മാനത്ത് പട്ടം- അക്ഷരങ്ങളുടെ എഴുത്ത് രീതി

രണ്ടാമത്തെ പാഠത്തിലാണ് കൂട്ടക്ഷരം പരിചയപ്പെടുന്നത് ( ന്ന, ച്ച) മൂന്നാം പാഠത്തില്‍ കൂടുതല്‍ കൂട്ടക്ഷരങ്ങള്‍ വരുന്നു. കുട്ടിക്ക് ചെറു വാക്യങ്ങള്‍ എഴുതാന്‍ സഹായകമായതും ആവൃത്തി കൂടുതല്‍ വരുന്നതുമായ കൂട്ടക്ഷരങ്ങള്‍ക്കാണ് ആദ്യ പരിഗണന. ക്രിയാപദങ്ങള്‍ എഴുതുമ്പോള്‍ കൂട്ടക്ഷരങ്ങള്‍ ആവശ്യമായി വരും. ( നോക്കി, ചിരിച്ചു, വന്നു, എത്തി, വാങ്ങി, കണ്ടു, കെട്ടി എന്നിങ്ങനെ ഭൂതകാലക്രിയകളില്‍ കൂട്ടക്ഷരം വേണ്ടിവരും) ലിപി പരിഷ്കരണത്തിന്റെ ഭാഗമായി മലയാളത്തിന്റെ എഴുത്തുരീതി എന്ന പുസ്തകം സര്‍ക്കാര്‍ പ്രസിദ്ധീകരിച്ചിട്ടുണ്ട്. അതില്‍ ഏതെല്ലാം കൂട്ടക്ഷരങ്ങള്‍ ചന്ദ്രക്കല ഇട്ട് എഴുതണം എന്ന് വ്യക്തമാക്കുന്നു, ചന്ദ്രക്കലയില്ലാതെ എഴുതേണ്ടവയും. മുന്‍ ലിപി പരിക്ഷരണത്തില്‍ നിന്നും വ്യത്യാസം വന്നിട്ടുണ്ട്. അനുബന്ധമായി ആ ലിസ്റ്റ് നല്‍കുന്നു. അധ്യാപകര്‍ അത് അറിഞ്ഞിരിക്കുകയും കുട്ടികളുടെ മുമ്പാകെ എഴുതുമ്പോള്‍ ആ രീതി സ്വീകരിക്കുകയും വേണം.

വടയെ വടിയാക്കാമോ, കോഴയെ കോഴിയാക്കാമോ എന്ന രീതിയിലുള്ള ചിഹ്നം ചേര്‍ക്കല്‍ പ്രവര്‍ത്തനം പല അധ്യാപകരും ചെയ്യുന്നുണ്ട്. വട എന്ന വാക്ക് ഉല്പാദിപ്പിക്കുന്ന ആശയം ഉണ്ട്. ഒരിക്കലും വട വടിയാകില്ല. കോഴ കോഴിയും. ട+ ഇ അല്ല ടി. ട്+ ഇ ആണ്, ട്+അ ചേരുന്നതാണ് ട. ട്+ ആ ആണ് ടാ. യാന്ത്രികമായി ചിഹ്നം ചേര്‍ക്കുമ്പോള്‍ അവരറിയാതെ ട്+ അ+ ഇ എന്നതിലേക്ക് എത്തുന്നു. അക്ഷരോച്ചാരണഭാഷയാണ് മലയാളം. എഴുതുന്നതുപോലെ ഉച്ചരിക്കും. പൊ എന്ന് എഴുതുകയും പൊ എന്ന് ഉച്ചരിക്കുകയും ചെയ്യും. ചിഹ്നങ്ങള്‍ ചേര്‍ന്ന ഒറ്റ യൂണിറ്റാണ് അത്. കൂട്ടക്ഷരമായ ങ്ക എഴുതുമ്പോള്‍ അത് ങയും കയും ചേര്‍ന്നാണെന്ന് നാം കുട്ടികളോട് പറയാറില്ല.ണ്ട. ഞ്ച. മ്പ, ന്ധ. ന്ദ. ന്ത, ത്ന തുടങ്ങിയ കൂട്ടക്ഷരങ്ങള്‍ ഇരട്ടിപ്പില്‍ നിന്നും വ്യത്യാസമുള്ളവയാണ്. അവയെ ഒറ്റ യൂണിറ്റായി നാം പരിചയപ്പെടുത്തുന്നതുപോലെ ചിഹ്നങ്ങള്‍ ചേര്‍ന്ന രീതിയില്‍ത്തന്നെ പരിചയപ്പെടുത്തണം. ഉച്ചാരണത്തില്‍ വരുന്ന മാറ്റവും ശ്രദ്ധിക്കണം, ഈ, ഊ, ഔ എന്നീ സ്വരങ്ങളോട് ചേര്‍ന്നുള്ള ചിഹ്നം സമാനമാണ്, ആദ്യത്തെ രണ്ടിടത്തും ദീര്‍ഘിപ്പിക്കാനാണ് ഉപയോഗിച്ചതെങ്കില്‍ ഒ ദീര്‍ഘിപ്പിക്കാന്‍ വേറെ ചിഹ്നം ഉപയോഗിച്ചു. ഇവിടെ ഒരു കുട്ടിപോലുെ ഈ, ഊ, ഔ എന്നിവയുടെ ചിഹ്നമാനതവെച്ച് സംശയം ചോദിക്കുന്നില്ല, കാരണം അവയോരോന്നിനെയും ഒറ്റയൂണിറ്റായാണ് നാം പരിചയപ്പെടുത്തിയത്. 

അനുബന്ധം

 

• കൂട്ടക്ഷരങ്ങള്‍ പലസ്വഭാവത്തിലാണ്. ചിലത് വലത് വശത്ത് ആ അക്ഷരംചേര്‍ത്ത് വയ്കുന്നു ( മ്മ, ത്ത, ജ്ജ, ള്ള) 
• ചിലതിന് അക്ഷരത്തിന്റെ പകുതി ചേര്‍ക്കുന്നു. (ന്ന, ഞ്ഞ) 
• ചിലതില്‍ ചെറിയ ഒരു ഭാഗം മാത്രം ചേര്‍ക്കുന്നു,(ക്ക)മറ്റ് ചിലതില്‍ അതേ അക്ഷരം താഴെ ചേര്‍ക്കുന്നു ( ണ്ണ, പ്പ,സ്സ, ഗ്ഗ, ) 
• അക്ഷരത്തിന്റെ ഭാഗം താഴെ ചേര്‍ക്കുന്ന കൂട്ടക്ഷരങ്ങളാണ് ദ്ദ, ട്ട എന്നിവ
• ഇരട്ടിപ്പുകളിലെ മറ്റു കൂട്ടരാണ് യ്യ, വ്വ. ബ്ബ, ച്ച എന്നിവ.  
• എന്നാല്‍ ഒറ്റപ്പെട്ടു നില്‍ക്കുന്നതാണ് ല്ല. തമിഴിലെ ല എടുത്ത് ഉപയോഗിച്ചിരിക്കുന്നു. 
• വ്യത്യസ്തമായ രണ്ട് അക്ഷരങ്ങള്‍ ചേര്‍ന്നുള്ള കൂട്ടക്ഷരങ്ങളാണ് അടുത്ത ഇനം, വലതുഭാഗത്ത് വെല്‍ഡ് ചെയ്ത രീതിയിലും താഴെ എഴുതുന്ന രീതിയിലുമാണവ. 
• കൂട്ടക്ഷരത്തെ അതിന്റെ ഉച്ചാരണവുമായി ശരിയായ രീതിയില്‍ ബന്ധപ്പിച്ച് അനുഭവം നല്‍കിയില്ലെങ്കില്‍ കുട്ടികള്‍ക്ക് അക്ഷരത്തെറ്റ് വരാം. ണ്ട, ണ്ഠ, ഞ്ച, ഞ്ഛ, സ്ഥ, സ്ത, ജ്ഞ, ഞ്ജ, ന്ത, ന്ധ, ന്ദ, എന്നിങ്ങനെയുള്ളവ വരുന്ന വാക്കുകള്‍ എഴുതുമ്പോള്‍ കുട്ടികള്‍ക്ക് തെറ്റ് വരുന്നത് ശരിയായ ഉച്ചാരണാനുഭവം കിട്ടാത്തതിനാലാണ്.