ചൂണ്ടുവിരലിലെ വിഭവങ്ങള്‍

2010 ജൂലൈമുതല്‍ അക്കാദമിക വിഭവങ്ങളുമായി ഈ വിദ്യാഭ്യാസ ബ്ലോഗ് ...പ്രയോജനപ്പെടുത്തുക, പ്രയോഗിക്കുക, പ്രചോദിപ്പിക്കുക, പ്രചരിപ്പിക്കുക.. ചൂണ്ടുവിരലില്‍ പങ്കിട്ട വിഭവമേഖലകള്‍....> 1.അധ്യാപക ശാക്തീകരണം ,2. വായനയുടെ വഴി ഒരുക്കാം, 3.എഴുത്തിന്‍റെ തിളക്കം, 4.വിദ്യാഭാസ ഗുണനിലവാരം- സംവാദം,5. മികവ്, 6.ശിശുസൌഹൃദ വിദ്യാലയം, 7.സര്‍ഗാത്മക വിദ്യാലയം, 8.നിരന്തര വിലയിരുത്തല്‍, 9.ഗണിതപഠനം, 10.വിദ്യാഭ്യാസ അവകാശ നിയമം, 11.ദിനാചരണങ്ങള്‍, 12.പാര്‍ശ്വവത്കരിക്കപ്പെടുന്നവര്‍, 13. രക്ഷിതാക്കളും സ്കൂളും, 14. കളരി, 15. ക്ലാസ് അന്തരീക്ഷം/ക്രമീകരണം, 16.ഇംഗ്ലീഷ് പഠനം, 17.ഒന്നാം ക്ലാസ്, 18. ശാസ്ത്രത്തിന്റെ പാത, 19.ആവിഷ്കാരവും ഭാഷയും, 20. പ്രത്യേക പരിഗണന അര്‍ഹിക്കുന്ന കുട്ടികള്‍, 21. ഐ ടി സാധ്യതകള്‍, 22. പഠനറിപ്പോര്‍ട്ടുകള്‍, 23.പഠനമാധ്യമം 24. ഭൌതികസൌകര്യങ്ങളില്‍ മികവ്, 25.അക്കാദമികസന്ദര്‍ശനം, 26.ഗ്രാഫിക് ഓര്‍ഗനൈസേഴ്സ്, 27.പ്രഥമാധ്യാപകര്‍.,28. ബാല, 29. വളരുന്ന പഠനോപകരണം,30. കുട്ടികളുടെ അവകാശം, 31. പത്രങ്ങള്‍ സ്കൂളില്‍, 32.പാഠ്യപദ്ധതി,33. ഏകീകൃത സിലബസ്, 34.ഡയറ്റ് .35.ബി ആര്‍ സി,36. പരീക്ഷ ,37. പ്രവേശനോത്സവം,38. IEDC, 39.അന്വേഷണാത്മക വിദ്യാലയങ്ങളുടെ ലോകജാലകം, 40. കലാവിദ്യാഭ്യാസം, 41.പഞ്ചായത്ത്‌ വിദ്യാഭ്യാസ സമിതി, 42. പഠനോപകരണം, 43.പാഠ്യപദ്ധതി പരിഷ്കരണം, 44. ചൂണ്ടുവിരല്‍,45. ടി ടി സി, 46.പുതുവര്‍ഷം, 47.പെണ്‍കുട്ടികളുടെ ശാക്തീകരണം, 48. ക്രിയാഗവേഷണം,49. ടീച്ചിംഗ് മാന്വല്‍, 50. പൊതുവിദ്യാഭ്യാസസംരക്ഷണം, 51.ഫീഡ് ബാക്ക്, 52.സ്റ്റാഫ് റൂം, 53. കുട്ടികളുട അവകാശം,54. കൃഷിയും പഠനവും,55. നോട്ട് ബുക്ക് ആകര്‍ഷകവും സമഗ്രവും, 56.പഠനയാത്ര, 57. വിദ്യാബ്ലോഗുകള്‍,58. സാമൂഹികശാസ്ത്രം, 59. സ്കൂള്‍ അസംബ്ലി, 60.സ്കൂള്‍ റിസോഴ്സ് (റിസേര്‍ച്) ഗ്രൂപ്പ് - ,61.പ്രതിഫലനാത്മകക്കുറിപ്പ്, 62. ബദല്‍പാഠങ്ങള്‍, 63.മെന്ററിംഗ്,64. വര്‍ക്ക്ഷീറ്റുകള്‍ ക്ലാസില്‍, 65.വിലയിരുത്തല്‍, 66. സാമൂഹിക ശാസ്ത്രാന്തരീക്ഷം, 67.അനാദായം, 68.എ ഇ ഒ , 69.കായികവിദ്യാഭ്യാസം,70. തിയേേറ്റര്‍ സങ്കേതം പഠനത്തില്‍, 71.നാടകം, 72.നാലാം ക്ലാസ്.73. പാഠാവതരണം, 74. മോണിറ്ററിംഗ്, 75.വിദ്യാഭ്യാസ ചിന്തകള്‍, 76.സഹവാസ ക്യാമ്പ്, 77. സ്കൂള്‍ സപ്പോര്‍ട്ട് ഗ്രൂപ്പ്,78.പ്രദര്‍ശനം,79.പോര്‍ട്ട്‌ ഫോളിയോ...80 വിവിധജില്ലകളിലൂടെ... പൊതുവിദ്യാഭ്യാസത്തിന്റെ കരുത്ത് അറിയാന്‍ ചൂണ്ടുവിരല്‍...tpkala@gmail.com.

Tuesday, August 26, 2014

പെരുവട്ടൂരില്‍ പെരുമയുളള വിദ്യാലയമുണ്ട്


യുറീക്ക രചനാശില്പശാലയില്‍ പങ്കെടുക്കാനാണ് കൊയിലാണ്ടിയിലെത്തിയത്.
രാജേഷ് വളളിക്കോടും ഞാനും റെയില്‍വേസ്റ്റേഷനിലിറങ്ങി
പന്തലായനി സ്കൂളില്‍ വര്‍ഷങ്ങള്‍ക്കു മുമ്പ് അധ്യാപനത്തിന്റെ അരങ്ങേറ്റം നടത്തിയ ഓര്‍മകള്‍ വരവേല്‍ക്കാന്‍ അവിടെ കാത്തു നിന്നിരുന്നു,
അന്നത്തെ സഹാധ്യാപകനായ ശ്രീ ഗോപി മാഷ്ടെ വീട് അടുത്താണ്. മാഷെ കണ്ട ശേഷം ഞങ്ങള്‍ പെരുവട്ടൂരിലെ ഉജ്ജയിനിയില്‍ എത്തി
ശില്പശാല തുടങ്ങാന്‍ വൈകും. പത്തുമണി വരെ സമയം
സ്വാതന്ത്ര്യ ദിനമാണ്
ഞങ്ങള്‍ നടക്കാനിറങ്ങി
കുട്ടികള്‍ പോകുന്നു.
അവരെ പിന്തുടര്‍ന്ന് ഞങ്ങള്‍ പെരുവട്ടൂര്‍ എല്‍ പി എസില്‍ എത്തി
പരിചയപ്പെട്ടു
അവിടുത്തെ ഗോപാലകൃഷ്ണന്‍ മാഷ് എന്റെ സഹാധ്യാപികയായിരുന്ന ശാന്തേച്ചിയുടെ ബന്ധുവാണ്.
പെരുവട്ടൂര്‍ സ്കൂളിലെ ഒരു അധ്യാപിക ചെങ്ങന്നൂര്‍ ഡയറ്റിലെ പൂര്‍വവിദ്യാര്‍ഥിയുമാണ്.
ഞങ്ങള്‍ക്ക് ഹൃദ്യമായ വരവേല്പ്
ഏതു വിദ്യാലയത്തില്‍ ചെന്നാലും നന്മതിരയുന്ന എനിക്ക് പെരുവട്ടൂര്‍ നല്ല അനുഭവം .
പഠനയാത്ര വഴികാട്ടിപുസ്തകം
വിദ്യാലയങ്ങള്‍ പഠനയാത്ര നടത്താറുണ്ട്
പോകുന്ന സ്ഥലങ്ങളെക്കുറിച്ച് മിക്ക കുട്ടികള്‍ക്കും അവ്യക്തമായ ധാരണയേ കാണൂ
ലക്ഷ്യബോധത്തോടെ യാത്ര ചെയ്യണം. അതിനായി ഓരോ കുട്ടിക്കും സന്ദര്‍ശനസ്ഥലങ്ങളുടെ പ്രാധാന്യം വ്യക്തമാക്കുന്ന വഴികാട്ടി പുസ്തകം തയ്യാറാക്കി നല്‍കുന്ന വിദ്യാലയമാണിത്. യാത്ര സ്വന്തം ജില്ലയെ അറിയലാക്കിയതും സമീപസ്ഥ ജില്ലയെ ലക്ഷ്യമാക്കിയതും വിനോദമല്ല പഠനമാണ് ലക്ഷ്യമിടുന്നതെന്ന് വ്യക്തമാക്കുന്നതായി.

കവി പാഠപുസ്തകത്തിലെ കവിത ചെല്ലാനെത്തി

വീരാന്‍ കുട്ടിയുടെ കവിത പുതിയ മൂന്നാം ക്ലാസ് പുസ്തകത്തിലുണ്ട്. നക്ഷത്രവും പൂവും. ഇത്തവണത്തെ വായനാവാരത്തിന്റെ ഭാഗമായി വീരാന്‍കുട്ടി വിദ്യാലയത്തിലെത്തി കവിത ചൊല്ലിയപ്പോള്‍ അത് വേറിട്ട അനുഭവമായി. കവിത െഴുതിയ കവി തന്നെ കാവ്യാനുഭവം ഒരുക്കാനെത്തുക എന്ന അസുലഭ മുഹൂര്‍ത്തം.

എല്ലാ വെളളിയാഴ്ചയും വായനാക്കുറിപ്പ് അവതരിപ്പിക്കുന്ന കുട്ടികള്‍

ഓഫീസ് റൂമില്‍ വായനാപ്രവര്‍ത്തനത്തെ വിശദീകരിക്കുന്ന സ്കൂളിന്റെ പോസ്റ്റര്‍.

ഒരോ ക്ലാസിനും പുസ്തകം നല്‍കുന്നു

പുസ്തകവായനയെ പാഠമാക്കുന്ന അധ്യാപകര്‍ അനുഗ്രഹമാണ്

നഗരസഭയിലെ കുട്ടികളുടെ ലൈബ്രറിയില്‍ പോയി. പുസ്തകങ്ങളുടെ വലിയലോകം നേരിട്ടു കണ്ടു. സ്കൂള്‍ ലൈബ്രറിയില്‍ എല്ലാവര്‍ക്കും അംഗത്വം ഉറപ്പാക്കി.അതത് ക്ലാസധ്യാപകരാണ് വായനാപ്രചോദകര്‍
ഗംഭീരം ജനകീയം ഈ വാര്‍ഷികം
ഒരു എല്‍ പി സ്കൂള്‍ വാര്‍ഷികത്തിന്റെ നോട്ടീസ് കണ്ട് ഞാന്‍ അതിശയിച്ചു പോയി. വലിയ വലിയ പരിപാടികളുടെ പ്രോഗ്രാം നോട്ടീസു പോലെ
  • ഉദ്ഘാടനസമ്മേളനം
  • വിളംബരഘോഷയാത്ര
  • പൂര്‍വവിദ്യാര്‍ഥി -അധ്യാപക സമ്മേളനം
  • നഴ്സറി കലോത്സവം
  • സര്‍ഗവിരുന്ന് ( രക്ഷിതാക്കള്‍ അവതരിപ്പിക്കുന്നത്)
  • കലാസന്ധ്യ
  • നൃത്ത സംഗീത നാടകശില്പം
  • സ്മൃതി മധുരം ( പൂര്‍വവിദ്യാര്‍ഥികളുടെ ഗാനമേള)
  • യാത്രയയപ്പുസമ്മേളനം ( യാത്രയാക്കപ്പെട്ട ശ്രീ രമേശ് ബാബു എന്ന പ്രഥമാധ്യാപകന് അഭിമാനിക്കാം. നാടിന്റെ ഹൃദയത്തില്‍ വിദ്യാലയത്തെ പ്രതിഷ്ഠിച്ചതിന്. ഇത്തരം വിപുലമായ ചടങ്ങോടെ വാര്‍ഷികം നടത്താന്‍ കഴിയുന്ന ഈ പൊതു വിദ്യാലയം അക്കാദമിക മികവിലും പിന്നിലല്ല)
 
 
 കുട്ടി എഴുത്തുകാരെ പ്രോത്സാഹിപ്പിക്കുന്നു
വിദ്യാലയം എല്ലാ വര്‍ഷവും കുട്ടികളുടെ രചനകള്‍ ഉള്‍പ്പെടുത്തി പതിപ്പുകള്‍ പ്രസിദ്ധീകരിക്കുന്നു. കൂടാതെ സര്‍ഗശേഷി ഉളള കുട്ടികളെ കണ്ടെത്തി പുസ്തകപ്രകാശനവും .സാമ്പത്തിക പരിമിതി ഇല്ലായിരുന്നെങ്കില്‍ കൂടുതല്‍ പുസ്തകങ്ങള്‍ ഈ വിദ്യാലയത്തില്‍ നിന്നും ഇറങ്ങുമായിരുന്നു. മഴ നനഞ്ഞ പെണ്‍കുട്ടിയുടെ ഒരു കോപ്പി എനിക്ക് അവര്‍ സ്വാതന്ത്ര്യദിനസമ്മാനമായി തന്നു


 ഒരോ കുട്ടിക്കും ഓരോ ചെടി
എത്ര കുട്ടികള്‍ വിദ്യാലയത്തിലുണ്ടോ അത്രയും ചെടികള്‍. കുട്ടികള്‍ക്ക് ക്രമനമ്പര്‍ നല്‍കിയിട്ടുണ്ട്. അവരവരുടെ ചെടികള്‍ പരിപാലിക്കേണ്ട ചുമതല അവരവര്‍ക്കു തന്നെ. ഓണമാകുമ്പേഴേക്കും വിദ്യാലയം അത്തപ്പൂക്കളത്തിനകത്താകും. ലളിതം. മനോഹരം,
എല്‍ എസ് എസ്
എല്ലാ വര്‍ഷവും എല്‍ എസ് എസിനു വിജയിക്കുന്നവര്‍ ഈ വിദ്യാലയത്തിന്റെ അഭിമാനം. തുടര്‍ച്ചയായി നേട്ടം കൊയ്യുന്നത് പഠനമികവിന്റെ ഉദാഹരണം തന്നെ.
 യാത്ര വെറുതേയായില്ല
പൊതുവിദ്യാലയനന്മകള്‍ അനുഭവിക്കുന്നത് പുണ്യം തന്നെ.


Sunday, August 24, 2014

ഓല -( ദിനാചരണപ്പതിപ്പ്)



മിക്ക വിദ്യാലയങ്ങളിലും ദിനാചരണങ്ങള്‍ നടക്കാറുണ്ട്.
ദിനാചരണങ്ങളുടെ കാലവുമായി പൊരുത്തപ്പെടുന്ന വിധമല്ല പലപ്പോഴും പാഠഭാഗങ്ങള്‍
ദിനാചരണവേളയില്‍ കുട്ടികള്‍ ശേഖരിക്കുന്ന വിവരങ്ങള്‍ വിലപ്പെട്ടതാണെന്ന ധാരണയുളള അധ്യാപകര്‍ അതിന്റെ പുനരുപയോഗസാധ്യത കണ്ടെത്തും
മാവേലിക്കര ഉപജില്ലയിലെ ഒരു കൊച്ചു വിദ്യാലയം തയ്യാറാക്കിയ ലഘുവിജ്ഞാനകോശമാണ് ഓല
ഒന്നാം ടേമില്‍ നടത്തിയ എല്ലാ ദിനാചരണങ്ങളുമായി ബന്ധപ്പെട്ട് അധ്യാപകരും വിദ്യാര്‍ഥികളും ശേഖരിച്ച ചിത്രങ്ങളും വിവരങ്ങളും ക്രമീകരിച്ചപ്പോള്‍ ഓലയുടെ പിറവിയായി
എം ജി എം എല്‍ പി എസിലെ പ്രഥമാധ്യാപിക പറയുന്നതിങ്ങനെ:-
  • വായനയിലും ലേഖനത്തിലും താല്പര്യമുണ്ടാക്കാനും
  • പാഠങ്ങള്‍ പഠിപ്പിക്കുമ്പോള്‍ റഫറന്‍സ് മെറ്റീരിയലായികുട്ടികള്‍ക്കും അധ്യാപകര്‍ക്കും ഉപയോഗിക്കാനും കഴിയും
  • കുട്ടികളുടെ ശേഖരണപ്രവര്‍ത്തനങ്ങളെ അംഗീകരിക്കാനും സാധിക്കുന്നു
  • പൊതു വിജ്ഞാനം വര്‍ധിക്കും
  • പഠനം പാഠപുസ്തകത്തിനപ്പുറത്തേക്ക് വ്യാപിക്കും
  • എല്ലാ ക്ലാസുകളിലേയും കുട്ടികളുടെ കൂട്ടായ പ്രവര്‍ത്തനമാകയാല്‍ ക്ലാസുകളുടെ അതിര് ഭേദിച്ചുളള പഠനവും നടക്കും
ചെറിയ പ്രവര്‍ത്തനം 
 
എന്നാല്‍ മൂല്യം കൂടുതല്‍


Thursday, August 21, 2014

ഒന്നാം ക്ലാസുകാര്‍ പുതിയപാഠങ്ങള്‍ രചിക്കുന്നു..


കുട്ടികളുടെ പഠനത്തെക്കുറിച്ച് നമ്മള്‍ക്ക് എത്ര തെറ്റിദ്ധാരണകളാണുളളത്? നാലാം ക്ലാസിലെ പാഠം നാലാം ക്ലാസില്‍ വെച്ചു മാത്രമേ പഠിക്കാവൂ എന്നതാണ് ഒരു അന്ധവിശ്വാസം. മുതിര്‍ന്ന ക്ലാസിലെ കുട്ടികളില്‍ നിന്നും ഉയര്‍ന്ന പഠനാനുഭവം ഒരുക്കേണ്ടതില്ല എന്നത് മറ്റൊന്ന്.

അധ്യാപക പിന്തുണയുടെ ഭാഗമായി ഞാന്‍ നാലാം ക്ലാസിലെ ഒടുക്കത്തെ ഉറവ എന്ന പാഠം നാടകാവിഷ്കാരമെന്ന ലക്ഷ്യം കുട്ടികള്‍ക്ക് മുമ്പാകെ അവതരിപ്പച്ചാണ് തുടങ്ങിയത്. പഠിപ്പിച്ചത്.

ആദി മുതല്‍ അതിന്റെ ത്രില്‍ ക്ലാസില്‍ നിറഞ്ഞു നിന്നു. (നാടക സ്ക്രിപ്റ്റ് തയ്യാറാക്കിയ പ്രക്രിയ മുന്‍ ലക്കത്തില്‍ സൂചിപ്പിച്ചത് വായിക്കുക)

കുട്ടികളുടെ ഇഷ്ടവും അഭിപ്രായവും പരിഗണിച്ചു. അവര്‍ പറഞ്ഞു

  • വേഷം വേണം
  • കര്‍ട്ടന്‍ വേണം
  • കാണാനാളും വേണം

അങ്ങനെ ക്ലാസ് പി ടി എയുടെ മുമ്പില്‍ അവതരിപ്പിക്കാന്‍ ധാരണയായി.

കുട്ടികള്‍ ഇത് വീട്ടിലറിയിച്ചു. മേക്കപ്പ് ചെയ്യണം

അത് രക്ഷിതാക്കള്‍ ഏറ്റു.

മറ്റു കുട്ടികളും കാഴ്ചക്കാരായി

എല്ലാവര്‍ക്കും റോള്‍ കൊടുക്കാന്‍ അധ്യാപകരുടെ മേല്‍നോട്ടം

ഞാന്‍ ഉച്ചയ്ക് കാണുന്നത് നാലാം ക്ലാസ് അധ്യാപകരുടേയും രക്ഷിതാക്കളുടേയും ഉത്സവക്ലാസ് ആയി മാറിയതാണ്

രണ്ടു മണിക്ക് നാടകം തുടങ്ങാന്‍ കാത്തിരിക്കുകയാണ് മൂന്നിലേയും രണ്ടിലേയും ഒന്നിലേയും പ്രീപ്രൈമറിയിലേയും കരുന്നുകള്‍

ഇടയ്ക് ചില വേഷങ്ങള്‍ സ്ക്രീനിനു പിന്നില്‍ നിന്നും എത്തി നോക്കും അപ്പോള്‍ കുട്ടികള്‍ ആര്‍ത്തു ചിരിക്കും

ഞാന്‍ കുട്ടികള്‍ക്കൊപ്പം തറയില്‍ ഇരുന്നു. അവരുമായി ചങ്ങാത്തം കൂടി.ഇത് പിന്നീട് ഗുണം ചെയ്തു.

നാടകം തീര്‍ന്നപ്പോള്‍ ഒന്നാം ക്ലാസിലെ കുട്ടികളോടൊപ്പം കൂടി

അവരോട് നാടകത്തെക്കുറിച്ച് ചോദിച്ചു. കഥ എന്താണ്?

അവര്‍ കഥപറയാനാരംഭിച്ചു

"ഒരിടത്ത് വെളളമില്ലായിരുന്നു

അന്നേരം രാജാവ് ..”

"വേണ്ട നമ്മുക്ക് കളിക്കാം"

കഥ പറച്ചില്‍ നിറുത്തി അവര്‍ തത്സമയനാടകാവതരണം തുടങ്ങി.

ആ നാടകം ഞാന്‍ മൊബൈലില്‍ പകര്‍ത്തി.

നിങ്ങളെ ആ ഒന്നാം ക്ലാസ് നാടകത്തിലേക്ക് സ്വാഗതം ചെയ്യുന്നു.

*******

"മഹാരാജാവേ നമ്മുടെ നാട്ടില്‍ വെളളമില്ലാതായി"

"ഇനി എന്തുചെയ്യും?” ( രാജാവനോടൊപ്പം കാണികളും റാണിയുംകൂടി ഈ ഡയലോഗ് കാച്ചി)

"അറിയൂല"

"ഞാന്‍ പറഞ്ഞോട്ടെ"

"വേണ്ട"

"നീ അടിയന്‍" (ഭൃത്യനെന്തിനാണ് എപ്പോഴും അടിയന്‍ എന്നു പറയുന്നതിന്റെ കാരണമറിയാത്ത കുട്ടികള്‍ അവരുടെ പേര് അടിയന്‍ എന്നു തീരുമാനിച്ചു.അത് ഔചിത്യം തന്നെ)

"ടാ ,നീയും അടിയന്‍"

രാജാവിനോട് റാണി :"വിളിക്കെടീ " (രാജാവിന്റെ വേഷം അഭിനയിക്കുന്ന നടിയെ സംഭാഷണം പറഞ്ഞുകൊടുക്കുമ്പോള്‍ രാജാവേന്നു വിളിക്കാന്‍ പറ്റുമോ?)

""

"വിളിക്ക്”

"ആരെവിടെ?”

"അടിയന്‍"

"അടിയന്‍" ( രാജാവും ഏറ്റു പറഞ്ഞുപോകുന്നു)

"വെളളമുളളോരു കിണറു കണ്ടെത്തൂ"

" കല്പനപോലെ..

( താണുവണങ്ങിയുള്ള ആ പറച്ചില്‍ കേട്ട് രാജാവ് കൈകൊട്ടിച്ചിരിക്കുന്നു)


അടിയന്‍കുട്ടി പിറകിലേക്കു പോകുമ്പോള്‍ രാജാവ് ആസ്വദിച്ച് പറഞ്ഞു പോകുന്നു "കല്പനപോലെ..”

"വാ. നീ വാ"

രാജാവ് അടുത്ത കഥാപാത്രത്തെ രംഗത്തേക്കു വിളിക്കുന്നു

എല്ലാവരും കൂടി തളളി കൊണ്ടുവരുന്നു

"നീ ഒരു സന്തോഷ വാര്‍ത്ത, എന്നു പറയ്"

ഡയലോഗ് പറഞ്ഞുകൊടുക്കുന്നു

"ഒരു സന്തോഷ വാര്‍ത്ത"

"എന്തു വാര്‍ത്ത ?”

"വറ്റാത്ത കിണര്‍ കണ്ടെത്തി"

"വെളളമുളള ഒരു കിണര്‍ കണ്ടെത്തി" ( മറ്റൊരാള്‍ തിരുത്തിച്ചേര്‍ത്തു)

"വറ്റാത്ത എന്നു വേണം" (റാണിപ്പട്ടം കെട്ടിയ കുട്ടി ഉറപ്പിച്ചു പറഞ്ഞു)

"....വറ്റാത്ത"

"ജനങ്ങളെല്ലാം അങ്ങോട്ടു പോയി “( റാണി പറഞ്ഞുകൊടുക്കുന്നു)

"ജനങ്ങളെല്ലാം അങ്ങോട്ടു പോയി"

രാജാവ്: " നമ്മക്കും പോകാം അങ്ങോട്ട്"

മറുപടി വൈകിയപ്പോള്‍ എല്ലാവരും ഇപെടുന്നു

കല്പനപോലെ എന്നു പറയിക്കുന്നു.

"രാജഗുരവിന്റെ അടുത്തുപോകാം"

രാജാവ് സിംഹാസനത്തില്‍ നിന്ന് എഴുന്നേല്‍ക്കുന്നു

"ഞാനാണ് രാജഗുരു" എന്ന് ഒരാള്‍ സ്വയം പ്രഖ്യാപിക്കുന്നു

അതുവരെ അടിയനായി അഭിനയിച്ച കുട്ടി രാജഗുരുവിന്റെ സ്ഥാനം ബലമായി കയ്യടക്കുന്നു. കസേരയില്‍ കയറി ഇരിക്കുന്നു

രാജാവ് എത്തി "ഡും ഡും രാജാവു വരുന്നു" എന്നു പറയാന്‍ ഒരാളെ നിര്‍ബന്ധിക്കുന്നു

കസേരയിലിരിക്കുന്ന രാജഗുരുവിനെ പിടിച്ചിറക്കി "നീ ഡും ഡും പറയെടാ "എന്നു നിര്‍ദ്ദേശിക്കുന്നു

അവനെ പ്രലോഭിപ്പിക്കുന്നു "നീ പറ... ഡും ഡും രാജാവു വരുന്നു..”


റാണിയും അവനോട് പറയുന്നു

റോള്‍ മോശമല്ലെന്നു തോന്നിയ അവനാകട്ടെ അത്

"പറേടാ"

"രണ്ടു പ്രാവശ്യം പറേണം" എന്നു രാജാവ് വിരലുയര്‍ത്തി ആവശ്യപ്പെടുന്നു.

"ഡു ഡും രാജാവ് വരുന്നു" എന്നു തുളളി തുളളിച്ചാടിപ്പറഞ്ഞു.

അവന്റെ തുളളിച്ചാട്ടം കണ്ട് ഒരാള്‍ ഓടി വന്ന് പിടിച്ചു നിറുത്തുന്നു

അവനെ രംഗത്തു നിന്നും തളളിമാറ്റുന്നു.

"മാറി നില്‍ക്ക്"

ഒരു കഥാപാത്രം കടന്നു വരികയും കസേരയില്‍ തട്ടി താഴെ വീഴുകയുംചെയ്യുന്നു

എല്ലാവരും കൂടി പിടിച്ചെഴുന്നേല്‍പ്പിക്കുന്നു

ആ വീഴ്ച കണ്ട് രാജഗുരുവാകാന്‍ തയ്യാറായ കുട്ടി ചിരിച്ചു പോകുന്നു

"കൊട്ടാരത്തിനുളള വെളളം കോരി"

"അവരുമെടുക്കട്ടെ'

"നീ ലൈനായിട്ടു നിറുത്തവരെ" ( എന്താണ് ഇനി അഭിനയിക്കേണ്ടതെന്നു രാജാവ് പറഞ്ഞുകൊടുക്കുന്നു)

ഒരാളെ കസേരയില്‍ പിടിച്ച് ഇരുത്തുന്നു. അതു കണ്ട അടിയന്‍കുട്ടി കടുപ്പിച്ചു പറയുന്നു.

" നീ മാറെടീ"

"രാജഗുരുവാ ഇത്" ( രാജാവ് വേഷത്തെ നിര്‍വചിക്കുന്നു)

രാജഗുരവിന് നാണം.ഒരാള്‍ ഗുരുവിന്റെ മടിയില്‍ ഒരു ബുക്ക് വെച്ചു ( ബുക്കല്ലേ ഗുരുവിന്റെ അടയാളം?അതവര്‍ക്കറിയാം).രാജാവ് ഗുരുവിന്റെ കവിളില്‍ തട്ടി നാണത്തെ തളളിക്കളയാനുളള പ്രോത്സാഹനം നല്‍കുന്നു.ഡയലോഗ് പറഞ്ഞു കൊടുക്കുന്നു

"ഇങ്ങോട്ടെന്തോത്തിനാ എഴുന്നെളളിയത് എന്നു ചോദിക്ക് "

രാജഗുരവിനെ പിടിച്ചെഴുന്നേല്‍പ്പിച്ച് നിറുത്തുന്നു


വീണ്ടും ഡയലോഗ് എല്ലാവരും കൂടി പറയുന്നു

"ഇങ്ങോട്ടെന്തോത്തിനാ എഴുന്നെളളിയത്?”

രാജഗുരു വാ പൊത്തി നാണിക്കുന്നു

"ഒരു ചെടി നട്ടു വെക്കണം"

രാജാവ് പറയുന്നു. അനിശ്ചിതാവസ്ഥ. അതല്ല ഡയലോഗ് എന്ന തിരിച്ചറിവ് എല്ലാവര്‍ക്കും. ആലോചന.

"അങ്ങനെയല്ല "മറ്റൊരാള്‍ തിരുത്തുന്നു

"വെളളമെല്ലാം പറ്റിപ്പോയി എന്നു പറ"

"ഇതാ നിന്റെ ബലൂണ്‍"

(രാജാപാര്‍ട്ട് കെട്ടിയ കുട്ടിക്ക് കാറ്റുപോയ ബലൂണ്‍ ഒരാള്‍ വെച്ചു നീ്ട്ടുന്നു

രാജാവ് സ്വയം മറന്ന് ബലൂണ്‍ വാങ്ങി വീര്‍പ്പിക്കുന്നതിലേക്ക് ശ്രദ്ധ കേന്ദ്രീകരിക്കുന്നു)

രാജഗുരു അസ്വസ്ഥയായി ചോദിക്കുന്നു

"എന്തുവാ പറയണ്ടേ?”

"ഒരു ചെടി നട്ടുവെക്കാം"

രാജാവ് നാടകത്തിലേക്ക് വീണ്ടും പ്രവേശിക്കുന്നു


"പത്തെണ്ണം നട്ടുവെക്കാമല്ലോ”
രാജഗുരു:” അവിടെപ്പോയി ഒരു ചെടി എടുത്തുകൊണ്ടുവാ"

"ഒരെണ്ണം മതി... ഒരെണ്ണം മതി" എന്നു രാജാവ് വിളിച്ചു പറയുന്നു

"ഒരെണ്ണം മതി "

"ചെടി ഇവിടെ നട്"

ക്ലാസിലെ മണല്‍ത്തടത്തില്‍ ചെടി നടാമെന്നു തീരുമാനിക്കുന്നു

മറ്റുളളവര്‍ ചെടി നടാന്‍ തുടങ്ങുന്നു

രാജാവ് “..ഞാനാ നടേണ്ടത്. ‍ഞാന്‍ നടാം"

ചെടി വാങ്ങുന്നു

മണല്‍ കുഴിച്ച് നടുന്നു

"വെളളം ഒഴിക്കണം"

ചെടി നേരെ നില്‍ക്കുന്നില്ല

ഒരാള്‍ നേരെ നിറുത്താന്‍ ശ്രമിക്കുമ്പോള്‍ അതു താഴെ വീഴുന്നു

"കണ്ടോ "എന്നു രാജാവിന്റെ പരിഭവം

"ഇനി നമ്മള്‍ക്ക് വട്ടത്തില്‍ നിന്ന് പാട്ടുപാടാം.”


രാജാവ് എല്ലാവരേയും വട്ടത്തില്‍ നിറുത്തുന്നു

****

നാലിലേയും ഒന്നിലേയും കുട്ടികള്‍ അവതരിപ്പിച്ച ഈ നാടകം എനിക്കു നല്‍കിയ തിരിച്ചറിവ് എന്താണ്?

ഒന്നാം ക്ലാസില്‍ അനുഗ്രഹിക്കപ്പെട്ട കഴിവുകളുമായി എത്തുന്ന കുട്ടികളെ നാം കശക്കിക്കളയുന്നു.

അവരുടെ സര്‍ഗശേഷിയെ ഭാവനയെ കലാവാസനയെ എല്ലാം. ഇതാണോ വിദ്യാഭ്യാസം?

കുട്ടിയിലുളള നൈസര്‍ഗിക കഴിവുകളെ പുറത്തെടുക്കലാണെന്നു പറയുകയും നേരേ മറിച്ചു ചെയ്യുകയും.

സ്കൂള്‍ ഒരു യൂണിറ്റാണ്

  • അവിടെ എല്ലാവര്‍ക്കും പരസ്പരം അനുഭവപാഠങ്ങള്‍ നല്‍കാന്‍ കഴിയും
  • ഒന്നാം ക്ലാസിലെ പഠം നാലാം ക്ലാസിലും നാലാം ക്ലാസിലെ പാഠം ഒന്നിലും പ്രയോജനപ്പെടുത്താം
  • ആവിഷ്കാരത്തിന്റെ ഉയര്‍ന്ന തലങ്ങള്‍ വിദ്യാലയത്തെ സര്‍വകലാശാലയാക്കും
  • തത്സമയ നാടകങ്ങളും ഭാഷാപഠനമാണ്
  • തയ്യാറെടുപ്പോടെ കുട്ടികള്‍ നടത്തുന്ന നാടകവും ഭാഷാപാഠമാണ്

  • കലാപാഠമാണ്
  • സാമൂിഹക പാഠമാണ്
  • സംഘബോധത്തിന്റെ പാഠമാണ്
  • സര്‍ഗാത്മകതയുടെ പാഠമാണ്
  • പരമാവധി അവസരങ്ങള്‍ നല്‍കുക
  • ഇന്നലെ പഠിപ്പിച്ച രീതിയില്‍ നാളെ പഠിപ്പിക്കാതിരിക്കുക

നവ്യാനുഭവക്ലാസുകള്‍ ആകട്ടെ നമ്മുടെ ലക്ഷ്യം



( ഇന്ന് അത്തരമൊരു അന്വേഷണം നടത്തി. പി കെ ഗോപിയുടെ കവിതയില്‍. അത് പിന്നീട് പങ്കിടാം)


Wednesday, August 13, 2014

പ്രതിഫലനാത്മക കുറിപ്പ് എസ് ആര്‍ ജിയില്‍ എങ്ങനെ അവതരിപ്പിക്കും?


പ്രതിഫലനാത്മക കുറിപ്പെഴുതണം എസ് ആര്‍ ജിയില്‍ ചര്‍ച്ച ചെയ്യണം എന്നു നിര്‍ദ്ദേശം
  • അത് എസ് ആര്‍ ജിയില്‍ എന്തിനാ ചര്‍ച്ച ചെയ്യുന്നത്?
  • എന്താ അവതരിപ്പിക്കേണ്ടത്?
  • എങ്ങനെ ചര്‍ച്ച ചെയ്യും?
  • പ്രതഫലനാത്മകകുറിപ്പുകള്‍ ഒന്നാം വാരം രണ്ടാം വാരം എന്ന കണക്കിനേ എഴുതാനാകുകയുള്ളോ? തന്റെ ഉളളിലേക്ക് നോക്കുന്ന ഏതൊരധ്യാപികയ്ക്കം പ്രതിഫലിക്കുന്നവ കുറിച്ചു കൂടേ? അധ്യാപികയ്ക് തോന്നുന്ന പക്ഷം എപ്പോള്‍ വേണമെങ്കിലും കുറിക്കാം.
വ്യക്തമായ ഉദാഹരണമില്ലാതെ സാങ്കല്പികമായി എത്ര നാള്‍ പറയും?
ഗുണപരമായ എന്തെങ്കിലും സംഭവിച്ചാലല്ലേ എസ്‍ ആര്‍ ജി യോഗങ്ങള്‍തന്നെ ഗുണമുളള ഏര്‍പ്പാടാകൂ
വിദ്യാലയങ്ങളില്‍ അവ്യക്തതയുളള നിരവധി കാര്യങ്ങള്‍.
അതിനു പ്രായോഗികമായ തെളിവുകള്‍ നല്‍കേണ്ടതാരാണ്?
ജില്ലയിലെ അക്കാദമിക സ്ഥാപനങ്ങള്‍ തന്നെ.
ആലപ്പുഴ ഡയറ്റ് കഴിഞ്ഞ മാസം മൂന്നു ട്രൈ ഔട്ട് നടത്തി.
ഫാക്കല്‍റ്റിയംഗങ്ങള്‍ വിദ്യാലയത്തില്‍ പോയി ക്ലാസെടുത്ത് ബോധ്യപ്പെട്ടു.
ആ വിദ്യാലയത്തിലെ അധ്യാപകരെ ബോധ്യപ്പെടുത്തി.
(വെറുതേ വിദ്യാലയം സന്ദര്‍ശിച്ച് സന്ദര്‍ശകഡയറയില്‍ ഉപദേശരൂപേണ കുറേ കുറിപ്പുകള്‍ എഴുതുന്നതില്‍ വലിയ അര്‍ഥമൊന്നുമില്ല.)
ചെയ്തു കാണിച്ചു കൊടുക്കണം
സുലഭ ടീച്ചര്‍ മിത്രകരി സ്കൂളില്‍ നടത്തിയ ട്രൈ ഔട്ടിന്റെ അനുഭവവും വിശകലനവുമാണ് ചുവടെ നല്‍കുന്നത്.

 
വീഡിയോ ദൃശ്യങ്ങള്‍ നിരീക്ഷിച്ച് കുട്ടികള്‍ പ്രവര്‍ത്തനം ചെയ്തു. 
അതിന്റെ വിശദാംശങ്ങള്‍ വിലയിരുത്തല്‍ കുറിപ്പുകളിലൂടെ മനസിലാകും. അതു നോക്കൂ.

ഈ വിലയിരുത്തല്‍ കുറിപ്പില്‍ എന്തെല്ലാം കാര്യങ്ങളാണ് പരിഗണിച്ചത്? അവയെല്ലാം പ്രസക്തമാണോ?
  • ഓരോ കുട്ടിയേയുംകുറിച്ച് 
  • കുട്ടികള്‍ക്ക് നല്‍കിയ സഹായം
  • അനുഭവപ്പെട്ട പ്രശ്നം
  • കുട്ടികളുടെ നോട്ട് ബുക്കിലെ രേഖപ്പെടുത്തല്‍
  • പഠനതന്ത്രം (ഐ ടി) ഫലപ്രദമായോ?
  • സ്വയം വിലയിരുത്തല്‍
എങ്കില്‍ എസ് ആര്‍ ജിയില്‍ പ്രതിഫലനാത്മക കുറിപ്പ് എങ്ങനെ എന്തിന് ചര്‍ച്ച ചെയ്യണം?
  • പഠനനേട്ടത്തിലൂന്നിയുള്ള പങ്കുവെക്കലാവണം
  • ക്ലാസിലെ മികവ് പങ്കുവെക്കുന്നതിന്
  • ക്ലാസ് തല പ്രശ്നങ്ങള്‍ക്ക് സ്കൂള്‍തല പരിഹാരം ആസൂത്രണം ചെയ്യുന്നതിന് സഹായകമാകണം. 
    • അധ്യാപികയുടെ ആസൂത്രണവും വിലയിരുത്തലും കാണിച്ച് ബോധ്യപ്പെടുത്തണം. നല്ല രീതിയില്‍  പ്രക്രിയയും വിലയിരുത്തലും എഴുതാത്തവര്ക്ക് പ്രതിഫലനാത്മക കുറിപ്പിനെ സാധൂകരിക്കാനോ വിദ്യാലയത്തെ അക്കാദമിക തെളിച്ചം കൊണ്ട് പ്രചോദിപ്പിക്കാനോ കഴിയില്ല.
    • മേല്‍ സൂചിപ്പിച്ച പ്രതിഫലനാത്മക കുറിപ്പിനെ പിന്തുണ്യ്കുന്ന ടീച്ചിംഗ് മാന്വലിലെ പ്രസക്ത ഭാഗം ഇങ്ങനെ-
അതെ പ്രതിഫലനാത്മക കുറിപ്പും തെളിവുകളും എസ്‍ ആര്‍ജിയുടെ മിനിറ്റ്സില്‍ വന്നാല്‍ പോര. നന്മകള്‍, കണ്ടെത്തലുകള്‍ മറ്റു ക്ലാസുകളിലേക്ക് വ്യാപിപ്പിക്കണം.അതിനുളള തീരുമാനം എടുക്കണം
ഉദാഹരണത്തിന് ഈ പ്രതിഫലനാത്മക കുറിപ്പ് അവതരിപ്പിക്കുന്ന എസ്‍ ആര്‍ ജി
എല്ലാ ക്ലാസുകളിലേയും കുട്ടികളുടെ നോട്ട് ബുക്ക് സമഗ്രമാക്കുന്നതിനും അതിനു പാകത്തില്‍ ടീച്ചിംഗ് മാന്വല്‍ സൂക്ഷ്മതയോടെ എഴുതുന്നതിനും തീരുമാനിക്കാം
ഭാഷേതര വിഷയങ്ങളിലും ഭാഷാപരമായ പ്രശ്നങ്ങള്‍ പരിഹരിക്കാനുളള ഇടപെടല്‍ നടത്താനും 
സാങ്കേതിക വിദ്യാസഹായത്തോടെ ആശയരൂപീകരണം ശക്തമാക്കാനും തീരുമാനിക്കാം
ഓരോ ആഴ്ചയിലും ഓരോ പുതിയ കണ്ടെത്തുകള്‍ പ്രതിഫലനാത്മക കുറിപ്പിലൂടെ വരട്ടെ
പരിഹരിക്കേണ്ട പ്രശ്നങ്ങള്‍ ചര്‍ച്ച ചെയ്യാനും മറക്കേണ്ട