ഓൺലൈൻ ക്ലാസുകള്‍ ഒരു മാസം പൂർത്തിയാകുമ്പോൾ
അതിനോടുളള രക്ഷിതാക്കളുടെ സമീപനമെന്ത് എന്ന് അന്വേഷിക്കുന്നത് ഉചിതമാകും.
രക്ഷിതാക്കള്‍ സംതൃപിതനിലയിലാണോ? കുട്ടികള് വല്ലതും പഠിക്കുന്നുണ്ടോ? അധ്യാപകരുടെ പിന്തുണയെക്കുറിച്ച് രക്ഷിതാക്കളുടെ അഭിപ്രായം എങ്ങനെ? ഇതൊക്കെ അറിയണ്ടേ?
പലവിധ പ്രശ്നങ്ങൾ രക്ഷിതാക്കൾ നേരിടുന്നുണ്ട് എന്നതു ശരി തന്നെ. എങ്കിലും കുട്ടികളുടെ പഠനക്കാര്യത്തിൽ അവർ ഉദാസീനരല്ല.
രക്ഷിതാക്കളുടെ താൽപര്യത്തെ പ്രയോജനപ്പെടുത്തി കുട്ടികളുടെ ഓൺലൈൻ പഠനം ചിട്ടപ്പെടുത്താൻ ശ്രമിച്ച വിദ്യാലയങ്ങളിലൊന്നാണ് പത്തനംതിട്ട ജില്ലയിലെ മുട്ടത്തുകോണം എസ് എൻ ഡി പി എൽ പി എസ്. പ്രഥമാധ്യാപിക സലിജടീച്ചറും ഞാനും പണ്ട് തിരുവല്ല ഡയറ്റിന്റെ ഇരുപത്തൊന്നുദിവസത്തെ പരിശീലനത്തില്‍ ഒന്നിച്ച് പങ്കെടുത്തിട്ടുണ്ട്. പിന്നീടാണ് ഞാന്‍ ഡയറ്റിലെത്തുന്നത്. ടീച്ചറുടെ ക്രിയാത്മകമായ ഇടപെടല്‍ അന്നേ ബോധ്യപ്പെട്ടതാണ്. ക്ലാസ് പി ടി എ കൂടി രക്ഷിതാക്കളുടെ വിലയിരുത്തല്‍ ശേഖരിക്കുന്നു എന്നു ടീച്ചര്‍ അറിയിച്ചപ്പോള്‍ അതിന്റെ പ്രാധാന്യം എനിക്ക് മനസിലായി. രക്ഷിതാക്കളുടെ അഭിപ്രായം എനിക്കു കൂടി പങ്കിടുമോ എന്നു ചോദിച്ചു. ടീച്ചര്‍ രക്ഷിതാക്കളുടെ ശബ്ദസന്ദേശങ്ങളാണ് ആദ്യം അയച്ചത്. അതെല്ലാം ടൈപ്പ് ചെയ്യണമല്ലോ എന്ന് സൂചിപ്പിച്ചപ്പോള്‍ മുഴുവന്‍ അഭിപ്രായങ്ങളും ടൈപ്പ് ചെയ്ത് എത്തിച്ചു തന്നു. മുപ്പത്തെട്ട് രക്ഷിതാക്കളാണ് കഴിഞ്ഞ ദിവസം ഓണ്‍ലൈന്‍ ക്ലാസ് പി ടി എയില്‍ പങ്കെടുത്തത്. അവരുടെ അഭിപ്രായങ്ങളാണ് ചുവടെ ക്രോഡീകരിച്ചവതരിപ്പിക്കുന്നത്.
ഇഷ്ടം കുട്ടി സ്കൂളില്‍ പോയി പഠിക്കുന്നതു തന്നെ
ഞങ്ങൾക്ക് കുട്ടികൾ സ്കൂളിൽ നേരിട്ട് വന്നു പഠിക്കുന്നതാണ് ഇഷ്ടം
സര്‍ക്കാരിന് അഭിനന്ദനം
എന്തു കൊണ്ടും ഓൺ ക്ലാസ്സ് നല്ലത്. ഇങ്ങനെ ഒരു സംവിധാനം ഒരുക്കിയ സർക്കാരിന് അഭിനന്ദനങ്ങൾ. നന്ദി
നമ്മുടെ കുട്ടികളുടെ വിദ്യാഭ്യാസം നഷ്ടപ്പെടുത്താതെ ഇങ്ങനെ ഒരു സംരംഭം തുടങ്ങിവച്ച വിദ്യാഭ്യാസ വകുപ്പിനും ടീച്ചേഴ്സിനും ഒരുപാട് അഭിനന്ദനങ്ങൾ..
കോവിഡ് എന്ന മഹാമാരിലോകത്തിൽ പടർന്നു പിടിക്കുന്ന ഈ സാഹജര്യത്തിൽ കുട്ടികളുടെ പഠിത്തം മുടങ്ങാതിരിക്കാനായി ഓൺലൈൻ ക്ലാസ് ഒരുക്കിയ ഗവൺമെൻ്റിനും പിന്നെ ഓൺലൈൻ ക്ലാസ് അവതരിപ്പിക്കുന്ന റ്റിച്ചേഴ്സിനും നന്മുടെ സ്കൂളിലെ റ്റീച്ചേഴ്‌സിനും നന്ദി
കുട്ടികളെ പ്രാഗൽഭ്യമുള്ളവരായി തീർക്കുന്നതിനായി പ്രയത്നിക്കുന്ന സർക്കാരിനും വിദ്യാഭ്യാസ വകുപ്പിനും എല്ലാ അധ്യാപകർക്കും ഹൃദയം നിറഞ്ഞ അഭിനന്ദനങ്ങൾ
ഓണ്‍ലൈന്‍ ക്ലാസ് മികച്ച നിലവാരമുളളത്
ഇപ്പോഴത്തെ സാഹചര്യത്തിൽ ഓൺലൈൻ ക്ലാസ്സ് അല്ലാതെ മാർഗമില്ലല്ലോ? ഓൺലൈൻ ക്ലാസ് വളരെ നല്ലതാണ്.
കോവിഡ് എന്ന മഹാമാരി ഈ ലോകത്തെയാകെ വിഴുങ്ങിക്കൊണ്ടിരിക്കുന്ന സാഹചര്യത്തിൽ ഭാവിയുടെ വാഗ്ദാനങ്ങളായ നമ്മുടെ കുട്ടികൾക്ക് ലഭിക്കേണ്ടതായ വിദ്യാഭ്യാസം നൽകാൻ കഴിയാതെ കുട്ടികൾ നിഷ്ക്രിയരായി പോകുമായിരുന്ന സാഹചര്യത്തെ മറികടക്കാൻ നമ്മുടെ ഗവൺമെൻറ് മുന്നോട്ട് വെച്ച നൂതന ആശയമായ ഓൺലൈൻ പഠന രീതി എന്തു കൊണ്ടും മികച്ച നിലവാരം പുലർത്തുന്നു .
തുടക്കത്തിലെ ആശങ്കമാറി
Online class എന്ന് കേട്ടപ്പോൾ ആദ്യമൊക്കെ ഒരുപാടു doubts ആയിരുന്നു. എങ്ങനെയൊക്കെയാണ് perform ചെയ്യേണ്ടത് എന്നിങ്ങനെയുള്ള സംശയങ്ങൾ.
എന്റെ കുട്ടി പിന്നിലായില്ല മുന്നില്‍ത്തന്നെ
എന്റെ കുട്ടിയെ സംബന്ധിച്ചു പറയുകയാണെങ്കിൽ പഠിക്കാൻ ഒരുപാട് പിന്നിലോട്ടായിപ്പോയ കുട്ടിയെ ഓൺലൈൻ ക്ലാസ്സിന്റെ സഹായത്തോടെ ഒരുപാട് മുന്നിലോട്ടെത്തിക്കാൻ എനിക്കും ടീച്ചേഴ്സിനും സാധിച്ചു.
പൊതുവെ പഠിക്കാൻ പിന്നോട്ടായിരുന്ന എന്റെ മകൻ ഓൺലൈൻ പഠന രീതി വന്നതോടെ പഠനത്തിൽ കുറച്ച് കൂടി താൽപര്യം കാണിക്കാൻ തുടങ്ങി.
എൻ്റെ രണ്ടു കുട്ടികളും ഓൺലൈൻ ക്ലാസിൽ നോക്കി നന്നായി പഠിക്കുന്നുണ്ട്
പഠനരീതി ഞങ്ങള്‍ക്കും മനസിലാക്കാനവസരം കിട്ടി
കുട്ടികളെ എങ്ങനെയാണ് പഠിപ്പിക്കേണ്ടത് എന്ന് രക്ഷിതാക്കൾക്കു മനസിലാക്കാൻ കഴിയും. സ്കൂളിൽ പോയി പഠിക്കുമ്പോൾ ടീച്ചർമാർ എങ്ങനെയാണു പഠിപ്പിക്കുന്നത് എന്ന് നമ്മൾ കാണുന്നില്ല. എന്നാൽ ഇപ്പോഴാണ് നമ്മൾക്ക് അത് മനസിലാക്കാൻ കഴിയുന്നത്.
ക്ലാസ്സുകളുടെ method മനസ്സിലാകാത്ത എന്നെപ്പോലുള്ള ഒരുപാട് രക്ഷകർത്താക്കൾക്കു ഈ ഓൺലൈൻ ക്ലാസ്സ് ഒരു വഴികാട്ടി ആയിട്ടുണ്ട് എന്നാണ് എന്റെ അഭിപ്രായം.
കുഞ്ഞിനെ പഠിപ്പിക്കുന്ന രീതിയെകുറച്ച് കൂടുതൽ മനസിലാക്കി.
ക്ലാസുകള്‍ രക്ഷിതാക്കള്‍ക്കും മനസിലാകും വിധം
ഓരോ പാഠവും നല്ലതായിട്ടാണ് പഠിപ്പിക്കുന്നതു രക്ഷിതാക്കൾക്കും കുട്ടികൾക്കും മനസിലാകുന്ന രീതിയിൽ ആണ് അദ്ധ്യാപകർ ക്ലാസ്സുകൾ എടുക്കുന്നത്.
മുൻപത്തെ സാഹചര്യത്തിന് വ്യത്യസ്തമായി ഓരോ വിഷയത്തിലും കുട്ടിക്ക് എന്താണ് പഠിക്കാനുള്ളത്, എങ്ങനെ പഠിക്കുന്നു, എത്രത്തോളം ഓരോ പാഠവും അവൻ ഉൾക്കൊണ്ടു എന്നത് നേരിട്ട് മനസ്സിലാക്കാനും പോരായ്മ പരിഹരിച്ച് മുന്നോട്ട് പോകാൻ ഒരു രക്ഷകർത്താവ് എന്ന നിലയിൽ എനിക്ക് ഈ ഓൺലൈൻ പoന രീതിയിലൂടെ സാധിക്കുന്നു
കുട്ടികള്‍ക്കും മനിസാക്കുന്നുണ്ട്
കുട്ടികൾക്ക് മനസ്സിലാകുന്ന രീതിയിൽ ക്ലാസുകൾ അവതരിപ്പിക്കാൻ എല്ലാ ടീച്ചേഴ്സിനും സാധിച്ചിട്ടുണ്ട്
ഓൺലൈൻ ക്ലാസ്സിലെ വീഡീയോ, പുനഃസംപ്രേഷണം എന്നിവ കുഞ്ഞു മനസുകളിൽ തങ്ങി നില്കാൻ സഹായിക്കുന്നു
അധ്യാപകരുടെ വൈകിട്ടത്തെ പിന്തുണ ഫലപ്രദം
വൈകിട്ട് ടീച്ചർ ക്ലാസ്സ് എടുക്കുന്നത് വളരെ ഫലപ്രദം ആണ്.
അതുപോലെ ഓൺലൈൻ ക്ലാസ്സ് കഴിഞ്ഞു ടീച്ചറുമാര് പഠിപ്പിക്കുന്നതു വളരെ വ്യക്തമായി കാര്യങ്ങൾ ഉൾകൊള്ളാൻ സഹായിക്കുന്നു.
വൈകിട്ട് ടീച്ചേഴ്സിന്റെ ഓൺലൈൻ ക്ലാസ് ഉണ്ട്. അതുംകൂടി ആകുംപോൾ കുട്ടികൾക്ക് വളരെ നന്നായി മനസ്സിലാകുന്നുണ്ട്.
ഓരോ ക്ലാസ്സിനെയും സംബന്ധിച്ച് വൈകുംന്നേരം ടീച്ചർമാർ ഒന്ന് കൂടി ക്ലാസ്സ് എടുക്കുന്നത് കുട്ടികൾക്ക് കൂടുതലായി കാര്യങ്ങൾ ഹൃദിസ്ഥമാക്കാൻ സഹായിക്കുന്നു.
പ്രവര്‍ത്തനങ്ങളുടെ പൂര്‍ത്തീകരണവും വിലയിരുത്തലും
ഓരോ പാഠവും നല്ലതുപോലെ മനസിലാക്കി അതിലെ ഫുൾ വർക്കുകളും ചെയ്യിപ്പിച്ചാണ് ടീച്ചർ ക്ലാസ്സുകൾ മുന്നോട്ടു കൊണ്ടുപോകുന്നത്.
തെറ്റുകൾ ഉണ്ടെങ്കിൽ അത് തിരുത്തി എങ്ങനെയാണ് എഴുതേണ്ടത് എന്ന് പറഞ്ഞുതരാറുണ്ട്
അതോടൊപ്പം തന്നെ ടീച്ചേഴ്സ് ഒരുപാട് effort എടുത്തിട്ടുണ്ട് ഇതിനുവേണ്ടി.
ടീച്ചർമാർ പ്രവർത്തങ്ങളും നോക്കുന്നുണ്ട്
തെറ്റുകൾ പറഞ്ഞു തരുന്നുണ്ട്.
ഓണ്‍ലൈന്‍ ക്ലാസിലെ കഥാപാത്രങ്ങളെ അഭിനയിച്ചു കാണിക്കുന്നതും. പാഠത്തിനെ ആസ്പദമാക്കിയുള്ള വീഡിയോ ക്ലിപ്പുകൾ ഇടുന്നതും കൊണ്ട് കുട്ടികൾക്ക് കാര്യങ്ങൾ പെട്ടെന്ന് മനസിലാക്കാൻ കഴിയുന്നുണ്ട്.
കുട്ടികള് സജീവമാണ്
നോട്ടുകൾ എല്ലാം കംപ്ലീറ്റ് ചെയ്യ്തിട്ടു ടീച്ചറിന് അയച്ചു കൊടുക്കുന്നുണ്ട്. ടീച്ചർ അതെല്ലാം ചെക്ക് ചെയ്യുന്നുണ്ട്.
നോട്ട് ഒക്കെ എഴുതുന്നുണ്ട്.
ക്ലാസ്സിൽ ടീച്ചർമാർ പാടുന്ന പാട്ടുകളും പരീക്ഷണങ്ങളും ചെയ്യാനും അതിന്റെ വീഡിയോ ഗ്രൂപ്പിൽ പോസ്റ്റ് ചെയ്യാനും ശ്രമിക്കുന്നു.
ടീച്ചർ നൽകുന്ന ഹോംവർക്കുകൾ വർക്ക് ഷീറ്റ് നോക്കി ചെയ്യാൻ ശ്രമിക്കുന്നു.
വൈകുംനേരം ടീച്ചർ നൽകുന്ന ക്ലാസ്സിന് മറുപടി നൽകാൻ നല്ല താൽപര്യം കാണിക്കുന്നു
രക്ഷിതാവെന്ന നിലയില്‍ കുട്ടിക്കൊപ്പം
ശാരീരികമായി മോശപ്പെട്ട അവസ്ഥയിലാണ് ഞാനെങ്കിലും അവനോടൊപ്പം ക്ലാസ്സുകൾ ഞാനും കേൾക്കുന്നു
കുട്ടിയുടെ കു‌ടെ ഇരുന്നു പറഞ്ഞു കൊടുക്കാൻ കഴിഞ്ഞു.
കുട്ടികളെ ഉപകരണങ്ങൾ വെച്ച് പഠിപ്പിക്കുന്നുണ്ട്
ഓണ്‍ലൈന്‍ ക്ലാസുകളുടെ മികവുകള്‍
സ്കൂളിൽ പഠിക്കുന്നതിന് വ്യത്യസ്തമായി വീണ്ടും വീണ്ടും ഒരേ പാഠഭാഗം തന്നെ ആവർത്തിച്ച് കാണാൻ കഴിയുന്നു.
ഓൺലൈൻ ക്ലാസ്സിന്റെ അവതരണ രീതി മികച്ച നിലവാരം പുലർത്തുന്നു.
കുട്ടികൾക്ക് കണ്ട് പഠിക്കാൻ സാധിക്കുന്നു.
എല്ലാം ഭംഗിയായി നടക്കുന്നുണ്ട്
ടീച്ചറും കുട്ടിയും തമ്മിൽ നേരിട്ടുള്ള ആശയ വിനമയയം ഇല്ലങ്കിലും ക്ലാസ്സ് മനസിലാക്കാൻ പറ്റും.
ഓണ്‍ലൈന്‍ ക്ലാസുകളുടെ പോരായ്മകള്‍
ഒരാഴ്ച കൊണ്ട് സ്കൂളിൽ പഠിക്കുന്നത് അര മണിക്കൂർ ക്ലാസ്സിൽ ഒതുങ്ങുന്നു.
സംശയ നിവാരണത്തിനുള്ള അവസരം ഇല്ലായ്മ.
എല്ലാ കുട്ടികൾക്കും ഒരേ പോലെ ഉൾക്കൊള്ളാൻ സാധിച്ചോ എന്നറിയാൻ മാർഗ്ഗമില്ല.
സലിജടീച്ചര്‍ രക്ഷിതാക്കള്‍ക്ക് നല്‍കിയ കുറിപ്പ്
പ്രിയ രക്ഷിതാക്കളെ ,
നമ്മുടെ ഓൺ ലൈൻ ക്ലാസ്സിനെ കുറിച്ച് , സാധാരണ രീതിയിൽ ക്ലാസ്സ് നടക്കാതിരിക്കുന്ന ഈ സാഹചര്യത്തിൽ ഓൺ ലൈൻ ക്ലാസ്സ് എങ്ങനെ ഫലപ്രദം ആകും എന്ന് ആശങ്ക ആയിരുന്നു..
എന്നാൽ ആ ആശങ്കയെ കാറ്റിൽ പറത്തി നമ്മുടെ ക്ലാസുകൾ വിജയ പ്രദമായി മുന്നോട്ടു പോവുകയാണ്...
ഞങ്ങൾ അദ്ധ്യാപകർക്ക് ഇത്രയും ഫലപ്രദമായ ഒരു അനുഭവം മുൻപ് ഉണ്ടായിട്ടില്ല. എന്റെ സ്കൂളിലെ എല്ലാ രക്ഷിതാക്കളും ഇരുകൈകളും നീട്ടി ഇതിനെ സ്വീകരിച്ചു കഴിഞ്ഞിരിക്കുന്നു..
അന്നന്നത്തെ ക്ലാസ്സുകളുടെ അവലോകനം ചോദ്യങ്ങൾ ചോദിച്ചു തുടങ്ങും . വോയിസ്‌ ക്ലിപ്പിൽ കൂടിയുള്ള ഓരോ കുട്ടിയുടെയും ഉത്തരങ്ങൾ കേൾക്കും തെറ്റുകൾ തിരുത്തും അതിൽ നിന്നും എത്രമാത്രം അവൻ ഉൾക്കൊണ്ടിട്ടുണ്ട് എന്ന് മനസ്സിലാക്കാൻ പറ്റും.. അതിനു ശേഷം ക്ലാസ്സിലെ പോലെ തന്നെ മുന്നോട്ടു പോകാൻ കഴിയുന്നു..
രക്ഷിതാക്കളുടെ ഇടപെടീൽ അൽപ്പം കൂടുതലാണേ, എങ്കിലും അതും നല്ല ഒരു നീക്കമാണ്.. കാര്യങ്ങൾ അവരും മനസിലാക്കുന്നുണ്ടല്ലോ..
ഞങ്ങൾ അധ്യാപകർക്ക് ഏറ്റവും നല്ല മാതൃകകൾ ലഭിക്കുന്നു..
ഓൺലൈൻ ക്ലാസ്സുകൾക്കൊപ്പം കുട്ടികൾക്ക് എല്ലാ പിന്തുണയുമായി ഞങ്ങളോടൊപ്പം നിങ്ങളും ചേർന്നപ്പോൾ അതൊരു വലിയ വിജയമായി
വൈകിട്ടത്തെ ക്ലാസിനെപ്പറ്റി
രക്ഷിതാക്കളെയും കുട്ടികളെയുമൊക്കെ ഇങ്ങനെ കൊണ്ടുവരാൻ പറ്റിയത് വൈകിട്ടുള്ള നമ്മുടെ ക്ലാസ്സ് കൊണ്ടാണ് ചോദ്യം ചോദിക്കൽ ഉത്തരം പറയൽ ...കുട്ടികളും ഒപ്പം എന്റെ രക്ഷിതാക്കളും അത് അങ്ങ് ഏറ്റെടുത്തു.. ക്ലാസ്സിൽ അമ്മമാർ വളരെ ആക്റ്റീവ് ആണ്.. നമ്മൾ അങ്ങ് ആക്കിച്ചു.. സ്റ്റാർ വാങ്ങാൻ മത്സരം ആണ്..
വൈകിട്ട് ക്ലാസ്സ് എടുക്കുന്നതിനു മുൻപ് വീണ്ടും ഓൺലൈൻ ക്ലാസ്സ് കാണും .. പറയുന്ന പ്രധാനപ്പെട്ടവ കുറിക്കും.. ഇപ്പൊ ക്ലാസ്സിലെ ആ ഉണർവ് തന്നെ കിട്ടുന്നു..
എന്താണ് ഈ അനുഭവത്തിലൂടെ കിട്ടുന്ന തിരിച്ചറിവുകള്‍?
- ഓണ്‍ലൈന്‍ ക്ലാസ് നടന്നോളും അധ്യാപകര്‍ കുട്ടികളുടെ ഉല്പന്നങ്ങള്‍ പ്രതീക്ഷിച്ചിരുന്നാല്‍ അത് ലക്ഷ്യത്തിലെത്തില്ല
- ഓരോ ദിവസത്തെ ക്ലാസിനെക്കുറിച്ചും കുട്ടികളുമായി അധ്യാപകര്‍ സംവദിക്കണം
- രക്ഷിതാക്കളുടെ താല്പര്യവും പങ്കാളിത്തവും പ്രധാനമാണ്.
- അത് ലഭിക്കണമെങ്കില്‍ അവരെ പ്രചോദിപ്പിക്കണം
- കുട്ടിയുടെ ഒപ്പമിരിക്കാന്‍ പ്രേരിപ്പിക്കണം
- വൈകിട്ടാണ് ഭൂരിപക്ഷം രക്ഷിതാക്കള്‍ക്കും സമയം ലഭിക്കുക. മൊബൈല്‍ ഫോണും ഉപയോഗിക്കാനാവുക.
- ഒരു സമയക്രമീകരണം ആവശ്യമാണ്.
- ഓണ്‍ലൈന്‍ ക്ലാസുകളുടെ പൂരക പ്രവര്‍ത്തനങ്ങള്‍ അനിവാര്യമാണ്
- അങ്ങനെ അധ്യാപകര്‍ ഇടപെടുന്നിടത്ത് രക്ഷിതാക്കള്‍ സംതൃപ്തരാണ്. അവര്‍ സര്‍ക്കാരിനും വകുപ്പിനും ക്ലാസെടുത്ത അധ്യാപകര്‍ക്കും സ്കൂളിലെ സ്വന്തം അധ്യാപകര്‍ക്കും നന്ദി പറയുന്നു.
- രക്ഷിതാക്കള്‍ക്ക് പഠനരീതി മനസിലാക്കാന്‍ അവസരം ലഭിച്ചിരിക്കുകയാണ്. ആ അനുഭവത്തെ എങ്ങനെ ധനാത്മകമായി പ്രയോജനപ്പെടുത്താനാകുമെന്നതാണ് അധ്യാപകര്‍ നേരിടുന്ന വെല്ലുവിളി.
(ഈ കുറിപ്പ് തയ്യാറാക്കാന്‍ വേണ്ടി നാലാം ക്ലാസിലെ പ്രണവിന്റെ അമ്മ കെ രതി, അനാമിക വിനോദിന്റെ അമ്മ നീതു, വൈഗയുടെ അമ്മ അമ്പിളി രാജേഷ്,ജോബ്നയുടെ രക്ഷിതാവ് ബിനു എം ടി, അഭിനവിന്റെ അമ്മ മഞ്ജു, അനാമിക അനീഷിന്റെ അമ്മ നിഷ, നന്ദകിഷോറിന്റെ അമ്മ അനുപ, ദേവപ്രിയയുടെ അമ്മ ആശ സന്തോഷ്, ആരാധ്യശ്രീയുടെ അമ്മ ഷൈനി, ശബരി, തീര്‍ത്ഥ എന്നിവരുടെ രക്ഷിതാവ് മായ, അളകനന്ദയുടെ മാതാവ് സീമ, ശ്രേയസിന്റെ അമ്മ സൗമ്യ, അഞ്ജന തുടങ്ങിയവരുടെ പ്രതികരണങ്ങളാണ് പ്രയോജനപ്പെടുത്തിയത്. വിലപ്പെട്ട നിരീക്ഷണങ്ങള്‍ നടത്തിയ അവരോട് ചൂണ്ടുവരിലിനുളള കടപ്പാട് രേഖപ്പെടുത്തുന്നു.)
8 comments:
തീർച്ചയായും. ഓൺലൈൻ ക്ളാസിനോടൊപ്പം അനുപൂരക പ്രവർത്തനം എന്ന നിലയിൽ അധ്യാപകർ കുട്ടികളോട് നേരിട്ട് സംവദിക്കാൻ സമയം കണ്ടെത്തിയാൽ 43, 44 പോയന്റുകളിലെ പരിമിതി കൂടി മറികടക്കാൻ തീർച്ചയായും കഴിയും. പിന്നെ ഒരാഴ്ചയിലെ ക്ലാസ്സ് കേവലം രണ്ട് മണിക്കൂറിൽ ഒതുങ്ങുന്നു എന്ന പരിമിതിയും ഒരു പരിധിവരെ ദിനേന അദ്ധ്യാപകൻ ഓൺലൈനിൽ കുട്ടികളോട് സംവദിച്ചാൽ മറികടക്കാൻ കഴിയും. ഇത്തരം ഒരു പങ്കിടൽ കേരളത്തിലെ എല്ലാ വിദ്യാലയങ്ങൾക്കും അവരുടെ ഒരു മാസത്തെ ഓൺലൈൻ ക്ലാസ് അവലോകനം നടത്തി പോരായ്മകൾ പരിഹരിച്ച് പിന്തുണാ സംവിധാനങ്ങൾ കൂടുതൽ പ്ലാൻ ചെയ്യാൻ പ്രചോദനമാകും. പങ്കിടാൻ സന്മനസ്സ് കാണിച്ച സ്‌കൂളിനും കലാധരൻ സാറിനും ചൂണ്ടുവിരലിനും അഭിനന്ദനങ്ങൾ....
ഇതിന് കൈയ്യടി നൽകേണ്ടത് കേരള വിദ്യാഭ്യാസ വകുപ്പ് മന്ത്രിക്കും അദ്ദേഹത്തിന് പരിപൂർണ്ണ പിന്തുണ നൽകുന്ന കേരള സർക്കാരിനും ആണ് കൂടാതെ ഭംഗ്യന്തരേണ ഇത്തരം കാര്യങ്ങൾ ഏറ്റെടുത്ത് മാതൃകയാവുന്ന പ്രധാനാധ്യാപകർ നാളെ വിദ്യാഭ്യാസ ചരിത്രത്തിൽ ഇടം പിടിക്കും എന്ന കാര്യം അവിതർക്കിതമാണ്... കൂടാതെ ഇത്തരം ഇടപെടലുകൾ അധ്യാപക സമൂഹത്തിന് മുമ്പാകെ എത്തിച്ച് അവരെ കർമ്മനിരതരാക്കുന്ന സാറിൻറെ പ്രവർത്തനം മഹനീയം ആണ്. നന്ദി സർ.
ആദ്യഘട്ടത്തിൽ ട്രയൽ രീതിയിൽ തുടങ്ങിയ നമ്മുടെ ഓൺലൈൻ പഠനരീതി ഇപ്പോൾ നമ്മുടെ പഠനനേട്ടങ്ങൾ മുൻനിർത്തി പാഠ ഭാഗങ്ങളിലേക്ക് പ്രവേശിക്കുന്ന ഒരു സന്ദർഭത്തിലാണ് നമ്മൾ തീർച്ചയായിട്ടും നമ്മുടെ കുട്ടികൾക്ക് വിക്ടേഴ്സ് ചാനൽ വഴി ക്ലാസിനുശേഷം നൽകുന്ന തുടർപ്രവർത്തനങ്ങൾ ,അധ്യാപകർ നടത്തുന്ന ചർച്ച വളരെ ഫലപ്രദമാണ് എന്നുള്ള അഭിപ്രായം തെളിവുകളുടെ അടിസ്ഥാനത്തിൽ ഇവിടെ വിവരിച്ചിരിക്കുന്നത്. ഒന്നും ചെയ്യാനില്ലാത്ത ഒരു കാലത്ത് അത് വളരെ വ്യക്തമായ ചിന്തയോടെ കൂടി ഇത്തരമൊരു സംവിധാനം നമ്മുടെ കുട്ടികൾക്ക് ഏർപ്പെടുത്തിയ വിദ്യാഭ്യാസ വകുപ്പ് മനസ്സിലെ ആശങ്കകളെ മറികടക്കുന്ന രീതിയിൽ ഉള്ള ഒരു പ്രവർത്തന പദ്ധതിയാണ് തുടക്കം കുറിച്ചത്. അതുകൊണ്ടുതന്നെ ഇൗ സംവിധാനം വളരെ ഫലപ്രദമായി ആയി രക്ഷിതാക്കളിലും കുട്ടികളിലേക്കും എത്തിക്കേണ്ടതും വളരെ ക്രിയാത്മകമായി ഇത്തരം പ്രവർത്തനങ്ങളിൽ ഏർപ്പെടുന്നുണ്ടോ എന്ന് എന്ന് പരിശോധിക്കപ്പെടേണ്ടതുണ്ട് ആവശ്യമായ ഒരു സന്ദർഭത്തിലാണ് നമ്മളെല്ലാവരും.എന്തായാലും പരിമിതികളെ മറികടക്കാൻ അത് അത്യാവശ്യമാണ് അതിനുള്ള പ്രവർത്തന പദ്ധതികൾ എല്ലാം ആവിഷ്കരിച്ച് നടപ്പിലാക്കേണ്ടതുണ്ട്. ആസൂത്രണത്തിലൂടെ പ്രവർത്തനങ്ങൾ തുടരട്ടെ. ഇത്തരം ഇളം പൂർ ജ്ജ് നൽകുന്ന പ്രതികരണങ്ങളെ അധ്യാപക സമൂഹത്തിലേക്ക് എത്തിക്കുന്ന കലാധരൻ സാറിന് കടപ്പാട് .
ഇത്തരം പഠനങ്ങൾ എല്ലാ വിദ്യാലയങ്ങളും നടത്തണം.അതിനു ഇൗ കണ്ടെത്തലുകൾ സഹായകരമാകും
ഓൺലൈൻ ക്ലാസുകൾ ഫലപ്രദമായി നടക്കുന്നു എന്നുതന്നെയാണ് ഞങ്ങളുെടെ സ്കൂൾ അനുഭവം. വിക്ടേഴ്സ് ക്ലാസുകൾ പഠന ആശയങ്ങൾ കുട്ടികളിലേക്ക് എത്തിക്കുന്നുണ്ട്. ശാസ്ത്ര വിഷയങ്ങളിൽ പ്രക്രിയാശേഷികൾ ആർജിക്കുന്നതിൽ ഓൺെലൈൻ ക്ലാസുകൾ ചില പരിമിതികൾ നേരിടുന്നു. എങ്കിലും പരമാവധി സാധ്യത തുറന്നിടാനുള്ള ശ്രമമുണ്ട്. അതത് അധ്യാപകർ വിശദീകരണവും തുടർ പ്രവർത്തനങ്ങളും തീർച്ചയായും നൽകണം. മലപ്പുറം ജില്ലയിൽ DEO യുടെ പത്ര പ്രസ്താവനയും ഡയറ്റ് അധ്യാപകരുടെ ഇടപെടലും ഇത്തരം ക്ലാസുകൾ അധ്യാപകർ നൽകാൻ പാടില്ല, കെെറ്റ് പ്രവർത്തനങ്ങൾ മാത്രം നൽകിയാൽ മതി എന്ന സന്ദേശം പ്രചരിപ്പിച്ചിട്ടുണ്ട്. ഞങ്ങൾ ഇപ്പോൾ നൽകിവരുന്ന പല തുടർ ക്ലാസുകളും നിർത്തുകയും കെെറ്റ് ക്ലാസ് പ്രവർത്തനങ്ങൾ മാത്രമായി ഒതുങ്ങുകയും ചെയ്തിട്ടുണ്ട്. 90 ശതമാനത്തിലധികം കുട്ടികളെ പ്രവർത്തനത്തിലേക്ക് കൊണ്ടുവന്ന് മികച്ച രീതിയിൽ നടത്തിയ പ്രവർത്തനത്തിന് അധികൃതരുടെ ഭാഗത്ത് നിന്ന് അഭിനന്ദനമല്ല, മറിച്ച് അങ്ങനെ ചെയ്യുന്നതിന് അനുമതിയില്ല എന്ന സന്ദേശമാണ് ഞങ്ങൾക്ക് ലഭിച്ചത്. കെെറ്റ് ക്ലാസ് Timetable മാറിക്കൊണ്ടിരിക്കുന്നു. എല്ലാ ആഴ്ചയും എല്ലാ വിഷയവും ഇല്ല. അതിനാൽ ചില ആഴ്ചകൾ വെറുതെയിരിക്കേണ്ടി വരുന്നു. അധ്യാപകർ നൽകുന്ന ക്ലാസുകളെ സമാന്തര ക്ലാസുകൾ എന്നാണ് ഇവിടെ വിശേഷിപ്പിക്കുന്നത്. അതിന് മുകളിൽ അനധികൃതം എന്ന ഭീഷണി തൂക്കിയിടുന്നുമുണ്ട്. ഇതെല്ലാം കാണുമ്പോൾ മികച്ച രീതിയിൽ പ്രവർത്തനം നടക്കുന്നതിനെ പിന്നോട്ട് വലിക്കാൻ ചിലർ രാജാവിനെക്കാൾ വലിയ രാജഭക്തി കാണിക്കുന്നുണ്ടോ എന്ന് സംശയമുണ്ട്.
വ്യത്യസ്തമായ ഇത്തരം രീതികൾ കാണുന്നതും കലാധരൻ സാറിനെപ്പോലുള്ളവർ ഇങ്ങെനെയുള്ള പ്രവർത്തനങ്ങളെ പിന്തുണക്കുന്നതും തികച്ചും ആശ്വാസകരം തന്നെ.
ഓൺ ലൈൻ ക്ലാസ്സിന്റെ വിജയത്തിൽ രക്ഷിതാക്കളുടെ പിന്തുണ വളരെ വലുതാണ്. പരിമിതികൾ തിരിച്ചറിഞ്ഞ് പരിഹാര പ്രവർത്തനങ്ങൾ ആസൂത്രണം ചെയ്യാൻ മാതൃകാപരമായ അന്വോഷണ പഠനമാണ് സലിജ ടീച്ചർ ചെയ്തത്. ടീച്ചർക്ക് അഭിനന്ദനങ്ങൾ.ഇത്തരം മാതൃകകൾ ഞങ്ങളിലേക്ക് എത്തിച്ച നമ്മുടെ കലാധരൻ സാറിന് ഒരു പാടു നന്ദി.
അധ്യാപക കേന്ദ്രിതമായ അവതരണ രീതി ആകർഷകമാക്കാനുള്ള പൊടിക്കൈകളായി ആനിമേഷനും മറ്റു തന്ത്രങ്ങളും ഉപയോഗിക്കുന്നവരുണ്ട്. അവയെ താഴെ തലത്തിൽ മറികടക്കണം
അതിനുള്ള അധ്യാപകരുടെ സ്വാതന്ത്ര്യത്തെ മലപ്പുറത്തിൻ്റെ വിദ്യാഭ്യാസ ഭരണ നേതൃത്വവും അക്കാദമിക നേതൃതസ്വവും തടയുന്നുവെന്നത് അത്ഭുതപ്പെടുത്തുന്നു.
വിക്ടേഴ്സ് ക്ലാസുകൾ ഒരു പ്രതികൂല സാഹചര്യം മറികടക്കാനുള്ള ഇടപെടൽ മാത്രമാണ്. സംപ്രേഷണം ചെയ്യുന്നതെല്ലാം മാതൃകകളല്ല.
സാമൂഹിക ജ്ഞാന നിർമിതി, ഭാഷാസമഗ്രതാ ദർശനം എന്നിവയെക്കുറിച്ച് ഉൾക്കാഴ്ചയില്ലാത്ത അവതരണങ്ങൾ വരുന്നത് അധ്യാപക അവതാരകരുടെ മാത്രം കുറ്റം കൊണ്ടല്ല. മേൽനോട്ടം വഹിക്കുന്നവരുടെ നിർദ്ദേശങ്ങളും കാഴ്ചപ്പാടുകളും പ്രതിഫലിപ്പിക്കുവാൻ അവർ നിർബന്ധിതരാണ്. സമീപന ധാരണയുള്ള അധ്യാപകർ പൂരക പ്രവർത്തനങ്ങൾ ഏറ്റെടുക്കണം.
കുട്ടികളുടെ പഠന നിലവാരം മെച്ചപ്പെടുത്തുന്നതിനു ഈ വിവരണം സഹായിച്ചു.
Post a Comment