പൂവ് ചിരിച്ചു ആസൂത്രണക്കുറിപ്പ് - 2

ക്ലാസ് : ഒന്ന്

യൂണിറ്റ് : 2

പാഠത്തിൻ്റെ പേര്  : പൂവ് ചിരിച്ചു

ടീച്ചര്‍ :  പ്രസന്ന എ പി 

ജി.എൽ.പി.എസ് പലകപ്പറമ്പിൽ , മങ്കട, മലപ്പുറം

കുട്ടികളുടെ എണ്ണം :.......

ഹാജരായവർ‍ : …… ...

തീയതി : …./07/2025

പ്രവർത്തനം : കഥാവേല (10 മിനുട്ട് )

പഠനലക്ഷ്യങ്ങൾ 

1. വായിച്ചുകേട്ട കഥകൾ ആശയക്രമീകരണം പാലിച്ച് ഭാവാത്മകമായി അവതരിപ്പിക്കുക

2. ചിത്രങ്ങൾ സ്വന്തമായ നിലയിൽ വ്യാഖ്യാനിക്കുക .

പ്രകൃതിവിശദാംശങ്ങൾ

വായനോത്സവത്തിൻ്റെ ഭാഗമായി വീട്ടിൽ നിന്ന് വായിച്ചു കേൾക്കാൻ ആയി നൽകിയ പുസ്തകത്തിലെ കഥകൾ സന്നദ്ധരായവർ / നിർദ്ദേശിച്ചവർ ഭാവാത്മകമായി അവതരിപ്പിക്കുന്നു .

പ്രവർത്തനം : റോൾപ്ലേ

പഠനലക്ഷ്യങ്ങൾ : കേട്ട / വായിച്ച കഥയിലെ കഥാപാത്രങ്ങൾ തമ്മിലുള്ള സംഭാഷണങ്ങൾ റോൾപ്ലേയിലൂടെ അവതരിപ്പിക്കുക

കരുതേണ്ട സാമഗ്രികൾ : തുമ്പി , മണ്ണിര , കുഞ്ഞുചെടി എന്നിവയുടെ മുഖം മൂടി / ചിത്രങ്ങൾ പ്രിൻ്റ് എടുത്തത്

സമയം : 3 0 മിനുട്ട്

പ്രകൃതിവിശദാംശങ്ങൾ

ഘട്ടം 1 ( 5 മിനുട്ട് )

ടീച്ചർ കുഞ്ഞുവിത്തിൻ്റെ കഥ ആശയവ്യക്തതയോടെ , ഭാവാത്മകമായി അവതരിപ്പിക്കുന്നു .

" കുഞ്ഞുവിത്തേ , ഉണരൂ ഉണരൂ ." മരത്തിൻ്റെ വേരുകൾ വിളിച്ചു .

കുർ കുർ കുർ കുർ ... കുഞ്ഞുവിത്ത് ഉറക്കം തന്നെ ഉറക്കം .

" കുഞ്ഞുവിത്തേ , ഉണരൂ ഉണരൂ ." ഒരു കുഞ്ഞുമഴത്തുള്ളി കുഞ്ഞു വിത ത്തെ തൊട്ടു വിളിച്ചു . കുഞ്ഞുവിത്ത് കുർ കുർ നിറുത്തി . കണ്ണ് തുറന്നു .

" വേഗം വളർന്നു . പൂവിടേണ്ടേ ?" മണ്ണ് ചോദിച്ചു .

" ഓ ഞാൻ വേഗം വളരാൻ പോകയാ ." കുഞ്ഞുവിത്ത് ഉഷാറായി . അത് മണ്ണിന് മുകളിലേക്ക് തല ഉയർത്തി . നീലാകാശം . പച്ചപ്പ് . കിളിപ്പാട്ടുകൾ . കാറ്റിൻ്റെ നൃത്തത്തിനൊത്ത് താളം പിടിക്കുന്ന ഇലകളും മരങ്ങളും . ആകെപ്പാടെ നല്ല രസം ! അപ്പോഴാണ് അതുവഴി ഒരു തുമ്പിയും മണ്ണിരയും വന്നത് . താഴെ കരിയിലകൾക്കിടയിൽ ഒരു പച്ചത്തല !

തുമ്പി മണ്ണിരയോട് ചോദിച്ചു : " അത് ആരാ ?"

മറുപടി കിട്ടിയില്ല . തുമ്പി വീണ്ടും ചോദിച്ചു : “ ആരാ അത് ?”

മണ്ണിരയ്ക്കും സംശയം . മണ്ണിര ചോദിച്ചു : " നീ ആരാ ?" 

കുഞ്ഞുവിത്ത് രണ്ട് ഇലകൾ  വിടർത്തി പറഞ്ഞു. അഭിമാനത്തോടെ പറഞ്ഞു

'’ഞാൻ ചെടി.”

"വളർന്ന് ഞാൻ പൂവിടും."

''ആ ഹാ, കൊള്ളാമല്ലോ. എന്നാൽ നിന്റെ ചുറ്റുമുള്ള മണ്ണ് ഞാൻ ഇളക്കിത്തരാം. വേഗം വളര് " മണ്ണിര പറഞ്ഞു.

തുമ്പി പറന്ന് വന്ന് കുഞ്ഞുചെടിയോട് പതുക്കെ ചോദിച്ചു.

''പൂവിടുമ്പോൾ എനിക്ക് ഒരു പൂവ് തരുമോ?"

"ഉം തീർച്ചയായും " കുഞ്ഞുചെടി പറഞ്ഞു.

"ബൈ " തുമ്പി പറന്നു പോയി

"ബൈ ബൈ " കുഞ്ഞുചെടി വിളിച്ചു പറഞ്ഞു.

ഘട്ടം 2 അഭിനയം (5 മിനുട്ട്)

കുഞ്ഞുവിത്തിന്റെ കഥ നിങ്ങൾക്കിഷ്ടമായോ? നമുക്കെല്ലാം കുഞ്ഞുവിത്തായാലോ?

പ്രതികരണം

• ടീച്ചർ കഥ വീണ്ടും പറയാം. അപ്പോൾ കുഞ്ഞുവിത്ത് ചെയ്തതും പറഞ്ഞതുമെല്ലാം ചെയ്യണം.അഭിനയിക്കണം

• ഈ കഥയുടെ മുഴുവന്‍ സംഭവങ്ങളും ടീച്ചർ ഭാവാത്മകമായി  വീണ്ടും അവതരിപ്പിക്കുന്നു.  എല്ലാവരും കുഞ്ഞുവിത്ത് ആയി കൂർക്കം വലിച്ചുറങ്ങൽ, ഉണരൽ, ചുറ്റുമുള്ളവ കാണൽ തുടങ്ങിയവ അഭിനയിക്കുന്നു.

ഘട്ടം 3 റോൾ പ്ലേ (20 മിനുട്ട്)

• കുഞ്ഞു വിത്ത് ഉണർന്നപ്പോൾ ആരൊക്കെയാണ് ആ വഴി വന്നത്?

പ്രതികരണം.

അതേ.. തുമ്പിയും മണ്ണിരയും.

• ന മുക്ക് തുമ്പിയും മണ്ണിരയും കുഞ്ഞുചെടിയും

• തമ്മിൽ കണ്ടതും സംസാരിച്ചതും അഭിനയിച്ചു നോക്കിയാലോ? 

• കുട്ടികളെ 5 ഗ്രൂപ്പ്‌ ആക്കുന്നു. ഓരോ ഗ്രൂപ്പിനും കുഞ്ഞുചെടി, മണ്ണിര, തുമ്പി എന്നിവയുടെ മുഖം മൂടികൾ/ ചിത്രങ്ങൾ നൽകുന്നു. (മറ്റ് കഥാപാത്രങ്ങളും ആകാം അത് കുട്ടികൾ ഗ്രൂപ്പിൽ തീരുമാനിക്കട്ടെ.)

• ഗ്രൂപ്പിൽ ചർച്ച. കഥാപാത്രങ്ങളെ തീരുമാനിക്കൽ, പരിശീലിക്കൽ.

•  ഓരോ ഗ്രൂപ്പിന്റേയും അവതരണം.

പ്രതീക്ഷിത ഉല്പന്നം 

• റോൾ പ്ലേ ഡിജിറ്റൽ പോർട്ട് ഫോളിയോ (വീഡിയോ)/ ഫോട്ടോ

വിലയിരുത്തല്‍

• റോള്‍ പ്ലേ നടത്തിയപ്പോള്‍ ഭാവം ഉള്‍ക്കൊണ്ടായിരുന്നോ സംഭാഷണം?

• സംഭവങ്ങള്‍ ക്രമമായി അവതരിപ്പിച്ചുവോ?

• റോള്‍ പ്ലേ പരസ്പരം വിലയിരുത്തി സംസാരിക്കാന്‍ അവസരം നല്‍കിയോ?

• ഭാവന ഉപയോഗിച്ച് റോള്‍പ്ലേയില്‍ കൂട്ടിച്ചേര്‍ക്കലുകള്‍ വരുത്തിയവരുണ്ടോ?

• എല്ലാവര്‍ക്കും പങ്കാളിത്തം ലഭിക്കാനായി സ്വീകരിച്ച തന്ത്രം എന്തായിരുന്നു?

• അഭിനയസാധ്യത പ്രയോജനപ്പെടുത്തിയവരാരെല്ലാം?

• ഗ്രൂപ്പ് പ്രവര്‍ത്തനം നടക്കുമ്പോള്‍ മോണിറ്റര്‍ ചെയ്തുവോ?

• ടീച്ചറുടെ ഏകാംഗാഭിനയത്തിന് സാധ്യത ഉണ്ടായിരുന്നുവോ?

പിരീഡ് രണ്ട്

പ്രവര്‍ത്തനം :: വളരുന്ന ചെടി (എഴുത്ത്)

പഠനലക്ഷ്യങ്ങള്‍:

• അംഗീകൃത രീതിയിൽ (അക്ഷരങ്ങളുടെ വലുപ്പം, ഘടന, ആലേഖന ക്രമം ) മലയാളം ലിപികൾ സഹായത്തോടെ എഴുതി വാക്കുകളും ചെറു വാക്യങ്ങളും പൂര്‍ത്തിയാക്കുക.

•  അക്ഷരങ്ങളുടെയും വാക്കുകളുടെയും പുനരനുഭവ സന്ദര്‍ഭങ്ങളില്‍ തെളിവെടുത്ത് എഴുതുന്നതിനും ഒറ്റയ്കും കൂട്ടായും മുതിര്‍ന്നവരുടെ സഹായത്തോടെയും  താരതമ്യം ചെയ്ത് തെറ്റുകൾ തിരുത്തി മെച്ചപ്പെടുത്തുന്നതിനും കഴിയുക.

സമയം:  40 മിനുട്ട് 

കരുതേണ്ട സാമഗ്രികള്‍: മാർക്കർ, ചാർട്ട് , പിന്തുണ ബുക്ക്,  ഹൈലൈറ്റർ, സ്റ്റാർ സ്റ്റിക്കർ, ക്രയോണ്‍സ്

ഊന്നല്‍ നല്‍കുന്ന അക്ഷരങ്ങൾ

• അ, ആ (ഹ്രസ്വവും ദീർഘവും), ര

• ത, ന ഇവ മുന്‍ പാഠത്തില്‍ പരിചയിച്ചതാണ്. (അടുത്ത ദിവസങ്ങളിൽ ഇവയ്ക്കെല്ലാം പുനരനുഭവം ഉണ്ട്)

ഊന്നല്‍ നല്‍കുന്ന ചിഹ്നങ്ങൾ

• ഈ യുടെ ചിഹ്നം, സംവൃതോകാരം ( ചന്ദ്രക്കലചിഹ്നം)

പ്രക്രിയാവിശദാംശങ്ങള്‍

ഘട്ടം 1 (15 മിനുട്ട്)

• റോള്‍ പ്ലേയ്ക് ശേഷം രൂപീകരണപാഠവുമായി ബന്ധപ്പെട്ട എഴുത്ത് പ്രവർത്തനപുസ്തകത്തിൽ നടത്തേണം.

• ഈ രംഗത്തിലെ സംഭാഷണം പറയിച്ച ശേഷം സചിത്രപ്രവര്‍ത്തനപുസ്തകത്തിലെ പ്രവര്‍ത്തനം ചെയ്യിക്കണം.

• തുമ്പി മണ്ണിരയോട് ചോദിച്ചത് എന്താ?

പ്രതികരണം

അത് ആരാ?

നമുക്ക് ഇത് എഴുതി നോക്കിയാലോ? (ലേഖനപ്രക്രിയ- )

ചാര്‍ട്ടെഴുത്ത് 

• ടീച്ചർ ചാർട്ടിൽ അത് ആരാ? എന്ന് പറഞ്ഞു കൊണ്ട് എഴുതുന്നു.(വാക്കകലം പാലിച്ച് വടിവോടെ)

ബോർഡഴുത്ത്

• നിങ്ങളുടെ കുഞ്ഞെഴുത്ത് പുസ്തകത്തിൽ എഴുതണ്ടേ? ടീച്ചർ ഒന്നുകൂടി എഴുതി കാണിക്കാം.

• അ, ആ, ര എന്നിവ യുടെ ഘടന പറഞ്ഞ് ടീച്ചർ ബോർഡിൽ അത് ആരാ? എന്ന് എഴുതുന്നു. അക്ഷരങ്ങൾ ഒറ്റയ്ക്കും എഴുതിക്കാണിക്കാം ICT ഉണ്ടെങ്കിൽ GlF രീതിയിൽ എഴുത്ത് രീതി പരിചയപ്പെടുത്താം.

• കുട്ടികൾ കുഞ്ഞെഴുത്ത് പുസ്തകത്തിൽ എഴുതുന്നു.

പിന്തുണനടത്തം

• പിന്തുണപുസ്തകത്തിൽ എഴുതൽ

• ഓരോ അക്ഷരത്തിനും ശരി അടയാളം നൽകൽ

• കട്ടിക്കെഴുത്ത്

ഘട്ടം 2 ( 10 മിനുട്ട്)

കഥയിലേക്ക് വീണ്ടും. അതാരാ എന്ന ചോദ്യത്തിന്  മറുപടി കിട്ടാതായപ്പോൾ വീണ്ടും ചോദിച്ചതെന്താണ്?

പ്രതികരണം 

ആരാ അത്?

ചാർട്ടെഴുത്ത്

• ടീച്ചർ ആരാ അത് എന്ന് സാവധാനം പറഞ്ഞു കൊണ്ട് ചാർട്ടിൽ കുട്ടികളുടെ പങ്കാളിത്തത്തോടെ അത് ആരാ എന്ന് നേരത്തെ എഴുതിയതിൽ നിന്നും തെളിവെടുത്ത് എഴുതുന്നു.

കുഞ്ഞെഴുത്ത് പുസ്തകത്തിൽ എഴുത്ത്

ആരാ അത്? എന്നത് കുഞ്ഞെഴുത്ത് പുസ്തകത്തിൽ കുട്ടികൾ തെളിവെടുത്ത് എഴുതുന്നു.

പിന്തുണനടത്തം

• പിന്തുണപുസ്തകത്തിൽ എഴുതൽ

• അംഗീകാരം നൽകൽ

ഘട്ടം 3 (15 മിനുട്ട്)

മണ്ണിര എന്താ ചോദിച്ചത്?

പ്രതികരണം

നീ ആരാ? 

ചാർട്ടെഴുത്ത്

• നീ ആരാ? എന്ന് പറഞ്ഞു കൊണ്ട് ടീച്ചർ ചാർട്ടിൽ എഴുതുന്നു. നീ എന്നതിൽ ഈ സ്വരത്തിൻ്റെ ചിഹ്നം ആദ്യമായി പരിചയപ്പെടുത്തുകയാണ്. ആരാ എന്നത് തെളിവെടുത്ത് എഴുതണം.

ബോർഡഴുത്ത്

• ടീച്ചർ ഒന്നുകൂടി എഴുതാം. നീ ആരാ? ഈ യുടെ ചിഹ്നം ഘടന പറഞ്ഞു കൊണ്ട്  ടീച്ചർ ബോർഡിൽ എഴുതുന്നു. നീ എന്ന വാക്ക് മാത്രം എഴുതി ബാക്കി ഡാഷിടുന്നു

നീ എന്നത് കുട്ടികൾ കുഞ്ഞെഴുത്ത് പുസ്തകത്തിൽ എഴുതുന്നു.

• നീ ആരാ? എന്നതിലെ ആരാ എന്നത് തെളിവെടുത്ത് എഴുതുന്നു.

പിന്തുണനടത്തം

• പിന്തുണ പുസ്തകത്തിൽ എഴുതൽ

• അംഗീകാരം നൽകൽ

തത്സമയ വിലയിരുത്തല്‍ (കുട്ടികള്‍ എഴുതുന്ന സമയത്ത് തന്നെ നടക്കുന്നതിനാല്‍ പ്രത്യേകം സമയം കാണിക്കുന്നില്ല)

• ടീച്ചർ എല്ലാവരുടെയും നോട്ടുബുക്ക് വിലയിരുത്തുന്നു.  

• ശരിയായി എഴുതിയ ഓരോരുത്തര്‍ക്കും ഓരോ അക്ഷരത്തിനും ശരിയടയാളം നല്‍കണം.

• കൂടുതൽ പേർക്ക് എഴുതാൻ വിഷമമുണ്ടെങ്കിൽ പൊതുവിൽ ഒന്നുകൂടി ബോർഡിൽ എഴുതി കാണിക്കുന്നു. അത് ആരാ-ഘടന പാലിച്ച് ഉറക്കെ പറഞ്ഞ് വടിവിൽ ) വീണ്ടും എഴുതുന്നു.

അനുരൂപീകരണം ( ഭിന്നശേഷി വിഭാഗത്തിൽ പെട്ടവർക്ക്)

• അമ്പടയാളത്തിലൂടെ വിരലോടിക്കല്‍ ( കൂടുതല്‍  പ്രയാസം അനുഭവപ്പെടുന്നവർക്ക്)

• അ, ആ, എന്നീ അക്ഷരങ്ങളുടെ എഴുത്തുരീതി ബോധ്യപ്പെടുന്നതിനായി അമ്പടയാളം ഇട്ട അക്ഷരത്തിലൂടെ എഴുതൽ , 

• കുത്തുകളിലൂടെ അക്ഷര ഘടന യോജിപ്പിച്ച് എഴുതൽ , 

• അക്ഷരത്തിന്റെ ഉള്ളിലൂടെ, രണ്ട് ലെയർ ഉള്ള അക്ഷര ഫ്രെയിമിലൂടെ പല നിറങ്ങളിലുള്ള സ്കെച്ച് പേന ഉപയോഗിച്ചെഴുതിക്കല്‍, 

• ഒത്തെഴുത്ത്  (കൂടുതല്‍  പ്രയാസം അനുഭവപ്പെടുന്നവർക്ക് )

• ടീച്ചർ കുട്ടിയുടെ കൈ പിടിച്ച് എഴുതൽ, 

• ടീച്ചർ കുട്ടിയുടെ നോട്ടുബുക്കിൽ എഴുതിക്കൊടുക്കൽ .

പഠനത്തെളിവ്

• സചിത്രപ്രവര്‍ത്തനപുസ്തകത്തിലെ രേഖപ്പെടുത്തലുകള്‍

വിലയിരുത്തല്‍

• ശരിയായി എഴുതിയ ഓരോ വാക്കിനും ശരിയടയാളം നല്‍കിയോ?

• പിന്തുണാനടത്തം പ്രയോജനപ്രദമായോ?

• തെളിവെടുത്തെഴുതുന്നതിന് എത്ര കുട്ടികള്‍ക്ക് കഴിഞ്ഞു?

• മുന്‍ദിവസത്തെ ചാര്‍ട്ട് എങ്ങനെയാണ് പ്രയോജനപ്പെടുത്തിയത്?

പിരീഡ് മൂന്ന്

പ്രവര്‍ത്തനത്തിന്റെ പേര്:  വളരുന്ന ചെടി  ( വായന)

പഠനലക്ഷ്യങ്ങള്‍:

1. പരിചിതാക്ഷരങ്ങളുളള ലഘുവാക്യങ്ങള്‍, പദങ്ങള്‍ എന്നിവ ഒറ്റയ്ക്കും സഹായത്തോടെയും വായിക്കുക

2. ശബ്ദഭംഗി ഉളവാക്കുന്ന അക്ഷരങ്ങളുടെയും പദങ്ങളുടെയും ആവർത്തനം കണ്ടെത്തുക

സമയം: 35 മിനിറ്റ്

കരുതേണ്ട സാമഗ്രികള്‍: രൂപീകരണപാഠം എഴുതിയ ചാര്‍ട്ട്

പ്രക്രിയാവിശദാംശങ്ങള്‍

കണ്ടെത്തൽ വായന  

വാക്യം കണ്ടെത്തല്‍  (5 മിനുട്ട്)

• നീ ആരാ എന്ന് എഴുതിയിട്ടുളളത് എത്രമാത്തെ വരിയാണ്.

• ഒന്നാമത്തെ വരി എന്താണ്?

• ……..

 വാക്ക് കണ്ടെത്തല്‍ (5 മിനുട്ട്)

• ആരാ എന്ന് എത്ര തവണ എഴുതിയിട്ടുണ്ട്?

• നീ,ആരാ, അത് എന്നീ വാക്കുകള്‍ ഓരോന്നായി ഓരോ കുട്ടികളോടായി തൊട്ടു കാണിച്ച് വായിക്കാൻ നിർദേശിക്കുന്നു. കുട്ടികൾ വാക്കുകൾ തൊട്ടു വായിക്കുന്നു.. 

• അതു പോലെ ടീച്ചര്‍ തൊട്ടുകാണിക്കുന്ന വാക്കുകൾ നിർദേശിക്കുന്ന കുട്ടികൾ വായിക്കുന്നു.

അക്ഷരം കണ്ടെത്തല്‍  (5മിനുട്ട്)

• ഊന്നല്‍ നല്‍കുന്ന അക്ഷരങ്ങള്‍ ( അ, ആ,ര) നിർദേശിക്കുന്ന കുട്ടികൾ തൊട്ടുകാണിക്കണം.

ചിഹ്നം ചേർന്ന വാക്ക് കണ്ടെത്തല്‍. (5 മിനുട്ട്)

• ഊന്നല്‍ നല്‍കുന്ന ചിഹ്നങ്ങള്‍ ചേര്‍ന്ന വാക്ക് എവിടെയാണ്? 

• നീ എന്ന വാക്കിന് മാത്രം അടിവരയിടുക.

• ത് എന്ന് എഴുതിയത് ഏത് വാക്കില്‍

ക്രമത്തില്‍ വായിക്കല്‍ (5 മിനുട്ട്)

• ഈ മൂന്നു വരികളും വായിക്കാന്‍ സന്നദ്ധതയുളളവര്‍ വരിക

• നിര്‍ദേശിക്കുന്ന ക്രമത്തില്‍ വായിക്കല്‍  

• രണ്ടാമത്തെ വരി ആദ്യം വായിക്കുക. എന്നിട്ട് ഒന്നാമത്തെ വരി

• മൂന്നും രണ്ടും വരികള്‍

• ഒന്നും മൂന്നും വരികള്‍

ചങ്ങല വായന ( 5 മിനുട്ട്)

• നാലുപേരായി വന്ന് ഓരോരോ വാക്യം വീതം വായിക്കുന്നു

• രണ്ടാം തവണ ഓരോരുത്തരും വായിക്കേണ്ടത് ആദ്യം വായിച്ച വാക്യം ആകാതിരിക്കണം

ഭാവാത്മക വായന ( വാക്കില്‍ തൊട്ട് )   (5 മിനുട്ട്)

• ഓരോ ഗ്രൂപ്പും ഭാവാത്മകമായി വായിക്കുന്നു.

പഠനത്തെളിവ്:

• വായിക്കുന്ന വീഡിയോ

വിലയിരുത്തൽ

• നിർദേശിച്ച എല്ലാ കുട്ടികൾക്കും നിർദേശിച്ച വാക്യങ്ങൾ, വാക്കുകൾ, അക്ഷരങ്ങൾ, ചിഹ്നം ചേർന്ന വാക്കുകൾ എന്നിവ കണ്ടെത്താനും വായിക്കാനും സാധിച്ചോ? 

• പ്രയാസപ്പെട്ടവർ ആരൊക്കെ?

• ഭാവാത്മക വായനയില്‍ സഹായം നല്‍കേണ്ടി വന്നോ? 

പിരീഡ് നാല്

പ്രവർത്തനം  *പൂക്കൾ കൈമാറ്റ ക്കളി*

പഠന ലക്ഷ്യങ്ങൾ

• ശരീരാവയവങ്ങളുടെ ഏകോപനം  ആവശ്യമുള്ള പ്രവർത്തനങ്ങൾ നടത്തുന്നതിന് കഴിവ് നേടുന്നു.

• അടിസ്ഥാന ചാല നൈപുണികൾ വികസിപ്പിക്കുന്നതിനുള്ള ബഹുവിധ പ്രവർത്തനങ്ങളിൽ ഏർപ്പെടുന്നതിനുള്ളകഴിവ് നേടുന്നു.

സമയം :20 മിനുട്ട്

കരുതേണ്ട സാമഗ്രികൾ .അഞ്ച് ചെമ്പരത്തിപ്പൂക്കൾ

പ്രക്രിയ വിശദാംശങ്ങൾ

നമുക്ക് ഒരു കളി കളിക്കാം 

• കുട്ടികളെ തുല്യ എണ്ണമുള്ള അഞ്ച് ഗ്രൂപ്പ് ആകുന്നു.

• കൈ നീട്ടിയാൽ തടാത്ത അകലത്തിൽ ഓരോ ഗ്രൂപ്പും വരിവരിയായി നിൽക്കുന്നു .

• ടീച്ചർ ഓരോ വരിക്ക് മുമ്പിലും ഓരോ വരകൾ വരയ്ക്കുന്നു.

• അഞ്ചു വരകളുടെയും വലത്തേയറ്റത്ത് ഓരോ ചെമ്പരത്തിപ്പൂ വീതം വയ്ക്കുന്നു.

• എല്ലാവരും ചെമ്പരത്തിപ്പൂവിന് അഭിമുഖദിശയിലേക്ക് നിൽക്കണം.

• ടീച്ചർ കുട്ടികളോട് നിർദ്ദേശം പറയുന്നു. വിസിൽ മുഴക്കുമ്പോൾ പൂവിനടുത്തു നിൽക്കുന്ന ആൾ പൂവെടുത്ത് തൊട്ട് പുറകിലുള്ള  ആൾക്ക് തലക്ക് മുകളിലൂടെ  കൈ ഉയർത്തി  പുറകിലേക്ക് ഇട്ടുകൊടുക്കണം. ആ പൂവ് താഴെ വിടാതെ പിടിച്ച് അടുത്തയാൾക്ക് കൊടുക്കണം 

• അങ്ങനെ പൂവ് കൈമാറി കൈമാറി അവസാനത്തെ ആൾക്ക് കിട്ടുകയും ആ ആൾ അതുമായി ഓടിച്ചെന്ന് പൂക്കൂടയിൽ വയ്ക്കുകയും വേണം. 

• മുന്നിൽ പൂക്കൂടയിൽവെച്ച ഗ്രൂപ്പ് ആണ് ജേതാക്കൾ. 

• പൂക്കൾ ഉയർത്തി അടുത്തയാൾക്ക് ഇട്ടുകൊടുക്കുന്നതിന് വേണമെങ്കിൽ പരിശീലനം നടത്താവുന്നതാണ്.

• പൂക്കൾ പിടിക്കാനാകാതെ എപ്പോൾ താഴെ വീണാലും അത്  എടുത്ത് ആദ്യം ഇട്ടയാൾക്ക്  തന്നെ കൊടുക്കണം.

• ആര് ആദ്യം പൂർത്തീകരിച്ചാലും മറ്റു ഗ്രൂപ്പുകൾ കളി പൂർത്തിയാക്കണം.

• കളി നിയമങ്ങൾ ടീച്ചർ കുട്ടികളോട് പങ്കുവെച്ചതിനുശേഷം കളി തുടങ്ങുന്നു.

പഠനത്തെളിവ്

•  കളിയുടെ വീഡിയോ എല്ലാവരുടെയും പങ്കാളിത്തം വ്യക്തമാക്കുന്ന ഡിജിറ്റൽ വീഡിയോ

വിലയിരുത്തൽ

• എത്രപേർക്ക് പൂക്കൾ താഴെ വീഴാതെ പിടിക്കാനായി ?

• ആദ്യം നിൽക്കുന്ന ഗ്രൂപ്പ് അംഗത്തിന് ഒന്നാം റൗണ്ടിൽ പൂക്കൾ താഴെ വീഴാതെ പിടിക്കുന്നതിന് അവസരമില്ല. എപ്പോഴാണ് അവസരം ഒരുക്കിയത്?

• പൂക്കുട എത്ര ദൂരത്ത് വെച്ചാൽ വേഗത്തിൽ ഓടുക എന്നതിന് അവസരം കിട്ടും?

• കൂടുതൽ ഉയർത്തിയിട്ടും കുട്ടികൾ കൂടുതൽ അകന്നുനിന്നും കളിച്ചപ്പോൾ എന്തായിരുന്നു ഫലം ?

പ്രവര്‍ത്തനം: ക്ലാസ് എഡിറ്റിംഗ്

പഠനലക്ഷ്യങ്ങള്‍:

• അക്ഷരങ്ങളുടെയും വാക്കുകളുടെയും പുനരനുഭവ സന്ദര്‍ഭങ്ങളില്‍ തെളിവെടുത്ത് എഴുതുന്നതിനും ഒറ്റയ്കും കൂട്ടായും മുതിര്‍ന്നവരുടെ സഹായത്തോടെയും  താരതമ്യം ചെയ്ത് തെറ്റുകൾ തിരുത്തി മെച്ചപ്പെടുത്തുന്നതിനും കഴിയുന്നു.

പ്രതീക്ഷിത സമയം:  20 മിനിറ്റ്

പ്രക്രിയ വിശദാംശങ്ങൾ

ഘട്ടം 1 (5 മിനുട്ട്)

• ഇന്ന് നാം പഠിച്ച വാക്യങ്ങള്‍ പറയാമോ? മൂന്ന് വാക്യങ്ങളും പറയിക്കുന്നു. 

• ആര്‍ക്കെല്ലാം വന്ന് അറിയാവുന്ന വാക്യങ്ങള്‍ ബോര്‍‍ഡില്‍ എഴുതാം? ചെറുകഷണം ചോക്കുകള്‍ നല്‍കുന്നു. എല്ലാവരും വന്ന് ബോര്‍ഡില്‍ എഴുതുന്നു.

ഘട്ടം 2 ( 15 മിനുട്ട്)

• എല്ലാവരും എഴുതി എന്നുറപ്പാക്കുന്നു.

• അതിനു ശേഷം എഡിറ്റിംഗിനുളള ചോദ്യങ്ങള്‍ ഉന്നയിക്കുന്നു.

എന്തെല്ലാമാണ് പരിഗണിക്കുക? ചുവടെയുളള ക്രമം സ്വീകരിക്കാം.

• വാക്കകലം പാലിച്ചാണോ എല്ലാവരും എഴുതിയത്?

• ആരെങ്കിലും എഴുതിയപ്പോള്‍ അക്ഷരങ്ങള്‍ തമ്മില്‍ ഒട്ടിച്ചേര്‍ന്നിരിക്കുന്നുണ്ടോ

• വാക്കില്‍ഏതെങ്കിലും അക്ഷരം വിട്ടുപോയിട്ടുണ്ടോ? എവിടെ?

• വാക്കില്‍ ചിഹ്നം വിട്ടുപോയിട്ടുണ്ടോ?

• അക്ഷരം മാറിപ്പോയിട്ടുണ്ടോ? ( അ, ആ)

• ചിഹ്നം മാറിപ്പോയിട്ടുണ്ടോ?

• അക്ഷരമോ ചിഹ്നമോ കൂടുതലായി ചേര്‍ത്തിട്ടുണ്ടോ?

• അക്ഷരത്തിന്റെ ഘടന പാലിച്ചിട്ടുണ്ടോ? (അ എന്ന് എല്ലാവരും എഴുതിയത് ഒരുപോലെയാണോ? 

അങ്ങനെ ഓരോരോ അക്ഷരമായി എടുത്ത് വിശകലനം ചെയ്ത് എഡിറ്റ് ചെയ്തു മെച്ചപ്പെടുത്തണം.

പഠനത്തെളിവ്

• ബോര്‍ഡില്‍ കുട്ടികളെഴുതിയത് മെച്ചപ്പെടുത്തി എഴുതിയശേഷമുളള ഫോട്ടോ

വിലയിരുത്തല്‍

• പരസ്പരം വിലയിരുത്തി മെച്ചപ്പെടുത്താനുളള കഴിവ് കുട്ടികളില്‍ വളര്‍ന്നു വരുന്നുണ്ടോ?

• ബോര്‍‍ഡ് എഡിറ്റിംഗിന് ശേഷം സ്വന്തം ബുക്കിലെ രേഖപ്പെടുത്തല്‍ ഒത്തു നോക്കിയപ്പെള്‍ മെച്ചപ്പെടുത്തല്‍ വേണമെന്ന് തിരിച്ചറിഞ്ഞവരുണ്ടോ?

• ബോര്‍ഡില്‍ വലുപ്പത്തില്‍ എഴുതാന്‍ എത്രപേര്‍ ശ്രദ്ധിച്ചു?

• ആര്‍ക്കൊക്കെയാണ് കൂടുതല്‍ സഹായം തുടര്‍പ്രവര്‍ത്തനങ്ങളില്‍ വേണ്ടത്?

പ്രതിദിന വായനപാഠം

വാട്സ്ആപ്പ് ഗ്രൂപ്പിൽ നൽകുന്നു.

പൂവ് ചിരിച്ചു

അനുബന്ധം 

ആസൂത്രണക്കുറിപ്പുകള്‍ വായിക്കാം. ക്ലിക് ചെയ്യുക

• പൂവ് ചിരിച്ചു ആസൂത്രണക്കുറിപ്പ് -1
• പൂവ് ചിരിച്ചു ആസൂത്രണക്കുറിപ്പ് - 3
• പൂവ് ചിരിച്ചു ആസൂത്രണക്കുറിപ്പ് - 2
• പൂവ് ചിരിച്ചു ആസൂത്രണക്കുറ്രിപ്പ് - 4
• പൂവ് ചിരിച്ചു ആസൂത്രണക്കുറിപ്പ് - 5
• പൂവ് ചിരിച്ചു ആസൂത്രണക്കുറിപ്പ് 7
• പൂവ് ചിരിച്ചു ആസൂത്രണക്കുറിപ്പ് - 8
• പൂവ് ചിരിച്ചു- ആസൂത്രണക്കുറിപ്പ് - 6
• പൂവ് ചിരിച്ചു ആസൂത്രണക്കുറിപ്പ് -9
• പൂവ് ചിരിച്ചു ആസൂത്രണക്കുറിപ്പ് 10
• പൂവ് ചിരിച്ചു ആസൂത്രണക്കുറിപ്പ് 11
• പൂവ് ചിരിച്ചു ആസൂത്രണക്കുറിപ്പ് 12

കുഞ്ഞുപുസ്തകം

• ഒന്നാം ക്ലാസുകാരുടെ ഒന്നാം ടേമിലെ കുഞ്ഞുപുസ്തകങ്ങൾ

പൂവ് ചിരിച്ചു

വായനപാഠങ്ങള്‍

• വായന പാഠങ്ങൾ - പൂവ് ചിരിച്ചു

അക്ഷരഘടന

• പൂവ് ചിരിച്ചു- അക്ഷരങ്ങള്‍

സംയുക്ത ഡയറി

• സംയുക്ത ഡയറിയും അക്കാദമിക മാസ്റ്റര്‍ പ്ലാനും