പൂവ് ചിരിച്ചു ആസൂത്രണക്കുറിപ്പ് - 3

 

 

ക്ലാസ് : ഒന്ന്

യൂണിറ്റ് : 2

പാഠത്തിൻ്റെ പേര്  : പൂവ് ചിരിച്ചു

ടീച്ചര്‍  :  ഷാഹിന  കെ പി 

ജി എം എൽ പി എസ് വടക്കാങ്ങര 

മങ്കട , മലപ്പുറം

പിരീഡ് ഒന്ന്

പ്രവർത്തനം വായന പാഠവും പിന്തുണയും

സമയം 40 മിനുട്ട്

തലേദിവസം നൽകിയ വായന പാഠം വായിച്ചവർ ആരൊക്കെ ?

വായിക്കാത്തവർക്ക് അവസരം

( മുൻ ദിവസം ഹാജരാകാത്ത ……………… ., ………… ... പരിഗണിച്ച് പ്രവർത്തനം പുതുമയോടെ ചെയ്യൽ .

മുൻദിവസം എഴുതിയ വാക്യങ്ങൾ മറ്റുള്ളവരെക്കൊണ്ട് പറയുന്നു ,

ആ രംഗത്തെ ചിത്രം ബോർഡിൽ വരയ്ക്കുന്നു .

തുമ്പി , മണ്ണിര , ചെടി . അറിയാവുന്ന രീതിയിൽ വരപ്പിക്കുന്നു

സംഭാഷണക്കുമിള വരച്ച് സംഭാഷണം എഴുതുന്നു

• അത് ആരാ ?

• ആരാ അത് ?

അപ്പോൾ അ , ആ , ര എന്നിവയുടെ ഘടന വ്യക്തമാക്കി ടീച്ചറും എഴുതണം . കൂട്ടുവായനയ്ക്ക് അവസരം ഒരുക്കുക . സവിശേഷ സഹായസമയം കണ്ടെത്തി ഹാജരാകാത്തവരുടെ കുഞ്ഞെഴുത്ത് പുസ്തകത്തിൽ രേഖപ്പെടുത്തൽ നടത്തുന്നു . )

• അത് ആരാ ? ആരാ അത് ? എന്നിവ കൂടുതൽ പിന്തുണ വേണ്ട ……………………………………………………

ലേഖനപ്രക്രിയ

ഘട്ടം 3 (15 മിനുട്ട്)

ഇന്നലത്തെ സംഭാഷണരംഗം ഓര്‍മ്മിപ്പിക്കുന്നു. 

മണ്ണിര എന്താ ചെടിയോട്  ചോദിച്ചത്?

പ്രതികരണം

നീ ആരാ? 

ചാർട്ടെഴുത്ത്

• നീ ആരാ? എന്ന വാക്യം ഓരോ അക്ഷരവും സാവധാനം  പറഞ്ഞുകൊണ്ട് ടീച്ചർ ചാർട്ടിൽ എഴുതുന്നു. നീ എന്നതിൽ ഈ സ്വരത്തിൻ്റെ ചിഹ്നം ആദ്യമായി പരിചയപ്പെടുത്തുകയാണ്. ആരാ എന്നത് തെളിവെടുത്ത് എഴുതണം.

ബോർഡഴുത്ത്

• ടീച്ചർ ഒന്നുകൂടി എഴുതാം. നീ ആരാ? ഈ യുടെ ചിഹ്നം ഘടന പറഞ്ഞു കൊണ്ട്  ടീച്ചർ ബോർഡിൽ എഴുതുന്നു. നീ എന്ന വാക്ക് മാത്രം എഴുതി ബാക്കി

  
  
  ഡാഷിടുന്നു

നീ എന്നത് കുട്ടികൾ കുഞ്ഞെഴുത്ത് പുസ്തകത്തിൽ എഴുതുന്നു.

• നീ ആരാ? എന്നതിലെ ആരാ എന്നത് തെളിവെടുത്ത് എഴുതുന്നു.

പിന്തുണനടത്തം

• പിന്തുണ പുസ്തകത്തിൽ എഴുതൽ

• അംഗീകാരം നൽകൽ

 

കുഞ്ഞുവിത്ത് രണ്ട് ഇലകൾ വിടർത്തി പറഞ്ഞ മറുപടി എന്തായിരുന്നു?

‍ഞാന്‍ ‍ചെടി. (ലേഖനപ്രക്രിയ- ചാര്‍ട്ടെഴുത്ത് മുതല്‍ തെളിവെടുത്തെഴുത്ത് വരെ)

മുകളിലെ ഓരോ വാക്യമെഴുതുമ്പോഴും സ്വീകരിക്കേണ്ട ലേഖനപ്രക്രിയയുടെ വിശദാംശങ്ങള്‍ ചുവടെ

ചാര്‍ട്ടെഴുത്ത് (3 മിനിറ്റ് വീതം)

• ഓരോരോ വാക്യങ്ങളായി എഴുതി അതിന്റെ തുടര്‍ലേഖനപ്രക്രിയകളെല്ലാം പാലിച്ച് കുട്ടികള്‍ എല്ലാവരും എഴുതിയെന്ന് ഉറപ്പാക്കിയ ശേഷം അടുത്ത വാക്യമെന്ന രീതി സ്വീകരിക്കണം. (ചാര്‍ട്ടിലെഴുതുമ്പോള്‍ ഘടന പറയേണ്ടതില്ല വാക്കകലത്തെക്കുറിച്ച് സൂചിപ്പിക്കണം, വാക്കിലെ ഓരോ അക്ഷരവും വ്യക്തമാകും വിധം ശരിയായ രീതിയില്‍ ഉച്ചരിക്കുകയും പിന്നെ കൂട്ടിച്ചേര്‍ത്തു വാക്കു പറയുകയും ചെയ്യുന്ന രീതിയിലാണ് വാക്യമെഴുത്ത്.)

ബോര്‍ഡിലെഴുത്ത് (3 മിനിറ്റ് വീതം )

• ചാര്‍ട്ടിലെഴുതിയ വാക്യം ബുക്കിലെഴുതുന്നതിന് ആവശ്യബോധം സൃഷ്ടിച്ചശേഷം അതിലെ ഓരോരോ വാക്കുകളും ബോര്‍ഡില്‍ ഘടനപാലിച്ച് പറയണം

• തുടര്‍ന്ന് ആ വാക്കിലെ പുതിയതായി പരിചയപ്പെടുത്തുന്ന അക്ഷരം ഘടനവ്യക്തമാക്കി പറഞ്ഞ് എഴുതണം. ഇത് രണ്ടോ മൂന്നോ തവണ ആവര്‍ത്തിക്കാം.

ഘടന വ്യക്തമാക്കേണ്ട അക്ഷരങ്ങള്‍

• ച, ഞ ( ഞാന്‍ ചെടി)

• ചിഹ്നങ്ങള്‍ (ഈ, എ എന്നിവയുടെ ചിഹ്നങ്ങള്‍)

ഇടതുവശത്തിരിക്കുന്ന കുട്ടികള്‍ക്ക് ടീച്ചറുടെ എഴുത്ത് കാണാനാകുമോ എന്നു നോക്കണം.

സചിത്രപുസ്തകത്തിലെഴുത്ത്

എഴുത്തില്‍ ശ്രദ്ധിക്കേണ്ട കാര്യങ്ങള്‍:

• നീ ആരാ? എന്നതില്‍ നീ എന്നത് നോക്കി എഴുതിയശേഷം ആരാ
  
  
  തെളിവെടുത്തെഴുതുകയാണ് വേണ്ടത്.
• വാക്കകലവും ശ്രദ്ധിക്കണം. അക്ഷരം തമ്മില്‍ ചേര്‍ന്നു പോകാതെ നോക്കുകയും വേണം.
  
• അ, ആ എന്നിവയുടെ വ്യത്യാസം പരിഗണിച്ചുവെന്നുറപ്പാക്കണം,
• എഴുതിയവര്‍ക്ക് ഓരോ വാക്കിനും ശരി അടയാളം നല്‍കുന്നു.
• തത്സമയ വിലയിരുത്തല്‍ (കുട്ടികള്‍ എഴുതുന്ന സമയത്ത് തന്നെ നടക്കുന്നതിനാല്‍ പ്രത്യേകം സമയം കാണിക്കുന്നില്ല)
• ടീച്ചർ എല്ലാവരുടെയും നോട്ടുബുക്ക് വിലയിരുത്തുന്നു.
• ശരിയായി എഴുതിയ ഓരോരുത്തര്‍ക്കും ഓരോ അക്ഷരത്തിനും ശരിയടയാളം നല്‍കണം.

• ച കൂടുതൽ പേർക്ക് എഴുതാൻ വിഷമമുണ്ടെങ്കിൽ പൊതുവിൽ ഒന്നുകൂടി ബോർഡിൽ എഴുതി കാണിക്കുന്നു.

പിന്തുണാബുക്കിലെഴുത്ത് (5 മിനിറ്റ് വീതം )

• പ്രയാസം അനുഭവിക്കുകയോ ഘടന ശരിയാകാതെയോ വാക്കകലം
  
  
  പാലിക്കാതിരിക്കുകയോ വടിവിൽ അ, ആ, ചെ എന്നിവ എഴുതാതിരിക്കുകയോ ചെയ്യുന്നവരുടെ അടുത്ത് ടീച്ചർ പിന്തുണാ ബുക്കുമായി ചെന്ന് കുട്ടിക്ക് നേരെ കാണും വിധത്തിൽ വടിവിൽ ഘടന പറഞ്ഞ് ഹൈ ലൈററര്‍‍ പേന ഉപയോഗിച്ച് എഴുതി കാണിക്കുന്നു.

• കുട്ടി എഴുതിയത് മാറ്റിയെഴുതാൻ ബുക്കില്‍ ആദ്യം എഴുതിയതിന്റെ മുകളിൽ ഒരു വെട്ട് കൊടുത്ത് തൊട്ടു താഴെ, മുകളില്‍ മാറ്റി എഴുതാൻ പറയുന്നു. കുട്ടി ശരിയായി എഴുതിക്കഴിഞ്ഞാൽ ശരി അടയാളം (അംഗീകാരമുദ്ര) നൽകുന്നു.
• എഴുത്തു പൂര്‍ത്തീകരിച്ച് ശരി അടയാളം കിട്ടിയ കുട്ടികള്‍ വെറുതേയിരിക്കാന്‍ പാടില്ല. പിന്തുണബുക്കി ലെഴുതുന്ന നേരം അവര്‍ക്ക് ഇലകള്‍ക്കും പൂവിനും നിറം നല്‍കാനുളള നിര്‍ദേശം ആകാം.

ബോര്‍ഡിലെ കട്ടിക്കെഴുത്ത് (കൂടുതല്‍ പ്രയാസം അനുഭവപ്പെടുന്നവർക്ക് )

• മുറിച്ചോക്ക് ചരിച്ചു പിടിച്ച് ബോര്‍ഡില്‍ ടീച്ചര്‍ കട്ടിയില്‍ അ, ആ എന്നീ അക്ഷരം എഴുതുന്നു. പ്രശ്നമുളള കുട്ടികള്‍ വന്ന് ആ അക്ഷരങ്ങളുടെ മുകളിലൂടെ മറ്റൊരു നിറമുളള ചോക്ക് വെച്ച് എഴുതുന്നു. തുടര്‍ന്ന് അതേ അക്ഷരം ബോര്‍ഡില്‍ മറ്റൊരിടത്തും കുട്ടി എഴുതുന്നു.
• ര, എ യുടെ ചിഹ്നം ഇവ മാറിപ്പോകുന്ന കുട്ടികള്‍ ആരാ, ചെടി എന്നീ വാക്കുകള്‍ കട്ടിക്കെഴുതിയതിന്റെ മുകളിലൂടെയാണ് എഴുതേണ്ടത്.
• അമ്പടയാളത്തിലൂടെ വിരലോടിക്കല്‍ ( കൂടുതല്‍ പ്രയാസം അനുഭവപ്പെടുന്നവർക്ക്)
  
• അക്ഷരങ്ങളുടെ എഴുത്തുരീതി ബോധ്യപ്പെടുന്നതിനായി അമ്പടയാളം ഇട്ട അക്ഷരത്തിലൂടെ എഴുതൽ ,
• കുത്തുകളിലൂടെ അക്ഷര ഘടന യോജിപ്പിച്ച് എഴുതൽ ,
• അക്ഷരത്തിന്റെ ഉള്ളിലൂടെ, രണ്ട് ലെയർ ഉള്ള അക്ഷര ഫ്രെയിമിലൂടെ പല നിറങ്ങളിലുള്ള സ്കെച്ച് പേന ഉപയോഗിച്ചെഴുതിക്കല്‍,
• ഒത്തെഴുത്ത് (കൂടുതല്‍ പ്രയാസം അനുഭവപ്പെടുന്നവർക്ക് )
• ടീച്ചർ കുട്ടിയുടെ കൈ പിടിച്ച് എഴുതൽ,
• ടീച്ചർ കുട്ടിയുടെ നോട്ടുബുക്കിൽ എഴുതിക്കൊടുക്കൽ

തെളിവെടുത്തെഴുതല്‍ (5 മിനിറ്റ്)

ഒന്നാം വാക്യത്തില്‍ നിന്ന് തെളിവായി എടുക്കാം ( ആരാ)

തെളിവെടുത്തെഴുതുന്ന ഓരോ സന്ദര്‍ഭത്തിലും സ്റ്റാര്‍ നല്‍കണം.

പ്രതീക്ഷിത ഉല്പന്നം

സചിത്രപ്രവര്‍ത്തനപുസ്തകത്തിലെ രേഖപ്പെടുത്തലുകള്‍

വിലയിരുത്തല്‍

ശരിയായി എഴുതിയ ഓരോ വാക്കിനും ശരിയടയാളം നല്‍കിയോ?

പിന്തുണാനടത്തം പ്രയോജനപ്രദമായോ?

തെളിവെടുത്തെഴുതുന്നതിന് എത്ര കുട്ടികള്‍ക്ക് കഴിഞ്ഞു?

മുന്‍ദിവസത്തെ ചാര്‍ട്ട് എങ്ങനെയാണ് പ്രയോജനപ്പെടുത്തിയത്?

പിരീഡ് രണ്ട്

പ്രവര്‍ത്തനത്തിന്റെ പേര്: വളരുന്ന ചെടി ( വായന)

പഠനലക്ഷ്യങ്ങള്‍: 1. പരിചിതാക്ഷരങ്ങളുളള ലഘുവാക്യങ്ങള്‍, പദങ്ങള്‍ എന്നിവ ഒറ്റയ്ക്കും സഹായത്തോടെയും വായിക്കുക 2. ശബ്ദഭംഗി ഉളവാക്കുന്ന അക്ഷരങ്ങളുടെയും പദങ്ങളുടെയും ആവർത്തനം കണ്ടെത്തുക

സമയം: 30 മിനിറ്റ്

കരുതേണ്ട സാമഗ്രികള്‍: രൂപീകരണപാഠം എഴുതിയ ചാര്‍ട്ട്

പ്രക്രിയാവിശദാംശങ്ങള്‍

വായന (5 മിനിറ്റ്)

കണ്ടെത്തല്‍ വായനയില്‍ സ്വീകരിക്കേണ്ട സമീപനം എന്താണ്? ആദ്യം വിളിച്ചു പറയുന്നവരിലേക്ക് ക്ലാസ് കേന്ദ്രികരിക്കാതിരിക്കാന്‍ ശ്രദ്ധിക്കണം.

• കണ്ടെത്തിയവര്‍ കൈ പൊക്കുക,
• എഴുന്നേറ്റ് നില്‍ക്കുക,
• എത്രതവണയെന്ന് വിരലുയര്‍ത്തിക്കാട്ടുക,
• എത്രാമതാണ് എന്ന് കൈവിരല്‍കൊണ്ട് വ്യക്തമാക്കുക,
• കണ്ടെത്തിയവര്‍ ബോര്‍ഡിന് അടുത്തേക്ക് വരിക തുടങ്ങിയ നിര്‍ദേശങ്ങള്‍ നല്‍കാം.
• ചുവടെയുളള വായനാഘട്ടങ്ങളിലും ഇതാണ് സ്വീകരിക്കേണ്ടത്

വാക്യം കണ്ടെത്തല്‍

• ചെടി പറഞ്ഞ മറുപടി എത്രാമത്തെ വരിയില്‍?
• നീ ആരാ എന്ന് എഴുതിയിട്ടുളളത് എത്രമാത്തെ വരിയാണ്.

വാക്ക് കണ്ടെത്തല്‍

• ആരാ എന്ന് എത്ര തവണ എഴുതിയിട്ടുണ്ട്?
• നീ ആരാ, അത് ആരാ, ആരാ അത്, ചെടി

വാക്കുകള്‍ തൊട്ടുവായിക്കാന്‍ അവസരം. അതു പോലെ ടീച്ചര്‍ തൊട്ടുകാണിക്കുന്നതും വായിക്കണം.)

അക്ഷരം കണ്ടെത്തല്‍

• ഊന്നല്‍ നല്‍കുന്ന അക്ഷരങ്ങള്‍ ( അ, ആ, ചെ, ഞ, ന്‍ ) തൊട്ടുകാണിക്കണം.

ചിഹ്നം ചേർന്ന വാക്ക് കണ്ടെത്തല്‍.

• ഊന്നല്‍ നല്‍കുന്ന ചിഹ്നങ്ങള്‍ ചേര്‍ന്ന വാക്ക് എവിടെയാണ്? നീ എന്ന വാക്കിന് മാത്രം അടിവരയിടുക.
• ചെടി എന്ന വാക്കിന് ചുറ്റും വട്ടം വരയ്കുക

ക്രമത്തില്‍ വായിക്കല്‍

• ഈ മൂന്നു വരികളും വായിക്കാന്‍ സന്നദ്ധതയുളളവര്‍ വരിക
• നിര്‍ദേശിക്കുന്ന ക്രമത്തില്‍ വായിക്കല്‍

രണ്ടാമത്തെ വരി ആദ്യം വായിക്കുക. എന്നിട്ട് ഒന്നാമത്തെ വരി

• മൂന്നും രണ്ടും വരികള്‍
• ഒന്നും മൂന്നും വരികള്‍

ചങ്ങല വായന

• നാലുപേരായി വന്ന് ഓരോരോ വാക്യം വീതം വായിക്കുന്നു
• രണ്ടാം തവണ ഓരോരുത്തരും വായിക്കേണ്ടത് ആദ്യം വായിച്ച വാക്യം ആകാതിരിക്കണം

ഭാവാത്മക വായന ( വാക്കില്‍ തൊട്ട് )

ഗ്രൂപ്പുകളുടെ വായന

ശ്രദ്ധിക്കേണ്ട കാര്യങ്ങള്‍

• എല്ലാവരുടെയും ബുക്കില്‍ ഓരോ വാക്യത്തിനും നേരെ ശരി നല്‍കുകയും രണ്ടു സ്റ്റാറുകള്‍ തെളിവെടുത്തെഴുതിയതിന് കൊടുക്കുകയും വേണം.

പ്രതീക്ഷിത ഉല്പന്നം

സചിത്രപ്രവര്‍ത്തനപുസ്തകത്തിലെ രേഖപ്പെടുത്തലുകള്‍

വിലയിരുത്തല്‍

1. വാക്കകലം പാലിച്ചിട്ടുണ്ടോ?
2. അക്ഷരങ്ങള്‍ ചേര്‍ന്നു പോയിട്ടുണ്ടോ?
3. അക്ഷരങ്ങള്‍ ശരിയായ രീതിയിലാണോ എഴുതിയിട്ടുളളത്?
4. എഴുതിയ വാക്കില്‍ എന്തെങ്കിലും മെച്ചപ്പെടുത്തല്‍ വരുത്തേണ്ടതുണ്ടോ?
5. ഭാവാത്മക വായനയില്‍ സഹായം നല്‍കേണ്ടി വന്നോ?

ന്നു .

പിരീഡ് മൂന്ന്

പ്രവർത്തനം : പാട്ടരങ്ങ്

പഠനലക്ഷ്യങ്ങൾ :

• പരിചിതമായ പാട്ടുകൾക്ക് അനുയോജ്യമായ താളം നൽകിയും ഭാവാത്മകമായും ഒറ്റയ്ക്കും കൂട്ടായും സദസ്സിനു മുൻപാകെ അവതരിപ്പിക്കുക

സമയം : 30 മിനിറ്റ്

കരുതേണ്ട സാമഗ്രികൾ: അഞ്ചിതളുകളുളള പലതരം പൂക്കൾ

പ്രകൃതിവിശദാംശങ്ങൾ :

• കൂട്ടുകാരെ ഇന്നലെ ടീച്ചർ പറഞ്ഞു തന്ന കുഞ്ഞു ചെടിയുടെ കഥ ഓർമയില്ലേ ?

• തലേ ദിവസം പറഞ്ഞ കഥ ഒന്നോ രണ്ടോ കുട്ടികൾ അവതരിപ്പിക്കുന്നു.

സന്ധ്യയായപ്പോള്‍ കുഞ്ഞു ചെടിക്ക് ഉറക്കം വന്നു. ഉറങ്ങാന്‍ തുടങ്ങി. അടുത്ത ദിവസം നേരം വെളുത്തു. കുഞ്ഞുചെടി ഉറക്കത്തിലാണ്.

"കുഞ്ഞുചെടീ, ഉണരൂ ഉണരൂ."

"കുർ കുർ കുർ കുർ.”

കുഞ്ഞുചെടി ഉറക്കം തന്നെ ഉറക്കം. ഒരു കുഞ്ഞുകാറ്റ് വന്ന് കുഞ്ഞുചെടിയെ തൊട്ടു വിളിച്ചു.

"കുഞ്ഞുചെടീ, ഉണരൂ ഉണരൂ."

"ങും ഞാനിത്തിരികൂടെ ഉറങ്ങട്ടെ.” കുഞ്ഞുചെടി പറഞ്ഞു.

"ദേ നോക്ക് അപ്പുറവും ഇപ്പുറവുമെല്ലാം എന്തെല്ലാം പൂക്കളാണ്?”

കുഞ്ഞുചെടി അല്പം കണ്ണുതുറന്നു.  (അഭിനയം)

"അതാ അഞ്ചിതളുളള ഒരു പൂവ് കണ്ടോ?”

"അതിന്റെ പെരെന്താ?”

അപ്പോള്‍ കുഞ്ഞുകാറ്റ് പാടി (പാട്ട്- അധ്യാപക സഹായി പേജ് 88 ല്‍) കുഞ്ഞുചെടിക്ക് പാട്ട് ഇഷ്ടമായി. 

"ഒന്നുകൂടി പാടാമോ?” ചെടി ചോദിച്ചു. കുഞ്ഞുകാറ്റ് വീണ്ടും പാടി, കുഞ്ഞുചെടി ഒപ്പം പാടി (എല്ലാവരും താളമിട്ട് ഒത്തുപാടണം-(അനുബന്ധം1 നോക്കുക)

• ലേഖനത്തിലും വായനയിലും പ്രയാസമനുഭവപ്പെടുന്നവരെ പാട്ടിന്റെ വരി ചൊല്ലിക്കൊടുക്കാന്‍ ടീച്ചര്‍ ഒപ്പം കൂട്ടുന്നു

പ്രതീക്ഷിത ഉല്പന്നം

• താളമിട്ട് പാട്ടുപാടുന്നതിന്റെ ഡിജിറ്റൽ പോർട്ട് ഫോളിയോ

വിലയിരുത്തൽ

• ഇതളുകളുടെ എണ്ണത്തെക്കുറിച്ചുള്ള ഈ പാട്ട് അവതരിപ്പിക്കുന്നതിലൂടെ പൂക്കൾ നിരീക്ഷിക്കുന്നതിനുള്ള താത്പര്യം കുട്ടികളിലുണ്ടായോ?

• അഞ്ചിതളുള്ള പൂക്കൾ വീട്ടുവളപ്പിലുണ്ടോ? സ്കൂൾ വളപ്പിലുണ്ടോ?

• അന്വേഷിച്ച് വരികൾ കൂട്ടിച്ചേർക്കാൻ അവസരം കൊടുത്തുവോ?

• ഓരോ പൂക്കളും ഉയർത്തിക്കാട്ടി അതിന്റെ പേര് ചേർത്ത് പാടുന്നതിന്‌ ഗ്രൂപ്പുകള്‍ക്ക്‌ അവസരം നല്‍കിയപ്പോള്‍ വ്യക്തിഗതമായി പാടി മറ്റുള്ളവര്‍ ഏറ്റുപാടുന്ന രീതി എത്ര ഗ്രൂപ്പുകള്‍ സ്വീകരിച്ചു? 

• സ്‌കൂള്‍ അസംബ്ലിയില്‍ ഈ പാട്ട്‌ അവതരിപ്പിക്കാന്‍ അടുത്ത ദിവസം വരികള്‍ കൂട്ടിച്ചേര്‍ത്തു വന്നവര്‍ ആരെല്ലാം?

പിരീ‍‍ഡ് നാല്

പ്രവര്‍ത്തനം: തരംതിരിക്കാം.

പഠനലക്ഷ്യങ്ങള്‍:

1. പൂക്കള്‍‍ നിരീക്ഷിച്ചും ചിത്രങ്ങള്‍ വിശകലനം ചെയ്തും മുതിര്‍ന്നവരോട് അന്വേഷിച്ചും പൂക്കളുമായി ബന്ധപ്പെട്ട് കണ്ടെത്തിയ സവിശേഷതകളുടെ (നിറം, വലിപ്പം) അടിസ്ഥാനത്തില്‍‍ പൂക്കളെ തരംതിരിക്കുന്നു, പട്ടികപ്പെടുത്തുന്നു.

2. ഇതളുകളുടെ എണ്ണത്തിന്റെ അടിസ്ഥാനത്തില്‍ ക്രമീകരിക്കുക.

3. അവ വിശകലനം ചെയ്ത് നിറം, വലിപ്പം, ഇതളുകളുടെ എണ്ണം എന്നീ മാനദണ്ഡങ്ങളുടെ അടിസ്ഥാനത്തിൽ പൂക്കളില്‍ വൈവിധ്യമുണ്ടെന്ന നിഗമനത്തിലെത്തിച്ചേരുക. (പൂക്കള്‍ എല്ലാം ഒരുപോലെയല്ല. നിറം, മണം, വലുപ്പം, ഇതളുകളുടെ എണ്ണം തുടങ്ങിയവയില്‍ പൂക്കള്‍ വ്യത്യാസപ്പെട്ടിരിക്കുന്നു)

4. വൈവിധ്യങ്ങള്‍ക്ക് കൂടുതല്‍ ഉദാഹരണങ്ങള്‍ കണ്ടെത്തുക

സമയം: 35  മിനിറ്റ്

കരുതേണ്ട സാമഗ്രികള്‍:

• വ്യത്യസ്ത നിറങ്ങളും ഇതളുകളും വലുപ്പവുമുളള പൂക്കള്‍

പ്രക്രിയാവിശദാംശങ്ങള്‍

കാറ്റിന്റെ പാട്ടു കേട്ട് കുഞ്ഞുചെടി കാറ്റിനോടു ചോദിച്ചു. എല്ലാ പൂക്കൾക്കും അഞ്ചിതൾ മാത്രമാണോ ഉള്ളത്?കാറ്റിന് ഇത് കേട്ടപ്പോൾ സംശയമായി. പിറ്റേദിവസം കാറ്റ് കുറേ പൂക്കളുമായിട്ടാണ് വന്നത്. കുഞ്ഞുചെടിയുടെ സംശയം തീര്‍ക്കണമല്ലോ?

പഠനപ്രശ്നാവതരണം.

• എല്ലാ പൂക്കൾക്കും അഞ്ചിതൾ മാത്രമാണോ ഉള്ളത്?

• കുട്ടികളുടെ പ്രതികരണങ്ങള്‍

• കൂടുതല്‍ പിന്തുണ ആവശ്യമുള്ളവരുടെ പ്രതികരണം ഉറപ്പാക്കുന്നു.

പ്രശ്നപരിഹരാസൂത്രണം

• എല്ലാ പൂക്കൾക്കും അഞ്ചിതൾ മാത്രമാണോ ഉള്ളത്? എന്ന് എങ്ങനെ കണ്ടെത്തും? കുട്ടികളുടെ നിര്‍ദ്ദേശങ്ങള്‍

• അവർക്കിഷ്ടപ്പെട്ട ആറ് പൂക്കളുടെ പേര് പറഞ്ഞു ഗ്രൂപ്പാകുന്നു..

• കുട്ടികളും ടീച്ചറും കൊണ്ടുവന്ന പൂക്കള്‍ ഗ്രൂപ്പടിസ്ഥാനത്തിൽ തരം തിരിക്കുന്നു.

• ഒന്നാം ഗ്രൂപ്പ്‌ രണ്ട് ഇതളുകളുള്ള പൂക്കൾ കൂട്ടത്തിൽ നിന്നും കണ്ടെത്തുന്നു.

• രണ്ടാം ഗ്രൂപ്പ്‌ മൂന്നിതൾ, മൂന്നാം ഗ്രൂപ്പ്‌ നാലിതൾ അങ്ങനെ…

• പൂക്കൾ തരം തിരിച്ച് കളം വരച്ച് അതില്‍ വയ്കുന്നു.

• കണ്ടെത്തലുകള്‍ പങ്കിടുന്നു.

തരംതിരിച്ചതിനെ അടിസ്ഥാനമാക്കി പാട്ടുണ്ടാക്കാമോ? 

ഇതളുകളുകളുടെ എണ്ണം
2	3	4	5	6	ആറില്‍ കൂടുതല്‍
യൂഫോബിയ തുമ്പ	തെങ്ങിൻ പൂ	തെച്ചി, കണ്ണാന്തളി അശോകം, കാക്കപ്പൂവ് ഹൈഡ്രാന‍്‍ജിയ	നിത്യ കല്യാണി സ്റ്റാര്‍ ചെക്കി വെളുത്തതെച്ചി മത്തന്‍, നാലുമണിപ്പൂവ്	നിലപ്പന ലില്ലി	ആകാശമല്ലി(മാങ്ങാനാറി) പിച്ചകം, ചെണ്ടുമല്ലി വാടാമുല്ല,  റോസോപ്പൂവ്, താമര, ആമ്പല്‍. സൂര്യകാന്തി
ഇതളുകളുടെ അടിസ്ഥാനത്തില്‍ പാട്ടിന്റെ സാധ്യത
	മൂന്നിതള് മൂന്നിതള് തെങ്ങിന്‍പൂവിന് മൂന്നിതള് തിത്തിരിക്കും മൂന്നിതള്	നാലിതള് നാലിതള് കാക്കപ്പൂവിന് നാലിതള് തെച്ചിപ്പൂവിന് നാലിതള്		ആറിതള് ആറിതള് ലില്ലിപ്പൂവിന്നാറിതള് നിലപ്പനയ്ക്കും ആറിതള്

പാട്ട് പാടിക്കഴിഞ്ഞാല്‍ അടുത്ത പഠനപ്രശ്നാവതരണം

• നമ്മുടെ നാട്ടില്‍ എല്ലാ നിറങ്ങളിലുമുളള പൂക്കള്‍ ഉണ്ടോ? 

• കുട്ടികളുടെ പ്രതികരണം.

കുഞ്ഞുചെടിക്കും സംശയം. ആ സംശയം തീർത്താലോ? 

• കുട്ടികൾക്ക് നീല, ചുവപ്പ്, മഞ്ഞ, വെള്ള, കറുപ്പ് നിറങ്ങളിലുള്ള കടലാസുകൾ നൽകുന്നു. പേപ്പറിന്റെ നിറത്തിനനുസരിച്ച് ഗ്രൂപ്പാവുന്നു.

• കളത്തില്‍ പ്രദർശനത്തിന് വെച്ച പൂക്കളിൽ നിന്നും തനിക്ക് കിട്ടിയ നിറത്തിലുള്ള പൂക്കള്‍ ശേഖരിക്കുന്നു.

• ശേഖരിച്ച പൂക്കളെ നിറത്തിന്റെ അടിസ്ഥാനത്തില്‍ ക്രമീകരിക്കണം.

• ഏത്‌ നിറത്തിലുള്ള പൂക്കളാണ്‌ ഇല്ലാതെ പോയത്‌?

• ഓരേ ഇനത്തില്‍ പെട്ട ചെടികള്‍ക്ക്‌ പല നിറത്തിലുള്ള പൂക്കളുണ്ടോ?

പ്രതീക്ഷിത ഉല്പന്നം

• ഇതളുകളുടെ എണ്ണമനുസരിച്ചു തരംതിരിച്ച കളങ്ങളുടെ ചിത്രം

• നിറങ്ങൾക്കനുസരിച്ചു പൂക്കള്‍ തരംതിരിച്ച് വച്ച കളങ്ങള്‍

• കുട്ടികള്‍ നിര്‍മ്മിച്ച പാട്ട്

വിലയിരുത്തല്‍

• പൂക്കളെ നിറങ്ങളുടെ അടിസ്ഥാനത്തില്‍ ഉദാഹരിക്കാന്‍ എത്രപേര്‍ക്ക് കഴിഞ്ഞു?

• ഇതളുകളുടെ അടിസ്ഥാനത്തില്‍ തരം തിരിക്കാനുളള ധാരണ എത്രപേര്‍ക്ക് ഉണ്ടായിരുന്നു?

• തരംതിരിച്ചത് ശരിയാണോ എന്ന് മറ്റു ഗ്രൂപ്പുകള്‍ വിലയിരുത്തിയോ?\

• പാട്ട് താളത്തിനൊത്ത് പാടിയവർ ആരൊക്കെ?

• വരികൾ കൂട്ടിച്ചേർത്തു പാടിയോ?

പിരീഡ് അഞ്ച്

പ്രവര്‍ത്തനം- നിറം തരൂ, ചിത്രപ്രദര്‍ശനം

പഠനലക്ഷ്യങ്ങള്‍-

1. പൂക്കള്‍ വിശകലനം ചെയ്ത് നിറം, വലിപ്പം, ഇതളുകളുടെ എണ്ണം എന്നീ മാനദണ്ഡങ്ങളുടെ അടിസ്ഥാനത്തിൽ പൂക്കളില്‍ വൈവിധ്യമുണ്ടെന്നു നിഗമനത്തിലെത്തിച്ചേരുക. (പൂക്കള്‍ എല്ലാം ഒരുപോലെയല്ല. നിറം, മണം, വലുപ്പം, ഇതളുകളുടെ എണ്ണം തുടങ്ങിയവയില്‍ പൂക്കള്‍ വ്യത്യാസപ്പെട്ടിരിക്കുന്നു)

2. ചിത്രങ്ങൾക്ക് നിറം നൽകുന്നു (പ്രകൃതിയിൽ നിന്നും ലഭ്യമായതും അല്ലാത്തതുമായ വസ്തുക്കൾ ഉപയോഗിച്ച് )

സമയം: 30 മിനിറ്റ്

കരുതേണ്ട സാമഗ്രികള്‍- ടി ബിയിലെ പ്രവർത്തനം (നിറം നൽകാം).

• കൂട്ടുകാരെ നമുക്കിനി പൂക്കൾക്ക് നിറം നൽകിയാലോ? എല്ലാവരും പാഠപുസ്തകം എടുക്കൂ. പൂക്കൾക്ക് അനുയോജ്യമായ നിറം നൽകൂ.

• പാഠപുസ്‌തകത്തിലെ ചിത്രം നിരീക്ഷിച്ച്‌ നിറം നല്‍കി ആകര്‍ഷകമാക്കിയ പേജുകള്‍ പരസ്‌പരം നിരീക്ഷിക്കുന്നു. 

• നിങ്ങൾ ചിത്രപ്രദർശനം കണ്ടിട്ടുണ്ടോ? നമുക്ക് നടത്തിയാലോ

• എല്ലാവരും നിറം നൽകിയ പേജ് തുറന്നു വെക്കൂ.

• ഇനി നമുക്ക് എല്ലാവരുടെയും ചിത്രങ്ങൾ കാണാം. അഭിപ്രായങ്ങൾ പറയണേ.

• ചിത്രങ്ങളുടെ പ്രദര്‍ശനം വിലയിരുത്തല്‍. 

വിലയിരുത്തല്‍

• നിറം നല്‍കുമ്പോള്‍ സൂക്ഷ്മത പാലിച്ചവരെത്രപേര്‍?

• പൂവുകള്‍ക്ക് അനുയോജ്യമായ നിറമാണോ നല്‍കിയത്?

• വ്യത്യസ്തമായ നിറം നല്‍കിയ കുട്ടികളുടെ വിശദീകരണമെന്തായിരുന്നു?

• ചിത്രപ്രദര്‍ശനത്തോടുളള പ്രതികരണമെങ്ങനെ?

വ്യക്തിഗത മാസ്റ്റര്‍ പ്ലാന്‍ തയ്യാറാക്കുന്നതിന് പരിഗണിച്ച കുട്ടികളുടെ ശക്തികള്‍ കണ്ടെത്താന്‍ പാട്ടരങ്ങ് നിറം നല്‍കല്‍ തരംതിരിക്കല്‍ പൂക്കള്‍ ശേഖരണം എന്നീ പ്രവര്‍ത്തനങ്ങള്‍ പ്രയോജനപ്പെടുത്തിതിന്റെ വിശദാംശങ്ങള്‍

അനുബന്ധം 1

പൂക്കള്‍ കാണിച്ചോ ചിത്രം പ്രദര്‍ശിപ്പിച്ചോ ചൊല്ലാം. (എഴുതിയത് കുട്ടികള്‍ക്ക് വായിക്കാനുള്ളതല്ല) 

അഞ്ചിതളല്ലോ അഞ്ചിതള് (4/4)

 തന്നാനേ താന തിന തന്നാനം താന

തന്നാനേ താന തിന തന്നാനം താന

അഞ്ചിതള് അഞ്ചിതള്

അരളിപ്പൂവിന്നഞ്ചിതള്

അഞ്ചിതള് അഞ്ചിതള്

മുക്കൂറ്റിപ്പൂവഞ്ചിതള്

രയ്യരെയ്യം രയ്യരെയ്യം

രയ്യര രയ്യര രയ്യരയ്യം

തന്നാനേ താന തിന തന്നാനം താന

തന്നാനേ താന തിന തന്നാനം താന

അഞ്ചിതള് അഞ്ചിതള്

കോളാമ്പിപ്പൂവഞ്ചിതള്

അഞ്ചിതള് അഞ്ചിതള്

നന്ത്യാര്‍വട്ടം അഞ്ചിതള്

രയ്യരെയ്യം രയ്യരെയ്യം

രയ്യര രയ്യര രയ്യരയ്യം

തന്നാനേ താന തിന തന്നാനം താന

തന്നാനേ താന തിന തന്നാനം താന

അഞ്ചിതള് അഞ്ചിതള്

ചെമ്പരത്തിക്കഞ്ചിതള്

അഞ്ചിതള് അഞ്ചിതള്

മന്താരപ്പൂവഞ്ചിതള്

രയ്യരെയ്യം രയ്യരെയ്യം

രയ്യര രയ്യര രയ്യരയ്യം

തന്നാനേ താന തിന തന്നാനം താന

തന്നാനേ താന തിന തന്നാനം താന

 അനുബന്ധം രണ്ട്

പ്രതിദിന വായനപാഠം ( ഈ സ്വരത്തിന്റെ ചിഹ്നത്തിന് ഊന്നല്‍. ഇ, ഈ എന്നീ സ്വരങ്ങളുടെ ചിഹ്നങ്ങള്‍ വേര്‍തിരിച്ചറിയാനും അവസരം, ര, ആ, ട, പ, റ. വ. ന എന്നിവയ്ക്ക് പുനരനുഭവം. പാട്, പാടി എന്നിവയില്‍ ചിഹ്നം മാത്രം മാറുന്നു,)