കുട്ടികളുടെ കഴിവ് വിലയിരുത്താന്‍ മാര്‍ഗങ്ങളേറെ..

നിരന്തര വിലയിരുത്തലിനും പോര്‍ട്ട് ഫോളിയോ വിലയിരുത്തലിനും ഒന്നും കേരളത്തിലെ അധ്യാപകര്‍ക്ക് വിശ്വാസമില്ലെന്നു തോന്നുന്നു. അവര്‍ക്ക് കോളനി വാഴ്ചയുടെ നിഴല്‍ മനസില്‍ നിന്നും മാറിയിട്ടില്ല. പരീക്ഷയില്‍ കാലോചിതമായ മാറ്റം എന്നാല്‍ എഴുത്തുപരീക്ഷയിലെ ക്രമീകരണത്തില്‍ മാറ്റം എന്ന അര്‍ഥത്തിനപ്പുറം ചിന്തയില്ല. വിദ്യാഭ്യാസ നിലവാരത്തില്‍ മുന്നില്‍ നില്‍ക്കുന്ന ആസ്ത്രേലിയ പാഠ്യപദ്ധതി നിശ്ചയിക്കുമ്പോള്‍ കുട്ടികളില്‍ നിന്നും പ്രതീക്ഷിക്കുന്ന പ്രകടനത്തിന്റെ തെളിവുകള്‍ കൂടി ഉദാഹരിച്ച് വ്യക്തത നല്‍കും. കുട്ടി നേടേണ്ട കഴിവുകളെ മൂര്‍ത്തമായ ഉദാഹരണം വെച്ച് അവതരിപ്പിക്കുന്നതിനാല്‍ അധ്യാപകര്‍ക്കു് കൃത്യമായ ലക്ഷ്യബോധത്തോടെ പ്രവര്‍ത്തിക്കാനാകും. കുട്ടികളുടെ പോര്‍ട്ട് ഫോളിയോ അതത് അധ്യാപകര്‍മാക്രമല്ല പാഠ്യപദ്ധതി വിദഗ്ധരും പരിശോധിക്കും. മികച്ചതും ശരാശരിയിലുളളതും ശരാശരിക്കു താഴെയുളളതുമായ ഉല്പന്നങ്ങളുടെ ഉദാഹരണങ്ങള്‍ നല്‍കുമെന്നതിനാല്‍ കുട്ടികളെ വിലയിരുത്തുന്നതില്‍ അവ്യക്തത കുറയും. ഒന്നാം ക്ലാസ് രണ്ടാം ക്ലാസ് എന്നിങ്ങനെ പറയുന്നതിനു പകരം ഒന്നാം വര്‍ഷം , രണ്ടാം വര്‍ഷം ,മൂന്നാം വര്‍ഷം എന്നിങ്ങനെ ക്ലാസുകളെ വിളിക്കുന്ന ആസ്ത്രേലിയയിലെ മൂന്നാം പഠനവര്‍ഷക്കാരുടെ പോര്‍ട്ട് ഫോളിയോ ഉദാഹരണങ്ങളില്‍ ചിലതാണ് ഇവിടെ പരിചയപ്പെടുത്തുന്നത്. ക്ലാസിലെ കുട്ടികളുടെ ഉല്പനന്നങ്ങള്‍ വൈവിധ്യമുളളതായിരിക്കും. കാരണം അവര്‍ ഗൈഡ് നോക്കി എഴുതുകയോ അധ്യാപിക എല്ലാവര്‍ക്കും ബോര്‍ഡിലെഴുതി പകര്‍ത്തിക്കുകയോ ചെയ്യില്ല. കുട്ടികള്‍ സ്വയം കഴിവുകള്‍ വികസിപ്പിക്കുന്നതില്‍ അഭിമാനിക്കുന്ന അധ്യാപകര്‍ക്കുവേണ്ടി ശാസ്ത്രത്തിന്റെ തെളിവുകള്‍ ഇതാ

അവകാശനിയമം ഉള്‍ക്കൊണ്ട ഒരു അധ്യാപിക ഇവിടെയുണ്ട്

വിദ്യാഭ്യാസ അവകാശ നിയമം, നിരന്തര വിലയരുത്തല്‍, പഠനനേട്ടം ഓരോരോ കാര്യങ്ങള്‍...ഇതുവല്ലോം നടപ്പുളള കാര്യമാണോ മാഷേ?

ഇത്തരം ചോദ്യം ഞാന്‍ അഭിമുഖീകരിച്ചിട്ടുണ്ട്

ചോദ്യങ്ങള്‍ മാത്രമല്ല പ്രവൃത്തികളും കണ്ടിട്ടുണ്ട്

പഠനനേട്ടത്തിന്റെ വക്താക്കള്‍ കുട്ടികളെ പരിഗണിക്കാത്തതാണ് ഏറെ കഷ്ടം

അതെല്ലാം അവിടെ നില്‍ക്കട്ടെ

ഇതാ ഒരു ടീച്ചര്‍

ഒരോ ടേമിലെയും പഠനനേട്ടങ്ങളുടെ ലിസ്റ്റ് തയ്യാറാക്കി. ഓരോ കുട്ടിയും എന്തെല്ലാം നേടി. നേടിയില്ല എന്നു രേഖപ്പെടുത്തി.

രക്ഷിതാവ് ഇക്കാര്യത്തില്‍ നല്‍കേണ്ട സഹായം എന്തെന്ന് എഴുതി

പുതിയ പഠനപുരോഗതി രേഖ തയ്യാറാക്കി

കോപ്പി എടുത്ത് ക്ലാസ് പി ടി എയില്‍ വിതരണം ചെയ്തു

ഇത് മാരാരിക്കുളം തെക്ക് പഞ്ചായത്തിലെ ടാഗൂര്‍മെമ്മോറിയല്‍ പഞ്ചായത്ത് എല്‍ പി സ്കൂളില്‍ രണ്ടാം ക്ലാസിലെ അധ്യാപികയാണ് ചെയ്തത്

മറ്റു ക്ലാസുകാരും ഇതു നടപ്പിലാക്കും

അഭിനന്ദിക്കാം

അനുകരിക്കാം

ഈ വിദ്യാലയത്തെക്കുറിച്ച് നേരത്തേ എഴുതിയിട്ടുണ്ട്

ഇനിയും എഴുതും.

അധ്യാപിക പഠനനേട്ടങ്ങള്‍ ക്രോഡീകരിച്ചെഴുതിയത്

വര്‍ഷയ്ക് മലയാളത്തിന്റെ എല്ലാ പഠനനേട്ടങ്ങളും ഉറപ്പായി.

പ്രിദയര്‍ശന്റെ വീട്ടുകാര്‍ക്ക് വ്യക്തമാണ് സഹായമേഖലയും രീതിയും

ഇംഗ്ലീഷില്‍ അല്പം ശ്രദ്ധിക്കണം. ഇങ്ങനെ ശ്രമിച്ചുനോക്കാം.

ആഹാ! ആതിരമോഹന്‍ ഒട്ടുമിക്ക പഠനനേട്ടങ്ങളും നേടിക്കഴിഞ്ഞല്ലോ..

പ്രേംജിത്തിന്റെ മികവിന്റെ സാക്ഷ്യപത്രം

തിരുവനന്തപുരം ജില്ലയിലെ ഗവ എല്‍ പി എസ് ചുണ്ടവിളാകം അക്കാദമിക അന്വേഷണത്തിന്റെ ആലയമാണ്. അവിടെ ഗവേഷണമനസുളള ഒരു പ്രഥമാധ്യാപകനുണ്ട്. ജനായത്ത ബോധമുളള ഒരു ടീം അധ്യാപകരുണ്ട്. ജനായത്ത വിദ്യാലയം എന്നു വിശേഷിപ്പിക്കാനാണ് പ്രഥമാധ്യാപകന്‍ ആഗ്രഹിക്കുന്നത്. പ്രേംജിത്ത് നടത്തിവരുന്ന പ്രവര്‍ത്തനങ്ങള്‍ മുമ്പും ചൂണ്ടുവിരല്‍ പങ്കിട്ടിട്ടുണ്ട്. ഇതാ ആ പരമ്പരയില്‍ ഒന്നു കൂടി.

മികവിന്റെ സാക്ഷ്യപത്രം

ഓണപ്പരീക്ഷ കഴിഞ്ഞപ്പോള്‍ മിക്ക വിദ്യാലയങ്ങളും ക്ലാസ് പി ടി എ വിളിച്ചു കാണും. കുട്ടികളുടെ ഉത്തരക്കടലാസില്‍ ഗ്രേഡ് ഉണ്ട്. അത് കാണിച്ചിട്ടുമുണ്ടാകും. ഇനി പഠനപുരോഗതി രേഖ തയ്യാറാക്കി ഒപ്പിടുവിക്കണം. ആ പരീക്ഷപേപ്പറിലുളളതിനേക്കാള്‍ എന്താണ് ഈ പഠനപുരോഗതി രേഖയിലുളളത്. അച്ചടിക്കാനുളള സൗകര്യവും കുറച്ചെഴുതാനുളള അധ്യാപകപ്രീണനസമീപനത്തിനവും ചേരും പടി ചേര്‍ത്താല്‍ പഠനപുരോഗതി രേഖയായി. ഈ രേഖ കുട്ടികളുടെ എല്ലാ കഴിവുകളേയും അടയാളപ്പെടുത്തുന്നില്ല. എന്റെ കുട്ടികള്‍ എന്ന രേഖ പണ്ടുണ്ടായിരുന്നു. അതില്‍ കൂടുതല്‍ എഴുതണം എന്നതായിരുന്നു പരാതി. ഇപ്പോ അതു പരിഹരിച്ചല്ലോ? പരീക്ഷപേപ്പര്‍ കണ്ട രക്ഷിതാവിന് കുട്ടിക്ക് കൂടുതലായി എന്തെങ്കിലും വിവരം നല്‍കാന്‍ പര്യാപ്തമല്ലല്ലോ ഈ പഠനപുരോഗതിരേഖ എന്ന ആരും നിരാശപ്പെടുന്നില്ല എന്നതാണ് ഖേദകരം. പഠനപുരോഗതി രേഖ സര്‍ക്കാര്‍ നല്‍കേണ്ടതല്ല. അത് പണ്ട് അധ്യാപകസംഘടനകള്‍ ചോദ്യപേപ്പറുകള്‍ അച്ചടിച്ച കാലത്ത് പ്രത്യേക ഓഫര്‍ പോലെ നല്‍കി ശീലിച്ചതിനാല്‍ ചോദ്യം തരുന്നവര്‍ പ്രോഗ്രസ് കാര്‍ഡും നല്‍കണമെന്ന അലിഖിത കീഴ്വഴക്കം സൃഷ്ടിക്കപ്പെട്ടു എന്നേ ഉളളൂ. അതു മറികടക്കാന്‍ കഴിയും. പരീക്ഷ നടത്താനുളള അധികാരം കെ ഇ ആര്‍ പ്രകാരം പ്രഥമാധ്യാപകനാണ്. (അവകാശ നിയമപ്രകാരം പരീക്ഷ നടത്താതിരിക്കാനുളള അവകാശവും പുതിയതായി ലഭിച്ചിട്ടുണ്ടാകും . പക്ഷേ കുട്ടിയുടെ നിലവാരം കൃത്യമായി ഉറപ്പാക്കി രക്ഷിതാക്കളെ ബോധ്യപ്പെടുത്തിയിരിക്കണം)

അതു പോകട്ടെ ,തന്റെ വിദ്യാലയത്തിലെ കുട്ടികളെല്ലാം കഴിവുളളവരാണെന്നു കരുതുന്ന പ്രേംജിത്ത് എന്ന പ്രഥമാധ്യാപകന്‍ പ്രധാന അധ്യാപകനാകുന്നത് അവിടെ തയ്യാറാക്കിയ മികവിന്റെ സാക്ഷ്യപത്രം എന്ന രേഖയുടെ അക്കാദമിക വീക്ഷണത്തിളക്കത്തിലാണ്.

നോക്കൂ ആദ്ദേഹം രൂപകല്പന ചെയ്ത മികവിന്റെ സാക്ഷ്യപത്രം

വിദ്യാലയ അസംബ്ളി നിരന്തരവിലയിരുത്തല്‍ വേദിയാക്കാം

വിദ്യാലയ വികസനപദ്ധതി -3 ( കഴിഞ്ഞ ലക്കങ്ങളുടെ തുടര്‍ച്ച )

ആവര്‍ത്തനവിരസതയുളള വിദ്യാലയ അസംബ്ലികള്‍- അവ കുട്ടികള്‍ക്ക് മയങ്ങിവീഴാനുളളതാണ്.  
സാരോപദേശഭാരം കയറ്റി വെക്കാനുളളതാണ് ചിലര്‍ക്ക് അസംബ്ലി.  
മതബോധനത്തിന്റെ രഹസ്യ അജണ്ട തിരുകികയറ്റുന്നവരുമുണ്ട്.  
അച്ചടക്കം പഠിപ്പിക്കാനും താക്കീത് നല്‍കാനുമൊക്കെ അസംബ്ലിയെ ഉപയോഗിക്കുന്ന കേണല്‍മാഷന്മാരെയും കാണാം.  
അധികാരത്തിന്റെ മേല്‍ കീഴ് ബന്ധത്തെ അരക്കിട്ടുറപ്പിക്കുന്ന അസംബ്ലിയില്‍ പിന്നാക്കം നില്‍ക്കുന്ന കുട്ടികള്‍ പലപ്പോഴും ബഹിഷ്കൃതരാണ്.  
അധ്യാപകരുടെ ആലോചനയില്‍ തുല്യപങ്കാളിത്തം എന്നത് കടന്നു വരുന്നില്ല. 
വിദ്യാലയത്തെ ഉദ്യാനമായി കാണുന്നില്ല. എന്‍ സി എഫ് അസംബ്ലിയെക്കുറിച്ച് പരാമര്‍ശിച്ചിട്ടുണ്ട്. പട്ടാളച്ചിട്ടയില്‍ കുട്ടികളെ വരിവരിയായി നിറുത്തുന്നതല്ല അസംബ്ലി എന്നാണതില്‍ പറയുന്നത്. പ്രഭാതപ്രവര്‍ത്തനം ആസ്വാദ്യമാകുന്ന വിദ്യാലയാനുഭവമാണത്. അനൗപചാരികതയും സൗഹൃദവും ഉമ്നേഷം പകരുന്ന പങ്കിടലുകളും വൈവിധ്യവും പങ്കാളിത്തവും ...

വിദ്യാലയത്തിന്റെ ചിന്ത സര്‍ഗാത്മകമാകുമ്പോഴേ വിദ്യാലയ വികസനപദ്ധതിയില്‍ അസംബ്ലി സ്ഥാനം പിടിക്കൂ.

വിദ്യാലയ വികസനപദ്ധതി തയ്യാറാക്കാന്‍ ആലോചിക്കുമ്പോള്‍ സൂക്ഷ്മമായി കാര്യങ്ങള്‍ വിശകലനം ചെയ്യേണ്ടതുണ്ട്.

• ഇപ്പോള്‍ വിദ്യാലയത്തില്‍ നടക്കുന്നതെല്ലാം മതി , അതിനെന്താ കുഴപ്പം എന്നാലോചിക്കുന്നവര്‍ പദ്ധതി തയ്യാറാക്കേണ്ടതില്ല. കാരണം അവര്‍ ഈ വ്യവസ്ഥിതിയില്‍ സംതൃപ്തരാണ്. നിലവിലുളള അവസ്ഥയില്‍ ഒരു മാറ്റവും വരുത്താത്ത വ്യവസ്ഥാസംരക്ഷകരാണവര്‍.വിദ്യാലയയാഥാസ്ഥിതികര്‍ എന്നു വിളിക്കാം.
• പുരോഗമനകാരികള്‍ തങ്ങളുടെ പ്രവര്‍ത്തനമേഖലയില്‍ നിരന്തരം പുതുക്കല്‍ നടത്തിക്കൊണ്ടിരിക്കും. വിമര്‍ശനാവബോധത്തോടെ ഇടപെടും. സാധ്യതകളെക്കുറിച്ച് ആലോചിക്കും.

ഇതാ നിരന്തര വിലയിരുത്തലിനുളള വേദി കൂടിയാക്കി അസംബ്ലിയെ മാറ്റാന്‍ ശ്രമിച്ച ഒരു വിദ്യാലയചിന്തകള്‍ ഇന്ന് പങ്കിടാം.

രസിച്ചു പഠിക്കാനുളളതാണ് രസതന്ത്രം

എം വി രാജന്‍ മാഷ് ഹൈസ്കൂളില്‍ അഞ്ഞൂറ്റി നാല്പത് കുട്ടികളെ രസതന്ത്രം പഠിപ്പിക്കുന്നു.  
ഏറെ പ്രയാസമെന്നു പലരും കരുതുന്ന വിഷയം ഏറ്റവും നന്നായി കുട്ടികള്‍ മനസിലാക്കി പഠിക്കുന്നു.  
രസിച്ചു പഠിക്കാനുളളതാണ് രസതന്ത്രം എന്നാണ് വട്ടേനാട് ഹൈസ്കൂളിലെ രാജന്‍മാഷ് വിശ്വസിക്കുന്നത്. പാഠപുസ്തകം ആധാരമാക്കിയാല്‍ അത് രസതന്ത്രത്തെ അറുമുഷിപ്പല്‍ വിഷയമാക്കുമെന്നു അദ്ദേഹം കരുതുന്നു. ഓരോ പാഠത്തിലൂടെയും നേടേണ്ട കഴിവുകള്‍ എന്താണെന്നു കൃത്യമായി ധാരണയുളള അധ്യാപകര്‍ക്ക് സ്വന്തം രീതി വികസിപ്പിച്ചെടുക്കാനാകും.  
പഠനപ്രവര്‍ത്തനങ്ങളെല്ലാം കഴിഞ്ഞുളള റഫറന്‍സിനുളള ഉപാധിയാക്കി പാഠപുസ്തകത്തെ പരിഗണിച്ചാല്‍ മതി. ( പാഠപുസ്തക ഭാഷ, അവതരണരീതി ഇതൊന്നും സാധാരണകുട്ടികളെ കണ്ടുകൊണ്ടല്ലെന്ന് അനുഭവം)

നിരന്തര വിലയിരുത്തല്‍ രീതി

വിലയിരുത്തലില്‍ വ്യത്യസ്തമായ സമീപനം, ജനാധിപത്യപരം. എന്താണെന്നു നോക്കുക

ഓരോ ആഴ്ചയിലെയും പിരീയഡുകള്‍ കഴിഞ്ഞാല്‍ ഉച്ചനേരം അതത് ക്ലാസുകളിലെ കുട്ടികള്‍ കൂട്ടങ്ങളാകും. ഓരോ ഗ്രൂപ്പിനും ഓരോ ലീഡര്‍. രാജന്‍മാഷ് പഠിപ്പിച്ച കാര്യങ്ങള്‍ എല്ലാവര്‍ക്കും എത്രത്തോളം മനസിലായി എന്നു വിലയിരുത്തലാണ് നടക്കുക. ചിലത് പരസ്പരം വിശദീകരിക്കുന്നതിലൂടെ വ്യക്തമാകും. മനസിലാകാത്ത ആശയങ്ങള്‍, മനസിലാകാത്ത കുട്ടികള്‍ ഇവ സംബന്ധിച്ച ഒരു റിപ്പോര്‍ട്ട് ലീഡര്‍മാര്‍ അധ്യാപകന് കൈമാറും. പൊതുവായി മനസിലാകാത്തവ ഉണ്ടെങ്കില്‍ പുതിയ പ്രവര്‍ത്തനം നല്‍കി അതു പരിഹരിക്കും. മനസിലാകാത്ത കുട്ടികളെ പ്രത്യേകം വിളിച്ച് അവരുമായി ഒന്നിച്ച് ചിന്തിക്കല്‍ നടത്തി അവരെ ആ തടസ്സങ്ങള്‍ മറികടക്കാന്‍ സഹായിക്കും.

യൂണിറ്റ് പരീക്ഷയുടെ ഉത്തരക്കടലാസ് പരിശോധനയ്ക്ക് മൂന്നു ഘട്ടങ്ങളുണ്ട്.

പ്രതിഫലനാത്മക കുറിപ്പിന്റെ വരവു വഴി എങ്ങനെ?

അവധിക്കാല പരിശീലനത്തില്‍ പ്രതിഫലനാത്മക കുറിപ്പിനെകുറിച്ച് പറഞ്ഞു.( ഒരു ക്ലസറ്ററ്‍ പരിശീലനം വരുന്നു. ആ മോഡ്യൂള്‍ നോക്കി. അനുഭവത്തിന്റെ പിന്‍ബലമില്ലാതെ ഇപ്പോഴും പറയുന്നു! സ്വന്തം ക്ലാസില്‍ 'പഠിപ്പിച്ച' ആര്‍ പി മാരാണോ മോഡ്യൂള്‍ തയ്യാറാക്കുന്നത്? അവരെന്തു കൊണ്ട് ഉദാഹരണം വെച്ചില്ല?)അതെന്തുമാകട്ടെ..

പ്രതിഫലനാത്മക കുറിപ്പ് എഴുതല്‍ യാന്ത്രികമായ ഒന്നല്ല

അതിന് അതിന്റേതായ വഴിയുണ്ട്

• പഠനലക്ഷ്യത്തിലെ കൃത്യത
• പഠനപ്രക്രിയയിലെ സൂക്ഷ്മത ( ഈ വാക്ക് സൂക്ഷ്മതയില്ലാതെ ഉപയോഗിക്കുത്)
• വിലയിരുത്തില്‍ പേജിലെ അക്കാദമിക ഉള്‍ക്കാഴ്ചയുടെ പ്രതിഫലനം

ഇത്രയും ഉണ്ടെങ്കില്‍ പ്രതിഫലനാത്മകകുറിപ്പ് താനേ വരും.

കഴിഞ്ഞ ലക്കങ്ങളില്‍ പങ്കു വെച്ച ട്രൈ ഔട്ട് അനുഭവങ്ങളെ വിലയിരുത്തല്‍ പേജിലെ കുറിപ്പിന്റേയും പ്രതിഫലനാത്മക കുറിപ്പിന്റേയും തലത്തില്‍ നിന്ന് പരിശോധിക്കുകയാണിവിടെ (2.നാലാം ക്ലാസില്‍ കുട്ടികളോടൊത്ത് -നല്ലൊരു അനുഭവ പാഠം.

1.എന്റെ ടീച്ചിംഗ് മാന്വലും വിലയിരുത്തല്‍ പേജും )

പവര്‍പോയ്ന്റ് പ്രസന്റേഷന്‍ ആഗ്രഹിക്കുന്നവരുടെ സൗകര്യം പരിഗണിച്ചാണ് ഈ രീതിയില്‍ പോസറ്റ് ചെയ്യുന്നത്.

 ആത്മാര്‍ഥതയില്ലാത്ത അധ്യാപകര്‍ പ്രതിഫലനാത്മക കുറിപ്പെഴുതില്ല. അവരെ നിര്‍ബന്ധിക്കരുത്
അക്കാദമിക ധാരണയില്ലാത്തവരും എഴുതില്ല. അവരോടൊപ്പം നിന്ന് സഹായിക്കണം

ഇങ്ങനെയായിരുന്നു ആദ്യ യൂണിറ്റ് ടെസ്റ്റ് (നിരന്തരവിലയിരുത്തല്‍ -ആനുഭവം)

അവധിക്കാല അധ്യാപക പരിശീലനത്തില്‍ അധ്യാപകരോട് നിരന്തര വിലയരുത്തല്‍ നടത്തണം, കുട്ടികളുടെ നോട്ട് ബുക്ക് സമഗ്രമാക്കണം,പ്രതികരണപ്പേജെഴുതണം,പ്രതിഫലനക്കുറിപ്പു തയ്യാറാക്കാണം,യൂണിറ്റ് ടെസ്ററ് നടത്തണം എന്നൊക്കെ പറ‍ഞ്ഞു. പറയാനെളുപ്പമാണ്.അതിന്റെ പ്രായോഗികത സ്വയം പരിശോധിക്കാതെ അധ്യാപകരോട് ഇക്കാര്യം സംസാരിക്കുന്നതില്‍ അര്‍ഥമില്ല

എനിക്ക് ടി ടി സി ക്ലാസാണ് ഉളളത് ( ഡി എഡ് എന്ന പുതിയ പേര്)

പഠിപ്പിക്കേണ്ട പേപ്പര്‍ -വിദ്യാഭ്യാസത്തിന്റെ ചരിത്രപരവും സാമൂഹികവും ദാര്‍ശനികവുമായ അടിത്തറ.

ഒന്നാം യൂണിറ്റ് വിദ്യാഭ്യാസസമൂഹശാസ്ത്രമായിരുന്നു. അധ്യാപകരോട് പറഞ്ഞതൊക്കെ എനി്ക്കും ബാധകമാണല്ലോ. അതിന്റെ അനുഭവം പങ്കിടാം.

നടത്തിയ പഠനപ്രവര്‍ത്തനങ്ങള്‍

• റോള്‍ പ്ലേ
  
  
  
• പുസ്തക റിവ്യൂ
• ചര്‍ച്ച
• ഫിലിം ക്ലിപ്പിംഗ് വിശകലനം
• റഫറന്‍സ് ചാര്‍ട്ട്
• ആശയഭൂപട നിര്‍മാണം
• പത്രവാര്‍ത്തകളുടെ വിശകലനം
• സ്വാനുഭവ വിശകലനം
• ബന്ധച്ചാര്‍ട്ട്
• അസൈന്‍മെന്റ്
• ഇന്റര്‍ നെറ്റില്‍ നിന്നും വിവരം ശേഖരിക്കല്‍
• സംവാദം
  
  
  
• 
  

ഓരോ പ്രവര്‍ത്തനവും വിദ്യാഭ്യാസ സമൂഹശാസ്ത്രത്തിലെ ഏതെങ്കിലും ആശയവുമായി ബന്ധപ്പെട്ടാണ് വിശകലനം ചെയ്തത്. വൈവിധ്യമുളള പഠന തന്ത്രങ്ങള്‍ അധ്യാപക വിദ്യാര്‍ഥികളെ പരിചയപ്പെടുത്തുക എന്നതും എന്റെ ലക്ഷ്യമായിരുന്നു.

നേരത്തേ ഈ അധ്യായം ഈ തന്ത്രങ്ങള്‍ ഉപയോഗിച്ച് പഠിപ്പിച്ച അനുഭവമില്ല. ഒരു ട്രൈ ഔട്ടാണെന്നു പറയാം. ഭൂരിപക്ഷം പ്രവര്‍ത്തനങ്ങളും വിജയം കണ്ടു. മാതൃഭൂമി വാരികയില്‍

സുള്‍ഫത്തെഴുതിയ ലേഖനം (യുണിഫോമുമായി ബന്ധപ്പെട്ടത്) കുട്ടികള്‍ ചര്‍ച്ച ചെയ്തത് സമൂഹത്തിന്റെ കാഴ്ചപ്പാടും വിദ്യാഭ്യാസവും തമ്മിലുളള ബന്ധം വിശകലനം ചെയ്യുന്നതിനു സഹായകമായി.ചില പോരായ്മകള്‍ സംഭവിച്ചിട്ടുണ്ട്.അസൈന്‍മെന്റ് നല്‍കിയപ്പോള്‍ എല്ലാവരും സഹായമില്ലാതെ ചെയ്യുമെന്നു കരുതി. അത് അവരുടെ രചനയെ ബാധിച്ചു.

നോട്ട് ബുക്കിന്റെ അവസ്ഥ

മുതിര്‍ന്ന കുട്ടികളായതിനാല്‍ തുടക്കത്തില്‍ വ്യക്തമായ നിര്‍ദ്ദേശം നല്‍കിയാല്‍ അവര്‍ മെച്ചപ്പെട്ട രീതിയില്‍ നോട്ടു ബുക്കില്‍ രേഖപ്പെടുത്തല്‍ നടത്തുമെന്നായിരുന്നു ഞാന്‍ കരുതിയത്. നാലു പ്രവര്‍ത്തനം കഴിഞ്ഞ് ഏതാനും ബുക്കുകള്‍ വിശകലനം ചെയ്തതില്‍ നിന്ന്

അപൂര്‍ണമായ തരത്തില്‍ രേഖപ്പെടുത്തുന്ന രീതി ശ്രദ്ധയില്‍ പെട്ടു. ഒരു വര്‍ക്കിന്റെ ഭാഗമായ രേഖപ്പെടുത്തലുകള്‍ പൂര്‍ത്തീകരിക്കാന്‍ രണ്ടോ മൂന്നോ ദിവസം വേണ്ടിവരും.പ്രത്യേകിച്ച് റഫര്‍ ചെയ്തെഴുതുന്നതിന്. അതിനിടയ്ക്ക പുതിയ പ്രവര്‍ത്തനം കയറി വരും.അതു കൊണ്ടു തന്നെ രേഖപ്പെടുത്തലിന് തുടര്‍ച്ചയില്ലാതെ വന്നു.

എല്ലാമുണ്ട്, ചിതറിക്കിടക്കുകയാണെന്നു മാത്രം. ഇത് മുന്‍കൂട്ടിക്കാണാന്‍ കഴിഞ്ഞില്ല.(അധ്യാപകന്റെ പ്രശ്നമായി ഇതിനെ കാണണം) തുടര്‍ന്നുളള രേഖപ്പെടുത്തലിനായി കുട്ടികള്‍ക്ക് മൂന്നു തരത്തിലുളള ഫീഡ് ബാക്ക് നല്‍കി.

• ഒന്ന് ഇതുവരെ ചര്‍ച്ച ചെയ്ത കാര്യങ്ങളിലെ ഉളളടക്ക സൂചനകള്‍ (ശീര്‍ഷകങ്ങളും ഉപശീര്‍ശകങ്ങളും ) സംഗ്രഹം എന്ന പേരില്‍ ടൈപ്പ് ചെയ്ത് ക്ലാസില്‍ പ്രദര്‍ശിപ്പിച്ചു.
• ഒന്നൊന്നര പേജ് തളളി അടുത്ത പ്രവര്‍ത്തനം എഴുതാനും മുറിഞ്ഞു മുറിഞ്ഞുളള രേഖപ്പെടുത്തല്‍ സന്ദര്‍ഭം വന്നാല്‍ മാസികകളിലും മറ്റും കാണുന്നതു പോലെ -പേജില്‍ തുടരുന്നു,- പേജിന്റെ തുടര്‍ച്ച എന്നിങ്ങനെ എഴുതാനും ധാരണയായി.
• ക്രയോണ്‍സ് ഉപയോഗിച്ച് ശീര്‍ഷകങ്ങള്‍ക്കും ഉപശീര്‍ഷകങ്ങള്‍ക്കും നിറപശ്ചാത്തലം നല്‍കുന്ന വിധം കാണിച്ചുകൊടുത്തു. ഇത് ആശയ ക്രമീകരണത്തെ സ്വാധീനിച്ചു.ബുക്കില്‍ കൃത്യമായ മാര്‍ജിനും ബോക്സും രേഖപ്പെടുത്തല്‍ ഭംഗിയും ഉണ്ടായി.

എല്ലാവരുടേയും നോട്ട് ബുക്ക് സമഗ്രവും ആകര്‍ഷകവുമാക്കാന്‍ അവര്‍ ശ്രമമാരംഭിച്ചു. മാസാവസാനം എല്ലാവരുടേയും ബുക്കുകള്‍ ഞാന്‍ വിലയിരുത്തി. കുട്ടികള്‍ സൂക്ഷിക്കുന്ന അധ്യാപകന്റെ ബുക്ക് എന്ന വിശേഷണമാണ് അവരുടെ ബുക്കുകള്‍ക്ക് നല്‍കിയത്. എല്ലാവരുടേയും ആദ്യയൂണിറ്റിന്റെ രേഖപ്പെടുത്തലില്‍ വിട്ടു പോയത് ചൂണ്ടിക്കാട്ടി നിര്‍ദ്ദേശങ്ങള്‍ സഹിതവും ആവശ്യമായ സന്ദര്‍ഭങ്ങളില്‍ ചിലകാര്യങ്ങള്‍ എഴുതി മാതൃക നല്‍കിയുമുളള ഫീഡ് ബാക്കാണ്അവരുടെ ബുക്കില്‍ ഞാന്‍ കുറിച്ചത്. ഓരോ വിദ്യാര്‍ഥിയുടേയും ബുക്കില്‍ ഒരു പേജ് ഫീഡ് ബാക്കെഴുതാന്‍ ഉപയോഗിച്ചു.ബുക്കിലെ രേഖപ്പെടുത്തലിനു സ്കോറും നല്‍കി. ഉദ്ദേശിച്ചതിനേക്കാല്‍ കൂടുതല്‍ സമയം നോട്ട് ബുക്ക് വിശകലനത്തിനു വേണ്ടി വന്നു. എല്ലാവരും എഴുതിയതെല്ലാം സൂക്ഷ്മമായി വായിച്ചു. ഇരുപത് മുപ്പത് മിനിറ്റ് ഒരു ബുക്കിനു വേണ്ടി വന്നു. ഒരു മാസത്തെ രേഖപ്പെടുത്തല്‍ ഒന്നിച്ചു നോക്കുന്നതുമൂലമാണ് ഇത്രയും സമയം വേണ്ടിവന്നത്. (അടുത്ത മാസം രണ്ടു തവണയായി ബുക്ക് വിശകലനം ചെയ്യണം). കൊച്ചുകുട്ടികളുടെ നോട്ട് ബുക്ക് സമഗ്രമാക്കാന്‍ അധ്യാപിക കൂടുതല്‍ അധ്വാനിക്കേണ്ടി വരും. എനിക്കു തോന്നുന്നു അധ്യാപിക സമാന്തര നോട്ട് ബുക്ക് തയ്യാറാക്കി മാതൃക ഒരു (യൂണിറ്റിന്റെയെങ്കിലും) കാണിക്കുന്നത് നന്നാകുമെന്ന്.

യൂണിറ്റ് ടെസ്റ്റ്

ജൂണ്‍ മാസം ആദ്യം കലണ്ടര്‍ വെച്ച് ആകെ യൂണിറ്റിനു വേണ്ട സമയവും ഓരോ ആഴ്ചയിലും തീരേണ്ട ഭാഗവും സംബന്ധിച്ച് കുട്ടികളുമായി ധാരണയിലെത്തിയിരുന്നു. അതു പ്രകാരമുളള 'ഉളളടക്ക വിന്യാസ സമയപട്ടിക "ക്ലാസില്‍ പ്രദര്‍ശിപ്പിച്ചു. തീയതി വെച്ച് പ്രവര്‍ത്തനം എഴുതാനും അധ്യാപകന്‍ വരാത്ത ദിവസവും നഷ്ടപ്പെട്ട സാധ്യായ മണിക്കൂറും രേഖപ്പെടുത്താനും നിര്‍ദ്ദേശിച്ചു.( എന്റെ പ്രവര്‍ത്തനം ചിട്ടപ്പെടുത്താനുളള ബോധപൂര്‍വമായ ശ്രമമായിരുന്നു ഇത്.)ഏതെങ്കിലും ദിവസം പീരിയഡ് നഷ്ടപ്പെട്ടാല്‍ അത് ആ ആഴ്ചയില്‍ തന്നെ കോമ്പന്‍സേറ്റ് ചെയ്തതു കാരണം ഓരോ ആഴ്ചയിലും കൃത്യമായ മണിക്കൂറുകള്‍ കണ്ടെത്താന്‍ കഴിഞ്ഞു.തീരുമാനിച്ച ദിവസം തന്നെ യൂണിറ്റ് ടെസ്റ്റും നടത്തി.

ചോദ്യങ്ങള്‍ കുട്ടികള്‍ തയ്യാറാക്കുന്നു

യൂണിറ്റ് ടെസ്റ്റ് അധ്യാപകന്‍ നടത്തണമോ അതോ നിങ്ങളിലുളള ആരെങ്കിലും നടത്തിയാല്‍ മതിയോ എന്ന ചോദ്യത്തിന് അവര്‍ തന്നെ ചോദ്യം ഉണ്ടാക്കാമെന്ന മറുപടിയാണ് ലഭിച്ചത്. ആര്യ, സ്റ്റെഫി, അനില എന്നിവര്‍ ചോദ്യങ്ങള്‍ രഹസ്യസ്വഭാവം നിലനിറുത്തി തയ്യാറാക്കാമെന്നേറ്റു. അവര്‍ മൂവരും പരസ്പരം ആലോചിക്കാതെ തയ്യാറാക്കിയ ചോദ്യങ്ങള്‍ ഞാനുമായി ചര്‍ച്ച ചെയ്തു. ചില ഭേദഗതികള്‍ നിര്‍ദ്ദേശിച്ചു.ഉത്തര സൂചികയും അവര്‍ തയ്യാറാക്കണമായരുന്നു. പരീക്ഷ ഗംഭീരമായി.ചോദ്യകര്‍ത്താക്കള്‍ക്ക് യൂണിറ്റ് ടെസ്റ്റ് വേണ്ടേ? എന്ന ചോദ്യമുണ്ടായി. അല്പം ക്ഷമിക്കാനാണ് അവരോടു പറഞ്ഞത്.തുടര്‍ന്നുളളത് ആ സംശയത്തെ പരിഹരിച്ചു

പരീക്ഷയ്ക്കുത്തരം വീട്ടിലിരുന്നമെഴുതാനവസരമുളള പുതിയ ചോദ്യങ്ങള്‍

നാല്പതു സ്കോറിന്റെ ചോദ്യങ്ങളാണ് ആര്യ, സ്റ്റെഫി, അനില എന്നിവര്‍ യൂണിറ്റ് ടെസ്റ്റിനായി തയ്യാറാക്കിയത്. അമ്പതു സ്കോറിന്റെ പരീക്ഷയാണെന്നും ബാക്കി ചോദ്യങ്ങള്‍ അധ്യാപകന്‍ ഇടുമെന്നും പറഞ്ഞു. ആ പത്തു സ്കോറിന്റെ ചോദ്യങ്ങള്‍ പുതിയ രീതിയിലുളളതായിരുന്നു.

അവ ചുവടെ ചേര്‍ക്കുന്നു

1. സ്വന്തം പഠനത്തെക്കുറിച്ച് യൂണിറ്റ് ടെസ്റ്റ് എഴുതിയപ്പോഴുളള തിരിച്ചറിവ് എന്താണ്? നാലു വാക്യത്തില്‍ വ്യക്തമാക്കുക
2. ചോദ്യങ്ങള്‍ തയ്യാറാക്കിയത് സ്റ്റെഫിയും ആര്യയുമാണ്. അവരുടെ ചോദ്യങ്ങളെ വിലയിരുത്തി മൂന്നു വാക്യം എഴുതുക
3. സ്റ്റെഫി, ആര്യ ,അനില എന്നിവരെ വിലയിരുത്താനായി മൂന്നു നല്ല ചോദ്യങ്ങള്‍ പ്രത്യേക ഷീററില്‍ തയ്യാറാക്കുക.അതിന്റെ ഉത്തര സൂചികയും ( യൂണിറ്റ് ടെസ്റ്റിലെ ചോദ്യങ്ങള്‍ ആവര്‍ത്തിക്കരുത്)

വീട്ടില്‍ വെച്ച് വ്യക്തിഗതമായി ഉത്തരമെഴുതാനാണ് ആവശ്യപ്പെട്ടത്. കുട്ടികള്‍ നല്ല ചോദ്യങ്ങളും ഉത്തര സൂചികയും തയ്യാറാക്കി വന്നു. (ഇതിനായി അവര്‍ നോട്ട് ബുക്കിലെ രേഖപ്പെടുത്തലുകള്‍ പല തവണ വിശകലനം ചെയ്തിട്ടുണ്ടാകും.അതൊരു പഠനമാണ്. ഉത്തര സൂചികതയ്യാറാക്കലും പ്രധാനമാണ്.) ചോദ്യമുണ്ടാക്കുക പരീക്ഷയായി മാറി.സ്വയം വിലയിരുത്താനും ചോദ്യത്തെ വിലയിരുത്താനുമുളള ശേഷിയും കണ്ടെത്താനായി.

ഡബിള്‍ മൂല്യനിര്‍ണയം

ഉത്തരക്കടലാസുകള്‍ ആരു പരിശോധിക്കും? കുട്ടികളെ ആറു പേരുളള ഗ്രൂപ്പാക്കി. ഒരു ഗ്രൂപ്പിലെ അംഗങ്ങളുടെ ഉത്തരക്കടലാസുകള്‍ അടുത്ത ഗ്രൂപ്പിനു കൈമാറി. ഇങ്ങനെ പരസ്പരം കൈമാറിയ ഉത്തരക്കടലാസുകള്‍ പരിശോധിക്കുന്ന രീതി അവതരിപ്പിച്ചു.അതിങ്ങനെയായിരുന്നു

• ഒരാള്‍ ഒരു ഉത്തരം വായിക്കും അതേ ചോദ്യത്തിനു മററുളള കുട്ടികള്‍ എഴുതിയ ഉത്തരവും തുടര്‍ന്ന് വായിക്കണം.
• ഏതാണ് മികച്ച രീതിയില്‍ എഴുതിയ ഉത്തരം എന്നു കണ്ടെത്തണം. ആ ഉത്തരത്തില്‍ ഇനിയുമെന്തെങ്കിലും കൂട്ടിച്ചേര്‍ക്കാനുണ്ടോ എന്നു പരിശോധിക്കണം.(മററുളളവരുടെ ഉത്തരവും നിങ്ങളുടെ അറിവും പ്രയോജനപ്പെടുത്താം) എത്ര സ്കോര്‍ നല്‍കാമെന്നു തീരുമാനിക്കണം.ആ കുട്ടിക്ക് നല്‍കേണ്ട നിര്‍ദ്ദേശം മാര്‍ജിനില്‍ കുറിക്കണം
• ഇതേ പോലെ മറ്റുളളവരുടെ ഉത്തരത്തിനും സ്കോറ്‍ നല്‍കുകയും ഫീഡ് ബാക്ക് കുറിക്കുകയും വേണം.
• അവ്യക്തതയോ സംശയമോ തര്‍ക്കമോ വന്നാല്‍ അധ്യാകന്റെ സഹായം തേടണം

പ്രതീക്ഷിച്ചതിലും വിജയമായിരുന്നു ഈ പ്രവര്‍ത്തനം മറ്റുളളവരുടെ ഉത്തരം വിശകലനം ചെയ്ത് നിര്‍ദ്ദേശം കുറിക്കുക എന്നത് ഒരു പഠനപ്രക്രിയയായി മാറി. വിലയിരുത്തല്‍ പഠനമാകുന്ന പുതിയ സന്ദര്‍ഭം.താനെഴുതിയ ഉത്തരത്തിന്റെ പരിമിതികളെക്കുറിച്ച് മെച്ചത്തെക്കുറിച്ച് ആലോചിക്കാനും ഓരോരുത്തര്‍ക്കു ഇതവസരം നല്‍കി. സഹപാഠികളുടെ ഉത്തരക്കടലാസുകളുടെ മൂല്യനിര്‍ണയം സ്വയം വിലയിരുത്തല്‍ കൂടിയായി.ഗ്രൂപ്പ് വിലയിരുത്തല്‍ സാധ്യത യൂണിറ്റ് ടെസ്റ്റില്‍ പ്രയോഗിക്കപ്പെട്ടു. ഓരോ കുട്ടിയും തങ്ങള്‍ നോക്കിയ ഉത്തരക്കടലാസില്‍ ഒരു ചെറുകുറിപ്പുകൂടി (സ്വയം വിലയിരുത്തല്‍) എഴുതി.

പിന്നീട് കുട്ടികള്‍ എങ്ങനെ വിലയിരുത്തി എന്നറിയാനും ഉത്തരങ്ങളുടെ നിലവാരം മനസിലാക്കാനും ഞാന്‍ എല്ലാ ഉത്തരക്കടലാസുകളും പുനര്‍ മൂല്യനിര്‍ണയത്തിനു വിധേയമാക്കി. അത്ഭതമെന്നു പറയട്ടെ രണ്ടോ മൂന്നോ പേര്‍ക്ക് ഒന്നോ രണ്ടോ സ്കോര്‍ കൂടുകയോ കുറയുകയോ ചെയ്തതല്ലാതെ വലിയ വ്യത്യാസം ഉണ്ടായില്ല.കുട്ടികള്‍ക്ക് യൂണിറ്റിലെ ഉളളടക്കം സംബന്ധിച്ച് വ്യക്തത കൈവരിക്കാന്‍ഗ്രൂപ്പ് വിലയിരുത്തല്‍ സഹായകമായി എന്നാണ് ഇത് സൂചിപ്പിക്കുന്നത്.

പരീക്ഷയുടെ ഫീഡ് ബാക്ക്

ഉത്തരക്കടലാസ് വിശകലനം ചെയ്തപ്പോള്‍ കണ്ടെത്തിയ പ്രധാന കാര്യങ്ങള്‍ ഇവയായിരുന്നു

• എല്ലാവര്‍ക്കും ആശയം ഉണ്ട്.എന്നാല്‍ ആശയം എഴുതുമ്പോള്‍ ചിലര്‍ക്ക് കൃത്യത ഇല്ലാത്ത അവസ്ഥയുമുണ്ട്. (ഉദാഹരണങ്ങളോ തെളിവുകളോ നല്‍കി ഉത്തരമെഴുിതായാല്‍ പരിഹരിക്കാവുന്നതേയുളളൂ.ഓരോ ഉത്തരവും തനിമയുളളതാക്കുക എന്നതാണ് പ്രധാനം)
• എല്ലാവര്‍ക്കും മികവുകളും പരിമിതികളും ഉണ്ട്.(ഓരോ കുട്ടിക്കും ഫീഡ് ബാക്ക് അനിവാര്യം)
• ചോദ്യത്തിന് ആവശ്യത്തിലധികം നീട്ടി ഉത്തരമെഴുതുന്നവരുമുണ്ട് (സമയ നഷ്ടം, കൂടുതല്‍ സ്കോര്‍ കിട്ടുകയുമില്ല.)
• അപ്രസക്തമായസന്ദര്‍ഭത്തില്‍ ചില ആശയങ്ങള്‍ എഴുതുന്നു.സ്ഥാനം മാറ്റിയാല്‍ കൂടുതല്‍ മെച്ചപ്പെടും.
  ആശയക്രമീകരണം ശ്രദ്ധിക്കുന്നില്ല
• കൂടുതല്‍ സ്കോര്‍ നേടാവുന്ന ചോദ്യം സമയം കിട്ടാത്തതു മൂലം പൂര്‍ത്തീകരിക്കാനാകുന്നില്ല ( സമയമാനേജ്മെന്റ് പരിശീലിക്കണം.മുന്‍ഗണന നിശ്ചയിക്കലും)
• മറ്റൊരാള്‍ വായിച്ചാല്‍ ചില കാര്യങ്ങള്‍ വ്യക്തമാകുന്നില്ല. ( മറ്റൊരാള്‍ വായിക്കുന്നതായി സങ്കല്പിച്ച് ഉത്തരം ഒന്നു കൂടി വായിച്ചു നോക്കാമായിരുന്നു.)
• ആശയങ്ങളുടെ ആവര്‍ത്തനം സംഭവിക്കുന്നു.
• സ്കോര്‍ പരിഗണിച്ച് ആവശ്യമായ ആശയങ്ങള്‍ ഉള്‍പ്പെടുത്താത്തവരുണ്ട് ( ഇത്രയും മതി എന്നു നിശ്ചയിക്കുന്ന രീതി പുനപ്പരിശോധിക്കണം)
• ചിലരെങ്കിലും ചോദ്യം നന്നായി മനസിലാക്കുന്നില്ല. സൂചനകള്‍കണ്ട് ചോദ്യം തെറ്റിദ്ധരിച്ച് ഉത്തരമെഴുതുന്നു

രണ്ടു മൂന്ന് ടിപ് ആക്ടിവിറ്റികളിലൂടെയും ഉത്തരക്കടലാസില്‍ തന്നെ ഫീഡ് ബാക്ക് കുറിപ്പുകള്‍ (എന്റെ വകയും കൂടി എഴുതി) നല്‍കിയും അവര്‍ക്ക് തന്നെ ഈ പ്രശ്നങ്ങള്‍ പരിഹരിക്കാനാകുമെന്ന ധാരണയുണ്ടാക്കാനവസരമൊരുക്കി.

ഇനി അഭിമുഖരീതിയിലുളള പരീക്ഷയുണ്ട്. യൂണിറ്റ് ടെസ്റ്റ് തയ്യാറാക്കിയ കുട്ടികളോടുളള മറ്റുളളവരുടെ ചോദ്യങ്ങള്‍.ക്ലാസ് മൂന്നു ഗ്രൂപ്പാകും. ഓരോ ഗ്രൂപ്പിന്റെയും മുമ്പാകെ ആവര്‍ മൂവരും മാറി മാറി എത്തണം, അഭിമുഖ രീതിയില്‍ ഉളളടക്കധാരണ വ്യക്തമാക്കണം.അതും പരസ്പര പഠനത്തിന്റെ വേദിയാകും.

ഓരോരുത്തരുമായി സംസാരിച്ച് അവരില്‍ നിന്നും അധ്യയനത്തെക്കുറിച്ച് ഫീഡ് ബാക്ക് ശേഖരിക്കല്‍ അരംഭിച്ചു.ഒരു മാസാന്ത്യ പങ്കാളിത്ത അവനോകനം നടത്തുന്ന രീതി വികസിപ്പിക്കണം.

തിരിഞ്ഞു നോക്കുമ്പോള്‍ പൊതുവേ തൃപ്തി തോന്നുന്നു.എങ്കിലും കൂടുതല്‍ മെച്ചപ്പെടുത്താനാകും. അടുത്ത യൂണിറ്റ് വ്യത്യസ്തവും സൂക്ഷ്മമാസൂത്രണത്തിന്റെ സ്വാധീനമുളളതുമായിരിക്കും.

......................................................................................

അനബന്ധം

.....................................................................................

1.തത്സമയ വിലയിരുത്തല്‍ കുറേ മുന്നോട്ടു പോയി. ഓരോരുത്തരേയും കുറിച്ച് ലാപ് ടോപ്പില്‍ ചെറു വിലയിരുത്തല്‍ കുറിപ്പുകള്‍ എഴുതി. ചിലര്‍ക്ക് മെച്ചപ്പെടാനവസരം ഒരുക്കി.സഹായമേഖലകള്‍ കണ്ടെത്താനുളള ശ്രമം പ്രധാനമാണെന്നു മനസിലായി. 

2.പരീക്ഷയ്ക്കു ശേഷം സിനിമ

യൂണിറ്റ് കഴിഞ്ഞപ്പോള്‍ അവരെ സിനിമ കാണിച്ചു. ചില്‍ഡ്രന്‍ ഓഫ് ഹെവന്‍.ഈ ഇറാനിയന്‍ പടം അധ്യാപകവിദ്യാര്‍ഥികള്‍ കാണേണ്ടതുണ്ട്. അധ്യാപകരുടെ സമീപനവും വിദ്യാര്‍ഥികളുടെ പ്രശ്നങ്ങളും അതിലുളളതിനാല്‍ വേറിട്ട കാഴ്ചയ്ക്കും സാധ്യത. മികച്ച ഇത്തരം ദൃശ്യപാഠങ്ങള്‍ (visual text) പാഠ്യപദ്ധതിയുടെ ഭാഗമാകണമായിരുന്നു.

ഇതുപോലെ നല്ല സിനിമകള്‍ കാണണമെന്നവര്‍ ആഗ്രഹിക്കുന്നു.

.................................................................

3.എന്റെ പ്രതിഫലനാത്മക ചിന്തകള്‍ ഈ അനുഭവക്കുറിപ്പിലുണ്ട്.

എന്താണ് എസ് ആര്‍ജിയിലേക്ക് പങ്കുവെക്കേണ്ടത് തീരുമാനിക്കാമല്ലോ

............................................................................

4.യൂണിറ്റ് ടെസ്റ്റ് -പരസ്പരം വിലയിരുത്തല്‍ സന്ദര്‍ഭമാക്കിയ (ഉത്തരക്കടലാസുകള്‍ പരസ്പരം കൈമാറി പരിശോധിച്ച് കുറിപ്പെഴുതുന്ന രീതി ) മോഹനനന്‍മാഷിന്റെ അനുഭവം ഞാന്‍ പ്രയോജനപ്പെടുത്തിയിട്ടുണ്ട്. അദ്ദേഹത്തോടുളള കടപ്പാട് സൂചിപ്പിക്കുന്നു.