ശിവതാര ടീച്ചറും പ്രതിദിന ക്ലാസ് വാട്സാപ്പ് കുറിപ്പുകളും

കൊല്ലം ജില്ലയിലെ ഇഞ്ചക്കാട് സ്കൂളിലെ ഒന്നാം ക്ലാസ് അധ്യാപികയായ ശിവതാര 2024-25 വർഷം ക്ലാസ് വാട്സാപ്പ് ഗ്രൂപ്പിനെ പ്രയോജനപ്പെടുത്തുന്നതിൽ ഒരു മാതൃക വികസിപ്പിക്കുകയുണ്ടായി. ടീച്ചറുടെ കുറിപ്പ് വായിക്കാം

"രക്ഷിതാക്കളുടെ പിന്തുണക്കുറവ് ഒരു വലിയ പ്രശ്നമായി കഴിഞ്ഞതിന്റെ മുൻ വർഷം അധ്യാപകർ പറഞ്ഞറിഞ്ഞിരുന്നു.

കഴിഞ്ഞ വർഷം ഒന്നാം ക്ലാസ്സ്‌ സ്വീകരിക്കുമ്പോൾ തന്നെ എന്റെ മനസ്സിൽ പ്രഥമ പരിഗണന എന്റെ രക്ഷിതാക്കളെ എല്ലാവരെയും ഒപ്പം നിർത്താൻ വേണ്ടത് ആദ്യം മുതൽ തന്നെ ചെയ്യുക എന്നതായിരുന്നു.

അതിന് ക്ലാസ്സ്‌ PTA യിൽ കാര്യങ്ങൾ വിശദമായി തന്നെ പറഞ്ഞു.

മുൻ വർഷത്തെ തെളിവ് കാണിക്കാൻ എനിക്ക് ഒന്നാം ക്ലാസ്സ്‌ അല്ലാതിരുന്നത് കൊണ്ട് ഒന്നും തന്നെ ഇല്ലാരുന്നു. പകരം സൈജ ടീച്ചറിന്റെ മഹാദേവിന്റെ പുസ്തകവും അന്നത്തെ ഗ്രൂപ്പിൽ നിന്ന് കിട്ടിയ കുറച്ചു തെളിവുകളുമൊക്കെ കാണിക്കുകയും ചെയ്തു. ലക്ഷ്യവും പ്രവർത്തനങ്ങളും ഒക്കെ വിശദീകരിക്കുകയും ചെയ്തു.  

എന്നാലും അതൊന്നും പോരായിരുന്നു.

കാരണം നിറയെ എഴുതിക്കൂട്ടിയ ബുക്കൊക്കെ നോക്കിയിരിക്കുന്ന രക്ഷിതാക്കളോട് ഇന്നവിടെ കളിയായിരുന്നു എന്ന് വൈകുന്നേരം പറയുന്ന കുട്ടിയെ ഒന്ന് രണ്ട് ദിവസങ്ങൾ രക്ഷിതാക്കൾ കേൾക്കും. പിന്നെ അവർ ചിന്തിക്കില്ലേ. 🤔

താഴെത്താഴെ വാക്കുകളൊക്കെ എഴുതി ചറ പറ ഹോംവർക്ക് ചെയ്യുന്ന  അടുത്തുള്ള unaided സ്കൂളിലെ കുട്ടിയെയും ഇന്ന് ചാടിക്കളിച്ചു പാട്ടുപാടി എന്നൊക്കെ പറയുന്ന സ്വന്തം കുട്ടിയെയും താരതമ്യം ചെയ്യുമ്പോൾ നമ്മുടെ സ്വപ്നത്തിലുള്ള വർഷാന്ത്യലക്ഷ്യത്തെക്കുറിച്ചൊന്നുമാകില്ല അവരുടെ ചിന്ത.

ഇതൊക്കെ ഞാനോർത്തു.

എന്നിട്ട് 

 " നമ്മൾ ചെയ്യുന്ന ഓരോ പ്രവർത്തനങ്ങളുടെയും പിന്നിലുള്ള ലക്ഷ്യം എന്താണ് എന്ന് നമ്മൾ അറിയുന്നതുപോലെ അവരും അറിയുക."

 ഇതാണ് എനിക്ക് അപ്പോൾ തോന്നിയ സൊല്യൂഷൻ.

 തവളച്ചാട്ടവും പൂച്ചയെ നിർമ്മാണവും ഒക്കെ വെറും സമയം പോക്കാനുള്ള കളികൾ അല്ലെന്നും അതിന് പിന്നിലെ കൃത്യമായ ലക്ഷ്യങ്ങൾ എന്തെന്നും  ബോധ്യപ്പെടുത്താൻ വേണ്ടിയാണ് ഈ സന്നദ്ധ പ്രവർത്തനങ്ങൾ മുതൽ ഇങ്ങനെ ടൈപ്പ് ചെയ്തിട്ടത്.

 ഇതിനു മുന്നേ നടന്ന നിർമ്മാണ ശില്പശാലയിൽ ഒക്കെ പങ്കാളിത്തം കുറവായിരുന്നു. എങ്കിലും ആ ശില്പശാല തങ്ങളുടെ  കുട്ടിയുടെ പഠനത്തിന് പ്രധാനപ്പെട്ടതാണെന്ന് വ്യക്തമാകും വിധം അതിനെക്കുറിച്ചും കുറിപ്പിട്ടിരുന്നു.

ഇതൊന്നും അത്ര വായിക്കാത്ത രക്ഷിതാക്കളും ഒക്കെ ഉണ്ടായിരുന്നു.

അത് ഉണ്ടാകുമെന്നും എനിക്കറിയാമായിരുന്നു.

 എങ്കിലും ഞാൻ ഓർത്തത്  ഇങ്ങനെയായിരുന്നു.

🔸 ആദ്യ മാസങ്ങളിളൊക്കെ എന്തായാലും  എന്താണീ ക്ലാസിൽ നടക്കുന്നത് ഗ്രൂപ്പിൽ നടക്കുന്നത് എന്നൊക്കെ രക്ഷിതാക്കൾ നോക്കും.

ആ അവസരം പ്രയോജനപ്പെടുത്തുക.

 അതുകൊണ്ട് ആ സമയം തന്നെ ഇത്തരം കുറിപ്പുകളിലൂടെ  ഒന്നാം ക്ലാസ്സ്‌ അത്ര ചെറിയൊരു കാര്യമല്ലെന്നും  രക്ഷിതാവും ടീച്ചറും ഒത്തുചേർന്നു കൊണ്ടുപോകേണ്ടതാണെന്നും, ഒക്കെ അവരിൽ ഉറപ്പിക്കണം.

🔸 എന്തായാലും ഇത് വായിക്കുന്ന കുറച്ചുപേരെങ്കിലും ഉണ്ടാകും.  ഒരേ നാട്ടുകാരായതിനാൽ അവർ തമ്മിൽ ഇതെക്കുറിച്ചൊക്കെ സംസാരിക്കുകയും ചെയ്യും.

 അവിടെ പാട്ടും കളിയും മാത്രമേ ഉള്ളൂ എന്ന്  ഏതെങ്കിലും ഒരു രക്ഷിതാവ് പറയുമ്പോൾ വായിച്ചവർ പറഞ്ഞോളും അതിനു പിന്നിൽ നിന്ന് കാര്യങ്ങൾ കൂടി ഉണ്ടെന്ന്..

( ഈ കാഴ്ചപ്പാട് സത്യമായി. അതുക്കും മേലെ എന്ന് പറയുന്നതുപോലെ കുറച്ചു നാൾ കഴിഞ്ഞപ്പോൾ അമ്മമാർ ചേർന്ന് ഒരു വാട്സ്ആപ്പ് കൂട്ടായ്മ പോലും ഉണ്ടാക്കിയിട്ടുണ്ടായിരുന്നു എന്ന് വർഷാവസാനമാണ് ഞാൻ അറിയുന്നത്😇)

 🔸നമ്മൾ വീഡിയോ കൂടി ഇടുന്നതിനാൽ  അവരവരുടെ കുട്ടിയെ കാണാൻ അവർ ശ്രദ്ധിക്കുകയും ചെയ്യും.

🔸 ഇനി ഇതൊക്കെ കണ്ടിട്ടും ഇതൊന്നും എന്നെ ബാധിക്കുന്ന കാര്യമേ അല്ല എന്ന് കരുതിയിരുന്ന ഒരു രക്ഷിതാവും എനിക്കുണ്ടായിരുന്നു. അവരെ നിരന്തരം വിളിക്കുക പേർസണൽ msg, ഇടുക ഇതൊക്കെ ചെയ്തു പോന്നു.

ഇനി

ഈ ലക്ഷ്യങ്ങൾ അവരെ ബോധ്യപ്പെടുത്തുമ്പോൾ തങ്ങളുടെ കുട്ടി ഇത് നേടിയിട്ടുണ്ടോ എന്ന് അവർക്ക് തന്നെ വിലയിരുത്താനും കഴിയും.

 നമ്മുടെ പഠനപ്രവർത്തനങ്ങൾ എങ്ങനെയാണ് പോകുന്നത് എന്ന രീതിയും അവർക്ക് മനസ്സിലാകും.

 പിന്നെ എനിക്ക് അനുഭവപ്പെട്ട മറ്റൊരു കാര്യം ടീച്ചർ ചെയ്യുന്ന ഓരോ കാര്യങ്ങളുടെയും പിന്നിൽ എന്തെങ്കിലും ഉണ്ടാകും എന്നൊരു ചിന്ത രക്ഷിതാക്കളിൽ വളർന്നു. നമ്മളിലുള്ള ആ വിശ്വാസം തുടർന്നുള്ള വായനോത്സവ രചനോൽസവ, സംയുക്ത ഡയറിയെഴുത്ത് പ്രവർത്തനങ്ങൾക്കായി നമ്മൾ നൽകുന്ന നിർദ്ദേശങ്ങൾ കൃത്യമായി പാലിക്കണമെന്ന് അവരെ തോന്നിപ്പിച്ചു.

 നമ്മുടെ ലക്ഷ്യത്തിലേക്ക് എത്താൻ നമുക്ക് മറ്റു തടസ്സങ്ങൾ ഒന്നും പിന്നെ ഉണ്ടാവില്ല.

മുകളിൽ screenshot ഇട്ട ആ സന്നദ്ധതാ പ്രവർത്തനത്തിന്റെ msg മുതൽ എനിക്കൊപ്പം കൂടിയ രക്ഷിതാക്കൾ ഇപ്പോൾ ഒന്നാം ക്ലാസ്സ്‌ കഴിഞ്ഞിട്ടും വിട്ടു പോകാൻ മടിക്കുന്നു.

 വർഷാവസാനം  പുസ്തക പ്രകാശനത്തിനായി ഡയറികളുടെ സമാഹാരം ഞാൻ തയ്യാറാക്കിയപ്പോൾ കഥകളുടെ സമാഹാരം രക്ഷിതാക്കൾ ചേർന്നാണ് തയ്യാറാക്കിയത്. ഒരു കൂട്ടം രക്ഷിതാക്കൾ ചേർന്ന് സ്വയം ഏറ്റെടുത്ത് ആ കഥകൾ എനിക്ക് ടൈപ്പ് ചെയ്തിട്ട് തന്നു. ഞാൻ അതിലെ തെറ്റ് തിരുത്തി തിരിച്ചയച്ചു. പിന്നെ പുസ്തകമായി എന്റെ കയ്യിൽ കിട്ടി.🫂)

പാഠപുസ്തകം തീരാതെ വന്നപ്പോഴും വായനാ പാഠങ്ങളാണ് ബാക്കിയുള്ളവ എന്ന് അവസാനം പറഞ്ഞപ്പോഴുമൊന്നും ആരും ഒന്നും ചോദിച്ചില്ല. തങ്ങളുടെ കുട്ടികളുടെ സമഗ്ര വികാസത്തിന് വേണ്ടിയുള്ള കാര്യങ്ങൾ ടീച്ചർ ചെയ്യും എന്നൊരു വിശ്വാസം അവർക്കുണ്ട്.

ഒന്നാലോചിച്ചു നോക്കൂ.

 പാട്ടും കളിയും മാത്രമാണ് അവിടെ നടക്കുന്നതെന്ന് അവരുടെ ചിന്തകളിൽ വരുന്നതിനു മുന്നേ തന്നെ അതിന്റെ പിന്നിലെ ലക്ഷ്യങ്ങൾ അവരെ ബോധ്യപ്പെടുത്തിയത് കൊണ്ടല്ലേ അങ്ങനെ.

 അതുകൊണ്ട് എന്റെ അനുഭവത്തിൽ ആദ്യ പാഠങ്ങളിൽ എങ്കിലും ഇത്തരത്തിൽ പഠന ലക്ഷ്യങ്ങൾ ഉൾപ്പെടെ പ്രവർത്തനങ്ങൾ അവരവരുടെ രക്ഷിതാക്കൾക്ക് മനസ്സിലാകും വിധം

വാട്സ്ആപ്പ് ഗ്രൂപ്പിൽ ഷെയർ ചെയ്യുന്നത് നല്ലതായിരിക്കും ❤️

അനുബന്ധം - ക്ലാസ് വാട്സാപ്പ് ഗ്രൂപ്പിൽ പങ്കിട്ട 10 കുറിപ്പുകൾ

1: 

പ്രിയ രക്ഷിതാക്കളേ,❤️

പാഠപുസ്തകത്തിലേക്ക് പ്രവേശിക്കുന്നതിനു മുൻപ് നമ്മുടെ ക്ലാസ്സിൽ നടക്കുന്ന പ്രവർത്തനങ്ങൾ എന്താണ്?  എന്തിനാണ്?

എന്നതിനെക്കുറിച്ച് കുറിച്ച് ഒരു ചെറിയ വിശദീകരണം.

നമ്മുടെ കുഞ്ഞുങ്ങളെ സംബന്ധിച്ച് പുതിയ അധ്യാപിക, പുതിയ സമയക്രമം, പുതിയ സഹപാഠികൾ, പുതുമയുടെ ലോകമാണത്.

അപരിചിതത്വവും ഉണ്ട്. സമ്മർദ്ദമില്ലാതെ വിദ്യാലയത്തിൽ നിത്യവും എത്തേണ്ടതുണ്ട്.

അത് ആന്തരികപ്രചോദനഫലമായി ഉണ്ടാകണം.

അങ്ങനെ സംഭവിക്കണമെങ്കിൽ കുട്ടിയുടെ പ്രകൃതമറിഞ്ഞുള്ള പ്രവർത്തനാനുഭവങ്ങൾ  ക്ലാസിൽ ഉണ്ടാകണം. കുട്ടികൾക്ക് ഇഷ്ടപ്പെടുന്ന പ്രവർത്തനങ്ങൾ ഒരുക്കണം.❤️

2

 പ്രവർത്തനാസൂത്രണം, സമയമാനേജ്മെൻ്റ്, മെറ്റീരിയൽ മാനേജ്‌മെൻ്റ്, സ്ഥലവിന്യാസം, വ്യക്തിഗത പിന്തുണ, വിലയിരുത്തൽ തുടങ്ങിയ ബോധനശാസ്ത്രപരമായ പ്രക്രിയകളിൽ അധ്യാപകർ പുതിയ കുട്ടികളിൽ പ്രായോഗിക അനുഭവം ഉണ്ടാക്കുകയാണ്. തുടർന്നുള്ള അധ്യയനത്തിന് സഹായകമാകും

ഒന്നാംആഴ്ച കൊണ്ട് എല്ലാ കുട്ടികളും സന്നദ്ധതാ നിലയിൽ എത്തണമെന്നില്ല  രണ്ടാം ആഴ്‌ചയും തുടരണം. 

ഒറ്റയടിക്ക് നിർത്തുകയല്ല മറിച്ച് സന്നദ്ധതാപ്രവർത്തനങ്ങളും പാഠപുസ്‌തക പ്രവർത്തനങ്ങളും ഇടകലർത്തിയാണ് പിന്നീട് പാഠത്തിലേക്ക് പ്രവേശിക്കേണ്ടത്. 👍🏻

3

വൈകാരിക വികാസം, ഭാഷാവികാസം, ആരോഗ്യകായിക ചാലകവികാസം സാമൂഹിക സാംസ്‌കാരിക സർഗാത്മക വി കാസം എന്നിവ ഈ പ്രായത്തിൽ പ്രസക്തമാണ്. വികാസമേഖലകളും വിഷയങ്ങളും തമ്മിലുള്ള ബന്ധമുണ്ട്. 

വിവിധ വിഷയങ്ങൾ ഒന്നാം ക്ലാസിൽ ഉണ്ട്. മാതൃഭാഷ, ഗണിതം, ഇംഗ്ലീഷ്, പ്രവൃത്തി പരിചയം, കല, വിദ്യാഭ്യാസം, കായികവിദ്യാഭ്യാസം 

ഇവയെല്ലാം സന്നദ്ധതാപ്രവർത്തനങ്ങളുടെ ഭാഗമായും പരിചയപ്പെടുത്തും 

ഈ വിഷയങ്ങളോടുള്ള താല്‌പര്യം ജനിപ്പിക്കുന്നതിന് ഇത് വഴിയൊരുക്കും. 

ഓരോ വിഷയത്തിലും ആവശ്യം വേണ്ട പൂർവ്വനൈപുണികൾ ഉണ്ട്. ഉദാഹരണമായി അക്ഷരങ്ങൾ എഴുതുന്നതിനുമുമ്പ് കുട്ടിക്ക് സൂക്ഷ്മപേശീനിയന്ത്രണം ആവശ്യമാണ്. അത്തരം പൂർവ്വനൈപുണികൾ നേടുന്നതിനും സന്നദ്ധതാ പ്രവർത്തനം അവസരം ഒരുക്കുന്നു.

4

വൈവിധ്യം ഉള്ള പ്രവർത്തനങ്ങൾ ഒന്നാം ക്ലാസിൽ ഉടനീളം വേണം. പാഠ്യ പദ്ധതി ഇതനുസരിച്ചാണ് ചിട്ടപ്പെടുത്തിയിട്ടുള്ളത്.

വികാസമേഖലകളുമായി ബന്ധപ്പെട്ട അനുഭവ വിടവ് പരിഹരിക്കുന്നതിനാണ് സന്നദ്ധതാപ്രവർത്തനം. 

കുട്ടികൾ വ്യത്യസ്ത‌ത സാമൂഹിക സാഹചര്യങ്ങളിൽ നിന്നുമാണ് വരുന്നത് അവർ ടീച്ചറുമായി മാനസിക അടുപ്പം സ്ഥാപിച്ചാൽ മാത്രമേ പഠനലക്ഷ്യങ്ങളിലൂന്നിയുള്ള പഠനാനുഭവങ്ങൾ ആരംഭിക്കുമ്പോൾ കുട്ടികൾക്ക് പ്രവർത്തനങ്ങൾ പൂർണമായി ഏറ്റെടുക്കാൻ കഴിയൂ. ടിച്ചറും കുട്ടിയും തമ്മിലുള്ള ശക്തമായ സൗഹ്യദബന്ധം സ്ഥാപിക്കുന്നതിന് സന്നദ്ധതാ പ്രവർത്തനം സഹായിക്കും. 

കുട്ടികളെ നന്നായി മനസ്സിലാക്കേണ്ടതുണ്ട്.

സങ്കോചമുള്ളവർ, ഏത് പ്രവർത്തനങ്ങളിലും സജീവമായി ഇടപെടുന്നവർ, വിവിധങ്ങളായ കഴിവുകൾ (നേതൃത്വപാടവം, ആശയവിനിമശേഷി ഉള്ളവർ) എന്നിങ്ങനെ വ്യത്യസ്‌തമായിരിക്കും കുട്ടികൾ പരിമിതികൾ നേരിടുന്നവരും ഉണ്ടാകും. ഇവരെ മനസ്സിലാക്കി അനുയോജ്യമായ പിന്തുണനൽകി മുഖ്യധാരയിൽ നിലനിർത്തണം. സന്നദ്ധതാ പ്രവർത്തനങ്ങൾ ഈ ലക്ഷ്യവും നിറവേറ്റും.👍🏻

5

ഇന്ന് പാഠഭാഗത്തിലേക്ക് കടന്നു.

മലകടന്നു പുഴ കടന്നു വന്ന ദേശാടനക്കിളികളുടെ കഥയിലൂടെയാണ് പാഠഭാത്തേക്ക് പ്രവേശിച്ചത്.

വിവിധയിനം നാട്ടുകിളികളുടെ ശബ്ദം തിരിച്ചറിയുക.

അവയുടെ ശബ്ദം അനുകരിക്കാൻ കഴിയുക.

ചിത്രം കണ്ടാൽ തിരിച്ചറിയുക

എന്നീ പഠനലക്ഷ്യങ്ങൾ കുട്ടികളിലേക്ക് എത്തിക്കാൻ

സ്പീക്കർ ഉപയോഗിച്ച് പക്ഷികളുടെ ശബ്ദം മാത്രം കേൾപ്പിച്ചു കൊണ്ട് പക്ഷികളെ തിരിച്ചറിയുന്ന പ്രവർത്തനമാണ് സ്വീകരിച്ചത്.

കാക്ക,താറാവ്,കുയിൽ, മയിൽ, കുരുവി, മൈന, ഉപ്പൻ, തത്ത, പ്രാവ്,  

 ദൂരെനിന്ന് പറന്നു വരുന്ന പക്ഷികളാണ് കഥാപാത്രങ്ങൾ എന്ന് തിരിച്ചറിയാനും,  കുട്ടിയുടെ ശരീരചലന ശേഷി വികസനത്തിനുമായി പ്രയോജനപ്പെടുന്ന പ്രവർത്തനമായ പാട്ടിന്റെ അവതരണത്തിലൂടെ

ലേഖനപ്രക്രിയയിലേക്ക് കടന്നു.

ചിറകടിക്കുന്ന ശബ്ദം.

പട പട പട പട

അക്ഷരവടിവും വാക്കകലവും പാലിച്ചു കൊണ്ട് എഴുതുന്ന പ്രക്രിയയാണ് നിലവിൽ നടക്കുന്നത്.

6: 

പഠന ലക്ഷ്യങ്ങള്‍:

 വിവിധ കളികളിലൂടെ ആവശ്യാനുസരണമുള്ള ശാരീരിക ചലനം ഏകോപനം

 തീരുമാനമെടുക്കാനുള്ള കഴിവ് എന്നിവ നേടുന്നു.

 വിവിധ ജീവികളുടെ സഞ്ചാര രീതികള്‍ അനുകരികരിക്കുന്നു.

ഒട്ടകപ്പക്ഷി നടത്തമാണ് ഇതിനായി ചെയ്തത്.

തുടർന്ന്

 തന തന താന (എഴുത്തനുഭവം)

പഠനശേഷികള്‍:

 അംഗീകൃത രീതിയിൽ (അക്ഷരങ്ങളുടെ വലുപ്പം, ഘടന, ആലേഖന ക്രമം) അക്ഷരങ്ങള്‍ സഹായത്തോടെഎഴുതി വാക്കുകളും ചെറു വാക്യങ്ങളും പൂര്‍ത്തിയാക്കുന്നു. (ത, ന എന്നീ അക്ഷരങ്ങളും ആ, ഇ, ഉ എന്നീ സ്വരങ്ങളുടെ ചിഹ്നങ്ങളുമുള്ള പദങ്ങൾ, വാക്യങ്ങൾ, പാട്ടുകൾ എന്നിവ)

2. താളബോധത്തോടെ വരികൾ ചൊല്ലുന്നു

3. പാട്ടിനും ആശയത്തിനും താളാത്മകമായശബ്ദത്തിനും അനുസൃതമായി താളത്തിൽ ചുവടുവയ്ക്കുന്നു.

വായ്ത്താരി പാടി ചുവടുകൾ വച്ചു കൊണ്ട് രസകരമായി ആരംഭിച്ചു.

പിന്നെ ലേഖനപ്രക്രിയ യിലേക്ക് കടന്നു.

7

 ചിത്രപ്രദര്‍ശനം പരിസരപഠനം

പഠനലക്ഷ്യങ്ങള്‍:

ചുറ്റുപാടുമുള്ള പക്ഷികളെ നിരീക്ഷിച്ച് പ്രത്യേകതകള്‍ കണ്ടെത്തുന്നു. നിറങ്ങളുടെ അടിസ്ഥാനത്തില്‍ തരംതിരിക്കുന്നു.

 വസ്തുക്കള്‍, സംഭവങ്ങള്‍ എന്നിവയുമായി ബന്ധപ്പെട്ട പ്രധാനവിവരങ്ങള്‍ വാചികമായി അവതരിപ്പിക്കുന്നു.

 ( അവയെക്കുറിച്ച് സംസാരിക്കാനുള്ള കഴിവ് )

കാക്കയ്ക്കുണ്ടൊരു കുപ്പായം...

പക്ഷികളുടെ നിറങ്ങൾ സൂചിപ്പിച്ചു കൊണ്ടുള്ള പാട്ടിലൂടെയാണ് പ്രവർത്തനം തുടങ്ങുന്നത്.

കുട്ടികൾ  പക്ഷികൾക്ക് അനുയോജ്യമായ നിറം നൽകുന്നു.  ഒരു പക്ഷിയ്ക്ക് തന്നെ എല്ലാ ഭാഗങ്ങൾക്കും ഒരേ നിറമല്ല. അതും കുട്ടി തിരിച്ചറിയുന്നുണ്ട്.

ഇനിയുള്ള തുടർപ്രവർത്തനത്തിന് രക്ഷിതാക്കൾ സഹായിക്കണേ 👍🏻.

നമുക്കൊരു പക്ഷിച്ചിത്ര ആൽബം നിർമിക്കണം.

അതിന് ഒരു A4 പേപ്പറിൽ ഓരോ കുട്ടിയും പക്ഷികളുടെ ചിത്രങ്ങൾ ശേഖരിച്ച് ഒട്ടിച്ചു കൊണ്ട് വരണം.  എല്ലാവരുടെയും ചേർത്ത് ക്ലാസ്സിനൊരാൽബം നിർമിക്കാമല്ലോ ❤️.

ഇതൊക്കെ ചേർത്ത് ഒരു പ്രദർശനവും നടത്താം.

❤️❤️❤️❤️❤️

ഇപ്പോൾ സ്കൂളിന് ചുറ്റുമുള്ള മരങ്ങളിൽ വന്നിരിക്കുന്ന കിളികളെ കുഞ്ഞുങ്ങൾ എനിക്ക് വിളിച്ചു കാണിച്ചു തരാറുണ്ട്.   അവർ അതേക്കുറിച്ച് പറയാറുണ്ട്.

വീട്ടിൽ വരുന്ന നമ്മുടെ നാട്ടുകിളികളെ കാണാനുള്ള അവസരങ്ങൾ അവർക്ക് നൽകണേ.  അവയെക്കുറിച്ച് വിശദീകരിച്ചും കൊടുക്കണേ ❤️.

8

 പഠനലക്ഷ്യങ്ങള്‍:

1- വിവിധ പ്രതലങ്ങളിൽ വരച്ച് നിറം നൽകുന്നു

2. കത്രിക പോലുള്ള ഉപകരണങ്ങൾ ഉപയോഗിച്ച് നിർമ്മാണ പ്രവർത്തനങ്ങളിൽ ഏർപ്പെടുന്നു

3- പഠനോപകരണങ്ങൾ ഉചിതമായ രീതിയിൽ കൈകാര്യം ചെയ്യുന്നതിന്

ഇവ ലക്ഷ്യമിട്ടു കൊണ്ടാണ് പക്ഷിയെ നിർമിക്കുന്ന പ്രവർത്തനം ക്ലാസ്സിൽ ചെയ്തത്.

ഈ പ്രവർത്തനത്തിലൂടെ 

അനുയോജ്യമായ നിറം തിരഞ്ഞെടുക്കാനുള്ള കഴിവും.  ക്രയോൺസ് ഉപയോഗിക്കുന്നതിലൂടെ കുട്ടിയുടെ സൂക്ഷ്മ പേശീ നിയന്ത്രണ ശേഷിയും വിലയിരുത്താനും കഴിയും.

കേവലം അക്ഷരങ്ങൾ കാണാതെ പഠിക്കുക എന്നതല്ല നമ്മുടെ കുഞ്ഞുങ്ങളുടെ സമഗ്രമായ ( എല്ലാ തരത്തിലുമുള്ള )  വികാസം നമ്മൾ ലക്ഷ്യമിടുന്നുണ്ട്.

9

ഇന്ന് ലേഖനപ്രക്രിയയാണ് നടന്നത്.

ഗ്രൂപ്പിൽ നൽകുന്ന വായനാ പാഠങ്ങൾ കുഞ്ഞുങ്ങൾ പരിചയപ്പെട്ട അക്ഷരങ്ങൾ മാത്രമാണ്.

അത് വായിക്കുമ്പോൾ കുട്ടിയ്ക്ക് ഒപ്പമിരിക്കണേ.

ഫോൺ കുഞ്ഞിന് നൽകി വായിക്കാൻ ഏൽപ്പിച്ചു പോകുന്നതിനേക്കാൾ സുരക്ഷിതവും പ്രയോജനവും കുട്ടി വായിക്കുമ്പോൾ ഒപ്പമിരിക്കുകയും സഹായിക്കുകയും അഭിനന്ദിക്കുകയും ചെയ്യുന്നതാണ് 🥰.

10

പഠനലക്ഷ്യങ്ങള്‍:

പരിചിതാക്ഷരങ്ങളുളള ലഘുവാക്യങ്ങള്‍, പദങ്ങള്‍ എന്നിവ ഒറ്റയ്കും സഹായത്തോടെയും വായിക്കുന്നു.

ശബ്ദഭംഗി ഉളവാക്കുന്ന അക്ഷരങ്ങളുടെയും പദങ്ങളുടെയും ആവർത്തനം കണ്ടെത്തുന്നു.

തന തന തന തന

തനു തിന താന

...................