267. ആസൂത്രണക്കുറിപ്പ് 9 - പിന്നേം പിന്നേം ചെറുതായി പാലപ്പം

 

ആമുഖം ക്ലാസിലെ നിലവിലുള്ള അക്കാദമികനില പരിഗണിച്ചാണ് ഈ ടീച്ചിംഗ് മാന്വല്‍ തയ്യാറാക്കിയിരിക്കുന്നത് . അക്ഷരബോധ്യച്ചാര്‍ട്ടിന്റെ അടിസ്ഥാനത്തില്‍ ഒരു കുട്ടിക്ക് കൂടുതല്‍ പിന്തുണ ആവശ്യമുണ്ട്. പരിചിത അക്ഷരങ്ങള്‍ പ്രയോജനപ്പെടുത്തി തനിയെ ഡയറി എഴുതുന്നവരുടെ എണ്ണം കൂടിയിട്ടുണ്ട്. പത്തില്‍ 9 കുട്ടികൾ (90%) സ്വതന്ത്രവായനക്കാരായി. വായനക്കാർ‍ഡുകൾ തനിയെ വായിക്കുന്നുണ്ട്. അനന്തുവിന് കൂടുതൽ പിന്തുണ ആവശ്യമുണ്ട്. പുതുതായി എത്തിയ ഒരു കുട്ടിക്ക് ആദ്യ യൂണിറ്റ് മുതലുള്ള അക്ഷരങ്ങളും ചിഹ്നങ്ങളും ഉറപ്പിക്കേണ്ടതായിട്ടുണ്ട്. നവംബർ മാസം തീരുമ്പോള്‍ ആദ്യ രണ്ട് യൂണിറ്റുകളിലെ അക്ഷരങ്ങളും ചിഹ്നങ്ങളും ആ കുട്ടി സ്വായത്തമാക്കണം എന്നതാണ് പ്രതീക്ഷിത ലക്ഷ്യം.

ക്ലാസ് : ഒന്ന്

യൂണിറ്റ് : 6

ടീച്ചറുടെ പേര് : ബിന്ദുമോൾ പി

ഗവ. എൽ പി എസ് പൊങ്ങ

മങ്കൊമ്പ്

ആലപ്പുഴ

കുട്ടികളുടെ എണ്ണം :10

ഹാജരായവർ : .......

തീയതി : ..…../ 2025

പിരീഡ് ഒന്ന്

പഠനലക്ഷ്യങ്ങൾ:

• കഥാവേളകളിൽ ചെറു സദസ്സിനു മുമ്പാകെ കഥ ഭാവാത്മകമായി പറയുന്നു .

• കേട്ടതോ വായിച്ചതോ ആയ കഥകൾ ആശയച്ചോർച്ചയില്ലാതെയും ഭാവം ഉൾക്കൊണ്ടും സ്വന്തം ഭാഷയിൽ അവതരിപ്പിക്കുന്നു .

• കൂട്ടുകാർ വരച്ച ചിത്രങ്ങളിലെ സവിശേഷതകൾ കണ്ടെത്തി വിലയിരുത്തലുകൾ പങ്കിടുന്നു .

• പരിചിതാക്ഷരങ്ങളുളള ലഘുവാക്യങ്ങള്‍, പദങ്ങള്‍ എന്നിവ ഒറ്റയ്കും സഹായത്തോടെയും വായിക്കുന്നു

പ്രതീക്ഷിത സമയം – 40 മിനുട്ട്

കരുതേണ്ട സാമഗ്രികൾ - കഥാപുസ്തകങ്ങൾ, വായനപാഠങ്ങൾ, അക്ഷരബോധ്യച്ചാര്‍ട്ടും ചിഹ്നബോധ്യച്ചാര്‍ട്ടും

പ്രക്രിയാവിശദാംശങ്ങൾ

സംയുക്ത ഡയറി പങ്കിടൽ 10 മിനുട്ട്

1. തനിയെ എഴുതിയവര്‍ക്ക് അവസരം

2. സഹായത്തോടെ എഴുതിയെങ്കിലും തനിയെ വായിക്കാന്‍ കഴിയുന്നവര്‍ക്ക് അവസരം

3. ടീച്ചറുടെ പങ്കാളിത്തത്തോടെ വായിക്കാന്‍ അവസരം ( സംയുക്തവായന)

4. തിരഞ്ഞെടുത്ത ഡയറി ചാർട്ടിൽ ക്ലാസ്സിൽ പ്രദർശിപ്പിക്കുന്നു.

ഇന്ന് ഞങ്ങളുടെ വീട്ടിൽ പാലാട ആയിരുന്നു. പാലും മുട്ടയും ശർക്കരയും ചേർത്ത് ഉണ്ടാക്കിയത്. ഞാന്‍ രുചിയോടെ മുഴുവന്‍ കഴിച്ചു.

ആ ഡയറി വായിക്കാന്‍ അവസരം. അക്ഷരബോധ്യച്ചാര്‍ട്ടിലൂടെ കൂടുതല്‍ പിന്തുണ ആവശ്യമുള്ളവരായി കണ്ടെത്തിയവരും വായന നടത്തുന്നു.

• ട്ട എന്ന അക്ഷരം വരുന്ന വാക്ക് വായിക്കുക. (അനന്തു )

• എ യുടെ ചിഹ്നം വരുന്ന വാക്കുകൾക്ക് അടിയിൽ വരയ്ക്കുക. (ശ്രേയ, അനന്തു)

• ഓ യുടെ ചിഹ്നം ചേർന്ന അക്ഷരം വരുന്ന വാക്ക് വായിക്കുക. (ശ്രേയ, അനന്തു)

• ഇ യുടെ ചിഹ്നം ചേർന്ന അക്ഷരം വരുന്ന വാക്ക് വായിക്കുക. (അനന്തു)

• അറിയാവുന്ന അക്ഷരങ്ങൾ മാത്രം വായിക്കുക ( അലോക )

ഹാജരായ എല്ലാ കുട്ടികളും ഡയറി എഴുതി എന്ന് ഉറപ്പാക്കൽ.

എഴുതാത്ത കുട്ടികൾക്ക് കുട്ടിട്ടീച്ചറുടെ സേവനം ഉറപ്പാക്കൽ.

അലോകയ്ക്ക് അദ്ധ്യാപികയുടെ മേൽനോട്ടത്തിൽ ‍ഡയറിയെഴുതാനവസരം.

മറ്റുള്ളവരുടെ ഡയറിക്കുറിപ്പുകൾ ഉച്ചനേരം വായിച്ച് അംഗീകാരമുദ്ര നൽകൽ. ശ്രദ്ധേയമായ ഡയറികള്‍ വായനപാഠങ്ങളാക്കല്‍.

ഒരാഴ്ച എഴുതിയ ഡയറിയിൽ നിന്ന് തെരഞ്ഞെടുക്കപ്പെട്ട ഏറ്റവും മികച്ച ഡയറി അസംബ്ലിയിൽ അവതരിപ്പിക്കുന്നു.(............)

പിരീഡ് രണ്ട്

പ്രവർത്തനം രുചിമേളം

പഠനലക്ഷ്യം:

• ആഹാരസാധനങ്ങൾ  മധുരം, പുളി, കയ്പ്, ഉപ്പ് എന്നിങ്ങനെ വ്യത്യസ്ത രുചികളിലുണ്ടെന്ന് തിരിച്ചറിയുന്നു.

പ്രതീക്ഷിതസമയം: 30 മിനിട്ട്

കരുതേണ്ട സാമഗ്രികൾ‍: മധുരം, പുളി, ഉപ്പ്, കയ്പ് എന്നീ രുചികളുള്ള ആഹാരസാധനങ്ങൾ‍ (രുചിച്ചു നോക്കാൻ പാകത്തിൽ)

പ്രക്രിയാവിശദാംശങ്ങൾ

കൂട്ടുകാർക്ക് ഏത് തരം ആഹാരം കഴിക്കാനാണ് കൂടുതൽ ഇഷ്ടം?

സ്വതന്ത്ര പ്രതികരണം

കണ്ണടച്ച് ആഹാരം രുചിച്ചുനോക്കിയാൽ അത് ഏത് ആഹാരമാണ് അതിന് എന്ത് രുചിയാണ് എന്ന് പറയാൻ കഴിയുമോ?

• വ്യത്യസ്ത രുചികളിലുള്ള ആഹാരങ്ങൾ  രുചിച്ചു നോക്കാനുള്ള അവസരം ഒരുക്കുന്നു.

• കുട്ടികൾ‍ കണ്ണടച്ച് ഇരിക്കണം. നാല് രുചികളിൽ ഒന്ന് വ്യക്തമായി മനസ്സിലാകുന്ന ഒരു ആഹാരം രുചിച്ചുനോക്കാൻ പാകത്തിന് നാവിൽ വച്ചുകൊടുക്കുന്നു. കുട്ടികൾക്ക് ഒരേ രുചിയുള്ള ആഹാരസാധനമല്ല നൽകേണ്ടത്. 

• മധുരം കിട്ടിയവർ ക്ലാസിന് ഇടതുവശത്തേക്ക് പോവുക

• പുളി കിട്ടിയവർ‍ വലതുവശത്തേക്ക് പോവുക

• ഉപ്പ് കിട്ടിയവർ മധ്യത്തിൽ നിൽക്കുക

• കയ്പ് കിട്ടിയവർ ബോർഡിന് അടുത്തേക്ക് വരിക

• കുട്ടികൾ കൂട്ടമാകുന്നു. രുചിച്ച ആഹാരമേതെന്ന് പരസ്പരം പറയുന്നു. ടീച്ചർ ആഹാരസാധനം കാണിക്കുന്നു. ശരിയായി പറഞ്ഞവരെ അഭിനന്ദിക്കുന്നു.  

വിലയിരുത്തൽ‍: 

• എല്ലാ കുട്ടികൾക്കും രുചികൾ‍ തിരിച്ചറിയാൻ‍ കഴിയുന്നുണ്ടോ?

• വ്യത്യസ്ത രുചികൾ‍ രുചിച്ചറിയാൻ എല്ലാ കുട്ടികൾക്കും അവസരം നൽകിയോ?

• 
  

പിരീഡ് മൂന്ന്

പ്രവർത്തന 28: രുചിമേളം (എഴുത്ത്) പാഠപുസ്തകം പേജ് 47

പഠനലക്ഷ്യങ്ങള്‍

1. ആഹാരസാധനങ്ങൾ  മധുരം, പുളി, കയ്പ്, ഉപ്പ് എന്നിങ്ങനെ വ്യത്യസ്ത രുചികളിലുണ്ടെന്ന് തിരിച്ചറിയുന്നു.

2. മലയാളം ലിപികൾ അംഗീകൃത രീതിയിൽ (അക്ഷരങ്ങളുടെ വലുപ്പം ആലേഖന ക്രമം ) സഹായത്തോടെ എഴുതി തീമുകളുമായി ബന്ധപ്പെട്ട സന്ദർഭങ്ങളിലെ വാക്കുകളും ചെറുവാക്യങ്ങളും പൂർത്തിയാക്കുന്നു.

പ്രതീക്ഷിതസമയം: 30 മിനിട്ട്

പ്രക്രിയാവിശദാംശങ്ങൾ ‍

കൂട്ടെഴുത്ത്

പാഠപുസ്തകം പേജ് 47 ലെ രുചിമേളം എന്നത് കൂട്ടെഴുത്ത് രീതിയിൽ പൂരിപ്പിക്കുന്നു. 

• ഓരോ രുചിയായി ചർച്ച ചെയ്യണം

മധുരമുള്ളവ 

• കടങ്കഥാരീതിയിൽ‍ അവതരിപ്പിക്കാം. ഒന്ന് ടീച്ചർ‍ ഉദാഹരിക്കും. ഏതാണ് ആ ആഹാരം എന്ന് കുട്ടികൾ ഊഹിച്ച് പറയട്ടെ.

• പാ------- (ആവശ്യമെങ്കിൽ ‍ സൂചന നൽകാം. മൂന്നക്ഷരമുള്ള വാക്കാണ്, പിറന്നാളിനും കല്യാണത്തിനുമൊക്കെ കാണും)

• തുടർന്ന്കുട്ടികൾക്ക് പറയാൻ അവസരം ( കേക്ക്, ഇലയട, കൊഴുക്കട്ട, പഴങ്ങൾ, മധുരസേവ..)

പുളിയുള്ളവ

• മോര്, അച്ചാറ്, പച്ചമാങ്ങ…

കയ്പുള്ളവ

• പാവയ്ക്ക നെല്ലിക്ക

ഏതെങ്കിലും വാക്ക് എഴുതാൻ സഹായം ആവശ്യമുണ്ടെങ്കിൽ‍ ടീച്ചർ പിന്തുണ നൽകണം.

കൂടുതൽ വിഭവങ്ങളുടെ പേരുകൾ ഓരോന്നിലും എഴുതി ചേർക്കാവുന്നതാണ്.

ഓരോ ഗ്രൂപ്പിലെയും എല്ലാവരും എഴുതി എന്ന് ഉറപ്പാക്കുന്നു.

അനന്തുവിന് പ്രത്യേക ശ്രദ്ധ.

ബോര്‍ഡെഴുത്ത്

• ഗ്രൂപ്പുകളിൽ എഴുതിയത് അവരുടെ പ്രതിനിധികൾ ബോർഡിൽ‍ എഴുതുന്നു.

• ടീച്ചർ കോളം വരച്ചിടണം.

• ഒരു ഗ്രൂപ്പ് എഴുതിയ ഇനം ആവർത്തിക്കേണ്ടതില്ല.

• എല്ലാ ഗ്രൂപ്പുകളും എഴുതിക്കഴിഞ്ഞാൽ ആവശ്യമെങ്കിൽ ടീച്ചർക്ക് കൂട്ടിച്ചേർക്കൽ നടത്താം. 

എഡിറ്റിംഗ്

• എഡിറ്റിംഗ് നടത്തല്‍.

മെച്ചപ്പെടുത്തിയെഴുത്ത്

• മെച്ചപ്പെടുത്തിയതുമായി പൊരുത്തപ്പെടുത്തി ബുക്കിലെ രേഖപ്പെടുത്തൽ മെച്ചപ്പെടുത്തല്‍.

• ടീച്ചർ വിലയിരുത്തി അംഗീകാരമുദ്ര നൽകണം.

പ്രതീക്ഷിത ഉല്പ്പന്നം: 

• പാഠപുസ്തകത്തിലെ  രേഖപ്പെടുത്തൽ, രുചികൾ‍ തിരിച്ചറിയൽ 

• വിലയിരുത്തൽ: 

• എല്ലാ കുട്ടികൾക്കും രുചികൾതിരിച്ചറിയാൻ‍ കഴിയുന്നുണ്ടോ?

• സ്വതന്ത്രമായി പാഠപുസ്തകത്തിൽ രേഖപ്പെടുത്തൽ‍ നടത്തിയത് എത്ര പേരാണ് ?

• വ്യത്യസ്ത രുചികൾ രുചിച്ചറിയാൻ  എല്ലാ കുട്ടികൾക്കും അവസരം നൽകിയോ?

പിരീഡ് നാല്

പ്രവര്‍ത്തന 29 : ചിത്രം നോക്കൂ കഥ എഴുതൂ ( പാഠപുസ്തകം പേജ് 48)

പഠനലക്ഷ്യങ്ങള്‍ :

• ചിത്രസൂചനകളിൽ നിന്നും കഥ വികസിപ്പിച്ചെഴുതി പങ്കിടുന്നു. സ്വന്തം കഥകൾക്ക് ചിത്രീകരണം നടത്തുന്നു

പ്രതീക്ഷിതസമയം : 30 മിനിട്ട്

പ്രക്രിയാവിശദാംശങ്ങള്‍

കോഴിയാണത് ആദ്യം അറിഞ്ഞത്. കോഴി കാക്കയോട് രഹസ്യം പറഞ്ഞു. കാക്ക ബീബൈയോട് പറഞ്ഞു.

" ആഹാ..നമുക്ക് എല്ലാവരെയും അറിയിക്കണം. ഞാൻ നടന്നുപോയി പറയാം നീ പറന്നുപോയി പറയൂ. ബീബൈ പറഞ്ഞു. അങ്ങനെ അവര്‍ നടന്നും പറന്നും പറയാന്‍ തുടങ്ങി . എന്തായിരുന്നു രഹസ്യമെന്നോ?!

നാളെ ഷൈനിയുടെ പിറന്നാളാണ്.

അങ്ങനെ എല്ലാവരും ഒത്തുകൂടി.

ഷൈനി നമുക്കെല്ലാവർക്കും പാലപ്പം തന്നതല്ലേ, നമ്മളെന്താ ഷൈനിക്ക് ഉണ്ടാക്കിക്കൊടുക്കുക ? ബീബൈ ചോദിച്ചു.

എന്തായാലും നല്ല മധുരമുള്ള ഒരു സാധനം വേണം. നെയ്യുറുമ്പ് പറഞ്ഞു.

ഓരോരുത്തരും എന്തൊക്കെയായിരിക്കും പറഞ്ഞത്. സ്വതന്ത്ര പ്രതികരണം.

"പായസമാണേൽ പ്രഥമൻ മതി "

പൂച്ച പറഞ്ഞു. ശരി പ്രഥമൻ ഞാൻ ഉണ്ടാക്കാം. കാക്ക തയ്യാറായി.

പ്രഥമന് എന്തൊക്കെ സാധനങ്ങൾ വേണം ?

കോഴി ചോദിച്ചു.

എഴുതാം.

• അട, ശർക്കര, തേങ്ങാപ്പാൽ , ………..

പ്രവർത്തനത്തിൻ്റെ തുടക്കം മുതൽ ഓരോരുത്തരും പറയുന്ന പ്രധാന പദങ്ങൾ ബോർഡിൽ പദസൂര്യനിൽ സന്നദ്ധയെഴുത്ത് .

ടീച്ചര്‍ ചാര്‍ട്ടില്‍ എഴുതുന്നു .

ഉദാ: പായസം - ഏത് പായസം - പ്രഥമൻ - മധുരം വേണം - ബോളി ഉണ്ടോ?- ദേ ആ പാത്രം എടുക്കൂ - ശർക്കരയിൽ ഉറുമ്പ് -

......…...

• ഥ എന്ന അക്ഷരം ആദ്യമായി വരുന്ന പ്രഥമന്‍ എന്ന പദം ടീച്ചര്‍ ആദ്യം ചാര്‍ട്ടിലും പിന്നെ ബോര്‍ഡിലും ഘടന പറഞ്ഞു എഴുതേണ്ടതുണ്ട്. തുടര്‍ന്ന് കുട്ടികള്‍ പാഠപുസ്തകത്തില്‍ അടുപ്പിലെ പാത്രത്തിന്റെ ചിത്രത്തിനടുത്തായി പ്രഥമന്‍ എന്ന് എഴുതണം .

പിന്തുണനടത്തവും ആവശ്യമെങ്കില്‍ കട്ടിക്കെഴുത്തും നടത്തണം .

ഈ പാഠത്തിൽ പരിചയപ്പെടുത്തിയ ദ, ധ, ഥ, ബ , ഉ , ഏ എന്നീ അക്ഷരങ്ങൾക്ക് പുനരനുഭവം വരുന്ന വിധത്തിൽ കഥാ സംഭവങ്ങളെ കുട്ടിയുടെ പങ്കാളിത്തത്തോടെ വികസിപ്പിക്കുന്നത് ഗുണകരമാണ്.

രചനോത്സവത്തിലേക്ക്

ചിത്ര സന്ദർഭത്തെ അടിസ്ഥാനമാക്കി ചോദ്യങ്ങൾ ചോദിക്കുന്നു

• ചിത്രത്തിൽ എന്താണ് സംഭവിക്കുന്നത്/ ആരാണിവർ?

• ഇതിനു മുമ്പ് എന്തായിരിക്കാം സംഭവിച്ചത്?

• എവിടെ എപ്പോഴാണ് സംഭവം നടക്കുന്നത്?

• ഇതിനു ശേഷം എന്താകാം സംഭവിക്കുക? ( ഇടതുപേജിലെ ചിത്രവും പരിഗണിച്ച് ചിന്തിക്കാം. ഉറുമ്പിനെയും കഥാപാത്രമാക്കാം. )

കുട്ടികളുടെ പ്രതികരണങ്ങൾ പദസൂര്യനായി രേഖപ്പെടുത്തല്‍

കാക്ക പ്രഥമന്‍ വെച്ചു. പിന്നെന്താണ് സംഭവിച്ചത്?

• വ്യക്തിഗതമായി ആലോചിക്കുന്നു.

• പഠനക്കൂട്ടത്തില്‍ ആശയം പങ്കിടുന്നു

• കുട്ടികൾ വ്യക്തിഗതമായി കഥ എഴുതുന്നു. പാഠപുസ്തകം പേജ് 51 .

• പിന്തുണ നടത്തം. എഴുതാന്‍ സഹായ സൂചനകള്‍ നല്‍കാം പ്രശ്നം നേരിടുന്നവര്‍ ഉണ്ടെങ്കില്‍ പങ്കാളിത്തയെഴുത്ത് നടത്താവുന്നതാണ് .

അലോകയ്ക്ക് കഥ പറയാനും സംയുക്തയെഴുത്തിനും അവസരം നൽകുന്നു.

അംഗീകാരം നൽകൽ.

അവതരണം.

പ്രതിദിന വായനപാഠം

• കുട്ടികളെഴുതിയ ഒരു കഥ ടൈപ്പ് ചെയ്ത് വായനസാമഗ്രിയാക്കി നല്‍കാം.

പ്രതീക്ഷിത ഉല്‍പ്പന്നം : കുട്ടികള്‍ കഥ അവതരിപ്പിക്കുന്ന വീഡിയോ

വിലയിരുത്തല്‍ :

കുട്ടികള്‍ക്ക് പദസൂര്യന്‍ ഉപയോഗപ്പെടുത്തി വാക്യങ്ങള്‍ എഴുതാന്‍ കഴിയുന്നുണ്ടോ? കുട്ടികള്‍ എഴുത്തില്‍ നേരിടുന്ന പ്രശ്നങ്ങള്‍ എന്തെല്ലാമാണ്?

ഥ തിരിച്ചറിഞ്ഞു വായിക്കാനും ഘടന പറഞ്ഞെഴുതാനും കുട്ടികൾക്ക് കഴിയുന്നുണ്ടോ?

തുടര്‍ പ്രവര്‍ത്തനം

പ്രവര്‍ത്തന 30 : ചിത്ര പുസ്തകം

പഠനലക്ഷ്യങ്ങള്‍ :

• ചിത്രസൂചനകളിൽ നിന്നും കഥ വികസിപ്പിച്ചെഴുതി പങ്കിടുന്നു. സ്വന്തം കഥകൾക്ക് ചിത്രീകരണം നടത്തുന്നു

പ്രതീക്ഷിതസമയം : 40 മിനിട്ട്

കരുതേണ്ട സാമഗ്രികള്‍ : A4പേപ്പർ , ക്രയോണ്‍സ്

പ്രക്രിയാവിശദാംശങ്ങള്‍

രചനോത്സവം ഘട്ടം 2

ലക്ഷ്യം-ഒരു ചെറു സചിത്രബാലസാഹിത്യകൃതി ഓരോ കുട്ടിക്കും

കഥയെഴുതാം

മൂന്ന് പേര് വീതമുള്ള ഗ്രൂപ്പാകുന്നു ( ഓരോ ഗ്രൂപ്പിലും തനിയെ തെറ്റ് കൂടാതെ എഴുതാന്‍ കഴിയുന്ന ഒരാള്‍ ഉണ്ടെന്ന് ഉറപ്പാക്കണം). വാട്സാപ്പ് ഗ്രൂപ്പില്‍ കഥാചിത്രങ്ങള്‍ നല്‍കുന്നു. മുയലും തത്തകളും.

നിര്‍ദ്ദേശങ്ങള്‍

• ചിത്രങ്ങള്‍ പഠനക്കൂട്ടത്തില്‍ വിശകലനം ചെയ്യണം. ( ആദ്യം എല്ലാ ചിത്രങ്ങളും നോക്കണം. എന്നിട്ട് ഒന്നാം ചിത്രം എടുക്കണം. അതിലെ സംഭവവും സംഭാഷണവും ഊഹിക്കണം. ഉദാഹരണം മുയല്‍ എന്തായിരിക്കും തത്തകളോട് പറഞ്ഞത്? തത്തകള്‍ എന്തായിരിക്കും മറുപടി പറഞ്ഞത്?)

• ഇങ്ങനെ ഓരോ ചിത്രവുമെടുത്ത് കഥ വികസിപ്പിക്കണം.

• ഓരോ ചിത്രത്തിലും വരേണ്ട ആശയങ്ങള്‍ തീരുമാനിക്കണം.

• (ഫോട്ടോ കോപ്പി നല്‍കുന്നില്ലെങ്കില്‍ ചിത്രം വരച്ച് എഴുതണം. ഭംഗി പ്രശ്നമല്ല.) ചിത്രത്തിനുള്ളില്‍ സംഭാഷണം എഴുതാം. ചിത്രത്തിന് താഴെ കഥയും എഴുതാം. ഓരോ ചിത്രത്തിനും വേണ്ട വാക്യങ്ങളാണ് അടിയില്‍ എഴുതേണ്ടത്.

• വ്യക്തിഗതമായി കഥ എഴുതണം. പേപ്പറിന്റെ ഒരു വശത്ത് മാത്രമേ എഴുതാവൂ. രണ്ട് ഷീറ്റ് പേപ്പര്‍ ഉപയോഗിക്കാം. ( ആവശ്യമെങ്കില്‍)

• ആര്‍ക്കെങ്കിലും ഏതെങ്കിലും വാക്ക് എഴുതാന്‍ സഹായം ആവശ്യമുണ്ടെങ്കില്‍ അത് കൂട്ടുകാരോട് ചോദിക്കാം.

• ടീച്ചറെ വിളിക്കാം ( വോയിസ് ടൈപ്പിംഗ് രീതിയില്‍ ടീച്ചര്‍ സഹായിക്കണം)

ഗ്രൂപ്പില്‍ രചന

• ടീച്ചറുടെ പിന്തുണനടത്തം- സഹായം വേണ്ടവരെ സഹായിക്കല്‍.

• എല്ലാവരും എഴുതിയ ശേഷം സാവധാനം വായിച്ചുനോക്കണം. അവരവര്‍ എഴുതിയതില്‍ എന്തെങ്കിലും തെറ്റുകള്‍ വന്നിട്ടുണ്ടോ എന്ന്. പെറുക്കി വായിക്കുന്ന രീതി പരിചയപ്പെടുത്തണം.

പ്രദര്‍ശനവും വിലയിരുത്തലും

• ക്ലാസില്‍ നിശ്ചിത സ്ഥലത്ത് പ്രദര്‍ശിപ്പിക്കുന്നു. ഒരു ഗ്രൂപ്പ് എഴുതിയത് അടുത്തടുത്ത് പ്രദര്‍ശിപ്പിക്കണം.

• എല്ലാവരും പോയി വായിക്കണം. പെന്‍സില്‍ കരുതണം.

• ഏതെങ്കിലും രചനയില്‍ അക്ഷരമോ, ചിഹ്നമോ ശരിയായി ചേര്‍ത്തിട്ടില്ലെങ്കില്‍ ആ വാക്കിന് പെന്‍സില്‍ വച്ച് വട്ടമിടണം.

സ്വന്തം രചന മെച്ചപ്പെടുത്തല്‍

• രചിയിതാവ് മറ്റുള്ളവരുടെ സഹായത്തോടെ തിരുത്തണം.

1. ചിത്രകഥാപുസ്തകത്തിലേക്ക്

2. രണ്ട് എഫോര്‍ ഷീറ്റ് നടുവെ മടക്കി സ്റ്റാപ്ലറടിച്ച് നല്‍കുക

3. പേജ് നമ്പറിടുക ( എട്ട് പേജുകള്‍)

4. നിര്‍ദ്ദേശങ്ങള്‍ നല്‍കുക

• പേജ് ഒന്ന്- കവര്‍ . ഒരു കവർ ചിത്രം വരപ്പിക്കുക (കുട്ടി) കഥയുടെ പേരും എഴുതിയ ആളുടെ പേരും ചേര്‍ക്കുക

• പേജ് രണ്ട് ചിത്രകഥ ഉണ്ടാക്കിയ രീതി എഴുതുക

• പേജ് മൂന്ന്. കഥയുടെ പേരും രചയിതാവിന്റെ പേരും സ്കൂളും വര്‍ഷവും

• പേജ് നാല് ആദ്യ ചിത്രം പേജിന്റെ പകുതിക്ക് മുകളില്‍ ചിത്രം താഴെ വിവരണം, ആ ചിത്രവുമായി ബന്ധപ്പെട്ട കഥാഭാഗം എഴുതുക

• പേജ് അഞ്ച് രണ്ടാം ചിത്രം. പേജിന്റെ പകുതിക്ക് മുകളില്‍ ചിത്രം താഴെ വിവരണം

• പേജ് ആറ് മൂന്നാം ചിത്രം. പേജിന്റെ പകുതിക്ക് മുകളില്‍ ചിത്രം താഴെ വിവരണം

• പേജ് ഏഴ് നാല് ചിത്രം. പേജിന്റെ പകുതിക്ക് മുകളില്‍ ചിത്രം താഴെ വിവരണം

• പേജ് എട്ട്( പിന്‍കവര്‍) രചയിതാവിന്റെ ഫോട്ടോയും രചയിതാവിനെക്കുറിച്ചുള്ള ചെറുവിവരണവും

ക്രയോണ്‍സ് ഉപയോഗിച്ച് നിറം കൊടുക്കുക (കുട്ടി) ഈ പ്രവർത്തനത്തിന്റെ ഒന്ന് രണ്ട് പേജുകള്‍ ക്ലാസ്സില്‍ ചെയ്തശേഷം ബാക്കി കുട്ടിക്ക് വീട്ടില്‍ വച്ചു ചെയ്യാനായി നല്‍കാവുന്നതാണ്

ഇവയെല്ലാം സ്കാൻ ചെയ്യല്‍.(ആവശ്യമെങ്കിൽ ഇമേജ് എഡിറ്ററിൽ പോയി കഥാ ഭാഗം ടൈപ്പ് ചെയ്യാം)

PDF ആക്കല്‍

പ്രകാശനം നടത്തല്‍. (ഡിജിറ്റല്‍ കോപ്പി) എ ത്രിയില്‍ പ്രിന്റെടുത്ത് പുസ്തകരൂപത്തിലും പ്രകാശിപ്പിക്കാം.

ഓരോ ആഴ്ചയിലും ഓരോ കുട്ടിയുടെ വീതം പ്രകാശനം.

പ്രതീക്ഷിത ഉൽപ്പന്നം : ചിത്ര പുസ്തകം

വിലയിരുത്തൽ :

• കഥയ്ക്ക് അനുയോജ്യമായ ചിത്രങ്ങള്‍ വരയ്ക്കാന്‍ എല്ലാ കുട്ടികള്‍ക്കും കഴിഞ്ഞോ?

• കുട്ടികള്‍ വരച്ച ചിത്രങ്ങളെ വ്യഖ്യാനിക്കാന്‍ അവര്‍ക്ക് അവസരം നല്‍കിയോ?

• ആവശ്യമായ സാമഗ്രികള്‍ ലഭ്യമാക്കിയോ?

• കുട്ടികളുടെ പേര് കവറില്‍ എഴുതിയോ?

അനുബന്ധം 1