ചൂണ്ടുവിരലിലെ വിഭവങ്ങള്‍

2010 ജൂലൈമുതല്‍ അക്കാദമിക വിഭവങ്ങളുമായി ഈ വിദ്യാഭ്യാസ ബ്ലോഗ് ...പ്രയോജനപ്പെടുത്തുക, പ്രയോഗിക്കുക, പ്രചോദിപ്പിക്കുക, പ്രചരിപ്പിക്കുക.. ചൂണ്ടുവിരലില്‍ പങ്കിട്ട വിഭവമേഖലകള്‍....> 1.അധ്യാപക ശാക്തീകരണം ,2. വായനയുടെ വഴി ഒരുക്കാം, 3.എഴുത്തിന്‍റെ തിളക്കം, 4.വിദ്യാഭാസ ഗുണനിലവാരം- സംവാദം,5. മികവ്, 6.ശിശുസൌഹൃദ വിദ്യാലയം, 7.സര്‍ഗാത്മക വിദ്യാലയം, 8.നിരന്തര വിലയിരുത്തല്‍, 9.ഗണിതപഠനം, 10.വിദ്യാഭ്യാസ അവകാശ നിയമം, 11.ദിനാചരണങ്ങള്‍, 12.പാര്‍ശ്വവത്കരിക്കപ്പെടുന്നവര്‍, 13. രക്ഷിതാക്കളും സ്കൂളും, 14. കളരി, 15. ക്ലാസ് അന്തരീക്ഷം/ക്രമീകരണം, 16.ഇംഗ്ലീഷ് പഠനം, 17.ഒന്നാം ക്ലാസ്, 18. ശാസ്ത്രത്തിന്റെ പാത, 19.ആവിഷ്കാരവും ഭാഷയും, 20. പ്രത്യേക പരിഗണന അര്‍ഹിക്കുന്ന കുട്ടികള്‍, 21. ഐ ടി സാധ്യതകള്‍, 22. പഠനറിപ്പോര്‍ട്ടുകള്‍, 23.പഠനമാധ്യമം 24. ഭൌതികസൌകര്യങ്ങളില്‍ മികവ്, 25.അക്കാദമികസന്ദര്‍ശനം, 26.ഗ്രാഫിക് ഓര്‍ഗനൈസേഴ്സ്, 27.പ്രഥമാധ്യാപകര്‍.,28. ബാല, 29. വളരുന്ന പഠനോപകരണം,30. കുട്ടികളുടെ അവകാശം, 31. പത്രങ്ങള്‍ സ്കൂളില്‍, 32.പാഠ്യപദ്ധതി,33. ഏകീകൃത സിലബസ്, 34.ഡയറ്റ് .35.ബി ആര്‍ സി,36. പരീക്ഷ ,37. പ്രവേശനോത്സവം,38. IEDC, 39.അന്വേഷണാത്മക വിദ്യാലയങ്ങളുടെ ലോകജാലകം, 40. കലാവിദ്യാഭ്യാസം, 41.പഞ്ചായത്ത്‌ വിദ്യാഭ്യാസ സമിതി, 42. പഠനോപകരണം, 43.പാഠ്യപദ്ധതി പരിഷ്കരണം, 44. ചൂണ്ടുവിരല്‍,45. ടി ടി സി, 46.പുതുവര്‍ഷം, 47.പെണ്‍കുട്ടികളുടെ ശാക്തീകരണം, 48. ക്രിയാഗവേഷണം,49. ടീച്ചിംഗ് മാന്വല്‍, 50. പൊതുവിദ്യാഭ്യാസസംരക്ഷണം, 51.ഫീഡ് ബാക്ക്, 52.സ്റ്റാഫ് റൂം, 53. കുട്ടികളുട അവകാശം,54. കൃഷിയും പഠനവും,55. നോട്ട് ബുക്ക് ആകര്‍ഷകവും സമഗ്രവും, 56.പഠനയാത്ര, 57. വിദ്യാബ്ലോഗുകള്‍,58. സാമൂഹികശാസ്ത്രം, 59. സ്കൂള്‍ അസംബ്ലി, 60.സ്കൂള്‍ റിസോഴ്സ് (റിസേര്‍ച്) ഗ്രൂപ്പ് - ,61.പ്രതിഫലനാത്മകക്കുറിപ്പ്, 62. ബദല്‍പാഠങ്ങള്‍, 63.മെന്ററിംഗ്,64. വര്‍ക്ക്ഷീറ്റുകള്‍ ക്ലാസില്‍, 65.വിലയിരുത്തല്‍, 66. സാമൂഹിക ശാസ്ത്രാന്തരീക്ഷം, 67.അനാദായം, 68.എ ഇ ഒ , 69.കായികവിദ്യാഭ്യാസം,70. തിയേേറ്റര്‍ സങ്കേതം പഠനത്തില്‍, 71.നാടകം, 72.നാലാം ക്ലാസ്.73. പാഠാവതരണം, 74. മോണിറ്ററിംഗ്, 75.വിദ്യാഭ്യാസ ചിന്തകള്‍, 76.സഹവാസ ക്യാമ്പ്, 77. സ്കൂള്‍ സപ്പോര്‍ട്ട് ഗ്രൂപ്പ്,78.പ്രദര്‍ശനം,79.പോര്‍ട്ട്‌ ഫോളിയോ...80 വിവിധജില്ലകളിലൂടെ... പൊതുവിദ്യാഭ്യാസത്തിന്റെ കരുത്ത് അറിയാന്‍ ചൂണ്ടുവിരല്‍...tpkala@gmail.com.

Friday, March 9, 2018

അഭിജിത്തും അരുണും പിന്നെ ഗണിതവിജയവും


ഡി വി എല്‍ പി എസ് പൂതക്കുളം സ്കൂളിലെ ശ്രീലത ടീച്ചര്‍ ഗണിതവിജയത്തെക്കുറിച്ച് എന്നോട് പറയുമ്പോള്‍ അക്കാദമികസംതൃപ്തിയുടെ പ്രകാശം ഞാന്‍ കണ്ടു

ടീച്ചര്‍ പറഞ്ഞുതുടങ്ങി
" അഭിജിത്ത്...
അവന്‍ അധികം സംസാരിക്കില്ല. ക്ലാസില്‍ പ്രതികരിക്കില്ല. ഒറ്റപ്പെട്ടുനടക്കാനിഷ്ടം, ഉച്ചഭക്ഷണസമയത്ത് ഏറ്റവും അവസാനം ഭക്ഷണം വാങ്ങാനെത്തുന്നവന്‍. അവനിലേക്കൊതുങ്ങിക്കഴിയുന്ന പ്രകൃതം
ഗണിതപരമായ പിന്നാക്കാവസ്ഥയും.
ഗണിതവിജയം പരിപാടിയില്‍ പങ്കെടുത്തതോടെ അവന്റെ രീതി ആകെ മാറി. ഉത്തരം എല്ലാവരേക്കാളും മുന്നില്‍ പറയാന്‍ അവന്‍ ഉത്സാഹം കാട്ടി. കുട്ടികളുമായി ഇടപഴകി. ഗണിതമത്സരങ്ങളില്‍ പങ്കെടുത്തു. വര്‍ക് ഷീറ്റുകള്‍ കൃത്യമായി പൂരിപ്പിച്ചു. രാവിലെ ടീച്ചറെ കാത്തു നില്‍ക്കും. "ടീച്ചറേ എന്റെ വര്‍ക് ഷീറ്റ് നോക്കിത്താ"
മൂന്നാം ദിവസം രക്ഷിതാക്കളുടെ യോഗമുണ്ടായിരുന്നു
പതിനാറ് പേരില്‍ പന്ത്രണ്ട് രക്ഷിതാക്കള്‍ എത്തി
അഭിജിത്തിന്റെ മുഖം വാടി. അവന്റെ വീട്ടില്‍ നിന്നും ആരും വന്നില്ല
വന്ന രക്ഷിതാക്കള്‍ അവരുടെ മക്കളുടെ പഠനോല്പന്നങ്ങള്‍ കൈതുകത്തോടെ നോക്കുന്നത് കണ്ട അവന്റെ കണ്ണു നിറഞ്ഞു
അഭിജിത് പൊട്ടിക്കരഞ്ഞു
"എന്താ മോനേ?” ശ്രീലത ടീച്ചര്‍ ചോദിച്ചു
"എന്റെ വീട്ടീന്നാരും വന്നില്ല.”
ടീച്ചര്‍ ഫോണ്‍ വിളിച്ചു. അവസാനം കുഞ്ഞമ്മ വന്നു
രക്ഷിതാവിന്റെ പേരിനുപകരം കുഞ്ഞമ്മയുടെ പേരെഴുതി ഒപ്പിട്ടു. അഭിജിത്തിന്റെ മുഖം പൂര്‍ണതൃപ്തി പ്രകടിപ്പിച്ചില്ല.
പിറ്റെ ദിവസം അവന്റെ ചേച്ചി അടുത്തുളള വീട്ടിലെ പ്ലസ്ടു വിദ്യാര്‍ഥിനിയെയും കൂട്ടി വന്നു
അവന്‍ അവരെ പഠനോല്പന്നങ്ങള്‍ കാണിച്ചു. വിശദീകരിച്ചു. ശ്രീലത ടീച്ചറും അവന്റെ മാറ്റം സാക്ഷ്യപ്പെടുത്തി
ഉച്ചയായപ്പോള്‍ കുട്ടികള്‍ പറഞ്ഞു "ടീച്ചറേ അഭിജിത്തിന്റെ അമ്മ വരുന്നു"
അതെ അവന്റെ അമ്മ.!
അവന്‍ പൂര്‍ണമായി തെളിഞ്ഞു. അമ്മയെ എല്ലാ പ്രവര്‍ത്തനങ്ങളും പരിചയപ്പെടുത്തി. കിട്ടിയ അംഗീകാരങ്ങള്‍ , തയ്യാറാക്കിയ ചാര്‍ട്ട്, സംഖ്യാമാലയില്‍ പൂമ്പാറ്റയെ ഇരുത്തിയത്, ബാങ്കില്‍ പോയി ചെക്ക് മാറിയത്....
അമ്മ നിറഞ്ഞു
"എന്തേ ഇന്നലെ വന്നില്ല?”ടീച്ചര്‍ ചോദിച്ചു
"അതിന്നലെ അവന്‍ വീട്ടില്‍ വന്ന് വലിയ കരച്ചിലായിരുന്നു. അടുക്കളയിലെ പാത്രങ്ങളെല്ലാം വലിച്ചെറിഞ്ഞു. തറയില്‍ വീണുരുണ്ടു. പി ടി എ യോഗത്തില്‍ ആരും വന്നില്ലാന്ന് പറഞ്ഞാണ് കരച്ചില്‍..”

അതിന്റെ ഫലമായിട്ടാണ് അമ്മയും ചേച്ചിയുമെല്ലാം സ്കൂളില്‍ വന്നത്
അഭിജിത്തിന്റെ ഗണിതതാല്പര്യവും നേട്ടവും മാറ്റവും അമ്മയ്ക് അവിശ്വസനീയമായിരുന്നു
അമ്മ കരഞ്ഞു
അതു കണ്ട അഭിജിത്തും.
ടീച്ചറുടെ കണ്ണിലും നനവ്.
2
അരുണ്‍ ഉത്സവക്കമ്പക്കാരന്‍
അരുണ്‍ സ്ഥിരമായി ക്ലാസില്‍ വരുന്ന പ്രകൃതക്കാരനല്ല. ഉത്സവമോ കല്യാണമോ വന്നാല്‍ അതിന്റെ പേരില്‍ വരില്ല.
കുട്ടികള്‍ പറഞ്ഞു "ടീച്ചറേ ഇന്ന് അരുണ്‍ വരില്ല"
"എന്തേ?”
"അത് അവരെല്ലാം ഉത്സവത്തിനു പോയി"
"കടയ്കലാ, അച്ഛന്റെ കുടുംബക്ഷേത്രത്തിലെ ഉത്സവമാ"
"ഇനി ഒരാഴ്ച അവനെ നോക്കണ്ട"
"ഇന്നലെ വൈകിട്ടാ പോയത്"
പത്തുമണി കഴിഞ്ഞപ്പോള്‍ സ്കൂള്‍ മുറ്റത്ത് ഒരു ഓട്ടോ വന്നു നിന്നു
അരുണും കുടുംബവുമാണ്
അവന്‍ അമ്പലത്തിലെ ഉത്സവത്തിനേക്കാള്‍ ഗണിതവിജയത്തിന് പ്രാധാന്യം നല്‍കി
പഠിക്കാന്‍ പോണം എന്നു നിര്‍ബന്ധിച്ചു
പത്തുമണിക്ക് മുമ്പ് സ്കൂളിലെത്തണം എന്നവന്‍ വാശിപിടിച്ചു. പിന്നെ ഓട്ടോ പിടിച്ചുപുറപ്പെടുകയല്ലാതെ മറ്റ് മാര്‍ഗമുണ്ടിയിരുന്നില്ല ആ രക്ഷിതാക്കള്‍ക്ക്
അമ്പത് കിലോമീറ്റര്‍ ദൂരം അവന് പ്രശ്നമായില്ല
രക്ഷിതാക്കള്‍ അവന്റെ ആവശ്യം മാനിച്ചു
എല്ലാ കുട്ടികളും കൈയടിച്ച് അവനെ വരവേറ്റു
വന്ന പാടെ അവന്‍ ചുറ്റും ഒന്നു നോക്കി
എല്ലാവരുടെ കൈയിലും വര്‍ക് ഷീറ്റ്
"ടീച്ചറേ ഏനിക്കും വര്‍ക് ഷീറ്റാ താ. ഞാന്‍ വേഗം ചെയ്തുതരാം"
അവന്റെ ഉത്സാഹം , താല്പര്യം
ഇത്തരം ധാരാളം ചെറിയ അനുഭവങ്ങള്‍ പങ്കിടാനുണ്ട് ലക്ഷ്മിയുടെ കാര്യം പറയട്ടെ......”
ശ്രീലത ടീച്ചറും ആവേശത്തിലാണ്
അധ്യാപനജീവിതത്തില്‍ അവിസ്മരണീയ മുഹൂര്‍ത്തങ്ങള്‍ എഴുതിച്ചേര്‍ത്ത പരിപാടിയാണ് ഗണിതവിജയം എന്ന് അവര്‍ സാക്ഷ്യപ്പെടുത്തി.
ഗണിത വിജയം സംസ്ഥാനത്തെ ഓരോ ബി ആര്‍ സിയിലും നടപ്പിലാക്കി
കൊല്ലം പൂതക്കുളം പഞ്ചായത്തിലെ എല്ലാ വിദ്യാലയങ്ങളിലും.
പൂതക്കുളം പഞ്ചായത്ത് മൂന്ന് നാല് ക്ലാസുകളില്‍ ഗണിതപിന്നാക്കാവസ്ഥയുളള കുട്ടികളില്ലാത്ത സംസ്ഥാനത്തെ ആദ്യ പഞ്ചായത്തായി പ്രഖ്യാപിക്കപ്പെട്ടു
തൃശൂര്‍ ജില്ലയിലെ എല്ലാ പഞ്ചായത്തിലും ഓരോ വിദ്യാലയത്തില്‍ വീതം ഗണിത വിജയം നടപ്പിലാക്കി
ജില്ല
ഗണിതവിജയം നടപ്പിലാക്കിയ വിദ്യാലയങ്ങള്‍
ഗണിതവിജയത്തിനു വിധേയരായ വിദ്യാര്‍ഥികള്‍
ഗണിതവിജയം പരിപാടി വിജയകരമായി പൂര്‍ത്തീകരിച്ചവരുടെ ശതമാനം
  1. കാസര്‍കോഡ്
7
114
75
  1. കണ്ണൂര്‍
15
220
90
  1. കോഴിക്കോട്
15
225
85
  1. വയനാട്
29
445
85
  1. മലപ്പുറം
15
241
86
  1. പാലക്കാട്
13
204
85
  1. തൃശൂര്‍
112
1750
പൂര്‍ത്തിയായില്ല
  1. എറണാകുളം
15
236
81
  1. ഇടുക്കി
8
82
97.5
  1. കോട്ടയം
13
195
87
  1. ആലപ്പുഴ
11
169
83
  1. പത്തനംതിട്ട
11
114
92
  1. കൊല്ലം
22
350
87
  1. തിരുവനന്തപുരം
12
193
78

ഗണിതവിജയം ചില അനുഭവസാക്ഷ്യങ്ങള്‍ കൂടി വായിക്കുക
1.
വട്ടത്തിലിരിക്കുന്ന കുട്ടികൾക്കു മുന്നിൽ വ്യത്യസ്ത വലിപ്പത്തിലുള്ള സംഖ്യാസ്ട്രിപ്പുകൾ കമിഴ്ത്തിവെച്ചിരിക്കുന്നു. കൂട്ടത്തിൽ നിന്ന് നാലക്ക സംഖ്യ, മൂന്നക്ക സംഖ്യ, രണ്ടക്ക സംഖ്യ, ഒരക്ക സംഖ്യ എന്നിങ്ങനെ നാലു വീതം സ്ട്രിപ്പുകൾ ഓരോ കുട്ടിയും എടുക്കണം. ഇതാണ് അധ്യാപിക നൽകിയ ടാസ്ക്. സംഖ്യകൾ എഴുതിയത് നോക്കാതെ  എല്ലാവരും സ്ട്രിപ്പുകൾ എടുത്ത് ടീച്ചറെ കാണിച്ചു.''നിർദേശിച്ചതു പോലെ തന്നെ എല്ലാവരും എടുത്തിരിക്കുന്നു."ടീച്ചർ പറഞ്ഞപ്പോഴാണ് കുട്ടികൾ എടുത്തതിന്റെ യുക്തി എനിക്ക് പിടി കിട്ടിയത്. ( നേരത്തേ പരിചയപ്പെട്ട സ്ട്രിപ്പുകൾ ആയതിനാൽ വലുപ്പം നോക്കി എത്ര അക്ക സംഖ്യയാണെന്ന് തിരിച്ചറിയാൻ അവർക്ക് കഴിയും.) ഇനി അടുത്ത ടാസ്ക് ."നിങ്ങൾക്ക് കിട്ടിയ 4 സംഖ്യകളും കൂട്ടിയാൽ കിട്ടുന്ന സംഖ്യ എത്രയാണെന്ന് കണ്ടെത്തി കണിക്കൂ.. " നിമിഷ നേരം കൊണ്ട് എല്ലാവരും സ്ട്രിപ്പുകൾ ചേർത്ത് വെച്ച് സംഖ്യ നിർമ്മിച്ചു കാണിച്ചു. എല്ലാവർക്കും ശരി! പിന്നീട് ടീച്ചർ നൽകിയ ചെറിയ കടലാസിൽ കൂട്ടിക്കിട്ടിയ സംഖ്യ എഴുതി. " എ.ടി.എം കൗണ്ടറിൽ നിന്ന് ഇത്രയും രൂപ എടുത്തോളൂ." ഇതായിരുന്നു അടുത്ത ടാസ്ക് .കേൾക്കേണ്ട താമസം, എല്ലാവരും ക്ലാസ്സ് മുറിയിലെ എ.ടി.എം.കൗണ്ടറിനു മുന്നിൽ ക്യൂ നിന്നു.
കൃഷ്ണശ്രീയായിരുന്നു മുന്നിൽ.1000, 100, 10, 1 എന്നിങ്ങനെ നിശ്ചിത എണ്ണം നോട്ടുകൾ എണ്ണിയെടുത്ത് അവൾ ടാസ്ക് വിജയകരമായി പൂർത്തിയാക്കിയപ്പോൾ ഞാൻ അവൾക്ക് കൈ കൊടുത്തു പറഞ്ഞു, ''Very good." ഇന്നലെ വരെ ഗണിതത്തിൽ അല്പം പിന്നാക്കമായിരുന്ന അവൾ ഇന്ന് മുന്നിലെത്തിയിരിക്കുന്നു, ഒന്നാമതായി !
 അവൾ മാത്രമല്ല  3, 4 ക്ലാസ്സുകളിലെ താരതമ്യേന പിന്നാക്കക്കാരായിരുന്ന 16 കുട്ടികളും ഇപ്പോൾ മുന്നാക്കക്കാരായിരിക്കുന്നു, സർവശിക്ഷ അഭിയാൻ ആസൂത്രണം ചെയ്ത 'ഗണിത വിജയം' ട്രൈ ഔട്ട് ക്ലാസ്സിലൂടെ. 
         ചെറുവത്തൂർ ബി.ആർ.സിയിലെ കയ്യൂർ ഗവ: എൽ.പി.സ്കൂളിലാണ് 4 ട്രെയിനർമാരുടെ നേതൃത്യത്തിൽ 10 നാൾ നീളുന്ന ഗണിത വിജയം പരിപാടി നടന്നു വരുന്നത്.7 ദിവസത്തെ പ്രവർത്തനങ്ങൾ പൂർത്തിയായപ്പോൾത്തന്നെ കുട്ടികൾ ഏറെ മുന്നേറിയിരിക്കുന്നുവെന്ന് അവരുടെ പ്രകടനം സാക്ഷ്യപ്പെട്ടുത്തുന്നു. ( നാരായണന്‍ ഒയോളം)
2
*ഇനി നമുക്ക് കണക്ക് പഠിച്ചാൽ മതി*
സാധാരണയായി വിദ്യാർത്ഥികൾ അലോസരമായി കാണുന്ന വിഷയമാണ് കണക്ക്. എന്നാൽ കണ്ടോത്ത് എ.എൽ.പി.സ്കൂളിലെ കുട്ടികളോട് നഗരസഭ ചെയർമാൻ അഡ്വ.ശശി വട്ടക്കൊവ്വൽ നിങ്ങൾക്ക് കണക്ക് ഇഷ്ടമാണോ എന്ന് ചോദിച്ചപ്പോൾ കുട്ടികൾ ഒറ്റ സ്വരത്തിൽ പറഞ്ഞു. ഞങ്ങൾക്ക് ഇനി കണക്ക് പഠിച്ചാൽ മതി. രക്ഷിതാക്കളും അധ്യാപകരും ഇത് ശരി വെച്ചു. കുട്ടികൾക്കിപ്പോൾ കണക്ക് ഏറെ ഇഷ്ടമാണ്.വീട്ടിലെത്തിയ യുടൻ ഗണിതത്തിലെ പ്രവർത്തനങ്ങൾ പൂർത്തിയാക്കിയിട്ടേ മറ്റെ ന്തും ചെയ്യൂവെന്ന് ശിവദയുടെ അമ്മ സാക്ഷ്യപ്പെടുത്തുന്നു.
3
വന്യ വശ്യതയാൽ മനോഹരമായ എച്ചിപ്പാറ സ്കൂളിലായിരുന്നു ആദ്യ സന്ദർശനം .ഗണിത വിജയം പ്രവർത്തനങ്ങൾ തലേന്നു തന്നെ കഴിഞ്ഞിരുന്നുവെങ്കിലും RP മാർ ചില പരിഹാര ബോധനങ്ങൾക്കായി വീണ്ടുമെത്തിയിരുന്നു .പല തരത്തിൽ കുട്ടികളുമായി ആശയവിനിമയം നടത്തിയപ്പോൾ ഒട്ടുമിക്ക ഗണിത ശേഷികളും ആർജ്ജിച്ചതായി കണ്ടെത്താൻ കഴിഞ്ഞു .നാടൻ താളത്തിലുള്ള ഒരു ഗണിതപ്പാട്ടിൽ കൂടി ചോദ്യവും ഉത്തരവും മത്സരമായ് പെയ്തിറങ്ങി .ഒന്നാം ക്ലാസ്സിൽ ലൈബ്രറിയും വായന പരിശോധിക്കാൻ കയറി ആ കൊച്ചുപുലിക്കുട്ടികൾ ഞെട്ടിച്ചു കളഞ്ഞു  .നല്ല വായനക്കാരും പ്രതികരണ ശേഷിയും ജീവനുമുള്ള കുട്ടികളെ കാണാൻ കഴിഞ്ഞു. കഥയും പാട്ടും കവിതയുമായ് നേരം പോയതറിഞ്ഞില്ല. തൊട്ടടുത്ത മുറിയിൽ പരീക്ഷയാണ് എട്ടാം ക്ലാസ്സുകാർക്ക് .ഒരൊറ്റ ഹൈസ്കൂൾ അദ്ധ്യാപകർ പോലുമില്ലാതെ UP അദ്ധ്യാപകർ ഒരു വർഷക്കാലം അവരെ പഠിപ്പിച്ച് തീർത്തിരിക്കുന്നു .ജോലിഭാരത്തിന്റെ ദൈന്യത വിളമ്പുന്ന അദ്ധ്യാപകർ ഇവിടെ വന്ന് ഇതൊന്ന് കാണണം .അറിയാതെ കൈകൾ കൂമ്പിപ്പോകും ഇവരെ നമസ്ക്കരിക്കാൻ .പ്രശസ്തമായ കോടാലി സ്കൂളായിരുന്നു അടുത്തയിടം. അനുദിനം പെരുകുന്ന കുട്ടികളെ ഉൾക്കൊള്ളാൻ കഴിയാതെ വീർപ്പുമുട്ടുകയാണ് സ്കൂൾ അധികൃതർ .H M ജോസ് മാഷുടെയും അദ്ധ്യാപകരുടെയും വേവലാതികൾക്ക് മറുപടിയില്ല. പിൻതുണ മാത്രം ബാക്കി.ഗണിത ലാബിൽ ചില പരീക്ഷണങ്ങൾ നടത്തി കുട്ടികളുടെ നിലവാരം കണ്ടെത്തി .തൊണ്ണൂറ് ശതമാനം ശേഷികളും നേടിയിട്ടുണ്ട്. മടങ്ങാൻ നേരം സീതമ്മയെന്ന പരുന്തിനെ കൈയിലിരുത്തി ഓമനിക്കാനും കഴിഞ്ഞു.പ്രതീക്ഷിത നിലവാരത്തിലേക്കുയരാൻ കൊടകര GLPS ഏറെ പരിശ്രമിക്കേണ്ടി വരുന്ന കാഴ്ച്ചയാണ് അടുത്ത സെൻറ റിൽ കണ്ടത്. ചാലക്കുടി BRC യിലെ ചാലക്കുടി SH ,പോട്ട ,അന്നനാട് എന്ന സെന്ററുകൾ സന്ദർശിച്ചു. ഗണിത വിജയത്തെ അന്നനാട് സ്കൂളിലെ HM ഉം അദ്ധ്യാപകരും കുട്ടികളും ആവേശത്തോടെ ഏറ്റെടുത്ത കാഴ്ചയാണ് കാണാൻ കഴിഞ്ഞത്. മറ്റ് രണ്ട് സെന്ററുകളും ശരാശരി നിലവാരം മാത്രമേ പുലർത്തി യുള്ളു .നയിച്ചവർക്കും  പങ്കെടുത്തവർക്കും എല്ലാ വിധ അഭിനന്ദനങ്ങളും അറിയിക്കുന്നു. ഇന്ന് യാത്രയിൽ അനുഗമിച്ച നന്ദകുമാർ മാഷ് ,ആനി ടീച്ചർ എന്നിവരുടെ സഹകരണത്തിനും ,സാന്നിദ്ധ്യത്തിനും നന്ദി പറയാൻ ഈ അവസരം ഉപയോഗിക്കുന്നു.    (പ്രകാശ് ബാബു. ജില്ല പ്രോഗ്രാം ഓഫീസർ.)

4.
നീലേശ്വരം: ഗണിതപഠനത്തിൽ കൊടുമുടി കീഴടക്കിയ ആഹ്ലാദാരവത്തോടെ കുട്ടികൾ. മക്കളുടെ ആഹ്ലാദത്തികവിൽ വിസ്മയത്തോടെ രക്ഷിതാക്കൾ. ഗണിതക്കളിമൂലയിൽ ലക്ഷ്യസ്ഥാനത്തേക്ക് കളിത്തോക്കു കൊണ്ട് വെടിയുണ്ടയുതിർത്തുംകണക്കിനെ ഇഷ്ടവിഷയമായി നെഞ്ചോടു ചേർത്തും ഗണിതവിജയം ജില്ലാതല വിജയപ്രഖ്യാപനം. സർവശിക്ഷാ അഭിയാൻ ആവിഷ്ക്കരിച്ച് ലക്ഷ്യം കൈവരിച്ച ഗണിത വിജയം പദ്ധതിയുടെ ജില്ലാതല വിജയപ്രഖ്യാപനവും ട്രൈ ഔട്ട് ക്ലാസുകളുടെ പ്രദർശനവും സെമിനാറുമാണ് വിദ്യാഭ്യാസ മേഖലയിലെ പുതിയ ഉണർവിന്റെ നിദർശനമായി മാറിയത്.
  • ഗണിതത്തെ കൂടുതൽ ആസ്വാദ്യകരമായ വിഷയമാക്കിത്തീർക്കാനും പിന്നോക്കാവസ്ഥ പരിഹരിക്കുന്നതിനുമായി ഈ അധ്യയന വർഷം തുടക്കമിട്ട പദ്ധതിയാണ് ഗണിത വിജയം.
  • ഗണിത ആശയങ്ങൾ കുട്ടികളിലേക്ക് എളുപ്പം കടന്നു ചെല്ലാൻ പഠനോപകരണങ്ങൾക്ക് ഏറെ സാധ്യതയുണ്ടെന്ന തിരിച്ചറിവിന്റെ ഭാഗമായി രൂപപ്പെട്ടതാണ് പദ്ധതി.
  • അതിനായി ഓരോ ബി ആർ സി പരിധിയിലെയും ഒരു എൽ പി സ്കൂളിൽ ഗണിത പ ഠ നോപകരണങ്ങൾ നിർമിച്ച് ഗണിത ലാബുകൾ ആരംഭിക്കുകയും ചെയ്തു.ജില്ലാതലത്തിൽ ബി ആർ സി പരിശീലകർക്ക് അഞ്ചു നാൾ നീണ്ട ട്രൈ ഔട്ട് ക്ലാസും തുടർച്ചയായി ജില്ലയിലെ ഏഴ് ഉപജില്ലയിലെയും ഗണിത ലാബിൽ പത്തുനാൾ നീണ്ട ട്രൈ ഔട്ട് ക്ലാസുകൾ വിജയകരമായി പൂർത്തിയാക്കുകയും ചെയ്തതിന്റെ അടിസ്ഥാനത്തിലാണ് ജില്ലാതല വിജയപ്രഖ്യാപനം സംഘടിപ്പിച്ചത്.
  • സംഖ്യാബോധം, സംഖ്യാ വ്യാഖ്യാനം, സങ്കലനം,വ്യവകലനം, ഗുണനം,ഹരണം, പ്രായോഗിക പ്രശ്ന പരിഹരണം എന്നിങ്ങനെയുള്ള പഠന നേട്ടങ്ങൾ ലക്ഷ്യമിട്ടുള്ള 42 പ്രവർത്തനങ്ങൾ ഉൾപ്പെട്ടതായിരുന്നു പത്തുനാൾ നീണ്ട പാക്കേജ്.
  • എസ് എസ് എ പരിശീലകരുടെ നേതൃത്വത്തിലായിരുന്നു ഗണിത ലാബുകൾ സജ്ജീകരിച്ച് ക്ലാസുകൾ കൈകാര്യം ചെയ്തത്. ലാബിലെ പഠനോപകരണങ്ങൾ ഉപയോഗിച്ചു മാത്രമായിരുന്നു പ്രത്യേക പാക്കേജ് നടപ്പിലാക്കിയത്.
  • പ്രീ ടെസ്റ്റ്, ഇടക്കാല വിലയിരുത്തൽ, അന്തിമ വിലയിരുത്തൽ എന്നിവയ്ക്കു ശേഷം ഗണിതത്തിൽ വളരെ പിന്നോക്കക്കാരായ, ഗണിതത്തിൽ തീരെ താൽപര്യമില്ലാത്തവരുമായ 3, 4 ക്ലാസുകളിലെ വിദ്യാർഥികളിൽ പുതിയ താൽപര്യവും ഉണർവും സജീവതയും പത്തുനാൾ കൊണ്ടു തന്നെ ദൃശ്യമായതായി വിജയ പ്രഖ്യാപന ചടങ്ങിലെത്തിയ രക്ഷിതാക്കളും സാക്ഷ്യപ്പെടുത്തി.
  • ഈ രീതിശാസ്ത്രം അടുത്ത അവധിക്കാല പരിശീലനത്തിൽ അധ്യാപകരെ പരിചയപ്പെടുത്തിയും തുടർന്ന് പരിശീലകരുടെ നേതൃത്വത്തിൽ തൽസമയ പിന്തുണയൊരുക്കിയും എല്ലാ ക്ലാസുകളിലും ഗണിത വിജയം പാക്കേജ് നടപ്പിലാക്കാനാണ് ഉദ്ദേശിക്കുന്നത്.
  • സർവശിക്ഷാ അഭിയാന്റെ ഈ മാതൃകാപദ്ധതി കണ്ടറിഞ്ഞ തദ്ദേശസ്വയംഭരണ സ്ഥാപനങ്ങളിലെ ജനപ്രതിനിധികൾ  തങ്ങളുടെ കീഴിലെ മുഴുവൻ വിദ്യാലയങ്ങളിലും ഗണിത ലാബ് ഒരുക്കാൻ താൽപര്യം പ്രകടിപ്പിച്ചിട്ടുണ്ട്.
  • പിന്നോക്കാവസ്ഥയിലുള്ള കുട്ടികൾക്ക് പ്രത്യേകശ്രദ്ധ നൽകിയും സാമ്പ്രദായിക രീതികൾക്കു പകരം താൽപര്യപ്രദമായ കളി പ്രവർത്തനങ്ങൾ ഒരുക്കിയുമാണ് ഗണിത വിജയം മുന്നേറുന്നത്.



Wednesday, February 21, 2018

പാലക്കുഴി വിഷൻ - ആത്മപ്രകാശനത്തിനൊരു വേദി

കൊട്ടാരക്കര: ഗവ. റ്റൗൺ യു പി സ്കൂളിലെ കുട്ടികൾ തയ്യാറാക്കിയ കുട്ടികളുടെ ചാനലാണ് 'പാലക്കുഴിവിഷൻ'.
അക്കാദമിക മാസ്റ്റർ പ്ലാൻ ചർച്ചകളിൽ രൂപം കൊണ്ട ഒരാശയമായിരുന്നു ഇത്. കുട്ടികളിലെ സർഗ്ഗാത്മക വാസനകളെ പ്രോത്സാഹിപ്പിക്കാനും സ്കൂളിലെ പ്രവർത്തനങ്ങൾ പൊതുജനങ്ങളിലെത്തിക്കാനുമുള്ള ഒരു മാധ്യമമായി ചാനലിനെ മാറ്റുക എന്നതാണ് ലക്ഷ്യം.
  • കുട്ടികൾ തന്നെ വാർത്തകളും പ്രോ ഗ്രാമുകളും കണ്ടെത്തുന്നു.,
  •  സ്ക്രിപ്റ്റുകൾ തയ്യാറാക്കുന്നു, 
  • ഷൂട്ട് ചെയ്യുന്നു, 
  • എഡിറ്റിംഗ്‌  നിർവഹിക്കുന്നു .
  • പരിശീലനത്തിനായി ശില്പശാലകൾ സംഘടിപ്പിച്ചു.
  • പ്രാദേശിക മാധ്യമ പ്രവർത്തകരും അധ്യാപകരും ശില്പശാലകൾ നയിച്ചു.
  • ഓരോ വിഭാഗത്തിലും അഭിരുചിക്കനുസരിച്ച് ടീമുകൾ രൂപപ്പെടുത്തി.
  • ക്ലാസ് മുറികളെയും, സ്കൂൾ കാമ്പസിനെയും സർഗ്ഗാത്മകതയുടെ ഇടമാക്കി പൊതു ജനസമക്ഷത്തിലെത്തിക്കുകയാണ് പാലക്കുഴി വിഷന്റെ വിഷൻ.
      2018 ഫെബ്രുവരി 12-ാം തീയതി ബഹു.എം.എൽ.എ അഡ്വ.ഐ ഷാ പോറ്റി അക്കാദമിക മാസ്റ്റർ പ്ലാൻ പ്രകാശനം ചെയ്തു. പാലക്കുഴിവിഷൻ ചാനൽ സമർപ്പണം കൊട്ടാരക്കര മുൻസിപ്പാലിറ്റി ചെയർപേഴ്സൺ ബി.ശ്യാമളയമ്മ നിർവഹിച്ചു.
      കുട്ടികൾ തയ്യാറാക്കുന്ന ഈ ചാനൽ പ്രക്ഷേപണം ചെയ്യുന്നത് മൂന്ന് വിധത്തിലാണ്
1.പ്രൊജക്റ്ററുപയോഗിച്ച് എല്ലാ കുട്ടികളെയും ബിഗ് സ്ക്രീനിൽ കാണിക്കുന്നു '.
2. യൂ ട്യൂബ്, ഫെയ്സ് ബുക്ക് ,വാട്സ് ആപ്പ് തുടങ്ങിയ സാമൂഹിക മാധ്യമങ്ങളിലൂടെ പൊതു ജനങ്ങളിലെത്തിക്കുന്നു .
3. ലോക്കൽ ചാനലിന്റെ സഹായത്തോടെ കൂടുതൽ ജനങ്ങളിലെത്തിക്കുന്നു '
    ആഴ്ചയിൽ ഒന്ന് എന്ന രീതിയിലായിരിക്കും സംപ്രേഷണം.   
സാമൂഹിക മൂല്യങ്ങൾ ഉയർത്തിപ്പിടിക്കുന്നതായിരിക്കും ഈ സംരംഭത്തിന്റെ മുഖമുദ്ര.
ആദ്യവാരത്തിലെ പ്രോ ഗ്രാമുകൾ
1 .സ്കൂൾ വാർത്തകൾ
2 .വ്യത്യസ്ത കഴിവുകളുടെ ഉടമയായ കാശിയുടെ ദക്ഷിണ കൊറിയൻ വാദ്യോ പ ക ര ണ മാ യ ' ജിമ്പേ ' വായന
3. ചികിത്സാ സഹായം തേടുന്ന വിദ്യാർത്ഥിനിയുടെ നൊമ്പരങ്ങൾ
4. പറമ്പിക്കുളം - പഠനയാത്ര... തുടങ്ങിയവയാണ് ഈ ആഴ്ചത്തെ പ്രധാന വിഭവങ്ങൾ
       അഭിപ്രായങ്ങളും നിർദ്ദേശങ്ങളും നൽകി കുട്ടികളുടെ ഈ സംരംഭത്തെ പ്രചോദിപ്പിക്കുമെന്ന പ്രത്യാശയോടെ -
   

പാലക്കുഴി വിഷന് വലിയൊരു സാധ്യത മുന്നോട്ട് വെക്കുകയാണ്. എല്ലാ ആഴ്ചയിലും സംപ്രേഷണം ചെയ്യണമെങ്കില്‍ എല്ലാ ആഴ്ചയിലും മികവുണ്ടാകണം. അതില്‍ കൊട്ടാരക്കരക്കാര്‍ക്ക് ആശങ്കയുണ്ടാകാനിടയില്ല. വിഷയവൈവിധ്യവും പ്രധാനമാണ്.എല്ലാ വിഷയങ്ങള്‍ക്കും പ്രാതിനിധ്യം വരുകയും വേണം. കുട്ടികള്‍ മാധ്യമപ്രവര്‍ത്തകരാകുന്നുവെന്നത് അവരുടെ  ഭാഷാപരമായ കഴിവിന്റെ വികാസതലം കൂടിയാണ്. എല്ലാ കുട്ടികള്‍ക്കും അവസരം ലഭിക്കും വിധം ഇത് ചിട്ടപ്പെടുത്തുകയാണെങ്കില്‍ മൂല്യനിര്‍ണയദൗത്യം കൂടി ഇതിന് നിര്‍വഹിക്കാനാകും.കഴിഞ്ഞവര്‍ഷം എസ് എസ് എ നടത്തിയ ദേശീയമികവില്‍ മൂന്നു വിദ്യാലയങ്ങള്‍ ഇത്തരം ഇടപെടല്‍ നടത്തിയതിന്റെ അനുഭവം പങ്കിട്ടിരുന്നു. കുട്ടികളുടെ കഴിവുകള്‍ സമൂഹത്തിലേക്ക് എത്തിക്കുന്നതിലൂടെ പൊതുവിദ്യാലയത്തില്‍ നടക്കുന്ന മികച്ച പ്രവര്‍ത്തനങ്ങള്‍ക്ക് അംഗീകാരവും പ്രോത്സാഹനവും ലഭിക്കും. പാലക്കുഴി വിഷന്‍ ശ്രദ്ധേയമാകുന്നത് ആധുനികസാങ്കേതികവിദ്യ പ്രയോജനപ്പെടുത്തുന്ന പഠനതന്ത്രമെന്ന നിലയിലും ടാലന്റ് ലാബ് എന്ന ആശയത്തിന്റെ സാക്ഷാത്കാരത്തിലെ സാധ്യതയെന്ന നിലയിലും വിദ്യാലയത്തെ വിലയിരുത്താനുളള സുതാര്യമായ സന്ദര്‍ഭമായുമെല്ലാമാണ്. വിദ്യാലയത്തിന് ആശംസകള്‍.

Tuesday, February 13, 2018

ബാലഗ്രാമില്‍ പൊതുവിദ്യാഭ്യാസസംരക്ഷണയജ്ഞത്തിന്റെ ഒരു വര്‍ഷം എങ്ങനെയായിരുന്നു?


ബാലഗ്രാം സ്കൂളിലെ പ്രഥമാധ്യാപകന്‍ നെടുങ്കണ്ടത്ത് വെച്ച് എന്നെ കണ്ടപ്പോള്‍ ഒരു ഫയല്‍ തന്നു
പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി ഒരു വര്‍ഷം നടത്തിയ പ്രവര്‍ത്തനങ്ങളാണ്. തെളിവുകള്‍ സഹിതം.
പ്രഥമാധ്യാപകനായ അഗസ്റ്റിന്റെ കൈയക്ഷരത്തിലാണ് മുഴുവന്‍ പേജുകളും. ഞാനതില്‍കൂടി കടന്നു പോയി. വൈവിധ്യമുളള പ്രവര്‍ത്തനങ്ങള്‍.ടീം വര്‍ക്കിന്റെ പ്രതിഫലനം.സജീവമായി വിദ്യാലയം പ്രവര്‍ത്തിച്ചതിന്റെ സാക്ഷ്യങ്ങള്‍. എന്തെല്ലാമാണ് അവിടെ നടന്നത്?
  • സമഗ്രവിദ്യാലയ വികസനപദ്ധതി രൂപീകരണം ( നൂറ്റിയാറ് കര്‍മപദ്ധതികള്‍)
  • അവധിക്കാല പാക്കേജ് ( അവധി, അറിവ്, ആഹ്ലാദം)
  • ഭവനസന്ദര്‍ശനം
  • യു കെ ജി വിദ്യാര്‍ഥികള്‍ക്ക് ബിരുദദാനച്ചടങ്ങ്
  • ആപ്പിള്‍ ( ഇംഗ്ലീഷ് നിലവാരം മെച്ചപ്പെടുത്താനുളള പദ്ധതി)
  • പൊന്‍മലയാളം ( ഭാഷാപരമായ മികവിലേക്ക്)
  • ഗണിതകൗതുകം
  • ശാസ്ത്രകവാടം
  • ജീവിതനൈപുണിവര്‍ഷാചരണം ( ഓരോ മാസവും ഓരോ മേഖലയ്ക് ഊന്നല്‍)
  • അറ്റന്‍ഡന്‍സ് ട്രാക്കിംഗ് സിസ്റ്റം
  • കല്ലുപെന്‍ സില്‍ മുതല്‍ കമ്പ്യൂട്ടര്‍ വരെ -വിദ്യാലയവിഭവസമാഹരണം (ഗ്രാമപഞ്ചായത്ത്, വിദ്യാഭ്യാസ വകുപ്പ്, എസ് എസ് എ, ബ്ലോക് പഞ്ചായത്ത്, ജേസീസ്, ലയണ്‍സ് ക്ലബ്, കെ എസ് പി എ, കെ എസ് ബി എ,കെ എസ് ആര് ആര്‍ ഡി എ, കെ എസ് ഇ ബി ജിവനക്കാര്‍, പൊതുജനങ്ങള്‍, വ്യക്തികള്‍, പ്രാദേശികസ്ഥാപനങ്ങള്‍)
    • മൈക്ക് സെറ്റ്
    • ഗ്യാസ് കണക്ഷന്‍
    • മുഴുവന്‍കുട്ടികള്‍ക്കും ഡിക്ഷ്ണറി
    • ഗ്യാസ് സ്റ്റൗ
    • അലമാര, മേശ
    • ക്ലാസ് ലൈബ്രറികള്‍
    • വാട്ടര്‍പ്യൂരിഫയര്‍
    • ആക്ടിവിറ്റി ടേബിള്‍
    • പ്രീപ്രൈമറിക്ക് കസേരകള്‍
    • കളിയുപകരണങ്ങള്‍
    • ബഞ്ച്, ഡസ്ഖ്
    • ടോയ്ലറ്റ് കോംപ്ലക്സ്
  • ലൈബ്രറി നവികരണവും വായനാപരിപോഷണവും
  • സാമൂഹ്കസുരക്ഷാ ബോധവത്കരണം
  • ബാലികാദിനം
  • മികവുത്സവം
  • നഴ്സറി ഫെസ്റ്റ്
  • വാര്‍ത്താപത്രിക പ്രകാശനം
  • എന്റെ വിദ്യാലയം ഹരിതവിദ്യാലയം
  • വായനക്കാര്‍ഡുകളുടെ പ്രകാശനം
  • അധ്യാപകദിനാചരണവും ഗുരുവന്ദനവും
  • മാതൃഭാഷാവാരാചരണവും ലൈബ്രറി പുസ്തകങ്ങള്‍ ഏറ്റ വാങ്ങലും
  • രക്ഷാകര്‍തൃബോധവത്കരണം
  • സ്നേഹക്കറി

    ഇനിയുമുണ്ട് പ്രവര്‍ത്തനങ്ങള്‍ വിശദീകരിക്കുന്നില്ല. കഴിഞ്ഞ ശനിയാഴ്ച അവധിദിനമായിരുന്നു. പക്ഷേ ബാലഗ്രാമിലെ അധ്യാപകരെല്ലാം ഒത്തുകൂടി. ജൈവവൈവിധ്യഉദ്യാനനിര്‍മിതിക്ക്. അധ്വാനം അധ്യാപകരുടെ വക.
    .
    കുറെയേറെ വിദ്യാലയങ്ങള്‍ക്ക് ഇത്തരം അനുഭവം പങ്കിടാനുണ്ടാകും 
    എങ്ങനെയാണ് പൊതുവിദ്യാലയങ്ങളിലെ അധ്യാപകര്‍ പ്രവര്‍ത്തിക്കുന്നതെന്ന് സമൂഹം അറിയട്ടെ. 

    എന്റെ വിദ്യാലയം എന്റെ അഭിമാനം എന്ന മുദ്രാവാക്യം തന്നെയാണ് പ്രധാനം

    ജനങ്ങള്‍ നല്‍കിയ പിന്തുണയക്ക് ഇരട്ടി അക്കാദമിക മൂല്യം ഈ വിദ്യാലയം തിരിച്ചു നല്‍കി

    ഇരുപത്തഞ്ച് വര്‍ഷത്തെ ചരിത്രത്തില്‍ ഏറ്റവും ഉയര്‍ന്ന ഒന്നാം ക്ലാസ് അഡ്മിഷനായിരുന്നു ഈ വര്‍ഷത്തേത്

    ചരിത്രംതിരുത്തി മുന്നേറാന്‍ ഈ വിദ്യാലയം നല്‍കുന്ന പ്രചോദനം ചെറുതല്ല

     


Saturday, February 10, 2018

സമ്പൂർണ്ണ ക്ലാസ്സ് റൂം ലൈബ്രറി സാധ്യമാണെന്നിവരും തെളിയിച്ചു

കൊടുവള്ളി ബി.ആർ സി യിലെ വിദ്യാലയങ്ങളിൽ സമ്പൂർണ്ണ ക്ലാസ്സ് റൂം ലൈബ്രറി എന്ന ലക്ഷ്യം ലക്ഷ്യം സാർത്ഥകമാക്കുന്നതിന് പിന്നിൽ പ്രവർത്തിച്ച പ്രധാനാധ്യാപകർ, രക്ഷാകർത്താക്കൾ, പൂർവ്വ വിദ്യാർത്ഥികൾ സന്നദ്ധ സംഘടനകൾ നാട്ടുകാർ സുമനസ്സുകളെ അഭിനന്ദിക്കുന്നു. 
  • 87 വിദ്യാലയങ്ങളിലെ 942 ക്ലാസ്സ് മുറികളിലാണ് ബഹുജന പങ്കാളിത്തത്തോടെ ക്ലാസ്സ് റൂം ലൈബ്രറി ഒരുക്കിയിരിക്കുന്നത്. 
  • 1 മുതൽ 7വരെയുള്ള മുഴുവൻ ക്ലാസ്സുകളിലും ലൈബ്രറികളാണ് സജ്ജമായി
  • ഓരോ ക്ലാസ്സിലെ യും കുട്ടികളുടെ പ്രകൃതത്തിനും നിലവാരത്തിനും അനുയോജ് മായ 50 മുതൽ 150 വരെ പുസ്തകങ്ങൾ
  • പുസ്തകഡിസ്പ്ലേ ബോർഡുകൾ ബുക്ക് ഷെൽഫുകൾ പുസ്തകവായന ഉറപ്പാക്കുന്നതിനുള്ള കാർഡുകൾ എന്നിവ ഉൾക്കൊള്ളുന്ന വിഭവങ്ങളാണ് ക്ലാസ്സ് മുറികളിൽ ജനകീയ പങ്കാളിത്തത്തോടെ തയ്യാറാക്കിയിരിക്കുന്നത്.
  •  ഹൈസ്കൂൾ ക്ലാസ്സുകളിലെ 250 ക്ലാസ്സുമുറികളിലും അട്ടത്തഘട്ടത്തിൻ ക്ലാസ്സ് ലൈബ്രറികൾ പൂർത്തിയാക്കും.
  • ജനുവരി 26 ന് ആവി ലോറ യു .പി സ്കൂളിൽ നടന്ന ഉത്ഘാടന ചടങ്ങിൽ സാഹിത്യ സാംസ്കാരിക രംഗത്തെ പ്രശസ്തർ പങ്കെടുത്തു.സംസ്ഥാനത്ത് ബഹുജന പിന്തുണയോടെ ഇത്രയധികം ക്ലാസ്സ് മുറികളിൽ ക്ലാസ്സ് ലൈബ്രറികളാരുക്കുന്നത് ഇതാദ്യമായാണ്.
എന്താണ് കൊടുവളളിയില്‍ ബി ആര്‍ സി സ്വീകരിച്ച പ്രക്രിയ?
  • ബി ആര്‍ സി തല ആശയരൂപീകരണയോഗം
  • ട്രെയിനര്‍മാര്‍ , സി ആര്‍ സി കോര്‍ഡിനേറ്റര്‍മാര്‍ എന്നിവര്‍ക്ക് ചുമതലാവിഭജനം. സ്കൂളുകള്‍ ചുമതലപ്പെടുത്തി
  • പ്രഥമാധ്യാപകരുടെയും പി ടി എ പ്രസിഡന്റുമാരുടെയും സംയുക്തശില്പശാല
  • എസ് ആര്‍ ജി കണ്‍വീനര്‍മാരുടെ യോഗം ( ലൈബ്രറി മാതൃകകള്‍, പുസ്തകസമാഹണമാര്‍ഗങ്ങള്‍ )
  • ഓരോ വിദ്യാലയവും പ്രാദേശികയോഗങ്ങള്‍ സംഘടിപ്പിച്ചു
  • പുസ്തകവണ്ടി,പുസ്തകപ്പയറ്റ്, സ്മാരകലൈബ്രറി, ജന്മദിനലൈബ്രറി, അമ്മലൈബ്രറി സാധ്യതകള്‍ പ്രയോജനപ്പെടുത്തി
  • ക്ലസ്റ്റര്‍തലത്തിലും പഞ്ചായത്ത് തലത്തിലും മാതൃകകള്‍ നവമാധ്യമപങ്കിടല്‍
  • അവലോകനയോഗങ്ങള്‍
  • സമ്പൂര്‍ണപ്രഖ്യാപനം
ക്ലാസ് ലൈബ്രറിക്ക് അംഗീകാരം നല്‍കാന്‍ കൈയ്പമംഗലം മാതൃക
കൈപ്പമംഗലം നിയോജക മണ്ഡലം - മികച്ച ക്ലാസ് ലൈബ്രറികൾ കണ്ടെത്താനായി  MLA ET ടൈസൺ മാസ്റ്റർ നിർദ്ദേശിച്ച പ്രകാരം ഒരു Team 78 വിദ്യാലയങ്ങളിലും സന്ദർശിച്ചു. Block പഞ്ചായത്ത് K K ആബിദലി,ഗ്രാമ പഞ്ചായത്ത് പ്രസിഡൻറ മാർ, ജില്ലാ പഞ്ചായത്തംഗം നൗഷാദ് കൈതവളപ്പിൽ, വിദ്യാഭ്യാസ സ്റ്റാ.ചെയർമാൻമാർ, AE0 മാർ ,BP 0, Trainers, C RCS, പ്രശസ്ത കവി ഇ.ജിനൻ, TBസുരേഷ് ബാബു, PK വാസു, Dr. UM മുസ്തഫ, CA നസീർ മാസ്റ്റർ, പി ക്കാസോ ഉണ്ണി പവിഴം ടീച്ചർ, എന്നിവരായിരുന്നു - ടീമംഗങ്ങൾ. 
  • ഏറ്റവും മികച്ച ക്ലാസ് ലൈബ്രറി - Govt UP School പെരിഞ്ഞനം കദി ജാബി ടീച്ചറുടെ Std IV, 
  • രണ്ടാമത് 2 പേർ മതിലകം St Mary's LPട chool, 1 MUP School അഴീക്കോട്, 
  • മൂന്നാമത് G MLPSchool Amandoor

  •  

Sunday, February 4, 2018

വിദ്യാഭ്യാസ ഓഫീസര്‍മാര്‍ ഇങ്ങനെയാകണം


മാടായി ഉപിജില്ലാ വിദ്യാഭ്യാസ ഓഫീസറുടെ ക്ലാസ് ഫെബ്രുവരി ഒമ്പതാംതീയതി ഒമ്പതു മുപ്പതിനാരംഭിക്കും
ശനിയാഴ്ച രാവിലെ ഒമ്പതു മുപ്പതിന് അവസാനിക്കും
ഇരുപത്തിനാല് മണിക്കൂര്‍ ക്ലാസ്
വിഷയം ജ്യോതി ശാസ്ത്രം
കമ്പ്യൂട്ടറൈസ്ഡ് ട്രാക്കിംഗ് ടെലസ്കോപ്പിന്റെ സഹായത്തോടെയാണ് ക്ലാസ്
ശാസ്ത്രജ്ഞരും ജനപ്രതിനിധികളും പങ്കാളികളാകും
ഗവ ബോയ്സ് വൊക്കേഷണല്‍ ഹയര്‍സെക്കണ്ടറി സ്കൂളാണ് വേദി
കേരളത്തിലെ വിദ്യാഭ്യാസ ഓഫീസര്‍മാരില്‍ പലരും അക്കാദമിക കാര്യങ്ങള്‍ക്ക് അര്‍ഹിക്കുന്ന പ്രാധാന്യം നല്‍കുന്നുണ്ടോ എന്ന ചോദ്യം സമൂഹത്തിലുണ്ട്.
പ്രമോഷന്‍ രീതിയില്‍ നിയമിതരായവരും അല്ലാതെ നിയമിതരായവരും ഉണ്ട്.
പക്ഷേ മികിവിന്റെ വഴിവെട്ടുന്നവര്‍ കുറവ്
മാടായി ഉപജില്ലാ വിദ്യാഭ്യാസ ഓഫീസര്‍ തന്റെ ചുമതലയുളള ഉപജില്ലയില്‍ വലിയ ഇടപെടലാണ് നടത്തിയത്. ശാസ്ത്രാവബോധം സൃഷ്ടിക്കാനുളള പരിപാടി തയ്യാറാക്കി. അത് കല്യാശേരി സമഗ്രവിദ്യാഭ്യാസ പദ്ധതിയുടെ ഭാഗമാക്കി എം എല്‍ എ പ്രഖ്യാപിച്ചു. അക്കാദമിക നേതൃത്വം പൂര്‍ണമായും ഉപജില്ലാ വിദ്യാഭ്യാസ ഓഫീസര്‍ ഏറ്റെടുത്തു.
എന്തെല്ലാം പരിപാടികളാണ് അവിടെ നടന്നത്?
ജൂലൈ ഇരുപത്തിയൊന്നിന് ചാന്ദ്രദിനത്തില്‍ സെലസ്റ്റിയ ആരംഭിച്ചു
പ്രവര്‍ത്തനകലണ്ടര്‍ എല്ലാ വിദ്യാലയങ്ങളിലും എത്തിച്ചു ( ബഹുവര്‍ണത്തിലുളളത് തൂക്കിയിടാവുന്നത്)
ശാസ്ത്രക്ലാസ്

വീഡിയോ പ്രദര്‍ശനം
വിദ്യാഭ്യാസ പ്രദര്‍ശനം
ആഗസ്റ്റ് രണ്ടിന് സൂരന്‍ കണ്ണൂരിന് മുകളില്‍ എത്തുന്ന സമയം സൗരകേരളം പരിപാടി
ഐ എസ് ആര്‍ ഒയുടെ പ്രദര്‍ശനം
ശാസ്ത്രക്വിസ്
ശാസ്ത്രചിത്രരചന
ഉപന്യാസരചന
വാനനിരീക്ഷണ ക്യാമ്പുകള്‍
എല്ലാവരെയും കൂട്ടിയോജിപ്പിച്ചുളള പ്രവര്‍ത്തനമാണ് നടന്നത്
ഉപജില്ലാ സയന്‍സ് ക്ലബ്ബ്,
സാമൂഹികശാസ്ത്രക്ലബ്ബ്
എസ് എസ് എ എല്ലാവരും ഈ പരിപാടിയുടെ വിജയത്തിനായി അണിനിരന്നു

ഇത്തരം സാധ്യതകള്‍ എല്ലാ വിദ്യാഭ്യാസ ഓഫീസര്‍മാരും പ്രയോജനപ്പെടുത്തണം. അക്കാദമിക നേതാവായി മാറണം. എം എല്‍ എ മാര്‍ , തദ്ദേശസ്വയം ഭരണസംവിധാനങ്ങള്‍ എല്ലാം സന്നദ്ധമാണല്ലോ.
ആലപ്പുഴ ഡി ഇ ഒ
ശ്രീ കൃഷ്ണദാസ് പുതുവഴി വെട്ടുന്ന ഉദ്യോഗസ്ഥരില്‍ ഒരാളാണ്.
അമ്പലപ്പുഴ ഉപജില്ലാ ഓഫീസറായിരുന്ന കാലത്ത് എല്ലാ വിദ്യാലയങ്ങളിലും നടപ്പിലാക്കിയ ക്ലാസ്റൂം ലൈബ്രറി സംവിധാനം ഈ വര്‍ഷം കേരളം മാതൃകകയായി സ്വീകരിച്ചു.
മലയാളത്തിളക്കം പരിപാടി ചേര്‍ത്തല ഹൈസ്കൂളിലെ പത്താം ക്ലാസില്‍ പ്രയോഗിച്ചു നോക്കി. വിജയപ്രദമെന്നു ബോധ്യപ്പെട്ട അദ്ദേഹം ആലപ്പുഴ വിദ്യാഭ്യാസ ജില്ലയിലെ എല്ലാ വിദ്യാലയങ്ങളിലും എന്റെ മലയാളം ഭാഷാപരിപോഷണ പരിപാടിയായി വികസിപ്പിച്ച് നടപ്പിലാക്കി.
വളരെ ചിട്ടയായ പ്രവര്‍ത്തനമാണ് നടത്തിയത്. അധ്യാപകസംഘടനകളുടെ യോഗം വിളിച്ചു പിന്തുണ തേടി. ഹെഡ്മാസ്റ്റേഴ്സ് ഫോറത്തെ മുന്നില്‍ നിറുത്തി. അധ്യാപകരെ പ്രചേദിപ്പിച്ചു. വിദ്യാലയങ്ങള്‍ 
നിരന്തരം സന്ദര്‍ശിച്ചു. പ്രഥമാധ്യാപകയോഗങ്ങളില്‍ അധ്യാപകരുടെ അനുഭവങ്ങള്‍ നിരന്തരം പങ്കിട്ടു.എസ് സി ഇ ആര്‍ ടി, എസ് എസ് എ എന്നിവയുടെ സഹകരണം ഉറപ്പാക്കി.എസ് സി ഇ ആര്‍ ടി കുട്ടികള്‍ക്ക് വായനാസാമഗ്രികള്‍ നല്‍കി.ഇടക്കാല വിലയിരുത്തല്‍ നടത്തി. ഘട്ടം ഘട്ടമായിട്ടാണ് നടപ്പിലാക്കിയത്. ആദ്യം പതിനാറ് വിദ്യാലയങ്ങളിലെ പത്താം ക്ലാസ്. പിന്നീട് എല്ലാ വിദ്യാലയങ്ങളിലെയും പത്താം ക്ലാസ്. വിജയപൂര്‍ത്തീകരണത്തെ തുടര്‍ന്ന് എട്ട് ഒമ്പ്ത് ക്ലാസുകള്‍, പിന്നെ യു പി വിഭാഗം. മൂവായിരത്തി മുന്നൂറ് കുട്ടികളാണ് എണ്‍പത്താറ് വിദ്യാലയങ്ങളില്‍ ഉണ്ടായിരുന്നത്. അവരെയെല്ലാം വിജയലക്ഷ്യത്തിലെത്തിച്ചു. ഇന്നലെ അതിന്റെ പ്രഖ്യാപനമായിരുന്നു. രക്ഷിതാക്കളുടെയും കുട്ടികളുടെയും അധ്യാപകരുടെയും പ്രഥമാധ്യാപകരുടെോയും അനുഭഭവസാക്ഷ്യങ്ങള്‍ .
ഡി ഇ ഒ കൃഷ്ണദാസ് ഈ വര്‍ഷം പെന്‍ഷനാവുകയാണ്.
അതിനു മുമ്പ് ചില മാതൃകകള്‍ കൂടി സൃഷ്ടിക്കണമെന്ന് അദ്ദേഹത്തിന് ആഗ്രഹമുണ്ട്.
അതിന്റെ പ്രവര്‍ത്തനങ്ങള്‍ പുരോഗമിക്കുന്നു.
പൊതുവിദ്യാഭ്യാസ സംരക്ഷണയജ്ഞത്തിന് കരുത്താകുന്ന വിദ്യാഭ്യാസ ഓഫീസര്‍മാരില്‍ ഒരാളുമായി ചേര്‍ന്ന് പ്രവര്‍ത്തിക്കാനായത് വലിയൊരു സൗഭാഗ്യമായി ഞാന്‍ കരുതുന്നു

Friday, February 2, 2018

എന്റെ വരയും വരിയും (ചിത്രകലയും ഭാഷയും)


എന്റെ വരയും വരിയും യു പി ക്ലാസിലെ ചിത്രകലാപിരീഡില്‍ നടന്ന മാതൃകാപ്രവര്‍ത്തനമാണിത്. 
ഇത്ചിത്രപുസ്തകങ്ങള്‍. കുട്ടികളുടെ ഓമനസൃഷ്ടികള്‍. ഒന്നും രണ്ടുമല്ല അറുപത്തിനാലെണ്ണം .
ഡിസംബറിലാണ് പ്രവര്‍ത്തനം ആരംഭിച്ചത്. ലൈബ്രറികളില്‍ നിന്നും കടകളില്‍ നിന്നും പുസ്തകങ്ങള്‍ എടുക്കുമ്പോള്‍ ചിത്രങ്ങള്‍ കൂടുതലുളളവയോട് കുട്ടികള്‍ കൂടുതല്‍ താല്പര്യം കാണിക്കുന്നു. എന്തുകൊണ്ട് നമ്മള്‍ക്ക് തന്നെ ഇത്തരം പുസ്തകം തയ്യാറാക്കിക്കൂടാ എന്ന ചോദ്യമാണ് അധ്യാപകനായ ജോഷി ഉയര്‍ത്തിയത്. കുട്ടികള്‍ക്ക് ആ ആശയം നന്നേ പിടിച്ചു. ഞങ്ങള്‍ റെഡി. ഞാനും റെഡി.
എങ്ങനെ തുടങ്ങും?
ചര്‍ച്ചയില്‍ രൂപപ്പെട്ട കാര്യങ്ങള്‍
  • ഡിങ്കന്‍, മങ്കൂസ് , മായാവി തുടങ്ങിയ രീതിയിലുളള കഥകള്‍ എഴുതേണ്ടതില്ല
  • ചുറ്റുപാടുമുളള സാധാരണക്കാരെയും ജീവികളെയും സംഭവങ്ങളെയും മനസില്‍ കൊണ്ടുവരണം
  • ചെറിയ കഥകള്‍ മതി
  • എളുപ്പത്തില്‍ വായിക്കാവുന്നത്
  • ഒരു പേജില്‍ ഒന്നോ രണ്ടോ വാക്യങ്ങളും ചിത്രവും
  • ക്രയോണ്‍സ് ഉപയോഗിച്ചാവണം നിറം നല്‍കേണ്ടത്. ( വേഗം പൂര്‍ത്തീകരിക്കാം. ഉണങ്ങാനായി കാത്തു നില്‍ക്കേണ്ട)
  • വരയ്കാനറിയാവുന്നവര്‍ വരയ്കുക. എല്ലാ എഴുത്തുകാരും വരയ്കണമെന്നില്ല. പരസ്പരം സഹായിക്കണം.
  • പുസ്തകത്തിന്റെ സൈസ് ചതുരാകൃതിയിലായിരിക്കും. പുതുമ വേണം
  • ഗ്രൂപ്പടിസ്ഥാനത്തിലും എഴുതാം
  • എല്ലാവരും പങ്കാളികളാകണം
  • തെരഞ്ഞെടുത്തവ അച്ചടിക്കണം
പ്രവര്‍ത്തനത്തിന് ദിശാബോധം നല്‍കുന്നതിനായി അധ്യാപകന്‍ കുറേ പുസ്തകങ്ങള്‍ പരിചയപ്പെടുത്തി. കെട്ടിലും മട്ടിലും വ്യത്യസ്തത പുലര്‍ത്തുന്നവ.
ആദ്യം വരികള്‍ പിന്നെ വര
ചിത്രീകരണ ശില്പശാല നടത്തി.
ചിത്രങ്ങള്‍ പിറന്നപ്പോള്‍ കഥ വീണ്ടും കുറുകി. ചിത്രത്തിലുളളത് വരികളായി വേണ്ടല്ലോ. സംസാരിക്കുന്ന ചിത്രങ്ങളായി പലതും.
കുട്ടികളുടെ വരകള്‍ കൗതുകമുളളത് തന്നെ
വരികളും
കലാപഠനത്തെ ഭാഷാപഠനമാക്കുന്നതിങ്ങനെയാണ്
അല്ലെങ്കില്‍ ഭാഷാപഠനത്തെ കലാപഠനമാക്കുന്നതിങ്ങനെയാണ്
ഇത്തരം സാധ്യതകളാണ് നാം പ്രയോജനപ്പെടുത്തേണ്ടത്
ഒരു വലിയ ആവിഷ്കാരസന്ദര്‍ഭത്തിനു വേണ്ടി ഏറ്റെടുക്കുന്ന പ്രോജക്ടാവണം കലാപ്രവര്‍ത്തനം.
കുട്ടികള്‍ തയ്യാറാക്കിയ ഡമ്മിപേജുകളാണ് ചുവടെ. അത് മനസിനു പിടിച്ചാല്‍ അടുത്തപടവിലേക്ക് പോകാം.
 എന്താണ് ഇത്തരം പ്രവര്‍ത്തനങ്ങളുടെ ഗുണം?
കുട്ടികള്‍ ചിത്രകലയെ സ്നേഹിക്കും. ചിത്രരചനാരീതികള്‍ പരിചയപ്പെടാന്‍ താല്പര്യം പ്രകടിപ്പിക്കും. ജിവിതകാലം മുഴുവന്‍ ഈ തുടക്കം മനസില്‍ കൊണ്ടു നടക്കും. ആവിഷ്കാരത്തിന്റെ പുതിയതലങ്ങള്‍ അന്വേഷിക്കും. ലേ ഔട്ട് എങ്ങനെയെന്നു നിരന്തരം നിരീക്ഷിക്കും. ആ കഴിവും വളര്‍ത്തും
 ഭാഷാപരമായ നേട്ടം വലുതാണ്. സര്‍ഗാത്മക രചനകളിലേക്ക് മനസ് തിരിയും. കൂടുതല്‍ വായന നടക്കും. ഭാഷാപരമായ എഡിറ്റിംഗ് ശേഷി വികസിപ്പിക്കും.രചനകളുടെ വിശകലനവും നടക്കും. ഭാഷാപഠനം താല്പര്യമുളള സര്‍ഗാത്മകപ്രവര്‍ത്തനമേഖലയായി മാറും
 പുസ്തകങ്ങളിലേക്ക് നിങ്ങളെ ഈ പരസ്യവാക്യങ്ങള്‍ ക്ഷണിക്കുന്നില്ലേ? അതും പ്രധാനമാണ് എങ്ങനെ പുസ്തകക്ഷണക്കുറിപ്പ് തയ്യാറാക്കാം എന്നതും. അതും കുട്ടികള്‍ ചെയ്യട്ടെ


Sunday, January 28, 2018

അക്കാദമിക മാസ്റ്റര്‍ പ്ലാന്‍ സമര്‍പ്പണം എന്തിന്? എങ്ങനെ?


2018ജനുവരി മാസം വിദ്യാലയങ്ങളെല്ലാം അക്കാദമിക നിലവാരം ഉയര്‍ത്തുന്നതിനുളള
പ്രവര്‍ത്തനപദ്ധതികളെക്കുറിച്ചുളള ആലോചനയിലായിരുന്നു. വിദ്യാലയങ്ങളും അധ്യാപകരും തമ്മില്‍ വലിയതോതിലുളള കൊടുക്കല്‍ വാങ്ങലുകള്‍ നടന്നു. സജീവമായ നവമാധ്യമചര്‍ച്ചകള്‍ നടന്നു. കേരളത്തിലെ വിദ്യാലയങ്ങളില്‍ ഇതിനുമുമ്പ് ഇത്രവിപുലമായ ആലോചന നടന്നിട്ടുണ്ടോ എന്നു സംശയമാണ്. സൂക്ഷ്മതല ആസൂത്രണത്തിന്റെ രീതിശാസ്ത്രം ഓരോ വിദ്യാലയവും വികസിപ്പിക്കുകയായിരുന്നു.
ആസൂത്രണരീതി തിരിച്ചിടുന്നു
ഇതുവരെ മുകളില്‍ നിന്നും നിര്‍ദേശിക്കുന്ന പ്രവര്‍ത്തനങ്ങള്‍ ചെയ്തു ശീലിച്ചവയാണ് ബഹുഭൂരിപക്ഷം വിദ്യാലയങ്ങളും. ഇനിയും താഴെതലത്തില്‍ അവരവര്‍ ആസൂത്രണം ചെയ്യുന്നവ നടപ്പിലാക്കാന്‍ പോവുകയാണ്. ഒരു സ്വച്ചിട്ടാല്‍ പ്രവര്‍ത്തിക്കുന്ന നൂറുകണക്കിന് യന്ത്രങ്ങളെക്കുറിച്ച് ആലോചിക്കുക. ആ സ്വിച്ച് പ്രവര്‍ത്തനക്ഷമമല്ലാതാകുന്നതോടെ എല്ലാ യാന്ത്രങ്ങളും ഒറ്റയടിക്ക് നില്‍ക്കും. നിശ്ചലമാകും. അതേ സമയം ഓരോ യന്ത്രത്തിനും ഓരോ സ്വിച്ചാണെങ്കിലോ? ഒരു കേന്ദ്രത്തിലെ മരവിപ്പ് ബാധിക്കില്ല. കേന്ദ്രീകൃതരീതി മുകളിലേക്ക് നോക്കിയിരിക്കുന്നവരെ സൃഷ്ടിക്കും. പറയുന്നത് മാത്രം ചെയ്യുക എന്ന ശീലം പോഷിപ്പിക്കും. ഓരോ വിദ്യാലയത്തിന്റെയും സര്‍ഗാത്മകതയെ മാനിക്കില്ല. അതിനെല്ലാം പരിഹാരമാവുകയാണ്. ഇനി നിലവാരമുയര്‍ത്താനുളള പരിപാടികള്‍ എപ്പോള്‍ ആരംഭിക്കണം എന്നതിന് ഉത്തരവും പ്രതീക്ഷിച്ചിരിക്കേണ്ട കാര്യമില്ല. അക്കാദമികസ്വാതന്ത്ര്യം സര്‍ഗാത്മകാന്വേഷണത്തിനുളള മുന്നുപാധിയാണ്.
പരസ്പരപൂരകത്വം
അക്കാദമിക മാസ്റ്റര്‍ പ്ലാന്‍ ബി ആര്‍ സികള്‍ക്കും ഡയറ്റുകള്‍ക്കും സംസ്ഥാനതല ഏജന്‍സികള്‍ക്കും പുതിയ ഉത്തരവാദിത്വം നല്‍കുന്നുണ്ട്. അതില്‍ പ്രധാനം സ്കൂള്‍ അക്കാദമിക മാസ്റ്റര്‍ പ്ലാനിലുളളത് നടപ്പിലാക്കാന്‍ സാവകാശം കൊടുക്കാത്ത വിധം പരിപാടികള്‍ നിര്‍ദേശിക്കാതിരിക്കലാണ്. മറ്റൊന്ന് പരിധിയില്‍ വരുന്ന അക്കാദമിക മാസ്റ്റര്‍ പ്ലാനുകള്‍ വിശകലനം ചെയ്ത് അതനുസരിച്ച് ബി ആര്‍ സി , ഡയറ്റ് പ്ലാനുകള്‍ രൂപപ്പെടുത്തുക എന്നതാണ്. അക്കാദമിക രംഗത്ത് പരസ്പരപൂരകത്വം ഉണ്ടാവണം . വിദ്യാലയങ്ങളെ പ്രവര്‍ത്തനപരിപാടികളുടെ സ്വീകര്‍ത്താക്കളായി മാത്രം കാണരുത്. അവര്‍ ഉല്പാദകരും മാതൃകസൃഷ്ടിക്കുന്നവരുമാണ്. അത്തരം പ്രവര്‍ത്തനസംസ്കാരത്തെ എങ്ങനെ ഫെസിലിറ്റേറ്റ് ചെയ്യാമെന്നതാകാണം അക്കാദമിക സ്ഥാപനങ്ങളുടെ അജണ്ട. എസ് എസ് എ പോലുളള സംവിധാനങ്ങളും പുതിയസാഹചര്യത്തിന് അനുസരിച്ച് മാറേണ്ടതുണ്ട്. അത്തരം ചര്‍ച്ചകള്‍ ആരംഭിക്കാനിനി വൈകിക്കൂടാ.
അക്കാദമികമാസ്ററര്‍ പ്ലാന്‍ സമര്‍പ്പണം
ഫെബ്രുവരി ഒന്നിനാണ് സമര്‍പ്പണം. സാമൂഹികചര്‍ച്ചയ്കായി സമര്‍പ്പിക്കണമെന്നാണ് ഉത്തരവില്‍ നിര്‍ദേശിച്ചിട്ടുളളത്. കേരളത്തിലെ എല്ലാ വിദ്യാലയങ്ങളും ഈ സമര്‍പ്പണച്ചടങ്ങ് ഗംഭീരമാക്കിയാല്‍ അത് സമൂഹത്തിലാകെ ചര്‍ച്ചാവിഷയമാകും. പൊതുവിദ്യാലയങ്ങളുടെ അക്കാദമിക ജാഗ്രത പൊതുസമൂഹത്തിനു കൂടുതല്‍ ബോധ്യപ്പെടും. വരും വര്‍ഷങ്ങളില്‍ പൊതുവിദ്യാഭ്യാസ രംഗത്തേക്ക് കൂടുതല്‍ കുട്ടികള്‍ പ്രവേശിക്കപ്പെടണം. ജനാധിപത്യ മതനിരപേക്ഷ സമൂഹത്തിന് അതാവശ്യമാണ്. ഒപ്പം ഉയര്‍ന്ന നിലവാരത്തിനായുളള തീവ്രശ്രമങ്ങളില്‍ സമൂഹത്തിന്റെ പിന്തുണയും പ്രോത്സാഹനവും വലിയതോതില്‍ വേണ്ടതുണ്ട്.
ആരുടെ മുമ്പാകെ സമര്‍പ്പിക്കണം?
വിദ്യാലയ വികസനസമിതി, പി ടി എ, പൂര്‍വവിദ്യാര്‍ഥികള്‍ ,തദ്ദേശസ്വയംഭരണ സ്ഥാപന പ്രതിനിധികള്‍, പൂര്‍വാധ്യാപകര്‍, പ്രാദേശിക വിദ്യാഭ്യാസ വിചക്ഷണര്‍, സാമൂഹിക സാംസ്കാരിക പ്രവര്‍ത്തകര്‍, വിദ്യാഭ്യാസ തല്പരരായ നാട്ടുകാര്‍ തുടങ്ങിയവരുടെ മുമ്പാകെയാണ് അവതരിപ്പിക്കേണ്ടത്.
ഇത്രയും വിഭാഗങ്ങളെ പങ്കെടുപ്പിക്കണമെങ്കില്‍ വിദ്യാലയത്തില്‍ മുന്നൊരുക്കം നടക്കേണ്ടതുണ്ട്
ക്ഷണിക്കേണ്ടവരുടെ ലിസ്റ്റു തയ്യാറാക്കണം
എങ്ങനെ ക്ഷണിക്കുമെന്നു തീരുമാനിക്കണം
ക്ഷണിക്കാന്‍ ചുമതലപ്പെടുത്തണം
എപ്പോള്‍ ക്ഷണിക്കുമെന്നും തീരുമാനിക്കണം.
സമര്‍പ്പണവേദി എവിടെയായിരിക്കണം?
എന്റെ വ്യക്തിപരമായ അഭിപ്രായം അത് സ്കൂളിനു പുറത്തുളള ഒരു വേദിയായിരിക്കണമെന്നാണ്. വിദ്യാലയത്തിലേക്ക് കൂടുതല്‍ പേരെ ആകര്‍ഷിക്കാന്‍ കൂടിയാണല്ലോ സമര്‍പ്പണം. എന്നും വിദ്യാലയത്തില്‍ വരുന്നവര്‍ മാത്രം കേട്ടാല്‍ പോരല്ലോ. വലിയബഹളങ്ങളൊന്നുമില്ലാത്ത തുറസ്സായ വേദികള്‍ കിട്ടുമെങ്കില്‍ അതാണ് ഉപിതം. ഉച്ചഭാഷിണി വേണ്ടിവരും. മറ്റു വേദികള്‍ കിട്ടുന്നില്ലെങ്കില്‍ വിദ്യാലയം തന്നെ ഉപയോഗിക്കേണ്ടി വന്നേക്കാം.
സമര്‍പ്പണരീതി എപ്രകാരമാകണം?
പൊതുവേദിയില്‍ വെച്ച് ഇങ്ങനെ നടക്കാന്‍ സാധ്യതയുണ്ട്- അക്കാദമിക മാസ്റ്റര്‍പ്ലാന്‍ സമര്‍പ്പണയോഗത്തിന്റെ ഉദ്ഘാടനം, ആശംസ, പ്രഥമാധ്യാപിക സമൂഹത്തിലെ പ്രധാനപ്പെട്ട ഒരു വ്യക്തിക്ക് അക്കാദമിക പ്ലാന്‍ കൈമാറല്‍ , അക്കാദമിക പ്ലാനിന്റെ പ്രസക്തിയെക്കുറിച്ച് ഒരാളുടെ വിശദീകരണം. ഇങ്ങനെ സാമ്പ്രദായിക രീതിയില്‍ ആലോചിക്കുന്നതിനു പകരം വ്യത്യസ്ത സാധ്യതകള്‍ ആലോചിക്കണം.
എന്തെല്ലാം സാധ്യതകള്‍?
  • അക്കാദമിക മാസ്റ്റര്‍ പ്ലാനിന്റെ ഊന്നല്‍ മേഖലകളും ലക്ഷ്യങ്ങളും പ്രധാന പ്രവര്‍ത്തനങ്ങളും അടങ്ങിയ സംക്ഷിപ്തം എല്ലാവര്‍ക്കും വിതരണം ചെയ്യല്‍ ( നൂറുകണക്കിനാളുകള്‍ക്ക് ഒരേ സമയം സമര്‍പ്പണം)
  • വിദ്യാലയം ലക്ഷ്യമിടുന്ന അക്കാദമിക പ്രവര്‍ത്തനങ്ങളും നേട്ടങ്ങളും ഐ സി ടി സാധ്യത ഉപയോഗിച്ച് അവതരിപ്പിക്കല്‍ ( തുടര്‍ന്ന് സമൂഹത്തിന്റെ വിവിധ മേഖലകളില്‍ പ്രവര്‍ത്തിക്കുന്നവര്‍ പ്രതീകാത്മകമായി ഏറ്റുവാങ്ങല്‍- കര്‍ഷകത്തൊഴിലാളികള്‍, കുടുംബശ്രീപ്രവര്‍ത്തകര്‍, സാംസ്കാരിക പ്രവര്‍ത്തകര്‍, സാമൂഹിക പ്രവര്‍ത്തകര്‍, യുവജനങ്ങള്‍, വനിതാക്കൂട്ടായ്മകള്‍, ജനപ്രതിനിധികള്‍.....സമൂഹത്തില്‍ അഭിപ്രായരൂപീകരണത്തെ സഹായിക്കുന്ന എല്ലാവരെയും ക്ഷണിക്കാം.)
  • മുന്‍കൂട്ടി ചുമതലപ്പെടുത്തിയ പ്രാദേശിക വിദഗ്ധര്‍, വിദ്യാഭ്യാസ പ്രവര്‍ത്തകര്‍ അക്കാദമിക മാസ്റ്റര്‍ പ്ലാനിലെ നിര്‍ദിഷ്ട മേഖല പരിചയപ്പെടുത്തി പ്രതികരിക്കല്‍
  • തീര്‍ച്ചയായും കുട്ടികളും അക്കാദമിക മാസ്റ്റര്‍ പ്ലാനിലെ ചില ഇനങ്ങള്‍ സമൂഹത്തിനു മുമ്പാകെ പരിചയപ്പെടുത്തണം. തങ്ങളുടെ വിദ്യാഭ്യാസം ഭാവിയില്‍ എങ്ങനെയായിരിക്കും ഈ വിദ്യാലയത്തില്‍ എന്നു രേഖയെ ആധാരമാക്കി കുഞ്ഞുവാക്യങ്ങളില്‍ അവതരിപ്പിക്കുന്നത് അക്കാദമിക മികവിന്റെ ലക്ഷണം കൂടിയാണ്. പൊതുചര്‍ച്ചകളിലും വേദികളിലും നിസങ്കോചം ആശയവിനിമയം നടത്തുന്ന കുട്ടികള്‍ ചര്‍ച്ചാഗ്രൂപ്പിനെ ഉത്തേജിപ്പിക്കും
  • വിശിഷ്ടാതിഥികളെല്ലാം അക്കാദമിക മാസ്റ്റര്‍ പ്ലാനിലെ ചുമതലപ്പെടുത്തിയ ഓര ഇനം പിരിചയപ്പെടുത്തല്‍
  • പ്രോഗ്രാം നടക്കുന്ന സ്ഥലത്ത് അക്കാദമിക മാസ്ററര്‍ പ്ലാനിലെ ഉളളടക്കം പോസ്റ്ററുകളിലായി ചിത്രീകരിച്ച് പ്രദര്‍ശിപ്പിക്കല്‍
  • അന്താരാഷ്ട്ര നിലവാരത്തിലേക്കുളള അക്കാദമിക പ്രവര്‍ത്തനസാധ്യതകളെക്കുറിച്ച് വിശദമാക്കി പൊതുസമൂഹത്തിന് സമര്‍പ്പിക്കുന്നതായി പ്രഖ്യാപിക്കല്‍
  • ................................................................
അക്കാദമിക മാസ്ററര്‍ പ്ലാനിനെക്കുറിച്ച് പൊതുസമൂഹത്തിന്റെ അഭിപ്രായം തേടല്‍ പ്രക്രിയകൂടിയാണിത്. അവരെങ്ങനെ അഭിപ്രായം പറയും?
വിദ്യാഭ്യാസ ഗ്രാമസഭസംഘടിപ്പിച്ച് സമര്‍പ്പണം നടത്താനാണ് ബാലഗ്രാമിലെ പ്രഥമാധ്യാപകനായ അഗസ്റ്റിന്‍ തീരുമാനിച്ചിട്ടുളളതെന്നു പറഞ്ഞു. ഗ്രാമസഭാഗ്രൂപ്പ് ചര്‍ച്ച പോലെ വിവിധ മേഖല തിരിച്ച് ചര്‍ച്ചയാകാം. മുന്‍‌കൂട്ടി നിശ്ചയിച്ച ഇനത്തില്‍ ചുമതലപ്പെടുത്തിയവരുടെ പൊതു ചര്‍ച്ചയാകാം. ചര്‍‌ച്ചാക്കുറിപ്പ് നല്‍കിയുളള പ്രതികരണശേഖരണവും ആകാം
ചര്‍ച്ചയില്‍ വരേണ്ട കാര്യങ്ങള്‍
  1. നിര്‍ദേശിച്ച പ്രവര്‍ത്തനം നിലവാരമുയര്‍ത്താന്‍ പര്യാപ്തമാണോ? സാധ്യതകള്‍
  2. മുന്‍ഗണനയില്‍ മാറ്റം വരുത്തേണ്ടതുണ്ടോ?
  3. കൂട്ടിച്ചേര്‍ക്കേണ്ടതായി എനിക്ക് നിര്‍ദേശിക്കാനുളളത്?
  4. ഒഴിവാക്കണമെന്നു്, ഭേദഗതി വരുത്തണമെന്നു തോന്നുന്നവ?
  5. നിര്‍വഹണതലം ശക്തമാക്കാനായി എന്തു ചെയ്യാനാകും?
  6. ഞാനുള്‍പ്പെടുന്ന സമൂഹത്തിന് എങ്ങനെ സഹായിക്കാനാകും?
ചര്‍ച്ച എപ്പോഴും പോസിറ്റീവാകണം. ഇത് ചര്‍ച്ചയില്‍ പങ്കെടുക്കുന്നവരോട് പറയണം. ക്രിയാത്മക നിര്‍ദേശങ്ങളാണ് പ്രതീക്ഷിക്കുന്നത്
യോഗത്തില്‍ പങ്കെടുക്കുന്നവരുടെ ദൗത്യം തീരുന്നില്ല. അക്കാദമിക മാസ്റ്റര്‌‍ പ്ലാനിന്റെ പ്രസക്തി, ലക്ഷ്യമിടുന്ന പ്രവര്‍ത്തനങ്ങള്‍, അതുവഴിയുണ്ടാകാന്‍ പോകുന്ന ഉയര്‍ന്ന നിലവാരം എന്നിവ സംബന്ധിച്ച് കിട്ടുന്ന അവസരങ്ങളിലെല്ലാം പരമാവധി ആളുകളുമായി ആശയവിനിമയം നടത്താന്‍ അവര്‍ തയ്യാറാണം.
തദ്ദേശസ്വയംഭരണസ്ഥാപനത്തിന് അക്കാദമിക മാസ്റ്റര്‍ പ്ലാനിനെ ആസ്പദമാക്കി ജനകീയ വിദ്യാഭ്യാസ സദസ്സ് സംഘടിപ്പിക്കാം. വിവിധ വിദ്യാലയങ്ങളിലെ ഉയര്‍ത്തിക്കാട്ടാവുന്ന പ്രവര്‍ത്തനപരിപാടികള്‍ പങ്കിടുന്നതിനുളള വേദി സൃഷ്ടിക്കാം. പൊതുവിദ്യാഭ്യാസത്തെക്കുറിച്ചുളള സജീവമായ ചര്‍ച്ചയുടെ അന്തരീക്ഷം സമൂഹത്തില്‍ നിലനിറുത്തണം
പ്രചരണം
  • പ്രധാനകവലകളില്‍ കൈയെഴുത്ത് പോസ്റ്റര്‍ ആകാം.
  • ഇപ്പോള്‍ പത്തോ പതിനഞ്ചോ എ ത്രി സൈസിലുളള പോസ്റ്റര്‍ പ്രിന്റെടുക്കാന്‍ വലിയ ചെലവില്ല. അത് പ്രാദേശിക കേന്ദ്രങ്ങളില്‍ ഒട്ടിക്കാം
  • അക്കാദമിക മാസ്റ്റര്‍ പ്ലാന്‍ സമര്‍പ്പണം വാര്‍ത്ത മാധ്യമങ്ങളില്‍ നല്‍കാം.
  • അധ്യാപകസംഘടനകളും വിദ്യാര്‍ഥി സംഘടനകളും പ്രചരണപരിപാടികള്‍ ഏറ്റെടുക്കണം.
  • സ്കൂള്‍ വാട്സ് ആപ്പ്, ഫേസ് ബുക്ക് കൂട്ടായ്മകളില്‍ പോസ്റ്റിടാം
  • ക്ഷണിക്കല്‍ തന്നെ പ്രചരണമാണല്ലോ
എന്തായാലും ആരും അറിയാത്ത രീതിയില്‍ ഈ ചരിത്രസംഭവത്തെ കാണരുത്.
അക്കാദമിക മാസ്റ്റര്‍ പ്ലാന്‍‌ പ്രയോഗപഥത്തിലേക്ക്
തയ്യാറാക്കിയ അക്കാദമിക മാസ്റ്റര്‍ പ്ലാന്‍ നടപ്പിലാക്കുന്നതിന് ഉത്തരവ് വന്നില്ലല്ലോ? വിദ്യാഭ്യാസ ഓഫീസര്‍ പറഞ്ഞില്ലല്ലോ? എന്നൊന്നും കാത്തിരിക്കരുതേ? ഫെബ്രുവരി, മാര്‍ച്ച് മാസങ്ങളില്‍ അക്കാദമിക മാസ്റ്റര്‍ പ്ലാന്‍ പ്രകാരണുളള പ്രവര്‍ത്തനങ്ങളുടെ ഉദ്ഘാടനം നടക്കണം. ഏറ്റവും വേഗത്തില്‍ സാക്ഷാത്കരിക്കാവുന്നവയാണ് തെരഞ്ഞെടുക്കേണ്ടത്. ശാസ്ത്രലൈബ്രറിയുടെ പ്രവര്‍ത്തനോദ്ഘാടനം അല്ലെങ്കില്‍ ഇ പോര്‍ട്ട്ഫോളിയോ ആരംഭിക്കല്‍, ടാലന്റ നിര്‍ണയം എന്നിങ്ങനെ എന്തുമാകാം. ഓരോ മാസവും ആരംഭിക്കുന്ന പ്രവര്‍ത്തനങ്ങളുടെ നിര്‍വഹണകലണ്ടര്‍ തയ്യാറാക്കുകയും വേണം. എന്തെല്ലാം പ്രവര്‍ത്തനങ്ങളാണ് ഉടന്‍ ആരംഭിക്കുക എന്ന് അക്കാദമിക മാസ്റ്റര്‍ പ്ലാന്‍ സമര്‍പ്പണ വേദിയില്‍ വെച്ച് പ്രഖ്യാപിക്കുന്നത് ഇത് നടപ്പിലാക്കാന്‍ പോകുന്ന പദ്ധതിയാണ് എന്ന ധാരണ പകരാന്‍ സഹായിക്കും.
ഓരോ പ്രവര്‍ത്തനവും ആരംഭിച്ചാല്‍ അതിന് ചുമതലക്കാരുണ്ടാകണം. അവര്‍ അതിന്റെ പൂര്‍ത്തീകരണം വരെ യുളള സൂക്ഷ്മപ്രവര്‍ത്തനങ്ങളിലോരൊന്നും എപ്പോള്‍ എങ്ങനെ ഏതു ഗുണനിലവാരത്തില്‍ നടത്തണമെന്ന് ആസൂത്രണം ചെയ്യണം. എല്ലാ കാര്യങ്ങളും പ്രഥമാധ്യാപിക തീരുമാനിക്കട്ടെ എന്നു വിചാരിക്കരുത്. ഹയര്‍ സെക്കണ്ടറി വരെയുളള വിദ്യാലയങ്ങളില്‍ വിഷയാടിസ്ഥാന അക്കാദമിക ഗ്രൂപ്പുകള്‍ പ്രവര്‍ത്തിക്കുന്നതിന്റെ സാധ്യത ആലോചിക്കണം. പരീക്ഷ വരുന്നു അതിനാല്‍ അടുത്ത വര്‍ഷം മതി പ്രവര്‍ത്തനങ്ങള്‍ എന്നു തീരുമാനിക്കേണ്ടതില്ല. ചിലത് ആരംഭിക്കാം. അവധിക്കാലത്തും പ്രവര്‍ത്തനങ്ങളാകാം. അതത് വിദ്യാലയമാണ് തീരുമാനിക്കേണ്ടത്.
വിദ്യാഭ്യാസ വകുപ്പ് ചെയ്യേണ്ടത്
അയവില്ലാത്ത നിര്‍ദേശങ്ങളും അധികഭാരമുളവാക്കുന്ന വിവരശേഖരഫോറങ്ങളും നല്‍കരുത്. പട്ടാളച്ചിട്ടയും അക്കാദമികച്ചിട്ടയും രണ്ടാണ്. ഓരോ മാസവും വിദ്യാലയങ്ങള്‍ ആരംഭിച്ച അക്കാദമിക പ്രവര്‍ത്തനങ്ങള്‍ അപ് ലോഡ് ചെയ്യുന്നതിന് ഓണ്‍ലൈന്‍ സംവിധാനമുണ്ടാക്കണം. അക്കാദമിക മാസ്റ്റര്‍ പ്ലാനിലെ മികച്ച നിര്‍വഹണാനുഭവങ്ങള്‍ പങ്കിടാനും ഈ സംവിധാനത്തിലൂടെ കഴിയണം. ഹൈടെക് മോണിറ്ററിംഗ് തന്നെ. അതിലൂടെ ആശയങ്ങളുടെ പങ്കിടല്‍ കൂടി നടക്കുമല്ലോ.
പ്രഥമാധ്യാപകയോഗങ്ങളില്‍ മുഖ്യ അജണ്ടയാകണം മാസ്റ്റര്‍ പ്ലാന്‍ പ്രകാരമുളള അക്കാദമികാനുഭവങ്ങളുടെ പങ്കിടല്‍. മുന്‍കൂട്ടി ചുമതലപ്പെടുത്തി ഇത് നടത്താം. ഐ സി ടി ഉപയോഗിച്ചുളള അവതരണങ്ങള്‍ ഡോക്യുമെന്റേഷന്‍ കൂടിയാണ്. അവയില്‍ നിന്നും തെരഞ്ഞെടുത്തത് ജില്ലാ സംസ്ഥാനയോഗങ്ങളില്‍ അവതരിപ്പിക്കാം.
അക്കാദമിക മാസ്റ്റര്‍ പ്ലാന്‍ പുതുക്കല്‍
തയ്യാറാക്കിയ മാസ്റ്റര്‍പ്ലാനില്‍ ഇനിയും കൂട്ടിച്ചേര്‍ക്കലുകള്‍ വരുത്താം. നിര്‍വഹണാനുഭവങ്ങളുടെയും ഇതര വിദ്യാലയങ്ങളില്‍ നിന്നും ലഭിച്ച വിജയാനുഭവങ്ങളുടെയും അടിസ്ഥാനത്തിലാകണം അത്. അന്വേഷണങ്ങളുടെ സംസ്കാരം പുതിയ ആശയങ്ങള്‍ നല്‍കും. അനുബന്ധമെന്നവണ്ണം അവ ഉള്‍പ്പെടുത്താം.
മുന്നൊരുക്കം
ഇനി അധിക ദിവസമില്ല എന്നറിയാം
അടുത്ത ദിവസം എസ് ആര്‍ജി കൂടണം. രണ്ടുദിവസം കൊണ്ട് സാധ്യമാക്കാവുന്ന ഉയര്‍ന്ന സംഘാടനരീതി ആലോചിക്കണം. ചുമതലകള്‍ നിശ്ചയിക്കണം
നേരത്തെ ആലോചന നടത്തിയ ധാരാളം വിദ്യാലയങ്ങളുണ്ട്. ഇനിയും ആലോചന നടത്താനായി സമയം കിട്ടാത്ത വിദ്യാലയങ്ങളുമുണ്ട്. ഇനിയുളള സമയത്തെ എങ്ങനെ ഫലപ്രദമായി ഉപയോഗിക്കാം എന്നു തീരുമാനിക്കൂ.
വിദ്യാഭ്യാസ ഓഫീസര്‍മാര്‍ക്ക് സമര്‍പ്പിക്കാനുളള ഒരു രേഖയല്ല അക്കാദമിക മാസ്റ്റര്‍ പ്ലാന്‍.
കേരളത്തിലെ ഓരോ വിദ്യാലയവും അക്കാദമികസമര്‍പ്പണചിന്തയോടെ പൊതുവിദ്യാഭ്യാസത്തെ അതത് പ്രദേശത്ത് ശക്തിപ്പെടുത്തുന്നതിനുളള കര്‍മപരിപാടികളുടെ ചൈതന്യരേഖയാണത്. അത് പ്രയോഗത്തിലേക്ക് ഏറ്റെടുക്കലാണ് സമര്‍പ്പണം.




Wednesday, January 24, 2018

ചിത്രകലാവിദ്യാഭ്യാസത്തിന് ഇങ്ങനെയും സാധ്യത


വളരെ ലളിതമായാണ് കാര്യങ്ങള്‍ പുരോഗമിച്ചത്. ഒരു മെഗാസന്ദര്‍ഭത്തെ ലക്ഷ്യമിട്ട് എല്ലാ കുട്ടികളേയും ചിത്രകലാവിദ്യാഭ്യാസത്തിലേക്ക് കൊണ്ടുവരികയായിരുന്നു. ഗവ ഹയര്‍സെക്കണ്ടറി സ്കൂള്‍ കല്ലില്‍
മേതലയിലാണ് വര്‍ണോത്സവം ചിത്രപ്രദര്‍ശനം നടന്നത്.
ഓണപ്പരീക്ഷയ്ക് മുമ്പായി കുട്ടികള്‍ക്ക് അറിയിപ്പ് ലഭിച്ചു വിദ്യാലയത്തില്‍ ചിത്രപ്രദര്‍ശനം നടത്തുന്നു.
  1. പാഠഭാഗങ്ങളുമായി ബന്ധപ്പെട്ടവയാകണം ചിത്രങ്ങള്‍
  2. പാഠഭാഗത്തിലുളള ചിത്രം അതേ പോലെ വരയ്കാന്‍ പാടില്ല
  3. ഡിസംബര്‍ പതിനഞ്ചുവരെ സമയം ലഭിക്കും
  4. പെന്‍സില്‍, ഓയില്‍ പെയിന്റ്, വാട്ടര്‍ കളര്‍‌, ഫേബ്രിക് കളര്‍, പോസ്ററര്‍ കളര്‍, ക്രയോണ്‍സ്, അക്രലിക് തുടങ്ങിയ ഏതു മാധ്യമവും ഉപയോഗിക്കാം
  5. എല്‍ പി തലം മുതലുളള കുട്ടികള്‍ക്ക് പങ്കെടുക്കാം.
  6. ഓരോന്നും ഉപയോഗിക്കാന്‍ താല്പര്യമുളള കുട്ടികളുടെ ഗ്രൂപ്പുകളുണ്ടാക്കി അതിന്റെ ഉപയോഗരീതിയില്‍ പരിശീലനം നല്‍കും.
  7. മൗണ്ട് ചെയ്യുന്ന രീതി ബ്ലാക്ക് പേപ്പര്‍ ഫ്രെയിമിംഗ് , കട്ട് ചെയ്യുന്ന രീതി , ഒട്ടിക്കല്‍ തുടങ്ങിയവയില്‍ പരിശീലനം
  8. എ ഫോര്‍, എ ത്രി പേപ്പറിലാണ് വരയ്കേണ്ടത്
കുട്ടികള്‍ ആവേശത്തോടെ പങ്കെടുത്തു
ലഭിച്ചവയില്‍ നിന്നും പ്രദര്‍ശനയോഗ്യമായ മുന്നൂറ്റിയമ്പത് ചിത്രങ്ങള്‍ തെരഞ്ഞെടുത്തു
ജനുവരി ഒന്നിന് വര്‍ണോത്സവം എന്ന പേരില്‍ ചിത്രപ്രദര്‍ശനം വിദ്യാലയത്തില്‍ നടന്നു.
കേരള ലളിതകലാ അക്കാദമി, കേരള കാര്‍ട്ടൂണ്‍ അക്കാദമി എന്നിവയുടെ സംസ്ഥാനതല പുരസ്കാരങ്ങള്‍ നേടിയ ശ്രീ രാജേന്ദ്രനാണ് കലാവിദ്യാഭ്യാസത്തിന്റെ വേറിട്ട വിദ്യാലയാനുഭവം സൃഷ്ടിച്ചത്. അദ്ദേഹം എസ് എസ് എയില്‍ ഇപ്പോള്‍ പ്രവര്‍ത്തിക്കുന്നു.
പ്രവര്‍ത്തനത്തിനെക്കുറിച്ചുളള എന്റെ വിലയിരുത്തല്‍
  1. ചിത്രകലാവിദ്യാഭ്യാസം വിവിധ വിഷയപഠനവുമായി ബന്ധിപ്പിക്കാനാണ് ഇവിടെ ശ്രമിച്ചത്. ചിത്രീകരിക്കണമെങ്കില്‍ കുട്ടികള്‍ ആ പാഠം സ്വാംശീകരിക്കണം. അത് പഠനത്തെ ബലപ്പെടുത്തും
  2. കുട്ടികള്‍ വരച്ച ചിത്രങ്ങള്‍ ആസ്വദിക്കുമ്പോഴും വിവിധ വിഷയങ്ങള്‍ കടന്നു വരും. പാഠസന്ദര്‍ഭങ്ങള്‍ ഓര്‍മയില്‍ വരും
  3. ചിത്രരചനയുടെ സാങ്കേതിക കാര്യങ്ങള്‍ നിശ്ചിത കാലയളവിനുളളില്‍ പകരാനായി
  4. ആരൊക്കെയാണ് ഈ രംഗത്തെ പ്രതിഭകള്‍ എന്നു കണ്ടെത്താനായി
  5. ചിത്രകല വിദ്യാലയത്തിന്റെ മുഖ്യ അജണ്ടയായി മാറി
  6. കുട്ടികളില്‍ താല്പര്യം വര്‍ധിച്ചു
  7. ചിത്രപ്രദര്‍ശന രീതി പരിചയപ്പെടുത്തി
പുതിയസാധ്യതകള്‍ തുറന്നിടുകയാണ് കലാധ്യാപകര്‍. അക്കാദമിക മാസ്റ്റര്‍ പ്ലാന്‍ തയ്യാറാക്കുമ്പോള്‍ പ്രായോഗികമായ ഇത്തരം രീതികള്‍ കൂടി ആലോചിക്കണം.
എസ് എസ് എയിലെ കലാധ്യാപകര്‍ ഒത്തിരി പ്രതീക്ഷ നല്‍കുന്നു