ക്ലാസ്: ഒന്ന്
യൂണിറ്റ്: 4
പാഠത്തിൻ്റെ പേര്: പിറന്നാള്‍ സമ്മാനം
ടീച്ചറുടെ പേര്: ഷൈലു. ഇ. പി
ജി എൽ പി എസ് പുറക്കൽ പാറക്കാട്
പന്തലായനി ബി ആർ സി,
കോഴിക്കോട്.
കുട്ടികളുടെ എണ്ണം:.......
ഹാജരായവർ: .......
തീയതി: ..…../ 2025
പിരീഡ് ഒന്ന് |
പ്രവർത്തനം1- സംയുക്ത ഡയറി, കഥാവേള, വായനക്കൂടാരം, വായനപാഠം
പഠനലക്ഷ്യങ്ങൾ:
കഥാവേളകളിൽ ചെറു സദസ്സിനു മുമ്പാകെ കഥ ഭാവാത്മകമായി പറയുന്നു.
കേട്ടതോ വായിച്ചതോ ആയ കഥകൾ ആശയച്ചോർച്ചയില്ലാതെയും ഭാവം ഉൾക്കൊണ്ടും സ്വന്തം ഭാഷയിൽ അവതരിപ്പിക്കുന്നു .
കൂട്ടുകാർ വരച്ച ചിത്രങ്ങളിലെ സവിശേഷതകൾ കണ്ടെത്തി വിലയിരുത്തലുകൾ പങ്കിടുന്നു .
പരിചിതാക്ഷരങ്ങളുളള ലഘുവാക്യങ്ങള്‍, പദങ്ങള്‍ എന്നിവ ഒറ്റയ്കും സഹായത്തോടെയും വായിക്കുന്നു
പ്രതീക്ഷിത സമയം 40 മിനുട്ട്
കരുതേണ്ട സാമഗ്രികൾ കഥാപുസ്തകങ്ങൾ , വായനപാഠങ്ങൾ ,
പ്രക്രിയാവിശദാംശങ്ങൾ
സംയുക്ത ഡയറി പങ്കിടൽ 15 മിനുട്ട്
*ടീച്ചർ എഴുതിയ ഡയറി വായിക്കുന്നു. ചിത്രവും കാണിക്കുന്നു
*ക്രമനമ്പർ പ്രകാരം മൂന്നുപേരുടെ സംയുക്ത ഡയറി വാങ്ങി ടീച്ചർ വായിക്കുന്നു. അവർ വരച്ച ചിത്രങ്ങൾ എല്ലാവരെയും കാണിക്കുന്നു
*ഡയറിയിലെ സവിശേഷതകൾ ചൂണ്ടിക്കാട്ടി അഭിനന്ദിക്കുന്നു. ആ സവിശേഷതകൾ ഗുണാത്മകമായി ക്ലാസ് വാട്ട്സ്ആപ്പ് ഗ്രൂപ്പിൽ പങ്കിടുന്നു
ഹാജരായ എല്ലാ കുട്ടികളും ഡയറി എഴുതി എന്ന് ഉറപ്പാക്കൽ.
പഠനക്കൂട്ടങ്ങളുടെ പിന്തുണയോടെ പ്രത്യേകസമയത്ത് ഡയറി എഴുതിക്കല്‍
ഡയറികള്‍ വിലയിരുത്തല്‍
മറ്റുള്ളവരുടെ ഡയറിക്കുറിപ്പുകൾ ഉച്ചനേരം വായിച്ച് അംഗീകാരമുദ്ര നൽകൽ.
ശ്രദ്ധേയമായ കാര്യങ്ങൾ പങ്കുവക്കുന്നു
വായനപാഠം വായിക്കൽ 15 മിനുട്ട്
കഴിഞ്ഞ ദിവസം നൽകിയ വായനപാഠം പഠനക്കൂട്ടങ്ങളിൽ വായിക്കൽ
ഒരാൾ ഒരു വരി വീതം ഓരോ പഠനക്കൂട്ടത്തിൽ നിന്നും പൊതുവായി വായിക്കൽ
ഇന്നലെ ഹാജരാകാത്ത കുട്ടികൾ ചാർട്ടിലെ വാക്യങ്ങൾ ഉപയോഗിച്ച് വായിക്കണം .
വായനക്കൂടാരത്തിലെ പുസ്തകവായന 10 മിനുട്ട്
വായനച്ചാർട്ടിൽ രേഖപ്പെടുത്തലുകൾ നടത്തുന്നു
കഥാവേളയിൽ ഇതുവരെ കഥ അവതരിപ്പിക്കാത്ത ഒരാള്‍ക്ക് അവസരം
പിരീഡ് രണ്ട് |
പ്രവർത്തനം റോൾപ്ലേ അരങ്ങനുഭവം
പഠന ലക്ഷ്യങ്ങൾ
കഥകളിലെ കഥാപാത്രങ്ങൾ തമ്മിലുള്ള സംഭാഷണങ്ങൾ സഹപാഠികളുമായി ചേർന്ന് റോൾപ്ലേയിലൂടെ സദസ്സിന് മുമ്പാകെ അവതരിപ്പിക്കുന്നു.
കൂട്ടായി ചെയ്യേണ്ട പ്രവർത്തനങ്ങളിൽ ചുമതലകൾ ഏറ്റെടുക്കുന്നു.
പ്രവർത്തനങ്ങൾ നടത്തുന്നതിന് ആവശ്യമായ നിയമങ്ങളും മാനദണ്ഡങ്ങളും കൂട്ടായി വികസിപ്പിക്കുന്നതിനും പാലിക്കുന്നതിനും കഴിയുന്നു
പ്രതീക്ഷിതസമയം 40 മിനുട്ട്
ആവശ്യമായ സാമഗ്രികൾ: താറാവ്, പട്ടിക്കുട്ടി, കോഴി എന്നിവയുടെ ചിത്രമുള്ളകിരീടങ്ങൾ /മാസ്ക് (ഒന്ന് വീതം മതിയാകും)
പ്രവർത്തന വിശദാംശങ്ങൾ
ഘട്ടം ഒന്ന് പശ്ചാത്തലമൊരുക്കല്‍ 5 മിനുട്ട്
ഇന്നലെ പറഞ്ഞ കഥാഭാഗം കുട്ടികളെക്കൊണ്ട് പങ്കിടിപ്പിക്കുന്നു
അമ്മുക്കിടാവിന്റെ പിറന്നാള്‍- സമ്മാനം കൊടുക്കണം.
"പൂക്കൾ മതിയോ?” ആട് ചോദിച്ചു,
"പഴങ്ങൾ മതിയോ?” പൂച്ച ചോദിച്ചു.
കോഴി നാരകത്തില്‍ ഒരു മുത്ത് കണ്ടു. വിവരം എല്ലാവരോടും പറഞ്ഞു. എല്ലാവരും മുത്ത് കാണാന്‍ പോയി.
താറാവ് മുത്ത് കണ്ടു
അതാ ആ മുത്ത് മതി.
അപ്പോള്‍ പട്ടി ചോദിച്ചു
എന്തിനാ മുത്ത്?
അമ്മുക്കിടാവിന് പിറന്നാള്‍ സമ്മാനം നല്‍കാനാ- കോഴി പറഞ്ഞു.
ആരൊക്കെയുണ്ട് കഥയില്‍? ആട്, പൂച്ച, താറാവ്, പട്ടി, കോഴി
ഈ രംഗം നമ്മള്‍ അഭിനയിക്കാന്‍ പോവുകയാണ്. പഠനക്കൂട്ടങ്ങളായി വേണം അവതരിപ്പിക്കാന്‍.
പാഠപുസ്തകം പേജ് 22,23ല്‍ ഉള്ള കാര്യമാണ് അവതരിപ്പിക്കുന്നത്.
പഠനക്കൂട്ടത്തില്‍ നടക്കേണ്ടത് സംബന്ധിച്ച നിര്‍ദ്ദേശങ്ങള്‍ അവതരിപ്പിക്കുന്നു
ഓരോരുത്തരും ഓരോ കഥാപാത്രമാകണം
ഒരാള്‍ അവതാരകയാകണം. അവതാരക പറയേണ്ടത്. അമ്മുക്കിടാവിന് ഒന്നാം പിറന്നാല്‍, സമ്മാനം കൊടുക്കണം. പാഠപുസ്തകത്തിലെ ഒന്നാം വരി വായിക്കണം. ( സമ്മാനം തേടി അവര്‍ നടന്നു)
തുടര്‍ന്ന് ഓരോ കഥാപാത്രം പറയുന്നതും പുസ്തകം നോക്കി ക്രമത്തില്‍ ഭാവത്തോടെ വായിക്കണം
പട്ടിക്കുട്ടി പറയുന്നത് എഴുതുകയും വേണം (എന്തിനാ മുത്ത്?)
ആട്, പൂച്ച ,പട്ടിക്കുട്ടി, താറാവ് കോഴി എന്നീ കഥാപാത്രങ്ങളുടെ ചിത്രങ്ങൾ ഒട്ടിച്ച കിരീടങ്ങൾ/മാസ്കുകൾ മേശപ്പുറത്ത് ഉണ്ട്. അവതരണ സമയത്ത് ഓരോ പഠനക്കൂട്ടത്തിനും ഉപയോഗിക്കാം.
ഘട്ടം രണ്ട് പഠനക്കൂട്ടങ്ങള്‍ റിഹേഴ്സല്‍ ചെയ്യുന്നു 10 മിനുട്ട്
ടീച്ചറുടെ പിന്തുണനടത്തം
പട്ടി പറഞ്ഞത് എല്ലാവരും പുസ്തകത്തില്‍ എഴുതിയോ?
എഴുത്തില്‍ പരസ്പരം സഹായിച്ചോ?
പുസ്തകത്തിലുള്ള സംഭാഷണ വാക്യങ്ങള്‍ ചുമതലപ്പെട്ടവര്‍ വായിച്ചത് ഭാവാത്മകമായാണോ?
വായനയില്‍ പരസ്പരം സഹായിച്ചോ?
കഥാപാത്രങ്ങള്‍ സംഭാഷണം നടത്തുന്നതിന്റെ സ്വാഭാവികത വരാന്‍ മ്യാവൂ, ക്വാക് ക്വാക്, ഭൗ ഭൗ എന്നിങ്ങനെ ശബ്ദാനുകരണം ആലോചിച്ചോ?
മരത്തില്‍ മുത്ത് ഉള്ള പ്രതീതിയില്‍ മുകളിലേക്ക് നോക്കണം എന്ന് ധാരണ ഉണ്ടായോ?
സദസ്സിന് അഭിമുഖീകരിച്ച് ആരൊക്കെ എങ്ങനെ നില്‍ക്കണം എന്ന് തീരുമാനമായോ?
അഭിനയത്തിന്റെ സാധ്യതകള്‍ കണ്ടെത്തിയിട്ടുണ്ടോ?
അവതാരക പറയുന്നത് റിഹേഴ്സല്‍ ചെയ്തോ?
ഘട്ടം മൂന്ന് അവതരണം എങ്ങനെ വിലയിരുത്തണം? ധാരണ രൂപീകരിക്കല്‍- 5 മിനുട്ട്
മറ്റു ഗ്രൂപ്പുകൾ ഓരോ ഗ്രൂപ്പിന്റെയും അവതരണത്തെ വിലയിരുത്തണം.
കുട്ടികളുടെ പങ്കാളിത്തത്തോടെ എന്തൊക്കെ വിലയിരുത്തണമെന്ന് ക്ലാസ്സിൽ ചർച്ച ചെയ്ത് തീരുമാനിക്കുന്നു.
വിലയിരുത്തൽ സൂചകങ്ങൾ
ശബ്ദം ( എല്ലാവരും കേള്‍ക്കത്തവിധം ഉച്ചത്തില്‍ പറഞ്ഞു)
സംഭാഷണ രീതി ( കഥാപാത്രത്തിന്റെ പ്രത്യേകത മനസ്സിലാക്കി)
അഭിനയം (ഭാവം, ശരീര ചലനങ്ങൾ)
പാഠപുസ്തകവാക്യങ്ങളുടെ ഭാവാത്മക വായന
ഘട്ടം നാല് അവതരണം 10 മിനുട്ട്
ഓരോ ഗ്രൂപ്പിലെയും അംഗങ്ങൾ കിരീടങ്ങൾ/ മാസ്ക് തലയിൽ വച്ച് അവരവർ തിരഞ്ഞെടുത്ത കഥാപാത്രങ്ങളുടെ സംഭാഷണം ഭാവാത്മകമായി അവതരിപ്പിക്കുന്നു
ഘട്ടം അഞ്ച് പരസ്പര വിലയിരുത്തല്‍ 10 മിനുട്ട്
ഓരോ സൂചകമെടുത്ത് ഓരോ ഗ്രൂപ്പിനെയും വിലയിരുത്തണം. അഭിനന്ദിക്കണം
ടീച്ചറുടെ ഫീഡ് ബാക്ക്
പ്രതീക്ഷിത ഉൽപ്പന്നം: കുട്ടികൾ രംഗാവിഷ്കാരം നടത്തിയതിന്റെ വീഡിയോ
വിലയിരുത്തൽ
അവതരണത്തിൽ എല്ലാവരുടെയും പങ്കാളിത്തം ഉണ്ടായിരുന്നോ?
ശാരീരിക വെല്ലുവിളികൾ നേരിടുന്ന കുട്ടികൾക്ക് പങ്കെടുക്കാൻ കഴിഞ്ഞുവോ?
പ്രോപ്പർട്ടികളുടെ ഉപയോഗം ഫലപ്രദമായിരുന്നുവോ
പിരീഡ് മൂന്ന് |
പ്രവർത്തനം:- നാരകത്തിലെ മുത്ത് (വായന)
പഠന ലക്ഷ്യങ്ങൾ
പരിചിതാക്ഷരങ്ങളുള്ള ലഘുവാക്യങ്ങൾ, പദങ്ങൾ എന്നിവ ഒറ്റയ്ക്കും സഹായത്തോടെയും വായിക്കുന്നു.
പ്രതീക്ഷിത സമയം- 40 മിനുട്ട്
പഠന സാമഗ്രികൾ:- കുഞ്ഞെഴുത്ത്
പ്രവർത്തന വിശദാംശങ്ങൾ
എല്ലാവരും കുഞ്ഞെഴുത്ത് പേജ് 25 എടുക്കുക
കണ്ടെത്തൽ വായന (വാക്യം) 10 മിനുട്ട്
1. നാരകത്തിൽ മുത്ത് കണ്ട താറാവ് പറഞ്ഞ വരി വായിക്കാമോ? വായിക്കാൻ കഴിയുന്നവർ കൈ ഉയർത്തൂ
2. താറാവ് മുത്ത് ആവശ്യപ്പെട്ടത് എങ്ങനെയെന്നുള്ള വരി വായിക്കാമോ? ( പഠനക്കൂട്ടം 1)
3. നായ ചോദിച്ചത് എന്താണെന്നുള്ള വരി വായിക്കാമോ? (പഠനക്കൂട്ടം 2)
4. അമ്മു കിടാവിനെ കുറിച്ച് പറയുന്ന വരി വായിക്കാമോ? (പഠനക്കൂട്ടം 3)
5. സമ്മാനത്തെ കുറിച്ച് പറയുന്ന വരി വായിക്കാമോ? (പഠനക്കൂട്ടം 4)
6. മുത്തിനെ കുറിച്ച് പറയുന്ന വരികൾ ഏതെല്ലാം? (പഠനക്കൂട്ടം 1)
7. തലക്കെട്ട് വായിക്കാമോ? (പഠനക്കൂട്ടം 2)
കണ്ടെത്തൽ വായന (വാക്ക്) 5മിനുട്ട്
1. മുത്ത് എന്ന വാക്ക് എത്ര പ്രാവശ്യം വന്നിട്ടുണ്ട്? കൈ വിരലിൽ കാണിക്കാമോ? (പഠനക്കൂട്ടം 3)
2. ആർക്കാണ് സമ്മാനം നൽകുന്നത്?തൊട്ടു വായിക്കാമോ? (പഠനക്കൂട്ടം 4)
3. അമ്മുക്കിടാവിന് നൽകുന്നത് എന്താണ് എന്ന വാക്ക് തൊട്ടു കാണിക്കാമോ? (പഠനക്കൂട്ടം 1)
കണ്ടെത്തൽ വായന (അക്ഷരം) 5 മിനുട്ട്
1. എ എന്ന അക്ഷരം എത്ര പ്രാവശ്യം ആവർത്തിക്കുന്നുണ്ട്? (പഠനക്കൂട്ടം 2)
2. മ്മ എന്ന അക്ഷരം എത്ര വാക്കിൽ വന്നിട്ടുണ്ട്? (പഠനക്കൂട്ടം 3)
ചങ്ങല വായന/ ഭാവാത്മക വായന 10 മിനുട്ട്
എല്ലാ പഠനക്കൂട്ടങ്ങള്‍ക്കും അവസരം
അവതരണത്തിനു മുൻപ് റിഹേഴ്സൽ ഗ്രൂപ്പുകളിൽ നടത്തണം. ഓരോരുത്തരും വായിക്കേണ്ട വരികൾ നിശ്ചയിക്കണം.
വിലയിരുത്തൽ
എല്ലാവർക്കും വായിക്കാൻ കഴിഞ്ഞോ?
കണ്ടെത്തൽ വായന ഫലപ്രദമായി നടത്താൻ കഴിഞ്ഞോ?
സഹായമില്ലാതെ വായിക്കാൻ എത്ര കുട്ടികൾക്ക് കഴിഞ്ഞു?.
എല്ലാവർക്കും ഭാവാത്മക വായന നടത്താൻ കഴിഞ്ഞോ?
പിരീഡ് നാല് |
പ്രവർത്തനം-: തത്തയെ നിർമ്മിക്കാം (പ്രവൃത്തി പരിചയം )
പഠന ലക്ഷ്യങ്ങൾ
സൂക്ഷ്മ പേശി വികസനത്തിന് സഹായകമായ രീതിയിൽ വിവിധ ആവശ്യങ്ങൾക്കായി കടലാസ്സുകൾ മടക്കുക, കീറുക, മുറിക്കുക, ഒട്ടിക്കുക എന്നിവ ചെയ്യുന്നു
പരിചയപ്പെട്ട കഥയുമായി ബന്ധപ്പെട്ട നിർമ്മാണ പ്രവർത്തനങ്ങളിൽ ഏർപ്പെടുന്നു.
പ്രതീക്ഷിത സമയം 30 മിനിറ്റ്
കരുതേണ്ട സാമഗ്രികൾ:
ഓരോ കുട്ടിക്കും പച്ചക്കടലാസിൽ വെട്ടിയെടുത്ത രണ്ടുവട്ടങ്ങൾ വീതം (ഒരു വലുതും ഒരു ചെറുതും ഒരു രൂപ നാണയത്തിന് വലിപ്പം വലിയ വട്ടത്തിന് ). ടീച്ചർക്ക് ചാർട്ടിൽ ഒട്ടിക്കാൻ വലിപ്പമുള്ള വട്ടങ്ങൾ
പ്രവർത്തന വിശദാംശങ്ങൾ
കഥാനുഭവം തുടരുന്നു
അതാ മുത്ത് എന്ന് താറാവ് പറഞ്ഞപ്പോൾ ഒരു തത്ത പറന്നു വന്ന് നാരകത്തിന്റെ കൊമ്പിലിരുന്നു. തത്ത നോക്കി. മുത്ത് കണ്ടില്ല. ചാഞ്ഞും ചരിഞ്ഞും നോക്കി. മുത്ത് കണ്ടില്ല. തത്ത താറാവിനോട് ചോദിച്ചു.
(പ്രതികരണങ്ങൾ )
എവിടെ മുത്ത്
സചിത്രപുസ്തകം എടുത്ത് തത്തയെ കണ്ടുപിടിക്കാമോ?
മൂത്ത് തേടി എന്ന തലക്കെട്ടുള്ള പേജിൽ നോക്കുന്നു. തത്തയുണ്ടോ?
ഇല്ല
നമ്മൾക്ക് തത്തയെ കൊമ്പിലിരുത്താം
പഠനോപകരണ പെട്ടിയിൽ നിന്ന് ഓരോരുത്തരും രണ്ട് വട്ടങ്ങൾ എടുക്കുക
ഒരു വലുതും ഒരു ചെറുതും
ടീച്ചർ വട്ടങ്ങൾ ഒട്ടിക്കുന്ന വിധം ചെയ്തു കാണിക്കുന്നു.
വലിയവട്ടം നേരെ പകുതിയായി മടക്കുക.ഇംഗ്ലീഷ് അക്ഷരം D ആകൃതിയിൽ കിട്ടും
മടക്കുഭാഗം മുകളിൽ വരത്തക്കവിധം പിടിക്കുക
അത് കൊമ്പിൽ നിന്നും അല്പം ഉയരത്തിലായി ചരിച്ച് വയ്ക്കുക. (മരത്തിന്റെ കൊമ്പ് ആരംഭിക്കുന്നിടത്ത് നിന്നും 45 ഡിഗ്രി ചരിച്ചാണ് വയ്ക്കേണ്ടത്)
D അക്ഷരാകൃതിയിൽ ഉള്ളതിന്റെ തല ഭാഗത്ത് ചെറിയ വട്ടം വയ്ക്കുക
ഇപ്പോൾ തത്തയുടെ ഉടലും തലയുമായി.
ഓരോ വട്ടവും അല്പം ഉയർത്തി അടിയിൽ ഒരു തുള്ളി പശ തേക്കുക. എന്നിട്ട് ഒട്ടിക്കുക.
തത്തയ്ക്ക് ചുവന്ന സ്കെച്ച് പേന വെച്ച് വളഞ്ഞ ചുണ്ട് വരയ്ക്കുക.
കാലുകൾ വരച്ച് കൊമ്പിൽ ഇരിക്കുന്ന രീതിയിൽ ആക്കുക.(ആരെങ്കിലും കൊമ്പിൽ ഇരിക്കാൻ ഉള്ളതിനേക്കാൾ ഉയരത്തിലാണ് തത്തയെ ഒട്ടിച്ചതെങ്കിൽ ചെറിയൊരു ശാഖ വരച്ച് അതിൽ ഇരുത്താൻ സഹായിക്കണം)
തത്തയ്ക്ക് കണ്ണ് വരയ്ക്കുക.
വാലും വരച്ചു ചേർക്കുക.
ചാർട്ടിൽ ചെയ്ത് ഒട്ടിച്ച് ബോധ്യപ്പെടുത്തിയ ശേഷമാണ് കുട്ടികൾ ചെയ്യേണ്ടത്.
പ്രതീക്ഷിത ഉൽപ്പന്നം: കടലാസ് തത്തമ്മ
തത്ത നിര്‍മ്മാണം വിഭവവീഡിയോ
https://www.youtube.com/watch?v=eJUPvhB13-A
വിലയിരുത്തൽ
എല്ലാ കുട്ടികളും നിർമ്മാണ പ്രവർത്തനത്തിൽ പങ്കെടുത്തുവോ?
നിർമ്മാണ പ്രവർത്തനം സമയബന്ധിതമായി പൂർത്തിയാക്കുവാൻ കഴിഞ്ഞുവോ?
പ്രതിദിന വായനാപാഠം (അനുബന്ധം )
(ഒ, ന്ത, സ, മ്മ, എ, ൾ എന്നിവയ്ക്ക് ഊന്നലുള്ളതും പരിചയിച്ച അക്ഷരങ്ങൾ മാത്രമുള്ളതും ).
പ്രതിദിന വായനാപാഠം വാട്സ്ആപ്പ് ഗ്രൂപ്പിൽ പങ്കിടൽ, കോപ്പി എടുത്തു നൽകൽ അടുത്ത ദിവസം ചാർട്ട് പ്രദർശിപ്പിച്ച് സന്നദ്ധ വായന സഹവർത്തിത വായന എന്നിവ നടത്തണം
No comments:
Post a Comment