( പലഹാരപ്പാട്ടടക്കമുള്ള എല്ലാ പ്രവര്‍ത്തനങ്ങളിലും വായനയിലും എഴുത്തിലും പിന്നാക്കം നില്‍ക്കുന്നവര്‍ എങ്ങനെ പങ്കാളികളാകും എന്നതിന്റെ വിശദാംശങ്ങളില്ല. പൊതുവായി നടത്താവുന്ന രീതിയാണുള്ളത്.അതിനാല്‍ ഓരോ പ്രവര്‍ത്തനവും അവര്‍ക്ക് നിരാശ സമ്മാനിക്കുന്നു. വ്യക്തിഗത പരിഗണനയും സഹപാഠികളുടെ പിന്തുണയുമില്ലെങ്കില്‍ ഇത്തരം കുട്ടികള്‍ക്ക് മുന്നേറാനാകില്ല. ഓരോ ക്ലാസിലും അവരുടെ ആത്മവിശ്വാസം കൂട്ടാനുള്ള കൈത്താങ്ങുതലം ഉണ്ടോ എന്ന് പരിശോധിക്കുകയും അത് ഉറപ്പാക്കുകയും വേണ്ടതുണ്ട്. അങ്ങനെയുള്ള ഭിന്നതല ആസൂത്രണക്കുറിപ്പ് വികസിപ്പിക്കാനാണ് ശ്രമിക്കുന്നത്)
വിഷയം മലയാളം
യൂണിറ്റ്: മൂന്ന്
പാഠത്തിൻ്റെ പേര്: പലഹാരക്കൊതി
ടീച്ചറുടെ പേര്: സൈജ എസ്
ഗവ എൽ പി എസ് കൊല്ലൂർവിള , കൊല്ലം
കുട്ടികളുടെ എണ്ണം :.......
ഹാജരായവർ: .......
തീയതി : ..…../ 2025
പ്രവർത്തനം അപ്പാണ്യവും പലഹാരപ്പാട്ടും
പഠനലക്ഷ്യങ്ങള്‍
കവിതയില്‍ അടങ്ങിയ വിവിധ താളങ്ങള്‍ തിരിച്ചറിഞ്ഞ് താളം പിടിച്ച് ചൊല്ലി രസിക്കുക
കരുതേണ്ട സാമഗ്രികള്‍: പലഹാരപ്പാട്ടുകള്‍ എഴുതിയ ചാര്‍ട്ട്
സമയം മുപ്പത് മിനിറ്റ്
ഘട്ടം ഒന്ന് അപ്പാണ്യം ആസൂത്രണം തുടര്‍ച്ച
അപ്പാണ്യത്തിന് പലഹാരപ്രദര്‍ശനം മാത്രം മതിയോ?
പലഹാരപ്പാട്ട് മത്സരം
ചിത്ര പ്രദര്‍ശനം വേണം
പാചകക്കുറിപ്പെഴുത്ത് മത്സരം
പലഹാരച്ചൊല്ലുകള്‍ മത്സരം
ആഹാരവുമായി ബന്ധപ്പെട്ട കടങ്കഥപ്പയറ്റ്
പലഹാരവിവരണം
പരസ്യം വേണം ( പോസ്റ്റര്‍)
എല്ലാം ഒരു ദിവസം നടത്താന്‍ സമയം തികയുമോ? ഉത്സവത്തിനൊക്കെ പലദിവസങ്ങളായി പരിപാടികള്‍ നടത്തുന്നത് കണ്ടിട്ടില്ലേ? നമ്മള്‍ക്ക് അതുപോലെ ആലോചിച്ചാലോ?
ദിവസം |
പരിപാടികള്‍ |
സംഘാടന ചുമതല |
ഒന്ന് |
പലഹാരപ്പാട്ട് മത്സരം, പോസ്റ്റര്‍ രചനാമത്സരം |
പഠനക്കൂട്ടം ഒന്ന് |
രണ്ട് |
പാചകക്കുറിപ്പെഴുത്ത് മത്സരം, കടങ്കഥപ്പയറ്റ് |
പഠനക്കൂട്ടം രണ്ട് |
മൂന്ന് |
പലഹാരച്ചൊല്ലുമത്സരം പലഹാരവിവരണം-മത്സരം |
പഠനക്കൂട്ടം മൂന്ന് |
നാല് |
അപ്പാണ്യം പ്രദര്‍ശനം ( പലഹാരങ്ങള്‍, ചിത്രം) |
പഠനക്കൂട്ടം നാല് |
സംഘാടനച്ചമുതലയുള്ളവര്‍ ചെയ്യേണ്ടത്
അതത് ദിവസത്തെ പോസ്റ്റര്‍ പ്രദര്‍ശിപ്പിക്കുക
സ്വാഗതം, ഉദ്ഘാടനം എന്നിവയുടെ ചമുതല ( പഠനക്കൂട്ടത്തിലെ അംഗങ്ങള്‍ തന്നെയാണ് പ്രസംഗിക്കേണ്ടത്)
സമ്മാനവിതരണം
ഘട്ടം രണ്ട് പലഹാരപ്പാട്ട് മത്സരം തയ്യാറെടുപ്പ്
കുട്ടികള്‍ പഠനക്കൂട്ടമായി ഇരിക്കുന്നു. ചുവടെയുള്ള രണ്ട് പലഹാരപ്പാട്ടുകള്‍ ചാര്‍ട്ടില്‍ പ്രദര്‍ശിപ്പിക്കുന്നു.
പലഹാരപ്പാട്ടുകള്‍ വടിവില്‍ വ്യക്തതയോടെ എഴുതിയ ചാര്‍ട്ട് പ്രദര്‍ശിപ്പിക്കുന്നു
1
അപ്പം അപ്പം അച്ചപ്പം
കറുമുറെ തിന്നാം അച്ചപ്പം
അപ്പം അപ്പം ……...
………. തിന്നാം …………
2
അപ്പം അപ്പം ഇടിയപ്പം
കൂട്ടിന് മുട്ടക്കറിയുണ്ടോ?
അപ്പം അപ്പം പാലപ്പം
കൂട്ടിന് ……………….?
അവ പൂരിപ്പിക്കണം.
വ്യക്തിഗതമായാണ് പൂരിപ്പിക്കേണ്ടത്.
പഠനക്കൂട്ടത്തിലെ എല്ലാവരും വരികള്‍ എഴുതിയെടുക്കണം.
അതിന് ശേഷം ഒരാള്‍ സാവധാനം വായിക്കണം. തുടര്‍ന്ന് എഴുതണം.
എഴുതാന്‍ സഹായം വേണ്ടവര്‍ക്ക് അത് നല്‍കണം.
പല വാക്കുകള്‍ ചേര്‍ത്ത് പൂരിപ്പിക്കാം.
പൂരിപ്പിച്ച ഓരോ വാക്കിനും ഓരോ സ്കോര്‍, കൂടുതല്‍ സാധ്യത കണ്ടെത്തിയവര്‍ക്ക് കൂടുതല്‍ സ്കോര്‍, പഠനക്കൂട്ടത്തിനാണ് സ്കോര്‍.
എല്ലാവരുടെയും ബുക്കില്‍ ശരിയായ രീതിയില്‍ രേഖപ്പെടുത്തല്‍ നടത്തിയിട്ടുണ്ടെങ്കില്‍ അതിനും സ്കോര്‍
പഠനക്കൂട്ടങ്ങളില്‍ വരികള്‍ പൂരിപ്പിച്ച ശേഷം റിഹേഴ്സല്‍ നടത്തണം.
ഘട്ടം മൂന്ന് പലഹാരപ്പാട്ട് മത്സരം
പഠനക്കൂട്ടങ്ങളുടെ അവതരണം. വിലയിരുത്തല്‍. ഓരോ പഠനക്കൂട്ടത്തിനും കിട്ടിയ സ്കോര്‍ രേഖപ്പെടുത്തുന്നു. ആ സ്കോര്‍ പഠനക്കൂട്ടത്തിലെ എല്ലാവരും അവരവരുടെ ബുക്കില്‍ രേഖപ്പെടുത്തണം
ആംഗ്യം, ഭാവം, താളം ഇവ പാലിച്ചും വാക്കുകള്‍ കൂട്ടിച്ചേര്‍ത്തും പലഹാരപ്പാട്ട് ചൊല്ലല്‍ മത്സരം
എല്ലാ പഠനക്കൂട്ടത്തിനും മാനത്തമ്പിളി വട്ടത്തില്‍ എന്ന പാട്ട് നല്‍കുന്നു. അത് ഓരോ വരി വീതം പഠനക്കൂട്ടത്തില്‍ കൈമാറി വായിക്കണം. വായനയില്‍ പ്രയാസം നേരിടുന്നവരെ സഹായിക്കണം. തുടര്‍ന്ന് ഏതെല്ലാം വാക്കുകള്‍ മാറ്റിച്ചൊല്ലാം എന്ന് ആലോചിക്കണം. ഉദാഹരണത്തിന് പത്തിരി ദോശ ചപ്പാത്തി എന്നത് പത്തിരി പൂരി ചപ്പാത്തി എന്നാക്കാം. താളം പാലിക്കണം.അതേ വരി പുതിയ വാക്ക് ചേര്‍ത്ത് വീണ്ടും ചൊല്ലാം.
മാനത്തമ്പിളി വട്ടത്തിൽ
പത്തിരി, ദോശ, ചപ്പാത്തി
പന്തു കണക്കെ കൊഴുക്കട്ട
പച്ചയുടുപ്പിട്ടിലയടയും
ഇഡ്ഡലി, പുട്ട്, നൂലപ്പം,
മധുരം കിനിയും നെയ്യപ്പം
പല രൂപത്തിൽ പല വേഷത്തിൽ
പലഹാരങ്ങൾ നിരനിരയായ്
റിഹേഴ്സലിന് അവസരം. ഒരാള്‍ ഒരുവരി ചൊല്ലി മറ്റുള്ളവര്‍ ഏറ്റ് ചൊല്ലുന്ന രീതിയാണ് സ്വീകരിക്കേണ്ടത്. എല്ലാവര്‍ക്കും ചൊല്ലിക്കൊടുക്കാന്‍ അവസരം കിട്ടണം. സഹായിക്കാം.
പഠനക്കൂട്ടങ്ങളുടെ അവതരണം
സ്കോര്‍
താളം പാലിച്ചതിന്
അനുയോജ്യമായ ആംഗ്യവും ഭാവവും ഉപയോഗിച്ചതിന്
പുതിയ വാക്കുകള്‍ കൂട്ടിച്ചേര്‍ത്തതിന്
എല്ലാവര്‍ക്കും പങ്കാളിത്തം ഉറപ്പാക്കിയതിന്
വ്യക്തതയോടെ അവതരിപ്പിച്ചതിന്
രണ്ട് പ്രവര്‍ത്തനങ്ങള്‍ക്കും കൂടി കൂടുതല്‍ സ്കോര്‍ കിട്ടിയ ഗ്രൂപ്പിന് സമ്മാനം. ( എന്താണ് സമ്മാനം നല്‍കുക?)
ക്ലാസ് വാട്സാപ്പ് ഗ്രൂപ്പില്‍ പലഹാരപ്പാട്ടുകള്‍ വായനസാമഗ്രിയായി ഇടുന്നു. അത് വീട്ടിലുള്ളവരുടെ സഹായത്തോടെ വായിച്ച് ചൊല്ലിയിടണം.
1
ഹായി ഠായി മിഠായി
തിന്നുമ്പോളെന്തിഷ്ടായി
തിന്നു കഴിഞ്ഞൂ കഷ്ടായി.
2
ഞാനൊരു പാട്ടു പഠിച്ചിട്ടുണ്ട്
കൈതപ്പൊത്തിൽ വച്ചിട്ടുണ്ട്
അപ്പം തന്നാലിപ്പം പാടാം
ചക്കര തന്നാപ്പിന്നേം പാടാം
3
അരിയെടുത്തു
പൊടിപൊടിച്ചു
പീര
ചേർത്തു നനനനച്ചു
മുളയിലിട്ടു
പുട്ടുചുട്ടു
കോലെടുത്തു കുത്തിയിട്ടു
പഴമെടുത്തു തൊലിതൊലിച്ചു
കുഴ കുഴച്ചു പരുവമാക്കി
ഗുളിക പോലെയുരുളയാക്കി
അത് കഴിച്ചു വയർ നിറച്ചു.
4
പരത്തിപ്പറഞ്ഞാൽ പർപ്പടകം
ഒതുക്കിപ്പറഞ്ഞാൽ പപ്പടം
വേഗത്തിൽ പറഞ്ഞാൽ പപ്പടം
അത് ചുട്ടെടുത്തൊന്നമർത്തിയാൽ പ്ടം.
ഇതും കേൾപ്പിക്കാം
അനുബന്ധം നോക്കുക
പ്രവര്‍ത്തനത്തിന്റെ പേര് പോസ്റ്റര്‍ രചനാമത്സരം
പഠനലക്ഷ്യങ്ങള്‍
സ്വന്തം അഭിപ്രായം പോസ്ററര്‍ രൂപത്തില്‍ ആവിഷ്കരിക്കുക ( ചിത്രങ്ങളും ആശയവിനിമയക്ഷമതയുള്ള വാക്യങ്ങളും നിറങ്ങളും ചേര്‍ത്ത് ആകര്‍ഷകമായി തയ്യാറാക്കുക)
കരുതേണ്ട സാമഗ്രികള്‍: പലഹാരപ്പാട്ടുകള്‍ എഴുതിയ ചാര്‍ട്ട്
സമയം പത്ത് മിനിറ്റ്
അപ്പാണ്യത്തിന്റെ പോസ്റ്റര്‍ തയ്യാറാക്കണം.
ഓരോ ദിവസത്തെയും പരിപാടികള്‍ സൂചിപ്പിച്ച്.
എന്തെല്ലാം കാര്യങ്ങള്‍ പോസ്റ്ററില്‍ വേണം ചര്‍ച്ച
മുഖ്യപരിപാടിയുടെ പേര് ( അപ്പാണ്യം)
എന്ന് നടക്കുന്നു? ( തീയതി)
എപ്പോള്‍ നടക്കുന്നു ( സമയം)
ഓരോ ദിവസത്തെയും പരിപാടികള്‍?
ആരാണ് സംഘാടകര്‍ ( ക്ലാാസ്, പഠനക്കൂട്ടത്തിന്റെ പേര്)
ചിത്രങ്ങള്‍ വേണമോ? ( വരച്ചത്, ഒട്ടിച്ചത്)
ഉള്ളടക്കം സംബന്ധിച്ച് ഓരോ പഠനക്കൂട്ടവും ധാരണയാക്കണം
തുടര്‍ന്ന് പേപ്പറിന്റെ എവിടെയെല്ലാം വിന്യസിക്കണം എന്ന് തീരുമാനിക്കുന്നു
 |
| പോസ്റ്റര്‍ മാതൃക |
ടീച്ചര്‍ മാതൃകകള്‍ പരിചയപ്പെടുത്തുന്നു
പ്രാധാന്യം അനുസരിച്ച് ആയിരിക്കണം അക്ഷര വലുപ്പം, നിറം എന്നിവയും പ്രധാനം
- ആകര്‍ഷകമായിരിക്കണം വിന്യാസം
- ശ്രദ്ധ പിടിച്ചുപറ്റുന്ന വാക്യങ്ങള്‍
- ഒത്തിരി എഴുതി നിറയ്കരുത്
ഡമ്മി തയ്യാറാക്കല്‍. എ ഫോര്‍ പേപ്പറില്‍ പെന്‍സില്‍ വച്ച് പോസ്റ്ററിന്റെ ചെറുരൂപം തയ്യാറാക്കല്‍. എല്ലാവരുടെയും കൈയക്ഷരം നിര്‍ബന്ധം. സഹായം വേണ്ടവര്‍ക്ക് സഹായം നല്‍കണം.
ഓരോ ഗ്രൂപ്പിനും വലിയ ചാര്‍ട്ട് പേപ്പര്‍, സ്കെച്ച് പെന്‍ എന്നിവ നല്‍കുന്നു. ഒഴിവ് സമയം പോസ്റ്റര്‍ തയ്യാറാക്കണം. എല്ലാവരുടെയും കൈയക്ഷരം നിര്‍ബന്ധം. വടിവില്‍ എഴുതാനായി ആദ്യം പെന്‍സില്‍ വെച്ച് എഴുതിയ ശേഷം സ്കെച്ച് പേന വച്ച് എഴുതിയാല്‍ മതിയാകും.
അനുബന്ധം
ഇവ ക്ലാസ് വാട്സാപ്പ് ഗ്രൂപ്പില്‍ പങ്കിടുക
എഴുത്തഴക് ഏറ്റെടുത്ത അധ്യാപകരുടെ പ്രതികരണങ്ങൾ ചുവടെ
No comments:
Post a Comment