ചൂണ്ടുവിരലിലെ വിഭവങ്ങള്‍

2010 ജൂലൈമുതല്‍ അക്കാദമിക വിഭവങ്ങളുമായി ഈ വിദ്യാഭ്യാസ ബ്ലോഗ് ...പ്രയോജനപ്പെടുത്തുക, പ്രയോഗിക്കുക, പ്രചോദിപ്പിക്കുക, പ്രചരിപ്പിക്കുക.. ചൂണ്ടുവിരലില്‍ പങ്കിട്ട വിഭവമേഖലകള്‍....> 1.അധ്യാപക ശാക്തീകരണം ,2. വായനയുടെ വഴി ഒരുക്കാം, 3.എഴുത്തിന്‍റെ തിളക്കം, 4.വിദ്യാഭാസ ഗുണനിലവാരം- സംവാദം,5. മികവ്, 6.ശിശുസൌഹൃദ വിദ്യാലയം, 7.സര്‍ഗാത്മക വിദ്യാലയം, 8.നിരന്തര വിലയിരുത്തല്‍, 9.ഗണിതപഠനം, 10.വിദ്യാഭ്യാസ അവകാശ നിയമം, 11.ദിനാചരണങ്ങള്‍, 12.പാര്‍ശ്വവത്കരിക്കപ്പെടുന്നവര്‍, 13. രക്ഷിതാക്കളും സ്കൂളും, 14. കളരി, 15. ക്ലാസ് അന്തരീക്ഷം/ക്രമീകരണം, 16.ഇംഗ്ലീഷ് പഠനം, 17.ഒന്നാം ക്ലാസ്, 18. ശാസ്ത്രത്തിന്റെ പാത, 19.ആവിഷ്കാരവും ഭാഷയും, 20. പ്രത്യേക പരിഗണന അര്‍ഹിക്കുന്ന കുട്ടികള്‍, 21. ഐ ടി സാധ്യതകള്‍, 22. പഠനറിപ്പോര്‍ട്ടുകള്‍, 23.പഠനമാധ്യമം 24. ഭൌതികസൌകര്യങ്ങളില്‍ മികവ്, 25.അക്കാദമികസന്ദര്‍ശനം, 26.ഗ്രാഫിക് ഓര്‍ഗനൈസേഴ്സ്, 27.പ്രഥമാധ്യാപകര്‍.,28. ബാല, 29. വളരുന്ന പഠനോപകരണം,30. കുട്ടികളുടെ അവകാശം, 31. പത്രങ്ങള്‍ സ്കൂളില്‍, 32.പാഠ്യപദ്ധതി,33. ഏകീകൃത സിലബസ്, 34.ഡയറ്റ് .35.ബി ആര്‍ സി,36. പരീക്ഷ ,37. പ്രവേശനോത്സവം,38. IEDC, 39.അന്വേഷണാത്മക വിദ്യാലയങ്ങളുടെ ലോകജാലകം, 40. കലാവിദ്യാഭ്യാസം, 41.പഞ്ചായത്ത്‌ വിദ്യാഭ്യാസ സമിതി, 42. പഠനോപകരണം, 43.പാഠ്യപദ്ധതി പരിഷ്കരണം, 44. ചൂണ്ടുവിരല്‍,45. ടി ടി സി, 46.പുതുവര്‍ഷം, 47.പെണ്‍കുട്ടികളുടെ ശാക്തീകരണം, 48. ക്രിയാഗവേഷണം,49. ടീച്ചിംഗ് മാന്വല്‍, 50. പൊതുവിദ്യാഭ്യാസസംരക്ഷണം, 51.ഫീഡ് ബാക്ക്, 52.സ്റ്റാഫ് റൂം, 53. കുട്ടികളുട അവകാശം,54. കൃഷിയും പഠനവും,55. നോട്ട് ബുക്ക് ആകര്‍ഷകവും സമഗ്രവും, 56.പഠനയാത്ര, 57. വിദ്യാബ്ലോഗുകള്‍,58. സാമൂഹികശാസ്ത്രം, 59. സ്കൂള്‍ അസംബ്ലി, 60.സ്കൂള്‍ റിസോഴ്സ് (റിസേര്‍ച്) ഗ്രൂപ്പ് - ,61.പ്രതിഫലനാത്മകക്കുറിപ്പ്, 62. ബദല്‍പാഠങ്ങള്‍, 63.മെന്ററിംഗ്,64. വര്‍ക്ക്ഷീറ്റുകള്‍ ക്ലാസില്‍, 65.വിലയിരുത്തല്‍, 66. സാമൂഹിക ശാസ്ത്രാന്തരീക്ഷം, 67.അനാദായം, 68.എ ഇ ഒ , 69.കായികവിദ്യാഭ്യാസം,70. തിയേേറ്റര്‍ സങ്കേതം പഠനത്തില്‍, 71.നാടകം, 72.നാലാം ക്ലാസ്.73. പാഠാവതരണം, 74. മോണിറ്ററിംഗ്, 75.വിദ്യാഭ്യാസ ചിന്തകള്‍, 76.സഹവാസ ക്യാമ്പ്, 77. സ്കൂള്‍ സപ്പോര്‍ട്ട് ഗ്രൂപ്പ്,78.പ്രദര്‍ശനം,79.പോര്‍ട്ട്‌ ഫോളിയോ...80 വിവിധജില്ലകളിലൂടെ... പൊതുവിദ്യാഭ്യാസത്തിന്റെ കരുത്ത് അറിയാന്‍ ചൂണ്ടുവിരല്‍...tpkala@gmail.com.

Saturday, November 21, 2015

ഗവേഷണാത്മക അധ്യാപനവും ക്ലസ്റ്ററും -ട്രൈ ഔട്ട് അനുഭവങ്ങള്‍


ഗവേഷണാത്മക അധ്യാപനാനുഭവം പങ്കിട്ട ട്രൈ ഔട്ട് ക്ലസ്റ്ററിലെ പ്രക്രിയയും വിശദാംശങ്ങളുമാണ് ഇവിടെ പങ്കിടുന്നത്
 പ്രക്രിയ- സെഷന്‍ ഒന്നില്‍ നാല് കാര്യങ്ങളാണ് നടന്നത്
  1. ആമുഖാവതരണം
  2. പവര്‍ പോയന്റ് അവതരണം ( ഗവേഷണ ലക്ഷ്യങ്ങള്‍, പഠനനേട്ടങ്ങള്‍, നടത്തിയ പ്രവര്‍ത്തനങ്ങള്‍, നേട്ടം )
  3. ഉല്പന്ന പ്രദര്‍ശനം ( പ്രക്രിയയുടെ ഭാഗമായി രൂപപ്പെട്ട രചനകള്‍)
  4. അനുഭവവിവരണം
അനുഭവ വിവരണത്തില്‍ നിന്നുളള പ്രസക്തഭാഗങ്ങള്‍ ചുവടെ നല്‍കുന്നു
ക്ലാസിലെ ഒരു പഠനനേട്ടമായിരുന്നു പ്രസംഗം തയ്യാറാക്കി അവതരിപ്പിക്കല്‍
വൈഗടീച്ചര്‍ ക്ലാസനുഭവം ഇങ്ങനെ പങ്കിട്ടു
  • ഭക്ഷ്യമേളയുടെ സംഘാടകരായ കുട്ടികള്‍തന്നെ അതിന്റെ ഉദ്ദേശ്യം മറ്റുളളവരെ അറിയിക്കണമെന്നും അതിനായി സമ്മേളനം നടത്തണമെന്നും ഞങ്ങള്‍ ഒന്നിച്ചു തീരുമാനിച്ചു.
  • അധ്യാപകരും രക്ഷിതാക്കളുമെല്ലാം വരുന്ന സദസ്സില്‍ പ്രസംഗിക്കുക എന്നത് ഉത്തരവാദിത്വമുളള ജോലിയാണെന്നും അത് ശ്രദ്ധാപൂര്‍വം ചെയ്യേണ്ടതാണെന്നും അവര്‍ മനസിലാക്കി പ്രവര്‍ത്തിച്ചു. അവര്‍ക്കറിയാവുന്ന രീതിയില്‍ പ്രസംഗം തയ്യാറാക്കി. ഗ്രൂപ്പില്‍ ഓരോരുത്തരും അവതരിപ്പിച്ചു. കുട്ടികളുടെ ആദ്യ സംരംഭം എന്ന നിലയില്‍ എനിക്ക് കൂടുതല്‍ ഇടപെടേണ്ടി വന്നു.
  • ഡില്‍ന നന്നായി പ്രസംഗിച്ചു. അലീനയ്ക് ആശംസാ പ്രസംഗം സംബന്ധിച്ച് ആശയക്കുഴപ്പം. സച്ചിന്റെ പ്രസംഗം മെച്ചപ്പെടുത്തി.
  • കുട്ടികള്‍ നന്നായി ഏറ്റെടുത്തു. ഇനി ഒരു പ്രസംഗം ചെയ്യാനവസരമുണ്ടായാല്‍ അത് വളരെ ഭംഗിയായി അവര്‍ക്ക് ചെയ്യാനാകും.
മറ്റൊരു പഠനനേട്ടമായിരുന്നു പോസ്റ്റര്‍ തയ്യാറാക്കല്‍
  • തങ്ങള്‍ക്ക് പറയാനുളളത് മറ്റുളളവരിലേക്ക് എങ്ങനെ എത്തിക്കാം എന്ന ചിന്തയാണ് പോസ്റ്റര്‍ എന്ന ആശയത്തിലേക്ക് കുട്ടികളെ എത്തിച്ചത്. വടിവോടെ അക്ഷരത്തെറ്റില്ലാതെ എഴുതാനും അവരില്‍ ആത്മവിശ്വാസം വളര്‍ത്താനും ഈ പ്രവര്‍ത്തനത്തിന് കഴിഞ്ഞു
എഴുത്തിലും വായനയിലും നല്‍കിയ പിന്തുണ എങ്ങനെ പിന്നാക്കക്കാരെ സഹായിച്ചു?
  1. പ്രവര്‍ത്തനങ്ങളില്‍ തഴയപ്പെടല്‍ എന്ന പ്രവണത ബോധപൂര്‍വം തടഞ്ഞു. പരിഗണന എപ്പോഴും എന്ന് മനസില്‍ ഉറപ്പിച്ചാണ് ഇടപെട്ടത്. പാഠാസൂത്രണം നടത്തിയത്.ഇഷ്ടപ്പെട്ട ഭക്ഷണത്തിന്റെ പേരെഴുതല്‍. ആദ്യം ബോര്‍ഡില്‍ പിന്നാക്കക്കാരാണെഴുതിയത്. മറ്റുളളവര്‍കൂടി എഴുതിക്കഴിഞ്ഞപ്പോള്‍ തെറ്റുവന്നവര്‍ സ്വയം തിരുത്തി.
  2. ഭക്ഷ്യമേള എന്ന് എഴുതുന്നത് സംബന്ധിച്ച് ആശയക്കുഴപ്പം ഉണ്ടായി. ഭക്ഷ്യം എന്ന വാക്ക് ഡിക്ഷ്ണറിയി്ല്‍ നിന്നും അവര്‍ കണ്ടെത്തി ബോധ്യപ്പെട്ടു. ഇത് ഗ്രൂപ്പില്‍ തെറ്റില്ലാതെ എഴുതാന്‍ സഹായകമായി,
  3. ബാനര്‍ തയ്യാറാക്കിയപ്പോഴും സ്വയം തെറ്റു തിരുത്താനും വീണ്ടും മറ്റൊരവസരത്തില്‍ ഭക്ഷ്യമേള എന്നെഴുതേണ്ടി വന്നപ്പോള്‍ തെറ്റില്ലാതെ എഴുതാനും കഴിഞ്ഞു. ഇത് സ്വയം തിരുത്തില്‍ കുട്ടികള്‍ക്ക് തിരിച്ചറിവുകള്‍ നല്‍കാന്‍ സഹായകമാണെന്നുളളതിന്റെ തെളിവാണ്
  4. ഒരു ഇല വരച്ച് അതില്‍ ഭക്ഷണം വിളമ്പുന്ന വിധം അടയാളപ്പെടുത്താന്‍ പറഞ്ഞപ്പോള്‍ പത്രം വായിക്കാന്‍ പറയാതെ തന്നെ വായിക്കേണ്ടതിന്റെ ആവശ്യം അവര്‍ക്കുണ്ടായി.
    മാതൃഭൂമി പത്രത്തിലെ സ്വാദ് മാത്രമല്ല സദ്യ എന്ന ലേഖനം കുട്ടികള്‍ പടം കണ്ടതിന്റെ അടിസ്ഥാനത്തില്‍ സ്വയം വായിക്കാന്‍ തയ്യാറായി.
എന്റെ തിരിച്ചറിവുകള്‍
  1. ഭക്ഷ്യമേള പോലെ സ്വാഭാവിക അന്തരീക്ഷം സൃഷ്ടിച്ച് അതിലൂടെ പ്രവര്‍ത്തനങ്ങള്‍ നല്‍കിയാല്‍ കുട്ടികള്‍ സ്വയം പ്രവര്‍ത്തനങ്ങള്‍ ഏറ്റെടുക്കുകയും താല്പര്യത്തോടെ
    പ്രവര്‍ത്തനങ്ങളില്‍ ഏര്‍പ്പെടുകയും ചെയ്യും
  2. മറ്റുളളവര്‍ ശ്രദ്ധിക്കും എന്ന തോന്നല്‍ അവരില്‍ ഉണ്ടായാല്‍ അവര്‍ വടിവോടെയും അക്ഷരത്തെറ്റില്ലാതെയും എഴുതും. അതിനാല്‍ അത്തരം സന്ദര്‍ഭങ്ങള്‍ ഒരുക്കേണ്ടതാണ്
  3. കുട്ടികള്‍ പോസ്റ്റര്‍ ഗംഭീരമാക്കി. വളരെ അധ്വാനം . കലാപരമായ ഇടപെടല്‍..
  4. തെറ്റുകള്‍ മനസിലാക്കാന‍്‍ ശരി കണ്ടെത്തേണ്ടതിന്റെ ആവശ്യം അവരില്‍ ഉണ്ടാക്കണം
  5. നോട്ടുബുക്കില്‍ എഴുതുമ്പോള്‍ തെറ്റുകള്‍ വരുത്തുന്ന കുട്ടികള്‍ ബോര്‍ഡിലും ചാര്‍ട്ടിലും എഴുതുമ്പോള്‍ തെറ്റുകള്‍ കുറവാണ് വരുത്തുന്നത്. കൂടുതല്‍ ശ്രദ്ധ ആവശ്യമുളള പ്രവര്‍ത്തനം തെറ്റുകള്‍ കുറയ്കും.
  6. പി ടി എയുടെ ഇടപെടല്‍ പഠനപ്രവര്‍ത്തനങ്ങള്‍ക്ക് വളരെ സഹായകമണ്. (അമീനയാണ് ക്ലാസ് പി ടി എയില്‍ കാര്യങ്ങള്‍ അവതരിപ്പിച്ചത്. കൃത്യമായ തീരുമാനത്തിലെത്താന്‍ സഹായകമായിരുന്നു ആ അവതരണം.) അധ്യാപകരുടെ ഉത്തരവാദിത്വം കൂടും എന്നതിനാല്‍ കൂടുതല്‍ മികച്ച പ്രകടനം അധ്യാപകരില്‍ നിന്നും ഉണ്ടാകും
മീനകുമാരി അനുഭവം പങ്കിടുന്നു.
  1. പോസ്റ്റര്‍ തയ്യാറാക്കല്‍ പ്രക്രിയ വ്യത്യസ്തമായ രീതിയാണ് ഓരോരുത്തരും സ്വീകരിച്ചത്. ചിലര്‍ വേറേ പേപ്പറില്‍ എഴുതി നോക്കി കുഴപ്പമൊന്നുമില്ല എന്നുറപ്പാക്കിയ ശേഷമാണ് എഴുതിയത്. പിന്നാക്കം നില്‍ക്കുന്നവരടക്കം എല്ലാവര്‍ക്കും മെച്ചപ്പെട്ട പോസ്റ്റര്‍ തയ്യാറാക്കാന്‍ വാശി. എല്ലാവരും തെറ്റില്ലാതെ എഴുതാന്‍ വളരെ ശ്രദ്ധിച്ചു. പ്രവര്‍ത്തനം കുട്ടികള്‍ ഏറ്റെടുത്തു. അവരുടെ പരിപാടി എന്ന നിലയില്‍ അത് ലക്ഷ്യം കണ്ടു. ആവശ്യാധിഷ്ഠിതമായി.
  2. കുട്ടികളുടെ പങ്കാളിത്തത്തോടെയുളള പാഠ്യപദ്ധതി വിനിമയമാണ് നടന്നത്. ആസൂത്രണം മുതല്‍ അവസാനം വരെ എന്തെല്ലാമാണ് നടക്കുക എന്ന് അവര്‍ക്കറിയാം. ആസൂത്രണ ചര്‍ച്ച ഫലപ്രദമായി.ചുമതലകള്‍ അവര്‍ മടി കൂടാതെ ഏറ്റെടുത്തു. ഒരിക്കല്‍ പോലും പിന്നാക്കക്കാര്‍ മുന്നോക്കക്കാര്‍ എന്നിങ്ങനെ വ്യത്യാസം അനുഭവപ്പെട്ടില്ല. അവരെല്ലാവരും കൂടി നടത്തുന്ന ഭക്ഷ്യമേള എന്ന ചിന്ത, ത്രില്‍, ആവേശം..
  3. ഒരാഴ്ച മുഴുവന്‍ മലയാളം എന്നാണ് തീരുമാനിച്ചത്. കുട്ടികള്‍ക്ക് മുഷിഞ്ഞില്ല. പ്രവര്‍ത്തനങ്ങള്‍ നന്നായി ചെയ്യാനുമായി. പിരീഡ് സമ്പ്രദായത്തിന്റെ വേലികള്‍ പൊളിച്ചാലും കുഴപ്പമില്ല
  4. മേള പ്രതീക്ഷിച്ചതിലധികം വിജയിച്ചത് കുട്ടികളുടെ ആത്മവിശ്വാസത്തെ വലിയ തോതില്‍ സ്വാധീനിച്ചിട്ടുണ്ട്. അവര്‍ ആസൂത്രകരും സംഘാടകരുമായി. നേതൃത്വപരമായ കഴിവും. അഭിപ്രായങ്ങള്‍ പറയാനും സ്വതന്ത്രമായി ചുമതലകള്‍ നിര്‍വഹിക്കാനും സൂക്ഷ്മതയോടെ നടപ്പിലാക്കാനും കഴിഞ്‍ഞു. ഭാഷാപരമല്ലാത്ത മറ്റു ഗുണങ്ങളും ശേഷികളും നേടിക്കൊടുക്കുന്നുണ്ട്.
  5. പ്രസംഗം ഇനിയും മെച്ചപ്പെടേണ്ടതുണ്ട്. കാര്യങ്ങള്‍ മനസില്‍ നിന്നും ഒഴുകി എത്തുന്നില്ല. അതിനു സഹായകമായ പാഠാസൂത്രണം ഞാന്‍ നടത്താത്തതാണ് കാരണമെന്നു തിരിച്ചറിയുന്നു.
  6. ഔചിത്യപൂര്‍വം തീരുമാനമെടുക്കാനുളള കഴിവു കുട്ടികള്‍ക്കുണ്ടായി. ഭക്ഷ്യമേളയുടെ പ്രചരണത്തിന് ഫ്ലക്സ് വേണ്ടെന്ന് അവര്‍ പറഞ്ഞു. പ്ലാസ്റ്റിക് വിമുക്ത വിദ്യാലയത്തില്‍ ഫ്ലക്സ് പാടില്ലെന്നവര്‍ ചൂണ്ടിക്കാട്ടി.
  7. ഭക്ഷണപ്പേരുകളി വളരെ ഉത്സാഹമുളള തുടക്കമായിരുന്നു. ഊഹിച്ച ഭക്ഷണം ഉരുണ്ടതാണോ? മഞ്ഞയാണോ?ഉളളില്‍ എന്തെങ്കിലും വെച്ചതാണോ? ബിസ്കറ്റ് പോലെയുളളതാണോ ?മധുരമാണോ കയ്പാണോ പുളിയാണോ എന്നിങ്ങനെ തുതരുരാ ചേദ്യങ്ങള്‍. എല്ലാവര്‍ക്കും പങ്കാളിത്തം ആദ്യം മുതല്‍. ആസ്വാദ്യമായി പ്രവര്‍ത്തനം. പിന്നാക്കക്കാര്‍ക്ക് നല്ല പ്രവേശിക. വിജയബോധം.സാന്റ്വിച്ച് എന്നത് കണ്ടെത്തിയത് അദിന്‍കൃഷ്ണയാണ്. ക്ലാസില്‍ എന്തെങ്കിലും നടക്കുന്നുവെന്നതേ ഗൗനിക്കാത്ത കുട്ടി ഇവിടെ സജീവമായി. അദിന്‍, അവിനാശ് , കേശവ് എന്നിവരും തിളങ്ങി.
  8. ബിരണി, സപറ് ( ബിരിയാണി, സാമ്പാറ്) എന്നെല്ലാം എഴുതിയവര്‍ അത് സ്വയം തിരുത്തി.
  9. കുട്ടികള്‍ സൂക്ഷ്മമായി ചിന്തിക്കുന്നു. തുറന്ന സ്റ്റേജില്‍ ഭക്ഷ്യമേള നടത്തിയാല്‍ കാക്കശല്യം ഉണ്ടാകും. എല്ലാവര്‍ക്കും നോട്ടീസ് കൊടുത്തു ക്ഷണിക്കണം, പി ടി എ പ്രസിഡന്റിനെയും എച് എംനേയും വിളിക്കണം തുടങ്ങിയ നിര്‍ദ്ദേശങ്ങള്‍ അവരുടെഭാഗത്തു നിന്നും ഉണ്ടായി.
  10. കുട്ടികളാണ് ക്ലാസ് പി ടി എയില്‍ പദ്ധതി അവതരിപ്പിച്ചത്. ഓരോ വിഭവവും ആരെല്ലെം കൊണ്ടുവരും എന്നു ചോദിച്ച് അതാതിനു നേരെ അമ്മമാരുടെ അവര്‍ പേരെഴുതി ചുമതലപ്പെടുത്തി. തീരുമാനമെടുക്കുന്ന പ്രക്രിയ കൂടി അവര്‍ പഠിച്ചു
  11. ഭക്ഷ്യപ്രദര്‍ശനം ഉത്സവത്തിന്റെ പ്രതീതി സൃഷ്ടിച്ചു. കളര്‍ഫുള്‍ ആയി. 43 ഇനങ്ങള്‍. എല്ലാ കുട്ടികള്‍ തന്നെ ക്രമീകരിച്ചു. ഒടുവില്‍ പാത്രമടക്കം എല്ലാം വൃത്തിയാക്കി വെക്കുന്ന ജോലിയും അവര്‍ തന്നെ ചെയ്തു.സംഘാടകരുടെ കടമകള്‍ തിരിച്ചറിഞ്ഞു
  12. സദ്യ ശരിക്കും കവിതയിലെ പോലെ തന്നെയായി. കോലാഹലം. അത് കവിതയുടെ ആസ്വാദനത്തിനു പര്യാപ്തം.
  13. നിര്‍ദ്ദശിക്കാതെ തന്നെ ആഹാരവുമായി ബന്ധപ്പെട്ട കവിതകള്‍ ലൈബ്രറിയില്‍ നിന്നും കണ്ടെത്തി. ക്ലാസില്‍ അവതരിപ്പിച്ചു.
സെഷന്‍ രണ്ട്
അവതരണത്തെ ആസ്വദമാക്കിയുളള ചര്‍ച്ച
  • എന്തെല്ലാം കാര്യങ്ങള്‍ സ്വീകാര്യമാണ്?
  • സന്തം ക്ലാസിലേക്ക് എങ്ങനെ പ്രോയജനപ്പെടുത്തും?
  • എന്തെല്ലാമാണ് ഇനിയും മെച്ചപ്പെടുത്തേണ്ടത്? കണ്ടെത്തേണ്ടത്?
പഠനനേട്ടങ്ങളും പ്രക്രിയയും സംബന്ധിച്ചും അനുഭവകേന്ദ്രിത പഠനസാധ്യതയെക്കുറിച്ചും ചര്‍ച്ച നടന്നു.
  1. കുട്ടികള്‍ ഏറ്റെടുക്കുന്നു. താല്പര്യത്തോടെ മുഴുകുന്നു. പിന്നാക്കക്കാര്‍ മുന്നിലേക്ക് വരുന്നു എന്നിവ വലിയ കാര്യമാണെന്നു വിലയിരുത്തി
  2. രക്ഷിതാക്കളുടെ പിന്തുണ പ്രവര്‍ത്തനാസൂത്രണത്തില്‍ ഉണ്ടാകുന്നത് ഗുണം ചെയ്യും. അധ്യായത്തിന്റെ ആരംഭത്തില്‍ ആസൂത്രണയോഗത്തിനെക്കുറിച്ച് ആലോചിക്കാവുന്നതാണ്
  3. പിന്നാക്ക പരിഗണന ഓരോ പ്രവര്‍ത്തനത്തിലും എങ്ങനെയായിരിക്കുമെന്നു മുന്‍കൂട്ടി തീരുമാനിച്ച് ആസൂത്രണക്കുറിപ്പ് തയ്യാറാക്കുന്നത് നന്നാകും.
  4. ചില കാര്യങ്ങളില്‍ ഇനിയും മെച്ചപ്പെടലുകള്‍ ആവശ്യമുണ്ട്. പ്രക്രിയാപരമായ കാര്യങ്ങളും പിന്നാക്ക പരിഗണനയും കൂടുതല്‍ സൂക്ഷ്മമാകണം.
  5. പാഠപുസ്തകം മാറിയപ്പോള്‍ കുട്ടികളുടെ റോള്‍ കുറഞ്ഞിരുന്നു. യാന്ത്രികമായ പ്രവര്‍ത്തനങ്ങള്‍, ഭാഷാവസ്തുതകളെ ഒറ്റപ്പെടുത്തി പഠിപ്പിക്കുന്ന സമീപനം.അതെല്ലാം പരിഹരിക്കാനാകും.
  6. വേണമെന്നു വെച്ചാല്‍ വേറിട്ടും ചിന്തിക്കാം പ്രവര്‍ത്തിക്കാം.
സെഷന്‍ മൂന്ന് 
ഫെസിലിറ്റേറ്ററുടെ വിശകലനാത്മക ഇടപെടല്‍
ചര്‍ചയുടെ തുടര്‍ച്ച എന്നവണ്ണം ഫെസിലിറ്റേറ്റര്‍ ഇടപെട്ടു. ഗവേഷണ ലക്ഷ്യങ്ങളൊരോന്നും എങ്ങനെ എത്രത്തോളം ഫലം കണ്ടു? എന്നതായിരുന്നു ആദ്യ പരിഗണന

  1. പഠനനേട്ടങ്ങള്‍ക്ക് സ്വാഭാവികമായ പ്രവര്‍ത്തനസന്ദര്‍ഭങ്ങള്‍ ഒരുക്കുക. എന്നതില്‍ ഗവേഷകര്‍ വിജയിച്ചിട്ടുണ്ട്. അത് പ്രായോഗികവുമാണ്. പല പഠനനേട്ടങ്ങള്‍ക്കും പാഠപുസ്തകത്തിലോ അധ്യാപകസഹായിയിലോ പ്രവര്‍ത്തനങ്ങള്‍ ഇല്ലായിരുന്നു. സ്വാഭാവികമായ ക്രമവും ഇല്ല. അവ്യക്തതയുണ്ട്. അതു പരിഹരിക്കാന്‍ ഈ അധ്യാപകര്‍ക്ക് കഴിഞ്ഞിട്ടുണ്ട്.(ഫ്ലോ ചാര്‍ട്ട് നോക്കുക)
  2. പാഠത്തെ കേന്ദ്രീകരിക്കുന്നതിനു പകരം ജീവിതാനുഭവത്തെ കേന്ദ്രീകരിക്കുന്ന പഠനരീതിയുടെ സാധ്യതകള്‍ പരിശോധിക്കുക എന്ന ലക്ഷ്യം ഉദ്ദേശിച്ചതിലധികം നേട്ടം കൊയ്തു. കുട്ടികള്‍ ആവേശത്തോടെ ഏറ്റെടുത്തു എന്നത് പാഠപുസ്തകകേന്ദ്രിത അധ്യാപനത്തിന്റെ അടിമകളാകുന്നവര്‍ക്ക് നല്ല പാഠമാണ്. പഠനനേട്ടത്തെ മുന്‍ നിറുത്തി പ്രവര്‍ത്തനാസൂത്രണത്തിനുളള പ്രമേയപരിസരം എന്ന നിലയില്‍ പാഠഭാഗങ്ങളെ കണ്ടാല്‍ മതി.
  3. പിന്നാക്ക പരിഗണനയോടെ ആസൂത്രണക്കുറിപ്പ് തയ്യാറാക്കുന്നതിന്റെ രീതി വികസിപ്പിക്കുക. ഒരു പരിധി വരെ മുന്നേറാന്‍ സാധിച്ചിട്ടുണ്ട്. ഇതിന്റെ കാര്യം തുടര്‍ന്ന് വിശകലനം ചെയ്യാം.
  4. ക്ലാസ് പി ടി എയുടെ പങ്കാളിത്തം പാഠാസൂത്രണഘട്ടിത്തിലും പാഠാന്ത്യഘട്ടത്തിലും ഉറപ്പാക്കുന്നതിനുളള തന്ത്രങ്ങള്‍ രൂപപ്പെടുത്തുക. സമയ പരിമിതി മൂലം ( ഇവിടെ അവതരിപ്പിക്കേണ്ടതിനാല്‍ പാഠാന്ത്യത്തിലെ ക്ലാസ് പി ടി എ നടന്നിട്ടില്ല. കൃത്യമായ പഠനനേട്ടത്തെ അടിസ്ഥാനമാക്കി കുട്ടികള്‍ നേടിയ കഴിവുകള്‍ തെളിവു സഹിതം ബോധ്യപ്പെടുത്താന്‍ കഴിയും. ( ഉദാഹരണം ഇവിടെ അവതരിപ്പിച്ച രീതിയില്‍ പവര്‍പോയന്റും ഉല്പന്ന പ്രദര്‍ശനവും ആകാം. സ്കൂളാകുമ്പോള്‍ കുട്ടികളുടെ സാക്ഷ്യങ്ങളും പ്രകടനങ്ങളും കൂടി വഴങ്ങും.
  5. ഭാഷാധ്യാപനത്തില്‍ നൂതനാശയപ്രവര്‍ത്തനങ്ങളുടെ സാധ്യത കണ്ടെത്തുക. തീര്‍ച്ചയായും ഒറ്റപ്പെട്ട പ്രവര്‍ത്തനങ്ങള്‍ നല്‍കുന്ന രീതിക്കു പകരം അവിഭാജ്യഘടകങ്ങളായി കോര്‍ത്തിണക്കിയ അനുഭവാധിഷ്ഠിത ഭാഷാപഠനം എന്നത് ശ്രദ്ധേയമാണ്.
അധ്യാപികമാരുടെ അവതരണ സ്ലൈഡുകളും തെളിവുകളും വീണ്ടും ഫെസിലിറ്റേറ്റര്‍ വിശകലനത്തിനു വിധേയമാക്കി. കുട്ടികള്‍ തയ്യാറാക്കിയ പോസ്റററുകളാണിവ.

ഇതില്‍ അക്ഷരത്തെറ്റ് മാത്രമാണ് പരിഹരിക്കപ്പെട്ടത്. അതും ഭക്ഷ്യമേള എന്നെഴുതിയത്. പോസ്റററിന്റെ സൂചകങ്ങള്‍ വികസിപ്പിക്കേണ്ടതുണ്ടായിരുന്നു.

പോസ്റ്റര്‍
  • ആശയം വ്യക്തമായിരിക്കണം
  • വാചകങ്ങളിലെ സംക്ഷിപ്തത
  • രേഖപ്പെടുത്തലിലെ മികവ്
     ഇവയാണ് അധ്യാപകര്‍ പരിഗണിച്ചത് . അതില്‍ മാത്രം ഒതുങ്ങരുത്. കുട്ടികള്‍ തയ്യാറാക്കുമ്പോഴാണ് പ്രശ്നങ്ങള്‍ ബോധ്യപ്പെടുക. ആശയവിനിയത്തെ ബാധിക്കുന്ന രീതിയില്‍ നിറം നല്‍കിയിരിക്കുന്നു. ( ഏതെല്ലാം നിറങ്ങളിലെഴുതിയത് വായിക്കാനാകും എന്നു ചോദിച്ച് അവരെക്കൊണ്ട് നിഗമനത്തിലെത്തിക്കാമായിരുന്നു). അതോ പോലെ വരികള്‍ തമ്മിലുളള അകലവും പ്രധാനമാണ്.
    തത്സമയ ആസൂത്രണത്തിന്റെ ആവശ്യകതയാണ് ഇത് സൂചിപ്പിക്കുന്നത്. ടീച്ചിംഗ് മാന്വല്‍ ഊഹിച്ചെഴുതുന്നതാണ്. അതുപോലെ നടക്കണമെന്നില്ല. വ്യത്യസ്തമായി കാര്യങ്ങള്‍ സംഭവിക്കും അപ്പോള്‍ തത്സമയാസൂത്രണം നടത്തുകയും ( പ്രശ്നവിശകലനവും പരിഹാരവും) അതിന്റെ അനുഭവങ്ങള്‍ കുറിക്കുകയും വേണം( എനിക്ക് തോന്നുന്നത് രചനാപ്രവര്‍ത്തനങ്ങളുടെ ചുവട്ടില്‍ തത്സമായാസൂത്രണ എന്നൊരു ബോക്സ് നല്‍കുന്നത് നന്നാകും )
    ചുവടെ നല്‍കിയ സൂചകങ്ങള്‍ പരിഗണിക്കാമോ? ഭാവിയിലുപകരിക്കും.
  1. നിറം ( ദൂരെ നിന്നും വായിക്കാന്‍ പറ്റുന്നത്)
  2. വലിപ്പം , വടിവ് ( വ്യക്തമായി  തിരിച്ചറിയാന്‍ കഴിയുന്നത്, തലക്കെട്ട് , ഉപശീര്‍ഷകം, പ്രധാനപ്പെട്ട മറ്റു കാര്യങ്ങള്‍,മറ്റുളളവ)
  3. അകലം ( വരികള്‍ തമ്മിലും  വാക്കുകള്‍ തമ്മിലും അക്ഷരങ്ങള്‍ തമ്മിലും)
  4. സ്ഥലവിന്യാസം ( സ്ഥാനം, ചിത്ര വിന്യാസം, ഒഴിവിടങ്ങള്‍)
  5. ആകര്‍ഷകത്വം ( നിറം, ഡിസൈന്‍, മുകളില്‍ സൂചിപ്പച്ചവയെല്ലാം)
  6. ഉളളടക്കം ( എന്താണോ ലക്ഷ്യമിട്ടത് അത് വ്യക്തമാക്കുന്നത്ര വിവരങ്ങള്‍ മാത്രം)
  7. വാക്യങ്ങളുടെ ഒതുക്കം ( ഉദ്ഘാടനം ചെയ്യുന്നത് പാര്‍വതി എന്നെഴുതാതെ ചുരുക്കുന്ന രീതി)
  8. തെറ്റില്ലാത്ത ഭാഷ (2015.10. വ്യാഴാഴ്ച പോലെയുളളവയും ചര്‍ച്ച ചെയ്യപ്പെടണം)
തിരിച്ചറിവ് -രേഖപ്പെടുത്തലിലെ മികവ് എന്നും മറ്റുമുളള സൂചകങ്ങള്‍ അമൂര്‍ത്തമാണ്. പലര്‍ക്കും പലരീതിയില്‍ വ്യാഖ്യാനിക്കാം. അതിനാല്‍ കുട്ടികളുടെ ഉല്പന്നങ്ങളിലെ ആവിഷ്കാരവിടവുകള്‍ കൂടി കണക്കിലെടുത്ത് എല്ലാ സൂചകങ്ങളും വികസിപ്പിക്കാം
അനുഭവക്കുറിപ്പ്

എല്ലാ കുട്ടികളുടെയും രചനകള്‍ വിലയിരുത്തണം. ഒരു കുട്ടിക്കെങ്കിലും പ്രശ്നമുണ്ടെങ്കില്‍ അത് അവഗണിക്കരുത്. ഉദാഹരണമായി ഈ രചനനോക്കുക.
    ഞാന്‍ നാരങ്ങാ അച്ചാറിന്റെ എരിവും പുളിയും ഞാന്‍ അറിഞ്ഞു
    പിന്നെ ഞാന്‍ രസം കുടിച്ചു . അപ്പോള്‍ പുളി ഞാന്‍ അനുപവപ്പെട്ടു.
    ഞാന്‍ പിന്നെ കഴിച്ചത് സംബാരം കുടിച്ചു . അതിന്  പുളിയും എരിവും ആയിരുന്നു.
    പിന്നെ ഞാന്‍ മാങ്ങാ അച്ചാറിന്റെ എരിവും മധുരവും ഞാന്‍ അറിഞ്ഞു
    പിന്നെ ഞാന്‍ ഇഞ്ചി അച്ചാറിന്  മധുരവും പുളിപും അനുപവപ്പെട്ടു
    സൂചകങ്ങള്‍  -
  1. അനുഭവത്തിന്റെ തലം വ്യക്തമാക്കുന്ന ഭാഷ
  2. വാക്യഭംഗി
  3. ആശയക്രമീകരണം
  4. തെറ്റില്ലാത്ത ഭാഷ
    1. വാക്യതലം
    2. പദതലം
    3. അക്ഷരതലം
  • അനുഭവത്തിന്റെ തലം വ്യക്തമാക്കുന്ന ഭാഷ എന്നത് കൊണ്ട് എന്താണ് അര്‍ഥമാക്കുന്നത്? നാരങ്ങാ അച്ചാറ് വായില്‍ വെച്ചപ്പോള്‍ ഹൊ എന്തൊരു പുളി! പുളികൊണ്ട് മുഖം ചുളിഞ്ഞുപോയി.പുളി മാത്രമോ നല്ല ഒന്നാന്തരം എരിവും.കണ്ണിലൂടെ വെളളം വന്നു. എന്നിങ്ങനെ ആരെങ്കിലും ഇന്ദ്രിയാനുഭവതീവ്രത വ്യക്തമാക്കുന്ന രീതിയില്‍ എഴുതിയിട്ടുണ്ടോ? എന്നു ചോദിക്കാമായിരുന്നു. അത്തരം ചോദ്യം ഉന്നയിച്ച് എല്ലാവരും അവരവരുടെ രചനകള്‍ മെച്ചപ്പെടുത്താനാവശ്യപ്പെട്ടിരുന്നെങ്കില്‍ ഈ രചനയിലും മാറ്റം വരുമായിരുന്നു. ( അച്ചാറ് മാത്രം എഴുതിയവര്‍ വൈവിധ്യമുളള മറ്റ് ആഹാരങ്ങള്‍ കൂടി കണക്കിലെടുത്ത് എഴുതണം എന്നും സൂചിപ്പിക്കാം)
  • വാക്യഭംഗി ക്ലാസില്‍ ചര്‍ച്ച ചെയ്തിട്ടില്ല. 'പിന്നെ, പിന്നെ,പിന്നെ' രോഗം വാക്യചികിത്സ കൊണ്ടു ഭേദമാക്കാമായിരുന്നു. എല്ലാ വാക്യങ്ങളും പരിശോധിക്കുക. ഒരേ പോലെയാണോ തുടങ്ങിയത്. പകരം പദം ഉപയോഗിച്ച് ഭംഗി വരുത്താമോ? ഞാനറിഞ്ഞു ,ഞാനറിഞ്ഞു എന്നെഴുതിയത് ആ അറിവിനെ മറ്റു രീതിയില്‍ വിപുലപ്പെടുത്തി എഴുതാനാവശ്യപ്പെട്ടാല്‍ മാററിയെടുക്കാമായിരുന്നു.
  • തെറ്റില്ലാത്ത ഭാഷയുമായി ബന്ധപ്പെട്ട് എഡിറ്റിംഗ് നടക്കണം. അതിന്റെ അഭാവം രചനയില്‍ പ്രതിഫലിക്കുന്നു. ഏതെങ്കിലും വാക്യങ്ങളില്‍ വാക്കുകള്‍ അനാവശ്യമായി ആവര്‍ത്തിച്ചിട്ടുണ്ടോ എന്ന ചോദ്യം എന്തേ നമ്മുടെ ക്ലാസുകള്‍ മറന്നു പോകുന്നു? ഞാന്‍ ഞാന്‍ എന്നത് തനിയെ കണ്ടെത്തി ഒഴിവാക്കുമായിരുന്നു
  • നാം സ്വാഭാവികമായി പറയാത്ത രീതിയില്‍ എഴുതിയിട്ടുണ്ടോ? അപ്പോള്‍ പുളി ഞാന്‍ അനുപവപ്പെട്ടു. എന്നു പറയുന്നതിനേക്കാള്‍ നന്നായി പറയാനാകുമോ?
  • ചില വാക്കുകള്‍ കുട്ടികള്‍ക്ക് അത്ര പരിചയമില്ല സംഭാരം തന്നെ ഉദാഹരണം. നാട്ടിലെ ഉച്ചാരണരീതി പ്രകാരം അത് സംബാരമായിട്ടുണ്ടാകാം. അത്തരം വാക്കുകള്‍ തെളിവുകളുടെ അടിസ്ഥാനത്തില്‍ തിരുത്തപ്പെടണമായിരുന്നു
  • അനുപവപ്പെട്ടു എന്നത് ഗ്രൂപ്പ് എഡിറ്റിംഗ്/ ബോര്‍ഡ് എഡിറ്റിംഗ്/ ഉച്ചാരണവും ലിഖിതരൂപവും തമ്മില്‍ ശരിയായി പൊരുത്തപ്പെടുത്താനുളള അവസരം എന്നിവയിലൂടെ പരിഹരിക്കാമായിരുന്നു
തത്സമയ വിശകലനം പ്രസക്തം
മുകളിലത്തെ ഉദാഹരണം സൂചിപ്പിക്കുന്നത് പിന്നാക്ക പരിഗണനയോടെയുളള ആസൂത്രണത്തില്‍ ഇനിയും മുന്നേറാനുണ്ടെന്നാണ്. തത്സമയ വിശകലനം എന്ന പ്രക്രിയയുടെ പ്രാധാന്യമാണിത് സൂചിപ്പിക്കുന്നത്. കുട്ടിയുടെ രചനകള്‍ പരമിതികളോടെ നിലനില്‍ക്കുന്നുവെങ്കില്‍ തത്സമയ വിശകലനം നടന്നിട്ടില്ല എന്നു കരുതാം.
  • ചൊല്ലുകള്‍ വ്യാഖ്യാനിക്കല്‍ എന്ന പ്രവര്‍ത്തനത്തില്‍ അധ്യാപികയാണോ ചൊല്ലുകള്‍ വ്യാഖ്യാനിക്കേണ്ടത്? ഒരു ക്ലാസില്‍ അങ്ങനെ നടന്നിരിക്കുന്നു. കുട്ടികള്‍ വ്യാഖ്യാനിക്കണം. മനസിലാക്കിയത് അവരെഴുതണം. പങ്കിടണം. ചര്‍ച്ച ചെയ്യണം. ചൊല്ലുകളെ അവരുടെ രചനകളില്‍ സന്നിവേശിപ്പിക്കുന്നതിനു സഹായകമായ ചര്‍ച്ച പ്രധാനം. രചനകളെ കരുത്തുറ്റതാക്കുന്നതിന് ചൊല്ലുകള്‍ വഴിയൊരുക്കമെന്ന് ഉദാഹരണം വെച്ച് ബോധ്യപ്പെടണം. ചൊല്ലുകള്‍ വ്യാഖ്യാനിക്കുന്നതിന് മൂന്ന് തലങ്ങള്‍ ക്ലാസില്‍ ഒരുക്കണം. അത് അധ്യാപകസഹായിയിലില്ല. അവ തയ്യാറാക്കിയവരുടെ കാഴ്ചപ്പാടിന്റെ ഇത്തിരിവട്ടത്തില്‍ കേരളത്തിലെ ക്ലാസുകള്‍ ചുറ്റിക്കറങ്ങരുത്.
  1. പ്രക്രിയാതലം ( ചൊല്ല് അവതരണം, വ്യക്തിഗത വ്യാഖ്യാനം. പരസ്പരം സാധൂകരിക്കല്‍. പൊതു അവതരണം ,ചര്‍ച്ച)
  2. ആശയവിനിമയതലം ( ചൊല്ലുകളെ ഉള്‍പ്പെടുത്തി രചനയിലേക്ക് )
  3. ചിന്താതലം (മറ്റുളളവരുടെ വ്യാഖ്യാനം, രചനയിലെ സന്നിവേശം എന്നിവയെക്കുറിച്ച് താരതമ്യ ചിന്ത)
സെഷന്‍ നാല്
  • ആസൂത്രണം
  • ചര്‍ച്ചയുടെ വെളിച്ചത്തില്‍ ഗവേഷണാത്മക അധ്യാപനത്തിനായി ഏറ്റെടുക്കാവുന്ന അക്കാദമിക പ്രശ്നങ്ങളും അവ പരിഹരിക്കുന്നതിനുളള പ്രവര്‍ത്തനവും 
ഗവേഷണാനുഭവം പങ്കിടുന്ന ക്ലസ്റ്ററുകള്‍ സാധ്യതയാണ്. നല്ല അക്കാദമിക ഇടപെടലുകള്‍ നടത്താന്‍ അധ്യാപകരെ പടിപടിയായി അത് സജ്ജമാക്കും.

4 comments:

M M Surendran said...

കുട്ടികളുടെ പങ്കാളിത്തത്തോടെയുളള പാഠ്യപദ്ധതി വിനിമയമാണ് നടന്നത്. ആസൂത്രണം മുതല്‍ അവസാനം വരെ എന്തെല്ലാമാണ് നടക്കുക എന്ന് അവര്‍ക്കറിയാം. ആസൂത്രണ ചര്‍ച്ച ഫലപ്രദമായി.ചുമതലകള്‍ അവര്‍ മടി കൂടാതെ ഏറ്റെടുത്തു. ഒരിക്കല്‍ പോലും പിന്നാക്കക്കാര്‍ മുന്നോക്കക്കാര്‍ എന്നിങ്ങനെ വ്യത്യാസം അനുഭവപ്പെട്ടില്ല. അവരെല്ലാവരും കൂടി നടത്തുന്ന ഭക്ഷ്യമേള എന്ന ചിന്ത, ത്രില്‍, ആവേശം..
A big salute....great job..Annuveshanangal iniyum thudaruka...

ബിന്ദു .വി എസ് said...

ഇങ്ങനെ ഗവേഷണ ഫലങ്ങള്‍ വിശ കലനം ചെയ്യല്‍ മതിയായിരുന്നു ക്ലസ്ടറില്‍ .പതിവ് അജണ്ടകളും "ഞങ്ങളെന്തോ ചെയ്യാനാ ടീച്ചറെ "എന്ന ആര്‍ പി മാരുടെ പരിദേവനവും ഒഴിവാക്കാമായിരുന്നു . ഈ പോസ്റ്റ്‌ വായിച്ചതിലൂടെ തെളിച്ചവും വെളിച്ചവും കിട്ടി .

Unknown said...

എന്തൊക്കെ വിഭവങ്ങളാ കുട്ടികള്‍ക്കായി അധ്യാപികമാര്‍ .... പഠനരുചിഭേദങ്ങള്‍ മനോഹരം...

Unknown said...

എന്തൊക്കെ വിഭവങ്ങളാ കുട്ടികള്‍ക്കായി അധ്യാപികമാര്‍ .... പഠനരുചിഭേദങ്ങള്‍ മനോഹരം...