ചൂണ്ടുവിരലിലെ വിഭവങ്ങള്‍

2010 ജൂലൈമുതല്‍ അക്കാദമിക വിഭവങ്ങളുമായി ഈ വിദ്യാഭ്യാസ ബ്ലോഗ് ...പ്രയോജനപ്പെടുത്തുക, പ്രയോഗിക്കുക, പ്രചോദിപ്പിക്കുക, പ്രചരിപ്പിക്കുക.. ചൂണ്ടുവിരലില്‍ പങ്കിട്ട വിഭവമേഖലകള്‍....> 1.അധ്യാപക ശാക്തീകരണം ,2. വായനയുടെ വഴി ഒരുക്കാം, 3.എഴുത്തിന്‍റെ തിളക്കം, 4.വിദ്യാഭാസ ഗുണനിലവാരം- സംവാദം,5. മികവ്, 6.ശിശുസൌഹൃദ വിദ്യാലയം, 7.സര്‍ഗാത്മക വിദ്യാലയം, 8.നിരന്തര വിലയിരുത്തല്‍, 9.ഗണിതപഠനം, 10.വിദ്യാഭ്യാസ അവകാശ നിയമം, 11.ദിനാചരണങ്ങള്‍, 12.പാര്‍ശ്വവത്കരിക്കപ്പെടുന്നവര്‍, 13. രക്ഷിതാക്കളും സ്കൂളും, 14. കളരി, 15. ക്ലാസ് അന്തരീക്ഷം/ക്രമീകരണം, 16.ഇംഗ്ലീഷ് പഠനം, 17.ഒന്നാം ക്ലാസ്, 18. ശാസ്ത്രത്തിന്റെ പാത, 19.ആവിഷ്കാരവും ഭാഷയും, 20. പ്രത്യേക പരിഗണന അര്‍ഹിക്കുന്ന കുട്ടികള്‍, 21. ഐ ടി സാധ്യതകള്‍, 22. പഠനറിപ്പോര്‍ട്ടുകള്‍, 23.പഠനമാധ്യമം 24. ഭൌതികസൌകര്യങ്ങളില്‍ മികവ്, 25.അക്കാദമികസന്ദര്‍ശനം, 26.ഗ്രാഫിക് ഓര്‍ഗനൈസേഴ്സ്, 27.പ്രഥമാധ്യാപകര്‍.,28. ബാല, 29. വളരുന്ന പഠനോപകരണം,30. കുട്ടികളുടെ അവകാശം, 31. പത്രങ്ങള്‍ സ്കൂളില്‍, 32.പാഠ്യപദ്ധതി,33. ഏകീകൃത സിലബസ്, 34.ഡയറ്റ് .35.ബി ആര്‍ സി,36. പരീക്ഷ ,37. പ്രവേശനോത്സവം,38. IEDC, 39.അന്വേഷണാത്മക വിദ്യാലയങ്ങളുടെ ലോകജാലകം, 40. കലാവിദ്യാഭ്യാസം, 41.പഞ്ചായത്ത്‌ വിദ്യാഭ്യാസ സമിതി, 42. പഠനോപകരണം, 43.പാഠ്യപദ്ധതി പരിഷ്കരണം, 44. ചൂണ്ടുവിരല്‍,45. ടി ടി സി, 46.പുതുവര്‍ഷം, 47.പെണ്‍കുട്ടികളുടെ ശാക്തീകരണം, 48. ക്രിയാഗവേഷണം,49. ടീച്ചിംഗ് മാന്വല്‍, 50. പൊതുവിദ്യാഭ്യാസസംരക്ഷണം, 51.ഫീഡ് ബാക്ക്, 52.സ്റ്റാഫ് റൂം, 53. കുട്ടികളുട അവകാശം,54. കൃഷിയും പഠനവും,55. നോട്ട് ബുക്ക് ആകര്‍ഷകവും സമഗ്രവും, 56.പഠനയാത്ര, 57. വിദ്യാബ്ലോഗുകള്‍,58. സാമൂഹികശാസ്ത്രം, 59. സ്കൂള്‍ അസംബ്ലി, 60.സ്കൂള്‍ റിസോഴ്സ് (റിസേര്‍ച്) ഗ്രൂപ്പ് - ,61.പ്രതിഫലനാത്മകക്കുറിപ്പ്, 62. ബദല്‍പാഠങ്ങള്‍, 63.മെന്ററിംഗ്,64. വര്‍ക്ക്ഷീറ്റുകള്‍ ക്ലാസില്‍, 65.വിലയിരുത്തല്‍, 66. സാമൂഹിക ശാസ്ത്രാന്തരീക്ഷം, 67.അനാദായം, 68.എ ഇ ഒ , 69.കായികവിദ്യാഭ്യാസം,70. തിയേേറ്റര്‍ സങ്കേതം പഠനത്തില്‍, 71.നാടകം, 72.നാലാം ക്ലാസ്.73. പാഠാവതരണം, 74. മോണിറ്ററിംഗ്, 75.വിദ്യാഭ്യാസ ചിന്തകള്‍, 76.സഹവാസ ക്യാമ്പ്, 77. സ്കൂള്‍ സപ്പോര്‍ട്ട് ഗ്രൂപ്പ്,78.പ്രദര്‍ശനം,79.പോര്‍ട്ട്‌ ഫോളിയോ...80 വിവിധജില്ലകളിലൂടെ... പൊതുവിദ്യാഭ്യാസത്തിന്റെ കരുത്ത് അറിയാന്‍ ചൂണ്ടുവിരല്‍...tpkala@gmail.com.

Saturday, April 14, 2012

ഇടതുപക്ഷ അധ്യാപക സുഹൃത്തുക്കളുടെ വിദ്യാലയം

എന്നോട് ഒരു സുഹൃത്ത് വിളിച്ചു ചോദിച്ചു .ഇടതുപക്ഷ അധ്യാപകരുടെ ശില്പശാല നടത്താന്‍ പോകുന്നു. എന്തെങ്കിലും നിര്‍ദേശം ഉണ്ടോ എന്ന്.
അപ്പോള്‍ ഞാന്‍  സുഹൃത്തിനോട് ഒരു ചോദ്യം ചോദിച്ചു .ചോദ്യങ്ങളാണല്ലോ അന്വേഷണത്തിന്റെ വിത്ത്.
ഇടതു പക്ഷ അധ്യാപക സുഹൃത്തുക്കള്‍ ഉള്ള വിദ്യാലയവും വലതു പക്ഷ ലോകവീക്ഷണം പുലര്ത്തുന്നവരുടെ വിദ്യാലയവും തമ്മില്‍ എന്തൊക്കെ പ്രകടമായ വ്യത്യാസങ്ങള്‍ കാണും? പ്രതീക്ഷിക്കുന്നു ?
മൂര്‍ച്ചയുള്ള ചോദ്യം സൂക്ഷ്മമായി ഉത്തരം വേണ്ട ചോദ്യം  കൂടുതല്‍ ചിന്ത വേണം.കൂടുതല്‍ വ്യക്തത വേണം. അതിനായി ആദ്യം ഞാന്‍ ഒരു മഹാഗുരുവിനെ തേടി. 
അധ്യാപകനായിരുന്ന എ കെ ജിയെ വീണ്ടും വായിച്ചു
എ കെ ജി എന്ന അധ്യാപകനെ കണ്ടെത്തുക .അദ്ദേഹത്തിന്റെ അനുഭവങ്ങളെ പാഠം ആക്കി മാറ്റുക . എന്റെ അന്വേഷണത്തിന്റെ  മാര്‍ഗം ഇതായിരുന്നു. പതിമൂന്നു    നിഗമനങ്ങളില്‍   ഞാന്‍  എത്തി  ചേര്‍ന്നു.അവ ആ  കണ്ടെത്തലുകള്‍ പങ്കിടാം .(ശീര്‍ഷകങ്ങള്‍ എന്റേത് )  .
1 . കുട്ടികള്‍ക്ക് വേണ്ടി/ കുട്ടികളെ അറിഞ്ഞുള്ള  അധ്യാപക മനസ് 
എ കെ ജിപറയുന്നു
  • 'ഞാന്‍ ഏകദേശം ഏഴു വര്ഷം പഠിപ്പിച്ചു. ആ ജോലി എനിക്ക് സന്തോഷ ദായകവും ഉന്മേഷകരവും   ആയിരുന്നു. കളങ്കമറ്റ ചെറിയ കുട്ടികള്‍  .ഞാന്‍ അവരുടെ എല്ലാം രക്ഷാധികാരിയാനെന്ന ബോധം. ധാരാളം ഒഴിവു ദിവസങ്ങള്‍ . പൊതു പ്രവര്‍ത്തനത്തിനുള്ള സന്ദര്‍ഭം. ജനങ്ങളുടെ സ്നേഹാദരങ്ങള്‍ ആര്ജിക്കാനുള്ള അവസരം. കനത്ത ജീവിത ക്ലേശം മറക്കാനും കുട്ടികളോടൊത്ത്തു കളിച്ചു ജീവിക്കാനുമുള്ള അവസരം.  -ഇതെല്ലാം എന്നെ മത്ത് പിടിപ്പിച്ചു.
  • അദ്ധ്യാപനത്തിനുള്ള എന്റെ താല്പര്യം വര്‍ധിച്ചു വന്നു . പണത്തിനു വേണ്ടി ജോലി ചെയ്യുന്ന ഒരധ്യാപകന്‍ എന്ന നിലയില്‍ നിന്നും ജനങ്ങളുടെ സുഹൃത്തായി പണിയെടുക്കുന്ന ഒരധ്യാപകന്‍ ആയി ഞാന്‍ മാറി . നേരം പുലരുമ്പോള്‍ മുതല്‍ ഒമ്പത് മണി വരെ ഞാന്‍ വിദ്യാര്തികളുടെ വീടുകള്‍ സന്ദര്‍ശിക്കുകയും അവരുടെ രക്ഷിതാക്കളുമായി സംസാരിക്കുകയും ചെയ്തു, പക്ഷെ ക്ലാസ് ആരംഭിക്കേണ്ട സമയത്ത് തന്നെ ഞാന്‍ സ്കൂളില്‍ എത്തിയിരുന്നു..'
താനാണ്   കുട്ടികളുടെ രക്ഷാധികാരി എന്ന് വിശ്വസിക്കുന്ന അദ്ധ്യാപകന്‍ വലിയ കടമയാണ് എല്കുന്നത്. രക്ഷിക്കാനുള്ള ആധികാരിക സ്ഥാനം വഹിക്കുമ്പോള്‍ ഏതെങ്കിലും കുട്ടി രക്ഷപെടാതിരുന്നാല്‍ അത് അധ്യാപകന്റെ  പരാജയം ആകും.
കുട്ടികളുടെ വീടുകള്‍ സന്ദര്‍ശിച്ചു അവരുടെ കുടുംബങ്ങളെ അറിഞ്ഞു മുന്നേറുന്ന ഈ അധ്യാപക മനസ്സ് അധ്യാപനത്തെ സന്തോഷ ദായകവും ഉന്മേഷകരവുംആയി അനുഭവിച്ചു. ഇടതുപക്ഷ അധ്യാപക സുഹൃത്തുക്കള്‍ കുട്ടികളെ അറിയുന്നവര്‍ ആയിരിക്കണം.
അങ്ങനെ ഉള്ള സ്കൂളുകള്‍ നാട്ടില്‍ ഉണ്ട് . രണ്ടു ഉദാഹരണങ്ങള്‍ ഇതാ ..
 1. (അധ്യാപികമാര്‍ കുട്ടികളുടെ വീടുകളിലേക്ക്. .....)
 2. (പൂമാല സ്കൂളിലെ അധ്യാപകരുടെ സ്നേഹ പര്യടനം, )

കൃത്യ സമയത്ത് സ്കൂളില്‍ എത്തി ചേരുക. അതിനു ഒരു പ്രതിബദ്ധതയുടെ തുടിപ്പുണ്ട്. കുട്ടികള്‍ക്ക് വേണ്ടി ചെയ്യാന്‍ ഒത്തിരി.വൈകിപ്പോയാല്‍ അവര്‍ക്ക് വിലപ്പെട്ടത്‌ പലതും നഷ്ടമാകും. കുട്ടികള്‍ക്ക് നഷ്ടമുണ്ടാകുന്ന ഒന്നും അധ്യാപകന്റെ ഭാഗത്ത് നിന്നും ഉണ്ടായികൂടാ.

 2 . എല്ലാ കുട്ടികളെയും പൊതു നിലവാരത്തില്‍ എത്തിക്കാനുള്ള ബാധ്യത സ്വയം ഏറ്റെടുത്തു പ്രവര്‍ത്തിക്കല്‍

  • 'തിരക്കിട്ട ഉച്ച ഭക്ഷണത്തിനു ശേഷം ഞാന്‍ പിന്നോക്കമായ കുട്ടികള്‍ക്കായി  പ്രത്യേകം ക്ലാസ് നടത്തി' എന്ന് എ കെ ജി ആത്മകഥയില്‍ എഴുതി 
എന്താണ് ഇതിന്റെ സന്ദേശം?. കുട്ടികള്‍ ആരും പിന്നില്‍ ആയിക്കൂടാ .അങ്ങനെ  ആകുന്നെങ്കില്‍ അതിന്റെ ഉത്തരവാദിത്വം അധ്യാപകന് തന്നെ ആണ്. അതിനാല്‍ അവരെ പൊതു നിലവാരത്തില്‍  എത്തിക്കേണ്ട ബാധ്യത സ്വയം ഏറ്റെടുക്കാന്‍ മറ്റാരും നിര്‍ദേശിക്കാതെ   സ്വയം തയ്യാറാകണം. ഇങ്ങനെ ഉള്ള അധ്യാപകര്‍ ഇടതുപക്ഷഅധ്യാപകരുടെ കൂട്ടത്തില്‍ ഉണ്ടോ? ആത്മപരിശോധന ആകാം.
ഒരു മാതൃക -(കുട്ടികള്‍ക്കായി ഒരു വിദ്യാലയമനസ്സ് ) 
കൂടുതല്‍ അനുഭവങ്ങള്‍ -  പോര്‍ട്ട്‌ ഫോളിയോ -സങ്കല്പമല്ല യാഥാര്‍ത്ഥ്യം
                                        നിരന്തര വിലയിരുത്തല്‍ ക്ലാസുകളില്‍
                                       സമര്‍പ്പിത അധ്യാപനം ഇവിടെ ഈ സ്കൂളില്‍..



3 . കുട്ടികളുടെ സുഹൃത്തും സഹായിയും ആയിരിക്കുക 

  • 'സായാഹ്നങ്ങള്‍ കുട്ടികളോടൊത്തുള്ള കളികള്‍ക്കും അവധി ദിനങ്ങള്‍ പൊതു പ്രവര്‍ത്തനത്തിനും ഞാന്‍ മാറ്റി വെച്ചു .'
  • 'ഞാനവരുടെ   സുഹൃത്തും സഹായിയും ആയിരുന്നു.ഒരു നല്ല അദ്ധ്യാപകന്‍ എന്ന പേര് സമ്പാദിക്കാന്‍ ഞാന്‍ വളരെ ശ്രമിച്ചിരുന്നു'


നല്ല ഒരധ്യാപകന്‍ എന്ന പേര് സമ്പാദിക്കാന്‍ വളരെ ഏറെ ശ്രമിച്ചിരുന്നു എന്ന് പറയുമ്പോള്‍ എ കെ ജി എന്ന   ഗുരുനാഥന്‍ എല്ലാ അധ്യാപകര്‍ക്കും വഴിവെളിച്ചം പകരുകയാണ് . കൂടുതല്‍ അധ്യാപന മികവിലേക്ക് സ്വയം ഉയരാതെ ഇത് സാധ്യമാവുകയുമില്ല. 
കുട്ടികളുടെ  സുഹൃത്താവുക എന്നാല്‍ എന്തോ അപരാധം ആണെന്ന് കരുതുന്ന അധ്യാപകരാണ് കൂടുതലും. അവര്‍ ആജ്ഞ നല്‍കുന്നു. നിര്‍ദേശിക്കുന്നു. ഉപദേശിക്കുന്നു.ഇപ്പോഴും അധീശ ഭാവം നിലനിറുത്തുന്നു. പഴയ ചൂരലാശാന്‍മാരുടെ പിന്‍ഗാമികള്‍ ആണ് . ഒരു സുഹൃത്തിന് ഇങ്ങനെ ആകാന്‍ പറ്റുകയില്ല. ശുചീകരണം നടക്കുമ്പോള്‍ ഒപ്പം ഇണ്ടാകും. കളികളില്‍ പങ്കാളി ആകും. സുഹൃത്തിന്റെ  സങ്കടങ്ങള്‍ ഏറ്റു വാങ്ങും . സുഹൃത്തിന്റെ ക്ഷേമം ലക്ഷ്യമിടും. എല്ലാ വിധ സഹായവുമായി മനസ്സൊപ്പി   കൂടെ ഉണ്ടാകും. ഒരു ദിവസം കണ്ടില്ലെങ്കില്‍ ആശങ്കപ്പെടും. ഒരു സുഹൃത്തിനും ചെങ്ങാതിയെ വഴിയില്‍ ഉപേക്ഷിച്ചു പോകാന്‍ ആവില്ല. പഴി പറഞ്ഞു രക്ഷപെടാനും കഴിയില്ല. പ്രിയ ഇടതുപക്ഷ അധ്യാപക സുഹൃത്തെ താങ്കള്‍ ഇക്കാര്യത്തില്‍ എവിടെ നില്‍ക്കുന്നു? 
നിങ്ങള്ക്ക് ഈ സ്കൂള്‍ അനുഭവങ്ങള്‍ നല്ല പാഠങ്ങള്‍ നല്‍കും 
 എ) ദല്‍ഹിയിലെ ഗ്രാമ വിദ്യാലയത്തില്‍.. 
 ബി )ബീന ടീച്ചര്‍

4 .  സാമൂഹികദൌത്യബോധം ഉള്ള അധ്യാപകര്‍

  • 'ഒരധ്യാപകന്റെ ജീവിതം ഒരു തരം പൊതുജന സേവനമാണ്. ഒരു പിന്തിരിപ്പന്‍ അധ്യാപകന് തന്റെ വിദ്യാര്‍ഥികളെ ഇന്നത്തെ വിനാശകരമായ വിദ്യാഭ്യാസ രീതിയുടെ പാവകളായി മാറ്റാന്‍ കഴിയുന്നത്‌ പോലെ വിപ്ലവകാരിയായ ഒരധ്യാപകന് നാളത്തെ പൌരന്മാരായിത്തീരേണ്ട കുട്ടികളുടെ മനസ്സില്‍ രാജ്യ സ്നേഹവും സ്വാതന്ത്രബോധവും അടിച്ചമര്‍ത്തലിനും സാമൂഹിക അനീതികള്‍ക്കും എതിരായി സമരം ചെയ്യാനുള്ള ധൈര്യവും ശക്തിയും കടത്ത്തിവിടാനും കഴിയും.' -എ കെ ജി 
 കുട്ടികളില്‍ ഈവിധ കഴിവുകള്‍ ഉണ്ടാകാന്‍ രാഷ്ട്രീയം പറഞ്ഞാല്‍ മതിയോ? അത് കൊണ്ട് ഒരു കാര്യവുമില്ല. കുട്ടികളുടെ ചിന്തയുടെ രീതി മാറ്റുകയാണ് വേണ്ടത്. അതിനു ആദ്യം അധ്യാപകരുടെ ചിന്താരീതി മാറ്റണം. പുതിയ പഠന രീതി ആരോ അടിച്ചേല്പിച്ച ഒരു ഭാരം ആയി കാണരുത്. ഗൈഡില്‍ നിന്നും പകര്ത്താവുന്ന ഉത്തരം അല്ല എന്നും കരുതണം. ഗൈടുകളെ സ്കൂളിന്റെ പടിക്ക് പുറത്ത് നിറുത്തണം. കുട്ടികള്‍ക് ചിന്തിക്കാനും അന്വേഷിക്കാനും കണ്ടെത്താനും പങ്കിടാനും തിരുത്താനും മെച്ചപ്പെടുത്താനും അവസരം കൊടുക്കണം  .അത് യാന്ത്രികമാകരുത്‌. വളരെ ചിട്ടയായി  ഒരുക്കുന്ന പഠനാനുഭവങ്ങളില്‍ എല്ലാ കുട്ടികള്‍ക്കും ഇടം ഉണ്ടാകണം. ഓരോ കുട്ടിക്കും ചിന്ത പങ്കുവെക്കാന്‍ അവസരം കിട്ടാത്ത ക്ലാസ് മുറികള്‍ കുട്ടികളുടെ പ്രകാശത്തെ സ്വയം പ്രകാശനത്തെ നിഷേധിക്കുന്നവയാണ്. അമാവാസിയുടെ അധ്യയന സംസ്കാരം നിഷേധിക്കപ്പെടനം.
  • 'അടിമത്തം നില നിറുത്താനുള്ള ഒരായുധമായിരുന്നു അന്നത്തെ വിദ്യാഭ്യാസം. ബോധന രീതിയും സിലബസും അതിനു യോജിച്ച തരത്തിലുള്ളതായിരുന്നു.കുട്ടികള്‍ പഠിക്കുകയോ ചുറ്റും നടക്കുന്ന രാഷ്ട്രീയ സംഭവങ്ങളെ കുറിച്ച് ചിന്തിക്കുകയോ ചെയ്യണമെന്നു കരുതിയിരുന്നില്ല.അത്തരം ഒരു സാഹചര്യം ഇന്നും നിലനില്‍ക്കുന്നു'.p104
കൂടുതല്‍ ആശയ സൂചനകള്‍ - (പഠന കോണ്ഗ്രസും വിദ്യാഭ്യാസവും)


5  . ചോദ്യങ്ങള്‍ ഉന്നയിക്കാനും ചോദ്യം ചെയ്യാനും ഉള്ള അവസരം 


  • 'മേലധികാരിക ളോടുള്ള അന്ധമായ വിശ്വസ്തതയ്ക്കു നിര്‍ബന്ധം പിടിക്കുക വഴി ഒരധ്യാപകന് തീര്‍ച്ചയായും തന്റെ കീഴിലുള്ള കുട്ടികളെ ബൂര്‍ഷ്വാകളായി   മാറ്റാന്‍ കഴിയും .
  • അവനു അവരെ ഇന്നത്തെ വിദ്യാഭ്യാസ-സാമ്പത്തിക-രാഷ്ട്രീയ ദുരിതത്തില്‍ നിന്ന് രാജ്യത്തെ രക്ഷിക്കാനുള്ള സമരത്തിലെ വീരയോദ്ധക്കള്‍ ആക്കി മാറ്റാനും കഴിയും.'
 മേലധികാരിക ളോ ടുള്ള അന്ധമായ വിശ്വസ്തത വേണ്ടതല്ലേ എന്ന് കരുതുന്നവര്‍ ഉണ്ടാകും.  വിശ്വസ്തത ജനാധിപത്യപരം ആകണം. സ്കൂളുകളില്‍ പാര്‍ലമെന്റ്   പേരിനു മാത്രം ആയാല്‍ പോരാ. ഓരോ ക്ലാസിന്റെ പ്രതിനിധിക്കും അവരുടെ ക്ലാസ് പ്രശ്നങ്ങള്‍ അവതരിപ്പിക്കാനും വിമര്‍ശനങ്ങള്‍ വെക്കാനും വേദി ഉണ്ടാകണം. തീരുമാനങ്ങള്‍ എല്ലാം അവരുടേത് കൂടി ആകണം.പി ടി എ കുട്ടികള്‍ക്ക് വേണ്ടി തീരുമാനങ്ങള്‍ എടുക്കും നിങ്ങള്‍ അനുസരിച്ചാല്‍ മതി എന്ന കാഴ്ചപ്പാട് പൊതുശ്മശാനത്തില്‍ സംസ്കരിക്കണം. പരസ്പരം മനസ്സ് തുറക്കല്‍ ജീവിതത്തില്‍ വിശ്വസ്തതയുടെ വലിയ പാഠങ്ങള്‍ നല്‍കും. നിങ്ങളുടെ സ്കൂളില്‍ എന്തൊക്കെ ആകാം എന്ന് ആലോചിക്കൂ ..കുട്ടികളുമായി ആലോചിച്ചുള്ള ഒരു പ്രവര്‍ത്തനപദ്ധതി ആയി ഓരോ യൂനിട്ടിലെയും പ്രവര്‍ത്തനങ്ങളെ വികസിപ്പിക്കാനും ആകും.


6 . ഈ സ്കൂള്‍ എന്റെ വീട് പോലെ സ്വന്തം
  • 'പെരളശ്ശേരി സ്കൂളിനു വേണ്ടി കെട്ടിടം പണിയാന്‍ ..നാടകങ്ങള്‍ നടത്തുക ,ശനി ഞായര്‍ ദിവസങ്ങളില്‍ വിവിധ സ്ഥലങ്ങളില്‍ കളികള്‍ നടത്തുക സ്കൂളിനു ആവശ്യമായ തടിയും കല്ലും ചുമക്കുക ഞാന്‍ ഇതെല്ലാം ചെയ്തു.' -എ കെ ജി
.സ്കൂളിനു വേണ്ടി കഠിനമായി പണി ചെയ്യാന്‍ സന്നദ്ധത  .അത് ഒരു മനോഭാവത്തിന്റെ ഉല്‍പ്പന്നം ആണ്  .ഞാന്‍ പത്തനംതിട്ട ജില്ലയിലെ ഒരു സ്കൂളില്‍ പോയി .ഒരു ഹാളിന്റെ മൂലയ്ക്കുള്ള ഒന്നോ രണ്ടോ ഓടു പൊട്ടിയിരിക്കുന്നു. വെള്ളം തറയില്‍ വീണു കിടപ്പുണ്ട്. ഇപ്പോള്‍ രണ്ടാഴ്ച കഴിഞ്ഞു. ഓടു മാറ്റിയിടാന്‍ പറ്റിയിട്ടില്ല. പണിക്കാരെ കിട്ടിയില്ലെന്ന് സ്കൂള്‍ അധ്യാപകര്‍ . ഞാന്‍ ചോദിച്ചു സ്വന്തം വീട്ടിലെ ഓടായിരുന്നെങ്കിലോ? അപ്പോള്‍ അവര്‍ മൌനികള്‍ ആയി. പി ടി എ ഭാരവാഹികള്‍ക്കും കുറ്റബോധം. അവിടെ തന്നെ ഏണി ഉണ്ട്.  അധ്യാപികമാര്‍ക്കും ആകാം. അല്ലെങ്കില്‍ പഠിക്കണം. സ്കൂളിലെ ടോയ് ലറ്റുകള്‍ മലിനമായിക്കിടക്കുന്നതും സ്വന്തം വീട് പോലെ സ്കൂള്‍ എന്ന ബോധം ഇല്ലാത്തതുകൊണ്ട് .സ്വന്തം മക്കള്‍ ആണ് മുന്നില്‍ ഇരിക്കുന്നത് എന്ന് ചിന്തിക്കാത്തത് കൊണ്ട് .സ്കൂളില്‍ പഠിപ്പിക്കുക എന്നാല്‍ സ്കൂളിനു വേണ്ടി പ്രവര്‍ത്തിക്കുക എന്നാണ് അര്‍ഥം .അതിന്റെ വ്യാപ്തി വലുതാണ്‌. പരിമിതികള്‍ക്കുള്ളില്‍ നില്‍ക്കുകയല്ല പരിമിതികളെ മറികടക്കാന്‍ കൂട്ടായ്മ വളര്‍ത്തി എടുക്കലാണ് വേണ്ടത് .
7 . സ്നേഹത്തിന്റെ ശക്തിയും ശിക്ഷയും

  • 'ഞാന്‍ ഒരു വര്ഷം കോഴിക്കോട്ടെ മദ്രസത്തുല്‍  മുഹമ്മദീയ സ്കൂളില്‍ അധ്യാപകനായി. ഈ സമയത്താണ് ഞാന്‍ മുസ്ലീം  സമുദായവുമായും മുസ്ലീം കുടുംബങ്ങലുമായും സമ്പര്‍ക്കത്തില്‍ ഏര്‍പ്പെട്ടത് .വീട്ടില്‍ ശല്യം ഒഴിവാക്കാന്‍ വേണ്ടി മാത്രമാണ് രക്ഷിതാക്കള്‍ മക്കെള സ്കൂളിലേക്ക് അയച്ചത്.ആണ്‍ കുട്ടികള്‍ സ്കൂളില്‍ വന്നത് പഠിക്കാന്‍ ആയിരുന്നില്ല. ശുണ്ടി പിടിച്ചു ആദ്യകാലത്ത് ഞാന്‍ അവരെ കഠിനമായി പ്രഹരിച്ചിരുന്നു. പക്ഷെ മാനേജര്‍ അത് തടഞ്ഞു. കുട്ടികളെ  ബലം പ്രയോഗിച്ചു പഠിപ്പിക്കാന്‍ ശ്രമിക്കുന്നതില്‍ കാര്യമൊന്നും ഇല്ലെന്നു അദ്ദേഹം ഓര്‍മിപ്പിച്ചു.
    ഞാന്‍ എന്റെ നയം മാറ്റി .ഞാന്‍ കുട്ടികളോട് കൂടെ കളിക്കാനും സദ്യകളിലും ആഘോഷങ്ങളിലും പങ്കെടുക്കാനും അവരുടെ വീടുകളിലേക്ക് പോകാനും അവരുടെ സമുദായത്തിലെ ആചാരങ്ങള്‍ പഠിക്കാനും ആരംഭിച്ചു. ഞാന്‍ അവരുടെ വിശ്വസ്ത സുഹൃത്തായി.
    .മത്സരങ്ങളും നാടകാഭിനയങ്ങളും നടത്തി അവരുടെ സ്നേഹ വും വിശ്വാസവും ആര്‍ജിച്ച ശേഷം ഞാന്‍ അവരോടു അവരുടെ പുസ്തകങ്ങള്‍ പഠിക്കാന്‍ ആവശ്യപ്പെട്ടു. ഞാന്‍ അവരില്‍ അനുയോജ്യമായ മാറ്റം വരുത്തി. നമ്പ്യാര്‍ മാസ്റര്‍ അവരുടെ അവിസ്മരണീയനായ അധ്യാപകനായി തീര്‍ന്നു. അനുഭവത്തില്‍ നിന്ന് ചൂരല്‍ കൊണ്ടല്ല ഹൃദയം കൊണ്ടാണ് അടിക്കേണ്ടതു എന്ന് ഞാന്‍ പഠിച്ചു. '
                                                           -എന്റെ ജീവിത കഥ p15
വിദ്യാഭ്യാസ മനശാസ്ത്രത്തിന്റെയോ അവകാശ നിയമത്തിന്റെയോ പിന്‍ബലമില്ലാതെ സ്വന്തം അനുഭവത്തില്‍ നിന്നും അദ്ദേഹം പ ഠിച്ച ശിശു  സൌഹൃദ കാഴ്ചപ്പാട് നോക്കുക.' ഞാന്‍ അവരില്‍ അനുയോജ്യമായ മാറ്റം വരുത്തി. നമ്പ്യാര്‍ മാസ്റര്‍ അവരുടെ അവിസ്മരണീയനായ അധ്യാപകനായി തീര്‍ന്നു.' രണ്ടു കാര്യങ്ങള്‍ -ഒന്ന് അനുയോജ്യമായ മാറ്റം ഉണ്ടാക്കി .ലക്‌ഷ്യം നേടുക തന്നെ ചെയ്തു. മറ്റൊന്ന് അത് കുട്ടികളുടെ മനസ്സില്‍ അധ്യാപകനെ പ്രതിഷ്ടിച്ചു .അധ്യാപക വിദ്യാര്‍ഥി ബന്ധം കൂടുതല്‍ ശക്തമായി. അതിന്റെ മറ്റൊരു തെളിവ് കൂടി വായിക്കാം

'അക്കാലത്ത് എന്റെ ഗ്രാമത്തില്‍ ഒരു സംഭവം ഉണ്ടായി. എന്റെ അറസ്റ്റിനെ  പറ്റി കേട്ട് ക്ഷുഭിതരായ വിദ്യാര്‍ഥികള്‍ ഹര്‍ത്താല്‍ ആചരിച്ചു. അവര്‍ അധ്യാപകരുടെ എതിര്‍പ്പിനു ചെവി കൊടുത്തില്ല. ഒരു പിന്തിരിപ്പന്‍ അദ്ധ്യാപകന്‍ ഈ വിവരം കുമാരന്‍ എന്ന വിദ്യാര്‍ഥിയുടെ രക്ഷകര്‍ത്താവിനെ അറിയിച്ചു. കോപിച്ച പിതാവ് കുട്ടിയെ കഠിനമായി  പ്രഹരിച്ചു 
നിരാശനായ കുട്ടി അന്ന് രാത്രി തന്നെ ആത്മഹത്യ ചെയ്തു.p25


8 .മനസ്സിലാകുന്ന ഭാഷയുടെ ശക്തി തിരിച്ചറിയണം .മനസ്സിലാക്കാന്‍ പറ്റിയ രീതിയും 


  • 'ഞാനൊരു ബുദ്ധി ജീവിയല്ല. ബുദ്ധിജീവികള്‍ക്ക് എന്റെ പ്രസംഗം അത്ര പിടിക്കാറില്ല.അവയില്‍ രാഷ്ട്രീയം ഇല്ലെന്നു അവര്‍ പറയും. അവര്‍ പുസ്തകങ്ങളില്‍ നിന്നും പഠിക്കുകയും വെച്ച് പുലര്‍ത്തുകയും ചെയ്യുന്ന തീയറികള്‍ ഒന്നും ഞാന്‍ പഠിച്ചിട്ടില്ല. ഞാന്‍ പഠിച്ചാല്‍ തന്നെയും അവ അങ്ങനെ തന്നെ ചര്‍ദ്ദിക്കുകയില്ല. പക്ഷെ ജനങ്ങള്‍ക്ക്‌ എന്റെ പ്രസംഗം ഇഷ്ടമാണ്. ഞാന്‍ വലരെ ശ്രദ്ധയോടെ ജനങ്ങളുടെ ജീവിതവും അവരുടെ വസ്ത്ര ധാരണ രീതികളും അവരുടെ പാര്‍പ്പിടങ്ങളും ചുറ്റുപാടുകളും പഠിച്ചിട്ടുണ്ട്. അവരുടെ പ്രശ്നങ്ങള്‍ അവര്‍ക്ക് മനസ്സിലാകുന്ന  ഭാഷയില്‍  വിവരിക്കുന്നു . ഞാന്‍ എവിടെ  പ്രസംഗിച്ചാലും  അവിടുത്തെ  ജനങ്ങളുടെ ജീവിതത്തെ പറ്റി പഠിക്കുക പതിവായിരുന്നു.
  • "മറ്റുള്ളവര്‍ ചൈനയെയും സ്പെയിനിനെയും പറ്റിയേ  പ്രസംഗിക്കൂ . ഗോപാലേട്ടന്‍ മാത്രമേ നമ്മുടെ മേസ്ഥിരിയെയും ടൈം  കീപ്പരെയും പറ്റി പ്രസംഗിക്കാരുള്ളൂ ' എന്നു കോട്ടന്‍ മില്‍ തൊഴിലാളികള്‍ അഭിപ്രായം പറഞ്ഞത്  എ കെ ജി ഓര്‍മ്മിക്കുന്നു. p30  
ഇവിടെ വളരെ  ശ്രദ്ധേയമായ ബോധന ശാസ്ത്ര സമീപനം ആണ് എ കെ ജി സ്വീകരിക്കുന്നത്. പ്രസംഗം ആരിലെക്കാണോ തറ യ്കെണ്ടത്  അവരുടെ 
അനുഭവം തൊട്ടു തുടങ്ങണം . ചുറ്റുമുള്ള സാമൂഹിക ജീവിതവുമായി ഇതു ഗഹനമായ വിഷയത്തെയും ബന്ധിപ്പിക്കാനും ലളിതമായി അവതരിപ്പിക്കാനും കഴിയുമെന്നാണ് എകെ ജിയുടെ അനുഭവം. മുതലാളിത്തം, സമ്രാജ്യത്തം ഒക്കെ ഇങ്ങനെ ചെറിയ പാഠങ്ങള്‍ ആക്കി അവതരിപ്പിക്കും.ചൂഷണത്തിന്റെ തത്വശാസ്ത്രവും മോചനത്തിന്റെ ദര്‍ശനവും ഗ്രാമീണരുടെ ജീവിതാനുഭവങ്ങളെ ഉദാഹരിച്ചു അവതരിപ്പിക്കും. ഓരോന്നിനും അദ്ദേഹം ലോക്കല്‍ ടെക്സ്റ്റുകള്‍ ഉണ്ടാക്കുന്നു എന്ന് സാരം.
പഠിപ്പിക്കുന്ന നാട്ടു പ്രദേശത്തെ നന്നായി അറിയാവുന്ന അധ്യപകര്‍ക്കെ അവിടുത്തെ ജീവിതം  റിസോഴ്സാക്കി മാറ്റാന്‍ കഴിയൂ  .പുതിയ   പാഠക്കു റി പ്പുകളും  പാഠങ്ങളും ഉണ്ടാകണം .ഉണ്ടാക്കണം. ഈ സാമൂഹികാനുരൂപീകരണം നടത്താതെ എല്ലായിടത്തും ഒരേ പാഠങ്ങള്‍ ചര്‍ദ്ദിക്കുന്ന അധ്യാപകര്‍ അക്കാദമിക രോഗികള്‍ ആണ്. സ്വയം ചികിത്സിക്കണം.
കുട്ടിക്ക് മനസ്സിലാകുന്ന ഭാഷ എന്നാല്‍ മുതിര്‍ന്ന ഒരാള്‍ക്ക് മനസ്സിലാകുന്ന ഭാഷ എന്നും കരുതരുത്.അവരുടെ പക്ഷത്ത് നിന്നുള്ള ആലോചനയാണ് പ്രധാനം. 
9  .വിലയിരുത്താനുള്ള സ്വാതന്ത്ര്യവും ഫീഡ് ബാക്കും (കേള്‍ക്കുന്നവരെ കേള്‍ക്കണം )


  • 'യോഗത്തിന്റെ അവസാനം ജനങ്ങള്‍ തങ്ങളുട്ടെ അഭിപ്രായങ്ങള്‍ സ്വതന്ത്രമായി പറയാറുണ്ടായിരുന്നു. ഞാന്‍ പതിവായി ഇതെല്ലാം ശ്രദ്ദ്ധിച്ചു' (p32'


ഇന്നത്തെ നമ്മുടെ നേതാക്കള്‍ പലരും  നിലം തൊടാമണ്ണുകള്‍  ആണ്. അവര്‍ സമയത്തിന്റെ തടവുകാര്‍ എന്ന് സ്വയം നടിക്കുന്നു. യോഗം തുടങ്ങാന്‍ താമസിക്കും എന്നറിഞ്ഞു കൊണ്ടു  എട്ടും പത്തും പരിപാടികള്‍ എല്ക്കുന്നു . യോഗത്തില്‍ പൂര്‍ണ സമയം ഇരിക്കില്ല. കേള്‍ക്കുന്നവരെ കേള്‍ക്കില്ല. അത്തരം ഒരു വിനയം നഷ്ടപ്പെട്ടതിനാല്‍ അവര്‍ ജനതയുടെ രക്ത ബന്ധം ഇല്ലാത്തവര്‍ ആയി മാറും. ഫീഡ് ബാക്ക് സ്വീകരിക്കുന്നതാകട്ടെ ഇടനിലക്കാരിലൂടെ. മായം ചേര്‍ത്തതും വ്യാഖ്യാനങ്ങള്‍ ചേര്‍ന്നതും പാഠഭേദങ്ങള്‍  ഉള്ളതുമായ റിപ്പോര്‍ടുകള്‍ ആണ് പലപ്പോഴും കിട്ടുന്നതും. എ കെ ജി നേരിട്ട് ഫീഡ് ബാക്ക് ശേഖരിച്ചു . ജനങ്ങള്‍ക്ക്‌ സ്വതന്ത്രമായി അഭിപ്രായങ്ങള്‍ പ്രകടിപ്പിക്കാന്‍ അവസരം കൊടുത്തു .
ക്ലാസിലും ഇത് ബാധകം ആണ്. അധ്യാപനം കഴിഞ്ഞാല്‍ കുട്ടികള്‍ അതിനെ വിലയിരുത്തണം. ഓരോ ക്ലാസും ഓരോ യൂണിറ്റും ഇങ്ങനെ വിലയിരുത്തപ്പെടുകയും ഫീഡ് ബാക്കിന്റെ അടിസ്ഥാനത്തില്‍ അധ്യാപകര്‍ പ്രവര്‍ത്തിക്കുകയും കയും വേണം. കേള്‍ക്കുന്നവരെ കേള്‍ക്കണം 
10 .  സ്നേഹവും ത്യാഗവും ( അക്കാദമിക സമരം ത്യാഗനിര്‍ഭരം)


  • 'സ്നേഹം കൊണ്ടും  ത്യാഗം കൊണ്ടും ജനങ്ങളെ സ്വാധീനിക്കാന്‍ കഴിയും' p40 
  • 'ജനങ്ങള്‍ക്ക്‌ പ്രവര്‍ത്തിക്കുന്നവരെ ആണ് ഇഷ്ടം .പ്രസംഗിക്കുന്നവരെ അല്ല. ആവശ്യം'. p54


 കുട്ടികളെ ഞാന്‍ സ്നേഹിക്കുന്നുണ്ട് എന്ന് പല അധ്യാപകരും പറയാറുണ്ട്‌. അവര്‍ക്ക് വേണ്ടി ത്യാഗം കൂടി സഹിക്കണം. സ്കൂളില്‍ ചെയ്യാവുന്ന ത്യാഗം എന്തൊക്കെയാണ്. ലക്‌ഷ്യം നേടാനുള്ളത് തന്നെ. അക്കാദമിക സമരം ത്യാഗനിര്‍ഭരം ആണ്. നല്ല ആസൂത്രണത്തിനു വേണ്ടി കൂടുതല്‍ സമയം കണ്ടെത്തുക , പഠിക്കുക, സ്വന്തം അധ്യയന  ശേഷി നിരന്തരം വികസിപ്പിക്കാന്‍ കിട്ടാവുന്ന സാധ്യതകള്‍ എല്ലാം പ്രയോജനപ്പെടുത്തുക. കുട്ടികള്‍ക്ക് തന്റെ സമയം കൂടുതലായി നീക്കി വെക്കുക .ക്ലാസിലെ നേട്ടം ഉറപ്പാക്കാന്‍ വേണ്ടി എന്തെല്ലാം നിസ്വാര്‍ത്ഥ പ്രവര്‍ത്തനം നടത്താമോ അതെല്ലാം ചെയ്യുക. അപ്പോള്‍ ആ  സാന്നിധ്യത്തിന്റെ കരുത്തും ഊര്‍ജവും കുട്ടികളില്‍ നിറയും. അവര്‍ സ്വാധീനിക്കപ്പെടും . പിന്നെ ഉയരങ്ങള്‍ ഒന്നിച്ചു കീഴടക്കാം  


11 . പുതുമയുടെ സ്പര്‍ശം (ബോധനപ്രക്രിയാപരമായ വാര്‍ധക്യമോ  അധ്യയന യൌവ്വനമോ വേണ്ടത് ?  )


  • 'സത്യാഗ്രഹ പ്രസ്ഥാനത്തിന് പതുക്കെ സ്തംഭനം അനുഭവപ്പെട്ടു തുടങ്ങി. ഗാനങ്ങള്‍ക്കും പ്രസംഗങ്ങള്‍ക്കും പുതുമ നഷ്ടപ്പെട്ടു .അവ വെറും നിത്യ സംഭവങ്ങളായി മാറി...... പുതിയ ഉണര്‍വും ഉത്സാഹവും സൃഷ്ടി ക്കാനുള്ള   മാര്‍ഗം എന്താണെന്ന്  ഞാന്‍ ചിന്തിച്ചു' p50
വളരെ പ്രസക്തമായ ഈ കാര്യം എല്ലാവരും തിരിച്ചറിയണം എന്നും ഒരേ സമരരീതി  രീതി മാത്രം സ്വീകരിക്കുന്ന  പ്രസ്ഥാനങ്ങള്‍ , എന്നും ഒരേ രീതിയുടെ തടവില്‍ കഴിയുന്ന അധ്യാപകരും പരിശീലകരും ഒക്കെ. 
പുസ്തകം വായിക്കുക- ചോദ്യങ്ങള്‍ ചോദിക്കുക- വിശദീകരിക്കുക-. നോട്ട്  കൊടുക്കുക എന്ന രീതി മാറിയപ്പോള്‍ നിര്‍ദേശം നല്‍കുക- ഗ്രൂപ്പാക്കുക  അവതരിപ്പിക്കുക- അസൈന്‍മെന്റ്  നല്‍കുക എന്നതിലേക്ക് വഴുതി വീണു പലരും. ഓരോ ദിനവും ഓരോ പുതിയ തന്ത്രം ആലോചനയില്‍ വരുന്നേയില്ല. എന്തിനു ക്ലാസ് ക്രമീകരണത്തില്‍ പോലും ഒരു മാറ്റവും വരുത്തില്ല. ബോധനപ്രക്രിയാപരമായ വാര്‍ധക്യം എന്ന് വിശേഷിപ്പികാവുന്ന ഈ അവസ്ഥയില്‍ നിന്നും അധ്യാപകര്‍ അധ്യയന യൌവ്വനം  വീന്ടെടുക്കെണ്ടിയിരിക്കുന്നു.  അപ്പോള്‍ ക്ലാസ് കുട്ടികള്‍ക്കും അധ്യാപകര്‍ക്കും ആവേശകരവും ആനന്ദപ്രദവും  ആയിത്തീരും. ക്ലാസിനെ കുറിച്ച് ഒട്ടേറെ സംസാരിക്കാന്‍ , അനുഭവം പങ്കിടാന്‍ സ്റ്റാഫ് റൂം വേദിയാകും. ഒരു അന്വേഷക സംഘം സ്കൂളില്‍ രൂപപ്പെടും. അതിനു ക്ലസ്ടരില്‍ പരിശീലനം തരേണ്ടതില്ല. മാനസികമായ മോഡ്യൂള്‍ ഉണ്ടായാല്‍ മതി.


12  . ഗവേഷക മനസ്സ് 
ജയിലില്‍ നിന്ന് തിരിച്ചു വന്ന ശേഷം ഞന്‍ സ്ഥലത്തെ രണ്ടു കര്‍ഷക കുടുംബങ്ങളെ ശ്രദ്ധികുകയുണ്ടായി. ആ അനുഭവം എന്റെ മനസ്സില്‍ കൊടുങ്കാറ്റു സൃഷ്ടിച്ചു. ഇതിന്റെ പശ്ചാത്തലത്തില്‍ ചിറയ്ക്കല്‍ താലൂക്കിലെ കര്‍ഷക ജീവിതം പഠിക്കാന്‍ തീരുമാനിച്ചു p64


പ്രശ്നങ്ങള്‍   പഠിക്കുക   അത് സാമൂഹിക  മാറ്റം  ആഗ്രഹിക്കുന്നവരുടെ  സവിശേഷതയാണ് .  കടമയാണ്. സ്കൂള്ളില്‍ ക്ലാസില്‍ എന്നും എക്കാലവും അക്കാദമിക പ്രശ്നങ്ങള്‍ ഉണ്ടാകും.അത് ഗവേഷണ ബുദ്ധിയുഒടെ പഠിക്കണം. ദത്തങ്ങള്‍ ശേഖരിക്കുകയും വിശകലനം ചെയ്യുകയും ചില പരികല്‍പനകളുടെ അടിസ്ഥാനത്തില്‍ ബദല്‍ അന്വ്ഷിക്കുകയും നടക്കേണ്ടതുണ്ട്. മറ്റൊരു ലോകം സാധ്യമാണെന്ന് പറയുന്നത് പോലെ എല്ലാവര്ക്കും അറിവ് ലഭിക്കുന്ന മറ്റൊരു ക്ലാസും സാധ്യമാണ്. അറിവ് ആയുധമാണ്. നാളെയുടെ വാഗ്ദാനങ്ങളെ നിരായുധരാക്കാന്‍ അധ്യാപകര്‍ ശ്രമിക്കരുത്. അറിവ് നെടുന്നതിലുണ്ടാകുന്ന ഇടര്ച്ചകളില്‍ ഫലപ്രദമായി ഇടപെടാന്‍ ഈ ഗവേഷണ മനോഭാവം സഹായിക്കും.


ഈ സൂചകങ്ങള്‍ ഉള്ള ഒരു വിദ്യാലയം ഇടതു പക്ഷ അധ്യാപകര്‍ ഉള്ളതായിരിക്കും( നല്ല ഗാന്ധിയന്‍ വീക്ഷണം ഉള്ളവരും ഈ സ്കൂളുകളില്‍ കാണും ) എന്ന് പറഞ്ഞാല്‍ അതിശയോക്തി ആവില്ല. ഇതൊന്നുമില്ലാത്ത സ്കൂളുകളില്‍ പുറമേ ഇടതും അകമേ വലതു ലോക വീക്ഷണവും പുലര്‍ത്തുന്നവര്‍ സുലഭം. അവര്‍ സ്വയം തിരിച്ചറിയുന്നുമുണ്ടാകില്ല .പക്ഷെ ..

13.............................................................................
................................................................................

16 comments:

പ്രേമന്‍ മാഷ്‌ said...

പ്രിയ കലാധരന്‍
വളരെ പ്രസക്തമായ പോസ്റ്റ്‌. പക്ഷെ പ്രിന്റ്‌ മീഡിയയിലും വരണം. ദേശാഭിമാനി ആഴ്ചപ്പതിപ്പില്‍ വന്നാല്‍ നല്ലത്. ഇല്ലെങ്കില്‍ അധ്യാപക ലോകത്തില്‍ . ലിങ്കുകള്‍ ചുരുക്കി സൈഡ് ബോക്സില്‍ നല്‍കാം.ചെറിയ ഒരു എഡിറ്റിംഗ് കൂടി ആയാല്‍ ആറോ ഏഴോ പേജില്‍ ഒതുങ്ങും. തീര്‍ച്ചയായും അതിനു ശ്രമിക്കണേ..

drkaladharantp said...

13.
to all Head masters
ഒരു നല്ല നേതാവിന് അനുയായികളെ മനസ്സിലാക്കാന്‍ കഴിയണം ഇതിനു കഴിയാതെ വന്നാല്‍ കഴിയാതെ വന്നാല്‍ കാര്യങ്ങള്‍ നിഷ്ഫലം ആകും. p69


തൊഴിലാളികളുടെ ജീവിതത്തിലെ നല്ലതും ചീത്തയുമായ വശങ്ങള്‍ നാം മനസ്സിലാക്കണം .പ്രാഥമികമായി അവ അംഗീകരിക്കണം. അതിനു ശേഷം ചീത്ത വശങ്ങള്‍ ചൂണ്ടിക്കാണിച്ചാല്‍ അവര്‍ അത് തിരുത്തും.p77


മറ്റുള്ളവര്‍ക്ക് ആജ്ഞ നല്‍കുകയല്ല അവരോടൊപ്പം പ്രവര്‍ത്തിക്കാന്‍ തയ്യാറാവുകയാണ്‌ വേണ്ടത് .അങ്ങനെ ഉള്ളവര്‍ക്ക് മാത്രമേ സഹ പ്രവര്‍ത്തകരുടെ സന്മാനോഭാവം നേടാന്‍ കഴിയൂ p95

mini//മിനി said...

നല്ല ലേഖനം,
മഹാനായ ഏ.കെ.ജി.യുടെ നാട്ടിൽ നിന്നും വെറും പതിനഞ്ച് മിനിട്ട് ബസ്‌യാത്ര ചെയ്യാവുന്ന ദൂരത്തിലാണ് ഞാൻ. 32 വർഷം അദ്ധ്യാപന ജീവിതത്തിന് ശേഷം, അദ്ധ്യാപനത്തിൽ മിക്കവാറും സംതൃപ്തി നേടിയിട്ടാണ് (പൂർണ്ണമല്ല) വിരമിച്ചത് എന്ന് സന്തോഷപൂർവ്വം അറിയിക്കുന്നു.
അദ്ധ്യാപന ജീവിതത്തിലെ അനുഭവങ്ങൾ ബ്ലോഗിൽ പോസ്റ്റ് ചെയ്തിട്ടുണ്ട്.

joshytk said...

നന്നായിട്ടുണ്ട്. ഒരു ചര്‍ച്ചക്കു വകയുണ്ട്

ബിന്ദു .വി എസ് said...

അധ്യാപനത്തിന്റെ രാഷ്ട്രീയം
വിദ്യാലയങ്ങളില്‍ നിന്നും രാഷ്ട്രീയത്തെ പടിയടച്ചു പിണ്ഡം വയ്ക്കണ മെന്ന വലതു പക്ഷ കാഴ്ച പ്പാടിനെ വെട്ടി നിരത്തുന്ന അത്യുജ്വല പോസ്റ്റ്‌ .അധിനി വേ ശവും പരിസ്ഥിതി നാശവും മത ഭീകരതയും നിത്യവും ചര്‍ച്ച ചെയ്യുകയും വിദ്യാഭ്യാസ ലക്ഷ്യങ്ങളായി അവയുടെ പരിഹാരം കാണാ തിരിക്കുകയും ചെയ്യുന്ന അവസ്ഥക്ക് മറുപടി കൂടി യാണ് ഈ എഴുത്ത് .ദേശ ത്തെ ക്കുറിച്ചും മനുഷ്യ നെക്കുറിച്ചും ഗൌരവ മായി ചിന്തിക്കുന്ന ഒരാള്‍ക്ക്‌ വിദ്യാഭ്യാസമെന്നത് രാഷ്ട്രീയ പ്രവര്‍ത്തനം തന്നെയാണ് .വര്‍ഗ വിഭജനത്തെ ക്കുറിച്ച് ആ ശങ്ക പ്പെടുന്നവര്‍ അതില്ലാതാക്കാന്‍ ഉപയുക്തമായ പഠനത്തെക്കുറിച്ചും അതിനുപയോഗിക്കേണ്ട പുത്തന്‍ മുറകളെ ക്കുറിച്ചും നിരന്തരം ആലോചിക്കുന്നു .ഗ്രാമങ്ങളില്‍ ആളുകളെ പോരാട്ടത്തിനൊരുക്കുകയും തൊഴിലിടത്തില്‍ നവീകരിക്കപ്പെട്ട കാഴ്ചപ്പാടോടെ വിദ്യാഭ്യാസം തന്നെ സമരായുധ മാക്കുക കയും ചെയ്ത എ .കെ ജി ജനഹൃദയങ്ങളില്‍ മരിക്കാതിരിക്കുന്നതെന്തു കൊണ്ട് എന്ന് ചൂണ്ടിക്കാട്ടിയ എഴുത്ത് അതിന്‍റെ സയോജന രീതി കൊണ്ട് അതിമനോഹരമായിരിക്കുന്നു .

lp school said...

ക്ലാസ്മുറിയില്‍ കയറി അധ്യാപകനെ വെട്ടിവീഴ്ത്തിയതും ഈ ആശയ സാക്ഷാത്കാരത്തിന് വേണ്ടിയോ?

premjith said...

അധ്യാപനത്തിന്റെ മാധുര്യം നുണയാന്‍ വെമ്പുന്ന മനസ്സുള്ള ഏതൊരാളും അവശ്യം വായിച്ചിരിക്കേണ്ട അറിവുകളാണ് ഒരു ഗവേഷകന്റെ പഠന ചാതുര്യത്ത്തോടെ സാര്‍ അവതരിപ്പിച്ചിട്ടുള്ളത് .
ഒരു യഥാര്‍ത്ഥ മനുഷ്യനായും സാമൂഹ്യ പരിഷ്കര്ത്താവായും ഇടതുപക്ഷ നേതാവായും മാത്രമേ ഞാനും ഇന്നു വരെ എ കെ ജി യെ കണ്ടിരുന്നുള്ളൂ ....കരുത്തുറ്റ അധ്യാപന മികവിന്റെ ഉടമ കൂടിയാണ് എന്നത് എനിക്ക് പുതിയ അറിവാണ് . ഞാന്‍ ജീവന് തുല്യം സ്നേഹിക്കുന്ന എന്റെ പ്രസ്ഥാനത്തിന്റെ അമരക്കാരില്‍ ഒരാള്‍ ഒരിക്കല്‍ പറഞ്ഞത് ഞാനിന്നും ഓര്‍ക്കുന്നു " സ്കൂള്‍ സമയത്ത് സംഘടനാ പ്രവര്‍ത്തനവും പിരിവും നടത്തുന്നത് ജോലിയുടെ ഭാഗം തന്നെയാണ് .... ഈ സമയത്തല്ലേ സ്കൂളുകളില്‍ അധ്യാപകരുണ്ടാവൂ ....." 10 മുതല്‍ 4 വരെയുള്ള സമയത്ത് മാത്രം സംഘടനാ പ്രവര്‍ത്തനം നടത്തി കുട്ടികളുടെ അവകാശങ്ങളോട് നീതി കാട്ടാത്ത ചുരുക്കം ചില പ്രവര്‍ത്തകരുടെ പ്രതിനിധിയാണ് ഇദ്ദേഹവും . ഇദ്ദേഹത്തെ പ്പോലുള്ളവര്‍ ഇക്കാര്യങ്ങള്‍ തീര്‍ച്ചയായും അറിയണം .കൃത്യ സമയത്ത് സ്കൂളിലെത്താന്‍ , കുട്ടികള്‍ക്ക് പഠന സമയം നഷ്ട്ടമാകാതെ അറിവ് നിര്‍മ്മാണ പ്രക്രിയയ്ക്ക് നേതൃത്വം നല്‍കാന്‍ , പുതിയ പഠന തന്ത്രങ്ങള്‍ സ്വപ്നം കാണാന്‍ , തന്റെ അധ്യാപന കഴിവുകള്‍ വര്‍ധിപ്പിക്കാന്‍ വായനയും എഴുത്തും ശീലമാക്കാന്‍ നിരന്തരം ശ്രമിക്കുന്ന ആളായിരിക്കണം ഒരു യഥാര്‍ഥ ഇടതുപക്ഷ സംഘടനാപ്രവര്ത്തകന്‍ .......
അധ്യാപക സംഘടനകളിലെ പ്രൊഫഷനലിസം ഇന്നു നഷ്ട്ടമായി വരുന്നു . ചുറ്റും നടക്കുന്ന അക്കാദമിക മാറ്റങ്ങള്‍ സൂക്ഷ്മമായി നിരീക്ഷിക്കുകയും അതിനനുസരിച്ച് പ്രതികരിക്കുകയും ചെയ്യുന്നവര്‍ ഇന്നു വളരെ കുറവാണ് . അവരെ ഉണര്‍ത്താനും പ്രചോദിപ്പിക്കാനും സ്വയം വിലയിരുത്തലിനു വിധേയമാകാനും ഈ പോസ്റ്റ്‌ സഹായിക്കും . വിശദമായ പഠനത്തിന്റെയും വായനയുടെയും ഉല്പന്നം ചൂണ്ടുവിരലിലൂടെ പങ്കു വച്ചതിനു നന്ദി .....തീര്‍ച്ചയായും എ കെ ജി യുടെ ജീവിത കഥ കണ്ടെത്തി പഠിക്കാനും ജീവിതത്തില്‍ പകര്‍ത്താനും ഇതു സഹായിക്കും

drkaladharantp said...

പ്രിയ എല്‍ പി സ്കൂള്‍
താങ്കളുടെ പ്രതികരണത്തില്‍ നിന്നും ഞാന്‍ മനസ്സിലാക്കിയത് ഇങ്ങനെ .ബ്ലോഗില്‍ പറഞ്ഞ കാര്യങ്ങളോട് താങ്കള്‍ യോജിക്കുന്നു. പക്ഷെ ഈ ദര്‍ശനം ഉള്‍ക്കൊണ്ടാല്ല പലരും പ്രവര്‍ത്തിക്കുന്നത്. അവര്‍ ഹിംസയുടെ മാര്‍ഗം സ്വീകരിക്കുന്നു. എനിക്കും താങ്കള്‍ക്കും ഒന്നിച്ചു പറയാം കഴിയണം ഹിംസയുടെ മാര്‍ഗം ശരിയല്ലെന്ന്. എതിരാളികളെ ആശയം കൊണ്ട് നേരിടാന്‍ കഴിയണം . ബോധതലത്തില്‍ ഇടപെടാന്‍ കഴിയാത്തവരാണ് വെട്ടി നുറുക്കാനും ചുട്ടെരിക്കാനും തയ്യാറാകുന്നത്. മറ്റു മതം ,രാഷ്ട്രീയം എല്ലാം അംഗീകരിക്കണം. വിയോജിക്കാനും കഴിയണം
നല്ല ആശയങ്ങളെ പ്രോത്സാഹിപ്പിക്കണം. എന്താ താങ്കള്‍ എല്‍ പി സ്കൂളില്‍ എങ്ങനെ പഠിപ്പിക്കുന്നു? പങ്കിടുമോ? അതോ

Uppumanga said...

blogil paranjathu valare sariyanu. pakshe ''idathu..valathu..''angane adhyapakare tharam thirikkaruthu..''MOORACHIKAL''..evideyayalum moorachikal thanne.[ee vakku thankalkku parichayam kanilla.pakaram padam enikku kittunnilla.

Rajeev said...

Good blogging sir

GHSS KUNNAKKAVU -BLOG said...

Action speaks louder than words...
Nice thoughts... Really promising.
But we,teachers should follow t with a positive outlook.

malayali said...

Kuttikalilum etharam prasnam ullavarund
Sahaanubhoothiyode avarku kaaryangal manasilaaki kodukanam

malayali said...

Valare nannayirikunnu
Preman maashinte nirdesam sweejarikanam

tuzhuvath@gmail.com said...

കാലികപ്രസക്തവും ഏറെ ചർച്ച ചെയ്യപ്പെടെണ്ടുന്നതുമായ വിഷയം.അഭിനന്ദനങ്ങൾ !!
ഇടതുപക്ഷ അധ്യാപകരുടെ വിദ്യാലയം എന്നാ ആശയത്തിനു വലിയ പ്രസക്തിയില്ല. 'നല്ല സിനിമ വേണോ? ആർട്ട് സിനിമ വേണോ? എന്ന ചോദ്യം പോലെ കുട്ടികളെ സ്നേഹിക്കുന്ന അധ്യാപകരുടെ വിദ്യലയത്തിനല്ലേ "ഇടതുപക്ഷ അധ്യാപക സുഹൃത്തുക്കളുടെ വിദ്യാലയം" എന്നതിനേക്കാൾ പ്രസക്തി ?

G Ravi said...

ചിന്തോദ്ദീപകമായ രചന. സ്വയം വിലയിരുത്താനും മെച്ചപ്പെടാനും ഉപകരിക്കുന്ന വ.നന്ദി അറിയിക്കട്ടെ

ഒരധ്യപകനെന്ന നിലയിൽ ഏറെക്കാലത്തെ സേവനപരിചയമുണ്ടെങ്കിലും, പത്തു വർഷത്തിലേറെഅധ്യാപക പരിശീലകനായി വിദ്യാലയത്തിനു പുറത്തായിരുന്നു.
അക്കാലയളവി ലുണ്ടായ അനുഭവങ്ങളുടെ പശ്ചാത്തലത്തിൽ വിദ്യാലയത്തിൽ തിരിച്ചെത്തിയപ്പോൾ ചെയ്തു വരുന്ന ചില കാ ര്യങ്ങൾ സൂചിപ്പിക്കട്ടെ.

I. കുട്ടികളോട് ചങ്ങാത്തം പുലർത്തുന്നു. സുഹൃത്തിനോടെന്ന പോലെ അവർ എന്നോടും പെരുമാറുന്നു

2. എന്റെക്ലാസിൽ ഒരു കുട്ടി വന്നില്ലെങ്കിൽ, രണ്ടാം പിരീഡു തന്നെ രക്ഷിതാവിനെ വിളിച്ചന്വേഷിക്കും.(ഇപ്പോൾ അത് ആവശ്യമായി വരാറില്ല. രാവിലെ രക്ഷിതാവ് ഫോൺ ചെയ്ത് വിവരം പറയാറുണ്ട് )
അവിചാരിതമായി ഞാൻ ഒരു ദിവസം ലീ വായാൽ അന്നു വൈകിട്ട് എന്നെയും വിളിച്ചന്വേക്കാറുണ്ട് എന്നും കൂട്ടത്തിൽ പറയണം

3. എല്ലാ ദിവസവും വൈകിട്ട് 2 കുട്ടികളുടെയെങ്കിലും വീട്ടിൽ പോകും. അതു കൊണ്ടു തന്നെ ക്ലാസ് പിടിഎയിൽ ഈ രക്ഷിതാക്കളെല്ലാം പങ്കെടുക്കുകയും ചെയ്യും

4.വിദ്യാലയത്തിനു ചുറ്റുപാടുമുള്ള കിടപ്പിലായവർ, രോഗികൾ, വയോജനങ്ങൾ എന്നിവരെ കുട്ടികളോടൊപ്പം സന്ദർശിക്കും.
ഇത്തരം സന്ദർശനങ്ങൾക്ക് ഇപ്പോൾ കുട്ടികൾ തന്നെ മുൻകൈ എടുത്ത് നമ്മളെ കൂട്ടിക്കൊണ്ടുപോവുകയാണ് ചെയ്യുന്നത്

5. ഉച്ചഭക്ഷണം കുട്ടികളോടൊപ്പമിരുന്നാണ് കഴിക്കുന്നത്. എല്ലാ ദിവസവും വിഭവ സമൃദ്ധമായിരിക്കും. കുട്ടികൾ ശരിയായി ഭക്ഷണം കഴിക്കുന്നതിനും, വീട്ടിൽ നിന്നും കുടുതൽ ശ്രദ്ധ ഭക്ഷണ കാ ര്യത്തിൽ ഉണ്ടാവുന്നതിനും ഇത് സഹായിച്ചിട്ടുണ്ട്

6. പൊതുവായ എല്ലാ കാര്യങ്ങളും എസ് എം എസ് മുഖേന രക്ഷിതാക്കളെ പതിവായി അറിയിക്കും. വിദ്യാലയത്തിന്റെ എല്ലാ കാ ര്യത്തിലും രക്ഷിതാക്കളുടെ സഹകരണം ഉറപ്പുവരുത്താൻ ഈ അടുപ്പം സഹായിക്കുന്നുണ്ട്

ചെയ്തു വരുന്ന ചില കാര്യങ്ങൾ സൂചിപ്പിച്ചു എന്നു മാത്രം.ഇത് ഇങ്ങനെ പറയേണ്ടതില്ല എന്നറിയാം
എങ്കിലും സാറിന്റെ ലേഖനം വായിച്ചപ്പോൾ മനസ് വല്ലാതെ തരളിതമായിപ്പോയി. ശരിയായ വഴിയിൽത്തന്നെയാണല്ലോ യാത്രയെന്ന് തിരിച്ചറിയാനുമായി

നന്ദി
മനസിലേക്ക് ഒന്നുകൂടി ചുഴിഞ്ഞു നോക്കാൻ പ്രേരിപ്പിച്ചതിന്.

drkaladharantp said...

Ravi thudaruka ee pravarthanam