ചൂണ്ടുവിരലിലെ വിഭവങ്ങള്‍

2010 ജൂലൈമുതല്‍ അക്കാദമിക വിഭവങ്ങളുമായി ഈ വിദ്യാഭ്യാസ ബ്ലോഗ് ...പ്രയോജനപ്പെടുത്തുക, പ്രയോഗിക്കുക, പ്രചോദിപ്പിക്കുക, പ്രചരിപ്പിക്കുക.. ചൂണ്ടുവിരലില്‍ പങ്കിട്ട വിഭവമേഖലകള്‍....> 1.അധ്യാപക ശാക്തീകരണം ,2. വായനയുടെ വഴി ഒരുക്കാം, 3.എഴുത്തിന്‍റെ തിളക്കം, 4.വിദ്യാഭാസ ഗുണനിലവാരം- സംവാദം,5. മികവ്, 6.ശിശുസൌഹൃദ വിദ്യാലയം, 7.സര്‍ഗാത്മക വിദ്യാലയം, 8.നിരന്തര വിലയിരുത്തല്‍, 9.ഗണിതപഠനം, 10.വിദ്യാഭ്യാസ അവകാശ നിയമം, 11.ദിനാചരണങ്ങള്‍, 12.പാര്‍ശ്വവത്കരിക്കപ്പെടുന്നവര്‍, 13. രക്ഷിതാക്കളും സ്കൂളും, 14. കളരി, 15. ക്ലാസ് അന്തരീക്ഷം/ക്രമീകരണം, 16.ഇംഗ്ലീഷ് പഠനം, 17.ഒന്നാം ക്ലാസ്, 18. ശാസ്ത്രത്തിന്റെ പാത, 19.ആവിഷ്കാരവും ഭാഷയും, 20. പ്രത്യേക പരിഗണന അര്‍ഹിക്കുന്ന കുട്ടികള്‍, 21. ഐ ടി സാധ്യതകള്‍, 22. പഠനറിപ്പോര്‍ട്ടുകള്‍, 23.പഠനമാധ്യമം 24. ഭൌതികസൌകര്യങ്ങളില്‍ മികവ്, 25.അക്കാദമികസന്ദര്‍ശനം, 26.ഗ്രാഫിക് ഓര്‍ഗനൈസേഴ്സ്, 27.പ്രഥമാധ്യാപകര്‍.,28. ബാല, 29. വളരുന്ന പഠനോപകരണം,30. കുട്ടികളുടെ അവകാശം, 31. പത്രങ്ങള്‍ സ്കൂളില്‍, 32.പാഠ്യപദ്ധതി,33. ഏകീകൃത സിലബസ്, 34.ഡയറ്റ് .35.ബി ആര്‍ സി,36. പരീക്ഷ ,37. പ്രവേശനോത്സവം,38. IEDC, 39.അന്വേഷണാത്മക വിദ്യാലയങ്ങളുടെ ലോകജാലകം, 40. കലാവിദ്യാഭ്യാസം, 41.പഞ്ചായത്ത്‌ വിദ്യാഭ്യാസ സമിതി, 42. പഠനോപകരണം, 43.പാഠ്യപദ്ധതി പരിഷ്കരണം, 44. ചൂണ്ടുവിരല്‍,45. ടി ടി സി, 46.പുതുവര്‍ഷം, 47.പെണ്‍കുട്ടികളുടെ ശാക്തീകരണം, 48. ക്രിയാഗവേഷണം,49. ടീച്ചിംഗ് മാന്വല്‍, 50. പൊതുവിദ്യാഭ്യാസസംരക്ഷണം, 51.ഫീഡ് ബാക്ക്, 52.സ്റ്റാഫ് റൂം, 53. കുട്ടികളുട അവകാശം,54. കൃഷിയും പഠനവും,55. നോട്ട് ബുക്ക് ആകര്‍ഷകവും സമഗ്രവും, 56.പഠനയാത്ര, 57. വിദ്യാബ്ലോഗുകള്‍,58. സാമൂഹികശാസ്ത്രം, 59. സ്കൂള്‍ അസംബ്ലി, 60.സ്കൂള്‍ റിസോഴ്സ് (റിസേര്‍ച്) ഗ്രൂപ്പ് - ,61.പ്രതിഫലനാത്മകക്കുറിപ്പ്, 62. ബദല്‍പാഠങ്ങള്‍, 63.മെന്ററിംഗ്,64. വര്‍ക്ക്ഷീറ്റുകള്‍ ക്ലാസില്‍, 65.വിലയിരുത്തല്‍, 66. സാമൂഹിക ശാസ്ത്രാന്തരീക്ഷം, 67.അനാദായം, 68.എ ഇ ഒ , 69.കായികവിദ്യാഭ്യാസം,70. തിയേേറ്റര്‍ സങ്കേതം പഠനത്തില്‍, 71.നാടകം, 72.നാലാം ക്ലാസ്.73. പാഠാവതരണം, 74. മോണിറ്ററിംഗ്, 75.വിദ്യാഭ്യാസ ചിന്തകള്‍, 76.സഹവാസ ക്യാമ്പ്, 77. സ്കൂള്‍ സപ്പോര്‍ട്ട് ഗ്രൂപ്പ്,78.പ്രദര്‍ശനം,79.പോര്‍ട്ട്‌ ഫോളിയോ...80 വിവിധജില്ലകളിലൂടെ... പൊതുവിദ്യാഭ്യാസത്തിന്റെ കരുത്ത് അറിയാന്‍ ചൂണ്ടുവിരല്‍...tpkala@gmail.com.

Tuesday, September 3, 2019

ദേശീയ അധ്യാപക അവാര്‍ഡ് നേടിയ മഹേഷും 75 ദിന പരിപാടിയും


ഒന്നാംക്ലാസ്സില്‍ കൂട്ടിനൊരു കുട്ടിപോലുമില്ലാതെ അര്‍ച്ചന ഒറ്റയ്ക്കിരുന്ന ആ സ്‌കൂളിനെ
കേരളത്തിലെ ഏറ്റവും സന്തോഷമുള്ള സ്‌കൂള്‍ എന്നാണ് ദ് ന്യൂ ഇന്‍ഡ്യന്‍ എക്‌സ്പ്രസ് വിശേഷിപ്പിച്ചത്. വെറും 75 ദിവസം കൊണ്ടായിരുന്നു ആ മാറ്റം
2016-ല്‍ പ്രവേശനോത്സവം നടക്കുമ്പോള്‍ ഒന്നാംക്ലാസ്സില്‍ അര്‍ച്ചന ചന്ദ്രന്‍ എന്ന കുട്ടി മാത്രം. അവള്‍ക്ക് കൂട്ട് ക്ലാസ് ടീച്ചര്‍ മഞ്ജുള മാത്രം. മൊത്തം സ്‌കൂളിന്‍റെ അവസ്ഥയും മെച്ചമൊന്നുമായിരുന്നില്ല. "ക്ലാസ്മുറിയിൽ ഇനി അർച്ചന ഒറ്റക്കല്ല; കൂട്ടിന് ആദിത്യനുമെത്തി" 2017ജൂണ്‍ ഒമ്പതിന്റെ വാര്‍ത്താശീര്‍ഷകമാണ് . വേറെ സ്‌കൂളില്‍ നിന്ന് ടി സി വാങ്ങി വന്ന ആദിത്യന്‍. അങ്ങനെ രണ്ടാം ക്ലാസ്സില്‍ രണ്ടുപേരായി. ഇങ്ങനെ പോയാല്‍ സ്‌കൂള്‍ പിള്ളേരില്ലാതെ അടച്ചുപൂട്ടേണ്ടി വരും.
ആരോഗ്യവകുപ്പ് ജീവനക്കാരനായ പ്രദീപ് കുമാറും കെ സവിതയും മകന്‍ ഷയറി എസ് ദീപിനെ ഈ സ്‌കൂളിലേ ഒന്നാംക്ലാസ്സില്‍ ചേര്‍ക്കാന്‍ തീരുമാനിച്ചു. ആറ് കിലോമീറ്റര്‍ ദൂരമുണ്ട് ഷയറിയുടെ വീടിരിക്കുന്ന മുഴക്കോത്തു നിന്നും സ്‌കൂളിലേക്ക്. ഷയറിയെ ചെറിയാക്കര സ്‌കൂളില്‍ പഠിപ്പിക്കാന്‍ ആ ബുദ്ധിമുട്ട് സഹിക്കാന്‍ അച്ഛനമ്മമാര്‍ തയ്യാറായിരുന്നു. കാരണം മകന്‍ സന്തോഷത്തോടെ സ്‌കൂളില്‍ പോകണമെന്നും ചിരിച്ചുകൊണ്ടുതന്നെ തിരിച്ചുവരണമെന്നും അവര്‍ അതിയായി ആഗ്രഹിച്ചു.
ചെങ്കല്ലു നിറഞ്ഞ കുന്നിന്‍ ചെരിവിലെ ഗവണ്‍മെന്‍റ് എല്‍ പി സ്‌കൂള്‍. അന്നാട്ടിലെ അധികം പേരും കൂലിപ്പണിക്കാരും തൊഴിലുറപ്പുതൊഴിലാളികളുമൊക്കെയാണ്. സ്കൂളിലേക്കുളള വഴി യാത്രായോഗ്യമായിരുന്നില്ല. പ്രധാനകവലയില്‍ ബസിറങ്ങി നടക്കണം. അതും കുത്തനെയുളള വഴിയിലൂടെ. വഴിയോരത്ത് വീടുകള്‍ കുറവാണ്. റബ്ബര്‍ തോട്ടം. രക്ഷിതാക്കള്‍ മക്കളെ വിടാന്‍ മടിച്ചു. വിദ്യാലയം ആകര്‍ഷകമായിരുന്നില്ല. മുഴിഞ്ഞ നിറത്തില്‍ മനംമടുപ്പിച്ച് അത് നനഞ്ഞു നിന്നു.
സ്കൂളാകെ മാറി
  • സ്മാർട്ട് ക്ലാസടക്കമുള്ള ആധുനികസംവിധാനങ്ങളുള്ള ക്ലാസ്മുറികള്‍
  • വർണം  വിതറിയ മനോഹരമാക്കിയ ചുമരുകൾ.

    ചെറിയാക്കര അന്നും ഇന്നും
     
    ഹരിതപന്തൽ,
  • ചെറുജലാശയം ഉൾപ്പെടെയുള്ള പാർക്ക്.
  • ഗ്രോബാഗുകളിൽ തളിർത്തുനിൽക്കുന്ന പച്ചക്കറികൾ.
  • എല്ലാ കുട്ടികളും കംപ്യൂട്ടർ പഠനം.
  • മൂന്ന്, നാല് ക്ലാസിലെ കുട്ടികൾക്ക് മലയാളം ഡിടിപിയിലും പരിശീലനം
  • അധ്യാപകർ, പിടിഎ, പൂർവ വിദ്യാർഥികൾ, നാട്ടുകാർ എന്നിവർ സജീവമായി
  • സ്‌കൂളിലെ പഠന രീതികളും അന്തരീക്ഷവും അടിമുടി മാറി.
  • തകർന്നു കിടന്ന റോഡ് പഞ്ചായത്തിന്റെ നേതൃത്വത്തിൽ ടാർ ചെയ്ത് മികവുറ്റതാക്കി. രാവിലെ
  • കുട്ടികൾ രാവിലെ ഒമ്പതിന്  സ്‌കൂളില്‍. ഒരു മണിക്കൂർ സമയം മാജിക്ക് ഇംഗ്ലീഷിന്റെ ലോകം. പാട്ടുപാടും, കഥ കേൾക്കും കാർട്ടൂണുകൾ കണ്ട് ഇംഗ്ലീഷ് പഠിക്കും. 
  • രക്ഷിതാക്കൾക്ക് കുട്ടികളുടെ പഠന നിലവാരം അറിയാൻ കുട്ടിയെ അറിയാൻ എന്ന പേരിൽ  മൊബൈൽ ആപ്പു്
  • ഓൺലൈൻ പരീക്ഷകളുടെ സാധ്യത പ്രൈമറി തലത്തിൽ പരിചയപ്പെടുത്താൻ പെഡഗോമാറ്റിക് ഇന്റർ നാഷണലുമായി ചേർന്ന് വേറിട്ട പദ്ധതി.
  • ജെവ വൈവിധ്യ ഉദ്യാനം, ജൈവ പന്തൽ, കുട്ടികളുടെ പാർക്ക്, ചിത്രീകരണം എന്നിവയെല്ലാം  കർമ പദ്ധതിയിൽ പൂർത്തിയാക്കി.
  • എൽഎസ്എസ് വിജയത്തിന‌് സമീപ വിദ്യാലയങ്ങളുമായി ചേർന്ന് പരിശീലന പദ്ധതി
  • സ്മാർട്ട് സ്‌കൂൾ സ്മാർട്ട് 50 പദ്ധതിയും ആരംഭിച്ചു. പ്രീ പ്രൈമറി മുതൽ നാലാം ക്ലാസുവരെ ലക്ഷ്യമിട്ടാണ് പദ്ധതി.
  • സ്‌കൂളിന്റെ വികസനത്തിനായി പൂർവ വിദ്യാർഥി കൂട്ടായ്മ
  • മികച്ച ക്ലാസ് മുറികളൊരുക്കാനുള്ള പ്രവർത്തനം അവർ നടത്തി.
  • കുട്ടികളുടെ യാത്രാക്ലേശം പരിഹരിക്കാൻ വാഹന സൗകര്യവും . 
  • എം രാജഗോപാലൻ എംഎൽഎയുടെ ഫണ്ടിൽ നിന്നും അനുവദിച്ച തുക കൊണ്ട് സ‌്കൂളിൽ ചുറ്റുമതില്‍
  • കളിയുപകരണങ്ങൾ ഉൾപ്പെടെയുള്ള പാർക്കും ഒരുങ്ങി.
  • സ്‌കൂളിലെ ഓരോ പരിപാടിയിലും നാട്ടുകാരുടെ സജീവപങ്കാളിത്തം.
ചെറിയാക്കര അന്നും ഇന്നും
ഈ മാറ്റത്തിനു പിന്നില്‍ പ്രവര്‍ത്തിച്ചത് മഹേഷ് എന്ന അധ്യാപകനാണ്. മനോരമ വിശേഷിപ്പിച്ചത് മഹേഷ് എന്ന മാണിക്യകല്ലെന്നാണ്. ചെറിയാക്കര വിദ്യാലയത്തിലെ മാറ്റത്തെക്കുറിച്ച് മഹേഷ് തന്നെ പറയട്ടെ. അതു വായിക്കൂ.
1. അർച്ചനയ്ക്ക് കൂട്ടുവേണം ചെറിയാക്കരയിൽ'
2016 ജൂണ്‍ 30 വരെ ചെറുവത്തൂര്‍ ബി ആര്‍ സിയിലെ ബിപിഒ ചുമതലയിലായിരുന്നു ഞാന്‍. 'അർച്ചനയ്ക്ക് കൂട്ടുവേണം ചെറിയാക്കരയിൽ'-ഈ വാര്‍ത്ത വന്ന ദിവസം എന്റെ സുഹൃത്തായ തൊട്ടടുത്ത വിദ്യാലയത്തിലെ പ്രധാനാധ്യാപകനോട് ഞാന്‍ ചോദിച്ചു,"താങ്കളുടെ വിദ്യാലയത്തില്‍ കുറേ കുട്ടികള്‍ ചെറിയാക്കര സ്കൂളിന്റെ സമീപപ്രദേശത്തു നിന്നും വരുന്നുണ്ടല്ലോ? താങ്കള്‍ക്ക് ഒന്നോ രണ്ടോ കുട്ടികളെ ചെറിയാക്കരയിലേക്ക് അയക്കാന്‍ രക്ഷിതാക്കള്‍ വഴി ഒരു ശ്രമം നടത്തിക്കൂടേ?”

"ആദ്യം അവിടെയുള്ള പൗരപ്രമുഖര്‍ തങ്ങളുടെ കുട്ടികളെ അവിടെ ചേര്‍ത്ത് പഠിപ്പിക്കട്ടെ അല്ലെങ്കില്‍ ആ പ്രദേശത്ത് നിന്നും അണ്‍ എയ്ഡഡ് വിദ്യാലയത്തിലേക്ക് കുട്ടികളെ അയക്കുന്ന രക്ഷിതാക്കള്‍ ആദ്യം തങ്ങളുടെ മക്കളെ അവിടെ ചേര്‍ക്കട്ടെ ,അതിനുശേഷം എന്റെ വിദ്യാലയത്തിലെ കുട്ടികളെ അവിടെ ചേര്‍ക്കുന്നതിനെ കുറിച്ച് ആലോചിക്കാം”.ഇതായിരുന്നു അദ്ദേഹത്തിന്റെ മറുപടി.രാത്രി ഞങ്ങള്‍ കുറേ നേരം തര്‍ക്കിച്ചു.
ഒരു ക്ലാസില്‍ ഒരു കുട്ടി മാത്രം..എത്രമാത്രം ഭീതിജനകമാണ് അത്..
കുട്ടിയുടെ സന്തോഷം..സന്തോഷകരമായ പഠനം ഇത് നമ്മളടക്കമുള്ള പൊതു സമൂഹത്തിന്റെ ഉത്തരവാദിത്തമല്ലേ? ഞാന്‍ ന്യായങ്ങള്‍ നിരത്തി.
ശുഭകരമായി യാതൊന്നും ആ വര്‍ഷം നടന്നില്ല.
ചെറിയാക്കരയില്‍ അര്‍ച്ചനക്ക് തനിച്ചിരിക്കേണ്ടി വന്നു...ഒരു വര്‍ഷം.
2 ചെറിയാക്കരയുടെ മനസ് വിളിക്കുന്നു
2016 ജൂണ്‍ 30 ന് ബി ആര്‍ സി പ്രവര്‍ത്തനത്തോട് വിട പറഞ്ഞ് ഞാന്‍ വിദ്യാലയത്തിലേക്ക് ചേക്കേറി. മനസ്സില്‍ ഒരു ആഗ്രഹം സൂക്ഷിച്ചിരുന്നു.ചെറിയാക്കര വിദ്യാലയത്തില്‍ അധ്യാപകനായി വരണം. വിദ്യാലയം നേരിടുന്ന പ്രതിസന്ധികളെ പഠിക്കണം.ആരും ആഗ്രഹിക്കുന്ന വിദ്യാലയമാക്കി ചെറിയാക്കരയെ മാറ്റണം.
ആരുടെ മുന്നിലും തലകുനിക്കാതെ അഭിമാനത്തോടെ ഉയര്‍ന്നു നില്‍ക്കാന്‍ കഴിയുന്ന വിദ്യാലയമായി ചെറിയാക്കര വളരണം.

ഇതൊക്കെ മനസ്സില്‍ സ്വപ്നമായി സൂക്ഷിച്ചു.
ബി ആര്‍ സി വിട്ട് ആദ്യ രണ്ടുമാസം ജി എച്ച് എസ് എസ് കുണ്ടംകുഴിയില്‍. പിന്നെ ഒരു 6 മാസം ജി ഡബ്ല്യു എല്‍ പി എസ് ബാരയില്‍. 6 മാസം ജി എം എല്‍ പി എസ് അജാനൂരില്‍.
പിന്നെ 6 മാസം മഹാകവി പി സ്മാരക വൊക്കേഷണല്‍ ഹയര്‍ സെക്കന്ററി വിദ്യാലയത്തില്‍
പിന്നെ 6 മാസം ജി എച്ച് എസ് എസ് ചായോത്ത്. (2016 ജുലായ് 1 മുതല്‍ 2018 ഒക്ടോബര്‍ 24 വരെ - 2 വര്‍ഷം 3 മാസക്കാലം 5 വിദ്യാലയങ്ങളിലായി അധ്യാപക ജീവിതം.)
2018 ഒക്ടോബര്‍ 24 ന് എന്റെ സ്വപ്നം സാക്ഷാത്കരിക്കാന്‍ ഞാന്‍ ആഗ്രഹിച്ച ജി എല്‍ പി എസ് ചെറിയാക്കരയില്‍.
ചെറിയാക്കരയില്‍ നടപ്പിലാക്കേണ്ട വികസന പദ്ധതികള്‍, അതിന്റെ പ്രായോഗികത എന്നിവയൊക്കെ ട്രൈഔട്ട് ചെയ്ത് നോക്കാന്‍ ജി ഡബ്ല്യു എല്‍ പി എസ് ബാരയിലും ജി എം എല്‍ പി എസ് അജാനൂരിലും അവസരങ്ങള്‍ ലഭിച്ചു. ബാരയിലെ മുന്നേറ്റത്തെയും മികവിനെയും സംസ്ഥാന മികവുത്സവം വരെ എത്തിക്കാന്‍ സാധിച്ചത് എന്നിലെ ആത്മവിശ്വാസം വളര്‍ത്തി..
ജി എച്ച് എസ് എസ് ചായോത്ത് നിന്നും ഏറെ പ്രയാസപ്പെട്ടാണ് ഞാന്‍ ചെറിയാക്കര എത്തിയത്.ചായോത്തെ 130 കുട്ടികളുടെ ഇംഗ്ലീഷ് അധ്യാപകനായിരുന്നു ഞാന്‍.
5 മാസത്തില്‍ താഴെ മാത്രമേ അവിടെ ജ‌ോലി ചെയ്തിട്ടുള്ളൂ എങ്കിലും കുട്ടികളും ,രക്ഷിതാക്കളും അധ്യാപകരുമായി(പ്രത്യേകിച്ചും രാജന്‍ മാഷും,സുനീതി ടീച്ചറുമായി) വല്ലാത്ത ഒരു ആത്മബന്ധം എനിക്കുണ്ടായിരുന്നു. എന്നാലും ചെറിയാക്കര എന്ന ലക്ഷ്യം എന്നെ ചായോത്തിനോട് വിട പറയാന്‍ പ്രേരിപ്പിച്ചു. വിടപറയും ദിനം എല്ലാ കുട്ടികള്‍ക്കും ‌ഒരു പേന സമ്മാനമായി കൊടുത്തപ്പോള്‍ കുട്ടികള്‍ പ്രയാസത്തോടെ ചോദിച്ചു..ഞങ്ങളെ എന്നെങ്കിലും ചെറിയാക്കര കൊണ്ടുപോകുമോ എന്ന്. (ഇതിനിടയില്‍ ചെറിയാക്കരയെക്കുറിച്ചും ഓട്ടുറുമയയെ കുറിച്ചും 13 കുട്ടികളെ കുറിച്ചും ചായോത്തെ എന്റെ മക്കള്‍ക്ക് നല്ല ബോധ്യമുണ്ടായിരുന്നു)
3 മനപ്പൊരുത്തമുളള ടീം
2018 ഒക്ടോബര്‍ 24 ന് ജി എല്‍ പി എസ് ചെറിയാക്കരയില്‍ എത്തിയപ്പോള്‍ പിന്തുണയായി, തോളോടുതോള്‍ ചേര്‍ന്ന് പ്രവര്‍ത്തിക്കാന്‍ മികച്ച ഒരു അധ്യാപകടീമിനെയും കിട്ടി എന്നത് വലിയ അനുഗ്രഹമായിരുന്നു. വളരെ രാവിലെത്തന്നെ വിദ്യാലയത്തിലെത്തി കര്‍മ്മനിരതനാകുന്ന സതീശന്‍ മാഷും  ചെറിയാക്കര വളര്‍ന്നുകാണണമെന്ന് എന്നും ആഗ്രഹിച്ച് ക്ലാസ്മുറിക്കകത്ത് കഠിനാധ്വാനം ചെയ്യുന്ന എന്റെ ചേച്ചി മഞ്ജുള. ഒപ്പം മികച്ച അധ്യാപികകൂടിയായ പ്രധാനാധ്യാപിക ബേബി ടീച്ചര്‍.പ്രീപ്രൈമറി അധ്യാപിക രേഷ്മ, നമ്മുടെ പിടിസിഎം, കഠിനാധ്വാനിയായ തമ്പാനേട്ടന്‍, ഭക്ഷണം പാകം ചെയ്യുന്ന സരോജിനിചേച്ചി ഞങ്ങള്‍ പെട്ടെന്ന് ടീമായി....
4 ചെറിയാക്കരയുടെ മുറ്റത്ത് മറ്റു വിദ്യാലയങ്ങളിലെ കുട്ടികളെത്തി 
ചെറിയാക്കരയെ എങ്ങനെ വ്യത്യസ്തമാക്കാം എന്ന ആലോചന മുന്നോട്ടുവെച്ചപ്പോള്‍ എല്ലാവരും എന്തിനും തയ്യാര്‍..13 കുട്ടികളെയും 4 പ്രീപ്രൈമറി കുട്ടികളെയും രാവിലെ 9 മണി മുതല്‍ 10 വരെ ഒന്നിച്ചിരുത്തി കഥ,കളി,കാര്‍ട്ടൂണ്‍ എന്നിവയിലൂടെ ഇംഗ്ലീഷ് പഠിപ്പിക്കാന്‍ ഞങ്ങള്‍ തീരുമാനമെടുത്തു. അങ്ങനെ അടുത്ത ദിവസം മുതല്‍ ചെറിയാക്കരയിലെ പ്രവര്‍ത്തന സമയം രാവിലെ 9 മണിയായി.
രണ്ടു ദിവസം കഴിഞ്ഞ് ഒക്ടോബര്‍ 27 ന് ഞാന്‍ ചെറിയാക്കര, പൊതാവൂര്‍ എന്നീ വിദ്യാലയങ്ങളിലെ കുട്ടികളെ ഉള്‍പ്പെടുത്തി ഒരു എല്‍ എസ് എസ് ക്ലാസിന് തുടക്കമിട്ടു. ചായോത്തെ എന്റെ കുട്ടികളെ ഓര്‍മ്മവന്നപ്പോള്‍ രക്ഷിതാക്കളുടെ ഗ്രൂപ്പില്‍ ക്ലാസിന് വരുന്നവര്‍ക്ക് സ്വാഗതം എന്നൊരു ഇന്‍വിറ്റേഷനും അയച്ചു. 27 ന് ശനി ചെറിയാക്കരയുടെ മുറ്റത്ത് 50 നടുത്ത് കുട്ടികളെത്തി. വര്‍ഷങ്ങളായി 30 ല്‍ താഴെ കുട്ടികള്‍ മാത്രം പെരുമാറിയ വിദ്യാലയ മുറ്റത്തും പിന്നെ എല്‍ എസ് എസ് ക്ലാസിലും അമ്പതോളം കുട്ടികള്‍.
എനിക്കെന്തോ വല്ലാത്ത ഊര്‍ജ്ജം കിട്ടിയ പോലെ.

മനസ്സും ആഗ്രഹിച്ചു...ഇത്രയും കുട്ടികള്‍ എന്നും ചെറിയാക്കരക്ക് വേണം..
സന്തോഷമുള്ള ആ ദിനം കടന്നുപോയി....
ഒരു രക്ഷിതാവിനെപ്പോലും നേരിട്ട് വിളിക്കാതെയുമാണ് ഇത്രയും കുട്ടികള്‍ ചെറിയാക്കര വന്നത് . ചെറിയാക്കരേക്ക് വരാന്‍ കുട്ടികള്‍ താല്പര്യം കാണിച്ചതിന് പിന്നില്‍
ഒരധ്യാപകനോട് കുട്ടികള്‍ കാണിക്കുന്ന സ്നേഹമായിരുന്നു എന്നും ഇത് അധ്യാപകന്‍ കുട്ടികളോട് കാണിച്ച കരുതലിന്റെ പ്രതികരണമാണെന്നും ചായോത്തെ പ്രിയപ്പെട്ട എന്റെ രക്ഷിതാക്കള്‍ക്കറിയാം. അവര്‍ ഫോണിലൂടെ എന്റെ വിശേഷങ്ങള്‍ അന്വേഷിക്കുന്നത് തുടര്‍ന്നുകൊണ്ടേയിരിക്കുന്നു.
സര്‍വേ ഫല വിശകലനം നല്‍കിയ തിരിച്ചറിവ്
പിന്നീടുള്ള ശ്രമം ചെറിയാക്കരയെ പഠിക്കാനുള്ളതായിരുന്നു. കയ്യൂര്‍ ചീമേനി പഞ്ചായത്തില്‍ നിന്ന് പഞ്ചായത്ത് വിദ്യാഭ്യാസ സമിതി കണ്‍വീനര്‍ ശ്രീ അനില്‍ കുമാര്‍ മാഷിന്റെ ( ചെറിയാക്കരയുടെ വികസനത്തിന് വലിയ അളവില്‍ അനില്‍മാഷിന്റെ പിന്തുണ ലഭിക്കുന്നുണ്ട്) സഹായത്തോടെ കഴിഞ്ഞ വര്‍ഷം പൂര്‍ത്തിയാക്കിയ ഗൃഹസര്‍വേയുടെ സര്‍വെ ഫോറം സംഘടിപ്പിച്ചു.തുടര്‍ന്ന് സര്‍വെഫലം വിശകലനം ചെയ്തു.ഞെട്ടിക്കുന്നതായിരുന്നു കണ്ടെത്തല്‍..
ഒരു ഗ്രാമപ്രദേശത്തെ വിദ്യാലയത്തിന്റെ കാച്ച്മെന്റ് ഏരിയയിലുള്ള 70 നടുത്ത് കുട്ടികളില്‍ 13 പേര്‍ മാത്രം ചെറിയാക്കര സ്കൂളിലും ബാക്കി 56 പേര്‍ മറ്റ് പല വിദ്യാലയങ്ങളിലുും.
ഒക്ടോബര്‍ 25 മുതല്‍ 30 വരെ തീയതികളില്‍ ചെറിയാക്കര വിദ്യാലയത്തിന്റെ മാസ്റ്റര്‍പ്ലാന്‍ വിശകലനം ചെയ്യുകയും ജനപക്ഷത്തു നിന്നും വിദ്യാര്‍ത്ഥി പക്ഷത്തു നിന്നും വിദ്യാലയത്തിന്റെ ശക്തിദൗര്‍ബല്ല്യങ്ങള്‍ വിശകലനം ചെയ്യുകയും ചെയ്തു.
5 വികസനത്തിനായി 75 ദിവസങ്ങള്‍
അക്കാദമിക നിലവാരത്തിലും ഭൗതികാന്തരീക്ഷ വികസനത്തിലും 75 ദിവസങ്ങള്‍ കൊണ്ടു പൂര്‍ത്തിയാക്കാവുന്ന കര്‍മ്മ പദ്ധതികള്‍ ആസൂത്രണം ചെയ്തു.
  • 20 മേഖലകളില്‍ വിദ്യാലയത്തിന്റെ വികസനാവശ്യങ്ങള്‍ നിശ്ചയിച്ചു.
  • 2018 നവമ്പര്‍ 1 ന് വിദ്യാലയവികസനസമിതി യോഗം വിളിച്ചുചേര്‍ത്ത് പദ്ധതികള്‍ അവതരിപ്പിച്ചു.
  • 13 കുട്ടികള്‍ പഠിക്കുന്ന വിദ്യാലയത്തില്‍ വികസനസമിതി യോഗത്തില്‍ 60 നടുത്ത് ആള്‍ക്കാര്‍ പങ്കെടുത്തു.വിദ്യാലയം മെച്ചപ്പെട്ടുകാണണമെന്ന് ആഗ്രഹിക്കുന്ന ഗ്രാമമമനസ്സുകളെ നമ്മള്‍ അന്ന് അടുത്തറിഞ്ഞു.
  • വികസന പദ്ധതി അവതരണത്തിന്റെ ഒടുവില്‍ വളരെ പെട്ടെന്ന് പൂര്‍ത്തിയാക്കേണ്ടുന്ന ഭൗതികവികസനം,അത് വരും വര്‍ഷപ്രവേശനത്തെ സ്വാധീനിക്കുന്ന രീതി എന്നിവ വിശദമാക്കി.
  • ഒരു ലക്ഷത്തി മുപ്പത്തിഅഞ്ചായിരം രൂപയുടെ വികസനപ്രവര്‍ത്തനം 75 ദിവസം കൊണ്ട് പൂര്‍ത്തിയാക്കാന്‍ നിശ്ചയിച്ചു.
  • സാമ്പത്തിക ശ്രോതസ്സിന്റെ കാര്യത്തില്‍ ചര്‍ച്ച മുടങ്ങി നിന്നപ്പോള്‍ ഞങ്ങള്‍ 4 അധ്യാപകര്‍ ചേര്‍ന്ന് 40000 രൂപ നല്‍കി പ്രവര്‍ത്തനങ്ങള്‍ക്ക് തുടക്കമിയാമെന്ന് അറിയിച്ചു.
  • പ്രളയവുമായി ബന്ധപ്പെട്ട് പ്രതിമാസം ശമ്പളത്തില്‍ നിന്ന് നല്ലൊരു തുക സര്‍ക്കാറിലേക്ക് നല്‍കുന്ന വേളയിലായിട്ടുപോലും വിദ്യാലയവികസനത്തിന്റെ കാര്യത്തില്‍ സാമ്പത്തിക സമാഹരണത്തിന് അധ്യാപകര്‍ തന്നെ തുടക്കമിടണമെന്ന അഭിപ്രായം മുന്നോട്ടു വെച്ചപ്പോള്‍ എല്ലാവരും അത് ഏകകണ്ഠമായി അംഗീകരിച്ചു.
  • വികസനസമിതി യോഗത്തില്‍ ഞങ്ങള്‍ 40000 രൂപ നല്‍കാമെന്ന് അറിയിച്ചപ്പോള്‍ വേദി ഉണര്‍ന്നു.
  • പത്തായിരം,അഞ്ചായിരം എന്നിങ്ങനെ കൂടിയിരുന്നവര്‍ തങ്ങളാല്‍ കഴിയും വിധം സ്പോണ്‍സര്‍ഷിപ്പുകള്‍ അറിയിച്ചു.തൊട്ടടുത്ത അങ്കണവാടിയിലെ ഇന്ദിരടീച്ചര്‍ 5000 രൂപ തന്റെ സാലറിയില്‍ നിന്നും നല്‍കന്നെന്ന് അറിയിച്ചപ്പോള്‍ ഞങ്ങള്‍ തിരിച്ചറിഞ്ഞു ചെറിയാക്കരഗ്രാമത്തിന്റെ മനസ്സ്
  • അങ്ങനെ നവമ്പര്‍ 1 ന് തന്നെ 85000 രൂപ സ്കൂള്‍ വികസനനിധിയിലേക്ക് സ്പോണ്‍സര്‍ഷിപ്പിലൂടെ സമാഹരിക്കാന്‍ സാധിച്ചത് വലിയ ആത്മവിശ്വാസമുണ്ടാക്കി...
6. സുമനസുകള്‍ കൂടിച്ചേരുന്നു
75 ദിവസം കൊണ്ടു പൂര്‍ത്തിയാക്കാന്‍ നിശ്ചയിച്ച പ്രവര്‍‌ത്തനങ്ങള്‍ക്ക അടുത്തദിവസം മുതല്‍ തന്നെ തുടക്കം കുറിച്ചു.. വിദ്യാലയം നേരിടുന്ന ഓട്ടുറുമ ഭീഷണി ഒഴിവാക്കാന്‍ നമ്മള്‍ ഇക്കാലയളവില്‍ വലവിധ പരിശ്രമങ്ങള്‍ നടത്തി. ഓട്ടുറുമയെ പഠിക്കാന്‍ ശ്രമിച്ചു.കണ്ടെത്തിയ കാര്യങ്ങള്‍ വികസനസമിതി യോഗത്തില്‍ അവതരിപ്പിച്ച് നവമ്പര്‍ 4 ന് ഞായറാഴ്ച ഓട്ടുറുമക്കെതിരെ വാട്ടര്‍ സ്പ്രെയറിങ്ങ് നടത്താന്‍ തീരുമാനിച്ചു.പെരളത്തുപോയി സ്പ്രയര്‍ മെഷീന്‍ സംഘടിപ്പിച്ചും മണിയേട്ടന്റെ സഹായത്താലും നവമ്പര്‍ 4 ന് ഞങ്ങള്‍ ഓട്ടുറുമക്കെതിരെ യുദ്ധം തുടങ്ങി.(ഞായര്‍ തിരുവനന്തപുരത്ത് എത്താമെന്ന് ഏറ്റ എനിക്ക് വിധുസാര്‍ ചെറിയാക്കരക്ക് വേണ്ടി ഉണര്‍ന്ന് പ്രവര്‍ത്തിക്കാന്‍ ഒരു ദിവസം അനുവദിച്ചു)ഓട്ടുറുമയെ പൂര്‍ണമായും തുരത്താന്‍ ഈ ശ്രമങ്ങളിലൂടെ വിദ്യാലയത്തിന് സാധിച്ചു.
ഈ ദിവസമാണ് ഞാന്‍ ഗോപാലേട്ടനെയും വിനോദിനെയും സുമേഷിനെയും കൂടുതല്‍ പരിചയപ്പെടുന്നത്. ഇതില്‍ സുമേഷ് പിടിഎ പ്രസിഡണ്ട്. വിനോദ് വിദ്യാലയം മെച്ചപ്പെട്ട് കാണണമെന്ന് ആഗ്രഹിക്കുന്ന നന്മയുള്ള ചെറുപ്പക്കാരന്‍. ഗോപാലേട്ടനെ എങ്ങനെയാണ് വിശേഷിപ്പിക്കേണ്ടത് എന്ന് എനിക്കറിയില്ല. 64 വയസ്സില്‍ യുവമനസ്സോടെ ചെറിയാക്കരയെ ശാന്തമായി, പക്വമായി മുന്നില്‍ നിന്നു നയിക്കാന്‍ പ്രാപ്തിയുള്ള നേതാവ്.
തുടര്‍ദിവസങ്ങളഅഭി, സ്റ്റാലിഷ്, വിപിന്‍, ശ്രീരാഗ്, അനീഷ്, ബാബു, അനീഷ് മാഷ്, വിജയേട്ടന്‍, ശശിയേട്ടന്‍, ബാലചന്ദ്രന്‍, പ്രിനിത, മദര്‍ പിടിഎ പ്രസിഡണ്ട് ഓമന......പേരെടുത്തു പറഞ്ഞാല്‍ തീരില്ല...അത്രയും പേര്‍. ഇവര്‍ വിദ്യാലയപ്രവര്‍ത്തനങ്ങളില്‍ ഇടപെടുന്ന രീതി എന്നെ അത്ഭുതപ്പെടുത്തി.
7 ചെറിയ വലിയ സന്തോഷങ്ങള്‍
ഞാന്‍ മുമ്പ് ജോലി ചെയ്ത എല്ലാവിദ്യാലയങ്ങളിലും ചുവര്‍ചിത്രീകരണം നടത്തിയ സാജന്‍ ചുവര്‍ വര്‍ണാഭമാക്കുന്ന ജോലി ആരംഭിച്ചു. നവമ്പര്‍ ആദ്യദിനങ്ങളില്‍ ചുവര്‍ചിത്രീകരണം മുന്നോട്ടു പോകുമ്പോള്‍ തന്നെ നവമ്പര്‍ 14 ശിശുദിനത്തില്‍ കുട്ടികളുടെ സന്തോഷം പ്രമേയമായമാക്കിയ ഹ്രസ്വചിത്രം പുറത്തിറക്കാന്‍ ഞങ്ങള്‍ ആലോചിച്ചു. ഇതിന് തൊടുപുഴ എന്‍ എസ്എസ് കാപ്പ് വിദ്യാലയത്തിലെ പ്രധാനാധ്യാപകനും എന്റെ സുഹ‍ൃത്തും വഴികാട്ടിയുമായിരുന്ന വിധു പി നായരുടെ വലിയ പിന്തുണയുമുണ്ടായിരുന്നു.
സ്റ്റുഡന്‍സ് പോലീസ് കേഡറ്റിനുള്ള ഒjg കൈപ്പുസ്തകത്തിന്റെ പ്രവര്‍ത്തനത്തില്‍ ഒപ്പമുണ്ടായിരുന്ന ഞങ്ങള്‍ തിരുവനന്തപുരം ശംഖുമുഖത്തെ പോലീസ് ഹെഡ്കോര്‍ട്ടേഴ്സിലിരുന്ന് രാത്രി 1 മണിവരെ ഹ്രസ്വചിത്രത്തിന്‍റെ ഷോട്ടുകളെ കുറിച്ച് സംസാരിച്ചു.
കുട്ടികളുടെ എണ്ണക്കുറവുള്ള വിദ്യാലയത്തില്‍ കളിക്കാനും പഠിക്കാനും കൂട്ടുകാര്‍ കുറഞ്ഞുപോയ സങ്കടത്തിന് പകരം ആഹ്ലാദകരമായ വിദ്യാലയാന്തരീക്ഷവും പഠനാന്തരീക്ഷവുമാണ് പകരം വെക്കേണ്ടത് എന്ന് മനസ്സ് എന്നെ ബോധ്യപ്പെടുത്തിക്കൊണ്ടേയിരുന്നു.
അതുകൊണ്ടു തന്നെയാണ് ഷോട്ട്ഫിലിമിന് കുട്ടികളുടെ സന്തോഷം പ്രമേയമായത്. ശിശുദിനത്തില്‍ ജിഎല്‍പിഎസ് ചെറിയാക്കരക്ക് പൊതുസമൂഹത്തോട് പറയാനുള്ള സന്ദേശം കൂടിയാണ് ഞങ്ങളുടെ ഷോര്‍ട്ഫിലിം...കുട്ടികള്‍ ....അവരുടെ സന്തോഷം...അതാണ് പ്രധാനം..കുട്ടികളുടെ സന്തോഷകരമായ നിമിഷങ്ങള്‍ ഒപ്പിയെടുക്കാനുതകുന്ന ഷോട്ടുകളെ കുറിച്ച് ഞങ്ങള്‍ ഉറക്കെ ആലോചിച്ചു.
കൂടെയുണ്ടായിരുന്ന രഞ്ജിത്ത് ഓരി, പാലക്കാടുള്ള മനോജ് സാര്‍, വിജയകുമാര്‍ കൂത്താട്ടുകുളം എന്നിവരൊക്കെ രാവേറെ ചെല്ലുംവരെ ചെറിയാക്കരയുടെ ഷോട്ട്ഫിലിമിനെക്കുറിച്ച് ആലോചിച്ചുകൊണ്ടേയിരുന്നു.
നവമ്പര്‍ 5 നാണ് ഞങ്ങള്‍ ഈ ആലോചന നടത്തുന്നത്. നവമ്പര്‍ 9 ന് ഷൂട്ടിങ്ങ്, നവമ്പര്‍ 10,11 ന് എഡിറ്റിങ്ങ് 12 ന് ഉദുമയില്‍ അവസാന ഷൂട്ടിങ്ങ്..13 ന് എഡിറ്റിങ്ങ് അവസാനഘട്ട ജോലി പൂര്‍ത്തിയാക്കി ശിശുദിനത്തില്‍ ഞങ്ങളുടെ ഹ്രസ്വചിത്രങ്ങള്‍ ചെറിയ വലിയ സന്തോഷങ്ങള്‍, നിനവ് എന്നിവ പുറത്തിറക്കി.
ചെറിയ വലിയ സന്തോഷങ്ങള്‍ എഡിറ്റ് ചെയ്യാന്‍ പ്രിയ സുഹ‍ത്ത് വിനയന്‍ പിലിക്കോടിന്റെ വലിയ പിന്തുണയയും സഹായവുമുണ്ടായിരുന്നു.
നിനവ് എന്ന ഞങ്ങളുടെ രണ്ടാമത്തെ ഷോട്ട്ഫിലിം എഡിറ്റ് ചെയ്തുതന്നതും രണ്ട് ഷോട്ട്ഫിലിമിനു സംഗീതം ചെയ്തതും വിധു പി നായരായിരുന്നു.
എം എല്‍ എ ശ്രീ എം രാജഗോപാലന്‍, എഇഒ ശ്രീ എം കെ വിജയകുമാര്‍ ബിപിഒ ഉണ്ണിരാജന്‍ എന്നിവര്‍ ഹ്രസ്വചിത്രത്തില്‍ അഭിനയിച്ചതും ഷോട്ഫിലിം പെട്ടെന്ന് പ്രചാരം നേടാന്‍ സഹായകമായി.
ഷോര്‍ട്ട്ഫിലിമിന്റെ പ്രകാശനകര്‍മ്മം ഞങ്ങള്‍ മികച്ച രീതിയില്‍ തന്നെ നടത്തി. സമഗ്രശിക്ഷയുടെ കാസറഗോഡ് ജില്ലാ പ്രൊജക്ട് ഓഫീസര്‍ ശ്രീ പിപി വേണുഗോപാലനാണ് ഷോട്ഫിലിം പ്രകാശനം ചെയ്തത്. ശിശുദിനത്തില്‍ നയനവിരുന്നിനോപ്പം എല്ലാവര്‍ക്കും പായസവും ഒരുക്കിയിരുന്നു. നൂറിലധികം പേര്‍ ചട‌ങ്ങില്‍ പങ്കെടുത്ത് ഞങ്ങളുടെ ഹ്രസ്വചിത്രം കണ്ടു. ഇതെല്ലാം ചേര്‍ന്ന കാഴ്ച ഞാന്‍ മാറിയിരുന്ന് ആസ്വദിച്ചു.

എനിക്ക് ഏറെ സന്തോഷം നല്‍കിയ മറ്റൊരു കാര്യം കൂടിയുണ്ട്. ജി ‍ബ്ല്യു എല്‍ പി സ്കൂള്‍ ബാരയില്‍ ഞാന്‍ പഠിപ്പിച്ച വെല്ലുവിളി നേരിടുന്ന അദ്വൈദ് എന്ന എന്റെ പ്രിയപ്പെട്ട പഠിതാവ് ആണ് ഇതിലെ കേന്ദ്രകഥാപാത്രം
8 ധനപിന്തുണയുമായി കുടുംബശ്രീ മുതല്‍
വിദ്യാലയ കവാടത്തില്‍ 12 മീറ്റര്‍ നീളത്തില്‍ ജൈവപ്പന്തല്‍ നിര്‍മ്മിക്കല്‍ പണി ആരംഭിച്ചു.രു ദിവസം ഞായറാഴ്ച സുഹ‍ത്ത് വിനയനോടൊപ്പം എല്‍ എസ് എസ് ക്ലാസിനായി ഞാന്‍ രാവിലെ 8 മണിക്ക് ചെറിയാക്കരയെത്തി. അപ്പോള്‍ അവിടെ യുവധാര കുടുംബശ്രീയുടെ യോഗം നടക്കുകയായിരുന്നു. കുടുംബശ്രീ സെക്രട്ടറി എന്നെ വിളിച്ചു പറഞ്ഞു...മാഷേ ഒരു സന്തോഷമുള്ള കാര്യം പറയാനുണ്ട്.ഞാന്‍ ആകാംക്ഷയോടെ അത് കേട്ടു .കുടുംബശ്രീ വിദ്യാലയ വികസന പ്രവര്‍ത്തനങ്ങള്‍ക്ക് 5000 രൂപ നല്‍കാന്‍ തീരുമാനിച്ചു.‌ഞാന്‍ അവരെ അത്തരം ഒരു തീരുമാനമെടുത്തതില്‍ അഭിനന്ദനവും നന്ദിയും അറിയിച്ചു.
വിദ്യാലത്തിന്റെ വിഭവസമാഹരണത്തിന്റെ രണ്ടാമത്തെ നാഴികക്കല്ലാവുകയായിരുന്നു യുവധാര കുടുംബശ്രീയുടെ തീരുമാനം. തുടര്‍ന്ന് പ്രദേശത്തെ 9 കുടുംബശ്രീകളും 1 പുരുഷസഹായസംഘവും ചേര്‍ന്ന് അമ്പതിനായിരത്തോളം രൂപ വിദ്യാലയത്തിന് നല്‍കി.
സഹായം വിദ്യാലയത്തെ തേടിയെത്താന്‍ തുടങ്ങിയതോടെ ഞങ്ങള്‍ വികസനപ്രവര്‍ത്തനവും ഊര്‍ജിതമാക്കി.
9 നാട് ശരിക്കും സ്കൂളിലേക്ക് ഒഴുകി
കുട്ടികളുടെ പാര്‍ക്കിന് പ്രഥമ പരിഗണന നല്‍കി പ്രവര്‍ത്തനമാരംഭിച്ചു.
ഒട്ടേറെ പാര്‍ക്കുകള്‍ സന്ദര്‍ശിച്ചു പലരുമായും ബന്ധപ്പെട്ടു .ഒടുവില്‍ സുരേഷ് എന്ന ചെറിയാക്കരയുടെ പാര്‍ക്കിന്റെ ശില്പിയെ തീരുമാനിച്ചു. സ്ഥലമൊരുക്കി പാര്‍ക്കിന്റെ പണി ആരംഭിച്ചു.
അടുത്തദിവസം തന്നെ സുരക്ഷിതമായ വിദ്യാലയന്തരീക്ഷം ഒരുക്കാനും കളിസ്ഥലം ഒരുക്കാനുമുള്ള പ്രവര്‍ത്തനത്തിന് തുടക്കമിട്ടു. കല്പണിക്ക് ചന്ദ്രേട്ടനെയും സുധിയേട്ടനെയും ചുമതലപ്പെടുത്തി. 5 വണ്ടി കല്ലിറക്കി. ചെറിയാക്കരയിലെ ചെറുപ്പക്കാര്‍ ഞായറാഴ്ച തോണിയില്‍ പൂഴി എത്തിച്ച് തോളില്‍ കടത്തി വിദ്യാലയത്തില്‍ പൂഴി എത്തിച്ചു.ഞങ്ങള്‍ പോലീസ് സ്റ്റേഷനിലെത്തി പ്രത്യേക അനുവാദം വാങ്ങി.
ചിത്രീകരണം, പാര്‍ക്ക്, കല്പണി എന്നിവ ഒരു പോലെ മുന്നോട്ടു പോകാന്‍ തുടങ്ങി...
സാമ്പത്തിക പ്രതിസന്ധി മറികടക്കാന്‍ പേഴ്സണല്‍ അക്കൗണ്ടില്‍ നിന്നും പോരാത്തപ്പോള്‍ ചിട്ടി വിളിച്ചും കാശ് അഡ്വാന്‍സ് ചെയ്ത് ‍‍ഞങ്ങള്‍ ജോലിക്ക് ഭംഗം വരുത്താതെ ചടുലമായി മുന്നോട്ട് നീങ്ങി.
ഇതിനിടയില്‍ വിദ്യാലയത്തിന് തൊട്ടു മുന്നിലുള്ള ശ്രീ വിഷ്ണുമൂര്‍ത്തി വീതുപുര വിദ്യാലയത്തിലേക്ക് അമ്പതിനായിരം രൂപ സ്പോണ്‍സര്‍ ചെയ്തു. ഒരു ക്ഷേത്ര കമ്മിറ്റി ഇത്തരത്തില്‍ വലിയൊരു സഹായം വാഗ്ധാനം ചെയ്തത് അക്ഷരാര്‍ത്ഥത്തില്‍ ഞങ്ങളെ അതിശയിപ്പിച്ചു. വീതുപുരയുടെ തണലില്‍ വിദ്യാലയത്തില്‍ ജൈവ ഓഡിറ്റോേറിയവും മുകള്‍ഭാഗം ഷീറ്റ് കവര്‍ ചെയ്യര്‍ പ്രവര്‍ത്തനവും പൂര്‍ത്തിയാക്കി.
നാട് ശരിക്കും സ്കൂളിലേക്ക് ഒഴുകി വരാന്‍ തുടങ്ങി. ഇക്കാലയളവില്‍ വിദ്യാലയം സംഘടിപ്പിച്ച ക്യാമ്പുകളിലും മറ്റ് ശുചീകരണ പ്രവര്‍ത്തനങ്ങളിലും വന്‍ ജനപങ്കാളിത്തം ഉണ്ടായി.
10 വിദ്യാലയത്തിന് വിദഗ്ധപിന്തുണ
ഞങ്ങളുടെ പഠിതാക്കള്‍ക്ക് പുറത്തുള്ളമികച്ച റിസോഴ്സ് പേഴ്സണ്‍സിനെ വിദ്യാലയത്തില്‍ എത്തിച്ച് പരിശീലനം നല്‍കുന്ന പ്രവര്‍ത്തനങ്ങള്‍ക്ക് തുടക്കം കുറിച്ചു.
നാടക പരിശീലനത്തിന് അനില്‍ നടക്കാവും ഇംഗ്ലീഷ് സ്കിറ്റിന്റെ പരിശീലനത്തിന് മഹേഷും വിദ്യാലയത്തിലെത്തി. രാത്രിയിലും വിദ്യാലയത്തില്‍ തങ്ങി ഞങ്ങളും രകഷിതാക്കളും കുട്ടികള്‍ക്ക് പരിശീലനം നല്‍കി. കു്ട്ടികള്‍ക്ക് കലാപ്രകടനത്തിന് പ്രത്യേകം ഉടുപ്പ് തയ്യാറാക്കി. ചൂട്ടേന്‍പാറയെത്തി ഫോട്ടോയും കലാപ്രകടനത്തിന്റെ വീഡിയോഷൂട്ടും പൂര്‍ത്തിയാക്കി.
മുന്‍ എച്ച് എം ശ്രീ സിവി ഗോവിന്ദന്‍ മാസ്റ്ററുടെ കുടുബത്തെ അദ്ദേഹത്തിന്റെ സ്മരണക്ക് പാര്‍ക്ക് നിര്‍മ്മിച്ചു നല്‍കുവാന്‍ ബന്ധപ്പെടുന്നത് ഇക്കാലയളവിലാണ്. കുടുംബം സസന്തോഷം ഇക്കാര്യം സമ്മതിക്കുകയും വിദ്യാലയത്തിലേക്ക് പാര്‍ക്ക് നിര്‍മ്മിക്കാന്‍ 50000 രൂപ നല്‍കുകയും ചെയ്തു.ഇതു കൂടി ആയപ്പോള്‍ ഞങ്ങളുടെ വിഭവസമാഹരണം രണ്ടുലക്ഷത്തി അമ്പതിനായിരത്തിനടുത്തെത്തി.
11 എല്ലാവര്‍ക്കും ചെറിയാക്കരയുടെ പ്രതിസന്ധികള്‍ മാറണം എന്ന ആഗ്രഹം
പൂര്‍വ വിദ്യാര്‍ത്ഥി സംഗമം വിളിച്ചു ചേര്‍ക്കാനായിരുന്നു പിന്നത്തെ ശ്രമം.കണ്‍വീനര്‍ ബാലചന്ദ്രനെ സമീപിച്ച് കാര്യങ്ങള്‍ ചര്‍ച്ച ചെയ്ത് അതി വേഗം പ്രവര്‍ത്തനങ്ങള്‍ മുന്നോട്ടു നീക്കി. 675 പൂര്‍ വിദ്യര്‍ത്ഥികളുടെ ലിസ്റ്റ് ഞങ്ങള്‍ അഡ്മിഷന്‍ രജിസ്റ്റര്‍ നോക്കി തയ്യാറാക്കി.ലിസ്റ്റ് തയ്യാറാക്കുന്നതില്‍ അമ്മമാരും ലിസ്റ്റ് ഡിടിപി ചെയ്യുന്നതില്‍ സതീശന്‍മാഷും ഊര്‍ജസ്വലമായി പ്രവര്‍ത്തിച്ചു. ഡിസമ്പര്‍ 9 ന് പൂര്‍വവിദ്യാര്‍ത്ഥി സംഗമം കോര്‍ഗ്രൂപ്പ് ചേര്‍ന്ന് പ്രവര്‍ത്തനങ്ങള്‍ക്ക് അന്തിമരൂപം നല്‍കി.
വൈകുന്നേരങ്ങളില്‍ ഞങ്ങളും ഗോപാലേട്ടനും വിനോദും പഴയകാല പ്രധാനാധ്യാപകര്‍, അധ്യാപകര്‍ എന്നിവരുടെയൊക്കെ വീടുകള്‍ സന്ദര്‍ശിച്ചു. പലരും ചെറിയാക്കരയില്‍ നിത്യേനെ സംഭവിക്കുന്ന മാറ്റങ്ങള്‍ പത്രങ്ങളിലൂടെ അറിഞ്ഞ സന്തോഷം ഞങ്ങളുമായി പങ്കുവെച്ചു.പൂര്‍വ അധ്യാപകര്‍ പലരും അങ്ങോട്ടു പറയാതെ തന്നെ വിദ്യാലത്തിലേക്ക് സാമ്പത്തിക സഹായം വാഗ്ദാനം ചെയ്തു. എല്ലാവര്‍ക്കും ചെറിയാക്കര ഇന്നു നേരിടുന്ന പ്രതിസന്ധികള്‍ മറികടക്കുന്ന കാഴ്ച കണ്ടാല്‍ മതി എന്ന ആഗ്രഹം മാത്രം. എല്ലാവരുടെയും അനുഗ്രഹങ്ങള്‍ വാങ്ങി പൂര്‍വ വിദ്യാര്‍ത്ഥി സംഗമത്തിലേക്ക് ക്ഷണിച്ചു കൊണ്ട് ഞങ്ങള്‍ മുന്നോട്ടു പോയി.
12 സ്മാര്‍ട്ട് 10 സ്മാര്‍ട്ട് 50
ഡിസമ്പര്‍ 16 ന് ഞായറാഴ്ച വിദ്യാലയത്തില്‍ വലിയൊരു അക്കാദമിക ഉത്സവം നടന്നു.
സ്മാര്‍ട്ട് 10 സ്മാര്‍ട്ട് 50 എന്ന് നാമകരണം ചെയ്ത പദ്ധതി ഉദ്ഘാടനം ചെയ്തത് പൊതുവിദ്യാഭ്യാസസംരക്ഷണ യജ്ഞത്തിന്റെ സംസ്ഥാന കോര്‍ഡിനേറ്റര്‍ ഡോ സി രാമകൃഷ്ണനായിരുന്നു. 2018 ലെ ദേശീയ അധ്യാപക അവാര്‍ഡ് ജേതാവ് ശ്രീ വിധു പി നായരായിരുന്നു മുഖ്യാതിഥി. ഗ്രാമപഞ്ചായത്ത് പ്രസിഡണ്ട് ശ്രീമതി കെ ശകുന്തള വിധു പി നായര്‍ക്ക് ചെറിയാക്കരഗ്രാമത്തിന്റെ സ്നേഹോപഹാരം സമര്‍പ്പിച്ചു.
വിദ്യാലയത്തിന്റെ ഹൈടെക്ക് പദ്ധതിയായ ഓണ്‍ലൈന്‍ പരീക്ഷയുടെയും കുട്ടിയെ അറിയാം മൊബൈല്‍ ആപിന്റെയും ഉദ്ഘാടനം തുടര്‍ന്നു നടന്നു. കുട്ടികളുടെ പഠനപുരേഗതി നിത്യേനെ രക്ഷിതാക്കലുടെ മൊബൈലില്‍ ലഭ്യമാകുന്ന സാങ്കേതിക വിദ്യായാണ് കുട്ടിയെ അറിയാം എന്ന മൊബൈല്‍ അപ്ലിക്കേഷന്‍.രക്ഷിതാക്കള്‍ക്ക് ലഭിക്കുന്ന ലിങ്കില്‍ ക്ലിക്ക് ചെയ്ത് ഓണ്‍ലൈന്‍ ആയി യൂണിറ്റ് ടെസ്റ്റുകള്‍ രക്ഷിതാക്കള്‍ക്ക് തന്നെ നടത്താവുന്നതാണ്.പരീക്ഷാഫലം ഞൊടിയിടയില്‍ വിശദമായിത്തന്നെ മൊബൈലില്‍ ലഭ്യമാകും വിധമാണ് ഓണ്‍ലൈന്‍ പരീക്ഷകള്‍ ഏര്‍പ്പെടുത്തിയിരിക്കുന്നത്.ഇതിനായി വിദ്യാലയം സെര്‍വര്‍ വാങ്ങിക്കഴിഞ്ഞു.ജൈവപ്പന്തലിന്റെ ഉദ്ഘാടനം വിധു പി നായരും ജൈവ ഗ്ലാലറിയുടെ ഉദ്ഘാടനം ഡോ സി രാമകൃഷ്ണനും നിര്‍വഹിച്ചു.വിദ്യാലയത്തിന്റെ മുന്നോട്ടു പോക്കിനാവശ്യമായ നിര്‍ദ്ദേശങ്ങള്‍ വിധുമാഷ് നല്‍കി.
തുടര്‍ന്ന് നടന്ന കുട്ടികളുടെ ക്യാമ്പിന് പ്രശസ്തസംഗീതജ്ഞന്‍ മണക്കാലഗോപാലകൃഷ്ണന്‍, ഗുരുശ്രേഷ്ഠ അവാര്‍ഡ് ജേതാവ് ശ്രീ വിജയകുമാര്‍ കൂത്താട്ടുകുളം, പ്രശസ്ത ചിത്രകാരന്‍ വര്‍ഗീസ് കളത്തില്‍ എന്നിവര്‍ നേതൃത്വം നല്‍കി.
ഒരു പ്രതിഫലവും വാങ്ങാതെ ഈ കൂട്ടുകാരൊക്കെ ചെറിയ്ക്കരയെത്തി എന്റെ നാട്ടുകാരോടും കുട്ടികളോടും ഇടപെടുമ്പോള്‍ ഞാന്‍ വളരെ സന്തോഷവാനാണ്.
ചെറിയാക്കരയുടെ വളര്‍ച്ചയും വിശേഷങ്ങളും പല ദിവസങ്ങളിലും ഞാന്‍ ഇവരുമായി പങ്കുവെക്കാറുണ്ട്.
ചെറിയാക്കരയിലെ കുട്ടികള്‍ക്ക് വേണ്ടി തയ്യാറാക്കിയ വിവിധ വര്‍ക്ക് ബുക്കുകളുടെ പ്രകാശനവും ഡിസമ്പര്‍ 16 ന് നടക്കുകയുണ്ടായി.അക്കാദമിക പ്രവര്‍ത്തനങ്ങള്‍ക്കുള്ള ഊന്നല്‍ വിദ്യാലയം ശ്രദ്ധിച്ചുകൊണ്ടേയിരുന്നു.
13 ആയിരം കലണ്ടറുകള്‍ ആയിരം വീടുകളിലേക്ക്
പൂര്‍വവിദ്യാര്‍ത്ഥി സംഗമത്തിന് ദിവസങ്ങള്‍ മാത്രം .കുട്ടികളുടെ പ്രാക്ടീസ്, അമ്മമാരുടെയും കുടുംബശ്രീ പ്രവര്‍ത്തകരുടെയും നേതൃത്വത്തില്‍ നടക്കുന്ന തിരുവാതിരയുടെ പ്രാക്ടീസ് എന്നിവ അവസാന ഘട്ടത്തില്‍.പൂര്‍വവിദ്യാര്‍ത്ഥികളുടെയും നാട്ടുകതാരുടെയും സ്പോണ്‍സര്‍ഷിപ്പുകള്‍ വിദ്യാലയത്തിന് ലഭിച്ചുകൊണ്ടേയിരുന്നു.
ക്രിസ്മസ് അവധിക്ക് വിദ്യാലയം അടയ്ക്കുന്നദിനം ഞങ്ങള്‍ ഹൗസ്ബോട്ടില്‍ ഒരു ക്ലാസ് പിടിഎ യോഗം നടത്തി. ഇതിനും ഞങ്ങള്‍ക്ക് സ്പോണ്‍സര്‍ഷിപ്പുണ്ടായിരുന്നു. ഹൗസ്ബോട്ടില്‍ വെച്ചു തന്നെ കുട്ടികളുടെ പ്രകടനങ്ങളുടെ ഷൂട്ടിങ്ങും ക്രിസ്മസ് ആഘോഷവും സംഘടിപ്പിച്ചു.
പത്രങ്ങള്‍ നല്ല രീതിയില്‍ പരിപാടി കവര്‍ചെയ്തു.
പൂര്‍വവിദ്യാര്‍ത്ഥി സംഗമത്തില്‍ വിതരണം ചെയ്യാനും നാട്ടുകാര്‍ക്ക് പുതുവര്‍ഷസമ്മാനം നല്‍കാനും വിദ്യാലയം 1000 കലണ്ടറുകള്‍ പ്രിന്റു ചെയ്തു.കുട്ടികളുടെ പിറന്നാള്‍ ഫോട്ടോ വെച്ച ഈ കലണ്ടര്‍ പ്രിന്റ് ചെയ്യുന്നതിന് 50000 രൂപയാണ് വിദ്യാലയം സമാഹരിച്ചത്.
വിദ്യാലയം കഴിഞ്ഞ 60 ദിവസം നടത്തിയ പ്രവര്‍ത്തനങ്ങളുടെ
75 ഓളം പാനലുകള്‍ തയ്യാറാക്കി.
14 സെക്കന്റ് ബെല്‍-പൂര്‍ വിദ്യാര്‍ത്ഥി സംഗമം
പൂര്‍വവിദ്യാര്‍ത്ഥി സംഗമം ഒരു ഉത്സവമായിരുന്നു.300 ഓളം പൂര്‍ വിദ്യാര്‍ത്ഥികള്‍ വിദ്യാലയത്തിലേക്ക് ഒഴുകി എത്തി. മൂന്ന് പന്തലുകളില്‍ വ്യത്യസ്ത ബാച്ചുകാരുടെ സംഗമം. വിദ്യാലയവികസനത്തിന്റെ നാള്‍ വഴികള്‍ ഞാന്‍ അവതരിപ്പിച്ചു.
എല്ലാവര്‍ക്കും പായസമടക്കമുള്ള സദ്യ ഒരുക്കിയിരുന്നു. കലണ്ടര്‍ വിതരണം ചെയ്തു. പൂര്‍വ അധ്യാപകരുടെ അനുഭവം പങ്കുവെച്ചു. പൂര്‍വ അധ്യാപകരെ ആദരിച്ചു.പലരും വിദ്യാലയത്തിലേക്ക് വലിയ തരത്തില്‍ സംഭാവനകള്‍ നല്‍കി. ചെറിയാക്കരയുടെ പ്രഥമ പ്രധാനാധ്യാപകന്‍ കുഞ്ഞമ്പു മാസ്റ്റര്‍ 25000 രൂപ സംഭാവന നല്‍കിയതു മുതല്‍ ചെറിയാക്കരയിലെ കൊച്ചു കൂട്ടുകാരികള്‍ നൃത്തം ചെയ്ത് സമ്മാനം ലഭിച്ച 1000 രൂപ വരെ വിദ്യാലയത്തിലേക്ക് നല്‍കി. കുട്ടികള്‍ക്ക് വേണ്ടി നിര്‍മ്മിച്ച പാര്‍ക്കിന്റെയും സംഗമത്തിന്റെയും ഉദ്ഘാടനം ശ്രീ രാജഗോപാലന്‍ എം എല്‍ എ നിര്‍വഹിച്ചു. തുടര്‍ന്ന് കുട്ടികളുടെ അക്കാദമംിക മികവിന്റെ പ്രകടനവും അമ്മമാരുടെയും കുടുംബശ്രീപ്രവര്‍ത്തകരുടെയും നേതൃത്വത്തിലുള്ള തിരുവാതിരയും അരങ്ങേറി.
എ ഇ ഒ ശ്രീ എം കെ വിജയകുമാര്‍ ഡയറ്റ് ലക്ചററ്‍ ശ്രീ പിവി വിനോദ്കുമാര്‍, വിനയന്‍ പിലിക്കോട് എന്നിവര്‍ പൂര്‍വവിദ്യാര്‍ത്ഥികളുമായി സംസാരിച്ചു. പൂര്‍വിദ്യാര്‍ത്ഥികള്‍ വിദ്യാലയത്തിന് സ്വന്തമായി ഒരു വാഹനം വാങ്ങുന്നതിന് സംഗമത്തില്‍ മൂന്നു ലക്ഷത്തി ഇരുപത്തിയാറായിരം രൂപ സ്പോണ്‍സര്‍ ചെയ്തു.
15 ചെറിയാക്കര ചെറുതല്ല എന്ന് തെളിയിച്ചുകൊണ്ടിരിക്കുകയാണ് ഒരു ഗ്രാമം.
ഇവിടെ ജോലി ചെയ്യുന്ന ഞങ്ങളാരും സമയം നോക്കാറില്ല. അങ്ങനെ ചുവന്ന മഷി പതിഞ്ഞ ഒരു വിദ്യാലയകലണ്ടറില്‍ ഞങ്ങള്‍ക്ക് വിശ്വാസവുമില്ല. എന്നും രാവിലെ 9 മണിക്കകം വിദ്യാലയത്തിലെത്തുന്ന ഞങ്ങള്‍ പലപ്പോഴും വീടെത്തുന്നത് രാത്രി ഏറെ വൈകിയാണ്.
ശനി, ഞായര്‍, മറ്റ് അവധി ദിനങ്ങള്‍ ഒക്കെ ഞങ്ങളെ സംബന്ധിച്ച് ചെറിയാക്കരക്ക് വേണ്ടി കൂടുതല്‍ പ്രവര്‍ത്തിക്കാനുള്ള ദിവസങ്ങളാണ്.
നാട്ടുകാരും അങ്ങനെത്തന്നെ. അവര്‍ മിക്കവാറും ദിവസങ്ങള്‍ വിദ്യാലയത്തിലുണ്ട്. തങ്ങളുടെ അധ്വാനം വിദ്യാലയത്തിനായി മാറ്റിവെക്കാന്‍ അവര്‍ മത്സരിച്ച് മുന്നോട്ടു വരികയാണ്. ഒരു നാടൊന്നിച്ചാണ് വിദ്യാലവികസനത്തിന് കൈകോര്‍ത്തിരിക്കുന്നത്..
സാഹചര്യങ്ങള്‍ മാറും. ചെറിയാക്കരക്ക് ചുറ്റുമുള്ള ജനങ്ങള്‍ക്ക് തിരിച്ചറിവുണ്ടാകും. മറ്റു വിദ്യാലയങ്ങള്‍ക്ക് സ്വപ്നം കാണാന്‍ പോലും സാധിക്കാത്ത തരത്തിലുള്ള  ഹൈടെക്ക് പദ്ധതികളും അക്കാദമിക മികവുമായി  ജി എല്‍ പി എസ് ചെറിയാക്കര മുന്നേറുമ്പോള്‍ എത്ര കാലമാണ് ഒരു ജനതക്ക് ഇതൊക്കെ തിരിച്ചറിയാതെ ജീവിക്കാന്‍ കഴിയുക.? ഞങ്ങള്‍ക്ക് ഇപ്പോള്‍ ഉറപ്പുണ്ട്. പലോത്ത് നിന്നും വിളഞ്ഞടുക്കത്തു നിന്നുമൊക്കെ വരും വര്‍ഷം കൂടുതല്‍ കുട്ടികള്‍ വിദ്യാലയത്തിലെത്തും. 2019 ഫെബ്രുവരിയോടെ ഞങ്ങളുടെ സ്കൂള്‍ വാഹനം ഓടിത്തുടങ്ങും. സാധിക്കുന്നത്രയും പറ്റുമെങ്കില്‍ കുട്ടികളുടെ വീട്ടില്‍ നിന്നും എനിക്കുതന്നെ അവരെ പിക്ക് ചെയ്യാന്‍ ശ്രമിക്കും .നിത്യേനെ രക്ഷിതാക്കളെ കാണാനും പഠനപുരോഗതി പങ്കുവെക്കാനുമുള്ള അവസരമായി ഈ ഡ്രൈവര്‍ ജോലി പ്രയോജനപ്പെടുത്താനാണ് ഞാന്‍ ആഗ്രഹിക്കുന്നത്.
ചെറിയാക്കരയില്‍ കുട്ടികളെത്തും.....
ഈ വിദ്യാലയത്തെ ചെറിയാക്കരക്ക് പുറത്തുള്ള പൊതു സമൂഹവും ആഗ്രഹിക്കും...
ആ നിലയിലേക്ക് വിദ്യാലയത്തെ വളര്‍ത്താനുള്ള കര്‍മ്മ പദ്ധതിയില്‍ നമുക്ക് നിങ്ങളുടെ പിന്തുണ നല്കണേ..
ചെറിയാക്കരയിലേക്ക് പ്രദേശവാസികള്‍ ചിന്തിച്ചു തുടങ്ങുമ്പോള്‍ തന്നെ സമീപത്തെ വിദ്യാലയങ്ങള്‍ കല്ലുവെച്ച നുണകള്‍ പ്രചരിപ്പിച്ചു തുടങ്ങി..ചെറിയാക്കരയുടെ മികവ് ആഗ്രഹിച്ച് വിദ്യാലയത്തിലെത്തിയ ഞാന്‍ പെട്ടെന്നുതന്നെ ട്രാന്‍സ്ഫര്‍ വാങ്ങിപ്പോകും എന്നതാണ് ഇപ്പോള്‍ നടക്കുന്ന വ്യജമായ പ്രചരണം.
ട്രാന്‍സ്ഫര്‍ വാങ്ങി പോകാനല്ല ഞാന്‍ ചെറിയാക്കരയിലെത്തിയത് മറിച്ച് ക്ഷമയോടെ വര്‍ഷങ്ങളോളം ജോലി ചെയ്ത് ചെറിയാക്കരയെ മികവിന്റെ കേന്ദ്രമാക്കാനാണ്...അതിന് ചെറിയാക്കരയില്‍ ഇന്നുള്ള ഞങ്ങളുടെ ടീമിന് സാധിക്കുക തന്നെ ചെയ്യും.
ഇപ്പോള്‍ പ്രീപ്രൈമറിയിലും ഒന്നാം ക്ലാസിലും പ്രവേശനം ആഗ്രഹിക്കുന്ന രക്ഷിതാക്കളോട് എനിക്കൊന്നേ പറയാനുള്ളൂ. ഇത് ഒരു അവസരമാണ്..ഈ മുന്നേറ്റത്തില്‍ ചെറിയാക്കരയുടെ കൂടെ നിന്നാല്‍ നിങ്ങളുടെ കുട്ടി നിങ്ങള്‍ സ്വപ്നം കാണുന്നതിനപ്പുറത്തേക്ക് വളരും.
നിങ്ങളുടെ മക്കള്‍ ഈ വിദ്യാലയത്തിലെ പഠനം പൂര്‍ത്തിയാക്കി പോകും വരെയും സാധിക്കുമെങ്കില്‍ അതിനുശേഷവും ഞാനടക്കമുള്ള അധ്യാപകര്‍ ചെറിയാക്കര തന്നെയുണ്ടാകും.ഈ നന്മ വിദ്യാലയത്തിന്റെ കാവലാളുകളായി.
(
വിദ്യാലയമുന്നേറ്റങ്ങള്‍ എന്നും കൂട്ടായ ശ്രമത്തിലൂടെ മാത്രമേ സാധ്യമായിട്ടുള്ളൂ. ചെറിയാക്കരയില്‍ ഞങ്ങള്‍ അധ്യാപകര്‍, പിടിഎ, മദര്‍ പിടിഎ, വിദ്യാലയ വികസന സമിതി, പൂര്‍വ വിദ്യാര്‍ത്ഥി സംഘടന, നാട്ടുകാര്‍ അങ്ങനെ എല്ലാവരും ചേര്‍ന്നാണ് ഈ മുന്നേറ്റം സാധ്യമാക്കിയത്. ഞാന്‍ എന്റെ കണ്ണിലൂടെ വിദ്യാലയ വികസനത്തിന്റെ നാള്‍വഴികള്‍ കുറിച്ചിട്ടു എന്നുമാത്രം)
-മഹേഷ്
കേരളത്തിലെമ്പാടും നടന്ന അന്വേഷണാനുഭവങ്ങളെ അക്കാദമിക മുന്നേറ്റങ്ങളെ  മികവ് മാതൃകകളെ സ്വാംശീകരിച്ച് തന്റെ പ്രവര്‍ത്തനസാഹചര്യത്തിന് അനുഗുണമാക്കുകയും ഗവേഷണാത്മകമനസോടെ  നൂതനപ്രവര്‍ത്തനങ്ങള്‍ ഏറ്റെടുക്കുകയും നാടിന്റെ മനസൊരുക്കി വിദ്യാലയത്തെ ഉയരത്തിലെത്തിക്കുകയും ചെയ്ത മഹേഷ നല്‍കുന്ന ദിശാബോധം വലുതാണ്.

അനുബന്ധം
അധ്യാപക അവാര്‍ഡ് നിര്‍ണയം സംസ്ഥാന ദേശീയ രീതികള്‍
അധ്യാപക അവാർഡ് നിർണയത്തിൽ ദേശീയതലത്തിൽ പ്രൊഫഷണലിസം നടപ്പാക്കിയപ്പോൾ സംസ്ഥാനം പഴയശൈലിയിൽതന്നെ. പരിഗണിക്കപ്പെടണമെങ്കിൽ ജൂറിക്കുമുന്നിൽ കഴിവുതെളിയിക്കണമെന്ന രീതി ദേശീയതലത്തിൽ നടപ്പായിട്ട് രണ്ടുവർഷമായി. അധ്യാപകർ സമർപ്പിക്കുന്ന നേട്ടങ്ങളുടെ പട്ടിക അടിസ്ഥാനമാക്കിയാണ് ഇപ്പോഴും സംസ്ഥാനത്ത് അവാർഡ് നിർണയം. ദേശീയതലത്തിൽ നിബന്ധനകൾ കർശനമാക്കിയതോടെ അവിടെ ജേതാക്കളുടെ എണ്ണവും കുറഞ്ഞു.
ദേശീയ ശൈലി ഇങ്ങനെ കേന്ദ്ര മാനവശേഷി മന്ത്രാലയത്തിന്റെ വെബ്‌സൈറ്റിലെ ലിങ്കിലൂടെയാണ് അവാർഡിന് അപേക്ഷിക്കേണ്ടത്. അപേക്ഷിക്കുമ്പോൾ തന്റെ നേട്ടങ്ങളും കഴിവുകളും എല്ലാം അപ്‌ലോഡ് ചെയ്യണം. അതിനെ പിന്തുണയ്ക്കുന്ന രേഖകളും ഉണ്ടാവണം. വീഡിയോകളും ഫോട്ടോകളും ഉൾപ്പെടുത്താം. ഇങ്ങനെ അപേക്ഷിക്കുന്നവരുടെ വിവരങ്ങൾ കേന്ദ്ര മന്ത്രാലയത്തിനും സംസ്ഥാന വിദ്യാഭ്യാസ വകുപ്പിനും കാണാം. സംസ്ഥാനത്തെ എസ്.സി.ഇ.ആർ.ടി. ഇവ പരിഗണിച്ച് മികച്ച ആറുപേരെ ശുപാർശ ചെയ്യും. പ്രൈമറി, ഹൈസ്കൂൾ, ഹയർ സെക്കൻഡറി എന്നീ തലങ്ങളിൽനിന്ന് രണ്ടുപേരെ വീതമാണ് ശുപാർശ ചെയ്യുന്നത്. ഡി.പി.ഐ., വിദ്യാഭ്യാസ സെക്രട്ടറി, .വിദ്യാഭ്യാസ വിദഗ്ധൻ എന്നിവരാണ് ശുപാർശ ചെയ്യാനുള്ള പാനലിലുള്ളത്. ഇതിന്റെ അടിസ്ഥാനത്തിൽ ആറുപേരെയും ന്യൂഡൽഹിയിൽ അഭിമുഖത്തിന് വിളിപ്പിക്കും. വിദഗ്ധരായ മൂന്നുപേരുള്ള ജൂറിക്കുമുന്നിൽ ഓരോരുത്തർക്കും 10 മിനിറ്റാണ് അഭിമുഖം. ഇതിൽ എട്ടുമിനിറ്റ് സ്വന്തം നേട്ടങ്ങൾ വിവരിക്കുന്ന പ്രസന്റേഷനുള്ളതാണ്. അപ്‌ലോഡ് ചെയ്ത വിവരങ്ങളുമായി ഇതിനെ ജൂറി വിലയിരുത്തും.
ദേശീയതലത്തിൽ ജേതാക്കളുടെ എണ്ണം ഏഴിലൊന്നായി പ്രൊഫഷണലിസം നടപ്പാക്കിയപ്പോൾ ദേശീയതലത്തിലെ അവാർഡ് ജേതാക്കളുടെ എണ്ണം ഏഴിലൊന്നായി കുറഞ്ഞു. രണ്ടു വർഷംമുമ്പ് 300 പേരെയാണ് തിരഞ്ഞെടുത്തിരുന്നത്. രാജ്യത്താകെ കഴിഞ്ഞകൊല്ലം 42 പേരും ഇക്കൊല്ലം 45 പേരും മാത്രമാണ് തിരഞ്ഞെടുക്കപ്പെട്ടത്. രാഷ്ട്രീയ ഇടപെടലുകൾ കുറയ്ക്കുന്നതിനായാണ് ദേശീയതലത്തിലെ അവാർഡ് നിർണയ ശൈലിക്ക് മാറ്റംവരുത്തിയത്. സംസ്ഥാന അവാർഡുകൾ ജില്ലാതലത്തിലാണ് നൽകുന്നത്.
( മാതൃഭൂമി വാര്‍ത്തയില്‍ നിന്ന് )

Friday, August 30, 2019

പാടിക്കല്‍ കാസര്‍കോഡിന് അഭിമാനം


വിദ്യാലയ നന്മതേടിയുളള എന്റെ യാത്രയില്‍ കാസര്‍കോഡ് എന്നും ആവേശം നല്‍കിയിട്ടുണ്ട്. ഇത്തവണ ഡോ ഗംഗാധരന് ഒപ്പമാണ് സ്കൂള്‍ സന്ദര്‍ശനം നടത്തിയത്. ആഗസ്റ്റ് ആദ്യവാരം പാടിക്കലിലെത്തി.
പാടിക്കല്‍ ‍ വിദ്യാലയത്തിലെ സംയോജിത ശാസ്ത്ര ലാബ്

തട്ട എന്ന ഉപകരണം ഞാന്‍ ആദ്യം കാണുകയാണ് . എന്റെ ഒപ്പമുണ്ടായിരുന്ന ഡോ ഗംഗാധരന്‍ അതെടുത്തു കുലുക്കി. വലിയ ശബ്ദം. തടിയാണെങ്കിലും നല്ല മുഴക്കം. പണ്ടു കാലത്ത് പശുക്കളുടെ കഴുത്തില്‍ തൂക്കിയിടുന്നതിനാണ് തട്ട ഉപയോഗിച്ചിരുന്നത്. പശു നടക്കുമ്പോള്‍ തട്ട ആടി ശബ്ദമുണ്ടാകും. അഴിച്ചുവിട്ട പശു എവിടെയാണെന്നു കണ്ടെത്താം. മൂന്നു നാലു പശുക്കള്‍ തട്ടയുമായി ഒന്നിച്ചു നടക്കുന്ന രംഗം ഞാന്‍ മനസില്‍ ആലോചിച്ചു. നല്ല വാദ്യമേളം ആയിരിക്കും. പാടിക്കല്‍ ഗവ യു പി എസിലെ സംയോജിത ശാസ്ത്ര ലാബില്‍ വളരെ പഴക്കം ചെന്ന രാമായണത്തിന്റെയും മഹാഭാരതത്തിന്റെയും താളിയോല ഗ്രന്ഥം കണ്ട് വിസ്മയിച്ചു പോയി. നിരവധി പുരാവസ്തുക്കള്‍.. അവ മാത്രമല്ല വലിയ മാതൃകകള്‍ നിര്‍മിച്ചൊരുക്കിയിട്ടുണ്ട്. സിന്ധു നദീതടം, ബേക്കല്‍ കോട്ട, നീര്‍മറി പ്രദേശം .. സാമൂഹിക ശാസ്ത്ര വിഭവങ്ങള്‍ ഒരിടത്ത്. ശാസ്ത്ര ലാബാണ് മറ്റൊരു വിഭാഗം. ശാസ്ത്രപാര്‍ക്കിലെ വിഭവങ്ങളും വിദ്യാലയം സ്വന്തമായി വികസിപ്പിച്ചതും ശേഖരിച്ചതുമായ ഇനങ്ങളും കൊണ്ട് സമ്പന്നം. ഗണിതലാബ് ഉപകരണങ്ങളും മൂന്നു നാല് ഷെല്‍ഫുകളിലായി ക്രമീകരിച്ചിരിക്കുന്നു. താരാഗണങ്ങളുടെ ചിത്രച്ചുമരുണ്ട്. ഫോട്ടോ ഗാലറിയുണ്ട്. കുട്ടികള്‍ക്ക് പരീക്ഷണങ്ങള്‍ ചെയ്യാന്‍ പാകത്തിലാണ് ക്രമീകരണം. ഒരു വലിയ ഹാള്‍ സംയോജിത ലാബിനായി നീക്കിവെച്ചിരിക്കുന്നു.
വികസനത്തിനുളള വിഭവസമാഹരണം
ഏതെല്ലാം സ്രോതസുകളില്‍ നിന്നാണ് വിദ്യാലയത്തിന് ധനസഹായം ലഭിച്ചത്? കിട്ടാവുന്നിടത്തെല്ലാം മുട്ടി നോക്കി.
  • വിദ്യാഭ്യാസ വകുപ്പ് എണ്‍പത് ലക്ഷം ( ഡൈനിംഗ് ഹാല്‍)
  • എം എല്‍ എ മുപ്പത്തി മൂന്നു ലക്ഷം ( ക്ലാസ് മുറി)
  • എം പി -പത്ത് ലക്ഷം ( ഓഡിറ്റോറിയം)
  • പഞ്ചായത്ത് ( ഇരുപത് ലക്ഷം)
  • എസ് എസ് എ മൂന്നു ലക്ഷം,  
  • പി ടി എ ഏഴ് ലക്ഷം
പഠനത്തില്‍ പ്രാദേശിക വിഭവങ്ങളും വൈദഗ്ധ്യവും പ്രയോജനപ്പെടുത്തുന്ന വിദ്യാലയമാണിത്
  • തിയറ്റര്‍ ലൈഫ് ( അഭിനയക്കളരി)
  • ചിത്രകല
  • നാടന്‍ കല പരിശീലനം ( അലാമി, കോല്‍ക്കളി)
  • അഭിമുഖം
  • ഗവേഷണം ( കൃഷിയറിവ്, പ്രാദേശിക ചരിത്രം)
പഠനയാത്രകള്‍

ശൂലാപ്പ് കാവ്, കദളീവനം, പാടം ( ജൈവതാളം രജിസ്ററര്‍ തയ്യാറാക്കി. ഇത് തയ്യാറാക്കുന്നതിന് കൃഷി ശാസ്ത്ര വിദ്യാര്‍ത്ഥിനിയായ നിഖിലയുടെയും കൃഷിക്കാരനായ മാധവന്റെയും സജീവ പിന്തുണ ) ഹോസ് ദുര്‍ഗ് കോട്ട.
നേട്ടങ്ങളില്‍ പ്രധാനം
ഒമ്പത് യു എസ് എസും അഞ്ച് എല്‍ എസ് എസും ഈ വര്‍ഷം പാടിക്കല്‍ സ്കൂള്‍ സ്വന്തമാക്കി. സമൂഹത്തിന് വിശ്വാസമുളള വിദ്യാലയം. അക്കാദമികമായി ഉയര്‍ന്ന നിലവാരം ഈ പരീക്ഷാ നേട്ടങ്ങളില്‍ നിന്നും മനസിലാക്കാം.
ജൈവവൈവിധ്യ ഉദ്യാനം
പാടിക്കല്‍ സ്കൂള്‍‍ ജൈവവൈവിധ്യ ഉദ്യാനം പ്രാധാന്യത്തോടെയാണ് ഏറ്റെടുത്തത്. പലയിടങ്ങളിലായി ധാരാളം വൈവിധ്യമുളള സസ്യങ്ങള്‍ കണ്ടു. രജിസ്റ്ററുമുണ്ട്
എന്റെ ചങ്ങാതി എന്റെ പുസ്തകം
ഒന്നാം ക്ലാസിലെ ക്ലാസ് ലൈബ്രറി എനിക്കിഷ്ടപ്പെട്ടു
അമ്മമാരാണ് വായനക്കാര്‍ഡുകള്‍ തയ്യാറാക്കിയിരിക്കുന്നത്.
മനഹോരമായ ചിത്രീകരണം നടത്തിയതും മറ്റാരുമല്ല.
അതിനായി ശില്പശാല സംഘടിപ്പിച്ചു
ഉളളടക്കം നോക്കി
ഭാഷാ സമീപനത്തിനിണങ്ങും വിധമാണ്
പാടിക്കള്‍ സ്കൂളിന്റെ പാചകപ്പുരയെക്കുറിച്ച് പറയാതിരിക്കാനാകില്ല
ഒരു കൊച്ചു കെട്ടിടം
നാലഞ്ചു മുറികള്‍
ഗ്യാസടുപ്പുളള ഒരു മുറി
വിറകടുപ്പുളള മറ്റൊരു മുറി
പാത്രങ്ങള്‍ സൂക്ഷിക്കാന്‍ വേറൊന്ന്
പാചകവിഭവങ്ങള്‍ സൂക്ഷിക്കാനും ഒന്ന്
വൃത്തി, ശുചിത്വം, അടുക്കും ചിട്ടയും ഇത് ആകര്‍ഷകമാണ്
സ്കൂള്‍ പരിസരത്തിന്റെ വൃത്തിയും പ്രത്യേകം പരാമര്‍ശിക്കേണ്ടതുണ്ട്
ഒരു മണിക്കൂര്‍ മാത്രമാണ് അവിടെ ചെലവഴിച്ചത്
അക്കാദമിക കാര്യങ്ങളില്‍ ആഴത്തില്‍ പോകാനായില്ല. പ്രഥമാധ്യാപകന് എന്നെ എങ്ങനെ
പ്രയോജനപ്പെടുത്താം എന്നതിലായിരുന്നു ചിന്ത. അദ്ദേഹം ഒരു ബുക്കെടുത്തു.പേനയും. എന്നിട്ട് ചോദിച്ചു മാഷെ ഇനി ഇവിടെ ഞങ്ങള്‍ എന്തൊക്കെയാണ് ചെയ്യേണ്ടത്? ശ്രദ്ധിക്കേണ്ടത്?
പ്രഥമാധ്യാപകനുംകുറേ സാധ്യതകള്‍ പങ്കുവെച്ചു
ഞാനും ചില ആശയങ്ങള്‍ അവതരിപ്പിച്ചു
ലളിതമായ ചര്‍ച്ച
അദ്ദഹം അതെല്ലാം കുറിച്ചെടുക്കുന്നുണ്ടായിരുന്നു
പൊതുവിദ്യാലയത്തെ ഉയരത്തിലെത്തിക്കാന്‍ തീവ്രമായി ആഗ്രഹിക്കുന്ന ഒരു മനസ് അദ്ദേഹത്തിലുണ്ട്
കാസര്‍കോഡിന്റെ അഭിമാനമാണ് പാടിക്കല്‍
മികച്ച പി ടി എയ്കുളള ഈ വര്‍ഷത്തെ സംസ്ഥാന പുരസ്കാരം ( രണ്ടാം സ്ഥാനം) നേടിയത് വിദ്യാലയത്തിന് കൂടുതല്‍ മുന്നേറാന്‍ കരുത്താകും
പാടിക്കല്‍ സ്കൂള്‍ ഹെഡ്മാസ്റ്ററെക്കുറിച്ച് ശ്രീ നരായണല്‍ ഒയോളം എഴുതി കുറിപ്പ്
*ഇതാണ് നേതൃത്വം...* 
2018-19 വർഷത്തെ സംസ്ഥാന സ്കൂൾ പി.ടി.എ അവാർഡുകൾ  പ്രഖ്യാപിച്ചപ്പോൾ പ്രൈമറി വിഭാഗത്തിൽ രണ്ടാം സ്ഥാനം കരസ്ഥമാക്കിയത്  കാസർഗോഡ് ജില്ലയിലെ ഗവ:യു .പി .സ്കൂൾ പാടിക്കീൽ. അധ്യാപകരെയും രക്ഷിതാക്കളെയും നാട്ടുകാരെയും ഒപ്പം നിർത്തി ,അഭിമാനാർഹമായ ഈ നേട്ടത്തിലേക്ക് വിദ്യാലയത്തെ കൈ പിടിച്ചുയർത്തിയതിന്റെ പൂർണ്ണ ക്രെഡിറ്റ് സ്കൂളിലെ പ്രഥമാധ്യാപകനായ വി.ദാമോദരനു തന്നെ. ഓലാട്ട് എ.യു.പി.സ്കൂളിൽ എന്റെ സഹപാഠിയും കൂളിയാട് ഗവ:യു .പി .സ്കൂളിലെ സഹപ്രവർത്തകനുമായിരുന്നു V D എന്ന് സ്നേഹിതർ വിളിക്കുന്ന വി.ദാമോദരൻ. പ്രഥമാധ്യാപകനായശേഷം, കിട്ടാവുന്ന ഏജൻസികളിൽ നിന്നെല്ലാം പരമാവധി സഹായം തേടിപ്പിടിച്ച് തന്റെ വിദ്യാലയത്തിന്റെ ഭൗതിക സാഹചര്യങ്ങൾ മെച്ചപ്പെടുത്തുന്ന കാര്യത്തിൽ മറ്റാരെക്കാളും മുന്നിലായിരുന്നു വി.ഡി. 
 ജി.എഫ്.യു.പി.സ്കൂൾ കീഴൂർ, ജി.യു.പി.സ്കൂൾ കാഞ്ഞിരപ്പൊയിൽ, ജി.എൽ.പി.സ്കൂൾ കയ്യൂർ തുടങ്ങി ഇതിനു മുമ്പ് പ്രഥമാധ്യാപകനായി ജോലി ചെയ്ത വിദ്യാലയങ്ങളെല്ലാം ഈ വസ്തുത സാക്ഷ്യപ്പെടുത്തും. ഭൗതിക വികസനത്തിനൊപ്പം വിദ്യാലയത്തിന്റെ അക്കാദമിക മികവിനായുള്ള  പ്രവർത്തനങ്ങൾ ചിട്ടയായി സംഘടിപ്പിക്കുന്നതിലും പ്രത്യേകം ശ്രദ്ധിച്ചു.'പത്തുമണിമുതൽ നാലുമണിവരെ ' എന്ന ചട്ടപ്പടി  സമയത്തിനപ്പുറം മാക്സിമം സമയം വിദ്യാലയത്തിനു വേണ്ടി ചെലവഴിക്കുകയെന്നത് ശീലമാക്കിയ  ദാമോദരൻ തന്റെ സഹപ്രവർത്തകരോടും ഇക്കാര്യം പറയുമായിരുന്നു.. ഹെഡ്മാഷ് പറയുന്നതിന്റെ സ്പിരിറ്റ് ഉൾക്കൊള്ളാതെ 'അധികസമയജോലി' ഇഷ്ടപ്പെടാത്തവരും സഹപ്രവർത്തകർക്കിടയിൽ ഉണ്ടാവുക സ്വാഭാവികം.. അതൊന്നും ഒരു വിഷയമാക്കാതെ വി.ഡി.യാത്ര തുടർന്നു കൊണ്ടേയിരുന്നു.
     നാലു വർഷങ്ങൾക്കു മുമ്പ് സ്വന്തം ഗ്രാമമായ കൊടക്കാട്ടെ പാടിക്കീൽ സ്കൂളിൽ എത്തുമ്പോൾത്തന്നെ ദാമോദരൻ മാഷുടെ മനസ്സിൽ വിദ്യാലയ വികസനം സംബന്ധിച്ച വ്യക്തമായ കാഴ്ചപ്പാട് ഉണ്ടായിരുന്നു. ഒട്ടും മെച്ചപ്പെട്ടതായിരുന്നില്ല അപ്പോഴത്തെ അവസ്ഥ.കെട്ടിടങ്ങൾ, ഫർണിച്ചറുകൾ, കളിസ്ഥലം, പാചകപ്പുര, ടോയ്ലറ്റ് തുടങ്ങി എല്ലാം അടിമുടി 
മാറേണ്ടവ.കുട്ടികളുടെ എണ്ണവും നന്നേ കുറവ്.പഠന നിലവാരവും മെച്ചപ്പെടേണ്ടിയിരിക്കുന്നു. 
                ഭാവനാ ശാലിയായ, ദീർഘവീക്ഷണമുള്ള, അർപ്പണ മനോഭാവമുള്ള  പ്രഥമാധ്യാപകൻ വിചാരിച്ചാൽ  ഒരു വിദ്യാലയത്തെ എങ്ങനെ മാറ്റിമറിക്കാം എന്നുള്ളതാണ് പിന്നീട് കണ്ടത്.  വിദ്യാലയ വികസനത്തിന് എവിടെ നിന്നെല്ലാം സഹായം കിട്ടുമോ, അതെല്ലാം അന്വേഷിച്ചറിഞ്ഞ്, ഓഫീസുകൾ കയറിയിറങ്ങി, ചുവപ്പുനാടയുടെ കുരുക്കഴിച്ച് എന്തു ത്യാഗം സഹിക്കേണ്ടി വന്നാലും  അതെല്ലാം നേടിയെടുക്കുന്നതിനും പി.ടി.എ യുടെയും വിദ്യാലയ വികസന സമിതിയുടെയും നേതൃത്വത്തിൽ സമയബന്ധിതമായി ഓരോന്നോരോന്നായി പൂർത്തീകരിക്കുന്നതിനും മാഷിന്  കഴിഞ്ഞു. ആധുനിക സൗകര്യങ്ങളോടുകൂടിയ ഹൈടെക് ക്ലാസ്സ് മുറികൾ, ശാസ്ത്ര ലാബ്,കമ്പ്യൂട്ടർ ലാബ്, ലൈബ്രറി, ഡൈനിംഗ് ഹാൾ ,അസംബ്ലി ഹാൾ, ജൈവവൈവിധ്യ ഉദ്യാനം, സ്കൂൾ ബസ് എല്ലാമെല്ലാം ഇന്ന് സ്കൂളിന് സ്വന്തം. പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായുള്ള പ്രവർത്തനങ്ങൾ കൂടി സജീവമായപ്പോൾ കുട്ടികളുടെ എണ്ണത്തിലും ഓരോ വർഷവും വർധനവ്ഉണ്ടായി.അനാദായകരപ്പട്ടിക
യിലേക്ക് കൂപ്പുകുത്തിക്കൊണ്ടിരുന്ന വിദ്യാലയത്തിൽ കഴിഞ്ഞ രണ്ടു വർഷമായി ഒന്നാം തരത്തിൽ രണ്ടു ഡിവിഷനിലേ ക്കാവശ്യമായ കുട്ടികൾ എത്തിയിരിക്കുന്നു. അക്കാദമിക മികവിന്റെ കാര്യത്തിലും ഏറെ മുന്നേറിയിരിക്കുന്നു ഈ ഗ്രാമീണ വിദ്യാലയം. 
    ''പത്തു മണിക്ക് മുമ്പും, നാലു മണിക്ക് ശേഷവും ശനിയും ,ഞായറും, മറ്റ് അവധി ദിവസങ്ങളിലുമുൾപ്പെടെ ആവശ്യമുള്ള സന്ദർഭങ്ങളിലെല്ലാ  സേവനം നടത്താൻ സന്നദ്ധരായ അർപ്പണ മനോഭാവമുള്ള അധ്യാപികമാരും  അധ്യാപകരുമാണ് ഇന്ന് വിദ്യാലയത്തിലുള്ളത്. അവരുടെ  കൂട്ടായ്മയാണ് - ആത്മാർഥമായ പ്രവർത്തനങ്ങളാണ് - സംസ്ഥാനത്തെ ബെസ്റ്റ് പി.ടി.എ അവാർഡിന് വിദ്യാലയത്തെ അർഹമാക്കിയത്‌." പ്രഥമാധ്യാപകനായ ദാമോദരൻമാഷ് ഇങ്ങനെ പറഞ്ഞാലും ഈ കുറിപ്പിന്റെ തുടക്കത്തിൽ അവാർഡിന്റെ ക്രെഡിറ്റ് എന്റെ പ്രിയസ്നേഹിതന് നൽകിയതിൽ നിന്നും ഞാൻ മാറില്ല. കാരണം അവൻ അങ്ങനെയാണ്.
നിശബ്ദമായി പ്രവർത്തിക്കാനായിരുന്നു അവന് എന്നും താല്പര്യം.. പബ്ലിസിറ്റിക്കു വേണ്ടി ഒന്നും ചെയ്യാറുമില്ല... ചെയ്തതിന് പബ്ലിസിറ്റി കൊടുത്തിട്ടുമില്ല.. ആരെയും സുഖിപ്പിക്കാനറിയാത്ത,  പരുക്കനായ, കർക്കശക്കാരനായ, നാട്യങ്ങളില്ലാത്ത പച്ചമനുഷ്യൻ... മാതൃകാ പ്രഥമാധ്യാപകൻ.
         പ്രിയ സഹപാഠി V D ക്കും സഹപ്രവർത്തകർക്കും, പി.ടി.എ.യ്‌ക്കും ടീം പാടിക്കീലിനും ഒരായിരം അഭിനന്ദനങ്ങൾ.

🌹നാരായണൻ ഒയോളം🌹

Monday, August 26, 2019

പ്രധാന അധ്യാപക ശിൽപശാല- കോഴിക്കോടന്‍ മാതൃക

     ശ്രീ ലൈജു കോഴിക്കോട് എഴുതിയ ഫീഡ് ബാക്ക് ആദ്യം വായിക്കാം

     "എ. ഇ.ഒ കോൺഫ്രൻസുകൾ പ്രധാന അധ്യാപകർക്കായി എല്ലാ മാസവും നടക്കാറുണ്ടെങ്കിലും മുക്കം ഉപജില്ലയുടെ 2019 ആഗസ് മാസത്തെ കോൺഫ്രൻസ് എന്തുകൊണ്ടും വ്യത്യസ്തമായി.  
പതിവിൽ നിന്ന് വ്യത്യസ്തമായി പ്രധാന അധ്യാപകർക്ക് ക്ലാസ് തല മോണിറ്ററിങ്ങും വിദ്യാലയത്തിലെ വിവിധ പരിപാടികൾ ആസൂത്രണം ചെയ്ത് നടപ്പിലാക്കുന്നതിനും കൂടുതൽ അറിവ് നൽകുന്ന തരത്തിൽ ഉപജില്ലയിലെ ഒരു മികച്ച സ്കൂളിലെ പ്രവർത്തനങ്ങൾ നേരിട്ട് കണ്ടും  പരിശോധിച്ചും പ്രായോഗിക ജ്ഞാനം നേടുന്നതിന് ഉതകുന്ന തരത്തിൽ ഒരു ദിവസത്തെ ശില്പശാലയായി കോൺഫ്രൻസിനെ മാറ്റിയത് എല്ലാ പ്രധാന അധ്യാപകരുടേയും പ്രശംസ പിടിച്ചു പറ്റി. 
ശിൽപശാല ആസൂത്രണം ചെയ്ത ഡയറ്റ് സീനിയർ ലക്ചറർ അബ്ദുൾ റഹ്മാൻ മാഷും എ.ഇ.ഒ.ഷീല ടീച്ചറും BP0 ശിവദാസൻ മാഷും ഇക്കാര്യത്തിൽ പ്രത്യേകം അഭിനന്ദനം അർഹിക്കുന്നു .പരിപാടി ഉൽഘാടനം ചെയ്ത ഡയറ്റ് പ്രിൻസിപ്പാൾ  പത്മനാഭൻ സാറിന് ഒരു സ്കൂളിൽ പ്രധാന അധ്യാപകന്റെ സ്ഥാനം എന്താണ് എന്ന് തൻമയത്വത്തോടെ അവതരിപ്പിച്ച് പ്രധാന അധ്യാപകരെ ശിൽപ്പശാലയ്ക്ക് കൃത്യമായി സജ്ജരാക്കി തീർക്കുവാൻ കഴിഞ്ഞു. ഉൽഘാടന പരിപാടിക്ക് ശേഷം ഉപജില്ലയിലെ OSMS സന്ദർശനവുമായി ബന്ധപ്പെട്ട കണ്ടെത്തുകളും അവയുമായി ബന്ധപ്പെട്ട ആഴത്തിലുള്ള വിചിന്തനവും അവതരിപ്പിച്ചതും തുടർന്ന് വരുന്ന ഗ്രൂപ്പ് തിരിഞ്ഞുള്ള വിവിധ വിഷയ മേഖലകളുടെ ഫലപ്രദമായ നീരീക്ഷണത്തിനും മോണിറ്ററിങ്ങ് റിപ്പോർട്ട് തയ്യാറാക്കലിനും മികച്ച പാത ഒരുക്കുവാൻ സഹായകമായി . 
ക്ലാസുകൾ സന്ദർശിച്ചുള്ള ക്ലാസ് വിലയിരുത്തലുകളും പ്രീടെസ്റ്റ്, തുടർ പ്രവർത്തനങ്ങൾ, പിന്നോക്കക്കാർക്കുള്ള പ്രവർത്തനങ്ങൾ, SRG, Subject council ,TM register, AMP, വാർഷിക കലണ്ടർ, പ്രതിമാസ കലണ്ടർ, ITenabled education, ഉച്ചഭക്ഷണ പരിപാടി, ആരോഗ്യ ശുചിത്വ പ്രവർത്തനകൾ, ക്ലാസ് ലൈബ്രറി, സ്കൂൾ ലൈബ്രറി, ലബോറട്ടറി, പ്രീ സ്കൂൾ പ്രവർത്തനങ്ങൾ, ക്ലബ് പ്രവർത്തനങ്ങൾ, ക്ലാസ് റൂമുകളിലെ ഭൗതീക സാഹചര്യങ്ങൾ, തനത് പ്രവർത്തനങ്ങൾ എന്നിങ്ങനെ പ്രധാന അധ്യാപകർ ശ്രദ്ധിക്കേണ്ട വിവിധ മേഖലകൾ കോർത്തിണക്കി 10 ഗ്രൂപ്പുകളായി തിരിഞ്ഞ് ഉപജില്ലയിലെ പ്രധാന അധ്യാപകർ കൃത്യമായ വിലയിരുത്തൽ ഫോർമാറ്റ് വച്ച് ഓരോ കാര്യങ്ങളും പ്രത്യേകം പ്രത്യേകം നിരീക്ഷിച്ച് വിലയിരുത്തൽ നടത്തുകയും അതിന് ശേഷം കുറിപ്പ് തയ്യാറാക്കി ഓരോ ഗ്രൂപ്പിന്റേയും കണ്ടെത്തലുകൾ അവതരിപ്പിക്കുകയും ചെയ്തത് പ്രസ്തുത മേഖലകളിലെ സ്വന്തം സ്കൂളിലെ പ്രവർത്തനങ്ങൾ മികച്ച രീതിയിൽ ആസൂത്രണം ചെയ്ത് നടപ്പിലാക്കുന്നതിനും പ്രവർത്തനങ്ങളുടെ വിലയിരുത്തൽ നടത്തുന്നതിനും പ്രധാന അധ്യാപർക്ക് മികച്ച പിന്തുണ നൽകി അവബോധം നൽകുവാൻ പര്യാപ്തമായി. ഓരോ ഗ്രൂപ്പും മികച്ച രീതിയിൽ നിരീക്ഷണകുറിപ്പുകൾ അവതരിപ്പിച്ചു.തുടർന്ന് DGE യുടെ video കോൺഫ്രൻസിലെ  അക്കാദമികമായ അറിയിപ്പുകൾ എ.ഇ.ഒ നൽകുക കൂടി ചെയ്തപ്പോൾ കോൺഫ്രൻസ് വ്യത്യസ്തവും നൂതനവുമായി തീർന്നു എന്ന് പറയാതിരിക്കാൻ കഴിയില്ല"

ഏക ദിന പ്രഥമാധ്യാപക അക്കാദമിക ശിൽപശാല 2019 ആഗസ്റ്റ് 22  വിശദാംശങ്ങള്‍
മുക്കം : ഉപജില്ല - കോഴിക്കോട്
സംഘാടനം : ( ഡയറ്റ് കോഴിക്കോട്,  ട ട K brc കുന്ദമംഗലം,  HM ഫോറം മുക്കം ഉപജില്ല)
മുന്നൊരുക്കം:
  •  ജൂൺ , ജൂലൈ മാസങ്ങളില്‍ ഉപ ജില്ലയിലെ 12 വിദ്യാലയങ്ങളിൽ എ.ഇ ഒ .ഡയറ്റ് ഫാക്കൽടി, ബി.പി.ഒ എന്നിവരുടെ ടീം സന്ദർശനം(os Ms) നടത്തി : കണ്ടെത്തലുകൾ,അക്കദമിക പ്രശ്നങ്ങൾ പരിഹരിച്ച രീതി, മേൽ തട്ടിൽ സ്വകരിക്കേണ്ട നടപടികൾ എന്നിവ ക്രോഡീകരിച്ചു.
  • രണ്ടു മാസത്തിലൊരിക്കൽ ഉപജില്ലയിലെ മികവുറ്റ വിദ്യാലയങ്ങളിൽ വെച്ച് അക്കാദമി ക കോൺഫ്രൻസുകൾ നടത്തണമെന്ന് ജൂണിൽ തന്നെ തീരുമാനിച്ചു.
  • HM ഫോറം പ്രസിഡന്റ്, സിക്രട്ടറി എന്നിവരുമായികൂടിയാലോചന നടത്തി.
  • ആദ്യ ശിൽപശാല എച്ച് എം. ഫോറം പ്രസിഡണ്ടിന്റെ വിദ്യാലയം ഏറ്റെടുത്തു.
  • ഉച്ച ഭക്ഷണം ചായ തുടങ്ങിയവ വിദ്യാലയം വഹിക്കും. എന്നേറ്റു .
  • മൊഡ്യൂൾ ഉപജില്ലയിൽ തന്നെ തയ്യാറാക്കി.
  • അക്കാദമിക നേതൃത്വം മികച്ച രീതിയിൽ നൽകുന്ന ഏതാനും പ്രഥാമാധ്യാപകരുമായി ഉള്ളടക്കം ചർച ചെയ്തു
  • വിദ്യാലയ പ്രവർത്തനങ്ങൾ അടുത്തറിയുക എന്ന ലക്ഷ്യത്തിന് മുൻഗണന നൽകി.
  • HM ഫോറം പ്രസിഡണ്ടായഅഗസ്റ്റിൻ മാഷ് വിദ്യാലയത്തിൽ SRG യോഗം ചേർന്ന്  എല്ലാവരുടെയും സഹകരണവും പിന്തുണയും ഉറപ്പാക്കി.
  • വിവിധ ചുമതലകൾ നൽകി. കൂട്ടായ്മ ഉറപ്പാക്കി.
  • ഉദ്ഘാടന സെഷനിലേക്ക് 30 മിനുട്ട് മാത്രം)  ഡയറ്റ് പ്രിൻസിപ്പാൾ : പൊതു വിദ്യാഭ്യാസ സംരക്ഷണ കോഡിനേറ്റർ എന്നിവരെ ക്ഷണിച്ചു.
ആ മുഖ സെഷനിൽ   OSMS report ppt അവതരിപ്പിച്ചു.
തുടർന്ന് ഒരു HM വിദ്യാലയത്തിൽ മോണിറററിംഗ് & സപ്പോട്ട് നൽകേണ്ട 10 ഇനങ്ങൾ
elicit ചെയ്തു.
അംഗങ്ങളെ 10 ഗ്രൂപ്പകളാക്കി. ( RP തന്നെ ഒരോ ഗ്രൂപ്പിലും നല്ല നേതൃത്യം നൽകാവുന്നവരെ ഉൾപ്പെടുത്തി ഗ്രൂപ്പാക്കി )
ഒരോ ഗ്രൂപ്പും വിലയിരുത്തേണ്ട മേഖലകൾ
വിലയിരുത്തൽ സൂചനകൾ എന്നിവ പരിചയപ്പെടുത്തി.
1. Class observation രണ്ട് പേരുള്ള 4 group 
    Monitoring Tool പരിചയപ്പെടുന്നു.

2.  Pre  Test തുടർ പ്രവർത്തനങ്ങൾ ./ പിന്നാക്കക്കാർക്കുള്ള പ്രവർത്തനങ്ങൾ
3. വിവിധ ക്ലബ് പ്രവർത്തനങ്ങൾ
4.  SRG, സബ്ജക്ട് കൗൺസിൽ,
5. AMP.  വാർഷിക കലണ്ടർ   പ്രതിമാസ കലണ്ടർ , ടീച്ചിംഗ് മാന്വൽ റജിസ്റ്റർ
6.   പ്രീ സ്കൂൾ വിദ്യാഭ്യാസം
7 ക്ലാസിലെ ഭൗതിക സൗകര്യം,
വിദ്യാലയ നൂതന ( തനത്  പ്രവർത്തനം
8. ഉച്ച ഭക്ഷണം, ആരോഗ്യ ശുചിത്വം
9. ICT Enabled education
10  class library. School library.   Lab Activities

പ്രക്രിയ?
  • ഒരോ ഗ്രൂപ്പും 11.45 മുതൽ 12.45 വരെ വിവര ശേഖരണം നടത്തി.
  • ഒരോ ഗ്രൂപ്പിനെ സഹായിക്കാൻ വിദ്യാലയത്തിലെ 10 പേർ മെന്റർമാരായി നിയോഗിച്ചു.
  • എല്ലാവരും വിവര ശേഖരണം നടത്തി
  • 12.45 മുതൽ 1.15 വരെ ക്രോഡീകരണം എഴുതി A4 ൽ  
  • മേഖല            പ്രധാന മികവ് / കണ്ടെത്തലുകൾ              മെച്ചപെടുത്താവുന്നവ
  •       എന്നിങ്ങനെ ടൈറ്റിലുകളിൽ എഴുതി തയാറാക്കി 
  • ഒരോ ഗ്രൂപ്പും അവതരിപ്പിച്ചു.
  • 3.30 വരെ അവതരണം നീണ്ടു.
  • ഒരോ ഗ്രൂപ്പും അവതരിപ്പിക്കുമ്പോൾ
ചർച്ചയും RP യുടെ കൂട്ടിച്ചേർ ക്കലുകൾ (മികച്ച മാത്യ കകൾ പരിചയ പ്പെടുത്തി കൊണ്ട്
ഉ... ദാ   
   Class library
    TLM for early literacy And numeracy
    TM register tryout material etc)

3.30 മുതൽ 
AEO,BPO,ഡയറ്റ്,അറിയിപ്പുകൾ നൽകി
4.30 മുതൽ 4 .45 ഫീഡ്ബാക്ക് നടന്നു.
ദേശീയ ഗാനത്തോടെ പിരിഞ്ഞു.
ശില്പശാല നടന്ന വിദ്യാലയത്തില്‍
  • പരിശീലനവിജയത്തിന്മികച്ച ഒരുക്കം HM ഉറപ്പു വരുത്തി.
  • ക്ലാസ് നിരീക്ഷണം ആരുടെയൊക്കെയെന്ന് മുൻകൂട്ടി നൽകിയില്ല അത് കൊണ്ട് എല്ലാവരും സജ്ജമായി
  • മെന്റർ മാർ നല്ല ഹോം വർക്ക് ചെയ്തു.
  • ഒരോ ഗ്രൂപ്പും നിരീക്ഷിക്കുന്ന മേഖലകൾ HM നെ തലേദിവസം അറിയിച്ചു.
  • ഇത് സമയബന്ധിതമായി Task പൂർത്തിയാക്കാൻ സഹായിച്ചു.
  • വിഭവ സമൃദ്ധമായ ഭക്ഷണം നൽകി.
  • HM നെ സഹായിക്കാൻഒരു ടീം തന്നെയുണ്ടായി
  • ഒരോ ഗ്രൂപ്പിന്റെയും റിപ്പോട്ട് HM നെ ഏൽപ്പിച്ചു.
  • ഇത് പിന്നീട് HM ന്SRG യിൽ ചർച്ച ചെയ്യാം
 കേരളത്തിലെ എല്ലാ ഡയറ്റുകള്‍ക്കും  ഉജില്ലാ ഓഫീസര്‍മാര്‍ക്കും മാതൃകയാക്കാവുന്ന ശ്രദ്ധേയമായ ഇടപെടലാണ് കോഴിക്കോട്ട് നടന്നത്
അക്കാദമിക ഗുണത ഉയര്‍ത്താനായി പ്രഥമാധ്യാപകരെ സജ്ജരാക്കുന്ന പ്രായോഗികമായ രീതി
സംഘാടകര്‍ക്ക് അഭിവാദ്യങ്ങള്‍