തുമ്പിവിമാനങ്ങള്‍ ഒന്നാം ദിവസം

   

തുമ്പി വിമാനങ്ങള്‍

ഔദ്യോഗിക അധ്യാപകസഹായിയിലെ ക്രമമോ പ്രക്രിയയോ ആയിരിക്കില്ല ഈ ആസൂത്രണക്കുറിപ്പില്‍ പിന്തുടരുക. പ്രതിദിനം നാല് പിരീഡെങ്കിലും കേരളപാഠാവലിയുടെ വിനിമയത്തിനായി പ്രയോജനപ്പെടുത്തുന്ന ക്ലാസുകള്‍ക്ക് വേണ്ടിയാണ് ഈ കുറിപ്പ് തയ്യാറാക്കിയിട്ടുള്ളത്. ( ശരിക്കും ആഴ്ചയില്‍ ഒരു ദിവസമൊഴികെ എല്ലാ ദിവസവും കേരളപാഠാവലിക്ക് അഞ്ച് പിരീഡാണ് വേണ്ടത്.) രണ്ടാം ഭാഗം ഒന്നാം ഭാഗത്തെതുപോലെ വിശദമായ പഠനത്തിന് ലക്ഷ്യമിടുന്നില്ല. കുട്ടികളെ സ്വതന്ത്രവായനക്കാരും തനിച്ചെഴുത്തുകാരുമാക്കുന്നതിന് ഊന്നല്‍. നേരത്തെ പരിചയപ്പെട്ട എല്ലാ അക്ഷരങ്ങളുടെയും പുനരനുഭവം ഉള്ളതിനാല്‍ അത്തരം സന്ദര്‍ഭങ്ങള്‍ കൂടുതല്‍ പിന്തുണ അര്‍ഹിക്കുന്നവര്‍ക്കായി വിനിയോഗിക്കണം. ചുവന്ന നിറത്തില്‍ നല്‍കിയിട്ടുള്ളത് കൂടുതല്‍ പിന്തുണ ആവശ്യമുള്ളവരെ പരിഗണിക്കുന്ന ഇടപെടലുകളാണ്.

രണ്ടാം ക്ലാസിലേക്ക് പ്രവേശിക്കുന്നതിന് സജ്ജമാക്കുന്നതെങ്ങനെയാണ്? അവരില്‍ ആത്മവിശ്വാസം വളര്‍ത്തുന്നതും സ്വന്തം കാലില്‍ നില്‍ക്കാന്‍ പ്രാപ്തരായി എന്ന് ബോധ്യപ്പെടുത്തുന്നതുമായ പ്രവര്‍ത്തനങ്ങള്‍ വേണം. ക്ലാസിലെ ചെറിയൊരു വിഭാഗത്തിന് കൂടുതല്‍ പിന്തുണ ആവശ്യവുമാണ്. ഈ പാഠത്തിന്റെ വിനിമയത്തില്‍ ഇരുകൂട്ടരെയും പരിഗണിക്കുന്ന ഒരു രീതി സാധ്യമാണോ എന്നാണ് പരിശോധിക്കുന്നത്.

• ഒരു കൂട്ടര്‍ സ്വതന്ത്രമായി പ്രവര്‍ത്തനങ്ങള്‍ ചെയ്യുന്നു

• കൂടുതല്‍ പിന്തുണ ആവശ്യമുള്ളവര്‍ ടീച്ചറോടൊപ്പം പ്രവര്‍ത്തിക്കുന്നു

ഒന്നാം ദിവസം

പ്രവര്‍ത്തനം -പാട്ടരങ്ങ് ഉറുമ്പുപാട്ടുകള്‍ ( കുഞ്ഞെഴുത്ത് പേജ് 121)

പഠനലക്ഷ്യങ്ങള്‍

• പാട്ടിലെ ആശയം ഉള്‍ക്കൊണ്ട് തുടര്‍ വരികള്‍ പൂരിപ്പിച്ച് എഴുതുന്നു.

പ്രതീക്ഷിത സമയം 35 മിനിറ്റ്

പ്രക്രിയാവിശദാംശങ്ങള്‍

• പഠനക്കൂട്ടങ്ങളാക്കുന്നു

• ലാ ലാലാ ലാലലേ എന്ന വായ്താരി ബോര്‍ഡില്‍ എഴുതുന്നു. വായ്താരി മാത്രം ഒത്തുചൊല്ലി രസിക്കുന്നു

• ഓരോ പഠനക്കൂട്ടവും വായ്താരി ചൊല്ലണം

• തുടര്‍ന്ന് കുഞ്ഞെഴുത്ത് പുസ്തകം നോക്കി കല്യാണത്തിന് പോകേണ്ടേ വരെ വായിക്കുന്നു

• ഓരോ വാക്കും നിറുത്തി സാവധാനം വായിക്കണം. പിന്നെ ഓരോ വരിയും വായിക്കണം. തുടര്‍ന്ന് നാല് വരിയും വായിക്കണം.കുട്ടികളും അപ്രകാരം ചെയ്യണം

• തുടര്‍ന്ന് അത്രയും വരികള്‍ ഓരോ പഠനക്കൂട്ടവും ചൊല്ലണം.

• ബാക്കി വരികള്‍ പഠനക്കൂട്ടങ്ങള്‍ പൂരിപ്പിക്കണം.

കൂടുതല്‍ പിന്തുണ ആവശ്യമുള്ളവര്‍ക്ക് ചിഹ്നധാരണ ലഭിക്കുന്നതിനും തെളിവെടുത്ത് എഴുതുന്നതിനും സഹായകമായ പ്രവര്‍‍ത്തനം ( ലാ, ലേ, ല്യ, ല്, ലു, നെ, ഞ്ഞോ, മ്പി )

• മുകളിലെ വരികള്‍ പകര്‍ത്തിയെഴുതുന്ന ഘട്ടം കഴിഞ്ഞാല്‍ പുതിയതായി വരികള്‍ നിര്‍മ്മിച്ചെഴുതുന്ന ഘട്ടമാണ്.

• സാധ്യതകള്‍ പഠനക്കൂട്ടത്തിലെ ഓരോരുത്തരും അവതരിപ്പിക്കണം.

• അവ താളാത്മകമാക്കി മാറ്റണം.

• ഓരോ പഠനക്കൂട്ടവും കണ്ടെത്തിയ സാധ്യതള്‍ പങ്കിടണം. ടീച്ചര്‍ അവ ബോര്‍ഡില്‍ എഴുതണം. ടീച്ചര്‍ക്കും കൂട്ടിച്ചേര്‍ക്കാം. ( കല്യാണത്തിന് പോകാനല്ലേ ഭംഗിയുള്ളൊരു കമ്മല്, ചന്തമുള്ളൊരു പാദസരം, കുളിച്ചൊരുങ്ങി വരണത്…….)

• ബോര്‍ഡില്‍ എഴുതിയ വരികള്‍ വായ്താരി ചേര്‍ത്ത് കൂട്ടായി ചൊല്ലുന്നു.

• അതില്‍ നിന്നും ഇഷ്ടമുള്ള വരി ചേര്‍ത്ത് ഓരോരുത്തരും വ്യക്തിഗതമായി പേജ് 121പൂരിപ്പിക്കുന്നു.

• പഠനക്കൂട്ടത്തില്‍ പരസ്പരം പരിശോധിക്കുന്നു

• എന്റെ കുട്ടിപ്പാട്ട് പുസ്തകത്തിലേക്ക് കൂടുതല്‍ വരികള്‍ ചേര്‍ത്ത് എഴുതുവാന്‍ നിര്‍ദേശിക്കാം.

• ഓരോ പഠനക്കൂട്ടവും പാട്ട്താളമിട്ട് അവതരിപ്പിക്കുന്നു

  നെയ്യുറുമ്പ് എന്ന പേര് മാറ്റി മറ്റ് ഉറുമ്പുകളെ ചേര്‍ത്തും ജീവികളെ ചേര്‍ത്തും പാടാം. 

പ്രവര്‍ത്തനം ചെറുജീവികള്‍ (പാഠപ്പുസ്തകം പേജ് 137)

പഠനലക്ഷ്യങ്ങള്‍

• ചുറ്റുപാടുമുള്ള ചെറുജീവികളെ നിരീക്ഷിച്ച് അവയുടെ ശാരീരിക പ്രത്യേകതകള്‍ മനസ്സിലാക്കി രേഖപ്പെടുത്തുന്നതിനും കാലുകളുടെ എണ്ണത്തിന്റെ അടിസ്ഥാനത്തില്‍ തരംതിരിക്കുന്നതിനും

പ്രതീക്ഷിത സമയം 35 മിനിറ്റ്

പ്രക്രിയാവിശദാംശങ്ങള്‍

ഘട്ടം ഒന്ന്

• കുട്ടികള്‍ ക്ലാസിലൂടെ നടക്കണം. ടീച്ചര്‍ നമ്പര്‍ പറയും. അപ്പോള്‍ അതനുസരിച്ച് കൂട്ടങ്ങളാകണം. (2,4,6,8 എന്നീ നമ്പരുകളാണ് പറയേണ്ടത്. )

ഘട്ടം രണ്ട്

• അതിനു ശേഷം ജീവികളുടെ പേരു പറഞ്ഞാല്‍ അതിന്റെ കാലുകളുടെ എണ്ണം എത്രയാണോ അത്രയും പേരുടെ കൂട്ടമാകണം. ഉദാഹരണം പൂച്ച എന്നാണ് പറയുന്നതെങ്കില്‍ നാല് പേരുടെ കൂട്ടമാകണം. ഷഡ്പദങ്ങളുടെയും നാല്‍ക്കാലികളുടെയും പേരുകള്‍ കൂടുതലായി പറയണം

ഘട്ടം മൂന്ന്

• കളി തീര്‍ന്ന ശേഷം ചെറുജീവികളെ തരം തിരിക്കാം പ്രവര്‍ത്തനം (പാഠപ്പുസ്തകം പേജ് 137) വിലയിരുത്തല്‍ പ്രവര്‍ത്തനമായി നല്‍കണം.

  • അവരവരുടെ അറിവ് അനുസരിച്ച് പൂരിപ്പിച്ചാല്‍ മതി. തെറ്റിപ്പോയാല്‍ പിന്നെ ശരിയാക്കാം.

  • കുട്ടികള്‍ എഴുതിയ ശേഷം ഓരോന്നായി പങ്കിടണം.

  • സ്വീകാര്യമെങ്കില്‍ എല്ലാവരും എഴുതണം. കോളത്തില്‍ കൊള്ളുന്നത്രയും എഴുതിയാല്‍ മതി.

  • എല്ലാവരും എഴുതിയത് ആശയപരമായും ഭാഷാപരമായും ശരിയാണെന്ന് ടീച്ചര്‍ ഉറപ്പുവരുത്തണം. കൂടുതല്‍ പിന്തുണ ആവശ്യമുള്ളവരെക്കൊണ്ട് വായിപ്പിക്കണം.

  • വിര, ഒച്ച്

  • പല്ലി, ഓന്ത്….

  • ഉറുമ്പ്, ചിത്രശലഭം...

  • എട്ട് കാലി

  • അട്ട, പഴുതാര

ആല്‍ബനിര്‍മ്മാണം. പേജ് 123 കുഞ്ഞെഴുത്ത്

പഠനലക്ഷ്യങ്ങള്‍

ജീവികളുടെ ചിത്രം ശേഖരിച്ചും സ്വന്തമായി വരച്ചുണ്ടാക്കിയും അവയെക്കുറിച്ചുള്ള വിവരങ്ങള്‍ അന്വേഷിച്ച് രേഖപ്പെടുത്തിയും ആല്‍ബം തയ്യാറാക്കുന്നു

പ്രവര്‍ത്തനവിശദാംശങ്ങള്‍

• നിര്‍ദ്ദേശങ്ങള്‍ നല്‍കണം,

• ചിത്രം ശേഖരിച്ചോ വരച്ചോ വീട്ടില്‍ വെച്ച് പൂര്‍ത്തിയാക്കണം.

• സംയുക്തഡയറി എഴുത്ത് രീതിയില്‍ ഓരോന്നിനും അടിക്കുറിപ്പ് എഴുതണം.

• പുസ്തകത്തിലല്ലാതെ പേപ്പറുപയോഗിച്ച് ആല്‍ബം നിര്‍മ്മിക്കുകയുമാകാം.

• മൂന്നോ നാലോ ദിവസം കൊണ്ട് പൂര്‍ത്തിയാക്കണം

• ക്ലാസ് വാട്സാപ്പ് ഗ്രൂപ്പില്‍ നിര്‍ദേശം നല്‍കണം.

• ആല്‍ബം എല്ലാവരും തയ്യാറാക്കി കഴിഞ്ഞാല്‍ പരസ്പരം വിലയിരുത്തണം

• ടീച്ചര്‍ ഓരോരുത്തരുടെയും ആല്‍ബം വിലയിരുത്തി ഫീഡ് ബാക്ക് നല്‍കണം.

• ലേഖനത്തിലെ പ്രശ്നം പരിഹരിക്കാന്‍ സഹായിക്കണം.

മൊഴിക്കിലുക്കത്തിലേക്ക്

അവലോകനം

1. എന്റെ പാട്ടുപുസ്തകത്തില്‍ എത്ര പാട്ടുകളായി?

2. ഞാന്‍ എത്ര കാര്‍ട്ടൂണ്‍ ഡയറികളെഴുതി?

3. കുഞ്ഞുവര്‍ത്തമാനങ്ങള്‍ എത്രയായി?

4. സംയുക്ത ഡയറിയില്‍ നിന്നും രക്ഷിതാവിന്റെ സഹായത്തോടെ നാല് വ്യത്യസ്ത ഉള്ളടക്കമുള്ള ഡയറികള്‍ തിരഞ്ഞെടുത്ത് അടയാളക്കടലാസ് വച്ചോ?

5. എത്ര പുസ്തകങ്ങള്‍ തനിയെ വായിച്ചു?

6. എത്ര കഥാക്കുറിപ്പുകള്‍ എഴുതി?

ഇത്രയും അവലോകനം നടത്തിയ ശേഷം രണ്ടാഴ്ചക്കുള്ളില്‍ എണ്ണം കൂട്ടാന്‍ തീരുമാനിക്കണം. ക്ലാസ് വാട്സാപ്പ് ഗ്രൂപ്പില്‍ പൊതുഅവസ്ഥ പങ്കിടണം.

ക്ലാസ് പി ടി എ കൂടി മൊഴിക്കിലുക്കം ചര്‍ച്ച ചെയ്യണം.