ചൂണ്ടുവിരലിലെ വിഭവങ്ങള്‍

2010 ജൂലൈമുതല്‍ അക്കാദമിക വിഭവങ്ങളുമായി ഈ വിദ്യാഭ്യാസ ബ്ലോഗ് ...പ്രയോജനപ്പെടുത്തുക, പ്രയോഗിക്കുക, പ്രചോദിപ്പിക്കുക, പ്രചരിപ്പിക്കുക.. ചൂണ്ടുവിരലില്‍ പങ്കിട്ട വിഭവമേഖലകള്‍....> 1.അധ്യാപക ശാക്തീകരണം ,2. വായനയുടെ വഴി ഒരുക്കാം, 3.എഴുത്തിന്‍റെ തിളക്കം, 4.വിദ്യാഭാസ ഗുണനിലവാരം- സംവാദം,5. മികവ്, 6.ശിശുസൌഹൃദ വിദ്യാലയം, 7.സര്‍ഗാത്മക വിദ്യാലയം, 8.നിരന്തര വിലയിരുത്തല്‍, 9.ഗണിതപഠനം, 10.വിദ്യാഭ്യാസ അവകാശ നിയമം, 11.ദിനാചരണങ്ങള്‍, 12.പാര്‍ശ്വവത്കരിക്കപ്പെടുന്നവര്‍, 13. രക്ഷിതാക്കളും സ്കൂളും, 14. കളരി, 15. ക്ലാസ് അന്തരീക്ഷം/ക്രമീകരണം, 16.ഇംഗ്ലീഷ് പഠനം, 17.ഒന്നാം ക്ലാസ്, 18. ശാസ്ത്രത്തിന്റെ പാത, 19.ആവിഷ്കാരവും ഭാഷയും, 20. പ്രത്യേക പരിഗണന അര്‍ഹിക്കുന്ന കുട്ടികള്‍, 21. ഐ ടി സാധ്യതകള്‍, 22. പഠനറിപ്പോര്‍ട്ടുകള്‍, 23.പഠനമാധ്യമം 24. ഭൌതികസൌകര്യങ്ങളില്‍ മികവ്, 25.അക്കാദമികസന്ദര്‍ശനം, 26.ഗ്രാഫിക് ഓര്‍ഗനൈസേഴ്സ്, 27.പ്രഥമാധ്യാപകര്‍.,28. ബാല, 29. വളരുന്ന പഠനോപകരണം,30. കുട്ടികളുടെ അവകാശം, 31. പത്രങ്ങള്‍ സ്കൂളില്‍, 32.പാഠ്യപദ്ധതി,33. ഏകീകൃത സിലബസ്, 34.ഡയറ്റ് .35.ബി ആര്‍ സി,36. പരീക്ഷ ,37. പ്രവേശനോത്സവം,38. IEDC, 39.അന്വേഷണാത്മക വിദ്യാലയങ്ങളുടെ ലോകജാലകം, 40. കലാവിദ്യാഭ്യാസം, 41.പഞ്ചായത്ത്‌ വിദ്യാഭ്യാസ സമിതി, 42. പഠനോപകരണം, 43.പാഠ്യപദ്ധതി പരിഷ്കരണം, 44. ചൂണ്ടുവിരല്‍,45. ടി ടി സി, 46.പുതുവര്‍ഷം, 47.പെണ്‍കുട്ടികളുടെ ശാക്തീകരണം, 48. ക്രിയാഗവേഷണം,49. ടീച്ചിംഗ് മാന്വല്‍, 50. പൊതുവിദ്യാഭ്യാസസംരക്ഷണം, 51.ഫീഡ് ബാക്ക്, 52.സ്റ്റാഫ് റൂം, 53. കുട്ടികളുട അവകാശം,54. കൃഷിയും പഠനവും,55. നോട്ട് ബുക്ക് ആകര്‍ഷകവും സമഗ്രവും, 56.പഠനയാത്ര, 57. വിദ്യാബ്ലോഗുകള്‍,58. സാമൂഹികശാസ്ത്രം, 59. സ്കൂള്‍ അസംബ്ലി, 60.സ്കൂള്‍ റിസോഴ്സ് (റിസേര്‍ച്) ഗ്രൂപ്പ് - ,61.പ്രതിഫലനാത്മകക്കുറിപ്പ്, 62. ബദല്‍പാഠങ്ങള്‍, 63.മെന്ററിംഗ്,64. വര്‍ക്ക്ഷീറ്റുകള്‍ ക്ലാസില്‍, 65.വിലയിരുത്തല്‍, 66. സാമൂഹിക ശാസ്ത്രാന്തരീക്ഷം, 67.അനാദായം, 68.എ ഇ ഒ , 69.കായികവിദ്യാഭ്യാസം,70. തിയേേറ്റര്‍ സങ്കേതം പഠനത്തില്‍, 71.നാടകം, 72.നാലാം ക്ലാസ്.73. പാഠാവതരണം, 74. മോണിറ്ററിംഗ്, 75.വിദ്യാഭ്യാസ ചിന്തകള്‍, 76.സഹവാസ ക്യാമ്പ്, 77. സ്കൂള്‍ സപ്പോര്‍ട്ട് ഗ്രൂപ്പ്,78.പ്രദര്‍ശനം,79.പോര്‍ട്ട്‌ ഫോളിയോ...80 വിവിധജില്ലകളിലൂടെ... പൊതുവിദ്യാഭ്യാസത്തിന്റെ കരുത്ത് അറിയാന്‍ ചൂണ്ടുവിരല്‍...tpkala@gmail.com.

Friday, March 21, 2014

നാലാം ക്ലാസുകാര്‍ക്കുളള യാത്രയയപ്പും ടി സി നല്‍കലും


കലവൂര്‍ ടാഗോര്‍സ്മാരക പഞ്ചായത്ത് പ്രൈമറിവിദ്യാലയത്തില്‍ മാര്‍ച്ച് മൂന്ന് രാവിലെ പത്തുമുപ്പതിന് യോഗം ആരംഭിച്ചു.
എന്താണ് യോഗ ലക്ഷ്യം?
  • ഈ വര്‍ഷം നാലാം ക്ലാസില്‍ നിന്നും ടി സി വാങ്ങിപ്പോകുന്ന കുട്ടികളെല്ലാവരും തൃപ്തികരമായ നിലവാരം ആര്‍ജിച്ചുവെന്ന് പ്രഖ്യാപിക്കണം.
  • അതൊരു ചടങ്ങാകണം.
  • പഞ്ചായത്തും പി ടി എയും എസ് എം സിയും സമൂഹത്തിലെ മറ്റു പ്രധാനവ്യക്തികളും പങ്കെടുത്ത് കുട്ടികളെ അഭിമാനത്തോടെ അടുത്ത വിദ്യാലയത്തിലേക്കു പറഞ്ഞയക്കുന്ന ചടങ്ങ്.പ്രവേശമോത്സവം പോലെ ഗംഭീരമാക്കണം തുടര്‍പഠനത്തിനായുളള യാത്രയയപ്പ്.
തനിമയാര്‍ന്ന ആലോചന നടത്തിയ ഈ യോഗത്തില്‍ പങ്കാളിത്തം ഇപ്രകാരം
  • പഞ്ചായത്ത് പ്രസിഡന്റ്
  • പി ടി എ പ്രസിഡന്റ്
  • പ്രഥമാധ്യാപിക
  • മറ്റ് അധ്യാപകര്‍
  • രക്ഷിതാക്കള്‍
  • ആകെ നാല്പതുപേര്‍ (ഞാനുള്‍പ്പടെ)
വെറുതേ ആഗ്രഹിച്ചാല്‍ പോര.പ്രായോഗികമാക്കാനുളള കൃത്യമായ പരിപാടി വേണം.  
അവസ്ഥാനിര്‍ണയം നടത്തിയാലല്ലേ ലക്ഷ്യത്തിലേക്കെത്താനുളള ഇടപെടല്‍ മേഖലകളും രീതികളും തീരുമാനിക്കാനാകൂ.
ഇപ്പോഴുളള നിലവാരം എന്താണ് ?
ഇതു പരിശോധിക്കലായിരുന്നു ആദ്യ ഇനം.
കുട്ടികളുടെ ഉത്തരക്കടലാസ് രക്ഷിതാക്കള്‍ക്കു നല്‍കി. ഗ്രേഡ് ,പ്രവര്‍ത്തനം, കുട്ടിയുടെ പ്രകടനം ഇവ പരിശോധിച്ചു. ഓരോ ഗ്രേഡിലും വരുന്ന കുട്ടികളുടെ എണ്ണം പറഞ്ഞു. അതു ശതമാനമാക്കി അവരുടെ സഹായത്തോടെ ഇപ്രകാരം ബോര്‍ഡില്‍ ക്രോഡീകരിച്ചു.

ഗണിതമേഖല ടേം
ഗ്രേഡ് %
എ
ഗ്രേഡ് % ബി
ഗ്രേഡ് % സി
ഗ്രേഡ് % ഡി
ദത്തങ്ങളുടെ ഉപയോഗം ഒന്ന്
78
11
11

രണ്ട്
44
12
44

സംഖ്യാബോധം ഒന്ന്
78
22
2

രണ്ട്
55

22

പ്രശ്നാപഗ്രഥനം ഒന്ന്

67
22
11
രണ്ട്
44
11
44

ക്ലാസ് നാലില്‍ ഗണിതത്തില്‍ ഒന്നും രണ്ടും ടേമുകളിലെ കുട്ടികളുടെ നിലവാരം ഇങ്ങനെയാണ്. ദത്തങ്ങളുടെ ഉപയോഗത്തില്‍ രണ്ടാം ടേമില്‍ കുട്ടികള്‍ പിന്നാക്കം പോയിട്ടുണ്ട്. സംഖ്യാബോധത്തില്‍ സമീനപ്രവണതയാണ്. പ്രശ്നാപഗ്രഥനത്തില്‍ കുട്ടികള്‍ മികവിലേക്കു വന്നു. ഇതു സൂചിപ്പിക്കുന്നത് കുട്ടികള്‍ കഴിവുളളവരാണെന്നും കൂടുതല്‍ ശ്രദ്ധിച്ചാല്‍ മാറ്റം സാധ്യമാണെന്നുമാണ്.ഡി ഗ്രേഡുണ്ടായിരുന്ന കുട്ടികള്‍ (11%) രണ്ടാം ടേമില്‍ നിലമെച്ചപ്പെടുത്തി.
  • സി ഗ്രേഡിലുളള നാല്പത്തിനാലു ശതമാനം കുട്ടികളെ ബി ഗ്രേഡിലോ എ ഗ്രേഡിലോ എത്തിച്ചാല്‍ മാത്രമേ ഗണിതത്തില്‍ തൃപ്തികരമായ നില കുട്ടികള്‍ കൈവരിച്ചതായി അവകാശപ്പെടാനാകൂ.
  • വാര്‍ഷികപ്പരീക്ഷവരെയുളള കാലം കരുതലോടെ പ്രവര്‍ത്തിക്കാന്‍ അധ്യാപകരും രക്ഷിതാക്കളും തീരുമാനിച്ചു.
  • സ്ഥാനവില, വലിയ സംഖ്യകളുടെ ക്രിയ എന്നിവയ്ക്ക് ഊന്നല്‍ നല്കും.
  • സ്വന്തമായി ചോദ്യം വായിച്ചു മനസിലാക്കാനുളള കഴിവ് വര്‍ധിപ്പിക്കും.
  • ഒരു മുഖ്യചോദ്യത്തിനുളളില്‍ ധാരാളം ഉപപ്രശ്നങ്ങള്‍ വരുന്ന പ്രായോഗികപ്രശ്നങ്ങള്‍ വായിച്ച് യഥാര്‍ഥത്തില്‍ എന്തെല്ലാമാണ് കണ്ടുപിടിക്കേണ്ടതെന്നു കൃത്യമായി നിര്‍ണയിക്കാനുളള പ്രയാസമാണ് കുട്ടികള്‍ നേരിടുന്നതെന്ന് അധ്യാപിക പറഞ്ഞു.കണ്ടെത്തേണ്ട കാര്യങ്ങള്‍ മാത്രം ഫിക്സ് ചെയ്യുന്ന തരത്തില്‍ പ്രവര്‍ത്തനം നല്‍കാനും തീരുമാനം.
ക്ലാസ് ടീച്ചര്‍ ഭാഷയിലെ നിലവാരം അവതരിപ്പിച്ചു.
സംഭാഷണരചന, കഥ പൂരിപ്പിച്ചെഴുതല്‍,വര്‍ണന തയ്യാറാക്കല്‍, ആസ്വാദനക്കുറിപ്പെഴുതല്‍, യാത്രാവിവരണം തയ്യാറാക്കല്‍ എന്നിവയായിരുന്നു രണ്ടാം ടേമില്‍ പരിശോധിച്ച മേഖലകള്‍.

ഭാഷാമേഖല
A %
B %
C%
D %
സംഭാഷണം
55
45


കഥാപൂരണം
78
22


വര്‍ണന
55
33
12

യാത്രാവിവരണം
78
11
11

ആസ്വാദനക്കുറിപ്പ്
55
33
12

സി ഗ്രേഡുകാര്‍ വളരെക്കുറവാണ്. അവരെ ബി ഗ്രേഡിലെത്തിക്കാനാകും. ബി ഗ്രേഡിലുളള കുട്ടികളുടെ പ്രശ്നങ്ങള്‍ അധ്യാപിക അവതരിപ്പിച്ചു. പരിഹാരനിര്‍ദ്ദേശങ്ങളും ആലോചിച്ചു
മറ്റു പ്രധാന തീരുമാനങ്ങള്‍
പരീക്ഷ കഴിഞ്ഞാലും നാലാം ക്ലാസിലെ കുട്ടികള്‍ക്ക് സഹവാസക്യാമ്പുണ്ടാകും.
ടി സി നല്‍കുന്നതു വരെയുളള കാലം പ്രയോജനപ്പെടുത്തി അവധിക്കാലമാധുര്യം നഷ്ടപ്പെടാതെ അവര്‍ നേടേണ്ട ശേഷികളുടെ വികാസത്തിനായി പ്രയത്നിക്കും. ഇതിന്റെ ട്രൈ ഔട്ട് എന്ന നിലയില്‍ കുടിടകളും രക്ഷിതാക്കളും അധ്യാപകരും ലൈറ്റ് ഹൗസ്, കടല്‍ത്തീരം എന്നവയിലേക്ക് യാത്ര നടത്തി. ഒരു വ്യവഹാരരൂപത്തെ അടിസ്ഥാനമാക്കി ഭാഷാപരമായ മികവിനുളള മാര്‍ഗമെന്ന നിലയിലാണ് ഈ യാത്ര.ഭാഷാപഠനത്തിനുളള അനുഭവപരിസരം അങ്ങനെ ആവേശകരമായി.
തെരഞ്ഞെടുപ്പു കഴിഞ്ഞാലുടന്‍ സ്വാഗതസംഘം ചേരും
ഇതൊരു തുടക്കമാണ്.
പഞ്ചായത്തിന്റെ സര്‍വ പിന്തുണയും ഉണ്ടാകും
എല്‍ സി ഡി പ്രൊജക്ടര്‍, ലാപ് ടോപ്പ് എന്നിവ നല്‍കും. ആദ്യ സെറ്റ് എത്തിക്കഴിഞ്ഞു.
അടുത്ത വര്‍ഷത്തേക്കുളള വിദ്യാലയസൂചകങ്ങള്‍ ജനകീയമായി വികസിപ്പിക്കും
അധ്യാപകരുടെ പൂര്‍ണമനസും രക്ഷിതാക്കളുടെ പിന്തുണയും എന്നതാണ് സമീപനം. ഈ രണ്ടു നിര്‍ണായക ചരങ്ങളും ഇല്ലാത്ത പരിപാടികള്‍ മാറ്റി വെക്കും.
  • എസ് എം സി ശക്തിപ്പെടുത്തും
  • എസ് ആര്‍ ജിയുടെ റോള്‍, ക്ലാസ് പി ടി എ റോള്‍,പ്രഥമാധ്യാപികയുടെ റോള്‍,പഞ്ചായത്തിന്റെ റോള്‍ എന്നിവ സംബന്ധിച്ച് ആലോചനകള്‍ അതത് സംവിധാനങ്ങള്‍ നടത്തും.
ആസൂത്രണത്തില്‍ മികവ് പ്രകടിപ്പിക്കും
  • വികസനപദ്ധതി, അക്കാദമിക പദ്ധതി,സാമൂഹികവിശ്വാസ പദ്ധതി എന്നിവ അജണ്ടയാക്കും
പഠനാനുനുഭവപരമായ മികവ്
  • പ്രക്രിയാസൂക്ഷ്മതയ്കായുളള അക്കാദമിക പിന്തുണ വിദ്യാലയത്തിനു ലഭ്യമാക്കും
  • പഠനോപകരണം- ടീച്ചര്‍ ഗ്രാന്റ് ഇല്ലാതായതു മൂലമുളള സാമ്പത്തിക പരിമിതി മറികടക്കാന്‍ പഞ്ചായത്ത് സഹായിക്കും
  • സാങ്കേതികവിദ്യ ഉപയോഗിച്ചുളള പഠനത്തിനു സഹായകമായ അന്തരീക്ഷം സൃഷ്ടിക്കും
  • ബാഹ്യവൈദഗ്ധ്യവും വിഭവങ്ങളും പരമാവധി പ്രയോജനപ്പെടുത്തും
ഈ വിദ്യാലയത്തിന്റെ ആലോചന സാധ്യതകളുടെ വാതില്‍ തുറന്നിടുകയാണ്.
എതു വിദ്യാലയത്തിലാണ് മനസുവെച്ചാല്‍ അഭിമാനത്തോടെ എല്ലാ കുട്ടികള്‍ക്കും ടി സി വാങ്ങാന്‍ പറ്റാത്തത്?
അവകാശനിയമം പഴി പറയാനുളളതല്ല
പ്രവര്‍ത്തിച്ചു കാണിക്കാനുളളതാണ്.
പരീക്ഷ കഴിഞ്ഞാല്‍ എല്ലാം കഴിഞ്ഞെന്നു കരുതുന്നവര്‍ക്കും ആലോചനയ്ക്ക വകയുണ്ട്.

Sunday, March 2, 2014

എല്ലാവര്‍ക്കും പങ്കാളിത്തം എല്ലാവര്‍ക്കും പഠനനേട്ടം



ഡയറ്റുകള്‍ കേരളത്തില്‍ സ്ഥാപിതമായിട്ട് ഇരുപത്തിയഞ്ച് വര്‍ഷം പൂര്‍ത്തിയാകുന്നതിന്റെ ഭാഗമായി തൃശൂര്‍ ഡയറ്റ് ഒരു ദേശീയസെമിനാര്‍ നടത്തുകയുണ്ടായി. ഈ സെമിനാറിന്റെ ഏറ്റവും ശ്രദ്ധേയമായ ഘടകം അവിടെ ഒരുക്കിയ പ്രദര്‍ശനമാണ്. ഡയറ്റുകള്‍ വികസിപ്പിച്ച പിന്തുണാസാമിഗ്രികളും ഗവേഷണറിപ്പോര്‍ട്ടുകളും .അവയില്‍ എന്നെ ഏറെ സ്വാധീനിച്ചത് മലപ്പുറം ഡയറ്റ് ഈ വര്‍ഷം നടത്തിയ എല്ലാവര്‍ക്കും പങ്കാളിത്തം എല്ലാവര്‍ക്കും പഠനനേട്ടം എന്ന പരിപാടിയുടെ തെളിവുകളും രേഖകളുമാണ്.

എന്താണ് ഞാന്‍ കണ്ട പ്രത്യേകത എന്നല്ലേ?

  • ഭാഷാപഠനസമീപനത്തില്‍ വിശ്വാസമില്ലാതെ പരമ്പരാഗതരീതിയലേക്കു ചുവടുമാറ്റുന്ന അധ്യാപകര്‍ക്ക് പുതിയ സമീപനം കരുത്തുളളതും ഭാഷാശേഷി വികസിപ്പിക്കാന്‍ പര്യാപ്തവുമാണെന്നു മലപ്പുറത്തിന്റെ ഈ പരിപാടി ബോധ്യപ്പെടുത്തുന്നു
  • ഗവേഷണാത്മകമായ രീതി സ്വീകരിച്ചു.
  • പരിപാടിക്കായി തെരഞ്ഞെടുത്ത് വിദ്യാലയങ്ങളിലെ അധ്യാപകരുടെ കൂടി പങ്കാളിത്തത്തോടെ പിന്തുണാമെറ്റീരിയലുകള്‍ വികസിപ്പിച്ചു
  • പരസ്പരബന്ധമില്ലാതെ ഡയറ്റിലെ വിവിധ ഫാക്കല്‍റ്റികള്‍ ഫോക്കസില്ലാത്ത പ്രവര്‍ത്തനങ്ങള്‍ നടത്തി സാമ്പത്തിക ലക്ഷ്യം നേടുന്ന സമീപനത്തില്‍ നിന്നും വിഭിന്നമായി കൃത്യമായ മാറ്റത്തെ മുന്നില്‍കണ്ട് പരിപാടി ആസൂത്രണം ചെയ്തു
  • വിദ്യാലയവും ബി ആര്‍സികളും ഡയറ്റും ലക്ഷ്യത്തിലെത്താനുളള സൂക്ഷ്മശ്രദ്ധ കാണിച്ചു
  • ഗുണമേന്മയാണ് അജണ്ടയെങ്കില്‍ അതു നേടുന്നതിന് വിദ്യാലയത്തെ ക്രിയാത്മകമായി സഹായിക്കലാണ് ഡയറ്റുകളുടെ ചുമതല എന്നു പ്രഖ്യാപിച്ചു.
    തുടക്കം
അവസ്ഥാപഠനം നടത്തി. ഇരുപതു മുതല്‍ മുപ്പത് ശതമാനം വരെ കുട്ടികള്‍ ഭാഷയില്‍ പിന്നാക്കം

കാരണങ്ങളും കണ്ടെത്തി.

  • പഠനാനുഭവങ്ങളുടെ അഭാവം
  • എല്ലാ കുട്ടികള്‍ക്കും പങ്കാളിത്തമില്ലാത്ത ക്ലാസുകള്‍
  • പഠനതാല്പര്യം ജനിപ്പിക്കാത്ത അവതരണങ്ങള്‍
  • സൂക്ഷ്മമ പ്രക്രിയ പാലിക്കാത്ത ടീച്ചിംഗ് മാന്വലുകള്‍
  • പാഠപുസ്തകമല്ലാതെ മറ്റു പഠനോപകരണങ്ങള്‍ പ്രയോജനപ്പെടുത്താത്ത അവസ്ഥ
  • പഠനപ്രക്രിയ പൂര്‍ണമായും പിനതുടരാത്തത്

ഞാന്‍ ഈ ഡയറ്റിലെ ഡോ പരമേശ്വരനുമായി സംസാരിച്ചപ്പോള്‍ അദ്ദേഹം പറഞ്ഞതിങ്ങനെ -

"ഓരോ അധ്യാപികയും കരുതുന്നത് താന്‍ സമീപനപ്രകാരം തന്നെയാണ് ക്ലാസെടുക്കുന്നതെന്നാണ്. പരിപാടിയുടെ ഭാഗമായി നടന്ന ചര്‍ച്ചകളില്‍ അവരവരുടെ പരിമിതികള്‍ തിരിച്ചറിഞ്ഞു. അതു വലിയൊരു നേട്ടമാണ്.ഈ തിരിച്ചറിവും പ്രക്രിയ പൂര്‍ണമായി തുറന്നമനസോടെ പിന്തുടര്‍ന്നപ്പോഴുണ്ടായ മാറ്റവും അധ്യാപകരെ പ്രചോദിപ്പിച്ചു."

ശാസ്ത്രീയമായ പ്രവര്‍ത്തനഘട്ടങ്ങള്‍

  • ആശയരൂപീകരണശില്പശാല
  • വിദ്യാലയങ്ങളുടെ തെരഞ്ഞെടുപ്പ്
  • പിന്തുണാസാമഗ്രികളുടെ നിര്‍മാണം (പ്രക്രിയാപൂര്‍ണതയുളള പാഠക്കുറിപ്പുകള്‍, വായനാസാമഗ്രികള്‍, ടീച്ചര്‍വേര്‍ഷന്‍ മുതലായവ)
  • പരിശീലനം ( അധ്യാപകര്‍ക്ക്, മോണിറ്ററിംഗ് ടീമിന്, പ്രഥമാധ്യാപകര്‍ക്ക്)
  • തത്സമയ പിന്തുണ ( ഓരോ വിദ്യാലയത്തിനും പ്രതിമാസം രണ്ടു തവണ)
  • പ്രഥമാധ്യാപികയുടെ മോണിറ്ററിംഗ് ) സൂചകങ്ങളുടെ അടിസ്ഥാനത്തില്‍
  • ഇടക്കാല വിലയിരുത്തല്‍,ഫീഡ് ബാക്ക് ശേഖരിക്കാന്‍ വ്യത്യസ്തമാര്‍ഗങ്ങള്‍
  • ക്ലാസ് പി ടി എ, എസ് ആര്‍ ജി എന്നിവയുടെ ശാക്തീകരണം
  • കുട്ടികളുടെ രചനകളിലെ വളര്‍ച്ച താരതമ്യം ചെയ്യല്‍
  • നേട്ടങ്ങള്‍ തെളിവുകളുടെ അടിസ്ഥാനത്തില്‍ വിവിധതലങ്ങളില്‍ പങ്കുവെക്കാനവസരം
  • തൊണ്ണൂറ്റി ഏഴു ക്ലാസുകളില്‍ തൊണ്ണൂറ്റി ഏഴു അധ്യാപകര്‍ നടത്തിയ ഇടപടെലിന്റെ അനുഭവങ്ങള്‍ ക്രോഡീകരിച്ച് കൂടുതല്‍ അധ്യാപകരിലേക്ക് പരിപാടി വ്യാപിപ്പിക്കാനുളള നീക്കം.

എന്താണ് ഫലം?

  • എല്ലാ വിഭാഗം കുട്ടികള്‍ക്കും നേട്ടമുണ്ടായി
  • അധ്യാപകരുടെ ആത്മവിശ്വാസം വര്‍ധിച്ചു
  • പ്രത്യക്ഷമായ മാറ്റത്തെ മുന്‍നിറുത്തി അവകാശനിയമം വിഭാവനം ചെയ്ത ഗുണനിലവാരമുളള വിദ്യാഭ്യാസം സാധ്യവും പ്രായോഗികവുമാണെന്ന തിരിച്ചറിവിലേക്ക് രക്ഷിതാക്കളും അധ്യാപകരും

കൃത്യമായ ലക്ഷ്യമുളള പ്രവര്‍ത്തനപാക്കേജുകളാണ് ഡയറ്റുകളില്‍ നിന്നും കേരളം പ്രതീക്ഷിക്കുന്നത്.

മലപ്പുറം മാതൃകാപരമായ അനുഭവം കാഴ്ചവെച്ചു..

ഇരുപത്തിയഞ്ചാം വര്‍ഷത്തിലെ തിളക്കമുളള ഇടപെടല്‍ .








Friday, February 21, 2014

മലായാളത്തിന്റെ ഭാവി വിദ്യാലയങ്ങളുടേയും


മാതൃഭാഷയെക്കുറിച്ച് വളരെ ശ്രദ്ധേയമായ ഒരു പുസ്തകം വായിച്ചു. ശ്രീ : കെ.സേതുരാമന്‍ എഴുതിയ മലയാളത്തിന്റെ ഭാവി ഭാഷാ ആസൂത്രണവും മാനവ വികസനവും. മാതൃഭൂമിയാണ് ഈ പുസ്തകം പ്രസിദ്ധീകരിച്ചത്. 
അതിലെ ചില കാര്യങ്ങള്‍ ലോക മാതൃഭാഷാദിനത്തില്‍ പങ്കിടുകയാണ്.
ഇംഗ്ലീഷിനെ പുണര്‍ന്നു പൊളളിയ രാജ്യമുണ്ട്
  • രണ്ടായിരത്തി രണ്ടില്‍ മലേഷ്യന്‍ സര്‍ക്കാര്‍ ശാസ്ത്രവും ഗണിതവും ഇംഗ്ലീഷില്‍ പഠിപ്പിക്കുന്നതിനു തീരുമാനമെടുത്തു.അതു വരെ പഠനമാധ്യമം മലായ്, ചൈനീസ്,തമിഴ് എന്നിവയായിരുന്നു. ആറുവര്‍ഷക്കാലത്തെ പരീക്ഷണത്തില്‍ നിന്നും അവര്‍ക്കു മനസിലായത് വിദ്യാഭ്യാസത്തിന്റെ നിലവാരം വളരെ താഴാനേ ഈ നടപടി വഴിയൊരുക്കിയുളളൂ എന്നാണ്. 2009 ല്‍ വീണ്ടും പഠനമാധ്യമം മാതൃഭാഷയിലേക്കു കൊണ്ടുവന്നു.
ഏതു രാജ്യത്താണ് മികച്ചനിലവാരമുളള വിദ്യാഭ്യാസമുളളത്?
  • പ്രോഗ്രാം ഫോര്‍ ഇന്റര്‍നാഷണല്‍ സ്റ്റുഡന്‍റ് അസസ്മെന്റ് (PISA),അന്താരാഷ്ട്ര തലത്തില്‍ വിദ്യാഭ്യാസഗുണനലവാരം കണക്കാക്കുന്ന പ്രധാന പരീക്ഷയാണ്. അറുപത്തിയഞ്ചു രാജ്യങ്ങള്‍ പങ്കെടുത്ത 2009 ലെ പരീക്ഷയില്‍ ചൈന, കൊറിയ, ഹോംങ്കോഗ്,ഫിന്‍ലാന്റ്, സിംഗപ്പൂര്‍ എന്നിവയാണ് മുന്നില്‍. ഈ രാജ്യങ്ങളിലെ കുട്ടികള്‍ മാതൃഭാഷയിലാണ് പഠിക്കുന്നത്
  • ഇന്റര്‍നാഷണല്‍ മാത്ത്മാറ്റിക്സ് ആന്‍ഡ് സയന്‍സ് സ്റ്റഡി ആണ് മറ്റൊരു അന്താരാഷ്ട്രപ്പരീക്ഷ.നാലും ഏട്ടും ക്ലാസുകളിലെ കുട്ടികളുടെ ശാസ്ത്രത്തിലും ഗണിതത്തിലുമുളള നിലവാരം ആണ് പരിശോധിക്കുക.2007ല്‍ അമ്പത്തൊമ്പതു രാജ്യങ്ങളിലെ വിദ്യാര്‍ഥികള്‍ പങ്കെടുത്തു.കൊറിയ, ജപ്പാന്‍, ഫിന്‍ലാന്റ്,തായ്വാന്‍ എന്നിവ ഉയര്‍ന്ന സ്കോര്‍ നേടി.മാതൃഭാഷയിലെ പഠനം ഈ വിഷയങ്ങളില്‍ കുട്ടികല്‍ക്ക് മുന്നിലെത്തുന്നതിനു തടസ്സമായില്ല.
  • എഡ്യൂക്കേഷണല്‍ ഇനിഷ്യേറ്റീവ് ഇന്ത്യയിലെ പ്രമുഖ നഗരങ്ങളിലെ മുന്തിയ ഇംഗ്ലീഷ് മീഡിയം വിദ്യാലയങ്ങളില്‍ നടത്തിയ പഠനത്തില്‍ ഈ വിദ്യാലയങ്ങളിലെ കുട്ടികള്‍ ലോകശരാശരിയിലും താഴെയാണെന്നു കണ്ടെത്തി.(2006)
  • അന്താരാഷ്ട്ര ഗണിത-ശാസ്ത്ര ഒളിമ്പ്യാഡുകളില്‍ ഇംഗ്ലീഷ് സംസാരിക്കുന്ന ഏഷ്യന്‍ രാജ്യങ്ങളുടെ പ്രകടനം മാതൃഭാഷയിലൂടെ ബോധനം നടത്തുന്ന രാജ്യങ്ങളുടേതിനേക്കാള്‍ പിന്നിലാണ്. ( ഇന്ത്യ, പാകിസ്ഥാന്‍, ബംഗ്ലാദേസ്, ഫിലിപ്പൈന്‍സ് മലേഷ്യ എന്നീ രാജ്യങ്ങളിലെ കുട്ടികള്‍ ഇംഗ്ലീെ,ില്‍ പരീക്ഷ എഴുതി പിന്നിലായപ്പോള്‍ ചൈന,ഇന്തോനേഷ്യ, കൊറിയ, തായ്ലന്റ്, വിയറ്റ്നാം, തായ്വാന്‍ എന്നീ രാജ്യങ്ങളിലെ കുട്ടികള്‍ അവരുടെ മാതൃഭാഷയിലെഴുതി മുന്നിലെത്തി.)
  • 2010 ലെ ഗണിത ഒളിമ്പ്യാഡില്‍ ഉന്നതസ്ഥാനം നേടിയ ആദ്യത്തെ ഇരുപത് രാജ്യങ്ങളിലെ കുട്ടികള്‍ മാതൃഭാഷയില്‍ പഠിച്ചവരും പരീക്ഷ അതേ ഭാഷയിലെഴുതിയവരുമാണ്.
ഉന്നതവിദ്യാഭ്യാസത്തിനു മാതൃഭാഷ അശക്തമോ?
കേരളത്തില്‍ പൊതുവേ ആളുകളുടെ വിശ്വാസമാണ് ഉന്നതവിദ്യാഭ്യാസത്തിനു മാതൃഭാഷ പര്യാപ്തമല്ലെന്ന്. അതിനാല്‍ പ്ലസ് ടു മുതല്‍ ആംഗലേയം തന്നെ. എന്താണ് ലോകത്തെ അവസ്ഥ?
  • മെഡിക്കല്‍, എഞ്ചിനീയറിംഗ്, മാനേജ്മെന്റ്, നിയമം എന്നീ കോഴ്സുകളില്‍ പഠനമാധ്യമം മാതൃഭാഷയിലുളള നിരവധി രാജ്യങ്ങളുണ്ട്. ചൈനീസ്, സ്പാനിഷ്,പോര്‍ച്ചഗീസ്, ജാപ്പാനീസ്,ജര്‍മന്‍, വിയറ്റ്നാമീസ്,ഫ്രഞ്ച്, കൊറിയന്‍,ഇറ്റാലിയന്‍,ടര്‍ക്കിഷ്,പോളിഷ്, ഉക്രേനിന്‍, മലായ്, പേര്‍ഷ്യന്‍, അസേറി പിന്നെ ഇംഗ്ലീഷ് നാട്ടിലെ അവരുടെ മാതൃഭാഷയും.(ഇന്ത്യയിലെ ഏതു മാതൃഭാഷ ഈ നിലയിലേക്കു പരിഗണിച്ചു? അധമബോധം നയിക്കുന്ന ജനതയും ഭരണകൂടവും!)
എന്താണ് സംഭവിച്ചുകൊണ്ടിരിക്കുന്നത്?
  • ഇംഗ്ലീഷ് മീഡിയം സ്കൂളുകള്‍ക്കായുളള ആവശ്യം കൂടിക്കൊണ്ടിരിക്കുകയാണ്. 2003-2006 കാലയളവിലാണ് വര്‍ധനയുടെ പ്രവണത കടിയത്. ആന്ധ്രാപ്രദേശില്‍ നൂറുശതമാനം വര്‍ധന. സര്‍ക്കാര്‍ എല്ലാ വിദ്യാലയങ്ങളും ഇംഗ്ലീഷ് മാധ്യമമാക്കാന്‍ തീരുമാനിച്ചു. തമിഴ്നാട്ടില്‍ 17% മഹാരാഷ്ട്രയില്‍ 12%, പഞ്ചാബില്‍4%, ഹിമാചല്‍പ്രദേശില്‍4%, കര്‍ണാടകയില്‍2%, കേരളത്തില്‍ 3%വീതം ഇംഗ്ലീഷ് മീഡയത്തിലേക്കുളള വര്‍ധനവുണ്ടായി.
  • മുംബൈ നഗരത്തില്‍ മറാത്തി മീഡിയക്കാര്‍ 4.31 ലക്ഷം.അതേ സമയം ഇംഗ്ലീഷ് മീഡിയക്കാര്‍ 5.57 ലക്ഷം (2009)
  • വാര്‍ത്തകള്‍ ശുഭകരമല്ല. ജമ്മുവില്‍ എല്ലാ വിദ്യാലയങ്ങളും ഇഗ്ലീഷ് മാഡിയത്തിലാക്കുമെന്ന് വിദ്യാഭ്യസമന്ത്രി (2003 FEB 16), പഞ്ചാബില്‍ ഗ്രാമീണവിദ്യാര്‍ഥികള്‍ക്ക ഗുണപരമായ വിദ്യാഭ്യാസം നല്‍കാന്‍ ഇരുപത്തിയൊന്നു ഇംഗ്ലീഷ് മീഡിയം മോഡല്‍സ്കൂളുകള്‍ സ്ഥാപിച്ചപ. ബംഗാളില്‍ ഇംഗ്ലീഷ് മീഡിയം മദ്രസകള്‍ ആരംഭിക്കാന്‍ 2010-11 തീരുമാനം.
മാതൃഭാഷ പഠനനിലവാരത്തെ ദോഷകരമായി ബാധിക്കുമോ?ഗവേഷണങ്ങള്‍ എന്തു പറയുന്നു?
  • മാതൃഭാഷാ വിദ്യാഭ്യാസം വിദ്യാര്‍ഥികളെ സ്വന്തം കാലില്‍ നിറുത്തുകയും അവരുടെ ബുദ്ധിസാമര്‍ഥ്യം പോലെ തന്നെ അവരുടെ വ്യക്തിത്വവും വികസിപ്പിക്കുകയും ചെയ്യും (THE IMPORTANCE OF MOTHERTONGUE BASED SCHOOLING FOR EDUCATIONAL QUALITY ,UNESCO 2004, Benson,Carole)
  • മെച്ചപ്പെട്ട അറിവുനേടലിന് ,വിജ്ഞാനത്തിന് മാതൃഭാഷാടിസ്ഥാനവിദ്യാഭ്യാസം. പ്രൈമറിതലത്തിലെ വിദ്യാഭ്യാസത്തിനുവേണ്ടി ജി എട്ട് രാജ്യങ്ങളിലെ ഒരു വികസിത രാജ്യം പോലും ,യൂറോപ്യന്‍യുണിയനിലെ രാജ്യങ്ങളിലൊന്നു പോലും, ഒ ഇ സി ഡി രാജ്യങ്ങളും ഒരു വിദേശഭാഷയെ ഉപയോഗിക്കുന്നില്ല.
മാതൃഭാഷയുടെ അവഗണന എങ്ങനെ ബാധിക്കും?
  • സാഹിത്യം, മാനവിക വികസനം, സാമ്പത്തിക പുരോഗതി,സാങ്കേതികവിദ്യാമേല്‍ക്കോയ്മ, ഇന്റര്‍നെറ്റ്, വെബ്സൈറ്റുകള്‍ എന്നിവയിലെല്ലാം മാതൃഭാഷാബോധനമാധ്യമ രാജ്യങ്ങള്‍ മുന്നിലാണ്.( സ്ഥിതിവിവരക്കണക്കുകള്‍ ഈ പുസ്തകത്തിലുണ്ട്)
  • അധികാരം,തൊഴില്‍ ,ഉന്നതവിദ്യാഭ്യാസം, സിവില്‍ സര്‍വീസ്, എന്നിവയിലെല്ലാം വൈദേശികഭാഷയെ ആദരിച്ചിരുത്തുന്ന മനോഭാവമാണ് പ്രശ്നങ്ങള്‍ക്കു കാരണം.
  • വോട്ടു ചോദിക്കുന്ന ഭാഷയില്‍ ജനങ്ങളെ ഭരിക്കുമ്പോഴേ ജനാധിപത്യം ചലനാത്മകമാകൂ.. ജനങ്ങള്‍ക്കു മനസിലാകാത്ത ഭാഷയില്‍ ഭരിക്കുമ്പോഴാണ് അഴിമതി കൂടുന്നത്.
കൂടുതല്‍ വിവരങ്ങള്‍ക്ക് ഈ പുസ്തകം തന്നെ വായിക്കണം.  
വിദേശഭാഷാമാധ്യമപഠനത്തെക്കുറിച്ചുളള കെട്ടുകഥകള്‍ ഓരോന്നായി പൊളിച്ചെറിയുന്ന പുസ്തകം. ആധികാരിക പഠനത്തിന്റെ പിന്‍ബലം.  
ശക്തമായ നിരീക്ഷണങ്ങള്‍ ധാരാളം.അധിനിവേശത്തിന്റെയും ഭാഷാസാമ്രാജ്യത്വത്തിന്റെയും തലങ്ങള്‍ ചര്‍ച്ച ചെയ്യുന്ന ഈ പുസ്തകം വിലപ്പെട്ട തിരിച്ചറിവുകളിലേക്കു നയിക്കും. വായിക്കാതിരിക്കരുത്.
( പവര്‍പോയന്റ് പ്രസന്റേഷനുളള സ്ലൈഡുകളെ മനസില്‍ കണ്ടാണ് ഈ കുറിപ്പ് ഇങ്ങനെ തയ്യാറാക്കിയത്.ആവശ്യക്കാര്‍ സമൂഹ,രക്ഷാകര്‍തൃ യോഗങ്ങളില്‍ പ്രയോജനപ്പെടുത്തുക) 

Saturday, February 15, 2014

കുട്ടികള്‍ (ഗോപാലേട്ടന്റെ) ജീവിതം പഠിക്കുന്നു...

ഫോട്ടോ കണ്ട് ഇതൊരു നാടകക്യാമ്പാണെന്ന് തെറ്റിദ്ധരിക്കരുത്.സാമൂഹ്യശാസ്ത്രക്ലാസ്സാണ്.ഒന്നര മണിക്കൂര്‍ നീണ്ടുനില്‍ക്കുന്ന ഒരു പീരിയഡ്.
ഗോപാലേട്ടന്റെ ജീവിതമാണ് കുട്ടികള്‍ നാടകമാക്കി കളിക്കുന്നത്.ഗോപാലേട്ടനായി രൂപം മാറാന്‍ അവര്‍ക്കു പത്തു മിനിട്ടു സമയം മാത്രമേ വേണ്ടു..കുട്ടികള്‍ക്ക് ഒരു ഷാളോ ലുങ്കിയോ തുണിക്കഷണമോ മതി കഥാപ്പാത്രങ്ങളായി മാറാന്‍. ഡസ്ക്കും ബെഞ്ചും പുതപ്പും പായയും ഉപയോഗിച്ച് അവര്‍ രംഗം സജ്ജീകരിക്കുന്നു.

  • ആരാണീ ഗോപാലേട്ടന്‍?
ഏഴാം ക്ലാസ്സിലെ കൈകോര്‍ത്തു മുന്നേറാം എന്ന പാഠഭാഗത്തിലെ ഒരു കഥാപ്പാത്രം.താഴ്ന്ന ഇടത്തരം കുടുംബത്തിലെ ഒരംഗം.ജീവിതം തള്ളിനീക്കാന്‍ പെടാപാടുപെടുന്ന സത്യസന്ധനായ ഒരു മനുഷ്യന്‍. കടം കയറി വീടും പുരയിടവും ജപ്തിചെയ്യാന്‍ വരുന്നതറിഞ്ഞ് ആത്മഹത്യചെയ്യാന്‍ ഒരുങ്ങി നില്‍ക്കുന്ന ഒരാള്‍.
  • കുട്ടികള്‍ എന്തിനാണ് ഗോപാലേട്ടന്റെ ജീവിതം പഠിക്കുന്നത്?
സാമ്പത്തികമായ അസമത്വങ്ങള്‍ സമൂഹത്തില്‍ നിലനില്‍ക്കുന്നു എന്ന് തിരിച്ചറിയാനും ദാരിദ്ര്യം മനുഷ്യജീവിതത്തെ വല്ലാതെ പരിമിതപ്പെടുത്തുന്നുവെന്ന് മനസ്സിക്കാനും.
പാഠത്തിന്റെ തുടക്കത്തില്‍ ഗോപാലേട്ടന്റെ ജീവിത സന്ദര്‍ഭങ്ങള്‍ വിശദമാക്കുന്ന നാല് കാര്‍ട്ടൂണ്‍ സ്ട്രിപ്പുകള്‍ കൊടുത്തിട്ടുണ്ട്.ഇതുവായിച്ച് ഇതിനെ നാടകമാക്കിക്കോളൂ എന്നു പറഞ്ഞാല്‍ കുട്ടികള്‍ നാടകമാക്കും. പക്ഷേ, നന്നാവില്ല.പഠനം നടക്കില്ല.

കുട്ടികള്‍നാടകം കളിക്കുന്നത്ഗോപാലേട്ടനെക്കുറിച്ച് പഠിക്കാനാണ്.നാടകം നന്നാവണമെങ്കില്‍ കുട്ടികള്‍ ഗോപാലേട്ടനെക്കുറിച്ച് ആലോചിക്കണം.അയാളുടെ മനസ്സിലേക്കു കടക്കണം.ഇത്ര  ചെറിയകുട്ടികള്‍ക്ക് അതിനു കഴിയുമോയെന്ന് നാം സംശയിക്കും. പക്ഷേ, കഴിയും.അവരുടെ ചിന്തയെ തൊട്ടുണര്‍ത്തിയാല്‍.അവരുടെ മനസ്സിനെ പിടിച്ചു കുലുക്കിയാല്‍.അതിനു ചില പ്രവര്‍ത്തനങ്ങളിലേക്കു കുട്ടികളെ നയിക്കണം.അത് എന്തൊക്കെയാണെന്ന് നോക്കാം.
ക്ലാസിനു നടുക്കുള്ള സ്ഥലത്ത് കുട്ടികള്‍ പരസ്പരം തൊടാതെ നടക്കുന്നു.അവര്‍ക്കു ചുറ്റുമുള്ള ഒരു കഥാപ്പാത്രത്തിന്റെ പേര് ഞാന്‍ വിളിച്ചു പറയുന്നു.
തെങ്ങുകയറ്റക്കാരന്‍ കുമാരേട്ടന്‍ കുട്ടികള്‍ പെട്ടെന്ന് കുമാരേട്ടനായി ഫ്രീസ് ചെയ്യുന്നു. ഒരു നിമിഷനേരത്തേക്കു ക്ലാസ് നിശബ്ദം.എവിടയോ കണ്ടുമറന്ന ഒരു തെങ്ങുകയറ്റതൊഴിലാളിയായി കുട്ടികള്‍ രൂപാന്തരം പ്രാപിച്ചിരിക്കുന്നു.
വീണ്ടും നടക്കുന്നു.കുട്ടികളുടെ പൊട്ടിച്ചിരി.
ഇതുപോലെ മറ്റു ചില കഥാപ്പാത്രങ്ങളുടെ പേരുകള്‍.....
കൃഷിക്കാരന്‍ നാരായണേട്ടന്‍
അടയ്ക്കാപൊളിക്കുന്ന ശശിയേട്ടന്‍
മീന്‍കാരി കല്ല്യാണിയേച്ചി
കള്ളുകുടിയന്‍ രാഘവേട്ടന്‍...
നടക്കുന്നതിനിടയില്‍ കുട്ടികള്‍ ഓരോതവണയും ഫ്രീസ് ചെയ്യുന്നു.ഒടുവില്‍
കൂലിപ്പണിക്കാരന്‍ ഗോപാലേട്ടന്‍...
കുട്ടികള്‍ ഒരു നിമിഷം ആലോചിക്കുന്നു.ഗോപാലേട്ടനായി
ഫ്രീസ് ചെയ്യുന്നു.
കുട്ടികള്‍ നിലത്ത് വൃത്താകൃതിയിലിരിക്കുന്നു. 
കൂലിപ്പണിക്കാരന്‍ ഗോപാലേട്ടനെ പരിചയമുണ്ടോ എന്ന് ചോദിക്കുന്നു.കുട്ടികള്‍ ഇല്ലെന്നു പറയുന്നു.നിങ്ങള്‍ ഗോപാലേട്ടനായപ്പോള്‍ ആരായിരുന്നു മനസ്സില്‍?
കുട്ടികള്‍ അവര്‍ക്കു പരിചയമുള്ള കൂലിപ്പണിക്കാരായ ചിലരുടെ പേരുകള്‍ പറയുന്നു.
  • ശരിക്കും ഗോപാലേട്ടന്‍ ആരാണ്?
പാഠപുസ്തകം നോക്കുന്നു.ഗോപാലേട്ടന്റെ ജീവിതം എന്ന തലക്കെട്ടില്‍ കൊടുത്ത നാലു കാര്‍ട്ടൂണ്‍ സ്ട്രിപ്പുകള്‍ വായിക്കുന്നു.ചര്‍ച്ചചെയ്യുന്നു.
  • ആരാണ് ഗോപാലേട്ടന്‍?
  • ഗോപാലേട്ടന് എത്ര പ്രായം കാണും?
  • ഗോപാലേട്ടന്റെ കുടുംബം?ഭാര്യ, മക്കള്‍...?
  • അദ്ദേഹത്തിന്റെ സന്തോഷം? പ്രയാസം..?
  • ഇനി ഗോപാലേട്ടന്റെ ജീവിതത്തില്‍ ഉണ്ടാകാന്‍പോകുന്ന പ്രതിസന്ധി എന്തായിരിക്കും?
    കുട്ടികളെ നാലു ഗ്രൂപ്പുകളാക്കുന്നു.ഓരോഗ്രൂപ്പിനും ഓരോ സ്ട്രിപ്പുകള്‍ നല്‍കുന്നു.ഗോപാലേട്ടന്റെ ജീവിതത്തിലെ ഈ സന്ദര്‍ഭങ്ങള്‍ കുട്ടികള്‍ നാടകരൂപത്തില്‍ അവതരിപ്പിക്കണം.പ്രധാന ആശയം ചോര്‍ന്നുപോകാതെ. ആവശ്യമായ കൂട്ടിച്ചേര്‍ക്കലുകള്‍ നടത്താം.
    പ്ലാനിങ്ങിനു പതിനഞ്ചുമിനുട്ട് സമയം അനുവദിക്കുന്നു.

    കുട്ടികള്‍ ഗ്രൂപ്പില്‍ പ്ലാന്‍ ചെയ്യാന്‍ തുടങ്ങി. 
    •  കഥാപ്പാത്രങ്ങള്‍ ആരൊക്കെ?  
    • എന്തൊക്കെ സംഭവങ്ങള്‍? 
    •  എവിടെയാണ് നടക്കുന്നത്?പിന്നീട് കഥാപ്പാത്രങ്ങളെ നിശ്ചയിച്ചു.ചില ഗ്രൂപ്പില്‍ ഇതു തര്‍ക്കങ്ങള്‍ക്കു വഴിവെച്ചു.ചിലര്‍ ചില വിട്ടുവീഴ്ചകള്‍ ചെയ്ത് തര്‍ക്കങ്ങള്‍ക്കു പരിഹാരവും കണ്ടെത്തി.കഥാപ്പാത്രങ്ങളുടെ സംഭാഷണങ്ങളെക്കുറിച്ച് ചില ധാരണകളില്‍ എത്തിച്ചേര്‍ന്നു.
    അവതരണത്തിനുള്ള സമയമായി.ക്ലാസില്‍ ലഭിക്കുന്നതെന്തും അവര്‍ വേഷവിതാനത്തിനായി ഉപയോഗിച്ചു. തുണിക്കഷണങ്ങള്‍ മുതല്‍ മേശവിരി വരെ. ഇന്‍സ്ട്രുമെന്‍റ്ബോക്സു്മുതല്‍ ചൂല് വരെ അവര്‍ പ്രോപ്പര്‍ട്ടികളാക്കി.  ബെഞ്ചും ഡസ്ക്കും മേശവിരിയും ഉപയോഗിച്ച് അവര്‍ ഗോപാലേട്ടന്റെ വീടുണ്ടാക്കി. അപ്പോഴാണ് രണ്ടാം ഗ്രൂപ്പിന്റെ സംശയം.
    കോണ്‍ഗ്രീറ്റ് വീടാണ് ഞങ്ങള്‍ക്കു വേണ്ടത്. ഇതെങ്ങനെ ശരിയാകും?
    കടം വാങ്ങി വീട് പുതുക്കിപണിത ഗോപാലേട്ടന്റെ പ്രതിസന്ധികളാണ് രണ്ടാം ഗ്രൂപ്പ് അവതരിപ്പിക്കേണ്ടത്.
    അഭിജിത്ത് അതിനു പരിഹാരം നിര്‍ദ്ദേശിച്ചു.
    "നമുക്ക് പുല്ലുപായ മുകളില്‍ വലച്ചുകെട്ടാം.അപ്പോള്‍ അത് കോണ്ക്രീറ്റുപോലെ തോന്നിക്കും.”
    അവരങ്ങനെ ചെയ്യുകയുംചയ്തു.
    അങ്ങനെ നാടകാവതരണം തുടങ്ങി.
    നാലുഗ്രൂപ്പിലെയും നാലു ഗോപാലേട്ടന്‍മാര്‍.അവരുടെ നാലുഭാര്യമാര്‍. അവരുടെ മക്കള്‍..ഒരുഗ്രൂപ്പ് അവസാനിപ്പിച്ചിടത്തുനിന്ന് മറ്റൊരുഗ്രൂപ്പ് തുടങ്ങുന്നു.ഗോപാലേട്ടന്റെ സ്വപ്നങ്ങള്‍,പ്രതീക്ഷകള്‍,പ്രയാസങ്ങള്‍...കുട്ടികള്‍ ഭംഗിയായി ഇംപ്രൊവൈസ് ചെയ്തു.ഇംപ്രൊവൈസ് ചെയ്യാനുള്ള കുട്ടികളുടെ കഴിവ് വര്‍ദ്ധിച്ചിരിക്കുന്നതായി എനിക്കുതോന്നി..ഇംപ്രൊവൈസ് ചെയ്യണമെങ്കില്‍ നല്ല ഭാവന വേണം.
    ഓരോഗ്രൂപ്പിന്റെയും അവതരണം എത്രത്തോളം നന്നായി?എന്തോക്കെയായിരുന്നു അവരുടെ ഗുണങ്ങള്‍?പോരായ്മകള്‍?പ്രധാന ആശയത്തോട് അവര്‍ എത്രത്തോളം നീതിപുലര്‍ത്തി?
    ഓരോ ഗ്രൂപ്പിന്റെയും അവതരണത്തെ മറ്റു  ഗ്രൂപ്പുകള്‍ വിലയിരുത്തുന്നതാണ്  അടുത്തഘട്ടം. 
    വിലയിരുത്തുന്നതിനുമുമ്പ് ഓരോ ഗ്രൂപ്പിനും കൂടിയാലോചിക്കാനുള്ള സമയം നല്‍കി . തുടര്‍ന്ന് ഗ്രൂപ്പിന്റെ അഭിപ്രായങ്ങള്‍ അവതരിപ്പിച്ചു. ഏതു ഗ്രൂപ്പിന്റെ അവതരണത്തെയാണോ വിലയിരുത്തിയത് ആ ഗ്രൂപ്പിന് മറുപടി പറയാന്‍ അവസരം നല്കി.
    • ഇനി ഗോപാലേട്ടന്റെ ജീവിതം ഒരിക്കല്‍കൂടി അപഗ്രഥിക്കണം.

    കുട്ടികള്‍ വീണ്ടും പാഠഭാഗത്തേക്കു വന്നു. ഗോപാലേട്ടന്റെ ജീവിതവുമായി ബന്ധപ്പെട്ട് പാഠഭാഗത്തു നല്‍കിയ ചോദ്യങ്ങള്‍ വിശകലനം ചെയ്തു.
    • വരുമാനത്തില്‍ കൂടുതല്‍ കടം വാങ്ങി ആധുനിക സുഖസൗകര്യങ്ങള്‍ ഉണ്ടാക്കി ജീവിക്കുന്നതിനോടുള്ള നിങ്ങളുടെ പ്രതികരണം എന്താണ്?
    വളരെ പ്രധാനപ്പെട്ട ചോദ്യം.ഈ ചോദ്യത്തോടുള്ള പ്രതികരണം കുട്ടികളുടെ ഹൃദയത്തില്‍ നിന്നു വരണം.അതിനു വേണ്ടിയാണ് കുട്ടികള്‍ ഇതുവരെ ഗോപാലേട്ടന്റെ ജീവിതം പഠിച്ചത്.ഗോപാലേട്ടനായി അവര്‍ രൂപാന്തരപ്പെട്ടത്.
     
    • സാമൂഹ്യശാസ്ത്രക്ലാസ് സര്‍ഗാത്മകമാകുന്നതെപ്പോള്‍ ?

    ക്ലാസുമുറിയില്‍ കുട്ടിക്ക് ആത്മാവിഷ്ക്കാരത്തിനുള്ള അവസരം വേണം.ചിത്രംവരയിലൂടെ,അഭിനയത്തിലൂടെ,കളിയിലൂടെ,വിവിധ രചനകളിലൂടെ...എങ്കിലേ ക്ലാസ്സുമുറി കുട്ടിയുടേതാകൂ.കുട്ടിയുടെ മനസ്സ് ശാന്തമാകൂ.
    • കുട്ടിയുടെ ചിന്തകളെ കൂടു തുറന്നു വിടണം.എങ്കിലേ അവന്‍/ള്‍  പഠനത്തിന്റെ അടുത്ത പടി കയറൂ.
    • കുട്ടിയുടെ വികാരങ്ങളെ തൊടാന്‍ കഴിയണം.എങ്കിലേ അവന്/ള്‍ക്ക്  പഠനം അര്‍ത്ഥവത്തായി തോന്നൂ.
    • കുട്ടിയുടെ നിലപാടുകളെ നിര്‍ഭയം അവതരിപ്പിക്കാന്‍ കഴിയണം. എങ്കിലേ അവര്‍ വ്യക്തിത്വമുള്ളവരായി വളരൂ.
    • ക്ലാസ്സുമുറി  പ്രചോദിപ്പിക്കണം.എങ്കിലേ കുട്ടിയുടെ ഭാവനയ്ക്കു ചിറകുമുളയ്ക്കൂ......

    എം എം സുരേന്ദ്രന്‍ 
    ഈ പോസറ്റിന്റെ അടുത്തഭാഗം വായിക്കാന്‍ കാനത്തൂര്‍പെരുമ സന്ദര്‍ശിക്കുക (http://kanathurperumagups.blogspot.in/2014/02/ii.html?spref=fb)

Friday, February 7, 2014

സാമൂഹ്യശാസ്ത്രക്ലാസില്‍ ചിത്രംവര വേണോ?



സാമൂഹ്യശാസ്ത്രക്ലാസില്‍ ചിത്രംവരയ്ക്ക് എന്തു പ്രാധാന്യം എന്നല്ലേ...?പ്രാധാന്യമുണ്ട്.മാത്രമല്ല കുട്ടികളെ ചരിത്രപഠനത്തിലേക്കു നയിക്കാനുള്ള ശക്തമായ ഒരു ടൂള്‍ കൂടിയാണ് ചിത്രംവര. എനിക്ക് ഈയിടെയാണ് അത് ബോധ്യപ്പെട്ടത്.
ഏഴാം ക്ലാസിലെ വേഷം മാറുന്ന കേരളം യൂണിറ്റ് 7 എന്ന പാഠഭാഗത്തിലെ ഒന്നാമത്തെ മൊഡ്യൂള്‍ പഠിപ്പിക്കുന്ന സന്ദര്‍ഭം.
സ്വദേശികളും വിദേശികളുമായ സസ്യങ്ങളെ പട്ടികപ്പെടുത്തിയ ശേഷം കേരളത്തിനു വിദേശ രാജ്യങ്ങളുമായുള്ള ബന്ധം സൂചിപ്പിക്കുന്ന വായനക്കുറിപ്പു വായിക്കുന്നു.തുടര്‍ന്ന്
  • വാസ്ഗോഡിഗാമയുടെ ചിത്രം പ്രൊജക്ട് ചെയ്തു കാണിക്കുന്നു.
  • ഇത് ആരാണെന്നു ചോദിക്കുന്നു.ഇദ്ദേഹത്തെ കുറിച്ചുളള സൂചന 'പുതുവഴിതേടി' എന്ന വയനാക്കുറിപ്പിലുണ്ട്. അതു വായിച്ചു നോക്കാന്‍ ആവശ്യപ്പെടുന്നു.
വാസ്ഗോഡിഗാമ എവിടെ നിന്നാണ് കേരളത്തിലേക്കു വന്നത് ?
  • ലോക ഭൂപടം കാണിക്കുന്നു.
  • കുട്ടികള്‍ വാസ്ഗോഡിഗാമയുടെ റൂട്ട് കണ്ടെത്തുന്നു.
  • യാത്രക്കിടയില്‍ ഗാമയും കൂട്ടരും നേരിട്ട പ്രയാസങ്ങള്‍ വിവരിക്കുന്ന വായനാക്കുറിപ്പു വായിക്കുന്നു.ചര്‍ച്ച.
ഗാമയുടെ വരവ് ചിത്രം വരയിലൂടെ ആവിഷ്ക്കരിക്കാമോ?
കഴിയില്ല എന്നായിരുന്നു കുട്ടികളുടെ ആദ്യ പ്രതികരണം.വരയ്ക്കാനുള്ള കുട്ടികളുടെആത്മവിശ്വാസം നഷ്ടപ്പെട്ടതായി തോന്നി.നിലത്ത് ചോക്കുകൊണ്ടാണ് വരയ്ക്കേണ്ടത് എന്നുപറഞ്ഞപ്പോള്‍ കുട്ടികള്‍ തയ്യാറായി.കടലാസിനെയും ബ്രഷിനെയുമാണ് അവര്‍ക്ക് പേടി.
കട്ടികളെ നാല് ഗ്രൂപ്പുകളാക്കി.
ഓരോഗ്രൂപ്പിനും വരയ്ക്കാനുള്ള സ്ഥലവും കളര്‍ചോക്കുകളും നല്‍കി.
നേര്‍ത്ത സംഗീതം കേള്‍പ്പിച്ചു.
അവര്‍ വര അരംഭിച്ചു.അപ്പോഴാണ് അവര്‍ക്ക് ഒരു നൂറുകൂട്ടം സംശയങ്ങള്‍....
അന്നത്തെ പായക്കപ്പല്‍ എങ്ങനെയായിരുന്നു? അത് എങ്ങനെയാണ് മുന്നോട്ടു നീങ്ങുന്നത് ?അതില്‍ സാധനങ്ങള്‍ എവിടെയാണ് സൂക്ഷിക്കുന്നത് ?അതിലെ ജോലിക്കാരുടെ വേഷം എന്തായിരുന്നു? ഞാന്‍ നേരത്തെ സുക്ഷിച്ചുവച്ച പായക്കപ്പലിന്റെയും മറ്റും ചിത്രങ്ങള്‍ പ്രൊജക്ടു ചെയ്തു കാണിച്ചുകൊടുത്തു.എന്നിട്ടും അവരുടെ സംശയങ്ങള്‍ തീര്‍ന്നില്ല.
ഗാമയെ സ്വീകരിക്കാന്‍ കാപ്പാട് കടപ്പുറത്ത് അപ്പോള്‍ ആരായിരുന്നു ഉണ്ടായിരുന്നത് ?
സാമൂതിരിയുടെ പടയാളികളുടെ വേഷം എങ്ങനെയായിരുന്നു ?
കൈയ്യിലെ ആയുധം എങ്ങനെയുള്ളതായിരുന്നു...?
തുടങ്ങി നീണ്ടുപോയ കുട്ടികളുടെ സംശയങ്ങള്‍ എന്നെ വല്ലാതെ കുഴക്കി.കുട്ടികള്‍ ശരിയായ ചരിത്ര പഠനത്തിലേക്കു നീങ്ങുകയാണെന്ന് എനിക്കു ബോധ്യപ്പെട്ടു.കുട്ടികള്‍ക്ക് റഫറന്‍സിനായി നല്‍കാവുന്ന വിഭവങ്ങള്‍ ഞാന്‍ വേണ്ടത്ര ശേഖരിച്ചിരുന്നില്ല.ഒരു സാമൂഹ്യശാസ്ത്രം പഠിപ്പിക്കുന്ന അധ്യാപകന്‍ എന്ന നിലയില്‍ എന്റെ പരിമിതി ബോധ്യപ്പെട്ട ഒരു സന്ദര്‍ഭമായിരുന്നു അത്. ക്രിയേറ്റീവ് ഡ്രോയിങ്ങിനുള്ള അവസരങ്ങള്‍ ക്ലാസില്‍ ധാരാളമായി നല്‍കേണ്ടതുണ്ടെന്ന് എന്നെ പഠിപ്പിച്ച ഒരു സന്ദര്‍ഭം.