കൊവിഡ് കാലത്ത് കുട്ടികള്‍ക്ക് പ്രകൃതിപാഠമൊരുക്കി രവീന്ദ്രന്‍മാഷ്,

കൂട്ടുകാരേ...

നിങ്ങളുടെ വീട്ടുപറമ്പിൽ എത്ര കുഴിയാനക്കുഴികളുണ്ട്?

എത്ര ദിവസം കൊണ്ടാണ് അവ പ്യൂപ്പയായി മാറുന്നത്? തുമ്പിയായി മാറിയാൽ എത്ര സമയമെടുക്കും പറക്കാൻ? ആദ്യം വിടർത്തുന്ന ചിറകുകളേ തായിരിക്കും! ആദ്യം പറക്കുന്നത് എങ്ങോട്ടയിരിക്കും?......

ഇനിയുമുണ്ട് കൗതുകം ഉറങ്ങുന്ന ചോദ്യങ്ങൾ....

കുഴിയാനയോടൊപ്പം ചേർന്ന് പഠിച്ച് എഴുതി വെക്കണേ...

നിങ്ങളുടെ

വി.വി.രവീന്ദ്രൻ മാസ്റ്റർ. GHSS ചെറുതാഴം കണ്ണൂർ .

9400515869'

വെറുതേ ഇങ്ങനെ ചോദിക്കുകയല്ല രവീന്ദ്രന്‍മാഷ് ചെയ്യുന്നത് . കുഴിയാനയെക്കുറിച്ച് ആദ്യം ഒരു വിവരണം നടത്തും. അതാകട്ടെ കുട്ടികള്‍ക്ക് പുതിയകാര്യമായിരിക്കും. അവസാനമാണ് കുട്ടികള്‍ക്കായി അന്വേഷണാത്മക ചോദ്യങ്ങള്‍. ( അനുബന്ധമായി വിവരണങ്ങള്‍ നല്‍കിയിരിക്കുന്നത് നോക്കുക)

പ്രകൃതിപാഠമൊരുക്കിയതിനെക്കുറിച്ച് രവീന്ദ്രന്‍മാഷ് ഇങ്ങനെ പറഞ്ഞു

"നിനച്ചിരിക്കാതെ വന്ന അവധിക്കാലത്ത് കുട്ടികൾ വീട്ടിൽ ഒതുങ്ങിക്കഴിയേണ്ടിവന്നപ്പോൾ അവർക്കു വേണ്ടി എന്തു ചെയ്യാൻ കഴിയും എന്ന ചിന്തയിൽ നിന്നാണ് പ്രകൃതി പാഠം എന്ന കുഞ്ഞെഴുത്തുകൾ തുടങ്ങിയത്. എൻ്റെ വിദ്യാലയത്തിലെ കുട്ടികൾക്കു വേണ്ടി ലോക് ഡൗൺ തുടങ്ങിയ ദിവസം മുതൽവാട്സപിലൂടെ അയക്കുവാൻ തുടങ്ങി. പിന്നീട് എൻ്റെ സുഹൃത്തുക്കളായ അധ്യാപകർക്കും നൽകി.ഇത് ശ്രദ്ധയിൽ പെട്ട tKr 24 ഓൺലൈൻ ന്യൂസ് ഇത്തരം പഠനങ്ങൾ ആവിശ്യപ്പെട്ടു. അവർക്ക് 18750 അംഗങ്ങൾ ' ഉള്ള 250 വാട്സ പ്പഗ്രൂകൾ ഉണ്ട്. അവരുടെ ആവശ്യപ്രകാരം ഇത്തരം എഴുത്തുകൾ നൽകി വരുന്നു.KSTA സംസ്ഥാന സെക്രട്ടറി അറിയിച്ചതിനെ തുടർന്ന് കുട്ടികളോട് സംസാരിക്കുന്ന ഓഡിയോ ഉൾപ്പെടെ 10 എണ്ണം നൽകി. കണ്ണപുരം നവചേതന ഓൺലൈൻ വിദ്യാലയം"

രവീന്ദ്രന്‍മാഷ് വേനൽപ്പച്ച കൈപുസ്തക നിർമാണത്തിൽ പങ്കെടുത്ത ആളാണ്. പരിസ്ഥിതി പ്രവര്‍ത്തകന്‍, നാടകകൃത്ത്. സംസ്ഥാന കലോത്സവങ്ങളിൽA ഗ്രേഡ് നേടിയ നാടകങ്ങൾ രചിച്ചിട്ടുണ്ട്.

നാടക രചനക്കുള്ള വിദ്യാരംഗം സാഹിത്യ വേദി പുരസ്കാരം, നൂതന അധ്യാപക പുരസ്ക്കാരം [കണ്ണൂർ ] അധ്യാപക പ്രതിഭാ പുരസ്കാരം, ടി.യം. വിഷ്ണു നമ്പീശൻ പുരസ്കാരം തുടങ്ങിയവ ലഭിച്ചിട്ടുണ്ട്. ആനുകാലികങ്ങളിൽ എഴുതുന്നു. പ്രസിദ്ധീകരിച്ച കൃതികൾ 1. ദി ട്രെയിൻ', 2. മക്കളേ തേടുന്ന സാറ [ പരിസ്ഥിതി നോവൽ - സീക്ക് പ്രസിദ്ധികരിച്ചത് ], 3 അംബികാസുതന് ഇനിയും ചിലത് പറയാനുണ്ട്.

ഉറുമ്പുകൾ മിടുക്കന്മാരിൽ ഒരാളാണ്.  ഈ ചെറിയ പ്രാണിക്ക് എണ്ണമറ്റ അത്ഭുതങ്ങളും അത്ഭുതങ്ങളും ഉണ്ട്, ഇത് സ്രഷ്ടാവ് എത്ര വലിയവനാണെന്ന് സ്ഥിരീകരിക്കുന്നു.

ദിയ. യു ക്യഷ്ണാലയം ഉദയം കുന്ന് പി ഒ ° (ബല്ല ഏസി.കണ്ണൻ നായർ. സ്മാരക.ഗവ :യു പി.സ്കൂൾ മേലാങ്കോട്ട്) ഉറുമ്പിനെക്കുറിച്ചുളള പ്രകൃതിപാഠം കഴിഞ്ഞപ്പോള്‍ പലേടത്തും റഫര്‍ ചെയ്ത് ഒരു കുറിപ്പ് തയ്യാറാക്കി അയച്ചു. അത് ചുവടെ.

 പല വീടുകളിലും നിലനിൽക്കുന്ന പ്രാണികളാണ് ഉറുമ്പുകൾ, ഇതാണ് ഈ വീടുകളുടെ ഉടമകളെ അസ്വസ്ഥരാക്കുന്നത്.  എവിടെയും ഒന്നിച്ചുനിൽക്കാനും വളരാനും കഴിവില്ലാത്ത, ഉറുമ്പുകൾ മഴക്കാടുകളിലെ മൃഗങ്ങളുടെ പിണ്ഡത്തിന്റെ 15% വരും.

 ഉറുമ്പുകളുടെ തരങ്ങൾ

 ലോകത്ത് പലതരം ഉറുമ്പുകൾ പടരുന്നുണ്ട്, എന്നാൽ ഏറ്റവും പ്രശസ്തമായ ഒരു കൂട്ടം ഇനം ഉണ്ട്:

 1- ടെർമിറ്റുകൾ: മണ്ണിന്റെ കണങ്ങളുടെ കോളനികളിൽ വസിക്കുന്ന ഏറ്റവും പ്രശസ്തമായ ഒരു ഇനമാണിത്.ഈ കോളനികൾ യഥാർത്ഥത്തിൽ ഒരു രാജ്യമോ ഉറുമ്പുകളുടെ നഗരമോ ആണ്, കൂടാതെ ഓസ്‌ട്രേലിയയിൽ ഏറ്റവും വലിയ ഉറുമ്പ് കൂടുകളും ഉണ്ട്.

 2- നട്ടുപിടിപ്പിച്ച ഉറുമ്പുകൾ: ഉഷ്ണമേഖലാ ആമസോണിയൻ വനങ്ങളിൽ വസിക്കുന്ന ഉറുമ്പുകളാണ്, അതിനാൽ കാർഷിക മണ്ണിൽ ജീവിക്കാൻ അവർ ഇഷ്ടപ്പെടുന്നു

 3- തേൻ ഉറുമ്പുകൾ: ചെടികളുടെ ഇലകളിൽ ചവിട്ടുന്ന കീടങ്ങളെ ഈ തരം ഉറുമ്പുകൾ മേയിക്കുന്നു, ഇവയിൽ പലപ്പോഴും പഞ്ചസാര അടങ്ങിയിട്ടുണ്ട്.

 4- ഹെഡ്ജ് ഉറുമ്പുകൾ: ഹെഡ്ജ് ഉറുമ്പുകൾ സസ്യജാലങ്ങളിൽ നിന്ന് തങ്ങളുടെ രാജ്യം പണിയുന്നു.ഹെഡ്ജ് ഉറുമ്പുകളുടെ നീളം 6 സെന്റിമീറ്ററാണ്, അവർ മരങ്ങൾക്കിടയിൽ ഓസ്‌ട്രേലിയയിലെ വനങ്ങളിൽ താമസിക്കുന്നു.

 ഉറുമ്പുകളുടെ വിചിത്രവും അത്ഭുതങ്ങളും

 1- ഏകദേശം 90 ദശലക്ഷം വർഷങ്ങൾക്ക് മുമ്പ് ക്രിറ്റേഷ്യസ് കാലഘട്ടം മുതൽ ഈ പ്രാണിയുണ്ട്.

 2- ഈ പ്രാണി ഗ്രഹത്തിലെ മൊത്തം ജീവികളുടെ 20% പ്രതിനിധീകരിക്കുന്നു.

 3- ഈ പ്രാണിക്ക് കാര്യങ്ങൾ ചിന്തിക്കാനും വിശകലനം ചെയ്യാനുമുള്ള കഴിവുണ്ട്, അതിന്റെ രണ്ട് ഭാഗങ്ങളുള്ള തലച്ചോറിന് നന്ദി.

 4- ഉറുമ്പുകളുടെ രാജ്ഞിക്ക് ഇരുപത് വർഷം വരെ ജീവിക്കാൻ കഴിയും, മാത്രമല്ല ഒരു മാസത്തിനുള്ളിൽ ഏകദേശം നാല് ദശലക്ഷം മുട്ടകൾ ഉത്പാദിപ്പിക്കാനും കഴിയും.

 5- ആമസോൺ കാട്ടിൽ കാണപ്പെടുന്ന ഒരു തരം ബുള്ളറ്റ് ഏജന്റ് ഉണ്ട്, ഇത് ചൂണ്ടുവിരലിന്റെ വലുപ്പത്തിൽ എത്തുമ്പോൾ ലോകത്തിലെ ഏറ്റവും വലിയ ഉറുമ്പാണ് ഇത്.

 6- വനങ്ങൾ, ഉയർന്ന താപനിലയുള്ള മരുഭൂമികൾ, സമതലങ്ങൾ, മറ്റ് സ്ഥലങ്ങൾ എന്നിവയിൽ എവിടെയെങ്കിലും ജീവിക്കാനുള്ള കഴിവ് ഈ പ്രാണിക്കുണ്ട്.

 7-ഉഷ്ണമേഖലാ വനങ്ങളിൽ ഇത് കാണപ്പെടുന്നു, മരത്തിന്റെ ഇലകൾ ഒന്നിച്ച് ഒട്ടിക്കുന്നു, അവ കൂടുണ്ടാക്കുന്നു.

 8 - ഒരു ഉറുമ്പ് മരിക്കുമ്പോൾ, അത് ഒരു വിചിത്ര ഗന്ധം പരത്തുന്നു, അത് ഒലിയിക് ആസിഡ് ഉൽ‌പാദിപ്പിക്കുന്നു, ഇത് ബാക്കി ഉറുമ്പുകളെ അവന്റെ മരണത്തെക്കുറിച്ച് മുന്നറിയിപ്പ് നൽകുന്നു, കൂടാതെ ഏതെങ്കിലും വിചിത്ര പ്രാണികൾ ശ്രദ്ധിക്കുന്നതിനുമുമ്പ് അവ അവനെ അടക്കം ചെയ്യുന്നു.

 9- ഈ പ്രാണിയെ ഒറ്റയ്ക്ക് ജീവിക്കാൻ കഴിയാത്ത ഒരു പ്രാണിയാണ്.അത് എല്ലായ്പ്പോഴും ഗ്രൂപ്പുകളിലും കോളനികളിലും വസിക്കുന്നു. ഈ പ്രാണിയുടെ ഒരു കൂടിൽ ദശലക്ഷക്കണക്കിന് അടങ്ങിയിരിക്കുന്നു.

 10 - ഒരു ഉറുമ്പ് കോളനിയിൽ മൂന്ന് തരം ഉൾപ്പെടുന്നു, മുട്ടയിടുന്ന രാജ്ഞി, വീട്ടുജോലിക്കാരി, അവർ എല്ലാ ജോലികളും കോളനിയിൽ ഭക്ഷണം നൽകുന്നു, പുരുഷന്മാരും അവരുടെ ജോലിയും രാജ്ഞിയിൽ നിന്ന് ഇണചേരലിന് മാത്രമായി പരിമിതപ്പെടുത്തി, തുടർന്ന് അവൾ മരിക്കുന്നു.

 11-ചെറിയ വലിപ്പമുണ്ടെങ്കിലും ഇത് വളരെ കഠിനമായ ഒരു പ്രാണിയാണ്.അത് അപകടകരമാണെന്ന് തോന്നുമ്പോൾ, ആത്മഹത്യ ചെയ്യുന്ന ചില ഉറുമ്പുകൾ അവരുടെ വയറ്റിൽ അമർത്തി വിഷാംശം ഇല്ലാതാക്കുന്നു.

 12- ഖര ഭക്ഷണം വിഴുങ്ങാൻ ഈ പ്രാണിയ്ക്ക് ബുദ്ധിമുട്ടാണ്, പക്ഷേ ഭക്ഷണം സൂക്ഷിക്കാൻ താടിയെല്ലിന്റെ പിൻഭാഗത്ത് ഒരു ബാഗ് ഉണ്ട്, ഇത് ഉരുകിയ ഉമിനീർ ഉൽപാദിപ്പിക്കുകയും ഭക്ഷണം ഉരുകുകയും ദ്രാവകം കഴിക്കുകയും ഉരുക്ക് ഒഴിവാക്കുകയും ചെയ്യുന്നു.

കുട്ടികള്‍ നിരീക്ഷണം നടത്തി കുറിപ്പുകളെഴുതി മാഷിന് അയക്കും

റഫര്‍ ചെയ്ത് ചെറിയ ശാസ്ത്ര ലേഖനമെഴുതിയയക്കും

പല്ലിയും ചിലന്തിയും കുഴിയാനയുമൊക്കെ ഇര പിടിക്കുന്നത് വീഡിയോയില്‍ പകര്‍ത്തി അയക്കും

കുട്ടികള്‍ പ്രകൃതിയിലേക്കിറങ്ങി.

കോവിഡ് കാലം ആസ്വാദ്യ പഠനകാലമായി മാറി.

രക്ഷിതാക്കള്‍ക്ക് നല്ല അഭിപ്രായം

നമ്മുടെ കുട്ടികള്‍ക്ക് ഇത്തരം പഠനങ്ങളിഷ്ടമാണ്

എന്തെല്ലാമാണ് സാധ്യതകള്‍

• സംസ്ഥാനത്ത് ഏതെങ്കിലും പ്രദേശത്തുളള ഒരു വിദഗ്ധന് ഒത്തിരി കുട്ടികള്‍ ഉള്‍പ്പെടുന്ന ഓണ്‍ലൈന്‍ ക്ലാസുകള്‍ സാധ്യമാണ്
• വിഷയമേഖലയില്‍ താല്പര്യമുളള കുട്ടികള്‍ക്ക് കൂടുതല്‍ ഉയര്‍ന്ന നിലയിലെത്താന്‍ സഹായകം
• തന്റെ ക്ലാസിലെ അധ്യാപിക എല്ലാ വിഷയങ്ങളിലും ആഴത്തിലുളള അറിവുളളവളാകണമെന്നില്ല. എന്നാല്‍ സമൂഹത്തിലെ വിദഗ്ധരുടെ സേവനം ലഭിക്കുന്നതു വഴി അത് മറികടക്കാനാകും
• അന്വേഷണാത്മക പഠനത്തിന് സഹായകം
• ഒരു കുറിപ്പ് നല്‍കുന്നതിനാല്‍ അടിസ്ഥാനധാരണകളോടെ തുടര്‍ പ്രവര്‍ത്തനങ്ങള്‍ ഏറ്റെടുക്കുന്നു
• സ്വയംപഠനശേഷിയുടെ വികാസം 
  ഇത് കൊവിഡ് കാലത്തേക്ക് പരിമിതപ്പെടരുത്. കുട്ടികള്‍ അയച്ച കുറിപ്പുകളും വീഡിയോകളും ഞാന്‍ കണ്ടു. താല്പര്യപൂര്‍വം അവര്‍ അത് ഏറ്റെടുക്കുന്നുണ്ട്. വലിയൊരു പ്രകൃതിപഠനസംഘത്തെ രൂപപ്പെടുത്താന്‍ ഇത്തരം പ്രവര്‍ത്തനങ്ങള്‍ക്ക് കഴിയും
  മഹാമാരിയുടെ കാലത്തെ സര്‍ഗാത്മകമായി പ്രയോജനപ്പെടുത്താനായി ആരംഭിച്ച ഈ പരിപാടി കേരളത്തിലെ വിദ്യാഭ്യാസ പ്രവര്‍ത്തകര്‍ക്ക് , അധ്യാപകപരിശീലന സ്ഥാപനങ്ങള്‍ക്ക് ദിശാബോധം നല്‍കുന്നതാണ്.  9400515869' നമ്പരില്‍ അദ്ദേഹത്തെ വിളിച്ച് കൂടുതല്‍ അറിയുമല്ലോ.

.

അനുബന്ധം ഒന്ന്

കുഴിയാന

കൂട്ടുകാരേ... കളിയിലും ടി.വി കാണുന്നതിലും മൊബൈൽ ഗെയ്മുകളിലും ഒതുക്കേണ്ടതല്ല നിങ്ങളുടെ അവധിക്കാലം. പുസ്തകങ്ങൾ വായിക്കണം... ഒപ്പം പ്രകൃതിയാകുന്ന പുസ്തകത്തിൻ്റെ താളുകളും വായിക്കണം... അതിനായി നമുക്ക് വെളിയിലേക്കിറങ്ങിയാലോ....

ഇന്നു നമുക്ക് കുഴിയാനകളേക്കുറിച്ച് പഠിക്കാം ... എന്താ ...

കൂട്ടുകാർ കുഴിയാനകളെ കണ്ടിട്ടുണ്ടോ? 

AntIion എന്ന ഷഡ്പദത്തിൻ്റെ കുഞ്ഞുങ്ങളാണ് കുഴിയാനകൾ.Ant എന്നാൽ ഉറുമ്പ് 'Lion എന്നാൽ സിംഹം. ഉറുമ്പുകളെ വേട്ടയാടുന്ന നായാടിയായതിനാലണത്രെ Antlion എന്ന പേരു വന്നത്. വടക്കേ അമേരിക്കയിൽ ഇതിനെ ഡൂഡിൽ ബഗ് എന്നാണ് പറയുന്നത്.കാരണം കുഴിയാനകൾ മണ്ണിൽ വരയ്ക്കുന്ന ചിത്രങ്ങൾ നിരീക്ഷിച്ചിട്ടാണത്രെ ആ നാട്ടുകാർ ഡൂഡിൽ ബഗ് എന്ന പേരു ചൊല്ലി വിളിച്ചത്!

ഇനി കുട്ടുകാരും നിരീക്ഷിക്കൂ.... രസകരമായ കാഴ്ചകളായിരിക്കും കാണാൻ പോകുന്നത്.അനുഭവങ്ങൾ കുറിച്ചു വെക്കാൻ മറക്കരുതേ.... കുഴിയാന ത്തുമ്പികൾ എന്നാൽ തുമ്പി വർഗമേയല്ല കേട്ടോ... പിന്നെ എന്തിനായിരിക്കും തുമ്പി എന്നു വിളിക്കുന്നു എന്നല്ലേ ..... കുഴിയാനകളോടൊപ്പം കൂടിയാൽ അതിൻ്റെ രഹസ്യം നിങ്ങൾക്കും കണ്ടെത്താം. 2000 സ്പീഷ്യസുകളിൽ പെട്ട കുഴിയാന ത്തുമ്പികളുണ്ടത്രെ ലോകത്തിൽ ... കൂഴിയാനകൾ കുഴിയുണ്ടാക്കുന്നത് രസകരമായ കാഴ്ചയാണ്.

0.5 cm മാത്രം വലുപ്പമുള്ള ഒരു കുഞ്ഞു ജീവി. 3 ജോഡി കാലുകളും മുന്നിൽ കൊമ്പുകൾ പോലുള്ള രണ്ട് ഭാഗങ്ങളുമുണ്ടിവയ്ക്ക്. വിസർജനാവയവമില്ലാത്ത ഒരു ജീവിയാണീക്കൂട്ടർ... മാലിന്യമെല്ലാം ശരീരത്തിൽ തന്നെ സൂക്ഷിച്ചു വെക്കും' ഒടുവിൽ സമാധിയിൽ കഴിയാറാകുമ്പോൾ ആ മാലിന്യം ഉപയോഗിച്ചാണ് സിൽക്ക് ഉണ്ടാക്കി മണ്ണും ചേർത്ത് കൂടൊരുക്കുന്നത്. 6 കാലുകൾ ഉണ്ടെങ്കിലും പുറകിലോട്ടു മാത്രമേ ഇവർ സഞ്ചരിക്കൂ.... കേൾക്കുമ്പോൾ കൂട്ടുകാർക്ക് കൗതുകം തോന്നുന്നില്ലെ? ഇങ്ങനെ എന്തൊക്കെ അൽഭുതങ്ങളുണ്ടെന്നോ പ്രകൃതിയാകുന്ന പുസ്തകത്തിൽ.അവ നേരിട്ടു കാണണം. അപ്പോ ഴാണ് നിങ്ങൾ അൽഭുതലോകത്തിലെത്തിയ ആലീസായി മാറുന്നത്. 

പകൽ മുഴുവൻ ഇല പ്പച്ചകൾക്കിടയിലും പുല്ലുകൾക്കിടയിലും കഴിയുന്ന കുഴിയാന ത്തുമ്പികൾ സന്ധ്യയോടു കൂടി ഇര തേടുവാനും ഇണചേരുവാനും പുറത്തേക്കിറങ്ങും. അമ്മ ത്തുമ്പി മണ്ണിലാണ് മുട്ടയിടുക. സൂര്യപ്രകാശം നേരിട്ടു പതിക്കാത്ത, എന്നാൽ അധികം നനവി ല്ലാത്ത ഇടം കണ്ടെത്തി അമ്മത്തുമ്പി മുട്ടയിടും.അധികം നനവുള്ള മണ്ണിൽ മുട്ടയിട്ടാൽ തൻ്റെ കുഞ്ഞുങ്ങൾ പട്ടിണി കിടന്നു ചത്തുപോകുമെന്ന് ആ അമ്മയ്ക്കറിയാം... ആരാണിതൊക്കെ അവരെ പഠിപ്പിക്കുന്നത്? ഏത് വിദ്യാലയത്തിൽ നിന്നാണ് പഠിക്കുന്നത്? ഉത്തരം കിട്ടാത്ത ചോദ്യങ്ങൾ അല്ലേ....

 ഒരു ജീവിതത്തിൽ അമ്മത്തുമ്പി എത്ര തവണ മുട്ടയിടും? ഒരു തവണ എത്ര മുട്ടയിടും? കൂട്ടുകാർ നിരീക്ഷിച്ചു കണ്ടെത്തി രേഖപ്പെടുത്തൂ.... 

ഇനിയും പഠിക്കാത്ത രഹസ്യങ്ങൾ ഏറെയുണ്ടത്രെ തുമ്പിക്കൈ ഇല്ലാത്ത കഴിയാനകളുടെ ജീവിതത്തിൽ.

മുട്ട വിരിഞ്ഞുണ്ടാകുന്ന കുഞ്ഞുങ്ങൾ മണ്ണിൽ കുഴിയുണ്ടാക്കും.ഓരോ കുഴിയിലും ഓരോ കുഴിയാന.ഒരു കുഴിയുടെ മുകളിലെ വ്യാസം 2.5 cm മുതൽ 3 cm വരെ.ഓരോ കുഴിയും കോൺ ( ചോർപ്പ്, നാളം) ൻ്റെ ആകൃതിയിലും. കുഴിയുടെ മധ്യത്തിലാണ് കുഴിയാനയുടെ വാസം . വാരിക്കുഴിയുണ്ടാക്കി ആനയെ കുടുക്കുന്നതു പോലെ ഇരകളെ കുടുക്കുന്നതിനാലാണോ കുഴിയാന എന്നു വിളിക്കുന്നത്! കുഴിയിലേക്കു വീഴുന്ന ഉറുമ്പ്, ചെറു കീടങ്ങൾ തുടങ്ങിയവയെ കുഴിയിൽ ഒളിച്ചിരിക്കുന്ന കുഴിയാന ചാടി വന്നു പിടിക്കും. പിന്നീട് മുന്നിലെ കൊമ്പ് ഉപയോഗിച്ച് ഇരയെ മയക്കേണ്ട വിഷവും ഇരയുടെ ശരീരഭാഗത്തെ ദ്രവരൂപത്തിലാക്കേണ്ട എൻസൈമും കുത്തിവെക്കും. അതേ കൊമ്പുകൾ ഉപയോഗിച്ച് തന്നെ ഇരയുടെ ശരീരത്തിൽ നിന്നും ആഹാരം ഊറ്റിക്കുടിക്കും. അവശേഷിക്കുന്ന മൃത ഭാഗം മുൻ കാലുകൾ ഉപയോഗിച്ച് കുഴിക്കു വെളിയിലേക്ക് തള്ളിക്കളഞ്ഞ് കുഴി വൃത്തിയായി വെക്കും. അടുത്ത ഇരയേക്കാത്ത്... ഇനി കുഴിയിൽ വീണ ഇര രക്ഷപ്പെടുവാൻ നോക്കിയലോ... മുൻ കാലുകൾ കൊണ്ട് മണ്ണ് തെറിപ്പിച്ച് അതിനെ കുഴിയിലേക്കു വീഴ്ത്തും... മാത്രമല്ല കുഴിയുടെ അരികിലെങ്ങാനും ഇരയുണ്ടെങ്കിൽ മണ്ണ് തെറിപ്പിച്ച് ഇരയെ കുഴിയിൽ വീഴ്ത്തും... എന്തൊരു സൂത്രശാലിയാണ് ഇക്കൂട്ടർ അല്ലേ....  കൂട്ടുകാരേ.. നമ്മുടെ പറമ്പു മുഴുവൻ സിമൻ്റിട്ടും ഇൻ്റർലോക്കുവെച്ചും ജില്ലിപ്പൊടി വിതറിയും സുന്ദരമാക്കിയാൽ പാവം മിണ്ടാപ്രാണികളായ കുഴിയാനകളുടെ കുലം അറ്റുപോകും. ഭക്ഷ്യശൃംഖലയിലെ പ്രധാന കണ്ണി തന്നെയാണ് കുഴിയാനകൾ. കീടങ്ങളുടെ വർധനവിനെ നിയന്ത്രിക്കുന്നതിലും ചിലന്തികളുടെയും മറ്റും വംശവർധനവ് തടയുന്നതിലും ഇവർക്കുള്ള പ്രാധാന്യം എടുത്തു പറയേണ്ടതാണ്... കുഴിയാനത്തുമ്പികളും കുഴിയാനകളും മാംസ ഭുക്കുകളാണ്... എന്നാൽ സസ്യങ്ങളുടെ നീര് മാത്രം കഴിക്കുന്ന ചിലരുമുണ്ട് ഇവരുടെ കൂട്ടത്തിൽ ... അവർ മുട്ടയിടുന്നത് ഇലകൾക്കിടയിലും മറ്റുമാ ണ്. മണ്ണിൽ കുഴിയുണ്ടാക്കുകയുമില്ല.

കുഞ്ഞു ജീവിയാണെങ്കിലും കുഴിയാനകളുടെകുല മറ്റുപോയാൽ അത് ആദ്യം സാരമായി ബാധിക്കുന്നതും മനുഷ്യരേയായിരിക്കും...

കൂട്ടുകാരേ... നിങ്ങളുടെ വീട്ടുപറമ്പിൽ എത്ര കുഴിയാനക്കുഴികളുണ്ട്?

എത്ര ദിവസം കൊണ്ടാണ് അവ പ്യൂപ്പയായി മാറുന്നത്? തുമ്പിയായി മാറിയാൽ എത്ര സമയമെടുക്കും പറക്കാൻ? ആദ്യം വിടർത്തുന്ന ചിറകുകളേ തായിരിക്കും! ആദ്യം പറക്കുന്നത് എങ്ങോട്ടയിരിക്കും?......

ഇനിയുമുണ്ട് കൗതുകം ഉറങ്ങുന്ന ചോദ്യങ്ങൾ....

കുഴിയാനയോടൊപ്പം ചേർന്ന് പഠിച്ച് എഴുതി വെക്കണേ...

നിങ്ങളുടെ

വി.വി.രവീന്ദ്രൻ മാസ്റ്റർ. GHSS ചെറുതാഴം കണ്ണൂർ .

അനുബന്ധം രണ്ട്

ഉറുമ്പുകൾ .....

           കൂട്ടുകാരേ ചുറ്റുപാടും നിരീക്ഷിച്ചും പുത്തൻ അറിവുകൾ നേടിയും നമുക്ക് ഈ കൊറോണക്കാലം ആസ്വദിക്കാം. നിരീക്ഷണകുറിപ്പുകൾ എഴുതിവെക്കണേ.....

നിങ്ങളുടെ വീട്ടിലും വീട്ടുപറമ്പിലും എത്ര തരം ഉറുമ്പുകളുണ്ട്... ഒന്ന് നടന്നു നോക്കിയാലോ... നിറത്തിലും വലുപ്പത്തിലും വ്യത്യസ്തമായവ... നമ്മെപ്പോലെ കുടുംബമായാണ് ഉറുമ്പുകളും ജീവിക്കുന്നത്. അവരുടെ സഞ്ചാരം ശ്രദ്ധിച്ചിട്ടുണ്ടോ കൂട്ടുകാർ... എന്തൊരു അച്ചടക്കമാണ് ..... അല്ലേ?

യാത്രയ്ക്കിടയിൽ എതിരെ വരുന്നവർ എന്തോ ആശയ വിനിമയം നടത്തുന്നുണ്ട്. എന്തായിരിക്കും അവർ പറയുന്നത്? എങ്ങോട്ടായിരിക്കും അവരുടെ സഞ്ചാരം? എന്തിനായിരിക്കും! കൂട്ടുകാർ നിരീക്ഷിക്കുക... കണ്ടെത്തുക. ഇനി ഇവർ കൂടൊരുക്കുന്നതിലും വൈവിധ്യമുണ്ട്. മരത്തിൻ്റെ പൊത്തിൽ കൂടു വെക്കുന്നവരുണ്ട്... ഇലകൾ ചേർത്തും മണ്ണിൽ കുഴിയുണ്ടാക്കിയും മണ്ണുകൾ ഉരുട്ടി കോട്ട പോലെ കെട്ടി കൂടു വെക്കുന്നവരും ഉണ്ട്...

ശ്രദ്ധയോടെ നിരീക്ഷിച്ചാൽ എന്തൊരു കൗതുകമായിരിക്കും ഇവരുടെ കാഴ്ചകൾ ..... ഇനി ഇവരിൽ പലർക്കും നിങ്ങൾക്കുള്ളത് പോലെ പേരില്ലത്രെ! അവരെ നിരീക്ഷിച്ച് പഠിച്ച് പേരിട്ടാലോ ...

ഓരോ ഉറുമ്പിൻ കോളനിയിലും പലവിഭാഗക്കാരുണ്ട്... അവർക്കൊക്കെ ഓരോ ജോലിയാണ്... അവരവർ അവരവരുടെ ജോലി ക്യത്യമായി ചെയ്യുമത്രെ. 

ഇനി പ്രകൃതിയിൽ ഇവർക്കും ചില ധർമ്മങ്ങളുണ്ട്. പല വിധത്തിൽ ഉറുമ്പുകൾ നമ്മെ സഹായിക്കുന്നുണ്ട്.. കീടങ്ങളെ നിയന്ത്രിച്ച് കാർഷിക വിളകൾക്ക് കരുത്ത് പകരുന്നവരുണ്ട് ഇവർക്കിടയിൽ ... മൃതശരീരങ്ങളെ മണ്ണിൻ്റെ ഭാഗമാക്കുന്നവരുമുണ്ടത്രെ! പൂക്കളിൽ പരാഗണം നടത്തുന്നവരുമുണ്ട്.

ഇനി മറ്റേതൊക്കെ രീതിയിൽ നമ്മെ സഹായിക്കുന്നുണ്ട്. കൂട്ടുകാർ കണ്ടെത്തി കുറിച്ചു വെക്കൂ ..

മരത്തിൽ മാത്രം കഴിയുന്നവ. മണ്ണിൽ മാത്രം കഴിയുന്നവ... മരത്തിലും മണ്ണിലും കഴിയുന്നവ.... ഇങ്ങനെ പലതരക്കാരുണ്ട് ഇവരുടെ കൂട്ടത്തിൽ ...

ഉറുമ്പുകളുടെ കൂടെ അവരുടെ കൗതുക ലോകത്തിലൂടെ സഞ്ചരിച്ച് അനുഭവങ്ങൾ കുറച്ചു വെച്ച് ... എനിക്കു അയച്ചു തരണേ....

നിങ്ങളുടെ

വി.വി.രവീന്ദ്രൻ മാസ്റ്റർ '

അനുബന്ധം മൂന്ന്

ചിലന്തികൾ.                              

കൂട്ടുകാരേ....

നമുക്കു മാത്രം അവകാശപ്പെട്ടതല്ല ഈ മണ്ണും വിണ്ണും ... ചെറുതും വലുതുമായ അനേകായിരം ജീവി വർഗങ്ങളുടേതുമാണ്‌. കൊറോണ വൈറസ് ലോകരാജ്യങ്ങളെയാകെ പരിഭ്രാന്തിയിലാക്കിയിരിക്കുകയാ 

ചുമരിലും ജനലിലും ടി.വി.ക്കു പിറകിൽ വരെ ഇവരെ കാണാൻ പറ്റും ... ചിലന്തി എന്ന പേര് ചൊല്ലി വിളിക്കുന്ന ഇക്കൂട്ടരെ സൂക്ഷ്മമായി നിരീക്ഷിക്കൂ.... നിറത്തിലും രൂപത്തിലും വലുപ്പത്തിലും മാത്രമല്ല ഇരപിടിക്കുന്ന രീതിയിൽ വരെ വ്യത്യസ്തരാണ് ചിലന്തികളെന്ന് അപ്പോഴാണ് മനസിലാവുക. വല കെട്ടി ഇരപിടിക്കുന്ന നട്ടെല്ലില്ലാത്ത ജീവിവർഗമാണ് ചിലന്തി. വലക്കെട്ടാതെ ഇര തേടുന്നവരുമുണ്ട് ഇവരുടെ കൂട്ടത്തിൽ.അവർ സസ്യങ്ങളിലെ സ്രവം കഴിച്ചാണ് ജീവിക്കുന്നത്. ഓരോ ചിലന്തിയുടേയും വലയും വലകെട്ടുന്ന രീതിയും വ്യത്യസ്തമാണ്. ചിലന്തിവലയും അവർ വല നെയ്യുന്ന രീതിയും ഒന്നു നിരിക്ഷിക്കൂ... എന്തൊരു കൗതുകമാണെന്നോ? വലുപ്പത്തിലും ആകൃതിയിലും ഒക്കെ വ്യത്യസ്തമാണ്. ഒരു വലയിലെ ഓരോ കണ്ണിയും തമ്മിലുള്ള കോൺ അളവ് വരെ തുല്യമാണ്.... പറമ്പിലെ നെയ്ത്തുകാരായ ചിലന്തിയെ വലനെയ്യാൻ പഠിപിച്ചതാരാണ്? ഒന്ന് ചിന്തിച്ചു നോക്കൂ.... എന്തൊരൽഭുതമാണല്ലേ... നമ്മുടെ വീട്ടിലേയും കൃഷിയിടങ്ങളിലേയും കീടങ്ങളെയും കൊതുകുകളേയും നിയന്ത്രിക്കുന്നതിൽ മാംസാഹാരിയായ ചിലന്തികൾക്ക് ഏറെ പ്രധാന്യമുണ്ട്. പൂക്കളേ പോലെ സൗന്ദര്യമുള്ള ചിലന്തികളുണ്ട്. പൂക്കളാണെന്നു കരുതി പൂമ്പാറ്റകൾ പാറി വന്നിരിക്കുമ്പോൾ സൂത്രക്കാരായ ചിലന്തി ചാടി വീണ് പൂമ്പാറ്റയെ പിടിച്ച് ആഹരിക്കും ... ചില കൂട്ടർ അവരുടെ വലയുടെ മധ്യത്തിൽ പതുങ്ങിയിരിക്കും.... ഇരയെ കാത്ത്. ടണൽ പോലെ നെയ്ത് അതിനകത്തിരിക്കുന്നവരുമുണ്ട്. ചിലന്തിവല കൊത്തിയെടുത്ത് കൂടുണ്ടാക്കുന്ന പക്ഷികളുമുണ്ട് നമ്മുടെ നാട്ടിൻ പുറത്ത്...

വേട്ടക്കാരൻ ചിലന്തി, ഇരട്ട വാലൻ ചിലന്തി ചാട്ടക്കാരൻ ചിലന്തി,വിറയൻ ചിലന്തി, ഇങ്ങനെ വിവിധ പേരിലാണ് ചിലന്തികൾ നാട്ടിൻ പുറങ്ങളിൽ അറിയപ്പെടുന്നത്.അരാ നിയോളജി [Araneology] എന്നാൽ എന്താണെന്നറിയുമോ കൂട്ടുകാർക്ക്? ചിലന്തികളേക്കുറിച്ചുള്ള പഠനത്തേയാണ് അരാനിയോളജി എന്നു പറയുന്നത്. 

ഒരു പുസ്തകവും പെൻസിലുമെടുത്ത് വീട്ടിനകത്തു നിന്നും നമുക്ക് തുടങ്ങാം ചിലന്തി യെക്കുറിച്ചുള്ള പഠനം. സൂക്ഷ്മമായി നിരീക്ഷിക്കണേ...

വലനെയ്യുന്ന വിധം...

ഇരപിടിക്കുന്ന രീതി....

ഒരു വലയിൽ എത്ര പേരുണ്ട് ...

കുഞ്ഞുങ്ങളെ സംരക്ഷിക്കുന്ന വിധം ....

മുട്ടയിടുന്നത് എവിടയാണ്....

അങ്ങനെയങ്ങനെ.... പ്രാണി വർധനവിനെ നിയന്ത്രിക്കുന്ന '... ചിലന്തിവിശേഷങ്ങളൊക്കെ നിരീക്ഷിച്ച് ' കുറിച്ചു വെച്ച് കുറിപ്പായി എഴുതി വെക്കണേ....

വി.വി.രവീന്ദ്രൻ മാസ്റ്റർ

അനുബന്ധം നാല്

പുൽച്ചാടി.

കൂട്ടുകാരേ...

പുൽച്ചാടികളെ കാണാത്തവരായി ആരും ഉണ്ടാകില്ല അല്ലേ....

അൽപ്പം പച്ചപ്പും പുൽച്ചെടികളുമുണ്ടെങ്കിൽ അവിടെ പുൽച്ചാടികളുമുണ്ടാകും.ഓരോ ദേശത്തും ഓരോ പേരിലാണത്രെ ഇവർ അറിയപ്പെടുന്നത്. പച്ചക്കുതിര, തത്താമുള്ള്, പുൽപ്പോത്ത്, പച്ചപ്പയ്യ്.......... ഇങ്ങനെ പോകുന്നു ഇവരുടെപേരുകൾ.. ഇവരുടെ സവിശേഷതകൾ കണ്ടെത്തി പൊതുവായ പേരിടേണ്ടതുണ്ട്.കൂട്ടുകാർക്കും ഒന്ന് പരിശ്രമിച്ചു കൂടെ.20000 ഇനത്തിൽ പെട്ട പുൽച്ചാടികളെ ഭൂമുഖത്ത് ഇതുവരെ തിരിച്ചറിഞ്ഞിട്ടുണ്ട്. എന്നാൽ നമ്മുടെ നാട്ടിൽ ഇതുവരേയായി ഇവരെക്കുറിച്ച് ഗഗനമായ പഠനം നടന്നിട്ടില്ല എന്നു തന്നെ പറയാം.

നീളം കൂടിയതും ബലമുള്ളതുമായ 2 പിൻ കാലുകളടക്കം 6 കാലുകളും ചിറകുക ളുമുള്ള ഇവർ സസ്യഭുക്കുകളാണ് കേട്ടോ...

1 cm മുതൽ 10 cm വരെ വലുപ്പമുള്ള പുൽച്ചാടികൾ പച്ച നിറത്തിലും മണ്ണിൻ്റേയും ഉണങ്ങിയ മരക്കമ്പുകളുടെയും നിറത്തിലും കാണപ്പെടുന്നു.ജന്മ ശത്രുക്കളിൽ നിന്നും രക്ഷ നേടാനുള്ള അനുകൂലനമാണ് പുൽച്ചാടികളുടെ ശരീരത്തിൻ്റെ നിറം.

അനുകൂല സാഹചര്യത്തിൽ ക്രമാതീതമായി വംശവർധനവ് നടത്തുവാൻ കഴിവുള്ള ജീവിവർഗമാണ് ഇവർ ... പ്രകൃതിയിൽ അതിൻ്റെ ആവിശ്യവുമുണ്ട്. എന്താണെന്നല്ലേ.... പറയാം.. കേട്ടോളൂ...

നമ്മുടെ നാട്ടിൻ പുറങ്ങളിലെ പക്ഷികളൊക്കെ അവരുടെ കുഞ്ഞുങ്ങൾക്ക് തീറ്റയായി നൽകുന്നതിൽ വലിയൊരു ഭാഗം പുൽച്ചാടികളാണത്രെ!  കണ്ണിയറ്റു പോകാതെ പ്രകൃതിയുടെ നിലനിൽപ്പിനു വേണ്ടി പിറക്കുന്നവർ....  സ്വയം ആഹാരമായി മാറി പക്ഷികളുടെ കുലം അറ്റുപോകാതിരിക്കാൻ പിറക്കുന്നവരാണ് പുൽച്ചാടികൾ. പറക്കുന്നതോടൊപ്പം പിൻ കാലുകൾ ഉപയോഗിച്ച് മുന്നോട്ടു ചാടുവാനും ഇവർക്കു കഴിയും ... പറക്കുമ്പോൾ ബലമുള്ള പിൻ കാലുകൾ ചിറകിന്നടിയിൽ മടക്കി വെക്കും. ചെടികളിലെ ഇലകളാണ് പ്രധാനമായും ഇവരുടെ ഭക്ഷണം. ലോകത്തിൻ്റെ പല ഭാഗങ്ങളിലേക്കും കാർഷിക വിളകളെ കൂട്ടമായി വന്ന് തിന്നു നശിപ്പിക്കുന്ന വെട്ടുകിളികളെക്കുറിച്ച് കേട്ടിട്ടില്ലേ നിനങ്ങൾ? ഇവരും പുൽച്ചാടി വിഭാഗത്തിൽ പെട്ടവരാണ് കേട്ടോ... ദേശാടനം നടത്തുന്ന വെട്ടുകിളികളുമുണ്ടത്രെ!

ഇനി ചെടികളുടെ വേരു തിന്നുന്ന ഒരു കൂട്ടരുണ്ട് പുൽച്ചാടികളുടെ കുടുംബത്തിൽ ... ആരാണെന്നല്ലേ... നമ്മുടെ നാട്ടിൻ പുറങ്ങളിൽ സന്ധ്യാനേരത്ത് ശബ്ദമുണ്ടാക്കുന്ന മണ്ണട്ട. 

മണ്ണട്ടകളും പുൽച്ചാടിയാണ്. സന്ധ്യയായാൽ ഇവർ പുറത്തിറങ്ങും. മുൻചിറകുകൾ ഉരസിയാണ് ഇവർ ശബ്ദമുണ്ടാക്കുന്നത്. ആൺ മണ്ണട്ടുകളേ ഇങ്ങനെ ശബ്ദമുണ്ടാക്കുകയുള്ളു... എന്തിനാണെന്നോ ''... ഇണകളെ ആകർഷിക്കാൻ. പാട്ടു പാടി ഇണകളെ ആകർഷിക്കുന്ന മണ്ണട്ടകളും നാട്ടിൻ പുറങ്ങളിൽ ഗണ്യമായി കുറയുകയാണ് ...

പുൽച്ചാടികളുടെ എണ്ണത്തിൽ ഗണ്യമായ കുറവുണ്ടായാൽ അത് ഒരു ആവാസവ്യവസ്ഥയെത്തന്നെ ഇല്ലാതാക്കിയെന്നു വരാം.ഭക്ഷ്യശൃംഖലയിലെ കണ്ണികൾ [ട്രോപ്പിക് തലം] മുറിഞ്ഞു പോകും. പുൽച്ചാടികളെക്കുറിച്ച് പഠിക്കണം.

ഇര തേടുന്ന വിധം '

ജിവിത ചക്രം ....

പൂമ്പാറ്റകൾക്കുള്ളതുപോലെ ...

പക്ഷികൾക്കുള്ളതുപോലെ ....

പുൽച്ചാടികൾക്കും ഓരോ പേരുണ്ടായിരിക്കണം....

അതിനായി ഇന്നു തന്നെ പഠനം തുടങ്ങിയാലോ ....

നിരീക്ഷണ സമയങ്ങളിൽ ഫോട്ടോ എടുത്തു വെക്കാൻ മറക്കല്ലേ .....

വി.വി.രവീന്ദ്രൻ മാസ്റ്റർ

അനുബന്ധം അഞ്ച്

പല്ലി.

കൂട്ടുകാരേ....

നിങ്ങളുടെ വീട്ടിലെ ചുമരിലും ടിവിക്കു പിറകിലും, ചുമരിൽ തൂക്കിയകണ്ണാടിക്കു പിന്നിലും മറ്റും പകൽ നേരങ്ങളിൽ പതുങ്ങിയിരിക്കുന്ന ഒരു സാധു ജീവിയാണ് പല്ലി. പല്ലിയെ കണ്ടിട്ടില്ലെ നിങ്ങൾ?  ഗെക്കോനിഡെ കുടുംബത്തിൽ പെട്ടവരാണ് പല്ലികൾ. ഫ്രെനേറ്റഡ് വിഭാഗത്തിൽ ഉൾപെട്ടവരാണ് ഇക്കൂട്ടർ. നമ്മുടെ വീട്ടിനകത്ത് രണ്ടു ഇനത്തിൻ പെട്ട പല്ലികളേയാണ് ഇതുവരെ തിരിച്ചറിഞ്ഞത്. ശരീരത്തിൽ ചെറിയ പുള്ളികളോടുകൂടിയവരാണ് ഒരു കൂട്ടർ. എന്നാൽ രണ്ടാമത്തെ വിഭാഗക്കാർ കുറച്ചു കറുത്ത നിറത്തോടു കൂടിയ വരും... പകൽനേരം പതുങ്ങിയിരിക്കുന്ന പല്ലികൾ സന്ധ്യയോടു കൂടിയാണ് ആഹാരം തേടിയും ഇണയേ തേടിയും പുറത്തേക്കിറങ്ങുന്നത്. അതിനാൽ പല്ലി നിരീക്ഷണത്തിന് ഉചിതമായ സമയം സന്ധ്യക്കു ശേഷമാണ്. പല്ലിയെ നിരീക്ഷിച്ച് കണ്ടെത്തിയ കാര്യങ്ങൾ കുറിച്ചു വെക്കുന്നതോടൊപ്പം കൂട്ടുകാർ അവരുടെ ഫോട്ടോ എടുത്തു വെക്കുകയും വേണം കേട്ടോ.....

ഒരു ദിവസം ഒരു മണിക്കൂർ നേരം ഒരു പല്ലിയെ മാത്രം നിരീക്ഷിക്കുക. അവൻ എത്ര പ്രാണികളെ പിടിക്കുന്നു എന്ന് കണ്ടെത്തുക. രണ്ടോ മൂന്നോ ദിവസം ഇതു തുടരുക. എന്നിട്ട് അതിൻ്റെ ശരാശരി കാണുക. ഇനി നിങ്ങളുടെ വീട്ടിൽ ആകെ എത്ര പല്ലികളുണ്ട് എന്നും കണ്ടെത്തു. അത്രയും പല്ലികൾ ഒരു മണിക്കൂർ നേരം കൊണ്ട് പിടിക്കുന്ന പ്രാണികളുടെ എണ്ണം കണക്കാക്കി നോക്കൂ.... 

അപ്പോഴറിയും പല്ലികളുടെ പ്രാധാന്യം. കൂട്ടുകാരേ  നിങ്ങളുടെ വീട്ടിനകത്ത് പല്ലികളില്ലാതായാൽ ഉണ്ടാകുന്ന കീടവർധനവ് ചിന്തിക്കുവാൻ പോലും പറ്റുന്നില്ല അല്ലേ ....

നമ്മുടെ നാട്ടിൽ കാണുന്ന ഓന്തും അരണയും ഉടുമ്പും ഇവരുടെ ജനുസ്സിൽപെട്ടവരാണ് കേട്ടോ...

ഒരാൺപല്ലിയുടെ അധീനതയിലുള്ള സ്ഥലത്തേക്ക് മറ്റൊരുത്തൻ വരുമ്പോൾ വാലുയർത്തി വിറപ്പിച്ച് അതിനെ ഭയപ്പെടുത്തി ഓടിക്കും. ഇനി മറ്റു ശത്രുക്കൾ പിടിക്കാൻ വന്നാലോ ഉരുണ്ട വാൽ മുറിച്ച് താഴേക്കിടും... താഴെ വീണ വാൽ പിടയ്ക്കും.'' ''താഴെ നിന്നു പിടയ്ക്കുന്ന വാലാണ് ഇരയെന്നു കരുതി ശത്രു വാലിന്നരികിലേക്കു കുതിക്കുമ്പോഴേക്കും പല്ലി സുരക്ഷിത സ്ഥാനത്തെത്തിയിരിക്കും. പല്ലിനിരീക്ഷണത്തിലേർപ്പെട്ടാൽ ഇങ്ങനെ രസകരമായ എന്തൊക്കെ കാഴ്ചകളുണ്ടെന്നോ... ഇവർ ചുമരിലെ വിടവിലും കണ്ണാടിക്കും, ടി.വിക്കും പിറകിലും മറ്റും മുട്ടയിടും. ഒരു അമ്മപ്പല്ലി ഒരു തവണ നാലുമുതൽ അഞ്ചു വരെ മുട്ടയിടും ' മുട്ട വിരിഞ്ഞു പുറത്തേക്കിറങ്ങുന്ന കുഞ്ഞുങ്ങളും നാവു നീട്ടി ഇരതേടാനിറങ്ങും... അവർക്ക് ജീവിതം ആരും പഠിപ്പിക്കുന്നില്ല ... ഇരപിടിക്കേണ്ട വിധം... ശത്രുക്കളിൽ നിന്നും രക്ഷ നേടേണ്ട വിധം ..... ഇങ്ങനെ പലതും അവർ സ്വയം ആർജിക്കുന്നതാണത്രെ! 

വീട്ടിനു വെളിയിലുമുണ്ട് മറ്റൊരു കൂട്ടർ. മരങ്ങളിൽ തടിയോടു ചേർന്ന് കിടക്കുന്ന കുറച്ചു മെലിഞ്ഞ് ഇരുണ്ട ചാരനിറത്തോടുകൂടിയ ഒരു വിഭാഗം. മരങ്ങളിലെത്തുന്ന പ്രാണികളെ നിയന്ത്രിക്കുന്ന ഇവർ തെങ്ങിനുണ്ടാകുന്ന മണ്ടരി രോഗം തടയുന്നതിന്നു സഹായിക്കുന്നുണ്ടെന്ന് കണ്ടെത്തി.ഇതിനെ കുറിച്ച് കൂടുതൽ പഠനം നടക്കുകയാണ്.... കൂട്ടുകാരേ... നിങ്ങളും നിരീക്ഷിക്കൂ.. പല്ലികൾക്ക് പ്രകൃതിയിലുള്ള പ്രാധാന്യം കണ്ടെത്തൂ.... ഇനി രസകരമായ മറ്റൊരു കാഴ്ചയുണ്ട്. എന്താണെന്നോ ...

മരമുകളിൽ കാണുന്ന പല്ലികൾ സുരക്ഷിതമായ ഒരിടം കണ്ടെത്തി ഒന്നിൽ കൂടുതൽ അമ്മമാർ ഒന്നിച്ച് മുട്ടയിടും. എന്നിട്ട് അവരെല്ലാവരും ചേർന്ന് മുട്ടയ്ക്ക്  കാവലിരിക്കും... വിരിയും വരെ... എന്തൊരു ഒരുമയാണല്ലെ! ഏഴര മുതൽ പതിനഞ്ച് സെൻ്റീമീറ്റർ വരെ നീളമുള്ള പല്ലികൾക്ക് വട്ടമുള്ള  ചെറിയകർണ്ണപുടങ്ങളും വിടർന്നതും സ്വതന്ത്രവുമായ വിരലുകളുമുണ്ട്. അകത്തെ വിരലിൽ അനക്കാനാവാത്ത നഖവും ഉണ്ടത്രെ. ശരീരത്തിൻ്റെ മുകൾഭാഗത്ത് ചെറിയ തരികൾ കാണാം...മൂക്കിൻ പുറത്താണ് കൂടുതലായി തരികൾ കാണുന്നത് ... ഉരുണ്ട വാലിൽ നിറയെ ശൽക്കങ്ങളും ...

കൂട്ടുകാരേ... 

നമ്മുടെ ഗൃഹനിർമ്മാണ രീതിയൊക്കെ മാറിയപ്പോൾ .....

വീട്ടിന്നകത്ത് രാത്രിയെ പകലാക്കുന്ന വെളിച്ചം വിതറിയപ്പോൾ ഒരു കാലത്ത് ധാരാളം കണ്ടിരുന്ന പല്ലികളും ഗണ്യമായി കുറയുകയാണ് ... നമ്മുടെ വീട്ടിലും പറമ്പിലും മൂന്നു വിഭാഗത്തിൽ പെട്ടവരേയുള്ളു? കൂട്ടുകാർ നിരീക്ഷിച്ച് കണ്ടെത്തൂ.... പല്ലികളുമായി ബന്ധപ്പെട്ട വിശ്വാസങ്ങളും പഴഞ്ചൊല്ലുകളും ശൈലികളുമുണ്ട് നമ്മുടെ നാട്ടിൻ പുറങ്ങളിൽ ധാരാളം. ഇത്തരം കാര്യങ്ങളും കണ്ടെത്തണേ

നൂറ്റാണ്ടുകളായി നിശ്ശബ്ദരായി കഴിഞ്ഞ് കീടങ്ങളെ നിയന്ത്രിക്കുന്ന പല്ലികളുടെ അൽഭുതലോകത്തിലേക്കിറങ്ങി കണ്ടെത്തിയ കാര്യങ്ങൾ ലഘുകുറിപ്പുകളായി അയച്ചു തരണേ....

വി.വി.രവീന്ദ്രൻ മാസ്റ്റർ

അനുബന്ധം ആറ്

മരം ഒരു വരം. 

[ഭാഗം ഒന്ന്.]

കൂട്ടുകാരേ...

നിങ്ങളുടെ വീട്ടുപറമ്പിൽ എത്ര മരങ്ങളുണ്ട്? മരങ്ങളുടെ എണ്ണം മാത്രം മതികേട്ടോ... പുൽച്ചെടികളേയും വള്ളിച്ചെടികളേയും മറ്റും ഒഴിവാക്കിയിട്ടായിരിക്കണം കണക്കെടുക്കേണ്ടത്. ഏതൊക്കെ മരങ്ങളാണ് ഉള്ളത്? എല്ലാ മരങ്ങളുടേയും പേര് കുറിച്ചെടുക്കണേ... പേരറിയാത്ത മരങ്ങൾ ഉണ്ടെങ്കിൽ മുതിർന്നവരോട് ചോദിച്ച് രേഖപ്പെടുത്തണേ......

ഇനി ഒരു മരത്തെ നിരീക്ഷിച്ചാലോ ... 

നിങ്ങളുടെ പറമ്പിലെ നിങ്ങൾക്കിഷ്ടമുള്ള ഒരു മരത്തിന്നരികിലേക്കു പോകാം...

മരത്തിൻ്റെ തടിയിലേക്കു സൂക്ഷിച്ചു നോക്കൂ... കറുപ്പം വെളുപ്പും ചാരനിറത്തിലും മറ്റും വരകളും പുള്ളികളും കാണുന്നില്ലേ... അവയൊക്കെ ഓരോ ജീവിവർഗമാണ്. ഏതൊക്കെ നിറത്തിലുള്ള പുള്ളികളുണ്ട്? അവരെല്ലാം ഒരേ ജീവിവർഗമാണോ? നിങ്ങൾ നിരീക്ഷിച്ച് പഠിച്ച് കണ്ടെത്തുക. നിരന്തരമായ പഠനമുണ്ടെങ്കിലേ ശാസ്ത്രീയമായ നിഗമനത്തിലെത്തുവാൻ കഴിയൂ കേട്ടോ.... 

ഇനി ആ മരത്തെ ആശ്രയിച്ചു കഴിയുന്ന മറ്റേതൊക്കെ സസ്യങ്ങളുണ്ട്?

ഇത്തിൾക്കണ്ണി, മരവാഴ, വിവിധ പന്നൽച്ചെടികൾ... ഇങ്ങനെ നിരവധി പേരുണ്ട് കേട്ടോ.... ഇവർ എന്തിനൊക്കെ ആയിരിക്കും മരത്തെ ആശ്രയിക്കുന്നത്? കണ്ടെത്തി കുറിച്ചു വെക്കണേ...

ഇനി ഒന്നുകൂടി സൂക്ഷ്മമായി നിരീക്ഷിച്ചു നോക്കൂ... മറ്റേതൊക്കെ ജീവികളുണ്ട് മരത്തിൽ? ഉറുമ്പുകൾ, ചിലന്തികൾ, പല്ലിയും ഓന്തും അരണയും മാത്രമല്ല പക്ഷികൾ ചിത്രശലഭങ്ങൾ നിശാശലഭങ്ങൾ ... ഇങ്ങനെ എത്രയെത്ര ജീവികളാണ് ഒരു മരത്തെ ആശ്രയിച്ചു കഴിയുന്നത് അല്ലേ.... വവ്വാൽ 'അണ്ണാൻ തുടങ്ങി നിരവധി സസ്തനികളുമുണ്ട് കേട്ടോ.

കൂടു വെച്ച് കുഞ്ഞുങ്ങളെ വളർത്താൻ'' '

താമസിക്കാൻ, അന്തിയുറങ്ങാൻ ' ആഹാരത്തിനായി.... 

ഓരോ കൂട്ടരും ഓരോരോ കാര്യത്തിനായി മരത്തെ ആശ്രയിക്കുന്നു... മരത്തെ താങ്ങായി ഉപയോഗിക്കുന്ന വള്ളിച്ചെടികളുമുണ്ട് അനവധി... എല്ലാ കാര്യങ്ങളും സൂക്ഷ്മമായി നിരീക്ഷിക്കണേ.... 

വ്യക്തമായ കണക്കെടുത്ത് രേഖപ്പെടുത്തി നോക്കുമ്പോഴറിയാം ഒരു മരമെന്നാൽ അനേകം ജീവജാലങ്ങൾ ചേർന്നതാണെന്ന്. ഇത്തരം എത്ര മരങ്ങൾ ഉണ്ട് നിങ്ങളുടെ വീട്ടുപറമ്പിൽ? എല്ലാ മരങ്ങളിലും കൂടി ആകെ എത്ര ജീവികളുണ്ടാകും? ഒന്ന് കൂട്ടി നോക്കൂ.... അൽഭുതമല്ലേ ....

ഒരു മരം നഷ്ടപെട്ടാൽ ഇല്ലാതാകുന്ന ജീവജാലങ്ങളുടെ കണക്കു കിട്ടിയില്ലെ കൂട്ടുകാർക്ക്?

അപ്പോൾ ഒരു കാട് നഷ്ടപെട്ടാൽ ഇല്ലാതാകുന്ന ജീവിവർഗങ്ങളുടെ എണ്ണം എത്ര വലുതായിരിക്കും അല്ലേ...

നമ്മുടെ വീട്ടുപറമ്പിൽ ഒരു മരം നട്ടുവളർത്തിയാൽ എത്ര ജീവികൾക്കായിരിക്കും ഇടം ലഭിക്കുന്നത് അല്ലേ ...

കൂട്ടുകാരേ...

നമുക്കും ഒരു മരം നടാം...

നാം നട്ട മരത്തെ

നമുക്ക് സംരക്ഷിക്കാം...

മരത്തെ നിരീക്ഷിച്ചു പഠിച്ച അറിവുകളോടൊപ്പം നിങ്ങൾ നട്ട മരത്തിൻ്റെ വളർച്ചയും വളർച്ചാ ഘട്ടങ്ങളിലെ മാറ്റങ്ങളും കുറിച്ചുവെക്കണേ....

എത്ര ശാഖകൾ വന്നു!

തളിരിടുന്ന കാലം ഏത്?

പൂവിടുന്നതെപ്പോൾ?

ചേക്കേറുന്ന പറവകളുണ്ടൊ?

തണൽ തേടി വരുന്നവരുണ്ടോ?

അങ്ങനെയങ്ങനെ... എല്ലാ കാര്യങ്ങളും നിരീക്ഷിക്കണേ....

വി.വി.രവീന്ദ്രൻ മാസ്റ്റർ

അനുബന്ധം ഏഴ് പ്രകൃതി പാഠം 7

മരം ഒരു വരം: [രണ്ടാം ഭാഗം.]

കൂട്ടുകാരേ.....

നിങ്ങൾ ഒരു മരത്തെക്കുറിച്ച് പഠിച്ചില്ലെ...''

ഇനി വീട്ടുപറമ്പിലെ ഓരോ മരത്തിൻ്റേയും തടി മാത്രം നിരീക്ഷിച്ചാലോ ... 

മരത്തൊലികൾക്കിടയിൽ അവർ ഒളിപ്പിച്ചുവെച്ച രഹസ്യങ്ങൾ നിങ്ങൾക്കും കണ്ടെത്താമല്ലോ... അല്ലേ..

ഓരോ മരത്തിന്നും ഓരോ നിറത്തിലുള്ള തൊലിയാണ്. ഇനി തൊലിയുടെ ഘടനയിലും വ്യത്യാസമുണ്ട്. ചിലത് മിനുസമുള്ളതായിരിക്കും.... നേരിയ തൊലി ഭാഗം അടർന്നു പോകും... പേരമരം കണ്ടിട്ടില്ലേ നിങ്ങൾ? അതുപോലെയാണോ പ്ലാവിൻ്റെ തടി? അല്ല അല്ലേ... കട്ടിയുള്ള വലിയ ഭാഗം അടർന്നുവീഴാറായി നിൽക്കുന്നത് കണ്ടിട്ടില്ലെ?അതിനടിയിൽ ചുവപ്പും മഞ്ഞയും കലർന്ന നിറവും...

മാവിൻ്റെ തടി ഈ രൂപത്തിലേ അല്ല കേട്ടോ... കുത്തനെ വളഞ്ഞുo പുളഞ്ഞും വരയിട്ടതുപോലെ തൊലി അടർന്നു നിൽക്കുന്നു... അല്ലേ...

ഒറ്റത്തടി മരമായ തെങ്ങിൻ്റെയും കമുകിൻ്റെയും തടി എങ്ങനെയാണ്? നിരീക്ഷിച്ചു കണ്ടെത്തൂ...

ഓരോ മരത്തിൻ്റേയും തടയിലുള്ള  വ്യത്യസ്തമായ ഈ സവിശേഷത നന്നായി ഉപയോഗിക്കുന്ന മറ്റു ജീവജാലങ്ങളും ഉണ്ട് കേട്ടോ...

രസകരമാണ് അവരേക്കുറിച്ചുള്ള പഠനവും... പ്ലാവിൻ തൊലിക്കിടയിൽ ജീവിക്കുന്നവരായിരിക്കില്ല തെങ്ങിൻതടിയിൽ... ചിലന്തികൾ ഉറുമ്പുകൾ പല്ലികൾ ഇവർക്കൊക്കെ ജീവിക്കാൻ പറ്റുന്ന വിധത്തിലുള്ള അളുക്കുകളുണ്ട് ഓരോ മരത്തടിയിലും... എല്ലാ വള്ളിച്ചെടികൾക്കും പിടിച്ചു കയറാൻ പറ്റാത്ത തടികൾ ഉണ്ട്... മറ്റു ചെടികൾക്ക് വേരിറക്കാൻ പറ്റാത്ത മരത്തടികൾ ...'' അങ്ങനെ എത്ര വൈവിധ്യമാണെന്നോ മരത്തടികൾ ... 

ഓരോ മരത്തടിയിലും ജീവിക്കുന്നവർ ആരൊക്കെയാണെന്ന് നിരീക്ഷിച്ചു കണ്ടെത്തണേ....

ഇപ്പോൾ കൂട്ടുകാർക്ക് മനസിലായില്ലെ മാവിൽ ഉള്ളതുപോലെ പായലും പന്നലും പേരയിൽ വളരാത്തതെന്തെന്ന്?

പക്ഷി നിരീക്ഷണം പോലെ' ''

ചിത്രശലഭ നിരീക്ഷണം പോലെ മരത്തടി നിരീക്ഷണവും രസകരമായ ഒരു പഠനമാണ്.

വീട്ടുപറമ്പിൽ നിന്നും തുടങ്ങാം... മരത്തടി നിരീക്ഷണം ...

ഓരോ മരത്തടിയുടേയും നിറം എന്തെന്ന് ?

ഘടനയെങ്ങനെയെന്ന്?

അവരുടെ തൊലിക്കിടയിൽ ജീവിക്കുന്ന ജീവികളേ തെന്ന്?

അങ്ങനെ മരങ്ങളോടു സംസാരിച്ചും നിരീക്ഷിച്ചും പഠിക്കുമ്പോൾ തടികളുടെ ഫോട്ടോ എടുക്കുന്നതോടൊപ്പം ഒരു വെള്ളക്കടലാസിൽ തടിയുടെ പകർപ്പ് എടുത്തു നോക്കൂ... രസകരമായ ചിത്രങ്ങളായിരിക്കും അത്...

പകർപ്പെടുക്കാൻ എളുപ്പമാണ് കേട്ടോ...

ഒരു പേപ്പർ മരത്തടിയിൽ ചേർത്തുവെക്കുക. പിന്നീട് പെൻസിലോ ക്രയോണോ ഉപയോഗിച്ച് പേപ്പറിനു മുകളിൽ മെല്ലെ ഉരസുക' മരത്തടിയുടെ പകർപ്പു റെഡി.

ഇനി കൂട്ടുകാർ ഒരുങ്ങിയില്ലെ വീട്ടുപറമ്പിലെ മരത്തടിയുടെ രഹസ്യം കണ്ടെത്തുവാൻ ...

തുടങ്ങിക്കോളൂ ....

വി.വി.രവീന്ദ്രൻ മാസ്റ്റർ

GHSS ചെറുതാഴം. കണ്ണൂര്

എടാട്ടുമ്മൽ '94005158 69.

അനുബന്ധം എട്ട് -പ്രകൃതി പാഠം: 8

മരം ഒരു വരം 

[മൂന്നാം ഭാഗം ]

കൂട്ടുകാരേ...

പക്ഷികളേക്കുറിച്ചും പൂമ്പാറ്റകളേക്കുറിച്ചും ഉള്ള പഠനത്തേപ്പോലെ രസകരമാണ് സസ്യ വൈവിധ്യങ്ങളേക്കുറിച്ചുള്ള പഠനവും. മറ്റു ജീവികളെക്കുറിച്ചുള്ള പഠനത്തേക്കാൾ ചില കാര്യങ്ങളിൽ കുറച്ചു കൂടി എളുപ്പമാണ് സസ്യങ്ങളേ കുറിച്ചുള്ള പഠനം കേട്ടോ... എന്താണെന്നോ ...

പക്ഷികളേ പോലെ പൂമ്പാറ്റകളേപ്പോലെ അവ സഞ്ചരിക്കില്ലല്ലോ ... അല്ലേ.

കൂട്ടുകാരേ... 

ഇന്നത്തെ നിരീക്ഷണം ഒരു പരീക്ഷണത്തിലൂടെയാകാം... എന്താ ...

പരീക്ഷണത്തിനായി ഒരു പോളിത്തീൻ കവറും കുറച്ചു നൂലും കരുതണേ.... 

ഇനി പരീക്ഷണം തുടങ്ങാം..

വീട്ടുപറമ്പിൽ നന്നായി ഇലകളുള്ള ഒരു ചെടിയുടെ അരികിൽ പോവുക. ഒരു മരമായാലും പ്രശ്നമില്ല കേട്ടോ... മാവോ പ്ലാവോ..... എന്തുമാകാം. പക്ഷേ നിങ്ങൾക്ക് താഴെ നിന്നാൽ എത്തുന്ന ഒരു ശിഖരം ഉണ്ടാകണം എന്നു മാത്രം. ഇനി നിങ്ങൾ തെരഞ്ഞെടുത്ത ചെടിയിൽ നന്നായി ഇലകളുള്ള [5 മുതൽ 10 വരെ ഇലകളായാൽ നന്ന് ] ഒരു കമ്പിലെ ഇലകൾ കമ്പോടു ചേർന്ന് പോളിത്തീൻ കവറിനുള്ളിലേക്ക് തിരുകി വെക്കുക. ചെടിയിൽ നിന്നും ഇലകളും കമ്പും വേർപെടുത്തരുതേ... കമ്പിലെ അഗ്രഭാഗങ്ങളിലെ എല്ലാ ഇലകളും കവറിനകത്തേക്കു കയറ്റിയതിനു ശേഷം നൂലുപയോഗിച്ച് കവറിൻ്റെ അഗ്രഭാഗം കമ്പോടു ചേർത്ത് നന്നായി കെട്ടുക. കവറിനകത്തുനിന്നുമുള്ള വായു പ്രവാഹം തടയുന്ന വിധംകെട്ടണേ.... രാവിലെ 10 മണിക്കു ശേഷം പരീക്ഷണം തുടങ്ങുന്നതാണ് നല്ലത്. ഒന്നോ രണ്ടോ മണിക്കൂറിനു ശേഷം കവർ മെല്ലെ അഴിച്ചു നോക്കൂ... കവറിനകത്ത് ശുദ്ധമായ ജലം കാണാം..

എവിടന്നു വന്നു... ഈ ജലം എന്നല്ലേ... കരയിലുള്ള സസ്യങ്ങളിലെ ഓരോ ഇലയുടെ അടിവശങ്ങളിലും ഉള്ള ആസ്യരന്ധ്രങ്ങൾ, ഇലയിൽ എത്തുന്ന അധികജലം പുറം തള്ളും. ഇങ്ങനെയുള്ള ജലമാണ് കവറിൽ നിങ്ങൾ ശേഖരിച്ചു വെച്ചിരിക്കുന്നത്. നിങ്ങൾക്ക് ലഭിച്ച ജലം അളന്നു നോക്കൂ...നിങ്ങൾ പരീക്ഷണത്തിന്നു വേണ്ടിയെടുത്ത ചെടിയിൽ ഇങ്ങനെ എത്ര കമ്പുകളുണ്ടാകും... ഏകദേശ കണക്ക് തയ്യാറാക്കു.... അത്രയും കമ്പുകളിലെ ഇലകൾ ഒരു മണിക്കൂറിൽ പുറം തള്ളുന്ന ജലം എത്രയായിരിക്കും? ചെറുതും വലുതുമായ എത്ര സസ്യങ്ങൾ ഉണ്ട് നിങ്ങളുടെ പറമ്പിൽ? അത്രയും ചെടികൾ ഒരു മണിക്കൂറിൽ പുറത്തേക്കു വിടുന്ന ജലത്തിൻ്റെ അളവ് കണ്ടു നോക്കൂ.... പകൽനേരം മൊത്തം പുറത്തുവിടുന്നതോ... കൂട്ടി നോക്കുമല്ലോ... അല്ലേ...

നമ്മുടെ അന്തരീക്ഷത്തെ ആർദ്രമാക്കുന്നതിൽ ചെടികൾക്കുള്ള പ്രാധാന്യം മനസിലായില്ലെ കൂട്ടുകാർക്ക്?

നല്ല ചൂടുള്ളപ്പോൾ മരച്ചോട്ടിൽ നിന്നാൽ തണുപ്പുണ്ടാകുന്നത് എന്താണെന്നും മനസിലായില്ലെ...

ആഹാരം തരുന്നവരും ...

ഓക്സിജൻ തരുന്നവരും ...

കാർബൺ ഡൈ ഓക്സൈഡിനെ ക്രമീകരിക്കുന്നവരും മാത്രമല്ല പച്ച നിറമുള്ള സസ്യങ്ങൾ ......

ഭൂമിയിൽ ജീവൻ്റെ ആരോഗ്യപരമായ നിലനിൽപ്പിന് അത്യന്താപേക്ഷിതമാണ് ഈ ജീവിവർഗം ...

അവയെ നാം കാക്കേണ്ടതുണ്ട്.

കരുതേണ്ടതുണ്ട്...

നമുക്കു വേണ്ടി...

വരും തലമുറയ്ക്കു വേണ്ടി.....

നമുക്കും നടാം ഒരുമരം....

നട്ടു വരുത്താം......

വളരുന്നതോടൊപ്പം മരത്തെ പഠിക്കണം...

എത്രണ ഇലകൾ വന്നു?

തളിരിടുന്ന മാസമേത്?പൂത്തതെപ്പോൾ?

കായ്ക്കുന്നതെപ്പോൾ?

നിങ്ങൾ നട്ട മരത്തെ ആശ്രയിക്കുന്ന മറ്റു ജീവികൾ ആരൊക്കെയാണ് ....

അങ്ങനെയങ്ങനെ....

ഒത്തിരിയൊത്തിരി കാര്യങ്ങളുണ്ട് കേട്ടോ......

എല്ലാം പഠിച്ച് കുറിച്ചുവെക്കണേ...

വി.വി.രവീന്ദ്രൻ മാസ്റ്റർ. GHSS ചെറുതാഴം' കണ്ണൂർ

എടാട്ടുമ്മൽ.9400515869