കാര്‍ട്ടൂണ്‍ ഡയറിയുടെ ട്രൈ ഔട്ടും വഴിവിളക്കും

മെ.യ് അഞ്ച് ലോക കാര്‍ട്ടൂണിസ്റ്റ് ദിനമാണ്. ഞാന്‍ മെയ് നാലിന് കാര്‍ട്ടൂണ്‍ ഡയറി

എന്ന ആശയം ഒരു വീഡിയോ പാഠമായി അധ്യാപകക്കൂട്ടായ്മകളിലേക്ക് പങ്കിട്ടു. മെയ് അഞ്ചാം തീയതി കുട്ടികളുടെ ഉല്പന്നങ്ങള്‍ ലഭിച്ചുതുടങ്ങി. അങ്ങനെ കാര്‍ട്ടൂണിസ്റ്റ് ദിനം സമുചിതമായി ആചരിക്കാനായി. ലോക കാര്‍ട്ടൂണിസ്റ്റ് 1895 മേയ് 5 ലാണ് ലോകകാര്‍ട്ടൂണിസ്റ്റ് ദിനത്തിന്റെ ഓര്‍മവേര് എത്തുക. ന്യൂയോര്‍ക്കിലെ യെല്ലോ വേള്‍ഡ് എന്ന പ്രസിദ്ധീകരണം‍ സര്‍ക്കുലേഷന്‍ കൂട്ടാന്‍ എന്താണ് മാര്‍ഗം എന്നാലോച്ചു. റിച്ചാര്‍ഡ്‌സ് ഔട്ട് കോള്‍ട്ട് എന്ന കാര്‍ട്ടൂണിസ്റ്റ് ഒരു ചിത്രം വരച്ചു നല്‍കി. മഞ്ഞ ഉടുപ്പിട്ട കുട്ടിയായിരുന്നു അത് . മഞ്ഞച്ചെക്കന്‍ ലോകശ്രദ്ധ നേടി. ‘യെല്ലോ കിഡ്ഡ്’ എന്ന് വിളിപ്പേരും വീണു. യെല്ലോ കിഡ്ഡിനൊപ്പം കാര്‍ട്ടൂണും ലോക ശ്രദ്ധ പിടിച്ചു പറ്റി. മ 1919 ഒക്ടോബറിൽ പ്രസിദ്ധീകരിച്ച മഹാക്ഷാമദേവത (വിദൂഷകൻ മാസിക) എന്ന കാര്‍ട്ടൂണാണ് കേരളത്തിലെ ആദ്യ കാര്‍ട്ടൂണായി പരിഗണിക്കുന്നത്.

വീഡിയോ പാഠങ്ങളുടെ ട്രൈ ഔട്ട്

കോവിഡ് കാലത്ത് ആറ് വീഡിയോ പാഠങ്ങളാണ് ഞാന്‍ തയ്യാറാക്കിയത്.

അതിലൊന്നാണ് കാര്‍ട്ടൂണ്‍ ഡയറി.

എന്റെ വിദ്യാലയസന്ദര്‍ശനാനുഭവങ്ങളും സിനിമഗാനങ്ങളും കോര്‍ത്തിണക്കി ബാല്യകാലാനുഭവങ്ങളിലേക്ക് ശ്രദ്ധ ക്ഷണിക്കുന്ന ഒന്നാം ഭാഗവും കാര്‍ട്ടൂണ്‍ ഡയറി എന്ന് ആശയത്തെ ഉദാഹരണസഹിതം വ്യക്തമാക്കുന്ന രണ്ടാംഭാഗവുമാണ് തയ്യാറാക്കിയ വീഡിയോ പാഠത്തിലുളളത് (യുകട്ട് വിഡിയോ എഡിറ്ററാണ് വീഡിയോപാഠം തയ്യാറാക്കാനായി ഉപയോഗിച്ചത്. ലളിതവും മിക്കവാറും എല്ലാ ആവശ്യങ്ങള്‍ക്കും പര്യാപ്തവുമാണ് ആ ആപ്പ് )

വഴിവിളക്ക് അധ്യാപക്കൂട്ടായ്മയും അധ്യാപകക്കൂട്ടവും ഈ വീഡിയോപാഠം പങ്കിട്ടു. ട്രൈ ഔട്ടു നടത്താന്‍ അധ്യാപകര്‍ സന്നദ്ധരായി. വഴിവിളക്ക് ഗവേഷണാത്മക അധ്യാപനം ഏറ്റെടുക്കാന്‍ സന്നദ്ധതയുളള ഒരു സംഘം അധ്യാപകരുടെ വേദിയാണ്. അവിടെ ആദ്യ പ്രവര്‍ത്തനമായി ഈ വീഡിയോ പാഠം ഏറ്റെടുക്കപ്പെട്ടു.

ട്രൈ ഔട്ട് ലക്ഷങ്ങൾ വ്യക്തമാക്കി കുറിപ്പു നല്‍കിയിരുന്നു. അതിവയാണ്

1. വ്യവഹാര രൂപ നിർമിതിയിലേക്ക് നയിക്കുന്നതിന് സഹായകമായ ആശയതലം സൃഷ്ടിക്കുന്നതിൽ വീഡിയോയുടെ സാധ്യത കണ്ടെത്തുക.

2. നിർമിക്കേണ്ട വ്യവഹാര രൂപത്തിൻ്റെ സവിശേഷതകൾ സംബന്ധിച്ച് ഉദാഹരണവും സൂചനകളും നൽകി വ്യക്തത വരുത്തുക

3. നിലവിലുപയോഗിക്കുന്ന ഡയറി, ആത്മകഥ എന്നീ വ്യവഹാര രൂപങ്ങളിൽ കാർട്ടൂൺ ഡയറി എന്ന പുതിയ സാധ്യതക്ക് ഇടമുണ്ടൊ എന്ന് അന്വേഷിക്കുക

4. കുട്ടികളുടെ സർഗാത്മകത ഭാഷാ മികവിനായി പ്രയോജനപ്പെടുത്തുക

5. ചിത്രീകരണ സഹിത രചന ഭാഷാ മികവിന് എന്ന ആശയം പ്രയോഗിച്ചു നോക്കുക

6 . വളരെ കുറച്ചു സമയം (5 മിനിറ്റ് ) കൊണ്ട് പ്രവർത്തനാവതരണം ഫലപ്രദമായി നടത്തി കൂടുതൽ സമയം കുട്ടികൾക്ക് രചനയ്ക്കായി വിനയോഗിക്കാൻ അവസരം ഒരുക്കുക (ക്ലാസിലെ ടൈം മാനേജ്മെൻ്റ് )

ഒരുവീഡിയോ പാഠം മാത്രം കുട്ടികള്‍ക്ക് നല്‍കിയാല്‍ മതിയോ? പോര കൃത്യമായ നിര്‍ദേശങ്ങള്‍ ടൈപ്പ് ചെയ്തു നല്‍കണം. അല്ലെങ്കില്‍ വീഡിയോ പലതവണ കാണേണ്ടിവരും. നിര്‍ദേശങ്ങള്‍ മനസിലാക്കാന്‍

കുട്ടികൾക്ക് നൽകേണ്ട നിർദ്ദേശങ്ങളും തയ്യാറാക്കി.

പ്രിയപ്പെട്ട കുട്ടികളേ,

1 വീഡിയോ കണ്ടല്ലോ ? എന്താണ് നാം എഴുതേണ്ടത്?

• കാർട്ടൂൺ ഡയറി.

 2. എന്തെല്ലാമാണ് ഉൾപ്പെടുത്തേണ്ടത്?

• കുട്ടിക്കാലത്തെ സംഭവങ്ങൾ, പ്രധാന സംഭവങ്ങൾ
• മനസിൽ തങ്ങി നിൽക്കുന്നവ
• പല വർഷങ്ങളിലേത്.

3 എങ്ങനെയാണ് എഴുതേണ്ടത്?

• സംഭവങ്ങളുടെ ക്രമീകരണം നടത്തണം
• വർഷം സൂചിപ്പിക്കാം
• ഏകദേശ മാസവും ദിവസവും ഊഹിച്ചെഴുതാം ( ഊഹമാണേ)
• ആ സംഭവത്തിൻ്റെ ചിത്രം വരയ്ക്കണം
• ചിത്രത്തിൻ്റെ ഭംഗിയല്ല കുട്ടിത്തമാണ് പ്രധാനം.
• എന്നിട്ട് കാര്യം എഴുതണം.
• സംഭാഷണങ്ങൾ ചേർക്കാം.
• കൗതുകം ജനിപ്പിക്കുന്ന രീതി പരീക്ഷിക്കാം
• ഓരോ സംഭവത്തിനും വ്യത്യസ്ത രചനാരീതി ആലോചിക്കാം
• അനുഭവതീവ്രത വേണ്ടിടത്ത് ഭാഷ അതനുസരിച്ചു വേണം.
• ഭാഷാഭംഗി ശ്രദ്ധിക്കണം.
• കുറുകിയ വാക്യങ്ങൾ നന്നാകും (ആവശ്യമെങ്കിൽ ).
• കാർട്ടൂൺ ഡയറിയാണ്. ഞാൻ, എനിക്ക്, എൻ്റെ എന്നിങ്ങനെ അവരവരുടെ പക്ഷത്തുനിന്ന് എഴുതുന്ന രീതിയിൽ വേണം.
• ഭാവന കൂട്ടിച്ചേർക്കാം. സാങ്കൽപികമായ കാര്യങ്ങളും ആകാം .
• പക്ഷേ വിശ്വസനീയമായ രീതിയിൽ വേണം അത് അവതരിപ്പിക്കാൻ.
• പരാമർശിക്കുന്ന വ്യക്തികളുടെ പേരു മാറ്റി ഉപയോഗിക്കാം.
• ഇതൊക്കെ മനസിൽവെച്ച് എഴുതിത്തുടങ്ങു..
• എത്ര പേജുവേണമെന്ന് അവരവർക്ക് തീരുമാനിക്കാം. 
• എല്ലാ ക്ലാസുകളിലെ കുട്ടികൾക്കും പങ്കെടുക്കാം"

വഴിവിളക്കിലെ അധ്യാപകരില്‍ ചിലര്‍ സ്വന്തമായി വീഡിയോ പാഠം തയ്യാറാക്കി. അവരവരുടെ കുട്ടികളോട് അവര്‍തന്നെ സംവദിക്കുന്നതിന് വേണ്ടിയാണ് ഇപ്രകാരം ചെയ്തത്. അവതരണതന്ത്രത്തിന്റെ സ്വയം പരിശീലനവുമായി അത് മാറി. അധ്യാപകര്‍ പുതിയ കഥകളും പാട്ടുകളും ഉള്‍പ്പെടുത്തി കുട്ടിക്കാല അനുഭവങ്ങളിലേക്ക് ശ്രദ്ധക്ഷണിക്കല്‍ തീവ്രമാക്കുന്നതിന് ശ്രമിച്ചു. ഒരു മാതൃക നല്‍കുമ്പോള്‍ അത് അതേ പോലെ സ്വീകരിക്കുന്നതിനേക്കാല്‍ തന്റെ ക്രിയാത്മകത കൂടി കൂട്ടിച്ചേര്‍ത്ത് അവതരിപ്പിക്കാനുളള നീക്കം അഭിനന്ദനാര്‍ഹമാണ്.

ട്രൈ ഔട്ട് ഫലങ്ങള്‍ എന്താണ്?

കുട്ടികളുടെ ഉല്പന്നങ്ങള്‍ ആദ്യം പരിശോധിക്കാം.( എല്ലാവരുടെയും പങ്കിടുന്നതിന് പ്രായോഗിക ബുദ്ധിമുട്ടുണ്ടേ) ഇംഗ്ലീഷിലും മലയാളത്തിലുമുളളവയുണ്ട്. എഡിറ്റിംഗ് നടത്താത്തവയാണ് എന്നത് ശ്രദ്ധിക്കുമല്ലോ.

 

 ധന്യടീച്ചര്‍, സിന്ധുടീച്ചര്‍, ചന്ദ്രബാബുമാഷ്, സുധടീച്ചര് എന്നിവര്‍ അയച്ചവയാണിവിടെ പങ്കിടുന്നത്.

വിലയിരുത്തലുകള്‍

• കുട്ടികൾ ഈ പ്രവർത്തനം വളരെ താല്പര്യത്തോടെ ഏറ്റെടുത്തു.അധികം എഴുതേണ്ടി വരുന്ന സന്ദർഭങ്ങളിൽ കാണിക്കാറുള്ള മടി ഈപ്രവർത്തനത്തിൽ ഉണ്ടായില്ല.ചിത്രം വരയ്ക്കാനുള്ള താല്പര്യം ഇവിടെ പ്രയോജനപ്പെട്ടു.എത്ര പേജുകൾ വേണമെങ്കിലും തയ്യാറാക്കാൻ കുട്ടികൾ 'റെഡി'യാണ് (സിന്ധുടീച്ചര്‍)
• ഇന്നലെ  ഞാനും ഒരു Video അവതരിപ്പിച്ചു.
  

  10 കുട്ടികളെയാണ് ഇതിൽ പങ്കെടുപ്പിച്ചത്. കർട്ടൂൺ ഒർമ്മ പതിപ്പ് മലയാളത്തിലും ഇംഗ്ലീഷിലും തയ്യാറാക്കാൻ കുട്ടികൾക്ക് നിർദ്ദേശം നല്കിയിരുന്നു.

  നേരിട്ട പ്രശ്നങ്ങളും, എൻ്റെ കണ്ടെത്തലുകളും പറയട്ടെ, 

   online Video ക്ലാസ്സുകൾ  ഏറ്റവും ഫലപ്രദമായി മുൻപോട്ടു കൊണ്ടു പോകാൻ കഴിയുന്നുണ്ടെങ്കിൽ നമ്മൾ ആഗ്രഹിക്കുന്ന ലക്ഷ്യത്തിലെത്താൻ കഴിയുമെന്ന് ഉറപ്പാണ്.( ഭാഷ, ഭാവം ,തെളിച്ചം, Voice modulation, എന്നിവ കൃത്യമായി പാലിച്ച് .)

  Time management ന് ശരിയായ ധാരണ വേണം.(ഞാൻ 5 മിനിറ്റാണ് introduction ന് വിചാരിച്ചത്.പക്ഷെ 11 മിനിറ്റ് വേണ്ടി വന്നു.)

  സ്വന്തം ക്ലാസിലെ കുട്ടികളെ മനസ്സിൽ വിചാരിച്ചാൽ കാര്യങ്ങൾ എളുപ്പമാകും.( ആദ്യമായി ചെയ്യുന്ന നമുക്കെല്ലാവർക്കും ഇത് എത്രത്തോളം ശരിയാകുമെന്ന ടെൻഷൻ ഉണ്ടാകും.നാലോ അഞ്ചോ video കഴിയുമ്പോഴേക്കും  എല്ലാം നേരെയാകുമെന്ന് ഉറച്ച് വിശ്വസിക്കുക.

  നമ്മൾ ഏറ്റെടുത്ത Task എത്രത്തോളം വിജയിച്ചുവെന്ന് സ്വയം മനസ്സിലാക്കിയാൽ മുന്നോട്ട് പോകാനുള്ള ഊർജ്ജം താനെ ലഭിക്കും (കുട്ടികളുടെ products നോക്കിയാൽ മനസ്സിലാക്കാമെന്ന് തോന്നുന്നു.)  ഇതൊക്കെ എൻ്റെ അഭിപ്രായങ്ങളാണ് കേട്ടോ.. തെറ്റുണ്ടെങ്കിൽ അറിയിക്കണേ..: ( സുധ ടീച്ചര്‍)
   
• വഴിവിളക്ക്... ഗവേഷണാത്മകമായി അദ്ധ്യാപകനത്തെ സമീപിക്കുന്നവരുടെ ഓൺലൈൻ കൂട്ടായ്മ.. 15 കുട്ടികളെ ഞാൻ ഗവേഷണത്തിനായി ഉപയോഗപ്പെടുത്തുന്നു.. കലാധരൻ മാഷ് മുന്നോട്ടു വെച്ച വീഡിയോ പാഠം എന്ന ആശയം ഞാനും ഏറ്റെടുത്തു. മാഷ് മാതൃകയായി നൽകിയ വീഡിയോ ആദ്യം കുട്ടികൾക്ക് കൊടുത്തു. ആവശ്യമായ ചർച്ചകൾ ഗ്രൂപ്പിൽ നടന്നിരുന്നു. അവർക്ക് സന്ദർഭങ്ങൾ ഓർത്തെടുക്കാൻ അവസരമൊരുക്കി. ചിത്രീകരണം നടത്തി ഡയറിയാക്കാൻ ആവശ്യപ്പെട്ടു. കുറച്ചു പേർ നന്നായി ചെയ്തു.. രണ്ടു പേർ ചിത്രം വരച്ചാൽ ശരിയാകുന്നില്ലെന്നു പറഞ്ഞു ഒഴിഞ്ഞു നിന്നു. അവർക്ക് പിന്തുണയും പ്രോത്സാഹനവും ആത്മവിശ്വാസവും നൽകി... ചെയ്തെടുത്തു.. പക്ഷെ.. അവരുടെ ചിത്രങ്ങൾ എന്നെ അദ്‌ഭുദപ്പെടുത്തി. മനോഹരം... വലിയ perfection ലക്ഷ്യം വെച്ച് ഇരുന്നതാണ്..മനസ്സിനെ സ്വാധീനിച്ച സംഭവം, വേദനിപ്പിച്ച കാര്യം, കൗതുകം നൽകിയത്,... അങ്ങനെ ഓർത്തെടുത്തു വരച്ചവ,,, എഴുതി അയച്ചു തന്നു. നിസ്സാരമായി തോന്നുന്ന ഓരോന്നും കുഞ്ഞുമനസ്സിനെ എത്ര ആഴത്തിലാണ് സ്പർശിച്ചിട്ടുള്ളത്.  എല്ലാവർക്കും പ്രോത്സാഹനം കൊടുത്തു.. അഭിനന്ദിച്ചു,, സമ്മാനങ്ങൾ കൊടുത്തു.. പോസിറ്റീവ് കമന്റ്‌ കൊടുത്തു....
          അതിനു ശേഷം ഞാൻ ഒരു വീഡിയോ ചെയ്തു. ഒരു കഥയാണ് എടുത്തത്. ഭാവത്തോടെ കഥ അവതരണം നടത്തി. അമ്മയുടെ വാത്സല്യം... സ്നേഹം,, പരിചരണം.. ഓർമ്മപ്പെടുത്തി.. സ്വന്തം അമ്മയെ വരയ്ക്കാൻ,, അമ്മയുമൊത്തുള്ള രസകരമായ സന്ദർഭങ്ങൾ കാർട്ടൂൺ രൂപത്തിൽ ചിത്രീകരിക്കാനും നിർദേശിച്ചു. ഇഷ്ടം പോലെ മുഹൂർത്തങ്ങൾ... അവർ വരച്ചു, എഴുതി തയ്യാറാക്കി.. ചിത്രങ്ങൾ വരക്കാനും കൊച്ചു വാചകങ്ങളിൽ വിശദീകരിക്കാനും എന്താ ഉത്സാഹം.. അമ്മയെ കുറിച്ച് കവിതകൾ എഴുതി.. ഗ്രൂപ്പിൽ പങ്കു വെച്ചു.... എന്റെ വീഡിയോക്ക് അവരിൽ നിന്നും കിട്ടി ഫീഡ്ബാക്ക്.. "ടീച്ചർ.. വല്ലാത്ത ഗൗരവത്തിലായിരുന്നു എന്ന്.. "  ശരിയാണ്.. നേരിട്ട് കുട്ടികൾക്ക് മുന്നിൽ നിൽക്കുമ്പോൾ നമുക്ക് പരിമിതികൾ ഇല്ലല്ലോ.. അവിടെ ഞങ്ങളുടെ ലോകമാണ്... ഞങ്ങൾ മാത്രമുള്ള ലോകം.. അവിടെ വലുപ്പവും ചെറുപ്പവുമില്ല... ശരിയും തെറ്റുമില്ല.... എന്തായാലും അടുത്തതിൽ ശരിയാക്കാമെന്ന് വാക്ക് പറഞ്ഞു.. വീഡിയോ പാഠം ചെയ്യുന്നത് കുട്ടികൾ ഏറ്റെടുത്തു എന്നുറപ്പായി.. (ധന്യ ടീച്ചർ)
•  ഒന്നാം ക്ലാസുകാര്‍ മുതലുളളവരുടെ രചനകള്‍ കിട്ടിയിട്ടുണ്ട്. കൗതുകത്തോടെ കുട്ടികള്‍ ഏറ്റെടുത്തു. ഭാഷാ ക്ലാസുകളില്‍ പുതുമകളുളള പ്രവര്‍ത്തനങ്ങള്‍ കണ്ടെത്തിയാല്‍ കുട്ടിക്ക് ഭാഷാവികസനം ആസ്വാദ്യമാകും.
• ഇംഗ്ലീഷിലും മലയാളത്തിലും കാര്‍ട്ടൂണ്‍ ഡയറി സാധ്യതയാണ്
• വലിയ മുന്നൊരുക്കമില്ലാതെ വിജയിപ്പിക്കാനായി.
• വീഡിയോപാഠങ്ങള്‍ അധ്യാപകപരീശനരീതിയായി മാറുന്നുണ്ട്
• ഓരോ അധ്യാപികയും തങ്ങളുടെ കൂട്ടിച്ചേര്‍ക്കലുകള്‍ നടത്തിയാണ് ട്രൈ ഔട്ട് ഏറ്റെടുത്തത്
• കുട്ടികള്‍ക്ക് നല്‍കേണ്ട ഫീഡ് ബാക്ക്, ഓണ്‍ലൈനിലൂടെ എപ്രകാരമാണെന്നും ട്രൈഔട്ട് നടത്തണം.
• കുട്ടികള്‍ പരസ്പരം രചനകള്‍ വായിച്ച് പ്രതികരിക്കുന്നതിനെയും പ്രോത്സാഹിപ്പിക്കണം.
• ചിത്രീകരണത്തില്‍ എല്ലാ കുട്ടികളും ഏര്‍പ്പെട്ടു. 

പ്രിയപ്പെട്ടവരേ വീഡിയോ പാഠങ്ങളെക്കുറിച്ചുളള വിമര്‍ശനങ്ങളും പോരൊയ്മകളും പറയണേ. അവ മെച്ചപ്പെടാനുളള അവസരമാണ്. ഒപ്പം നിങ്ങള്‍ക്കും ഇത്തരം സാധ്യതകള്‍ പരീക്ഷിച്ചുനോക്കുകയുമാകാം. ക്രിയാത്മകമായ നിര്‍ദേശങ്ങളും പ്രതീക്ഷിക്കുന്നു.
ട്രൈ ഔട്ട് ഏറ്റെടുത്ത വഴിവിളക്ക് ടീമിന് ആശംസകള്‍ നേരുന്നു.
അധ്യാപകക്കൂട്ടത്തിന് നന്ദിയും രേഖപ്പെടുത്തുന്നു