരിച്ചുള്ള പ്രക്രിയ കുറിപ്പുകൾ വളരെ സഹായകമാണ്.ഇനിയും അങ്ങനെ തന്നെ വേണം എന്നാണ് അഭിപ്രായം. ആത്മവിശ്വാസത്തോടെ ക്ലാസ് എടുക്കാൻ ഇത്തരത്തിലുള്ള പാഠങ്ങൾ വളരെ സഹായിക്കുന്നു

9️⃣കഥകൾ വളരെ താല്പര്യത്തോടെ തന്നെയാണ് കുട്ടികൾ ഏറ്റെടുത്തത് .അത് തുടരുന്നതിൽ സന്തോഷം .

⏸️ഈ കൂട്ടായ്മ തീർച്ചയായും നില നിൽക്കുക തന്നെ വേണം.

ഷീബ ടി എം

ജി എൽ പി എസ് ചാത്തമംഗലം

കോഴിക്കോട്

4

SRG meeting, CRC, BRC... ഇങ്ങനെ കിട്ടിയിരുന്ന അക്കാഡമിക അറിവുകൾ എല്ലാം ഈ കൂട്ടായ്മയിൽ നിന്നു കിട്ടുന്നു

• രൂപീകരണപാഠങ്ങളിൽ പാഠപുസ്തക അവതരണം എപ്പോൾ എന്ന് വ്യക്തമാക്കിയാൽ നല്ലതാണ്.
• ഒരു യൂണിറ്റിന് മുന്നോടിയായി ഒരു ശില്പശാല ആകാം.
• രൂപീകരണ പാഠങ്ങൾ വേണം.
• വായനാ സാമഗ്രി വളരെ ഫലപ്രദം.
• ലേഖനപ്രവർത്തനങ്ങൾ ക്ലാസ്സ്‌റൂം സാധ്യതക്കു അനുയോജ്യമായ രീതിയിൽ നടത്താൻ അദ്ധ്യാപകർക്കു കഴിയും.
• സംയുക്ത ഡയറി നിലവിലുണ്ട്.
• പുതിയ ലേഖനപ്രവർത്തനവുമാകാം.
• വായന -വിവിധ ഘട്ടങ്ങൾ വേണം.
• പ്രക്രിയാകുറിപ്പുകൂടി ഉണ്ടായാൽ വളരെ സന്തോഷം.
• കഥകൾ തുടരണം.
• കുട്ടികളുടെ മികവുകൾ പങ്കിടാം.
• മുൻ വർഷങ്ങളെക്കാൾ വളരെ മെച്ചമാണ്.

SRG meeting, CRC, BRC... ഇങ്ങനെ കിട്ടിയിരുന്ന അക്കാഡമിക അറിവുകൾ എല്ലാം ഈ കൂട്ടായ്മയിൽ നിന്നു കിട്ടുന്നു. കളയിക്കാവിള മുതൽ കാസറഗോഡ് വരെയുള്ള 1ക്ലാസ്സ്‌ അധ്യാപകരെ ഒരു കുടക്കീഴിൽ കൊണ്ടുവരുന്ന ഈ കൂട്ടായ്മ DPEP കാലഘട്ടത്തിനു ശേഷം ഞാൻ കണ്ട ഏറ്റവും മികച്ച അധ്യാപക കൂട്ടായ്മയാണ്. ദയവായി ഇത് തുടരണം.

Jaya. S, (Teacher)

St. Andrew's Lps.Karumkulam. Neyyattinkara, Tvpm.

5

എല്ലാ അധ്യാപകർക്കും വഴികാട്ടിയായ ഈ കൂട്ടായ്മ നിലനിർത്തണം

പ്രിയപ്പെട്ട കലാധരൻ സാറിനും ടീമിനും.. 🙏        എല്ലാ അധ്യാപകരും ഒന്നടങ്കം  ആത്മസംതൃപ്തിയോടെ കുട്ടികളുടെ മികവിനെ കുറിച്ച് പറയുന്നുണ്ടെങ്കിൽ അവരെ ഇതിന് പ്രാപ്തരാക്കിയത് ഈ കൂട്ടായ്മ ഒന്നു മാത്രമാണ്.

• ഫ്രെയിം തിരിച്ചുള്ള പ്രക്രിയ കുറിപ്പുകളും കൃത്യമായ നിർദ്ദേശങ്ങളും വായന സാമഗ്രികളും രൂപീകരണ പാഠങ്ങളും ഈ കൂട്ടായ്മയിലൂടെ ലഭ്യമാക്കിയതാണ് ഈ ഗവേഷണാത്മക പ്രോജക്റ്റിന്റെ  വിജയം.
• യഥാസമയം ഇവയൊന്നും ലഭ്യമല്ലായിരുന്നുവെങ്കിൽ ഈ പ്രോജക്ട് ഒരിക്കലും ലക്ഷ്യം കാണില്ലായിരുന്നു.
• ഈ രീതി പിന്തുടർന്ന് വന്ന എല്ലാ വിദ്യാലയങ്ങളിലും ഒരു ഏകീകൃത അധ്യയന രീതി കൊണ്ടുവരാൻ ഈ കൂട്ടായ്മയിലെ പങ്കിടൽ കൊണ്ട് സാധ്യമായി.
• ഈ ഗ്രൂപ്പ് നിർജീവമായാൽ ഇതിലെ ഭൂരിഭാഗം അധ്യാപകരും ഇപ്പോൾ തുടരുന്ന ഈ രീതിയിൽ നിന്ന് പുറകോട്ട് പോകും എന്നതിൽ ഒരു സംശയവും ഇല്ല.
• അതുകൊണ്ട് എല്ലാ അധ്യാപകർക്കും വഴികാട്ടിയായ ഈ കൂട്ടായ്മ നിലനിർത്തണമെന്ന അഭ്യർത്ഥനയോടെ..

 മിനി കെ,

 കലാസമിതി എൽ പി സ്കൂൾ, എം ജി കാവ്,

 തൃശ്ശൂർ.

6

ആത്മ സംതൃപ്തി തോന്നുന്നു

ഈ വർഷത്തെ ഒന്നാം പാദവാർഷിക പരീക്ഷ പിന്നീടുമ്പോൾ , വിലയിരുത്തൽ പൂർത്തിയാകുമ്പോൾ ഒരു ആത്മ സംതൃപ്തി തോന്നുന്നു. ഒരു കാലത്ത് ഇംഗ്ലീഷ്, കുട്ടികളെ സംബന്ധിച്ച് ബാലികേറാമല ആയിരുന്നു. അതുപോലെ തന്നെയാണ് ഇന്ന് മലയാളത്തിന്റെ അവസ്ഥ. പക്ഷേ ഈ രീതിയിൽ മുന്നോട്ടു പോയാൽ അതിൽ മാറ്റം വരും എന്നത് ഉറപ്പാണ്. പരീക്ഷ വേളയിൽ പല കുട്ടികളും സ്വയം ചോദ്യങ്ങൾ വായിച്ച് ഉത്തരം എഴുതുന്നത് കണ്ടപ്പോൾ ഒരു ചെറിയ അഭിമാനമൊക്കെ തോന്നി. ഈ രീതിയിലുള്ള പഠനവും ഈ ഗ്രൂപ്പും വളരെ വലിയ രീതിയിൽ ഒരു അധ്യാപിക എന്ന നിലയിൽ എന്നെ ഉയർത്തുന്നതിൽ സ്വാധീനം ചെലുത്തി.

• രണ്ടാം ടേമിലും ഈ ഒരു support പ്രതീക്ഷിക്കുന്നു.
• സംശയങ്ങ പരസ്പരം കൈമാറി മാറ്റാനും ഒക്കെ ഈ ഗ്രൂപ്പ് സഹായകമാണ്.

ഈ ടേമിൽ കുഞ്ഞുങ്ങൾക്ക് ചിത്രകഥകൾ പൂർത്തീകരിക്കുവാൻ സാധിക്കുമെന്ന് തോന്നുന്നു അത് പങ്കിടാം. സ്വതന്ത്രവായന കാർഡുകൾ പ്രയോജനം ചെയ്തിരുന്നു. ഈ സഹായം ആവോളം പ്രതീക്ഷിക്കുന്നു

നന്ദി സാറിനും ടീമിനും.

Sreejadevi

Kuttemperoor UPS

Mannar

Chengannoor

Aalappuzha

7

രൂപീകരണപാഠവും പാഠപുസ്തകവും ഒരുമിച്ച് കൊണ്ടുപോകുന്ന രീതിയാണ് നല്ലതെന്ന് തോന്നുന്നു. 

 സചിത്ര പുസ്തകത്തിലേക്കാവശ്യമായ സാമഗ്രികൾ തയ്യാറാക്കാൻ ശില്പശാലകൾ സംഘടിപ്പിക്കേണ്ടത് അത്യാവശ്യമാണ്. ശില്പശാലകൾ വഴി സാമഗ്രികൾ ഉണ്ടാക്കുകയാണെങ്കിൽ കുട്ടികളുടെ ക്ലാസ്സ്റും പ്രവർത്തനങ്ങൾക്ക് (സചിത്ര പുസ്തകത്തിന്)ഏകീകൃത സ്വഭാവം കൈവരും.

രൂപീകരണ പാഠത്തിൽ പാഠപുസ്തകത്തിലെ വാക്കുകൾക്ക് തെളിവ് പകരുന്ന തരത്തിലായാൽ നന്നാവുകയില്ലേ ( പുസ്തകം ലിങ്ക് ചെയ്യുമ്പോൾ )

വായന സാമഗ്രി അധിക വായനക്ക് ആവശ്യമാണ്

ടീച്ചറെഴുത്ത്, കുട്ടിയെഴുത്ത്, പിന്തുണാ ബുക്കിലെഴുത്ത് ബോർഡെഴുത്ത് ഇങ്ങനെയുള്ള ലേഖന പ്രവർത്തനങ്ങൾ എല്ലാം നല്ലതാണ് പക്ഷേ സമയ പരിമിതി പ്രശ്നമുണ്ടാക്കുന്നു.

സംയുക്ത ഡയറി തുടരാം . രചനോത്സവവും ആകാം

ഒന്നാം യൂണിറ്റ് പോലെ വിശദമായതല്ലെങ്കിലും frame തിരിച്ച് രൂപീകരണ പാഠം നൽകിയാൽ നന്നായിരിക്കും

രക്ഷിതാക്കളുടെയും കുട്ടികളുടെയും അഭിപ്രായങ്ങൾ സ്വീകരിക്കുന്നതും പങ്കു വെക്കുന്നതും അധ്യാപകരായ നമ്മൾക്ക് ഊർജ്ജം നൽകും

നമ്മുടെ ഈ കൂട്ടായ്മ എന്തുകൊണ്ടും നല്ലതാണ്. തുടരണം

• ഈ വർഷം കുട്ടികൾക്ക് ആദ്യ ടേമിൽ തന്നെ സ്വതന്ത്ര രചനക്ക് അവസരം ലഭിച്ചു. അതും അവർ പരിചയിച്ച അക്ഷരങ്ങളും വാക്കുകളും പ്രയോഗിക്കാൻ പറ്റുന്ന തരത്തിലുള്ള പ്രവർത്തനം കൂടിയായപ്പോൾ മക്കൾക്കും സന്തോഷം അധ്യാപകർക്ക് ആശ്വാസവുമായി.

കുട്ടികൾ 25 ൽ കൂടുതലായ ക്ലാസ്സുകളിൽ സമയ പരിമിതി വലിയൊരു പ്രശ്നമാണ്. ഒട്ടിക്കലും എഴുത്തും വരുമ്പോൾ എല്ലാ പ്രക്രിയകളും പൂർത്തീകരിക്കാൻ വിഷമമാണ്. സ്കിപ്പ് ചെയ്ത് പോകുമ്പോൾ മാനസിക വിഷമം അനുഭവപ്പെടുന്നു. അതോടൊപ്പം പിന്നോക്കക്കാരെയും  ചേർത്തുപിടിക്കണം . അങ്ങനെ വരുമ്പോൾ ഭാഷാ പ്രവർത്തനത്തിന് കൂടുതൽ സമയം വേണം. മറ്റു വിഷയങ്ങളുടെ സമയം അപഹരിക്കപ്പെടേണ്ടി വരുന്നു.

മൂന്നാം യൂണിറ്റിൽ കുട്ടികളുടെ സർഗാത്മകപ്രവർത്തനങ്ങൾ (കുട്ടിക്കവിത) പങ്കിടാൻ പറ്റിയാൽ നല്ലതായിരിക്കും

ഉഷാകുമാരി കെ.സി.

ഏര്യം വിദ്യാമിത്രം യുപി സ്കൂൾ

മാടായി സബ് ജില്ല

കണ്ണൂർ

8

ലേഖന പ്രവർത്തനങ്ങൾ അതേ പടി തുടരുന്നത് നന്നായിരിക്കുമെന്ന് തോന്നുന്നു

രൂപീകരണ പാഠങ്ങൾ കുറേ പിന്നിട്ടതിനു ശേഷം പാഠ ഭാഗത്തേക്ക് കടക്കുന്നതിനു പകരം രണ്ടും തുടക്കത്തിലേ ലിങ്ക് ചെയ്തുകൊണ്ടുപോകുന്ന തരത്തിലായിക്കൂടെ?

ശില്പശാലയിൽ സചിത്ര പുസ്തകത്തിലേക്കാവശ്യമായ സാമഗ്രികൾ തയ്യാറാക്കിയാൽ ക്ലാസ് ഒരു തടസവുമില്ലാതെ കൊണ്ടുപോകാൻ സാധിക്കുമല്ലോ.

ലേഖന പ്രവർത്തനങ്ങൾ അതേ പടി തുടരുന്നത് നന്നായിരിക്കുമെന്ന് തോന്നുന്നു. ഒരു ദിവസം കുട്ടി സ്വായത്തമാക്കിയ അക്ഷരങ്ങളുടേയും ചിഹ്നങ്ങളുടേയും എഴുത്തു രൂപം പ്രയോഗിക്കാനും അത് ഒന്നുകൂടി മനസിൽഉറപ്പിക്കാനുമുള്ള അവസരമാണല്ലോ ബോർഡെഴുത്ത്. പാദവാർഷിക പരീക്ഷയിൽ അതിന്റെ ഗുണം കാണാനുണ്ട്.

സ്വതന്ത്ര രചനയ്ക്ക് രചനോത്സവം കൂടിയാവാം.

വയനാ പ്രക്രിയ അതുപോലെ തന്നെയാവാം. താളാത്മക വായന ചില സന്ദർഭങ്ങളിൽ ഒഴിവാക്കാമെന്നു തോന്നുന്നു.

രണ്ടാം യൂനിറ്റിൽ ലഭിച്ച പോലെ പൊതു നിർദേശങ്ങൾ ലഭിച്ചാൽ ഒരധ്യാപികയ്ക്ക് പ്രക്രിയാ കുറിപ്പുകൾ തയ്യാറാക്കാവുന്നതേയുള്ളൂ. ഏതെല്ലാം ഘട്ടങ്ങളിലൂടെ കടന്നുപോകണമെന്ന് ഒന്നാം യൂനിറ്റിൽ വ്യക്തമായതാണല്ലോ.

രക്ഷിതാക്കളുടെ പ്രതികരണങ്ങൾ സ്വീകരിക്കുന്നതും പങ്കുവയ്ക്കുന്നതും നല്ലതാണ്. അവരുടെ തൃപ്തിയാണല്ലോ നമ്മുടെ വിജയം. കുട്ടികളുടെ അഭിപ്രായങ്ങളുമാവാം.

കൂട്ടായ്മ എന്നും നല്ലതാണ്. അധ്യാപികയ്ക്ക് സ്വയം വിലയിരുത്താനും മെച്ചപ്പെടാനും തന്റെ കുട്ടികളെ മെച്ചപ്പെടുത്താനും ഇത് സഹായിക്കും.

മുൻ വർഷത്തേതുമായി തട്ടിച്ചു നോക്കുമ്പോൾ വായനയിലും ലേഖനത്തിലും ഈ രീതി ഒരു പടി മുന്നിൽത്തന്നെ . കുട്ടികൾ ഒഴുക്കോടെ ഭാവാത്മകമായി വായിക്കുന്നു. തെറ്റില്ലാതെ എഴുതുന്നു.

മറ്റു വിഷയങ്ങളുടെ സമയം അപഹരിക്കരുതെന്നു പറഞ്ഞാലും ഭാഷാ പ്രവർത്തനങ്ങൾക്കു വേണ്ടി സമയം അപഹരിക്കപ്പെടുന്നു. ഇതൊരു വലിയ പ്രശ്നമാണ്.

രാധാമണി. സി.വി.

ഐ.എ.എൽ.പി.എസ്. ബേക്കൽ.

ബേക്കൽ സബ് ജില്ല.

കാസറഗോഡ്.

9

അടുത്ത ഘട്ടം സചിത്ര പുസ്തകം സ്വതന്ത്രരചനകളിലേക്ക് മാറണമെന്നാണ് എൻ്റെ അഭിപ്രായം. 

വളരെ സംതൃപ്തിയോടെ ഒന്നാം ടേം പൂർത്തിയാക്കി. ആത്മനിർവൃതി തന്നെയാണ്. 

കുക്കു, കിറ്റി, മനസ്സ് ,പൂമ്പാറ്റ എന്നൊക്കെ പേരിട്ട് അവർ അവരെ ആവിഷ്ക്കരിച്ച് ഡയറിയെ ഹൃദയത്തോട് ചേർത്തു.

 സ്വന്തമായി തയാറാക്കിയ മഴ രചനകൾ വായനക്കാർഡുകളും

ചിത്രകഥയും ഒക്കെ കുട്ടികളെസ്വതന്ത്ര വായനയിലേക്കും രചനയിലേക്കും സ്വാഭാവികമായി എത്തിച്ചേരാൻ സഹായകമായി.

ഓണം എന്ന ആഘോഷവുമായി ബന്ധപ്പെട്ട പാട്ടുപൂക്കളം മലരും മണവും എന്ന പാഠത്തിലേക്ക് നല്ലൊരു മുന്നൊരുക്കമായി .

വളരെ ആസ്വദിച്ചാണ് അവർ പാട്ടുപൂക്കളം ഏറ്റെടുത്തത്. അടുത്ത ഘട്ടം സചിത്ര പുസ്തകം സ്വതന്ത്രരചനകളിലേക്ക് മാറണമെന്നാണ് എൻ്റെ അഭിപ്രായം. 

ആശയം സ്വയം ചിത്രവും നിർമ്മാണവുമൊക്കെയായി ആവിഷ്ക്കരിക്കട്ടെ.' 

ഈ ഗ്രൂപ്പിൽ സമയാസമയങ്ങളിൽ ലഭ്യമാകുന്ന പിന്തുണ വളരെ വലുതാണ് നന്ദി... 

കലാധരൻ സാർ.🥰🥰 മറ്റ് അദ്ധ്യാപക സുഹൃത്തുക്കൾക്കും.

ആരോഗ്യപരമായ വിമർശനങ്ങളും മാതൃകകളുമൊക്കെയായി നയിക്കുന്ന ടീമിന് നന്ദി

ജയന്തി.മലപ്പുറം

10

സ്വന്തമായി കുട്ടികൾ ചോദ്യങ്ങൾ വായിക്കുന്നു. ഉത്തരം എഴുതുന്നു. ഡയറി എഴുത്ത് കുട്ടിയുടേത് മാത്രമായി എന്നു തന്നെ വേണമെങ്കിൽ പറയാം.

• ആദ്യം തന്നെ പറയാനാഗ്രഹിക്കുന്നത് മുൻ വർഷവുമായി താരതമ്യം ചെയ്താൽ നേട്ടങ്ങൾ മാത്രമെ സാർ പറയാൻ ഉള്ളൂ.
• സ്വന്തമായി കുട്ടികൾ ചോദ്യങ്ങൾ വായിക്കുന്നു.
• ഉത്തരം എഴുതുന്നു.
• ഡയറി എഴുത്ത് കുട്ടിയുടേത് മാത്രമായി എന്നു തന്നെ വേണമെങ്കിൽ പറയാം.
• പാoപുസ്തകങ്ങൾ ഇപ്പോൾ ഒരു പ്രശ്നമേയല്ല
• രൂപീകരണ പാഠങ്ങൾ പാഠ പുസ്തകത്തിലേക്ക് കുട്ടികളെ അതിവേഗത്തിൽ എത്തിക്കുന്നുണ്ട്.
• മുൻവർഷങ്ങളെ അപേക്ഷിച്ച് ആത്മ സംതൃപ്തി പറഞ്ഞറിയിക്കാൻ പറ്റാത്തത്ര ഉയരത്തിലാണ് സാർ.
• രണ്ടാം ടേമിൽ സ്വതന്ത്രരചന പ്രോത്സാഹിപ്പിക്കാനായി ചിത്രങ്ങളിൽ നിന്നും കുട്ടികൾ കഥകൾ വികസിപ്പിക്കട്ടെ.
• മൂന്നാം ടേം ആകുമ്പോഴത്തേക്കും കുട്ടി സ്വന്തമായി കഥകൾ എഴുതാൻ പ്രാപ്തരാകും എന്നൊരു വിശ്വാസമുണ്ട്.
• വായന, ലേഖനം എന്നിവയുടെ ഘട്ടങ്ങൾ രണ്ടാം ടേമിലും തുടരട്ടെ.
• ഔദ്യോഗിക സംവിധാനത്തെ വിശ്വാസത്തിലെടുക്കുക പ്രയാസമായതിനാൽ ഈ കൂട്ടായ്മ ഇങ്ങനെ തന്നെ തുടരട്ടെ.
• കുട്ടികൾ എഴുതുന്ന ചിത്രകഥകൾ പതിപ്പാക്കി പൊതുസമൂഹത്തിൽ പങ്കിടാം.
• കഥകൾ ലഭ്യമാക്കുന്നത് നല്ലതു തന്നെ എങ്കിലും കൊച്ചു പുസ്തകങ്ങളിൽ നിന്നും കുട്ടി അവനിഷ്ടപ്പെട്ടത് വായിക്കുന്നതാകും നല്ലത്.
• നിർമ്മാണ പ്രവർത്തനവും ശില്പശാലയും ഇതേ രീതിയിൽ തുടരേണ്ടതില്ല.
• ഫ്രെയിം തിരിച്ച് പ്രക്രിയാ കുറിപ്പുകൾ ആവശ്യമില്ല
• സ്വതത്ര വായനാ സാമഗ്രികൾ വളരെ നല്ലതായിരുന്നു. കുട്ടികൾ താൽപര്യത്തോടെ  സ്വന്തമായി വായിച്ചിരുന്നു.
• എന്റെ സ്കൂളിൽ രണ്ടു ഡിവിഷനുകളിലായി 51 കുട്ടികളുണ്ട്. ഇവരിൽ 5 പേരെ വിചാരിച്ച പുരോഗതിയിൽ എത്തിക്കാൻ കഴിഞ്ഞിട്ടില്ല എന്ന വിഷമം നിലനിൽക്കുന്നുണ്ടെങ്കിലും ഇത്രയും ആത്മനിർവൃതിയുള്ള ഒന്നാം ടേം ഇതുവരെ ഉണ്ടായിട്ടില്ല എന്നത് ചാരിതാ ർത്ഥ്യത്തോടെ പറയട്ടെ. കലാധരൻ സാറിനും ടീമിനും ഹൃദയം നിറഞ്ഞ അഭിനന്ദനങ്ങളും നന്ദിയും.

Aruva teacher

HIAUPS Chithari

Bekal

Kasaragod

മുകളിലെ വിലയിരുത്തൽ നൽകിയ തിരിച്ചറിവുകളിൽ നിന്ന് മുന്നോട്ടു വക്കുന്ന നിർദ്ദേശങ്ങൾ

1. കേരളത്തിലെ അധ്യാപകർക്ക് തുടർച്ചയായ അക്കാദമിക പിന്തുണ ആവശ്യമാണ്. വിഷയാധിഷ്ഠിത നവ മാധ്യമ കൂട്ടായ്മകൾ അക്കാദമിക സംവിധാനങ്ങളുടെ നേതൃത്വത്തിൽ ജില്ലാടിസ്ഥാനത്തിൽ രൂപീകരിക്കാവുന്നതാണ്.
2. ജില്ലാ പ്രതിനിധികളെ ഉൾപ്പെടുത്തി സംസ്ഥാന കൂട്ടായ്മകളും ഉണ്ടാകണം
3. ഓരോ യൂണിറ്റിൻ്റെ വിനിമയവും പ്രവർത്തനാധിഷ്ഠിതമായും ഫലമുറപ്പാക്കുന്ന വിധത്തിലും ആക്കി മാറ്റാൻ സഹായകമായ ഇടപെടലുകൾ  നടത്തണം
4. തെളിവുകൾ ശേഖരിച്ച് പങ്കിടുക പ്രധാനമാണ്.
5. കോർ ടീം അംഗങ്ങളുടെ ചെറു ഗ്രൂപ്പ് നിരന്തരം അവലോകനം നടത്തണം
6. ഒരു വർഷത്തെ ഒന്നായി കണ്ടുള്ള പരിശീലന ലക്ഷ്യങ്ങൾ തീരുമാനിക്കണം
7. ഓരോ ടേമിലേക്കും ലക്ഷ്യം നിർണയിക്കുകയും വേണം .
8. പുതിയ സാധ്യതകൾ തേടുക എന്നത് ഒരു സംസ്കാരമായി മാറണമെങ്കിൽ സ്വയം വിമർശനത്തിൻ്റെ വിനയം സ്വീകരിക്കണം.

 കുറിപ്പ് 1

ഔദ്യോഗിക സംവിധാനങ്ങളുടെ ഭാഗത്തുനിന്ന് ഒന്നാം ക്ലാസിൽ കാര്യങ്ങൾ ഭംഗിയായി നടക്കുന്നതിന് നിരവധി ഇടപെടലുകൾ ഉണ്ടായി. അതിന് പൂരകമാകും വിധം അക്കാദമിക ധാര സജീവമാക്കി നിറുത്താൻ കഴിയുന്ന ഒരു മാതൃക വികസിച്ചു വരേണ്ടതുണ്ടായിരുന്നു. പ്രായോഗികമായി അത് സാധ്യമാണ്.ഒരു റിസോഴ്സ് ടീമിനെ  TA, DA പരിഗണനയില്ലാതെ സന്നദ്ധ സേവനത്തിന് സജ്ജമാക്കിയാൽ.

 

നിപ അവധികാലത്തെ ഓൺലൈൻ ക്ലാസ് ഒന്നിൽ

"ഓണാവധി കഴിഞ്ഞ് സ്കൂൾ തുറന്നപ്പോൾ മലയാളം സചിത്ര ബുക്കിലേക്കുള്ള ടീച്ചർ സപ്പോർട്ട് മെറ്റീരിയൽ സ് ഒന്നും തയ്യാറായിട്ടില്ലായിരുന്നു

.കാത്തിരിപ്പിനൊടുവിൽ മണവും മധുരവും എന്ന യൂണിറ്റിന്റെ ടീച്ചർ സപ്പോർട്ട് മെറ്റീരിയലുകൾ എത്തി.

പിറ്റേദിവസം തന്നെ അതിലെ ചിത്രങ്ങൾ എല്ലാം തന്നെ ഓരോ കുട്ടിക്കും ഓരോന്ന് വിധം പ്രിൻറ് എടുത്തു.

വ്യാഴാഴ്ച മുതൽ സചിത്ര ക്ലാസ്സ് ആരംഭിക്കാനും തീരുമാനിച്ചു.

അന്ന് രാത്രി തന്നെ ടി എം എഴുതിത്തീർത്തു .

സചിത്ര ബുക്കിലേക്കുള്ള പ്രവർത്തനങ്ങൾ കണ്ടപ്പോൾ വളരെ സന്തോഷം തോന്നി കാരണം കളർഫുൾ ആയി കുട്ടികൾക്ക് ചെയ്യാൻ പറ്റുന്ന പ്രവർത്തനങ്ങൾ എല്ലാ ചിത്രങ്ങളും നല്ല ഭംഗിയുള്ള ചിത്രങ്ങൾ .എഴുതാനുള്ളവയും കുട്ടികൾക്ക് താല്പര്യ ഉണർത്തുന്നത്.

പിറ്റേദിവസം സചിത്ര ബുക്ക് ചെയ്യുമ്പോൾ കുട്ടികൾക്ക് ഉണ്ടാകുന്ന ആ സന്തോഷം ....അത് ആലോചിച്ചപ്പോൾ തന്നെ എനിക്ക് വളരെ സന്തോഷം തോന്നി. രാത്രി 12 മണി ആയപ്പോൾ വെറുതെ ഒന്ന് വാട്സ്ആപ്പ് തുറന്നു നോക്കി. 

നിപ്പ കാരണം കോഴിക്കോട് ജില്ലയിൽ രണ്ടുദിവസം അവധിയാണത്രേ😢😢😢.

പിന്നെ ആകെ ടെൻഷനായി.

ഇനി എന്ത് ചെയ്യും? 

സചിത്ര ബുക്ക് ചെയ്തിട്ടില്ല.

അപ്പോഴേക്കും എച്ച് എം മെസ്സേജും വന്നു നാളെ മുതൽ ഓൺലൈൻ ക്ലാസ്സ് എടുക്കണമെന്ന് പറഞ്ഞു.

പക്ഷേ ഞാൻ എത്ര തലപുകഞ്ഞാലോചിച്ചു.

 സചിത്ര ബുക്ക് ഓൺലൈൻ വഴി എങ്ങനെ എടുക്കും?

 ചിത്രങ്ങൾ ഒട്ടിക്കുകയും വരക്കുകയും എഴുതുകയൊക്കെ ചെയ്യുന്നതാണ്.

അതിൽ തന്നെ ചാർട്ട് എഴുത്ത് ബോർഡ് എഴുത്ത് അങ്ങനെ പലതരം എഴുത്തുകളും ......അതുപോലെതന്നെ വായനകളും പലതരം വായനകളും ചങ്ങല വായന തുടങ്ങി ......ഇനി എന്ത് ചെയ്യും?

കുറേ ആലോചിച്ചു കിടന്നു. 

പിന്നീട് എപ്പോഴോ ഉറങ്ങിപ്പോയി.

രാവിലെ നേരത്തെ എഴുന്നേറ്റു .കുറെ പുസ്തകങ്ങൾ സ്കൂളിലാണ്.

ഓൺലൈൻ ക്ലാസ് എടുക്കണമെങ്കിൽ അവയൊക്കെ വീട്ടിലെത്തിക്കണം.

10 മണി ആയപ്പോൾ സ്കൂളിൽ പോയി ആവശ്യമുള്ള സാധനങ്ങൾ എല്ലാം എടുത്ത് വന്നു.

അപ്പോഴും എൻറെ സംശയം സചിത്ര ബുക്ക് എങ്ങനെ ഓൺലൈൻ ആയിട്ട് എടുക്കും.

കുട്ടികൾ അതിൽ എങ്ങനെ ചിത്രങ്ങൾ ഒട്ടിക്കും അവർക്ക് ചിത്രങ്ങൾ എങ്ങനെ എത്തിക്കും???????.എൻറെ കോ വർക്കർ ശബ്ന ടീച്ചർക്കും ഇതേ സംശയങ്ങൾ തന്നെ ആയിരുന്നു.

അവസാനം കലാധരൻ സാറോട് ചോദിക്കാൻ തീരുമാനിച്ചു ഞങ്ങൾക്ക് സചിത്രവുമായി ബന്ധപ്പെട്ട്  സംശയങ്ങൾ ഉണ്ടെങ്കിലും സാറാണ് ഗ്രൂപ്പ് വഴി അത് തീർത്തു തരുന്നത്.ഞാൻ സാറിനെ മെസ്സേജ് അയച്ചു ഓൺലൈൻ ക്ലാസ്സ് ആരംഭിച്ചിട്ടുണ്ട് ഗൂഗിൾ മീറ്റ് വഴി എങ്ങനെ ഞങ്ങൾ സചിത്ര ബുക്ക് എടുക്കുക ..... സർ വളരെ കൃത്യമായ ഒരു മറുപടി അതിന് എനിക്ക് നൽകി.

ചിത്രങ്ങൾ ഒട്ടിക്കുന്നതിന് പകരം ചിത്രങ്ങൾ വരയ്ക്കാൻ ആവശ്യപ്പെട്ടു .

ഏതു രീതിയിൽ ക്ലാസ് നൽകണമെന്ന് കാര്യത്തിലും സർ ഞങ്ങൾക്ക് ഒരു വ്യക്തത നൽകി.അതോടുകൂടി എനിക്ക് കുറച്ച് ധൈര്യം വന്നു .

അതുവരെ ആകെ ടെൻഷനിലായിരുന്നു. ,അങ്ങനെ സചിത്ര ബുക്കിന്റെ ക്ലാസ് വെള്ളിയാഴ്ച രാവിലെ 10 മണിക്ക് ഗൂഗിൾ മീറ്റ് വഴി നടത്തുമെന്ന് കുട്ടികളെ അറിയിച്ചു.

കൃത്യം 10 മണിക്ക് തന്നെ എല്ലാ കുട്ടികളും ഗൂഗിൾ മീറ്റിൽ ജോയിൻ ചെയ്തു.

എല്ലാവരുടെ മുഖത്തും വളരെ സന്തോഷം .

കാരണം അവരുടെ ടീച്ചറെ അവര് ഫോണിൽ കാണുകയാണല്ലോ.

ടീച്ചറെ എന്ന് വിളിച്ച് അവർ അവരുടെ സന്തോഷം പ്രകടിപ്പിച്ചു.

എനിക്കും വളരെ സന്തോഷം. ഒരു ദിവസത്തെ ഇടവേളക്കുശേഷം ഞാൻ എൻറെ കുട്ടികളെ കാണുകയാണ് പെട്ടെന്ന് ആയിരുന്നല്ലോ അവധി പ്രഖ്യാപിച്ചത്.

ഇന്നലെ ഗൂഗുൾ മീറ്റ് വഴിയല്ല ക്ലാസ്സ് എടുത്തത് വാട്സ്ആപ്പ് വഴിയായിരുന്നു.

അതുകൊണ്ടുതന്നെ അവരുടെ ആദ്യത്തെ ഗൂഗിൾ മീറ്റ് ക്ലാസും ആയിരുന്നു ഇന്ന് .

രണ്ടു പൂമ്പാറ്റയുടെ ചിത്രങ്ങൾ എടുത്ത് അതിൽ ഒന്നിന് നിറം നൽകി ഒന്ന് നിറം നൽകാത്തതും എടുത്തു.

ക്ലാസിൽ പറയുന്ന പോലെ തന്നെ പറഞ്ഞുനോക്കി എത്രത്തോളം ഫലവത്താവും എന്ന് അറിയില്ലല്ലോ.

പക്ഷേ എൻറെ കുട്ടികളുടെ പ്രതികരണം ഞാൻ പ്രതീക്ഷിച്ചതിനപ്പുറം ആയിരുന്നു.

എൻറെ ഓരോ ചോദ്യങ്ങൾക്കും കൃത്യമായി അവർ ഉത്തരം നൽകി.

പൂമ്പാറ്റ വരയ്ക്കാൻ ആവശ്യപ്പെട്ടു അവരോട് .വൃത്തിയായി വളരെ മനോഹരമായ ഒരു പൂമ്പാറ്റയെ അവർ വരച്ചു.

പൂമ്പാറ്റയുടെ ഒരു മോഡൽ ഞാൻ അവർക്ക് കാണിച്ചു കൊടുത്തു.

ചില കുട്ടികൾ അവരുടെതായ ഭാവനയിൽ പൂമ്പാറ്റയെ വരച്ചു.

മറ്റു കുട്ടികൾ ഞാൻ കാണിച്ച പൂമ്പാറ്റയുടെ അതേ മാതൃകയിൽ വരച്ചത്.

പിന്നീട് എൻറെ ഓരോ നിർദ്ദേശങ്ങൾക്കും അനുസരിച്ച് അവർ പൂമ്പാറ്റയ്ക്ക് നിറം നൽകുകയും പൂമ്പാറ്റയെ കുറിച്ച് എഴുതുകയും ചെയ്തു.

ഗൂഗിൾ മീറ്റ് വഴി ആയതിനാൽ എനിക്ക് അവർ വരയ്ക്കുന്നതും എഴുതുന്നതും കാണാൻ സാധിച്ചിരുന്നു.

രക്ഷിതാക്കളുടെ സഹായം തീരെ വേണ്ട എന്ന് തന്നെ ഞാൻ അവരോട് പറഞ്ഞിരുന്നു.

കുട്ടികൾ സ്വന്തമായി തന്നെ വരച്ച് നിറം നൽകി എഴുതി.

വളരെ സന്തോഷം തോന്നി.

കുട്ടികളും അതേ വളരെ സന്തോഷത്തിലായിരുന്നു കാരണം അവരുടെ ടീച്ചറുടെ മുമ്പിൽ ഇരുന്നാണ് അവർ വരയ്ക്കുന്നതും എഴുതുന്നതും.

ക്ലാസിൽ ചെയ്യുന്നതുപോലെ തന്നെ ഓരോ ഭാഗങ്ങളും നിറം നൽകുമ്പോഴും ടീച്ചറെ ഇങ്ങനെ പോരെ ഇങ്ങനെ മതിയോ എന്നൊക്കെയുള്ള ചോദ്യങ്ങൾ ഉയർന്നു.

ഓരോ കുട്ടിയുടെ സംശയങ്ങൾക്കും കൃത്യമായി ഞാൻ മറുപടിയും നൽകി.

ചെയ്തു കഴിഞ്ഞവർ ചിത്രം ഉയർത്തി കാണിച്ചു.

എഴുതിക്കഴിഞ്ഞവർക്ക് എഡിറ്റിങ്ങിനു വേണ്ടി  ഞാൻ എഴുതിയത് കാണിച്ചു.

അവർ അത് നോക്കി അവരുടെ തെറ്റുകൾ കണ്ടുപിടിച്ച് തിരുത്തി എഴുതി. 

പ്പു , മ്പ , തുടങ്ങിയ അക്ഷരങ്ങളിൽ ചില കുട്ടികൾക്ക് കൺഫ്യൂഷൻ ഉണ്ടായി.

എഴുതിയ വാക്യങ്ങൾ കുട്ടികൾ വായിച്ചു കേൾപ്പിച്ചു.

ഗൂഗിൾ മീറ്റ് വഴി ആയതു കൊണ്ടായിരിക്കാം എല്ലാ കുട്ടികൾക്കും വായിക്കാൻ വളരെ ഉത്സാഹം ആയിരുന്നു.

മുഴുവൻ കുട്ടികളും എഴുതിയത് വായിച്ചു കഴിഞ്ഞതിനുശേഷം ആണ് ക്ലാസ്സ് അവസാനിച്ചത്.

സത്യം പറയാലോ അപ്പോഴാണ് എൻറെ ശ്വാസം നേരെ വീണത്😊.

ഗൂഗിൾ മീറ്റ് വഴി സചിത്രമൊക്കെ എങ്ങനെ എടുക്കാം എന്നുള്ള കൺഫ്യൂഷൻ അതോടുകൂടി അവസാനിച്ചു. "

Filsy K Makkoottam AMUPS

Kunnamangalam

Kozhikode

പുതിയ കാലത്തെ കുട്ടിക്കളികൾ

പുതിയ കാലത്തെ കുട്ടികളുടെ കളികൾ കണ്ടിട്ടുണ്ടോ? അവർ ഭാഷ പുതുക്കുന്നു. താളവും ചലനവും കൊരുത്തിടുന്നു. നോൺസെൻസിൽ സെൻസ് കണ്ടെത്തുന്നു. ബാല്യത്തെ പൊലിപ്പിക്കുന്നു.

കുട്ടികളുടെ കളിയൊക്കെ പണ്ടല്ലായിരുന്നോ ഇന്നെന്തു കളി? എന്ന് ചോദിക്കുന്നവരുണ്ടാകും.

കുട്ടികളിൽ നിന്ന് അത്രമേൽ അവർ അകന്നിരിക്കുന്നു.

കളികളുടെ പഠന സാംസ്കാരിക മൂല്യം പിന്നൊരിക്കൽ ചർച്ച ചെയ്യാം

ഇതാ കേരളത്തിലെ അധ്യാപകർ ശേഖരിച്ചു തന്ന കുറെ കളികൾ.

ചിലതിന് വിവരണം ഉണ്ട്

ചിലതിന് വീഡിയോ ഉണ്ട്

ചിലതിന് പാട്ട് മാത്രം.

നിങ്ങൾക്കറിയാവുന്ന പുതിയ കുട്ടിക്കളികൾ കമൻ്റായി പങ്കിടൂ

എന്നാൽ വായിച്ചു തുടങ്ങാം.

1

ആവോ മീനാ

സൂപ്പർ സീനാ

ബിഗ് ബോയ്

ലെയ്സി ഗേൾ

സ്റ്റാച്ച്യൂ.

2

സാം സൂലേ

സപ്ലേ സൂലേ

ആനേ വാലേ

ഗോതമ്പു ലാലേ

3 .

പീ..... ക്കാ.... ച്ചു

പീ ക്കാച്ചു

അപ് അടിക്കത്

ഡൗണടിക്കത്

ഫ്രണ്ടടിക്കത്

ബാക്കടിക്കത്

പീ ... ക്കാ.... ച്ചു.

4

വാസ്കോഡിഗാമ

വൺ ടു ത്രീ ഗാമ

പുതുവർഷമേകാൻ

അഴകേറി വാവാ

ജിലും ജിലും താളത്തിൽ

പറന്നു വരാം

മനുഷ്യന്റെ രൂപത്തിൽ

തിരിച്ചു വരാം

കൊച്ചിയിലെ കൊച്ചമ്മാവൻ

പന്തൊലൊരുക്കി

ഓഹോയ്....ഹൊയ്യാഹൊയ്(2)

5

കുഞ്ഞുറോസാപ്പൂവേ 

എഴുന്നേറ്റ് നിൽക്ക്

കണ്ണു രണ്ടും തിരുമ്മ്

ഇടത്തോട്ട് നോക്ക് 

വലത്തോട്ട് നോക്ക്

ഇഷ്ടമുള്ളൊരാളെ

ചാടി ചാടി പിടിക്ക്

ധാരാളം കുട്ടികൾക്ക് ഒരുമിച്ച് കളിക്കാവുന്ന കളിയാണ്. കുഞ്ഞുറോസാപ്പൂവായി ഒരു കുട്ടി നടുക്ക് നിൽക്കണം മറ്റുള്ളവർ ചുറ്റും കൈകോർത്ത് പിടിച്ച് നിന്നാണ് പാട്ട് പാടേണ്ടത്. പാട്ട് തീരുമ്പോൾ ചുറ്റുo നിൽക്കുന്ന കുട്ടികൾ പുറംതിരിഞ്ഞ് നിൽക്കണം നടുവിൽ നിന്ന കുട്ടി ഇഷ്ടമുള്ള ആളെ ചാടിപ്പോയി തൊടുന്നു. അടുത്തതായി ആ കുട്ടി നടുക്ക് നിന്ന് കളി തുടരാം

6.1

 ചോ ചോ ചോ ചോ ചോക്ലററ് 

എൻ്റെ അമ്മയും നിൻ്റെ അമ്മയും ടീച്ചറ് 

ചോ ചോ ചോ ചോ ചോക്ലററ് 

എൻ്റെ അച്ഛനും നിൻ്റെ അച്ഛനും ഡോക്ടറ് 

ചോ ചോ ചോ ചോ ചോക്ലററ് 

എൻ്റെ ചേച്ചിയും നിൻ്റെ ചേച്ചിയും പ്ലസ്ടുല് 

ചോ ചോ ചോ ചോ ചോക്ലററ് 

എൻ്റെ ചേട്ടനും നിൻ്റെ ചേട്ടനും കട്ടുറുമ്പ്

ചോ ചോ ചോ ചോ ചോക്ലററ് 

എൻ്റെ വാവയും നിൻ്റെ വാവയും ങ്യാ..  ങ്യാ.. ങ്യാ..

6.2

ചോക്ലേറ്റ് ചോക്ലേറ്റ്

ചോക്ലേ... റ്റ്

എന്റച്ഛനും നിന്റച്ചനും

പോലീസ്

എന്റമ്മയും നിന്റമ്മയും

ടീ.. ച്ച.. റ്....

എന്റേച്ചിയും നിന്റച്ചിയും

കോ.. ളേ.. ജി ൽ

എന്റെട്ടനും നിന്റെട്ടനും

കട്ടുറുമ്പ്

ഞാനും നീയും

Best friend..

7

 കുലകുല മുന്തിരി

നരി നരി ചുറ്റി വാ...

കുലകുല മുന്തിരി

നരി നരി ചുറ്റി വാ..

കുട്ടികൾ വട്ടത്തിൽ ഇരിക്കുക. ഒരു കുട്ടി കയ്യിൽ ഒരു കുലയുമായി (ചെടിയുടെ അറ്റം പൊട്ടിച്ചത് ) കുട്ടികൾക്കു ചുറ്റും വട്ടത്തിൽ ഈ പാട്ടും പാടി  ഓടുക [ ആദ്യത്തെ വരി ഓടുന്നയാളും രണ്ടാമത്തെ വരി വട്ടത്തിൽ ഇരുന്ന കുട്ടികളും ആണ് പാടേണ്ടത് ].എന്നിട്ട് ആരും കാണാതെ കയ്യിലെ കുല ഒരു കുട്ടിയുടെ പിറകിൽ വെക്കും. വീണ്ടും വട്ടംചുറ്റി വരുമ്പോഴേക്കും ആ കുട്ടി കുല കണ്ടില്ലെങ്കിൽ കുലയെടുത്ത് ഇരുന്നയാളെ അടിക്കും. അയാൾ അടി കിട്ടാതെ വട്ടത്തിൽ ഓടി വന്ന് പഴയ സ്ഥലത്തിരിക്കണം.

പിറകിൽ വെച്ച കുല കണ്ടുവെങ്കിൽ അതുമായി ഓടി കുല പിറകിൽ വെച്ച ആളെ അടിക്കാൻ ഓടുക. അയാൾ ഓടി വന്ന് ഒഴിഞ്ഞ സീറ്റിൽ ഇരിക്കുക.. പാട്ട് പാടി കളി തുടരുക.

8

സ്റ്റോൺ  പേപ്പർ സിസേഴ്സ്

സ്റ്റോൺ പേപ്പർ .........

മാറ്റി മാറ്റി പറയും

ഒരാൾ കത്രികയും മറ്റയാൾ പേപ്പറും വന്നാൽ വെട്ടും.

ഒരാൾ പേപ്പറും മറ്റെയാൾ സ്റ്റോണും വന്നാൽ ഇടിക്കും

9

 ഡും ഡും ചാച്ചാ

 ഡും ഡും ചാച്ചാ

 ഡും ചാ ഡും ചാ

 ഡും ഡും ചാച്ചാ

 ഹരേസ മരേസ

 സിംഗപ്പൂർ മംഗപ്പൂർ

 ബ്യൂട്ടി ക്യൂട്ടി  ലു ലു ലു ലു..

10

ഡും ഡും...ആരാണ്?

മാലാഖ

എന്തിനു വന്നു

നിറത്തിനു വന്നു

എന്ത് നിറം

മഞ്ഞ (ഓടി പോയി മഞ്ഞ തൊടുക, തൊടാത്തവർ പുറത്ത്.. ഇത്തരത്തിൽ നിറങ്ങൾ മാറ്റി കളി തുടരുക )

11

ആനവട്ടം അമ്പല വട്ടം

കുളിക്കാൻ പോവുമ്പോൾ

പാലത്തിൽ കയറി

പാലം പൊട്ടി ചടപട വീണു

12.

ബോംബയിൽ നിന്നൊരു 

ബേബി വന്നു

ബിസ്‌ക്കറ് കൊണ്ട് വന്നു

എന്ത് ബിസ്‌ക്കറ്?

പാല് ബിസ്ക്കറ്റ്

എന്ത് പാല്?

പശുമ്പാല്

എന്ത് പശു?

കുത്തണ പശു

എന്ത് കുത്ത്?

സൂചിക്കുത്ത്

എന്ത് സൂചി

മൊട്ടുസൂചി

എന്ത് മൊട്ട്?

താമര മൊട്ട്

എന്ത് താമര?

കുളത്തിലെ താമര

എന്ത് കുളം?

എറണാകുളം

എന്ത് എരണ?

കുറ്റി എരണ

എന്ത് കുറ്റി? 

കരണക്കുറ്റി

13

 ടിപ്പ്, ടോപ്, ടാപ്, ജനുവരി 

ടിപ്പ്, ടോപ്, ടാപ് ഫെബ്രുവരി 

മാസങ്ങളുടെ പേര് പറഞ്ഞു കൊണ്ട് രണ്ടു പേർ കൈകളിൽ അടിക്കുന്നു. ഡിസംബർ ആകുമ്പോൾ കൈ വലിക്കുന്നു

14

ഓറഞ്ച് ആപ്പിൾ

അമേരിക്ക ബേബി

ചിക്ക്‌ ചിക്കാ ബേബി

ചിക്കാ ചിക്കാ ബേബി

A... B... C.. D...

കുറേ കുട്ടികൾ വട്ടത്തിൽ നിൽക്കുന്നു. ഈ പാട്ടു പാടിക്കൊണ്ട് കൈകൊട്ടുന്നു.എന്നിട്ട്  A B C D എന്ന് പറയുമ്പോൾ കാലുകൾ അകത്തി വെയ്ക്കുന്നു.ഓരോ കളിയിലും ഇത് ആവർത്തിക്കുന്നു. അവസാനം വരെ  ആരാണോ വീഴതെ നിൽക്കുന്നത് അവർ ജയിക്കും.

15

 ബബിൾഗം ബബിൾഗം ബബിൾഗം 

എത്ര ബബിൾഗം വേണം?

സെവൻ (എത്രയാണോ പറയുന്നത് അത്രയും വിരലുകൾ എണ്ണുന്നു അവസാനം വരുന്ന വിരൽ മടക്കുന്നു) കളി തുടരുന്നു ആരുടെ വിരലുകൾ ആണോ എല്ലാം മടക്കി കഴിഞ്ഞത് അവർ ജയിച്ചു

16.

രാജാ രാജാ കൊട്ടാരത്തിൽ കള്ളൻ കടന്നു

കെട്ടിട്

എന്തും കൊണ്ട് ?

കയറും കൊണ്ട്

ഏ വഴി ?

ഈ വഴി

ഒരു ആള് രാജാവ് ബാക്കി ഉള്ളവരെല്ലാം കൈ കോർത്തു രാജാവിനു അഭിമുഖമായി നിൽക്കുന്നു. വരിയുടെ ഏറ്റവും വലത്തേ അറ്റത്തു നിൽക്കുന്ന ആള് രാജാവിന്റെ മറുപടി കേട്ട് ഇടത്തെ അറ്റത്തു കൈ കോർത്തു നിൽക്കുന്നവരുടെ കൈകൾക്കുള്ളിലൂടെ കയറി പോകുന്നു എല്ലാവരും പുറകെ കൈകൾക്കുള്ളിലൂടെ കടക്കുന്നു അങ്ങനെ പോകുമ്പോൾ ഇടതു വശത്ത് ഉള്ള ആദ്യത്തെ ആള് പുറകിലേക്ക് തിരിഞ്ഞു വരുന്നു.. അടുത്തായി രാജാവിനോട് വീണ്ടും ചോദിക്കുന്നു രാജാവ് ഇടതു വശത്ത് നിന്നുള്ള രണ്ടാമത്തെ വാതിൽ കാണിക്കുന്നു. വീണ്ടും എല്ലാവരും വരി വരിയായി അതിലൂടെ കടന്നു പോകുന്നു എല്ലാവരും കടന്നു പോകുമ്പോൾ ആ കുട്ടിയും തിരിഞ്ഞു നിൽക്കുന്നു... ഇങ്ങനെ കളി തുടരുന്നു…

17

വട്ടം വട്ടം നാരങ്ങ

ചെത്തി ചെത്തി

തിന്നുമ്പോൾ

എന്താ സീതേ മിണ്ടാത്തേ

റെഡി വൺ ടൂ ത്രീ.

18

ലെ .. ലെ ... ലെ

ലെയ്സോ

ബിങ്കോ

ഓപ്പോ

പോളോ

20

 ഓ... ഓ ...ഓ

ഓറഞ്ച് ആപ്പിൾ

അമേരിക്ക ബേബി

ചിക്ക് ചിക്കാ ബേബി

A B C D

ഓ.... ഓ... ഓ

ഗ്രേപ്പ് ... ഗ്രുവ

അമേരിക്ക ബേബി

ചിക്ക് ചിക്കാ ബേബി

E F G H

21

ഡും ഡും ഡാലേ

ഡും ഡാലേ ഹാലേ ഹാലേ

ചിം ചിം ചാലേ

ചിം ചാലേ ഹാലേ ഹാലേ

മമ്മീ മമ്മീ

അക്കോ പിക്കോ (2)

മമ്മീ മമ്മീ ഹാലോ

ഓൾ ഓഫ് യു ലൈക്ക് ഏൻഡ് ഷൂട്ട്

22.

ബെഞ്ച് മ്മലരിക്കുന്ന പൂമ്പാറ്റേ

നിനക്കെന്താ ഗൾഫില് പോയാല്

മമ്മൂട്ടി മുട്ടി മുട്ടി

നാരങ്ങ പീഞ്ഞ് പീഞ്ഞ്

ആപ്പിള് ചെത്തി ചെത്തി ചെസ്

23.

സൈനബ ബസിൽ കയറി

വളകിലുക്കി

എന്ത് വള

കുപ്പി വള

എന്ത് കുപ്പി

സോഡാ കുപ്പി

എന്ത് സോഡാ?

മൊട്ട് സോഡാ

എന്ത് മൊട്ട്

താമര മൊട്ട്

എന്ത് താമര

കുളം താമര

എന്ത് കുളം

എറണാകുളം

എന്ത് എറണാ

കാട്ട് എറണാ

എന്ത് കാട്

കുറ്റിക്കാട്

എന്ത് കുറ്റി

ബീഡിക്കുറ്റി

24

സൈനബ ബസിൽ കയറി

വളകിലുക്കി

എന്ത് വള

കുപ്പി വള

എന്ത് കുപ്പി 

സോഡാ കുപ്പി

എന്ത് സോഡാ

അപ്പ സോഡാ

എന്ത് അപ്പം

നെയ്യപ്പം

എന്ത് നെയ്യ്

ആട്ടിൻ നെയ്യ്

എന്താട് കോലാട്

എന്ത് കോല്

ചെണ്ടക്കോല്

എന്ത് ചെണ്ട

മരച്ചെണ്ട

എന്ത് മരം

വീട്ടിമരം

എന്ത് വീട്ടി

കടം വീട്ടി

എന്ത് കടം

പൈസ കടം

എന്ത് പൈസ

നയാ പൈസ

25

കപ്പ് കേക്ക് 

കപ്പ് കേക്ക്

കപ്പ് കപ്പ് കേക്ക്

ഐ സീ 

യൂ സീ

കൊക്കകോള ഫ്ലാഷ്

കൈ കൊടികളി

26

അത്തിപ്പഴം കൊത്തി തിന്ന തത്തമ്മേ

നിന്റെ ചുണ്ടിന്റെ നിറം

എന്താണ് എന്ന് പറയാമോ

ചുവപ്പ്

വാസ്കോഡ ഗാമാ

ഡും ഡും ചാച്ച

ചോ ചോ ചോക്ലേറ്റ്

ചോ  ചോ ചോക്ലേറ്റ്